မကွေး၊ မေ ၁၂၊ ၂၀၂၃။
မကွေးတိုင်း၊ ဂန့်ဂေါမြို့နယ်၊ တောင်ခရမ်းကျေးရွာ ရဲစခန်းမှာ တာဝန်ကျနေတဲ့ စစ်ထောက်လှမ်းရေး ဒုအရာခံဗိုလ်တဦး မေလ ၁၁ ရက် မနက်၈နာရီကျော်က သေနတ်ပစ်ခံရပြီး သေဆုံးခဲ့တယ်လို့ PDF တာဝန်ရှိသူက ပြောပါတယ်။
သေဆုံးခဲ့သူမှာ ဒုအရာခံဗိုလ်သိန်းဇော် ဖြစ်ပြီး လက်ဖက်ရည်ဆိုင်ကနေ ရဲစခန်းကိုဆိုင်ကယ်စီးပြန်လာချိန် ရဲစခန်းနဲ့မီတာ၂၀၀ အကွာအရောက်မှာ မြို့နယ်ပကဖတပ်ဖွဲ့တွေက သေနတ်နဲ့ ၇ ချက်ပစ်ခတ်ခဲ့တာဖြစ်တယ်လို့ ဂန့်ဂေါခရိုင်အမှတ် (၁) တပ်ရင်းမှ တာဝန်ရှိသူတဦး ကပြောပါတယ်။
“သိန်းဇော်က ပွဲချင်းပြီးသေတယ်။ သူစီးလာတဲ့ ဆိုင်ကယ်ကိုသိမ်းယူခဲ့တယ်။ သူကရွာကပြည်သူတွေကို ငွေညစ်တာတွေလုပ်တယ်။ ပြီးတော့ သူတို့အချင်းချင်းလည်း မတည့်ကြဘူး။ အဲဒါကို အတွင်းကသတင်းပေးလို့ ပကဖတွေကသွားပြီး ရှင်းလင်းခဲ့တာပါ။ သူ့ဆီမှာလက်နက်ကတော့ မပါလို့မရခဲ့ဘူးဗျ” လို့ ဆိုပါတယ်။
ဒုအရာခံဗိုလ်သိန်းဇော်ရဲ့အလောင်းကိုတော့ ပစ်ခတ်ခံရတဲ့နေ့၊ နေ့လည် ၃ နာရီကျော် မီးသင်္ဂြိုလ်နေတုန်းမှာ ဂန့်ဂေါမြို့နယ်ပကဖတပ်ဖွဲ့တွေက လက်နက်ကြီးတွေနဲ့ ပစ်ခတ်ခဲ့လို့အလောင်းကို မီးမလောင်ကျွမ်းသေးဘဲထားကာ ထွက်ပြေးသွားခဲ့ကြတယ်လို့ ပြောပါတယ်။
သိန်းဇော်ပစ်ခတ်ခံရပြီးနောက် တောင်ခရမ်းကျေးရွာက အသက် ၃၀ ကျော်အရွယ် အထည်ချုပ်အမျိုးသမီးတဦးနဲ့ အမျိုးသားတဦးတို့ ဖမ်းဆီးခံရပြီး ယနေ့ မေလ ၁၂ ရက်အထိပြန်မလွတ်သေးဘဲ ရဲစခန်းထဲမှာပဲ စစ်ဆေးခံနေရတယ်လို့ သိရပါတယ်။
စာတည်း-007