ရွှေဘို၊ ဧပြီ ၃၀၊ ၂၀၂၅ ။

စစ်ကိုင်းတိုင်း၊ ရွှေဘိုမြို့နယ်၊ ကွေ့တက်ကြီးကျေးရွာမှာ နေအိမ်ထဲ ဒရုန်းဗုံးကျပေါက်ကွဲလို့ မိသားစုဝင် ၃ ဦးဒဏ်ရာရခဲ့တယ်လို့ ရွှေဘိုမြို့နယ်ပကဖထံက သိရပါတယ်။

ဧပြီ ၂၈ ရက် မနက် ၁၀ နာရီခန့်မှာ အဆိုပါကျေးရွာနဲ့ ၂ မိုင်ခန့်အကွာ မခေါက်ကျေးရွာမှာတပ်စွဲထားတဲ့ စစ်ကောင်စီတပ်နဲ့ပျူစောထီးတပ်ဖွဲ့ဝင်တွေက ကွေ့တက်ကြီးရွာကို ဒရုန်းနဲ့ ဗုံး ၁ လုံးချခဲ့ရာ ရွာခံ ဦးဘိုကြည် နေအိမ်ခြံဝန်းအတွင်း ကျရောက်ပေါက်ကွဲခဲ့တာလို့ ဆိုပါတယ်။

“ အဲ့ဒီ(မခေါက်)ရွာက ဒရုန်းတက်လာတာကို ဒေသခံတွေက မြင်လိုက်တယ်” လို့ မျက်မြင်ဒေသခံတွေရဲ့ ပြောပြချက်ကို ရွှေဘိုမြို့နယ်ပကဖတာဝန်ခံက ပြောပါတယ်။

ဒရုန်းဗုံးပေါက်ကွဲတာကြောင့် အသက် ၅၉ နှစ်အရွယ် ဦးဘိုကြည်မှာ ဝမ်းဗိုက်ဗုံးစမှန်၊ သားဖြစ်သူ အသက် ၁၆ နှစ်အရွယ် မောင်တရုတ်မှာ ညာဘက်ဒူးဗုံးစဖောက်ဝင်၊ တူမဖြစ်သူ အသက် ၂၂ နှစ်အရွယ် မငြိမ်းသဇင်ကျော်မှာ တင်ပါးဗုံးစမှန်ဒဏ်ရာ(မစိုးရိမ်ရ)တွေ အသီးသီးရရှိခဲ့တာကြောင့် နီးစပ်ရာဆေးခန်းမှာ ဆေးကုသမှုခံယူနေရပါတယ်။

” တိုက်ပွဲလည်းမရှိဘဲနဲ့ ပြည်သူကို ရည်ရွယ်ချက်ရှိရှိနဲ့ လာတိုက်ခိုက်တဲ့သဘောပါ” လို့ ရွှေဘိုမြို့နယ်ပကဖတာဝန်ခံက ပြောပါတယ်။

မခေါက်ကျေးရွာမှာ စစ်ကောင်စီတပ်လက်အောက်ပြည်သူ့စစ်(ပျူစောထီး)အင်အား ၄၀ ခန့်နဲ့ စစ်ကောင်စီတပ်ဖွဲ့ဝင် ၇ ဦးခန့် တပ်စွဲထားပြီး ယခင်ကလည်း ကွေ့တက်ကြီးကျေးရွာကို ဒရုန်းဗုံးချတိုက်ခိုက်မှုတွေ ရှိခဲ့တယ်လို့ ဆိုပါတယ်။

မတ် ၂၅ ရက်ကလည်း ရွှေဘိုမြို့၊ အမှတ် ၁ ရပ်ကွက်ရှိ အောင်ဇေယျစျေးထဲ စစ်တပ်ပစ်တဲ့ လက်နက်ကြီးကျလို့ ကလေးငယ်အပါအဝင် ၅ ဦးဒဏ်ရာရတယ်လို့ သိရပါတယ်။

ပုံစာ – စစ်ကောင်စီတပ်ဖွဲ့ ဒရုန်းအသုံးပြု လေ့ကျင့်နေ့စဉ်။ (Photo – PCT News)

စာတည်း – ဟိန်းစံ

စစ်ကိုင်း၊ ဒီဇင်ဘာ ၂၈၊ ၂၀၂၂။

စစ်ကိုင်းတိုင်း၊ အရာဝောာ်မြို့နယ်ထဲက စစ်ကောင်စီတပ်စခန်းနဲ့ ရဲစခန်းတွေပေါ်ကို ဒရုန်းအသုံးပြုပြီးတော့ ဖရဲသီးတွေကို ဆုငွေနဲ့အကျိုးခံစားခွင့်တွေ ပြန်လည်ချီးမြှင့်မယ့်အကြောင်းအရာတွေပါတဲ့ စာစောင်တွေကို ကျဲချခဲ့တယ်လို့ အရာတော်မြို့နယ်ပြည်သူ့ကာကွယ်ရေးအဖွဲ့ကတဆင့် သိရပါတယ်။

ဒီဇင်ဘာလ ၂၇ ရက်မနေ့က ညနေ ၅ နာရီခွဲလောက်မှာ အမျိုးသားညီညွတ်ရေးအစိုးရ – NUG ကာကွယ်ရေးဝန်ကြီးဌာနရဲ့ညွှန်ကြားချက်အတိုင်း ကြဲခဲ့တာလို့ အရာတော်မြို့နယ်ပြည်သူ့ကာကွယ်ရေးအဖွဲ့မှ ပြန်ကြားရေးတာဝန်ခံကပြောပါတယ်။

“အမြန်လုပ်ပြီးဆုတ်ခွာခဲ့ရတာမို့ အဓိကမြို့ပေါ်တဝိုက်ရယ်၊ သူတို့တပ်စွဲထားတဲ့ အဓိကနေရာတွေကို ကျနော်တို့ကျဲခဲ့တာပါ၊ ဒါနဲ့ဆို ၃ကြိမ်မြောက်ပါ၊ ဝန်ကြီးဌာနကနေ ပြည်သူ့ဘက်ကိုရပ်တည်လိုတဲ့စစ်သားတွေကို စည်းရုံးတဲ့စာတွေဖြန့်တာပါ”လို့ ပြောပါတယ်။

ပြီးခဲ့တဲ့နှစ် ဇွန်လပိုင်းကလည်း အရှေ့တပ်လို့ခေါ်တဲ့ အရာတော် စခတ ၁၀ ရဲ့အပေါ်မှာ အလားတူစာစောင်တွေကို ပထမဆုံးအကြိမ်ကျဲခဲ့ပြီး၊ ၂၀၂၂ခုနှစ် ဧပြီလပိုင်းလောက်ကလည်း ဝန်ကြီးဌာနရဲ့လမ်းညွှန်မှုနဲ့ ဒုတိယအကြိမ်လုပ်ဆောင်ခဲ့ကာ၊ ခုတခါနဲ့ဆို ၃ ကြိမ်မြောက်ရှိပြီလို့ ဆိုပါတယ်။

အဆိုပါ ပန်းဖလပ်စာစောင်ထဲမှာ အမာခံသတင်းပေး(ဖရဲသီး)လုပ်မယ်ဆိုရင် သတင်းအချက်အလက်ပေါ်မူတည်ပြီး ဆုငွေပြန်လည်ချီးမြှင့်မှာဖြစ်သလို ကာကွယ်ရေးဝန်ကြီးဌာနရဲ့ ကာကွယ်ပေးမှုအာမခံချက်ကိုလည်း ခံစားရမယ်ဆိုတဲ့အချက်တွေအပြင် တခြားအချက်များစွာလည်း ပါဝင်ပါသေးတယ်။

စစ်ကိုင်း၊ ဒီဇင်ဘာ ၂၇၊ ၂၀၂၂။

စစ်ကိုင်း၊ ရွှေဘိုမြိုနယ်က စပါးခင်းတွေကို ခိုးရိတ်နေတဲ့ပျူစောထီးတွေကို ဒီဇင်ဘာလ ၂၆ ရက်နေ့လယ်က ဒရုန်းနဲ့တိုက်ခိုက်ခဲ့တယ်လို့ Shwebo Federal Army(SBFA) ကသတင်းထုတ်ပြန်ထားပါတယ်။

စပါးခင်းတွေကိုခိုးရိတ်နေချိန် နေ့လယ် ၁၁ နာရီခွဲလောက်မှာ ဒရုန်းနဲ့တိုက်ခိုက်ခဲ့လို့ အများအပြားဒဏ်ရာရရှိသွားတယ်လို့ ဆိုပါတယ်။

“ရွာသာရွာကျေးရွာကပျူရွာတွေဗျ၊ သူတို့ကကောက်ရိတ်စက်နဲ့ အနီးနားက စပါးခင်းတွေကို ပျူအင်အားအများအပြားနဲ့ခိုးရိတ်နေတာကို ဒရုန်း ၂ လုံးနဲ့တိုက်ခိုက်ခဲ့တာပါ” လို့ SBFA ရဲ့ တာဝန်ခံကပြောပါတယ်။

ပြည်သူပိုင်စပါးခင်းတွေကို ခိုးယူနေတာကြောင့် အကာအကွယ်ပေးတဲ့အနေနဲ့ တိုက်ခိုက်ခဲ့တာဖြစ်တယ်လို့ သူကဆက်ပြောပါတယ်။

အဲဒီတိုက်ခိုက်မှုမှာ ShweBo Federal Army – SBFA အဖွဲ့၊ တိုက်နယ် ၂ ညီနောင်များ၊ မဟာမိတ်ဖြစ်တဲ့ဝက်လက်မြို့နယ် GHOST RIDER အဖွဲ့ ၊တိုက်နယ် ၅ နယ်မြေခံရဲဘော် အင်အားစုတွေက ပူးပေါင်းခဲ့တယ်လို့ သိရပါတယ်။

ပြီးခဲ့တဲ့ ဒီဇင်ဘာလ ၂၄ ရက်ကလည်း SBFAနဲ့ ပူးပေါင်းအဖွဲ့တွေဟာ သီးလုံးရွာနဲ့ တည်သီးတောကျေးရွာက ပျူစောထီးတွေကို စစ်ကြောင်းနှစ်ကြောင်းခွဲကာတိုက်ခိုက်ခဲ့လို့ အနည်းဆုံးပျူစောထီးတဦး သေဆုံးခဲ့ပါသေးတယ်။

စစ်ကိုင်း၊ ဒီဇင်ဘာ ၂၄၊ ၂၀၂၂။

စစ်ကိုင်းတိုင်း၊ ရွှေဘိုမြို့နယ်၊ မြင်းစီးရွာက ပြည်သူပိုင်စပါးတွေကို ခိုးရိတ်နေတဲ့ စစ်ကောင်စီတပ်သားတွေနဲ့ ပျူစောထီးတွေကို ဒီဇင်ဘာလ ၂၄ ရက်ဒီနေ့မနက် ၁၁ နာရီလောက်မှာ ဗုံးကြဲတိုက်ခိုက်ခဲ့ပါတယ်။

မြင်းစီးရွာက ပျူစောထီးတွေနဲ့ စစ်ကောင်စီတပ်သား စုစုပေါင်းအင်အား ၁၅ ဦးလောက်ကို သေနတ်နဲ့အရင်ပစ်ခတ်ပြီးမှ ဒရုန်းသုံးပြီး ဗုံးသီး ၃ လုံးနဲ့ပစ်ချတိုက်ခိုက်ခဲ့တာလို့ FIRE Dragon (KU) တာဝန်ခံ ဗိုလ်ထူးက ပြောပါတယ်။

“အင်အားကတော့ ကင်းဝတ်နေတာရောဆိုရင် ၁၅ ကောင်လောက်ရှိတယ်။ ၁၁ နာရီကျော်လောက်မှာ ဗုံးသီး ၃ လုံး ချခဲ့တယ်။ အသေအပျောက်စာရင်းကတော့ နယ်မြေခံတွေပြောမှသိရမှာဖြစ်လို့ မသိရသေးပါဘူး။ ဗုံးမချခင်မှာ ၇ မိနစ်ခန့် အပြန်အလှန်ပစ်ခတ်မှု ဖြစ်ခဲ့သေးတယ်” လို့ ပြောပါတယ်။

အဲ့ဒီစစ်ကောင်စီတပ်တွေဘက်က လက်နက်ကြီးတွေနဲ့ ပြန်လည်ပစ်ခတ်ခဲ့ပေမယ့် ကာကွယ်ရေးရဲဘော်တွေ အထိခိုက်မရှိခဲ့ဘူးလို့လည်း ဆိုပါတယ်။

FIRE Dragon (KU)၊ Northern Tigers Group (NTG)၊ D.U.G.F (KU Dragon)၊ Wolf Guerrilla (Ye-U)နဲ့ နယ်မြေခံ ကာကွယ်ရေးအဖွဲ့တွေက တိုက်ခိုက်ခဲ့တာဖြစ်ပြီး၊ ပြီးခဲ့တဲ့ ဒီဇင်ဘာလ ၃ ရက်ကလည်း ရွှေဘိုမြို့နယ်၊ ထညှင်းကုန်းရွာကနေအိမ်တွေကိုမီးဝင်ရှို့တဲ့ စစ်သားနဲ့ပျူစောထီးတွေကို FIRE Dragon (KU) အဖွဲ့က ဒရုန်းနဲ့ဗုံးကြဲတိုက်ခိုက်ခဲ့ရာ စစ်ကောင်စီဘက်က ၅ ဦးခန့် သေဆုံးခဲ့ပါသေးတယ်။

စစ်ကိုင်း၊ ဒီဇင်ဘာ ၂၃၊ ၂၀၂၂။

စစ်ကိုင်းတိုင်း၊ မြောင်မြို့နယ်၊ ညောင်ကားယားကျေးရွာထဲကို စစ်ကောင်စီက ဒရုန်းနဲ့ အီနာဂါတွေကြဲချခဲ့လို့ လူနေအိမ်တချို့ပေါ်ကျရောက်ပေါက်ကွဲခဲ့ပြီး အိမ်ထဲမှာရှိတဲ့သူတွေ ထိမှန်ခဲ့သလို ကလေးတဦးလည်းသေဆုံးခဲ့တယ်လို့ သိရပါတယ်။

ဒီဇင်ဘာလ ၂၃ ရက်ဒီကနေ့မနက် ၁၀ နာရီက ဧရာဝတီမြစ်အရှေ့ဘက်ကမ်းမှာရှိတဲ့ ကိုင်းကျေးရွာကနေ ‌မြစ်အနောက်ဖက်ကမ်းက ညောင်ကားယားရွာထဲကို ၆၀ မမ ၃လုံးတွဲ ၂ခါကြဲခဲ့တာဖြစ်ပြီး တလုံးကတော့ နေအိမ်ထဲမှာရှိနေတဲ့ မြေးအဖွား၂ယောက်ရှေ့ကို ကျကာပေါက်ကွဲခဲ့တယ်လို့ ဆိုပါတယ်။

“ကလေးကတော့ နောက်စေ့နဲ့ခေါင်းတွေမှန်တာ၊ အဖွားကလည်း တော်တော်လေးတော့ ကုရမယ့်အနေထားမှာရှိတယ်၊ တချို့ကကျောတွေ၊ ပေါင်တွေ၊ ရင်ဘတ်တွေ နံပိုင်းတွေ အစမှန်ဒဏ်ရာရတယ်၊ အီနာဂါက ခဏခဏလာလာချတယ်၊ နဂါးပေါက်ရွာကိုချတာတောင်မှ ၃ကြိမ်ရှိသွားပြီ။” လို့ CDSOM အဖွဲ့တာဝန်ခံကပြောပါတယ်။

ပေါက်ကွဲမှုကြောင့် ၄ နှစ်အရွယ်ကလေးငယ်တဦး သေဆုံးခဲ့ပြီး၊ ၁၆ နှစ်အရွယ် လူငယ်တဦးနဲ့ အမျိုးသမီး ၅ဦးထိမှန်ခဲ့ကာ၊ အသက် ၆၀အရွယ် အဖွားနဲ့ ၁၆နှစ်ရွယ်လူငယ်တဦးက ဒဏ်ရာတွေများတဲ့အတွက် စောင့်ကြည့်ကုသပေးရမယ့် အခြေနေမှာရှိတယ်လို့ ဆိုပါတယ်။

ဧရာဝတီမြစ် အရှေ့ဘက်ကမ်းကရွာတိုင်းနီးပါးမှာ စစ်တပ်အထိုင်စခန်းတွေရှိပြီး အဆိုပါစခန်းတွေကနေ ကျေးရွာပြည်သူတွေဆီကို မကြာခဏဆိုသလို အီနာဂါဗုံးသီးတွေ လာကြဲလေ့ရှိကာ ပထမအကြိမ်တွေတုန်းက အနည်းငယ်ထိခိုက်တာမျိုးရှိပေမယ့် ခုတကြိမ်ကတော့ လူသေတဲ့ထိ အဆိုးရွားဆုံးဖြစ်တယ်လို့ သိရပါတယ်။