ဒဏ်ရာပြင်းထန်

မြေလတ်အသံ၊ ဇွန် ၁၆၊ ၂၀၂၅။

မန္တလေး၊ အိုးဘိုထောင်ဗူးဝမှာ ထောင်အာဏာပိုင်တွေ ရိုက်နှက်မှုကြောင့် ဒဏ်ရာပြင်းထန်ရရှိခဲ့တဲ့ ကိုဝေမိုးနိုင်အပါအဝင် နိုင်ငံရေးအကျဥ်းသား ၅၀ ဦး ဆေးကုသခွင့်လုံးဝမရရှိကြဘူးလို့ မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ရက် – PPNM ဆီကသိရပါတယ်။

အဆိုပါ နိုင်ငံရေးအကျဥ်းသားတွေဟာ မုံရွာထောင်ကနေ ပြောင်းရွေ့ခံရပြီး ဇွန် ၁၂ ရက်မှာ အိုးဘိုထောင်ကိုရောက်ရှိချိန် ထောင်အာဏာပိုင်တွေက နံပါတ်တုတ်တွေကျိုးကျတဲ့အထိ ရိုက်နှက်ခဲ့တာလို့ဆိုပါတယ်။

“ရိုက်တဲ့ဟာကလည်း စနစ်တကျကို ရည်ရွယ်ချက်ရှိရှိနဲ့ ထောင်ဝင်မှာဦးကျိုးအောင်လို့ ရိုက်တဲ့ကိစ္စရပ်ဖြစ်တဲ့အတွက် ဆေးဝါးစောင့်ရှောက်မှုကတော့ မရရှိဘူး။ ဒီလိုဖြစ်အောင်ကို သေချာရိုက်တဲ့အတွက် ဆေးဝါးကုသဖို့ဆိုတာ အခက်အခဲအများကြီးပဲ ကျနော်တို့နိုင်/ကျဥ်းတွေ အတွက်ရှိပါတယ်”လို့ PPNMမှ ဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ရိုက်နှက်ခံရတဲ့ နိုင်ငံရေးအကျဥ်းသား ၅၀ ဦးမှာ ဦးခေါင်းပေါက်ပြဲဒဏ်ရာနဲ့ ခန္ဓာကိုယ်မှာ ဒဏ်ရာအသီးသီးရရှိခဲ့ကြပေမယ့် ဇွန် ၁၆ ရက်ဒီကနေ့အချိန်ထိ ဆေးကုသခွင့်မရရှိခဲ့ကြဘူးလို့ သူကဆိုပါတယ်။

ပြီးခဲ့တဲ့ဇွန် ၁၂ ရက်မနက် ၅ နာရီကျော်မှာမုံရွာထောင်ကနေ နိုင်ငံရေးအကျဥ်းသား ၁၀၀ ခန့်နဲ့ ရာဇဝတ်မှုကြောင့် အကျဥ်းကျနေတဲ့ အကျဥ်းသား ၁၀၀ ခန့်တို့ဟာ အနောက်မြောက်တိုင်းစစ်ဌာနချုပ်က သံပြားကာကား ၂ စီး၊ အိမ်စီးကား ၃ စီး၊ ဆယ့်နှစ်ဘီးကား ၆ စီးတို့နဲ့ အိုးဘိုထောင်ကိုပို့ ဆောင်ခံလိုက်ရတာလို့ PPNM ကထုတ်ပြန်ထားပါတယ်။

အိုးဘိုထောင်ကနေတဆင့် နိုင်ငံရေးအကျဥ်းသားတချို့နဲ့ ရာဇဝတ်မှုကြောင့်ကျခံနေရတဲ့ အကျဥ်းသားတချို့တို့ကို ဇွန် ၁၃ ရက်မှာ မြင်းခြံထောင်နဲ့ မ‌ကွေးထောင်တွေဆီ အသီးသီးပို့ဆောင်ခံလိုက်ရတယ်လည်း သိရပါတယ်။

ပြီးခဲ့တဲ့ဧပြီ ၁၃ ရက်လည်း မကွေးထောင်ရှိ ထောင်အာဏာပိုင်တွေက နိုင်ငံရေးအကျဉ်းသား ၄၀ ကျော်ကို မြေမြင်ပေါ်မှာဝမ်းလျားမှောက်ခိုင်းကာ ရိုက်နှက်ခဲ့တာကြောင့် နိုင်/ကျဥ်းတွေမှာ ခါး၊ ခြေထောက်နဲ့ တင်ပါးတွေမှာ ဒဏ်ရာအသီးသီးရရှိခဲ့ကြပေမယ့် ဆေးဝါးကုသခွင့်မရရှိခဲ့ကြဘူးလို့ သိရပါတယ်။

စာတည်း – လင်း

စစ်ကိုင်း၊ မေ ၂၄၊ ၂၀၂၃။

စစ်ကိုင်းတိုင်း၊ ဝက်လက်မြို့ပေါ်မှာ ကင်းပတ်နေကြတဲ့ စစ်ကောင်စီတပ်သားတွေ မေလ ၂၄ ရက် ဒီကနေ့ မနက် ၁၁ နာရီကျော်မှာ တိုက်ခိုက်ခံရတာကြောင့် စစ်ကောင်စီတပ်အရာရှိတဦး ဒဏ်ရာပြင်းထန်စွာရရှိခဲ့တယ်လို့ ဒေသကာကွယ်ရေးတပ်ဖွဲ့ဝင်တွေဆီက သိရပါတယ်။

ကား ၁ စီး၊ ဆိုင်ကယ် ၂ စီး စီးနင်းပြီး အင်အား ၁၀ ဦးကျော်နဲ့ ပတ်ကင်းပတ်နေတဲ့စစ်အုပ်စုကို ဝက်လက်မြို့၊ စတားလမ်းကွေ့အရောက်မှာ တောကြီးမြွေပွေးအဖွဲ့က မိုင်းဆွဲတိုက်ခိုက်ခဲ့တာလို့ ရွှေဘိုခရိုင်တပ်ရင်း(၂)မှ တာဝန်ရှိသူတဦးက မြေလတ်အသံကို ပြောပါတယ်။

“ဗိုလ်မှာ ဒဏ်ရာရသွားတာက ခြေသလုံးကြွက်သားတွေ ပွင့်ထွက်သွားတာ။သူဒဏ်ရာရတာကို မျက်မြင် တွေ့သူတွေနဲ့ဖရဲသီးတွေရဲ့ပြောကြားချက်အရအတည်ပြုနိုင်ခဲ့တာ။ ဗိုလ်ရဲ့ အသေးစိတ်အချက် အလက်ကိုတော့သိဖို့ခက်တယ်” လို့ ပြောပါတယ်။

ဒဏ်ရာရသွားသူမှာ အသက် ၃၀ ကျော်အရွယ် ဗိုလ်အဆင့်ရှိသူဖြစ်ပြီး လက်ရှိမှာသူ့ကို မြို့ပေါ်တပ်ရင်းတခုမှာ ဆေးကုသထားတယ်လို့ သိရပါတယ်။

ဒါ့အပြင် မေလ ၂၃ ရက် မနေ့ ညနေ ၄ နာရီကျော်မှာလည်း လှတောရဲစခန်းကနေ ဝက်လက်မြို့ပေါ်ကို ခြေလျင်လာတဲ့ အင်အား ၇၀ ကျော်ပါ စစ်ကြောင်းကို ပင်းဇင်းကျေးရွာအနီးမှာ People’s Servant Revolution(Wetlet)အဖွဲ့နဲ့ နယ်မြေခံပကဖတွေက မိုင်းဆွဲပြီးထိတွေ့ပစ်ခတ်ခဲ့တာကြောင့် စစ်ကောင်စီတပ်သား၂ဦး ဒဏ်ရာရရှိခဲ့တယ်လို့ တပ်ရင်း(၂)မှ တာဝန်ရှိသူတဦးက ပြောပါတယ်။

အဲဒီတိုက်ခိုက်ခံရတဲ့ စစ်ကောင်စီတပ်သားတွေဟာ လှတောကျေးရွာရဲစခန်းတိုက်ခိုက်ခံရတာကြောင့် ရွှေဘိုကနေ စစ်ကူရောက်ရှိလာကြတဲ့ တပ်သားတွေဖြစ်ကြပြီး တပ်အမှတ်အသားတွေကိုတော့ မသိရှိရဘူးလို့ ကာကွယ်ရေးတပ်ဖွဲ့တွေက ပြောဆိုကြပါတယ်။

စာတည်း – ရင်ငြိမ်း

စစ်ကိုင်း၊ ဖေဖော်ဝါရီ ၁၃၊ ၂၀၂၃။

စစ်ကိုင်းတိုင်း၊ အရာတော်မြို့နယ်မှာရှိတဲ့ စစ်ကောင်စီရဲ့ အမှတ် ၁၀ လေ့ကျင့်ရေးတပ် စခန်းကို ဖေဖော်ဝါရီ ၁၂ ရက်ညနေ ၅ နာရီကျော်မှာ တိုက်ခိုက်ခံရတာကြောင့် ၉ဦး ဒဏ်ရာအပြင်းအထန် ရသွားခဲ့တယ်လို့ သိရပါတယ်။

အမှတ် ၁၀ လေ့ကျင့်ရေးတပ် (အရပ်အခေါ် အရှေ့တပ်)ကို ကာကွယ်ရေးတပ် ၅ဖွဲ့က ၈၀မမနဲ့ ၅လုံးပစ်ခတ်တိုက်ခိုက်ခဲ့ချိန်မှာ ပြောင်းမတော်တဆကွဲထွက်ခဲ့တာကြောင့် ရဲဘော်တဦး ဒဏ်ရာအနည်းငယ်ရသွားခဲ့တယ်လို့ Danger Force LPDF ပြန်ကြားရေး တာဝန်ခံ ကိုမာန်ဟုန်က ပြောပါတယ်။

“စကစ ကိုးယောက်လုံးက ဆေးရုံမှာ အရေးပေါ် ကုသမှုခံယူနေတယ်လို့ အတွင်းဖရဲသီးပြောလို့ အတည်ပြုနိုင်ခဲ့တာပါ။ ကျနော်တို့ဘက်က ဒဏ်ရာရသွားတာက တပ်ကိုပထမအကြိမ် ပစ်တဲ့အချိန်မှာ ပြောင်းကွဲထွက်သွားလို့ ရသွားတာ။ ဒဏ်ရာကမစိုးရိမ်ရဘူး။ ကျနော်တို့ပစ်ခတ်ခဲ့တဲ့ လက်နက်ကြီးတွေကလည်း တပ်တွင်းထဲကို ကျရောက်ခဲ့တယ်”လို့ ဆိုပါတယ်။

အဲ့ဒီတပ်ကို ပစ်ခတ်တိုက်ခိုက်ခဲ့ချိန်မှာလည်း စစ်ကောင်စီဘက်က ၆၀မမတွေနဲ့ ပြန်လည်ပစ်ခတ်ခဲ့ပေမယ့် အထိအခိုက်မရှိ ပြန်ဆုတ်နိုင်ခဲ့တယ်လို့ ကိုမာန်ဟုန်က ပြောပါတယ်။

ဒီတိုက်ခိုက်မှုကိုတော့ Danger Force LPDF၊ ကြယ်နီတပ်ဦး၊ ပင်လယ်ပျော်သိမ်းငှက်(SF2)၊ People’s Revolution Force (PRF)၊ တမန်တော်ပျောက်ကြားတပ်ဖွဲ့ (APOSTLE)တို့က ပူးပေါင်းလုပ်ဆောင်ခဲ့တာဖြစ်ပါတယ်။

ပြီးခဲ့တဲ့ ဖေဖော်ဝါရီလ ၁ ရက်မှာလည်း အရာတော်မြို့နယ်၊ သစ်ကြင်းကြီးတပ်စခန်းကို Droneနဲ့ ၄ကြိမ်၊ ရှော့ဒုန်းနဲ့ ၃ကြိမ် တိုက်ခိုက်ခဲ့တာကြောင့် စစ်ကောင်စီတပ်သား ၂ ဦးသေဆုံးပြီး ၂ ဦးအပြင်းအထန် ဒဏ်ရာရရှိတယ်လို့ သိရပါတယ်။