တိုက်ပွဲ​

■ ကျေးရွာ ၁၅ ရွာခန့်က ဒေသခံ ၁၀,၀၀၀ ကျော်ထွက်ပြေးနေရ

ဒိန်းဂျား၊ ကျော်ကြီး

မကွေး၊ ဖေဖော်ဝါရီ ၂၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ မဒဲကျေးရွာအနီးနဲ့ မဲဇလီရွာတံတားတို့မှာ တိုက်ပွဲတွေဖြစ်ပွားပြီး နှစ်ဖက်တပ်တွေနဲ့ အရပ်သားတွေသေဆုံးမှုရှိကာ အိမ်ခြေ ၁၀၀ ကျော်မီးလောင်ပျက်စီးခဲ့တယ်လို့ ဒေသခံတွေနဲ့ မင်းဘူးခရိုင်ပကဖ ပြန်ကြားရေးတာဝန်ခံထံက သိရပါတယ်။

ဖေဖော်ဝါရီ ၁ ရက် ယမန်နေ့ နေ့လယ် ၁၂ နာရီခန့်မှာ ရွှေစက်တော်ဘုရားပွဲလုံခြုံရေးအတွက် နယ်မြေရှင်းလင်းရေးထွက်လာတဲ့ စစ်ကောင်စီတပ်နဲ့ပျူစောထီးအဖွဲ့ ပူးပေါင်းအင်အား ၂၀၀ ခန့်နဲ့ ဒေသကာကွယ်ရေး ပူးပေါင်းတပ်ဖွဲ့တွေအကြား မဒဲကျေးရွာလမ်းဆုံအနီးမှာ ထိတွေ့တိုက်ပွဲတွေဖြစ်ပွားခဲ့တယ်လို့ ဆိုပါတယ်။

” ရွာလမ်းဆုံမှာ ကျနော်တို့ကလည်း ရှေ့အတက်၊ သူတို့ဘက်ကလည်း နယ်မြေရှင်းလင်းရေးအဝင် မျက်နှာချင်းဆိုင်တွေ့ပြီး တိုက်ပွဲဖြစ်ကြတာ။”လို့ မင်းဘူးခရိုင်ပကဖပြန်ကြားရေးတာဝန်ခံ ကိုအညာသားက ပြောပါတယ်။

မိနစ် ၃၀ ကျော်ကြာတိုက်ပွဲဖြစ်ပွားခဲ့ပြီးနောက် စစ်ကောင်စီတပ်ဘက်က ၂၀ ကျော်ထိခိုက်သေဆုံးနိုင်ပြီး ဒေသကာကွယ်ရေးပူးပေါင်းတပ်တွေဘက်က GZ Army အဖွဲ့ဝင် ၂ ဦး သေဆုံးခဲ့ကာ စစ်ရေးအခြေနေတွေကြောင့် အလောင်းပြန်မကောက်နိုင်ခဲ့ဘဲ ပြန်လည်ဆုတ်ခွာခဲ့ရတယ်လို့ ဆိုပါတယ်။

” မိုင်းဆွဲလိုက်တဲ့အချိန်မှာ ၇ ယောက်လောက်က ပက်လက်လန်ကုန်တာ။ အလဲမှာ ဝိုင်းပစ်တာ အတုံးအရုန်းပဲ။ ပထမလာတဲ့ တပ်စိတ်က လမ်းပေါ်မှာတင်ထိခိုက်ကုန်တာ မျက်မြင်ပဲ။” လို့ အထက်ပါတာဝန်ခံက ပြောပါတယ်။

စစ်ကောင်စီတပ်ဖွဲ့ဝင်တွေ ထိခိုက်သေဆုံးမှုအခြေအနေတွေနဲ့ပတ်သက်ပြီး မြေလတ်အသံက သီးခြား အတည်မပြုနိုင်သေးပါဘူး။

တိုက်ပွဲဖြစ်ပွားချိန်မှာ စစ်ကောင်စီပူးပေါင်းတပ်ဖွဲ့ဝင်တွေဘက်က လက်နက်ကြီးတွေနဲ့ မဒဲကျေးရွာကို ပစ်ခတ်တာကြောင့် မဒဲ(မြောက်)ရွာက နေအိမ် ၁၀၀ ကျော် မီးလောင်ပျက်စီးခဲ့ပြီး ရွာခံအမျိုးသမီး ၁ ဦး သေဆုံးခဲ့ကာ သေဆုံးသူနဲ့ပတ်သက်တဲ့အချက်အလက်ကို မသိရသေးဘူးလို့ ၎င်းကဆိုပါတယ်။

ပွင့်ဖြူဒေသခံတဦးကတော့ မဒဲရွာကို စစ်ကောင်စီတပ်က လက်နက်ကြီးအပြင် မီးလောင်ဗုံးတွေနဲ့ပါ ပစ်ခတ်တာကြောင့် ကျေးရွာနေအိမ်တွေမီးကူးစက်လောင်ခဲ့ပြီး ပျက်စီးဆုံးရှုံးမှု များပြားခဲ့တယ်လို့ ဆိုပါတယ်။

“ စစ်ကောင်စီတပ်ဖွဲ့ဝင်တွေက ရော့ကတ်တွေနဲ့ ထုတယ်။ မီးလောင်ဗုံးတွေနဲ့ ကြဲတယ်။ မဒဲမြောက်ရွာကိုကျပြီး ၃ ပုံ ၂ ပုံနေအိမ်တွေ မီးလောင်သွားပါတယ်။ ရှိသမျှ ကား၊ ဆိုင်ကယ်၊ အိမ်၊ တိုက်၊ သိုလှောင်ထားတဲ့ ဆန်၊ စပါး၊ ငရုပ်၊ ကြက်သွန်တွေ ဆုံးရှုံးပါတယ်။” လို့ ၎င်းက ပြောပါတယ်။

အလားတူ မနေ့မနက် ၁၀ နာရီခန့်မှာ အင်အား ၂၀ ခန့်နဲ့တပ်စွဲထားတဲ့ မဲဇလီတံတားရှိ စစ်ကောင်စီတပ်စခန်းကို ဒေသကာကွယ်ရေးပူးပေါင်းတပ်တွေဘက်က သွားရောက်တိုက်ခိုက်ခဲ့ရာ နှစ်ဖက်အပြန်အလှန်ပစ်ခတ်မှုတွေဖြစ်ခဲ့တယ်လို့ မင်းဘူးခရိုင်ပကဖပြန်ကြားရေးတာဝန်ခံက ပြောပါတယ်။

” မဲဇလီတံတားတိုက်ပွဲ စကစဘက်က သေဆုံးမသိရသေးဘူး။ ပြည်သူ ၁ ယောက်ကတော့ လေကြောင်းနဲ့လာတိုက်လို့ ဆုံးရှုံးသွားတယ်။ ဆည်တော်ရွာက တံတားနဲ့ရွာနဲ့က ကပ်လျက်ရှိတာ။”လို့ တာဝန်ခံကိုအညာသားက ပြောပါတယ်။

မဲဇလီတံတားတိုက်ပွဲအတွင်း တိုက်ပွဲဖြစ်ပွားနေရာအနီးနဲ့ဆည်တော်ကျေးရွာကို စစ်ကောင်စီတပ်က တိုက်လေယာဥ်နဲ့ ဗုံး ၄ လုံးကြဲချတိုက်ခိုက်ခဲ့တာကြောင့် ဆည်တော်ကျေးရွာခံ အမျိုးသား ၁ ဦး သေဆုံးခဲ့ပြီး ကာကွယ်ရေးတပ်ဖွဲ့ဝင်တွေ ထိခိုက်မှုမရှိခဲ့ဘူးလို့ ဆိုပါတယ်။

တိုက်ပွဲဖြစ်ပွားခဲ့တဲ့ စစ်ကောင်စီတပ်စစ်ကြောင်းဟာ စလင်းမြို့အခြေစိုက် ခလရ ၂၅၃၊ ၂၅၄၊ ၂၅၅၊ ပွင့်ဖြူဝါစိုက်ပျိုးရေးတပ်နဲ့ ကျောင်းကုန်းကြီး၊ ရွာခိုင်နဲ့ ရေပုတ်ကလေးကျေးရွာတွေက ပျူစောထီးတွေ ပူးပေါင်းစစ်ကြောင်းဖြစ်ပြီး တိုက်ပွဲဖြစ်ပြီးနောက် မဲဇလီရွာအတွင်း ဝင်ရောက်ကာ ဖေဖော်ဝါရီ ၂ ရက် ဒီကနေ့ နေ့လယ်ပိုင်းအထိ ရဲစခန်းနဲ့ကျေးရွာနေအိမ်တွေမှာ တပ်စွဲထားတယ်လို့ သိရပါတယ်။

တိုက်ပွဲနဲ့လက်နက်ကြီးပစ်ခတ်တာတွေကြောင့် အိမ်ခြေ ၂၀၀ ကနေ ၃၀၀ ကြားရှိတဲ့ မဒဲတောင်၊ မဒဲမြောက်၊ ကနီ၊ တူးပေါက်၊ ချင်းကုန်း၊ အင်ကုန်း အရှေ့အနောက်၊ ထန်းတောစု၊ ညောင်ပင်ဝိုင်း၊ ဆည်တော်အပါအဝင် ကျေးရွာပေါင်း ၁၅ ရွာခန့်က ဒေသခံ ၁၀,၀၀၀ ကျော် ဘေးလွတ်ရာကို ထွက်ပြေးတိမ်းရှောင်နေကြရတယ်လို့ သိရပါတယ်။

စာတည်း – ဟိန်းစံ