ညောင်ဦး၊ ဧပြီ ၂၄၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ မြေသန့်တောင်နဲ့ ကြအိုရွာက နေအိမ် ၇ လုံးကို ဧပြီ ၂၂ ရက်နဲ့ ၂၃ ရက်မှာ စစ်ကောင်စီတပ်ဖွဲ့ဝင်တွေက မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

ဧပြီ ၂၁ ရက်ကစတင်ပြီး ညောင်ဦး တပ်မ ၈၈ လက်အောက်ခံ စစ်ကောင်စီတပ်ဖွဲ့ဝင်၊ ပျူစောထီးနဲ့ ရဲအင်အား ၆၀ ကျော်က တင့်ကား ၃ စီး၊ စစ်ကား ၃ စီးနဲ့အတူ အဆိုပါကျေးရွာနှစ်ရွာကို တပြိုင်တည်း ဝင်ရောက်လာခဲ့တယ်လို့ဆိုပါတယ်။

“စစ်ကြောင်းဝင်လာကတည်းက ရွာထဲနေတယ်။ (ဧပြီ ၂၂)ညနေက မြေသန့်တောင်က နေအိမ် ၁ လုံးမီးရှိ့တယ်။ (ဧပြီ ၂၃ )မနက်မှာ မြေသန့်တောင်က ၅ လုံး၊ ကြအိုက ၁ လုံးရှို့တယ်။ နွားတွေကား ၁ စီးတိုက်နဲ့ ဝက်တွေ ကား ၁ စီးတိုက်သယ်သွားတယ်။ အိမ်ထောင်ပရိဘောဂတွေလည်း ယူသွားတယ်”လို့ ဒေသခံက ပြောပါတယ်။

စစ်ကောင်စီစစ်ကြောင်းဟာ ဧပြီ ၂၃ ရက် မနက် ၇ နာရီကျော်ခန့်မှာ အဆိုပါကျေးရွာတွေကနေ ညောင်ဦးဘက်ကို ပြန်ထွက်သွားပြီလို့ သိရပါတယ်။

စစ်ကောင်စီစစ်ကြောင်းဝင်လာတဲ့ ဧပြီ ၂၁ ရက်နေ့မနက်ပိုင်းမှာ မြေသန့်တောင်ကျေးရွာ မြောက်ပိုင်းနားမှာ ၁ ကြိမ်၊ ဧပြီ ၂၂ ရက်က ပစ္စည်းတွေသယ်နေချိန်မှာ ၂ ကြိမ်၊ ဧပြီ ၂၃ ရက်မှာ ကျေးရွာတွေကနေ စစ်ကြောင်းပြန်ဆုတ်ချိန်မှာ ၁ ကြိမ် ဒေသကာကွယ်ရေးအဖွဲ့ဝင်တွေက မိုင်းဆွဲတိုက်ခိုက်ခဲ့တယ်လို့ အထက်ပါဒေသခံကပြောပါတယ်။

စစ်ကောင်စီစစ်ကြောင်းဝင်လာချိန် ထွက်ပြေးခဲ့ရတဲ့ ရွာခံတွေက ဧပြီ ၂၃ ရက်ညနေပိုင်းကစတင်ပြီး ကျေးရွာကို ပြန်လာဝင်ရောက်နေထိုင်နေကြပြီလို့ သိရပါတယ်။

မြေသန့်တောင်ကျေးရွာမှာ အိမ်ခြေ ၂၀၀ ကျော် လူဦးရေ ၈၀၀ ဝန်းကျင်နေထိုင်ပြီး ကြအိုရွာကတော့ အိမ်ခြေ ၄၀၀ ကျော် လူဦးရေ ၁,၅၀၀ နီးပါးနေထိုင်ကြတယ်လို့ ဆိုပါတယ်။

ဧပြီ ၃ ရက်ကလည်း ညောင်ဦးမြို့နယ်ထဲက မီးလောင်ဖျားမြောက်ရွာကို စစ်ကောင်စီတပ်ဖွဲ့ဝင်တွေက မီးရှို့ဖျက်ဆီးလို့ နေအိမ် ၅ လုံးပျက်စီးခဲ့ပြီး ဆိုင်ကယ် ၁၀ စီးကျော်ကိုလည်း ယူဆောင်သွားတယ်လို့ သိရပါတယ်။

စာတည်း – လင်း

ညောင်ဦး၊ ဧပြီ ၄၊ ၂၀၂၅။

မန္တလေးတိုင်း၊ ညောင်းဦးနယ်မှာစစ်ကြောင်းထိုးနေတဲ့ စစ်ကောင်စီတပ်ဖွဲ့ဝင်တွေက မီးလောင်ဖျား(မြောက်ရွာ)က နေအိမ်တွေကိုမီးရှို့ပြီး တပ်ပြန်ဆုတ်သွားတယ်လို့ ဒေသကာကွယ်ရေးအဖွဲ့ တာဝန်ရှိသူတွေဆီက သိရပါတယ်။

ဧပြီ ၃ ရက်မနက် ၁၀ နာရီခွဲမှာ ညောင်ဦးမြို့နယ်၊ ကျောက်ပြင်ကန်နဲ့ စကာကျေးရွာတွေမှာ ညအိပ်တပ်စွဲခဲ့တဲ့ စစ်ကြောင်း ၂ ခုက စစ်ကောင်စီတပ်ဖွဲ့ဝင် ၁၀၀ ခန့်ဟာ မီးလောင်ဖျား(မြောက်ရွာ)ကိုဝင်လာပြီး နေအိမ်တွေကိုမီးရှို့ခဲ့တာလို့ ဆိုပါတယ်။

“မနက်ပိုင်းမှာ မီးလောင်ဖျားမြောက်ရွာကို ဝင်ရှို့တယ်။ မီးရှို့ပြီးတော့ ၂ နာရီလောက်မှာ စဉ့်ကူဘက် ပြန်ဆုတ်သွားတယ်။ မြေသန့်တောင်နဲ့ ကြိုကုန်းမှာတပ်စွဲတဲ့ စစ်ကြောင်းတွေလည်း ပုဂံဘက် ပြန်ထွက်သွားပြီး။ စစ်ကြောင်းအားလုံးပြန်ဆုတ်သွားပြီ။”လို့ ဒေသကာကွယ်ရေးအဖွဲ့ တာဝန်ရှိသူတဦးက ပြောပါတယ်။

စစ်ကောင်စီတပ်ဖွဲ့ဝင်တွေ မီးရှို့သွားလို့ ကျေးရွာထဲက နေအိမ် ၅ လုံး မီးလောင်ပျက်စီးသွားပြီး ဆိုင်ကယ် ၁၀ စီးကျော်ကိုလည်း ယူသွားတယ်လို့ ဆိုပါတယ်။

စစ်ကြောင်းတွေပြန်ဆုတ်ခွာသွားတဲ့အတွက် ဧပြီ ၃ ရက်ညနေပိုင်းမှာပဲ စစ်ရှောင်နေကြတဲ့ ဒေသခံအများစုကရွာထဲကိုပြန်ဝင်ရောက်နေကြပြီလို့ အထက်ပါတာဝန်ရှိသူက ပြောပါတယ်။

မတ် ၂၈ ရက်ကစပြီး ပုဂံညောင်ဦး၊ ပခုက္ကူ၊ ကမ္မမြစ်ခြေ ပျူစောထီးတွေနဲ့ စစ်ကောင်စီတပ်ဖွဲ့ဝင် စုစုပေါင်းအင်အား ၆၀၀ ပါစစ်ကြောင်းဟာ ကြအို၊ မြေသန့်တောင်၊ တက်မရေနံမှော်၊ မုန်တိုင်း၊ ပြင်းချောင်းကျေးရွာတွေကိုစစ်ကြောင်း ၈ ကြောင်းနဲ့ဝင်ရောက်ပြီး စစ်ကြောင်းထိုးဝင်ရောက်ခဲ့ပါတယ်။

အဲဒီနောက် မတ် ၃၁ ကနေ ဧပြီ ၂ ရက်ထိ အနောက်အုံ၊ ချောင်းရှည်၊ ဇီးစမြင်မြောက်၊ ဇီးစမြင် အလယ်၊ ဇီးစမြင်တော၊ ကျောက်ပြင်ကန်၊ ယာတောကြီး၊ သချင်ကန်၊ စကား၊ မြောင်၊ ရွှေသဖြူ၊ ကန်သာ၊ လည်ကန်၊ မီးလောင်ဖျားမြောက်၊ မီးလောင်ဖျားတောင်၊ ကြအိုကျွန်း၊ ရွာသစ်၊ ဥယျာဉ်၊ ကျွန်းချောင်း၊ ကံစပ်တော၊ သပွတ်စုအပါအဝင် ကျေးရွာ ၂၆ ရွာကို စစ်ကြောင်းပတ်ထိုးနေခဲ့တဲ့အတွက် ဒေသခံ ၂၀,၀၀၀ ကျော် ဘေးလွတ်ရာကိုထွက်ပြေးတိမ်းရှောင်နေခဲ့ကြရတယ်လို့ ဆိုပါတယ်။

စစ်ကြောင်းထိုးနေစဉ် ချောင်းရှည်ရွာက ဒေသခံ ၂ ဦး၊ ဇီးတမြင်က ၃ ဦး၊ ကန်သာက ၂ ဦး အပါအဝင်ကျေးရွာစုံက ဒေသခံ အမျိုးသား၊ အမျိုးသမီး ၇၀ လောက်ဖမ်းဆီးခံရပြီး စစ်ကြောင်းပြန်ထွက်သွားချိန်မှာတော့ အကုန်ပြန်လွတ်လာကြပြီလို့ အထက်ပါတာဝန်ရှိသူက ပြောပါတယ်။

ဒါ့အပြင် မတ် ၃၁ ရက်မှာ အရှေ့ကျောက်ပြင်ကန်ကျေးရွာက နေအိမ် ၂ လုံးမီးရှို့ခံရပြီး ကြက်၊ ဘဲ၊ ဝက်တွေအပါအဝင် စားသောက်ကုန်တွေနဲ့ တန်ဖိုးရှိပစ္စည်းအတွေကိုလည်း ယူသွားတယ်လို့ ဆိုပါတယ်။

စစ်ကောင်စီဘက်ကတော့ ဧပြီ ၂ ရက်က ၂၂ ရက်အထိ ၃ ပတ်တာကာလ အပစ်ခတ်ရပ်ဆဲမယ်လို့ သတင်းထုတ်ပြန်ထားပေမယ့် လေကြောင်းတိုက်ခိုက်မှုနဲ့ စစ်ကြောင်းထိုးမီးရှို့တာတွေကို ဆက်လက် လုပ်ဆောင်နေဆဲဖြစ်ပါတယ်။

စာတည်း – လင်း

ညောင်ဦး၊ ဧပြီ ၂၊ ၂၀၂၅။

မန္တလေးတိုင်း၊ ညောင်းဦးမြို့နယ်မှာ စစ်ကောင်စီအင်အား ၆၀၀ ကျော်နဲ့စစ်ကြောင်းထိုးနေလို့ ဒေသခံ ၂၀,၀၀၀ ကျော်ထွက်ပြေးနေရတယ်လို့ ဒေသကာကွယ်ရေးအဖွဲ့တာဝန်ရှိသူတွေထံက သိရပါတယ်။

မတ် ၃၁ ရက်ကစတင်ကာ ဒီကနေ့ ဧပြီ ၂ ရက်အထိ ညောင်ဦးမြို့နယ်အတွင်းက ကျေးရွာ ၂၆ ရွာကို စစ်ကြောင်း ၈ ကြောင်းခွဲကာ အင်အားအလုံးအရင်းနဲ့ လှည့်ပတ်စစ်ကြောင်း ထိုးနေတာလို့ ဆိုပါတယ်။

” ဒီနေ့ထိ စစ်ကြောင်းထိုးနေတုန်း။ တိုက်ပွဲဖြစ်တာတော့မရှိသေးဘူး။ မိုင်းကွဲသံတွေတော့ ကြားရတာရှိတယ်။ သူတို့စစ်ကြောင်းကများတော့ တော်လှန်ရေးအဖွဲ့တွေ အကုန်နောက် ဆုတ်နေရတယ်။ စစ်ကြောင်းက ၈ ကြောင်းတောင်ပတ်ထိုးနေတော့ ဘယ်သူမှဝင်မတိုက် နိုင်ကြဘူး။ မိုင်းတွေလောက်ဘဲ ခွဲနိုင်ကြတယ်”လို့ ညောင်ဦးမြို့နယ်အခြေပြု ဒေသကာ ကွယ်ရေးတပ်ဖွဲ့တာဝန်ရှိသူက မြေလတ်အသံကို ပြောပါတယ်။

စစ်ကောင်စီစစ်ကြောင်းတွေကြောင့် ညောင်ဦးနဲ့ချောက်မြို့နယ်အကြားက ကျေးရွာတွေဖြစ် တဲ့ အနောက်အုံ၊ ချောင်းရှည်၊ ဇီးစမြင်မြောက်၊ ဇီးစမြင် အလယ်၊ ဇီးစမြင်တော၊ ကျောက် ပြင်ကန်၊ ယာတောကြီး၊ သချင်ကန်၊ စကား၊ မြောင်၊ ရွှေသဖြူ၊ ကန်သာ၊ လည်ကန်၊ မီးလောင်ဖျား( မြောက်)၊ မီးလောင်ဖျား(တောင်)၊ ကြအိုကျွန်း၊ ရွာသစ်၊ ဥယျာဥ်၊ ကျွန်းချောင်း၊ ကံစပ်တော၊ သပွတ်စုအပါအဝင် ကျေးရွာ ၂၆ ရွာက ဒေသခံ ၂၀,၀၀၀ ကျော်ဟာ ကျေးရွာတွေအနီးက တောစပ်၊ ယာခင်းတွေနဲ့ ဆွေမျိုးတွေရှိရာ အခြားမြို့ရွာတွေမှာ သွားရောက်ရှောင်တိမ်းနေထိုင်နေကြရတယ်လို့ သိရပါတယ်။

ဒါ့အပြင် ချောင်းရှည်ရွာ ၊ ဇီးတမြင်ရွာ၊ ကန်သာရွာတွေအပါ စစ်ကြောင်းထိုး ဝင်ရောက်ရာ လမ်းကြောင်းတလျှောက်ကျေးရွာတွေက ဒေသခံ အမျိုးသား၊ အမျိုးသမီး ၇၀ ခန့် ဖမ်းဆီးခံခဲ့ရပြီး ပြန်လည်လွတ်မြောက်လာသူတွေလည်းရှိတယ်လို့ ၎င်းက ဆက်ပြောပါတယ်။

၎င်းစစ်ကြောင်းတွေဟာ မတ် ၂၀ ရက်ကစတင်ကာ ကြအို၊ မြေသန့်တောင်၊ တက်မရေနံ မှော်၊ မုန်တိုင်း၊ ပြင်းချောင်းကျေးရွာတွေကို စစ်ကြောင်းထိုးဝင်ရောက်ခဲ့သေးပြီး မတ် ၃၀ ရက်မှာ မြေသန့်တောင်ကျေးရွာအနီးဝင်ရောက်ချိန် ဒေသကာကွယ်ရေးအဖွဲ့တွေက မိုင်းဆွဲ တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၈ ဦးထိခိုက်ပြီး ကား ၁ စီး ပျက်စီးခဲ့ပါသေးတယ်။

စစ်ကောင်စီအဖွဲ့တွေက ကျေးရွာတွေကို စစ်ကြောင်းထိုးဝင်ရောက်စဥ် မတ် ၃၁ ရက်မှာ အရှေ့ကျောက်ပြင်ကန်ကျေးရွာက နေအိမ် ၂ လုံးမီးရှို့ခံရပြီး ကြက်၊ ဘဲ၊ ဝက်တွေအပါအဝင် စားသောက်ကုန်တွေနဲ့ တန်ဖိုးရှိပစ္စည်းအချို့တွေယူဆောငိတာတော့ရှိတယ်လို့ သိရပါတယ်။

ဧပြီ ၂ ရက် ဒီကနေ့အထိ အဆိုပါ စစ်ကြောင်းတွေဟာ မြေသန့်တောင်၊ ကြအို၊ မုန်တိုင်၊ ကျောက်ပြင်ကန်၊ ကဒိုင်း၊ စက၊ ဇီးတမြင်ရွာတွေမှာ ဆက်လက်တပ်စွဲနေထိုင်နေပြီး စစ် ကြောင်းထိုးနေဆဲဖြစ်တယ်လို့ သိရပါတယ်။

ပုံစာ – ဒီပဲယင်းမြို့နယ်က ကျေးရွာတွေ ၂၀၂၂ အတွင်း စစ်ကြောင်းထိုးခံရလို့ ဒေသခံတွေထွက်ပြေးရစဥ် ( ဓာတ်ပုံ – ဒီပဲယင်းစစ်ရှောင်ထောက်ပံ့ရေး)။

သတင်း – ကျော်ကြီး၊ စာတည်း – ဟိန်းစံ