ညောင်ပင်ကြီး

မုံရွာ၊ မတ် ၁၈၊ ၂၀၂၆။

စစ်ကိုင်းတိုင်း၊ မုံရွာမြို့၊ ညောင်ပင်ကြီးရပ်ကွက်ရှိ ညောင်ပင်ကြီးဇက်ဆိပ်အနီး ချင်းတွင်းမြစ်မှာ ရေနစ်ပျောက်ဆုံးခဲ့တဲ့ ဆယ်ကျော်သက်ကလေး ၃ ဦးရဲ့ ရုပ်အလောင်းတွေကို ပြန်လည်တွေ့ရှိခဲ့တယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေထံက သိရပါတယ်။

မတ်လ ၁၈ ရက် ဒီကနေ့မနက် ၈ နာရီခန့်မှာ ရေနစ်ပျောက်ဆုံးနေရာရဲ့ ရေမိုင် မိုင်ဝက်ခန့်အကွာနေရာမှာ အလောင်း ၂ လောင်း၊ မတ်လ ၁၇ ရက် ယမန်နေ့ မနက် ၇ နာရီခန့်မှာ ရေမိုင် ၁ မိုင်ခန့်အကွာ မြစ်အတွင်းမှာ အလောင်း ၁ လောင်းကို ဆယ်ယူရရှိခဲ့တာလို့ ဆိုပါတယ်။

“ကျန်တဲ့ ၂ လောင်းက ဒီမနက်ရတယ်။ ၁ လောင်းက မနေ့မနက်က ရတယ်။ ဆုံးတာက ကျား ၂ ၊ မ ၁ ပါ။ ဘောလုံးနဲ့ရေဆင်းကစားရင်း နစ်သွားတာလို့တော့ သိရတယ် “လို့ ကူညီကယ်ဆယ်ရေးလုပ်ဆောင်ပေးခဲ့သူတဦးက မြေလတ်အသံကို ပြောပါတယ်။

မတ်လ ၁၆ ရက် ည​နေ ၅ နာရီခန့်မှာ ညောင်ပင်ကြီးဇက်ဆိပ်အနီး ချင်းတွင်းမြစ်မှာ ဆယ်ကျော်သက်အရွယ် ကလေး ၅ ဦး ရေဆင်းကစားရာက ၅ ဦးလုံး ရေနစ်ခဲ့ပြီး ၂ ဦးကို အနီးအနားရှိ စက်လှေသမားတွေက ကယ်ဆယ်နိုင်ခဲ့တာကြောင့် အသက်ရှင်ခဲ့ပေမယ့် ၃ ဦးဟာ ရေနစ်မြုပ် ပျောက်ဆုံးသွားခဲ့တာပါ။

သေဆုံးသူတွေဟာ မုံရွာမြို့ ရုံးကြီးရပ်ကွက်နဲ့ ရန်ကင်းရပ်ကွက်နေထိုင်တဲ့ အသက် ၁၃ နှစ်နဲ့ ၁၄ နှစ်အရွယ်ရှိ မိန်းကလေး ၁ ဦးနဲ့ ယောက်ျားလေး ၂ ဦးတို့ဖြစ်တယ်လို့ ဆိုပါတယ်။

ဆယ်ယူရရှိတဲ့ ကလေးတွေရဲ့အလောင်းတွေကို မုံရွာမြို့ဆေးရုံကို ပို့ဆောင်ပေးခဲ့ရပြီး အဲ့ဒီကတဆင့်မိသားစုဝင်တွေက နေအိမ်တွေကိုပြန်လည်သယ်ယူသွားပြီဖြစ်တယ်လို့ သိရပါတယ်။

ပဲခူး၊ ဇန်နဝါရီ ၂၉၊ ၂၀၂၅။

ပဲခူးတိုင်း၊ ရွှေကျင်နဲ့ညောင်လေးပင်မြို့နယ်တွေမှာ စစ်ကောင်စီတပ်ဖွဲ့ဝင်တွေဘက်က လေကြောင်းကနေ ဗုံးကြဲချတိုက်ခိုက်တာနဲ့ လက်နက်ကြီးပစ်ခတ်တိုက်ခိုက်တာတွေကြောင့် အမျိုးသမီး တဦးသေဆုံးပြီး ဘုန်းကြီးကျောင်းနဲ့နေအိမ်တွေ ပျက်စီးသွားတယ်လို့ ရွှေကျင်မြို့နယ်ပအဖ တာဝန်ရှိသူကပြောပါတယ်။

ဇန်နဝါရီ ၂၇ ရက်နေ့မနက် ၁၁ နာရီ မိနစ် ၄၀ ခန့်မှာ ရွှေကျင်မြို့နယ်၊ ညောင်ပင်ကြီးကျေးရွာကို စစ်ကောင်စီဘက်က ဂျက်တိုက်လေယာဥ် ၁ စီးနဲ့ ဗုံး ၂ လုံးကြဲချတိုက်ခိုက်ခဲ့သလို ပိန်းဇလုပ်အခြေစိုက် ခလရ ၂၆၄ တပ်နဲ့ ရေကြည်ချောင်းကျေးရွာမှာတပ်စွဲထားတဲ့ စစ်ကောင်စီတပ်ဖွဲ့ဝင်တွေကလည်း လက်နက်ကြီးတွေနဲ့ပစ်ခတ်ခဲ့တာကြောင့် အေးမြအောင်ဘုန်းကြီးကျောင်း၊ ကျောင်းသစ်ဘုန်းကြီးကျောင်း ၂ ကျောင်းနဲ့ နေအိမ် ၂ လုံးပျက်စီးခဲ့ပါတယ်။

ဇန်နဝါရီ ၂၈ ရက်နေ့ မနက် ၂ နာရီခန့်မှာလည်း ညောင်ပင်ကြီးကျေးရွာ ကျောင်းသစ်ဘုန်းကြီးကျောင်းဝင်းထဲကို စစ်ကောင်စီတပ်ဖွဲ့ဝင်တွေဘက်က ဂျက်တိုက်လေယာဥ် ၁ စီးနဲ့ ပေါင် ၅၀၀ ဗုံး ၂ လုံးထပ်မံကြဲချတိုက်ခိုက်ခဲ့ပြီး ကျောင်းဝင်းအတွင်း ကျန်ရှိအဆောက်အဦတွေနဲ့ ကျောင်းအနီး နေအိမ် ၁ လုံးထပ်မံပျက်စီးခဲ့ပါသေးတယ်။

ညောင်လေးပင်မြို့နယ်၊ ပျဉ်ရေကြီးကျေးရွာကိုလည်း ဇန်နဝါရီ ၂၈ ရက်နေ့ နေ့လည် ၁၂ နာရီ ၃၀ ခန့်မှာ စစ်ကောင်စီတပ်ဖွဲ့ဝင်တွေဘက်က ဒရုန်းနဲ့ ဗုံးသီး ၆ လုံးကြဲချတိုက်ခိုက်ခဲ့တာကြောင့် ရွာထဲက ဘုန်းကြီးကျောင်းပေါ်ကိုကျရောက်ပေါက်ကွဲခဲ့ကာ ကျောင်းဆောင် ၄ ဆောင် ပျက်စီးခဲ့သလို ဘုန်းကြီးကျောင်းနံဘေးမှာ နေထိုင်တဲ့ အသက် ၆၉ နှစ်အရွယ်ဒေါ်စန်းမြင့် နံကြားအောက် ဗုံးစမှန်ဒဏ်ရာရပြီးနေရာမှာတင်သေဆုံးခဲ့တယ်လို့ သိရပါတယ်။

စစ်ကောင်စီတပ်ဖွဲ့ဝင်တွေဟာ စစ်ရှုံးလာချိန်တွေမှာ ဘုန်းကြီးကျောင်းတွေအတွင်း PDF တွေခိုအောင်းနေတယ်ဆိုတဲ့ သတင်းကိုလွှင့်ပြီးမှ ဘာသာရေးအဆောက်အဦတွေကို တိုက်ခိုက်တာဟာ စစ်ရာဇဝတ်မှုတွေ ပေါ်ပေါ်တင်တင်ကျူးလွန်နေတာဖြစ်တယ်လို့ ဆိုပါတယ်။

“၂၅ ၊ ၂၆ လောက်တုန်းက သူတို့ကင်းပုန်းဝပ်နေတဲ့ ပုဇွန်မြောင်းကျေးရွာဘုန်းကြီးကျောင်းကို PDF ပူးပေါင်းတပ်တွေက ဝင်ရောက်တိုက်ခိုက်တဲ့အခါမှာ သူတို့ဘက်က အင်အား ၂၀ ကျော်ကျဆုံးသွားပြီးတော့ လက်နက်တွေလည်း ဆုံးရှုံးသွားတဲ့အခါမှာ စစ်တောင်းမြစ်ဝှမ်းမှာရှိတဲ့ တော်လှန်ရေးအင်အားစုတွေ ထိန်းချုပ်ထားတဲ့နယ်မြေထဲကို လေကြောင်းကတိုက်ခိုက်တာ၊ ဒရုန်းနဲ့ဗုံးကြဲတာပါ။ သူတို့ထိခိုက်နစ်နာပါတယ်လို့ စစ်ရှုံးလာတဲ့အခါတိုင်းမှာ ပြည်သူတွေကို ကျုးလွန်တိုက်ခိုက်တာပါ။”လို့ ရွှေကျင်မြို့နယ် ပအဖ တာဝန်ခံကပြောပါတယ်။

စစ်ကောင်စီတပ်ဖွဲ့ဝင်တွေဘက်က လေယာဥ်နဲ့ဗုံးကြဲတာ၊ လက်နက်ကြီးပစ်ခတ်တာနဲ့ ဒရုန်းနဲ့ဗုံးသီးချတာတွေကြောင့် ပျဉ်ရေကြီး၊ ညောင်ပင်ကြီး၊ ကုန်းတလကြီးကျေးရွာတွေအပါအဝင် ကျေးရွာ ၅ ရွာခန့်က သက်ကြီးရွယ်အို၊ ကလေးသူငယ်တွေနဲ့ လူဦးရေ ၅၀၀ ကျော်ခန့်ဟာ ဘေးလွတ်ရာကျေးရွာတွေကို ကြိုတင်ရွေ့ပြောင်းနေထိုင်နေကြပြီး ကျေးရွာကနေ မပြောင်းရွှေ့ဘဲ အခြေအနေစောင့်ကြည့်နေကြသူတချို့လည်း ရှိနေတယ်လို့ သိရပါတယ်။

ဇန်နဝါရီ ၂၇ ရက်နေ့ညပိုင်းကလည်း ကျောက်တံခါးမြို့နယ်၊ နတ်တလင်းကျေးရွာမှာ စစ်ကောင်စီတပ်ဖွဲ့ဝင်တွေဘက်က ပစ်ခတ်တဲ့ လက်နက်ကြီးကျရောက်ပေါက်ကွဲပြီး အမျိုးသမီး ၁ ဦးသေဆုံးကာ ကလေး ၁ ဦးဒဏ်ရာရခဲ့သေးတယ်လို့ သိရပါတယ်။

စာတည်း – ကိုချမ်း

စစ်ကိုင်း၊ ဇွန် ၁၇၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ညောင်ပင်ကြီးကျေးရွာရဲ့ စက်လှေဆိပ်မှာရှိတဲ့ တဲတွေကို စစ်အုပ်စုက ဇွန်လ ၁၇ ရက် ဒီနေ့ မနက် ၁၀ နာရီလောက်မှာ ဝင်ရောက်မီးရှို့ခဲ့တယ်လို့ ဒေသခံတွေဆီက သိရပါတယ်။

စစ်ကောင်စီတပ်ဖွဲ့တွေဟာ ညောင်ပင်ကြီးရဲစခန်းကနေ ထွက်လာပြီး အမှတ်(၃)ရပ်ကွက်မှာရှိတဲ့ စက်လှေဆိပ်ကမ်းက တဲ ၃ လုံးကို မီးရှို့ဖျက်ဆီးခဲ့ပြီး၊ လက်နက်ကြီးတွေနဲ့ နီးစပ်ရာကျေးရွာတွေဘက်ကို လိုက်လံပစ်ခတ်နေတယ်လို့လည်း ဆိုပါတယ်။

“သူတို့က ရွာတွေကိုပတ်ပြီး မီးလိုက်ရှို့နေတာ။ စခန်းမှာ တဝက်ကျန်ခဲ့တယ်။ တဝက်ကတော့ နေအိမ်တွေကို မီးလိုက်ရှို့နေတယ်။ အဲဒီဆိပ်ကမ်းမှာက တဲ ၃ လုံးပဲရှိတယ်။ အဲဒါကို မီးရှို့သွားတာ။ မနေ့ကလည်း သူတို့ရဲစခန်းတွေ ပြန်ပြင်ဖို့အတွက် ဘိလပ်မြေတွေ မုံရွာကနေသယ်လာသေးတယ်” လို့ ချင်းတွင်းမြစ် အနောက်ဘက်ကမ်း သပိတ်ကော်မတီဝင်တဦးက ပြောပါတယ်။

ညောင်ပင်ကြီးကျေးရွာကို စစ်ကောင်စီတပ်ဖွဲ့တွေက အင်အား ၁၀၀ ကျော်နဲ့ တပ်စွဲထားတာ ဇွန်လ ၉ ရက်ကနေ ဒီနေ့အထိပဲ ဖြစ်ပါတယ်။ အဲဒီစစ်ကောင်စီတပ်ဖွဲ့တွေဟာ ညောင်ပင်ကြီးရွာထဲမှာရှိတဲ့ နေအိမ်တချို့ကို ဖျက်ဆီးပြီး အဲဒီနေရာတွေကို တပ်ပိုင်မြေ အဖြစ် သိမ်းဆည်းမယ်လို့လည်း ပြည်သူမှပြည်သူသို့ ပရဟိတအဖွဲ့ဝင် ကိုစနေ က အခုလိုပြောပါတယ်။

“ရွာထဲမှာ ကျန်နေသေးတဲ့ အိမ်တွေကိုလည်း နေ့တိုင်းပဲမီးရှို့နေတယ်။ တချို့သော နေအိမ်တွေကို မြေကော်စက်တွေနဲ့ ထိုးပြီး တပ်ပိုင်မြေအဖြစ် သိမ်းနေတယ်လို့ သိရတယ်။ ရွာသားတွေလည်း အခုချိန်ထိ အဆင်ပြေမယ့် ရွာတွေဆီ ရှောင်တိမ်းနေရတယ်” လို့ သူကဆိုပါတယ်။

အဲဒီစစ်ကောင်စီတပ်ဖွဲ့တွေဟာ ဇွန်လ ၁၅ ရက်ကလည်း နှင်းတောရွာသား ၈ ဦးကို ညောင်ပင်ကြီးရဲစခန်းကို ဖမ်းဆီးခေါ်ဆောင်သွားပြီး ယနေ့အထိ နေအိမ်ကိုပြန်လည်ရောက်ရှိခြင်းမရှိသေးဘဲ ရဲစခန်းပြန်လည်ပြုပြင်ဖို့အတွက် ဘိလပ်မြေအိတ်တွေ ထမ်းပိုးပေးနေရတယ်လို့ ဆိုပါတယ်။

အခုလို စစ်ကောင်စီတပ်က ညောင်ပင်ကြီးကျေးရွာထဲမှာ အထိုင်ချထားတဲ့အတွက် ညောင်ပင်ကြီးရွာ အပါအဝင်၊ အိုမ၊ ထန်းတောကြီး၊ ရွာရှည်၊ ရုံးပင်ရိုး၊ ထန်းတော၊ ပလောက်၊ ဝက်မှေး၊ ကံကော်၊ နှင်းတော၊ သိမ်တော၊ အောင်ချမ်းစည်၊ ရွှေအင်းလေး အစ ရှိတဲ့ ကျေးရွာက ဒေသခံ ၅၀၀၀ ခန့် ထွက်ပြေးတိမ်းရှောင်နေရပါတယ်။

စာတည်း – နွေဦးငြိမ်းချမ်း

စစ်ကိုင်း၊ ဇွန် ၁၁၊ ၂၀၂၃။

စစ်ကောင်စီတပ်သားတွေရဲ့ ဖမ်းဆီးထိန်းသိမ်းတာကို ခံထားရတဲ့ စစ်ကိုင်းတိုင်း၊ ဆားလင်းကြီးမြို့နယ် ပြည်သူ့အုပ်ချုပ်ရေးအဖွဲ့ဝင် ဦးဗန့်ဂျီ ကို ဇွန်လ ၁၁ ရက် ဒီမနက် ၈ နာရီလောက်မှာ သေဆုံးလျှက် ပြန်တွေ့ခဲ့တယ်လို့ သိရပါတယ်။

အသက် ၄၀ ကျော်အရွယ်ရှိ ဦးဗန့်ဂျီရဲ့အလောင်းကို စစ်ကောင်စီတပ်စွဲနေတဲ့ ညောင်ပင်ကြီး ကျေးရွာအနီးက ထန်တောဆိပ်သစ်ကွင်းထဲမှာ တွေ့ရှိခဲ့ရတာလို့ ဆားလင်းကြီးမြို့နယ် သတင်းမှန်ပြန်ကြားရေးအဖွဲ့မှ တာဝန်ရှိသူတဦးက ပြောပါတယ်။

“ကိုဗန့်ဂျီ ခန္ဓာကိုယ်ပေါ်မှာ ဒဏ်ရာတွေတော်တော်တွေ့ရတယ်။ ကျောကုန်းတွေ၊ ဦးခေါင်းတွေမှာ ရိုက်နှက်ခံထားရတဲ့ ဒဏ်ရာတွေပါတယ်။ ရင်ဘက်တွေမှာ ဓားထိုးဒဏ်ရာတွေ တွေ့ရတယ်ဗျ။ စကစတွေက မနေ့(ဇွန်၁၀)က သတ်ပြီးတော့ အလောင်းလာပစ်သွားတာလို့ ထင်တယ်” လို့ ဆိုပါတယ်။

လက်ရှိမှာ ဦးဗန့်ဂျီရဲ့ရုပ်အလောင်းကို စစ်ကောင်စီတပ်စွဲတဲ့နေရာတွေနဲ့ အဝေးတနေရာမှာ မီးသင်္ဂြိုလ်ပေးလိုက်ပြီလို့ သူကဆက်ပြောပါတယ်။

ဦးဗန့်ဂျီဟာ နောက်ထပ်အဖွဲ့ဝင် ၃ ဦးနဲ့အတူ မေလ ၃၁ ရက်နေ့လယ် ၂ နာရီလောက်က စစ်ကောင်စီ စစ်ကြောင်းတခုကို ကင်းထောက်ရင်း ညောင်ပင်ကြီးကျေးရွာအနီးမှာ မုံရွာဘက်ကနေ ဝမ်ပေါင်ကို ရိက္ခာလာပို့တဲ့ စစ်ကြောင်းနဲ့ထိပ်တိုက်တွေ့ပြီး ပစ်ခတ်ဖမ်းဆီး ခံလိုက်ရတာဖြစ်ပါတယ်။

ဖမ်းဆီးခံရပြီးနောက် ဦးဗန့်ဂျီကို ဇွန်လ ၃ ရက်နေ့လယ် ၁ နာရီကျော်မှာ ဖမ်းဆီးထိန်းသိမ်းထားတဲ့ နောင်အိုင်ကြီးရဲစခန်းကနေ မုံရွာမြို့က စစ်ကြောရေးတနေရာကို ပို့ဆောင်လိုက်ပြီး ၈ ရက်အကြာမှာ အခုလိုသေဆုံးလျှက် ပြန်တွေ့ခဲ့ရတာဖြစ်ပါတယ်။

စာတည်း – လင်း