မကွေး၊ ဒီဇင်ဘာ ၂၄၊ ၂၀၂၁။

မကွေးတိုင်း၊ အောင်လံမြို့နယ် တိုင်းဒေသကြီးလွှတ်တော်ကိုယ်စားလှယ် ၁ ဦး၊ CDM ပညာရေးဝန်ထမ်းတဦး၊ NLD မြို့နယ် အလုပ်အမှုဆောင်တဦးနဲ့ တက်ကြွလှုပ်ရှားသူတဦး စုစုပေါင်း ၄ ဦးရဲ့ နေအိမ်တွေကို မနေ့က ချိတ်ပိတ်ခဲ့တယ်လို့ ဒေသခံတွေဆီက သိရပါတယ်။

မကွေးတိုင်း၊ အောင်လံမြို့နယ် တိုင်းဒေသကြီးအမှတ်(၁) လွှတ်တော်ကိုယ်စားလှယ် ဦးအေးကျော်၊ CDM ပညာရေးဝန်ထမ်း ဆရာဦးကျော်ကျော်ဦး၊ NLD မြို့နယ် အလုပ်အမှုဆောင် ဒေါ်ဥမ္မာဌေးနဲ့ ကိုသူရနိုင် (ခေါ်) ကိုမိုင်းဆက် တို့ ၄ ဦးရဲ့ နေအိမ်တွေ စစ်ကောင်စီက ချိတ်ပိတ်ခဲ့တာဖြစ်ပါတယ်။

“ဦးအေးကျော်အိမ်ဆို ယောက္ခမပါရှိတယ်။ သက်ကြီးရွယ်အိုပေါ့ အသက်က ၇၀ နီးပါး ရှိနေပြီ၊ မိသားစုတွေနေတဲ့ အိမ်ကို သူတို့အပြင်ခဏသွားတုန်း ဝင်ပြီးချိတ်ပိတ်ပစ်တာ။ အခုတော့ နေစရာမရှိလို့ အမျိုးတွေအိမ်မှာ သွားနေရတယ်။ ကျန်တဲ့သူတွေအိမ်ကတော့ လူမနေတာ ကြာပါပြီ” လို့ အောင်လံမြို့ ဒေသခံတဦးက မြေလတ်အသံကို ပြောပါတယ်။

အခုချိတ်ပိတ်ခံရတဲ့ လွှတ်တော်ကိုယ်စားလှယ် ဦးအေးကျော်မှာ တိုင်းဒေသကြီး အမှတ် (၂) လွှတ်တော်ကိုယ်စားလှယ်ဖြစ်ပြီး၊ အမှတ် (၁) လွှတ်တော်ကိုယ်စားလှယ် ဦးဇော်မင်းမှာ မကွေးတိုင်းဒေသကြီးအစိုးရအဖွဲ့ဝင် ဝန်ကြီးတပါးဖြစ်လို့ အာဏာသိမ်းစဉ်ကာလကတည်းက ဖမ်းဆီးထိန်းသိမ်းခံထားရကာ အခုလို နိုင်ငံရေးနဲ့ပတ်သက်သူတွေရဲ့ နေအိမ်တွေကို ချိတ်ပိတ်တာ အောင်လံမြို့နယ်မှာ ပထမဆုံးဖြစ်ကြောင်း သိရပါတယ်။

အောင်လံမြို့နယ် ပြည်သူ့လွှတ်တော်ကိုယ်စားလှယ်နဲ့ အမျိုးသားလွှတ်တော်ကိုယ်စားလှယ် (၂၀၁၅ အနိုင်ရအမတ် ဟောင်း) ၂ ဦးကတော့ စစ်ကောင်စီထံမှာ ခံဝန်ထိုးပြီး နေထိုင်နေကြောင်းနဲ့ နိုင်ငံအရေးအယူအစမတူသူတွေကို အခုလို မတရားဖမ်းဆီးထောင်ချတဲ့အပြင်၊ ထွက်ပြေးတိမ်းရှောင်နေရသူတွေရဲ့ နေအိမ်တွေကို မတရား ချိတ်ပိတ်တဲ့အပေါ် မြို့ခံလူထုအနေနဲ့ လက်မခံနိုင်ကြဘူးလို့ ဒေသခံတွေက ပြောပါတယ်။

ပဲခူး၊ ဒီဇင်ဘာ ၁၁၊ ၂၀၂၁။

ဒီဇင်ဘာ ၁၀ ရက်နေ့ လူ့အခွင့်အ‌ရေးနေ့ အသံတိတ်သပိတ်တွင် ဆိုင်ပိတ်ခဲ့သည့် ပဲခူးတိုင်းအနောက်ခြမ်း၊ ပြည်မြို့ရှိ စျေးဆိုင်များကို ငွေ တသိန်း မှ ငွေ သုံးသိန်းထိ စစ်ကောင်စီက တောင်းနေကြောင်း မြို့ခံများထံက သိရသည်။

အဓမ္မငွေတောင်းခံမှုတွေကို ဒီဇင်ဘာလ ၁၁ ရက်နေ့က ဆိုင်အချို့ကို လိုက်လံတောင်းခံနေခြင်းဖြစ်ပြီး အချို့ဆိုင်များကို အစည်းအ‌‌‌ဝေးခေါ်နေကြောင်း ဓါတ်ပုံမှတ်တမ်းများလည်း ရိုက်ယူထားကြောင်း မြို့ခံများထံကသိရသည်။

” ဆိုင်ကြီးတွေကို အဓိကတောင်းတာ မနေ့ကတည်းက ကြံ့ခိုင်ရေးအဖွဲ့ကလူတွေလည်း ပါတယ်။ ရပ်ကွက်အုပ်ချုပ်ရေးမှူးတွေနဲ့ ဆိုင်တွေကို ဓါတ်ပုံရိုက်တယ် မဖွင့်ရင်လည်း အတင်းဖွင့်ခိုင်းတယ်။ လုံးဝမဖွင့်တဲ့ဆိုင်တွေကိုတော့ ဒီနေ့ငွေညစ်နေတယ်” ဟု မြို့ခံတဦး ကပြောသည်။

အလားတူ ခေတ္တရာမြို့သစ်အုပ်ချုပ်ရေးမှူးကလည်း ဆိုင်မဖွင့်ခဲ့သည့် ဆိုင်များကို ဓါတ်ပုံမှတ်တမ်းများ ရိုက်ယူကာ စာရင်းပြုစုပြီး အထက်ကို တင်ပြနေကြောင်း မဖွင့်သည့်ဆိုင်များကိုလည်း ငွေတောင်းနေကြောင်း ‌သိရသည်။

” ဒီဘက်ကိုတော့ အခုထိ လာပြောတာမရှိသေးဘူး။ လာခေါ်မယ်လို့တော့ ကြားတယ်။ မြို့သစ်မှာတော့ အုပ်ကြီးဆိုသူက ဆိုင်တွေကို မှတ်တမ်းတွေယူ ငွေတောင်းတာတွေလုပ်နေတယ်လို့ သိရတယ်။” ဟု မြို့ခံတဦးကပြောသည်။

အသံတိတ်သပိတ် အား ပြည်မြို့ရှိ စျေးဆိုင်များစွာက ပါဝင်ပူးပေါင်းခဲ့ပြီး ယင်းနေ့မှာပင် စစ်ကောင်စီတပ်သားများက ခြိမ်းခြောက်ကာ အတင်းအဓမ္မဆိုင်ဖွင့်ခိုင်းမှုများ ပြုလုပ်ခဲ့ကြသည်။

မကွေး၊ ဒီဇင်ဘာ ၁၁၊ ၂၀၂၁။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့ပေါ်ရှိ Power 9 စားသောက်ဆိုင်ပိုင်ရှင်သားရဲ့ကို PDF ဆိုပြီး ဒီဇင်ဘာလ ၁၁ ရက်နေ့နံနက် ၁၀ နာရီခန့်က စစ်ကောင်စီအဖွဲ့တွေ လာရောက်ပြီး ဆိုင်အတွင်းပစ္စည်းတွေကို ဖျက်ဆီးကာ ဆိုင်ကိုချိတ်ပိတ်ပြီး ပစ္စည်းတွေကို သိမ်းယူသွားကြောင်း ဒေသခံတွေဆီက သိရပါတယ်။

အဲဒီအပြင် နေအိမ်တိုက်ကို တပါတည်းချိတ်ပိတ်သွားကြောင်း၊ စလင်းမြို့ ခလရ-၂၅၃ နဲ့ ၂၅၄ စစ်သားတွေနဲ့ ဆင်ဖြူကျွန်းရဲစခန်းက ရဲတပ်ဖွဲ့ဝင် အင်အား ၂၀ ခန့်နဲ့ လာရောက်ဖျက်ဆီး သွားတယ်လို့ ဒေသခံတွေက ပြောပါတယ်။

“စစ်ကားတွေကော ရဲကားတွေကော ဆိုင်ရှေ့မှာအများကြီးဗျ၊ စစ်ကားကို ၅ စီး‌‌​ လောက်ပါတယ်။ ဆိုင်ပိုင်ရှင်ရဲ့သားက PDF အဖွဲ့ဝင်ဆိုပြီး ဆိုင်ကိုချိတ်ပိတ်ဖို့လာတာတဲ့။ အဲဒီကလေးကအဲလိုမဟုတ်ပါဘူး၊ မ‌​ကွေးတက္ကသိုလ်ကျောင်းသားပါ၊ အဲဒီကလေးကအိမ်မှာ မရှိတာကြာပါပြီ၊ အရင်ကလည်း တခါလာပြီးစစ်သေးတယ်။ အဲဒီတုန်းကလည်း ဆိုင်ပိုင်ရှင်ကို သေနတ်ဒင်နဲ့ခေါင်းကိုရိုက်လို့ ၃ ချက်ချုပ်လိုက်ရတယ်။ ဆိုင်ပိုင်ရှင်ရဲ့အမျိုးသမီးကိုလည်း ပါးတွေရိုက်သွားကြတယ်၊ ခုဟာက စိုးလွန်းတယ်ဗျ” လို့ မြို့ခံတဦးက ပြောပါတယ်။

ဆိုင်အတွင်း တန်ဖိုးရှိ ပစ္စည်းများကို ရစရာမရှိအောင် ဖျက်ဆီးသွားမှုကြောင့် တန်ဖိုးများစွာဆုံးရှုံးကြောင်း စွပ်စွဲခံရသူလူငယ်ကို မိဘများက အမွေပြတ်စွန့်လွတ်ကြောင်း ကြေညာထားခံရပြီး မိဘများကိုယ်တိုင်လည်း ထွက်ပြေးတိမ်းရှောင်နေရကြောင်း မြို့ခံတွေဆီက သိရပါတယ်။

မကွေး၊ ဒီဇင်ဘာ ၁၀၊ ၂၀၂၁။

မကွေးတိုင်းဒေသကြီး၊ သရက်ခရိုင်၊ ကံမမြို့နယ် အထွက်ရှိ ဒန်းကိုင်း စစ်ကောင်စီ စစ်ဆေးရေးဂိတ်ကို ယနေ့ ဒီဇင်ဘာ ၁၀ ရက် မနက် ၂ နာရီခန့်တွင် ရှော့တိုက်ဒုံးဖြင့် ကံမ-သရက်ပူး​ပေါင်းအဖွဲ့က သွားရောက်ပစ်ခတ်တိုက်ခိုက်ခဲ့ကြောင်း သိရသည်။

မနက် ၂ နာရီခန့်တွင် ရှော့တိုက် တလုံးနှင့် အရင်စပစ်ခဲ့ပြီး သိပ်မကြာခင်မှာပဲ စစ်ကောင်စီဂိတ်မှ သေနတ်များနှင့် ရမ်းသမ်းပစ်ခတ်ခဲ့ကြောင်း ကံမ-သရက် ပူးပေါင်းအဖွဲ့မှ နောက်ထပ်ရှော့တိုက် တလုံးထပ်ပစ်၍ ဘေးကင်းစွာဆုတ်ခွာခဲ့ကြောင်း စစ်ကောင်စီတပ်သားများ ထိခိုက်သေဆုံးမှုရှိမရှိနှင့် နောက်ဆက်တွဲအခြေအနေကို မသိရသေးကြောင်း တာဝန်ရှိသူမှ ပြောသည်။

“အဓမ္မ စစ်သားစုဆောင်းတာ ရွာအချို့ကိုရည်ရွယ်ချက်ရှိရှိ လျှပ်စစ်မီး ဖြတ်တောက်တာတွေ လုပ်နေတဲ့အတွက် တိုက်ခိုက်ခဲ့တာပါ” ဟု အဖွဲ့တာဝန်ရှိသူမှ မြေလတ်အသံကို ပြောသည်။

ကံမ-သရက် ပူးပေါင်းအဖွဲ့သည် ပြီးခဲ့သည့် ဒီဇင်ဘာ ၇ ရက်နေ့ ကလည်း သရက်မြို့နယ် သာစည်ကျေးရွာအနီး Mytel Tower တိုင်ကို ဗုံးခွဲတိုက်ခိုက်ခဲ့ကြောင်း သိရသည်။