စစ်ကောင်စီ

ပဲခူး၊ ဧပြီ ၂၃၊ ၂၀၂၂။

ပဲခူးတိုင်း သာယာဝတီခရိုင် နတ်တလင်းမြို့နယ်က အုပ်ချုပ်ရေးမှူးအသတ်ခံရပြီးနောက်မှာ NLDအမျိုးသားလွှတ်တော်ကိုယ်စားလှယ်အပါအဝင် ရွာသား ၃၀ဦးထက် မနည်းကို စစ်ကောင်စီက ဖမ်းဆီးထားတယ်လို့ သိရပါတယ်။

ဧပြီ ၁၅ရက် သင်္ကြန်အကြတ်နေ့က အမျိုးသားလွှတ်တော်ကိုယ်စားလှယ်ဦးရဲမင်း နေထိုင်တဲ့လှပခြင်းအုပ်စုက အုပ်ချုပ်ရေးမှူး ပစ်သတ်ခံရတဲ့ ကိစ္စနဲ့ ဖမ်းဆီးတာလို့ ဆိုပါတယ်။

“ကိုရဲမင်းကို လာဖမ်းတာ မတွေ့လို့ သူ့နှမကိုခေါ်သွားတယ် ပြီးမှ ကိုရဲမင်းနဲ့ လူချင်းလဲရတာ အုပ်ချုပ်ရေးမှူး အသတ်ခံရတဲ့ ကိစ္စနဲ့ ဖမ်းတာတဲ့၊ ကိုရဲမင်းလိုပဲ သူတို့လိုချင်တဲ့သူကို မတွေ့လို့ မဆိုင်တဲ့သူကိုဖမ်းသွားပြီးမှ ပြန်လဲယူရတာတွေရှိတယ်” လို့ ဒေသခံတဦးက ပြောပါတယ်။

ဦးရဲမင်းဟာ ၂၀၂၀ရွေးကောက်ပွဲမှာ သာယာဝတီခရိုင်ထဲက နတ်တလင်း၊ဇီးကုန်း၊ကြို့ပင်ကောက်မြို့နယ်တွေရဲ့ ရွေးချယ်ခံအမျိုးသားလွှတ်တော်ကိုယ်စားလှယ်တဦးဖြစ်ပီး အကျိုးဆောင်ရှေ့နေတဦးလည်း ဖြစ်တယ်။

လှပခြင်းအုပ်စု အုပ်ချုပ်ရေးမှူး အသတ်ခံရတဲ့ ကိစ္စနဲ့ပတ်သက်ပြီး အနီးနားမှာရှိတဲ့ ကုလားတက်ထွန်းအုပ်စုထဲက ရွာသားတွေအပြင် နတ်တလင်းမြို့ပေါ်ကပြည်သူတွေအပါအဝင် ပြည်သူ ၃၀ ကျော်ကို မဆိုင်ပဲ ဖမ်းဆီးတာတွေလုပ်နေတာဖြစ်တယ်လို့ နတ်တလင်းမြို့နယ်ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ခံက ပြောပါတယ်။

” သူတို့ဖမ်းတဲ့ သူတွေက မဆိုင်တဲ့ သူတွေ ၊ သူတို့ကို ကျနော်တို့ သိတောင်မသိဘူး၊ တကယ်လုပ်တဲ့ သူတွေက လွတ်မြောက်တဲ့ နေရာတွေမှာ ရောက်နေကြပြီ၊ ဘယ်သူတွေက လက်ညိုးထိုးပြီးဖမ်းခိုင်းနေတယ်ဆိုတာလည်းသိတယ်” လို့ နတ်တလင်းမြို့နယ် ပကဖ ပြန်ကြားရေးတာဝန်ခံက ပြောပါတယ်။

အခုလို ဖမ်းဆီးတာတွေ လုပ်နေပေမယ့်လည်း နတ်တလင်းမြို့နယ်အတွင်းက စစ်ကောင်စီနဲ့ ပက်သတ်တဲ့ အုပ်ချုပ်ရေးမှူးတွေနဲ့ ဒလံသတင်းတွေပေးတွေကို ဆက်ပြီးအရေးယူတာတွေ လုပ်ဆောင်သွားမှာဖြစ်တယ်လို့ လည်း ပြောပါတယ်။

” နတ်တလင်းမြို့နယ်ထဲက အုပ်ချုပ်ရေးမှူးတချို့နဲ့ ပျူတွေ တပ်မ ၆၆ အင်းမမှာ သင်တန်းဆင်းပြီး လက်လုပ်တွေပါလာတယ်လို့ သတင်းရထားတယ် ၊ ပိုက်ဆံရှိတဲ့ သူတွေလည်း အတိုဝယ်ကိုင်ထားကြတယ်” လို့ မြို့နယ် ပကဖ ပြန်ကြားရေး တာဝန်ခံက ပြောပါတယ်။

ပြီးခဲ့တဲ့ ဧပြီ ၁၅ရက် သင်္ကြန်အကြတ်နေ့မှာ နတ်တလင်းမြို့နယ် လှပခြင်းအုပ်စု အုပ်ချုပ်ရေးမှုးကို သာယာဝတီခရိုင် PDF တပ်ရင်းတခုက မနက်၁၀ နာရီဝန်းကျင်မှာ သေနတ်နဲ့ ပစ်သတ်ခဲ့တာဖြစ်ပါတယ်။

မကွေး၊ ဧပြီ ၁၂၊ ၂၀၂၂။

မကွေးတိုင်း၊ နတ်မောက်မြို့နယ်၊ သမှုန်းကုန်းကြီးကျေးရွာရှိနေအိမ် ၁ လုံးကို ဧပြီလ ၁၁ ရက်နေ့ ညက မီးရှို့သွားပြီး၊ အိမ်ထောင်ဦးစီးကို ဖမ်းဆီးသွားတယ်လို့ နတ်မောက်မြို့နယ် ပြည်သူ့ကာကွယ်ရေးတပ်က ဗိုလ်ရာကျော်က မြေလတ်အသံကို ပြောပါတယ်။

မနေ့က ည ၉ နာရီခွဲခန့်က စစ်ကောင်စီအင်အား ၂၀ ခန့်နဲ့အတူ မီးသတ်ကားတစီးနဲ့ သမှုန်းကုန်းကြီးကျေးရွာက ဦးအောင်ထူးနေအိမ်ကို ရောက်ရှိလာပြီး၊ ယူဆောင်လို့မရတဲ့ ပစ္စည်းတွေကိုဖျက်စ္စည်းကာ ပစ္စည်းတွေနဲ့ ငွေတွေကိုလည်း ယူဆောင်သွားပြီး၊ နေအိမ်ကို မီးရှို့လိုက်တယ်လို့ သိရပါတယ်။

“စစ်ကား ၁ စီးနဲ့ တခါတည်း မီးသတ်ကားပါလာတယ်။ ကြိုပြီးကြံစီထားတဲ့သဘောမျိုးပေါ့၊ ဆိုင်ကယ်တွေလည်းနောက်ကနေ ရောက်လာတယ်ပေါ့၊ စိုင်ကောင်းရဲစခန်းက ရဲတွေလည်းပါတယ်၊ အဲဒီအိမ်ကိုဝင်ပြီးတော့ အိမ်ထဲကရှိတဲ့ပစ္စည်းတွေကို ထုခွဲရိုက်ပြီးတော့ အကုန်လုံး မီးရှို့ဖျက်ဆီးသွားတာပေါ့။ ဖုန်း ၅ လုံးနဲ့ ပိုက်ဆံ ၃ သိန်းကျော် ယူသွားတယ်။ အိမ်ထောင်ဦးစီး ဦးအောင်ထူးကိုလည်း ဖမ်းသွားတယ်၊ ဘာအကြောင်းပြချက်နဲ့ဖမ်းသွားတယ်ဆိုတာ ဘယ်သူမှမသိရသေးဘူး” လို့ ဗိုလ်ရာကျော်ကပြောပါတယ်။

စစ်ကောင်စီတပ်ဖွဲ့တွေဟာ နတ်မောက်မြို့နယ်၊ သမှုန်းကုန်းကျေးရွာအတွင်း အခုလို မကြာခဏ ပြုလုပ်လေ့ရှိပြီး၊ ကျေးရွာက ပြည်သူတချို့လည်း ထွက်ပြေးတိမ်းရှောင်နေရတယ်လို့ သိရပါတယ်။

မကွေး၊ ဧပြီ ၉၊ ၂၀၂၂။

မကွေးတိုင်း၊ ပခုက္ကူမြို့နယ်၊ စညောင်းရွာက မသန်စွမ်းအမျိုးသား ၁ ဦးအပါအဝင် ၃ ဦးကို ဧပြီ ၈ ရက် မနေ့က ညပိုင်းမှာ စစ်ကောင်စီတပ်တွေက သေနတ်နဲ့ပစ်သတ်သွားတယ်လို့ ဒေသခံတွေဆီက သိရပါတယ်။

အသက် ၃၀ အရွယ် မသန်းစွမ်းသူ ကိုသန်းဌေးဦး၊ အသက် ၂၈ နှစ်အရွယ် ကျောင်းဆရာမ ၁ ဦး နဲ့ သူရဲ့ အဖေတို့ကို ရွာအနောက်ဘက်ပိုင်းမှာ ည ၇ နာရီလောက်က ပစ်သတ်သွားတာလို့ ဒေသခံတဦးက ပြောပါတယ်။

“ ဆရာမအသက်က၂၈ ဝန်းကျင်ရှိတယ်၊ သူ့အဖေနဲ့ တောထဲက ခရမ်းချဉ်‌ခင်း စောင့်နေတာ စစ်သားတွေက ပစ်သတ်သွားကြတယ်။ သားဖနှစ်ယောက်လုံးပေါ့။ တစ်ယောက်က ရွှေအ၊ စကားမပြောတတ်၊ နားမကြားဘူး၊ ရွာအနောက်ဘက်ထန်းတောမှာ ထန်းတက်တာတွေ့တော့ ပစ်သတ်သွားကြတယ်၊ ရွာကလူတွေလည်း ပြေးနေရတော့ အခုမနက်မှသိရတယ်၊” လို့ သူကပြောပါတယ်။

အဲ့ဒီတပ်တွေဟာ စညောင်းရွာအနီးက မြစ်ဖျားရွာကိုနေ့လည်ပိုင်းမှာ မီ:ရှို့ဖျက်ဆီးခဲ့ပြီး၊ ညနေ ၆ နာရီလောက်မှ အင်းအား ၁၀၀ ကျော်နဲ့ ရွာထဲကိုစစစ်ကြောင်းထိုးဝင်ရောက်လာတာဖြစ်သလို နေအိမ်မီးရှို့တာတွေတော့ လုပ်မသွားဘူးလို့လည်း ဒေသခံတဦးက ဆက်ပြောပါတယ်။

စညောင်းရွာမှာ အိမ်‌ခြေ ၂၂၀ နဲ့ လူဦးရေ ၁၀၀၀ ကျော်နေထိုင်ပြီး၊ စစ်တပ်ကဝင်ရောက်လာချိန်ကတည်းက ရွာသားအားလုံးနီးပါးက တိမ်းရှောင်နေခဲ့ပြီး၊ လက်ရှိအချိန်ထိလည်း ရွာထဲကိုပြန်မဝင်ရဲကြသေးလူးလို့လည်း သိရပါတယ်။

ပဲခူး၊ ဧပြီ ၇၊ ၂၀၂၂။

ပဲခူးတိုင်း ပြည်မြို့မှာ သင်္ကြန်ပွဲတော်ကျင်းပဖို့နဲ့ ယိမ်းကားတွေအတွက် လိုအပ်တဲ့ ပိုက်ဆံကို လုပ်ငန်းရှင်တွေနဲ့ ရပ်ကွက်အလိုက် ပြည်သူတွေဆီက လိုက်တောင်းနေတယ်လို့ ဒေသခံတွေဆီက သိရပါတယ်။

ရပ်ကွက်အချို့မှာတော့ ရာအိမ်မှူးတွေတဆင့် လိုက်တောင်းနေသလို လုပ်ငန်းရှင်တွေကိုတော့ အလှူငွေဖြတ်ပိုင်းနဲ့ လိုက်တောင်းနေတာတွေရှိတယ်လို့ ဒေသခံအမျိုးသားတဦးက ပြောပါတယ်။

” လုပ်ငန်းရှင်တွေကိုအဓိကကောက်တယ်၊ ၅သောင်းကနေ ၁ သိန်း လုပ်ငန်းအလိုက်ပေါ်မူတည်ပြီးတောင်းတယ်၊ ရွှေကူရပ်ကွက်မှာလည်းထိုနည်းတူ အေးဓါးပြလုပ်တောင်းတယ် “လို့ ပြောပါတယ်။

ယိမ်းကားအတွက်နဲ့ အကအဖွဲ့အတွက် ဝတ်စုံးဖိုး စတဲ့ ခေါင်းစဥ်အမျိုးမျိုးနဲ့ ငွေကြေးအတိအကျပြောပြီး တောင်းနေတာလည်းဖြစ်ပါတယ်။

” သင်္ကြန်ယိမ်းအတွက် တတ်နိုင်သလောက်ပါဝင်ပါအုန်းဆိုပြီး ဝတ်စုံဖိုး ၃သောင်းထည့်ခိုင်းတာ၊ ၂ထောင်ပဲ ထည့်လိုက်တယ် ” လို့ ဒေသခံတဦးက ပြောပါတယ်။

ပြည်မြို့ပေါ်က ရပ်ကွက်အချို့မှာတော့ သင်္ကြန်အတွက် ပိုက်ဆံလိုက်တောင်းပြီး ဖြစ်ပေမယ့် ရပ်ကွက်အချို့ကိုတော့ လာတောင်းတာမျိုးမရှိသေးပါဘူး၊ မဏ္ဍပ်တချို့ကိုစတည်‌ဆောက်နေပြီး လမ်းလျှောက်သင်္ကြန်ကျင်းပမဲ့ နေရာတွေမှာလည်း ပြင်ဆင်နေပြီဖြစ်တယ်လို့ သိရပါတယ်။

“ဗဟိုမီးသတ်အရင်မီးကင်းတဲကို အဆင်ထပ်မြင့်ပြီး လမ်းတွေနဲ့ မဏ္ဍပ်တွေကိုစောင့်ကြည့်ဖို့ စီစီတီဗီတွေ ပတ်လည်တပ်ထားတယ်၊ လမ်းလျှောက်သင်္ကြန်က အရင် NLD လက်ထက် နေရာမှာပဲ အခု သင်္ဘာဆိပ်လမ်းကနေ ပိုက်တွေ စသွယ်တန်းနေပြီ” လို့ ဒေသခံ တဦးက ပြောပါတယ်။

တော်လှန်ရေးအင်အားစုတွေနဲ့ သပိတ်ကော်မတီတွေကတော့ စစ်ကောင်စီကျင်းပမဲ့ သင်္ကြန်ပွဲ‌တော်မှာ မပါဝင်ဖို့နဲ့ တော်လှန်သင်္ကြန်ကျင်းပဖို့ တိုက်တွန်းနှိုးဆော် လှုပ်ရှားမှုတွေ ဆက်တိုက်လုပ်ဆောင်နေဆဲဖြစ်ပါတယ်။