စစ်ကောင်စီယာဥ်တန်း

ပွင့်ဖြူ၊ ဇွန် ၂၅၊ ၂၀၂၅။

မကွေးတိုင်း၊ ပွင့်ဖြူမြို့နယ်မှာ စစ်ကြောင်းပတ်ထိုးပြီး ပြန်ဆုတ်လာတဲ့ စစ်ကောင်စီတပ်ဖွဲ့ ကြားဖြတ်တိုက်ခိုက်ခံရပြီး စစ်ကောင်စီတပ်ဖွဲ့ဝင် ၄ ဦးဒဏ်ရာရကာ ကား ၁ စီးပျက်စီးတယ်လို့ မင်းဘူခရိုင်ပကဖပြန်ကြားရေးတာဝန်ခံထံက သိရပါတယ်။

ဇွန် ၂၄ ရက် ယမန်နေ့မနက် ၁၀ နာရီကျော်မှာ မဒဲ၊ ကနီရွာတွေဘက်ကနေ စစ်ကြောင်းပတ်ထိုးပြီး ပြန်ဆုတ်လာတဲ့ စစ်ယာဥ် ၄ စီးနဲ့ အင်အား ၁၅၀ ခန့်ပါ စစ်ကောင်စီတပ်ဖွဲ့ကို ထိန်အိုင်ရွာအနီးလမ်းကွေ့အရောက်မှာ မိုင်းဆွဲပစ်ခတ်ခဲ့တာလို့ ဆိုပါတယ်။

“ကားကိုဖျက်အားပြင်းမိုင်းသုံးပြီးတော့ မိုင်းဆွဲလိုက်တယ်။ကားတစီးကတော့မီးလောင်သွားတယ်။ ဒီကောင်တွေကအော်ဟစ်ပြီး ပြေးကြတယ်။ ကျနော်တို့ဘက်ကလည်း အင်အားမမျှတတဲ့အပေါ် စစ်ဆင်ရေးလုပ်ရတာဆိုတော့ မိနစ်ပိုင်းလောက်ကိုဘဲ ပြောက်ကျားပစ်ခတ်ပြီး ပြန်ဆုတ်လာရတယ်” လို့ မင်းဘူးခရိုင်ပကဖပြန်ကြားရေးတာဝန်ခံ ကိုအညာသားက ပြောပါတယ်။

အဆိုပါ မိုင်းဆွဲပစ်ခတ်မှုအတွင်း စစ်ကောင်စီတပ်ဖွဲ့ဝင် ၄ ဦးဒဏ်ရာရပြီး ကားတစီးပျက်စီးသွားကာ မောင်းနှင်မရတော့တာကြောင့် ကျန်ကားတွေနဲ့ဆွဲယူသွားပြီး စလင်းမြို့ဘက်ကို ဆုတ်ခွာသွားတယ်လို့ သိရပါတယ်။

စစ်ကောင်စီတပ်ဖွဲ့ဝင်တွေ ထိခိုက်ဒဏ်ရမှုကို မြေပြင်တိုက်ခိုက်မှုပြုလုပ်ခဲ့တဲ့ ရဲဘော်တွေရဲ့မျက်မြင်တွေ့ရှိချက်ဖြစ်ပြီး အဲဒီတိုက်ခိုက်မှုကိုတော့ GZ ARMY နဲ့ပူးပေါင်းရဲဘော်တွေက တိုက်ခိုက်ခဲ့ကြတာလို့ အထက်ပါတာဝန်ခံက ပြောပါတယ်။

အဆိုပါစစ်ကောင်စီတပ်ဟာ ပခုက္ကူ တပ်မ ၁၀၁ နဲ့ ဆင်လူးပျူစောထီးအဖွဲ့ ပူးပေါင်းတပ်ဖွဲ့တွေဖြစ်ပြီး ဇွန် ၂၁ ရက်ကစတင်ကာ ဆင်လူးရွာကနေတဆင့် ပုသိမ်-မုံရွာလမ်းအတိုင်း မဲဇလီ၊ မဒဲ၊ ကနီရွာတွေဘက်ကို စစ်ကြောင်းထိုးနေတာဖြစ်ပါတယ်။

၎င်းစစ်ကြောင်းကြောင့် အိမ်ခြေ ၁၀၀ ကျော်ကနေ ၃၀၀ ကျော်ရှိတဲ့ ကျွဲခြံ၊ လယ်မ၊ မဲဇလီ၊ ကျောက်ပုံ၊ အင်းကုန်း၊ ညောင်ပင်ဝိုင်း၊ ထူးပေါက်၊ မဒဲ၊ ကနီကျေး ရွာတွေအပါ ရွာ ၁၃ ရွာ လောက်က ဒေသခံပြည်သူ ၅,၀၀၀ ကျော်စစ်ရှောင်နေကြရပြီး လတ်တလောမှာ စစ်ကြောင်းပြန်ထွက်သွားပေမယ့် ကျေးရွာတွေမှာ နယ်မြေရှင်းလင်းရေးမလုပ်ရသေးလို့ နေရပ်မပြန်ကြရသေးဘူးလို့ သိရပါတယ်။

စာတည်း – ဟိန်းစံ

ပခုက္ကူ၊ မတ် ၁၇၊ ၂၀၂၃။

မကွေးတိုင်း၊ ပခုက္ကူမြို့၊ အမှတ် ၃ ရပ်ကွက် မြို့ရှောင်လမ်းပိုင်း တနေရာမှာ စစ်ကောင်စီယာဥ်တန်းတွေကို တိုက်ခိုက်မယ့် မစ်ရှင်တခု ဖျက်သိမ်းလိုက်ရတယ်လို့ People Defence Force Column 1 အဖွဲ့ဆီက သိရပါတယ်။

မကွေးနဲ့ စစ်ကိုင်းနယ်တွေထဲကို ပခုက္ကူက စစ်ကောင်စီတပ်တွေ စေလွှတ်မယ့် သတင်းရရှိထားလို့ မတ်လ ၁၆ ရက် မနေ့ မနက် ၉ နာရီခန့်က မြို့ရှောင်လမ်းပိုင်းမှာ စစ်ကောင်စီတပ်ကို တိုက်ခိုက်မယ့် မိုင်း ၂ လုံး ထောင်ထားချိန် အရပ်ဝတ် ဝတ်ဆင်ထားသူ ၂ ဦးက အဲ့ဒီမိုင်း ၂ လုံးကို ကောက်ယူသွားလို့ ဖောက်ခွဲမယ့်အစီအစဉ် ဖျက်သိမ်းလိုက်ရတာလို့ အဖွဲ့တာဝန်ခံက မြေလတ်အသံကို ပြောပါတယ်။

“စကစ ကားတန်းတွေကို ကြားကနေ ဖြတ်တောက်မိုင်းခွဲဖို့ ဂုန်နီအိတ်နဲ့ထည့်ပြီး ထောင်ထားတာကို လာကောက်သွားတာ။ ကျနော်တို့ဘက်က တွေ့နေလျက်နဲ့ ပြည်သူလား၊ စကစလား မသေချာလို့ မိုင်းမခွဲလိုက်ရဘူး” လို့ ပြောပါတယ်။

မစ်ရှင်တစ်ခုအောင်မြင်ဖို့ အချိန်၊ ငွေနဲ့ အသက်ရင်း လုပ်ကိုင်ထားရတာဖြစ်ပြီး ပြည်သူတွေအနေနဲ့ လမ်းဘေးဝဲယာတွေမှာ ရှိနေတဲ့ မသက်ဆိုင်တဲ့အထုပ်အပိုးပစ္စည်းတွေကို ကိုင်တွယ်တာ၊ ယူဆောင်တာတွေ မလုပ်ကြဖို့နဲ့ လုပ်ဆောင်ခဲ့ရင် ဖြစ်ပေါ်လာတဲ့အကျိုးဆက်တွေကို ကိုယ်တိုင်တာဝန်ယူရမယ်လို့ ဆိုပါတယ်။

People Defence Force Column 1 အဖွဲ့ဟာ ပခုက္ကူမြို့နယ် အခြေပြုလှုပ်ရှားနေတဲ့ ဒေသတွင်း ကာကွယ်‌ရေးတပ်ဖွဲ့ တခုဖြစ်ပြီး ဒေသတွင်းမဟာမိတ်တပ်ဖွဲ့တွေနဲ့ ပူးပေါင်းကာ စစ်ကောင်စီတပ်ကို တိုက်ခိုက်မှု မစ်ရှစ်တွေ မကြာခဏ လုပ်ဆောင်နေတဲ့အဖွဲ့ ဖြစ်တယ်လို့ သိရပါတယ်။

စာတည်း – ရင်ငြိမ်း