တိုက်ပွဲအတွင်း စစ်ကောင်စီတပ်ဖွဲ့ဝင် ၃ ဦးသေဆုံး

ကျောက်ကြီး၊ ဇွန် ၁၁၊ ၂၀၂၅။

ပဲခူးတိုင်း၊ ကျောက်ကြီးမြို့နယ်၊ ရွာကြီးအင်းကျေးရွာထိပ်မှာတပ်စွဲထားတဲ့ စစ်ကောင်စီတပ်စခန်းကို ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၃ ဦးသေဆုံးပြီး လက်နက်ခဲယမ်းတွေ သိမ်းဆည်းခဲ့တယ်လို့ Falcons Guerilla Force ကပြောပါတယ်။

စစ်ကောင်စီတပ်ဖွဲ့ဝင် ၂၀ ခန့်နဲ့တပ်စွဲထားတဲ့ အဲ့ဒီစခန်းကို ဇွန် ၁၀ ရက်မနက် ၈ နာရီကျော်မှာ ဒေသကာကွယ်ရေးတပ်တွေက ထိုးစစ်ဆင်တိုက်ခိုက်ခဲ့ရာ မိနစ် ၂၀ ခန့်အကြာမှာ စစ်ကောင်စီဘက်က စခန်းကိုစွန့်ခွာထွက်ပြေးခဲ့တယ်လို့ဆိုပါတယ်။

“သူတို့(စကစ)ဝင်ရောက်တပ်စွဲထားတာက အများပြည်သူတွေရဲ့နေအိမ်တွေပါ။ ကျနော်တို့တိုက်ပွဲဖြစ်ပြီး ဝင်ရောက်ရှင်းလင်းချိန်မှာ MA 1 သေနတ် ၁ လက် ခဲယမ်းတွေ၊ စစ်သုံးဆောင်ပစ္စည်းတွေကို သိမ်းဆည်းရမိခဲ့တယ်ဗျ။ စစ်**အလောင်း ၃ လောင်းတွေ့ခဲ့တယ်”လို့ Falcons Guerilla Force မှတာ ဝန်ရှိသူတဦးကပြောပါတယ်။

ရွာကြီးအင်းကျေးရွာရှိစခန်းမှာ ကျောက်ကြီး-ပဲနွယ်ကုန်းလမ်းမကြီးနဲ့နီးပြီး စစ်ကောင်စီတပ်တွေ စခန်းစွန့်ထွက်ပြေးချိန်မှာလည်း လက်နက်ကြီးတွေနဲ့တောက်လျောက်ပြန်လည်ပစ်ခတ်ခဲ့တယ်လို့ ဆိုပါတယ်။

ပြီးခဲ့တဲ့ ဧပြီ ၂၈ ရက်ကလည်း ကျောက်ကြီးမြို့နယ်ရှိ ကျွန်းကုန်း၊ ရင်းတိုက်ကုန်း၊ တောင်စု၊ ရန်မျိုးအောင်၊ တမာခေါ၊ နောင်ကုန်းတံတားရှိ စစ်ကောင်စီတပ်စခန်းတွေကို ကရင်အမျိုးသား လွတ်မြောက်ရေးတပ်မတော် – KNLA နဲ့ ပူးပေါင်းတပ်ဖွဲ့တွေကတိုက်ခိုက်ရာ ဒုတပ်ရင်းမှူးအပါအဝင် ၂၀ ကျော်သေဆုံးပြီး လက်နက်မျိုးစုံ ၃၀ကျော်နဲ့ ခဲယမ်း၊ စစ်အသုံးအဆောင်ပစ္စည်းတွေ သိမ်းဆည်းရရှိခဲ့တယ်လို့ သိရပါတယ်။

စာတည်း – လင်း

ပဲခူး၊ ဧပြီ ၃၊ ၂၀၂၃။

ပဲခူးတိုင်းဒေသကြီး၊ နတ်တလင်းမြို့နယ်၊ ကြက်မနက်ကျေးရွာရှိ စစ်ကောင်စီတပ်စွဲထားတဲ့ အထိုင်စခန်းကို ဝင်ရှင်းချိန် နှစ်ဖက်ထိခိုက်သေဆုံးတာတွေ ရှိခဲ့တယ်လို့ သိရပါတယ်။

ဧပြီလ ၁ ရက်နေ့ ည ၈ နာရီကျော်ခန့်မှာ အင်အား ၃၀ လောက်နဲ့ ကတုတ်ကျင်း၊ ဘန်ကာတွေနဲ့ အခိုင်အမာတပ်စွဲထားတဲ့ စစ်ကောင်စီစခန်းကို ပြည်သူ့ကာကွယ်ရေးပူးပေါင်းတပ်ဖွဲ့တွေက ပိတောက်ဖြူစစ်ဆင်ရေးအဖြစ် ဝင်ရောက်စီးနင်းချေမှုန်း တိုက်ခိုက်ခဲ့တယ်လို့ Bago Region PDF ပြန်ကြားရေးတာဝန်ရှိသူက ပြောပါတယ်။

“အင်အားတော့များတယ်။ သူတို့တပ်စွဲထားတာက ပဲခူးရိုးမကို ဖြတ်လေးဖြတ်လုပ်ချင်လို့ တပ်စွဲနေထိုင်နေတာဖြစ်တယ်။ တိုက်ပွဲဲဖြစ်တော့ သူတို့ စခန်းကုန်းကို ကျနော်တို့ဘက်က သိမ်းနိုင်ခဲ့တယ်။ ကျနော်တို့ဘက်ကလည်း ကျဆုံးတာရှိတယ်။ သူတို့က ပြည်သူ့နေအိမ်တွေမှာ တပ်စွဲထားတာဆိုတော့ သူတို့နေရာကို မီးရှို့တာတော့ မလုပ်ခဲ့ဘူး။ အဲလိုလုပ်ခဲ့ရင် အခြားပြည်သူနေအိမ်တွေလည်း မီးကူးသွားတာတွေဖြစ်မှာစိုးရတယ်” လို့ ပြောပါတယ်။

တိုက်ပွဲဖြစ်ပွားပြီးနောက်မှာ စစ်ကောင်စီဘက်မှ (၁)ဦးသေဆုံးကာ (၂)ဦးဒဏ်ရာ အပြင်းအထန် (စိုးရိမ်ရ) ရရှိခဲ့သလို စစ်ကောင်စီတပ်ဖွဲ့ဆီကနေ MA-3 ဒင်ခေါက် သေနတ် (၁) လက်၊ ကျည် (၂၀)နဲ့ လက်ပစ်ဗုံး (၁) လုံးတို့ကိုပါ သိမ်းဆည်းရရရှိခဲ့တယ်လို့ ဆိုပါတယ်။

အဲဒီတိုက်ပွဲမှာ သာယာဝတီခရိုင် PDF တပ်ရင်း ၃၈၀၁၊ တပ်ခွဲ ၂ မှ တော်လှန်ရေးတပ်ဖွဲ့ဝင် (၂) ဦးပါ သေဆုံးခဲ့သေးတယ်လို့ သိရပါတယ်။

အဆိုပါ စီးနင်းတိုက်ခိုက်မှုကို ပိတောက်ဖြူစစ်ဆင်ရေးအနေနဲ့ သာယာဝတီခရိုင် PDF တပ်ရင်း ၃၈၀၁ မှ တပ်ခွဲ ၂၊ တပ်ခွဲ ၃၊ တပ်ခွဲ ၄၊ ပြည်ခရိုင် PDF တပ်ရင်း ၃၆၀၂ မှ တပ်ခွဲ ၅၊ တပ်စု ၂ နဲ့ ပြည်ခရိုင် PDF တပ်ရင်း ၃၆၀၁ ပူးပေါင်းလုပ်ဆောင်ခဲ့တာပါ။

၂၀၂၂ ခုနှစ် အောက်တိုဘာလ ၁၁ ရက်နေ့ မနက်ပိုင်းက ကြက်မနက်ကျေးရွာကို အင်အား ၆၀ လောက်နဲ့ စစ်ကြောင်းထိုးလာတဲ့ စစ်ကောင်စီအဖွဲ့ကို ဒေသကာကွယ်ရေးအဖွဲ့တွေက ကြားဖြတ်တိုက်ခိုက်ခဲ့ရာ စစ်ကောင်စီဘက်က ၂ ဦးသေဆုံးပြီး အများပြားဒဏ်ရာရခဲ့သေးတယ်လို့ သိရပါတယ်။

စာတည်း – 007

စစ်ကိုင်း၊ မတ် ၂၇၊ ၂၀၂၃။

စစ်ကိုင်းတိုင်း၊ ယင်းမာပင်မြို့မှာရှိတဲ့ စစ်ကောင်စီတွေအထိုင်ချရာ စခန်းတွေကို ယနေ့မတ်လ ၂၇ ရက် မနက်အစောပိုင်းက ဒေသခံမဟာမိတ်တပ်တွေ ပူးပေါင်းတိုက်ခိုက်ခဲ့တယ်လို့ Myanmar National Armed Force MNAF က သတင်းထုတ်ပြန်ထားပါတယ်။

ယင်းမာပင်မြို့ပေါ်က စုပေါင်းရုံးနဲ့လဝကရုံးတွေကို ဒီနေ့မနက် ၃ နာရီကနေ ၅ နာရီအတွင်းမှာ လက်နက်ကြီးတွေနဲ့ တိုက်ခိုက်ခဲ့တာလို့ MNAF အဖွဲ့ တပ်ရင်းတာဝန်ခံ ဗိုလ်ရောင်နီက ပြောပါတယ်။

“ဒီနေ့မှာက သူတို့တပ်မတော်နေ့ဆိုပြီး အခမ်းအနားတွေလုပ်ကြမှာ။ ပျော်ပွဲရွှင်ပွှဲတွေ လုပ်ကြမှာ။ ပြည်သူတွေကိုတော့ ဖိနှိပ်ချုပ်ချယ်ပြီး သူတို့ကျတော့ ပျော်ပွဲရွှင်ပွဲတွေလုပ်မှာဆိုတာကို မခံချင်လို့ သွားရောက်တိုက်ခိုက်ခဲ့တာပါ” လို့ ပြောပါတယ်။

စစ်ကောင်စီဘက်က လက်နက်ကြီးတလုံးသာ ပြန်လည်ပစ်ခတ်ခဲ့ကာ ထိခိုက်သေဆုံးမှုကိုတော့ မသိရရှိရသေးဘူးလို့ သူကဆက်ပြောပါတယ်။

တော်လှန်ရေးတပ်ဖွဲ့တွေက လက်နက်ကြီးတပ်ဖွဲ့တွေ ပစ်ခတ်နေချိန်မှာ လက်နက်ငယ်အဖွဲ့တွေနဲ့လည်း အသင့်ပြင်ထားတယ်လို့ ဆိုပါတယ်။

အဲဒီတိုက်ခိုက်မှုမှာ Myanmar National Armed Force -MNAF တပ်ရင်းက Chindwin Toe Na Yar PDF တပ်ခွဲ ဦးဆောင်ပြီး SSTF ၊ ယင်းမာပင်ခရိုင်တပ်ရင်း ၂၉(ဒေါင်းမင်း)၊ Yoma Fighter၊ ချင်းတွင်း Revolutionality Fighter၊ မြွေဆိုး၊ သခင်ဒေါင်းညို၊ ဆားလင်းကြီးဆရာကျောင်း တို့က လက်နက်ကြီးတွေနဲ့ပစ်ခတ်ပြီး Myanmar National Armed Force – MNAF တပ်ရင်းက Jungle Hunter Revolution Forceတပ်ခွဲ၊ Special 7 Attacks Forces-MSAF တပ်ခွဲ၊ မုံရွာခရိုင်တပ်ရင်း ၂၅ (သံမဏိတပ်ခွဲ-၂)၊ M.7 PDA၊ ဘာမရှောင်၊ C.R.F အဖွဲ့တို့က လက်နက်ငယ်တွေနဲ့ ပူးပေါင်းတိုက်ခိုက်ခဲ့တယ်လို့ သိရပါတယ်။

ပြီးခဲ့တဲ့ နှစ်ဒီဇင်ဘာလ ၉ ရက် ညကလည်း MNAF အဖွဲ့ဟာ ယင်းမာပင်မြို့ပေါ်က စစ်ကောင်စီအထိုင်ချရာ စစ်ကောင်စီစခန်းနဲ့ ထွေအုပ်ရုံးတွေကိုလည်း မဟာမိတ်တွေနဲ့ပေါင်းကာ တိုက်ခိုက်ခဲ့ပါသေးတယ်။

စာတည်း – 007