မုံရွာ၊ ဇူလိုင် ၇၊ ၂၀၂၅။

စစ်ကိုင်းတိုင်း၊ မုံရွာမြို့၊ နတ်လူထိပ်ပန်ရပ်ကွက်မှာရှိတဲ့ စစ်ကောင်စီဂိတ်ကို ဇူလိုင် ၇ ရက် ဒီနေ့လယ်ပိုင်းမှာ လက်ပစ်ဗုံးနဲ့ ပစ်ခတ်ခဲ့တယ်လို့ The Phoenix Army ဆီက သိရပါတယ်။

ဒီနေ့လယ် ၁ နာရီခွဲလောက်မှာ အင်အား ၂၅ ဦးဝန်းကျင်ရှိတဲ့အဆိုပါ စစ်ကောင်စီဂိတ်ကို မီတာ ၃၀ အကွာကနေ ပစ်ခတ်တိုက်ခိုက်ခဲ့တာလို့ ဆိုပါတယ်။

“ကျနော်တို့က သူတို့ဘေးက လမ်းကြားထဲက သွားပြီးပစ်ခတ်ခဲ့တာ၊ လက်ပစ်(ဗုံး)နဲ့ မီတာ ၃၀ လောက်ကကျနော်တို့ပစ်ခတ်တာ၊ နောက်ပြီးကျတော့ ဂန်းငယ်တွေနဲ့လည်း ပစ်ခဲ့ပါသေးတယ်၊ သူတို့ အထိအခိုက်တော့ရှိတယ်၊ အသေအဆုံးကတော့မသိရဘူး။” လို့ The Phoenix Army တာဝန်ခံ ကိုရောင်နီက ပြောပါတယ်။

အဲ့ဒီဂိတ်ဟာ လမ်းသွားလမ်းလာတွေဆီက နေ့စဥ်ငွေတောင်းတာ၊ ဆိုင်ကယ်လိုင်စင် စစ်ဆေးတာတွေလည်းလုပ်နေတာကြောင့် ခုလိုပစ်ခတ်ခဲ့တာလို့ ဆိုပါတယ်။

ဒီပစ်ခတ်မှုကို The Phoenix Army နဲ့ ဗန္ဓုလနှင့်အဖွဲ့သားများအဖွဲ့တို့က ပစ်ခတ်တိုက်ခိုက်ခဲ့တာဖြစ်ပြီး ၄ ဦးထိခိုက်မှုရှိတယ်လို့ သူကဆက်ပြောပါတယ်။

“မြို့ပေါ်ဆိုတော့ ကျနော်တို့လည်း လျင်လျင်မြန်မြန်ပဲ လုပ်ရတာမလို့ပါ၊ အဲ့ဒီမှာရှိတဲ့ ၄ ကောင်ကတော့ ထိခိုက်ပါတယ်၊ အဲ့ဒီ ၄ ဦးကတော့ ကျနော်‌တို့ရှေ့တွင် ဝပ်သွားတာတွေ့လိုက်တယ်”လို့ The Phoenix Army တာဝန်ခံကိုရောင်နီက ပြောပါတယ်။

ပြီးခဲ့တဲ့ ဇွန် ၁ ရက်ကလည်း မုံရွာမြို့၊ အောင်မင်္ဂလာရပ်ကွက်မှာ ဆက်ကြေးကောက်နေတဲ့ စစ်ကောင်စီတပ်ဖွဲ့ဝင်တွေကို The Phoenix Army ပစ်ခတ်တိုက်ခိုက်ခဲ့ရာ ၂ ဦးသေဆုံးပြီး ဆိုင်ကယ် ၁ စီး၊ ဖုန်း ၂ လုံး၊ လွယ်အိတ် ၁ လုံးကိုသိမ်းဆည်းရခဲ့ပါသေးတယ်။

စာတည်း – လင်း

မြင်းခြံ၊ မတ် ၅၊ ၂၀၂၅။

မန္တလေးတိုင်း၊ မြင်းခြံခရိုင်၊ မြင်းခြံမြို့၊ အမှတ် ၁၈ ရပ်ကွက်ရှိ စစ်ကောင်စီဂိတ်ကို ဒေသခံကာကွယ်ရေး ပူးပေါင်းတပ်ဖွဲ့တွေက တိုက်ခိုက်ခဲ့ပြီး စစ်ကောင်စီဘက်က ၄ ဦးသေဆုံးခဲ့တယ်လို့ မြင်းခြံခရိုင်တပ်ရင်း ၉၊ Myingyan Black Tiger – MBT အဖွဲ့က မတ် ၄ ရက်မှာ ထုတ်ပြန်ပါတယ်။

ပျူစောထီးခေါင်းဆောင် သီတာယုမွန်အဖွဲ့က ပျူစောထီးတွေအပါ စစ်သားနဲ့ ရဲ စု‌စု‌ပေါင်း အင်အား ၂၀ ရှိတဲ့ အဆိုပါစစ်ဆေးရေးဂိတ်ကို မတ် ၃ ရက် နေ့လယ် ၁၁ နာရီဝန်းကျင်မှာ တိုက်ခိုက်ခဲ့ကြတာလို့ ဆိုပါတယ်။

“နေရာမှာ စစ်‌ကောင်စီတပ်ဖွဲ့ဝင် ၄ ဦး သေဆုံးသွားတာရှိတယ်။ အဲ့ဒီအလောင်းတွေကိုတော့ မြင်းခြံမြို့ အထက ၂ ကျောင်းထဲမှာ ရေခဲပုံးနဲ့ထားတယ်လို့ သိထားရတယ်။” လို့ Myingyan Black Tiger-MBT ခေါင်းဆောင်ဗိုလ်မိုက်ခဲက ပြောပါတယ်။

အဲ့ဒီစစ်ကောင်စီဂိတ်ဟာ ခရီးသွားကားတွေကို ဆက်ကြေးကောက်နေတဲ့ဂိတ်ဖြစ်ပြီး စျေးဝယ်လာတဲ့ ဒေသခံတွေဆီကလည်း ရိက္ခာသယ်ယူစရိတ်တောင်းတဲ့အပြင် ကာကွယ်ရေးတပ်ဖွဲ့ဝင်တွေကို မဝင်လာနိုင်အောင် ဟန့်တားဖို့လုပ်ထားတဲ့ဂိတ်ဖြစ်တယ်လို့ ဆိုပါတယ်။

“မြင်းခြံမြို့ပြင်က ကျေးရွာတွေဈေးဝယ်လာရင် ပြည်သူတွေဆီက ဆန်အိတ် ၁ အိတ်ကို ၇ ထောင်နှုန်းတောင်းတယ်။ ဆန်အိတ် ၁ အိတ်ကို ၅ ထောင်နှုန်းတောင်းတယ်။ ကား ၁ စီးကို ဘယ်လောက် ဘယ်လောက်ဆိုပြီးလည်းတောင်းတယ်။ ဆက်ကြေးကောက်နေတဲ့ ကောင်တွေပေါ့။ အနုနည်းနဲ့ ဓါးပြတိုက်နေတဲ့ပုံစံမျိုးတွေလုပ်နေတာ။” လို့ ဗိုလ်မိုက်ခဲက ဆက်ပြောပါတယ်။

ဒီတိုက်ခိုက်မှုကို Myingyan Black Tiger – MBT မြင်းခြံခရိုင်တပ်ရင်း ၉၊ ဗိုလ်စားပြောက်ကျားတပ်ဖွဲ့နဲ့ BGF တို့က ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့မတ် ၁ ရက်ကလည်း မြင်းခြံမြို့နယ်၊ ကျောက်ပြုတ်-တူးရွင်းဘိုရွာကြားနဲ့ မြင်းခြံမြို့-ကုက္ကဲကျေးရွာအကြားမှာ စစ်ကောင်စီတပ်ဖွဲ့ဝင်တွေနဲ့ဒေသခံကာကွယ်ရေးတပ်တို့ အပြန်အလှန်ပစ်ခတ်မှုတွေဖြစ်ခဲ့ပါသေးတယ်။

စာတည်း – လင်း

ဘုတလင်၊ မတ် ၃၊ ၂၀၂၃။

စစ်ကိုင်းတိုင်း၊ ဘုတလင်မြို့က စစ်ကောင်စီ စစ်ဆေးရေးဂိတ်ကို မတ်လ ၂ ရက်မနေ့ကမနက်အစောပိုင်းမှာ အလစ်အငိုက် ဝင်ရောက်တိုက်ခိုက်ခဲ့တာကြောင့် စစ်သား ၃ ဦး သေဆုံးကာ သေနတ် ၂ လက်နဲ့ ကျည်မျိုးစုံကိုလည်း သိမ်းဆည်းနိုင်ခဲ့တယ်လို့ Depeyin Local Mobile Team ဆီက သိရပါတယ်။

ဘုတလင်မြို့အထွက်၊ မုံရွာ – ရေးဦးကားလမ်းပေါ်က အဆိုပါဂိတ်ကို မနေ့ကမနက် ၅ နာရီလောက်မှာ ဝင်ရောက်တိုက်ခိုက်ခဲ့တာလို့ Kaung Kin Local Squad နဲ့ Local Mobile Team ရဲ့ စစ်ဗျူဟာမှူး ဗိုလ်ကောင်းကင်က ပြောပါတယ်။

“စစ်သား ၃ ယောက် မနက်အစောပိုင်း အိမ်စီးကားအဖြူနဲ့ ဂိတ်ကို ရောက်လာတာကို တိုက်ခိုက်ခဲ့တာပါ။ စစ်သားတွေ တချက်မှ ပြန်ပစ်ချိန်တောင် မရဘူး။ ပစ်ခတ်ချိန် ၅ မိနစ်အတွင်း နေရာမှာပဲ ပွဲချင်းပြီး သေကုန်တာပါ” လို့ ပြောပါတယ်။

အဲ့ဒီစစ်ကောင်စီဂိတ်ဟာ ဒေသခံပြည်သူတွေဆီက ပိုက်ဆံတောင်းကြမ်းသလို တောင်သူတွေရဲ့ ပဲဆီတွေကိုလည်း ပုံးအဝါနဲ့ ထည့်လို့ဆိုကာ သိမ်းယူတာတွေလည်း ပြုလုပ်လေ့ရှိတယ်လို့ သူကဆက်ပြောပါတယ်။

MA4 တွဲ ၁ လက်၊ MA 11 ၁ လက်၊ ၄၀-မမ အသီး ၁၅ လုံး၊ MA11 ကျည်ဘောက် ၄ ခု၊ လက်ပစ်ဗုံး ၂ လုံးနဲ့ 5.56 ကျည်တောင့်တွေကိုပါ သိမ်းဆည်းနိုင်ခဲ့တယ်လို့ ဆိုပါတယ်။

တိုက်ခိုက်မှုအတွင်း စစ်သား ၃ ဦး သေဆုံးခဲ့တယ်လို့ ကာကွယ်ရေးရဲဘော်တွေက ပြောပေမယ့် ဒီသေဆုံးနဲ့ပတ်သက်ပြီး မြေလတ်အသံက သီးခြားအတည်ပြုချက် မရရှိသေးပါဘူး။

ဒီစစ်ဆင်ရေးကို Local Mobile Teamနဲ့ ကြေးမုံတပ်ရင်း တပ်ခွဲ-၃၊ တပ်ရင်း ၁၂ ရွှေဘိုခရိုင် – တို့ ပူးပေါင်းကာ ပြောက်ကျားစစ်ဆင်ရေးအဖြစ် တိုက်ခိုက်ခဲ့တာလို့ သိရပါတယ်။

Depeyin Local Mobile Team ရဲ့ထုတ်ပြန်ချက်မှာတော့ အခုစစ်ဆင်မှုဟာ ဆပ်ပြာကျင်းတူမီး တိုက်ပွဲမှာ ကျဆုံးခဲ့ရတဲ့ အာဇာနည်ရဲဘော်တွေရဲ့ ၁ နှစ် ၈ လပြည့် ကြေကွဲဝမ်းနည်းဖွယ် အမှတ်တရနေ့အတွက် သူရဲ‌‌ကောင်းတို့အမှတ်တရ အထူးစစ်ဆင်ရေး ပြုလုပ်ခဲ့တာဖြစ်တယ်လို့ ဖော်ပြထားပါတယ်။

ဒီပဲယင်းမြို့နယ်၊ ဆပ်ပြာကျင်းရွာတိုက်ပွဲဟာ ပြီးခဲ့တဲ့နှစ် ဇူလိူင် ၂ ရက်က ဖြစ်ပွားခဲ့တာ ဖြစ်ပြီး စစ်ကောင်စီတပ်က အင်အား အလုံးအရင်းသုံးကာ တိုက်ခိုက်ခဲ့တာကြောင့် ဒေသခံပြည်သူ့ကာကွယ်ရေး ရဲဘော် ၂၆ ဦး ကျဆုံးခဲ့တယ်လို့ Depeyin Local PDF Team ရဲ့ သတင်းပြန်ကြားရေးတာဝန်ခံဆီက သိရပါတယ်။

Depeyin Local Mobile Team အဖွဲ့ဟာ ဇန်နဝါရီလ ၂၉ ရက်ကလည်း ဒီပဲယင်းမြို့တွင်းကို ဝင်ရောက်တိုက်ခိုက်ခဲ့ရာ စစ်သား ၃ ဦး ပြင်းထန်ဒဏ်ရာရခဲ့ပြီး ဒလန်လို့ သတင်းကြီးသူ တဦးကိုပါ ရှင်းလင်းခဲ့ပါသေးတယ်။

စာတည်း – လင်း