စစ်ကိုင်း၊ ဒီဇင်ဘာ ၂၆၊ ၂၀၂၂။

စစ်ကိုင်းတိုင်း၊ မုံရွာမြို့၊ အမှတ် ၂ ရဲစခန်းက စခန်းမှူးနဲ့ရဲတပ်သားတွေလိုက်ပါလာတဲ့ကား ဒီဇင်ဘာလ ၂၆ ရက်ဒီမနက်ပိုင်းမှာ ပစ်ခတ်တိုက်ခိုက်ခံခဲ့ရပါတယ်။

စခန်းမှူးအပါအဝင် ၇ ဦးလိုက်လာတဲ့ကားကို မုံရွာမြို့၊ နန္ဒရပ်ကွက်၊ သမစိတ္တလမ်း၊ အင်ကြင်းခိုင်ဟိုတယ်အနီးမှာ ဒေသခံကာကွယ်ရေးတပ်ဖွဲ့ဝင်တွေက တိုက်ခိုက်ခဲ့တာဖြစ်ပြီး တိုက်ခိုက်မှုကြောင့် စခန်းမှူးနဲ့ ရဲ ၂ ဦး နေရာတင်သေဆုံးခဲ့တယ်လို့ မုံရွာခရိုင်တပ်ရင်း(၇) – Lightning People Defence Force တာဝန်ခံကပြောပါတယ်။

“မုံရွာမြို့ပေါ်က နန္ဒဝန်ရပ်ကွက်၊ အင်းကြင်းခိုင်ဟိုတယ်နားက ပစ်တိုင်းထောင်ကွမ်းယာဆိုင်ရှေ့မှာ ကွမ်းယာဝယ်ကြတာ၊ ကားပေါ်မှာအမှတ် ၂ စခန်းမှူးအပါအဝင် ၆ ယောက်နဲ့ စခန်းမှူးရဲ့မိန်းမလည်း ပါတယ်။ အဲဒီအမျိုးသမီးကလည်း ကွမ်းယာဆိုင်ဘေးမှာထိုင်စောင့်နေတာ။ သေတဲ့အထဲမှာ စခန်းမှူးတယောက်အပြင် သူ့ရဲ့ဘော်ဒီကပ် ၂ ယောက်ပါတယ်။ အောက်ကို ဆင်းပစ်တဲ့ ၂ ယောက်လည်းစုတ်ပြတ်နေပြီး သွေးအိုင်ထဲမှာပါ” လို့ ပြောပါတယ်။

အပြန်အလှန်ပစ်ခတ်ချိန် ၂ မိနစ်ဝန်းကျင်သာကြာခဲ့ပြီး အဆိုပါရဲတွေဘက်က ကား ၂ စီးနဲ့အင်အားထပ်ရောက်လာလို့ ပြန်ဆုတ်ခွာလာခဲ့ရတယ်လို့ ဆိုပါတယ်။

ဒီတိုက်ခိုက်မှုကို မုံရွာခရိုင်တပ်ရင်း(၇) – Lightning People Defence Force၊ Black Falcon မြို့ပြပျောက်ကြားအဖွဲ့တို့ ပူးပေါင်းလုပ်ဆောင်ခဲ့တာဖြစ်ပြီး ကာကွယ်ရေးရဲဘော်တဦးလည်း ထိခိုက်ဒဏ်ရာရရှိခဲ့တယ်လို့ သိရပါတယ်။

ပြီးခဲ့တဲ့ဒီဇင်ဘာလ ၂၁ ရက်ကလည်း မုံရွာမြို့နယ်၊ တောပုကျေးရွာအနောက်ဘက်ခြမ်းရှိ တောဝါကျောင်းအနီးမှာ ကင်းပုန်းဝတ်နေတဲ့ပျူစောထီးတွေကို မုံရွာခရိုင်တပ်ရင်း(၇) – Lightning People Defence Force အဖွဲ့က လက်နက်ကြီးနဲ့ပစ်ခတ်တိုက်ခိုက်ခဲ့ရာ ပျူစောထီး ၅ ဦးသေဆုံးခဲ့ပါသေးတယ်။

မကွေး၊ ဇွန် ၅၊ ၂၀၂၂။

မကွေးမြို့ အမှတ် ၂ ရဲစခန်းက ရဲတပ်ဖွဲ့ဝင်တချို့ အချုပ်ဖြင့်ဖမ်းဆီးခံထားရပြီး တာဝန်မှူးနဲ့စခန်းမှူး စုံခုံဖွဲ့ပြီးစစ်ဆေးခံနေရတယ်လို့ မကွေးစစ်ကောင်စီ၊ ရဲတပ်ဖွဲ့နဲ့ နီးစပ်တဲ့သူတွေဆီက သိရပါတယ်။

မေလ ၃၁ ရက်နေ့က စစ်ကောင်စီမကွေးလေတပ်စစ်သားက အမှတ် ၂ ရဲစခန်းမှူးကို ထိုးကြိတ်တာကြောင့် စခန်းအတွင်းမှာရှိတဲ့ ရဲတပ်ဖွဲ့ဝင်တွေက လေတပ်သားကိုဝိုင်းဝန်းထိုးကြိတ်ခဲ့လို့ လက်ရှိမှာ ထိုးကြိတ်ခဲ့တဲ့ရဲတပ်ဖွဲ့ဝင်တွေကို ဖမ်းချုပ်ထားတယ်လို့သိရပါတယ်။

ဒါ့အပြင် ရန်ဖြစ်တဲ့ဖိုင် လူမှုကွန်ယက်ပေါ်ပြန့်နှံ့ခဲ့တာနဲ့ပတ်သက်လို့ အဲ့ဒီနေ့က တာဝန်မှူးကျတဲ့ ရဲအရာရှိနဲ့ ရဲစခန်းမှူးကိုတော့ စုံခုံဖွဲ့ပြီးစစ်ဆေးနေတယ်လို့ ဆိုပါတယ်။

“စခန်းတခုလုံးတော့မဟုတ်ဘူးလို့သိရတယ်။ အဲ့ဒီနေ့က တပ်ကလူကိုဝိုင်းထိုးတဲ့ထဲမှာပါတဲ့ သူတွေတော့ အချုပ်ကျနေတယ်။ စခန်းမှူးနဲ့အဲ့ဒီနေ့က တာဝန်ကျတာဝန်မှူးနဲ့ကိုတော့ ဗီဒီယိုဖိုင်ရိုက်တဲ့ကိစ္စနဲ့ စခန်းထဲရန်ဖြစ်တာကြောင့် အုပ်ချုပ်မှုလျော့နည်းဖြစ်စဥ်နဲ့ စုံ/ခုံ (စုံစမ်းစစ်ဆေးရေးခုံရုံး) ဖွဲ့ထားတယ်။ စုံ/ခုံပြီးလို့ သက်/ချုပ်(သက်သေခံအကျဥ်းချုပ်) ထွက်လာမှ သူတို့ကိုဖမ်းချုပ်သင့်/မသင့်ဆိုတာမျိုး ဆက်သွားမှာ” လို့ မကွေးရဲတပ်ဖွဲ့နဲ့နီးစပ်သူတဦးက မြေလတ်အသံကို ပြောပါတယ်။

အဲ့ဒီအမှတ် ၂ ရဲစခန်းဖြစ်တဲ့ကိစ္စနဲ့ပတ်သက်လို့ စခန်းတခုလုံးဖမ်းဆီးထားတာမျိုးမရှိဘဲ ရဲတပ်ဖွဲ့ဝင်တချို့ကိုဖမ်းဆီးစစ်ဆေးနေတာဖြစ်ပြီး အမှတ် ၂ ရဲစခန်းက ရဲတပ်ဖွဲ့ဝင်အားလုံးရဲ့မိုဘိုင်းလ်ဖုန်းတွေကိုတော့ သိမ်းဆည်းထားတာရှိတယ်လို့ မကွေးမြို့စစ်ကောင်စီနဲ့ နီးစပ်သူတဦးက ပြောပါတယ်။

ဒါ့အပြင် အဲ့ဒီတောင်တွင်းလမ်းပေါ်က အမှတ် ၂ ရဲစခန်းမှာ စစ်ကောင်စီတပ်ကတပ်စွဲထားတာမျိုးတော့မတွေ့ရဘူးလို့ မကွေးမြို့ခံတွေဆီက သိရပါတယ်။

အဆိုပါဖြစ်စဥ်ဖြစ်ပွားမှုနဲ့ ရိုက်ကူးထားတဲ့ဗီဒီယိုဖိုင် လူမှုကွန်ယက်ပေါ်ပြန့်နှံ့ခဲ့တာနဲ့ပတ်သက်လို့ မကွေး အမှတ် ၂ ရဲစခန်းက တပ်ဖွဲ့ဝင်တွေအပြင် မြို့နယ်၊ ခရိုင်၊တိုင်း ရဲတပ်ဖွဲ့ဝင်တွေပါ စစ်ဆေးခံနေရတာတွေရှိတယ်လို့ မကွေးရဲတပ်ဖွဲ့အသိုင်းအဝိုင်းထံကသိရပါတယ်။