ပဲခူး၊ ဒီဇင်ဘာ ၁၅၊ ၂၀၂၂။

ပဲခူးတိုင်း၊ ပြည်မြို့နယ်တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျကို စစ်ကောင်စီက ဒီဇင်ဘာ ၁၂ ရက် မနေ့က ပုဒ်မ ၆ ခုနဲ့ ထောင်ဒဏ် ၁၉ နှစ်ချမှတ်ခဲ့တယ်လို့မိသားစုဆီက သိရပါတယ်။

NLD အမတ် ဦးကျော်ဇေယျကို စစ်ကောင်စီတပ်ဖွဲ့တွေက ပြီးခဲ့တဲ့ ဇွန်လ ၉ ရက်မှာဖမ်းဆီးလိုက်ပြီး ရေကြည်အိုင် စစ်ကြောရေးမှာ ၁၀ ရက် ဖမ်းဆီးစစ်ဆေးခံရပြီးနောက် ဇူလိုင် ၂၉ ရက်မှာ ပြည်မြို့ ဒကစကို ပို့ကာ သြဂုတ် ၈ ရက်မှာတော့ပြည်ထောင်ကိုရောက်ရှိခဲ့ပါတယ်။

ဖမ်းဆီးခဲ့ပြီးတဲ့နောက် စစ်ကောင်စီက ဦးကျော်ဇေယျကို ပုဒ်မ ၆ ခုဖြစ်တဲ့ အကြမ်းဖက်မှု ၊ ရွေးကောက်ပွဲ ၊ ၅၀၅(က) ၂ ခါ ၊ ယစ်မျိုး ၊ ဘေးစီမံ စတဲ့ပစ်မှုတွေနဲ့ ဖမ်းဆီးထားပြီ ၆ လအကြာမှာ အမိန့်ချခဲ့တယ်လို့လည်းဆိုပါတယ်။

“ရေကြည်အိုင်စစ်ကြောရေးမှာ စုတ်ပြတ်သတ်နေအောင်ရိုက်တာ လူရုပ်တောင်မပေါ်ဘူး။ဖမ်းဆီးခံရတဲ့ ၆လလုံး မိသားစုဝင်တွေနဲ့ တွေ့ခွင့်မပေးပါဘူး။ စာတောင်ပေးလို့မရဘူးအခုလိုအမိန့်ချခံရတာတော့ခံပြင်းတာပေါ့။ မတရားအမိန့်တွေ သူတို့ချချင်သလိုချနေတာ မတရားမှန်းသိပေမဲ့လည်း အခုချိန်တော့ ကိုယ့်လူနေကောင်းကျန်းမာဖို့ဘဲအရေးကြီးတယ်ကိုယ့်ထက်တောင်ပေးဆပ်ထားရသူတွေတပုံကြီးရှိသေးတာပဲ ”လို့ ဦးကျော်ဇေယျရဲ့အမျိုးသမီးက မြေလတ်အသံကို ပြောပါတယ်။

ပြည်ထောင်တွင်းတရားရုံးမှာ ဦးကျော်ဇေယျကို ထောင်ဒဏ် (၁၉) နှစ်ချမှတ်တာကိုမိသားစုဝင်တွေက ကိုယ်တိုင်သွားပြီး ကြားနာရခြင်းမျိုးမဟုတ်ပဲ တဆင့်ပြောစကားကသာသိရှိရတယ်လို့ ဆိုပါတယ်။

ဦးကျော်ဇေယျဟာ ၂၀၁၅ ကနေ ၂၀၂၀ အထိရွေးကောက်ပွဲမှာ အနိုင်ရလွှတ်တော်ကိုယ်စားလှယ်တဦးဖြစ်ကာ လက်ရှိပြည်မြို့မှာ နိုင်ငံရေးမှုနဲ့ ဖမ်းခံထားရသူ ၅၀ဦးထက်မနည်းရှိနေပါတယ်။

ပဲခူး၊ အောက်တိုဘာ ၃၁၊ ၂၀၂၂။

ပဲခူးတိုင်းဒေသကြီး(အနောက်ပိုင်း)၊ ပြည်မြို့က နိုင်ငံရေးတက်ကြွလှုပ်ရှားသူ ပရဟိတသမားတဦးကို စစ်ကောင်စီက အကြမ်းဖက်ဥပဒေနဲ့ ထောင်ဒဏ် ၇ နှစ် ချမှတ်လိုက်ပါတယ်။

ယနေ့အောက်တိုဘာ ၃၁ ရက်နေ့မှာပဲ ပရဟိတသမားတဦးဖြစ်တဲ့ တက်ကြွလှုပ်ရှားသူ ကိုသိန်းမင်းထွန်းကို စစ်ကောင်စီရဲ့ အကျဉ်းထောင်တွင်း အထူးတရားရုံးကနေ အကြမ်းဖက်ဥပဒေပုဒ်မ ၅၂(က) နဲ့ ထောင်ဒဏ် ၇ နှစ်ကို ချမှတ်လိုက်တယ်လို့ သူနဲ့နီးစပ်သူများထံက သိရပါတယ်။

“ဒီနေ့အမိန့်ချတယ်။ ကျန်းမာရေး ကောင်းပါတယ်။ ခြေထောက်ကတော့ နဂိုအတိုင်း မဖြစ်ဘူး ဒဏ်ရာရထားတဲ့ဟာက ဘာဖြစ်လဲဆိုတော့ ခြေထောက်ဆက်တာမှာ အရိုးအက်တော့ မညီဘူး။ အခုဂျိုင်းထောက်နဲ့ နေရတယ်။ ထောင်ဆရာဝန်ကို ပြောထားတယ်လို့ ပြောတယ်။ နဂိုအတိုင်းကောင်းဖို့ သူတို့မိသားစုက ကြိုးစားပြီး လုပ်နေကြတယ်လို့ ကြားရတယ်။ ခြေထောက်က ခါတိုင်းလို မဟုတ်ဘူး။ ကိုက်နေတယ်လို့ ကြားတယ်။” လို့ ကိုသိန်းမင်းထွန်းနဲ့ နီးစပ်သူတဦးက မြေလတ်အသံကို ပြောပါတယ်။

ကိုသိန်းမင်းထွန်းဟာ နွေဦးတော်လှန်ရေးမှာ တက်ကြွစွာ ပါဝင်လှုပ်ရှားခဲ့ရာက စစ်ကောင်စီရဲ့ လိုက်လံဖမ်းဆီးခြင်းကို ရှောင်ရှားဖို့ တောတွင်းတနေရာမှာ ခိုလှုံနေရာက ပြီးခဲ့တဲ့ ၂၀၂၁ ခုနှစ် နိုဝင်ဘာလ ၁၀ ရက်နေ့မှာ စစ်ကောင်စီစစ်ကြောင်းရဲ့ စီးနင်းပစ်ခတ်ဖမ်းဆီးခြင်းကို ခံလိုက်ရပြီး သူနဲ့အတူ ကိုဖုန်းပြည့်ပိုင်၊ ကိုပြည့်စုံ နဲ့ ကိုကုလားလေး တို့ပါ ဖမ်းဆီးခံခဲ့ကြရတာ ဖြစ်ပါတယ်။

“ပစ်ခတ်ဖမ်းဆီးခံရတုန်းက ခြေထောက်က အခုအကောင်းအတိုင်းဖြစ်ဖို့ ခက်သွားပြီ။ သူက ပရဟိတကို တကယ်ကို လုပ်ခဲ့တာလေ။ ဆန္ဒပြတဲ့အချိန်မှာသာ ဖမ်းဆီးလို့ ထွက်ပြေးသွားခဲ့တာကနေ ဖြစ်သွားတာ။” လို့ သူနဲ့အတူ ပရဟိတလုပ်ကိုင်ခဲ့သူတဦးက ပြောပါတယ်။

ဖမ်းဆီးခံခဲ့ရတဲ့ ၄ ဦးထဲက ရွှေတောင်မြို့နယ် အကသ အဖွဲ့ဝင်တဦးဖြစ်တဲ့ ကိုဖုန်းပြည့်ပိုင်ကိုတော့ ပြီးခဲ့တဲ့ အောက်တိုဘာ ၁၄ ရက်နေ့က ပြည်အကျဉ်းထောင်တွင်း အထူးတရားရုံးကနေပဲ အကြမ်းဖက်ဥပဒေပုဒ်မ-၅၀(က)၊ ၅၂(က) တွေနဲ့ ထောင်ဒဏ် ၁၀ နှစ် ချခဲ့ပါသေးတယ်။

၂၀၂၂ ခုနှစ် စက်တင်ဘာလကနေ အောက်တိုဘာ ၁၅ ရက်နေ့အထိ ပြည်အကျဉ်းထောင်တွင်း ဖမ်းဆီးထားသူ ၂၀ ကျော်ကို အကြမ်းဖက်ဥပဒေဖြင့် ထောင် ၁၀ နှစ်စီချမှတ်ခံထားရပြီးနောက် အခုလို ကိုသိန်းမင်းထွန်းကို ထပ်မံထောင်ချခဲ့တာဖြစ်ပြီး ပြည်ခရိုင်ထဲမှာ အကြမ်းဖက်ဥပဒေနဲ့ ဖမ်းဆီးတရားစွဲဆို ထောင်ချခံထားရသူ ၁၅၀ ဝန်းကျင်မှာရှိတယ်လို့ အကျဉ်းထောင်အသိုင်းအဝန်းကနေ သိရပါတယ်။

ပဲခူး၊ ဇွန် ၂၉၊ ၂၀၂၂။

ပဲခူးတိုင်း(အနောက်ခြမ်း)၊ သာယာဝတီခရိုင်၊ လက်ပံတန်းမြို့၊ ဖြူစင်လူငယ်ပရဟိတအသင်းဥက္ကဌ ကိုဝင်းမင်းစိုး ဇွန်လ ၂၈ ရက်မနေ့က ထောင်ဒဏ် ၁၀ နှစ်ချမှတ်ခံခဲ့ရတယ်လို့ သူနဲ့နီးစပ်တဲ့သူတွေဆီက သိရပါတယ်။

ပြီးခဲ့တဲ့နှစ် အောက်တိုဘာလ ၃၁ ရက်နေ့က လက်ပံတန်းမြို့ပေါ်ကြံ့ခိုင်ရေးရုံးအပါအဝင် နေရာအများအပြားမှာ ဗုံးပေါက်ကွဲတာနဲ့ပတ်သက်ပြီး သူအပါ အဝင် ၂ ဦးကို PDF နဲ့ ပတ်သတ်တယ်ဆိုပြီး စွပ်စွဲဖမ်းဆီးခဲ့ရာကနေ သူ့ကိုသာယာဝတီထောင်တွင်းတရားရုံးက အခုလို ထောင် ၁၀ နှစ်ချမှတ်ခဲ့တာပါ။

“လက်ပံတန်းမှာဗုံးကွဲတာတွေနဲ့ပတ်သက်ပြီး PDF နဲ့ပတ်သက်တယ်ဆိုပြီး စွပ်စွဲပြီး ဖမ်းသွားတာ။ ကျနော်တို့သိသလောက်ကတော့ ဒီဗုံးကွဲတာတွေနဲ့ သူနဲ့ဘာမှမပတ်သက်ဘူး။ ဒလန်က ဖမ်းခိုင်းတာနဲ့ဖမ်းသွားတာ။ မနေ့ကထောင်တရာရုံးမှာဘဲ အကြမ်းဖက်ပုဒ်မနဲ့ ဆယ်နှစ်ချလိုက်တယ်ဆိုတာသိရတယ်” လို့ သူနဲ့နီးစပ်သူဒေသ ခံတဦးကမြေလတ်အသံကို ပြောပါတယ်။

ကိုဝင်းမင်းစိုးဟာ လက်ပံတန်းမြို့ပေါ် ပရဟိတလုပ်ငန်းတွေမှာ တက်ကြွစွာဆောင်ရွက်တဲ့သူဖြစ်ပြီးတော့ ပြီးခဲ့တဲ့နှစ် ဇွန်လ အခုလိုအချိန် လက်ပံတန်းမြို့မှာ ကိုဗစ်တတိယလှိုင်းပြင်းထန်ခဲ့စဥ်ကလည်း စစ်ကောင်စီက ဘာမှထောက်ပံ့ပေးမှုမရှိတာတောင် ဗော်လန်တီယာလုပ်ပြီး ပရဟိတအလုပ်တွေကို အားထည့်လုပ်ဆောင်သူဖြစ်တယ်လို့ ဒေသခံတွေက ပြောပါတယ်။

စစ်အာဏာသိမ်းပြီးတဲ့နောက်မှာ စစ်ကောင်စီတပ်က သူတို့ကိုဆန့်ကျင်တယ်လို့ ယူဆသူတွေကို PDF နဲ့ ပတ်သက်တယ်လို့စွပ်စွဲဖမ်းဆီးကာ အမြင့်ဆုံးပြစ် ဒဏ်တွေချမှတ်နေပြီး နိုင်ငံရေးအကျဥ်းသားများကူညီစောင့်ရှောက်ရေးအသင်း- AAPPရဲ့ စာရင်းတွေအရ မနေ့ကအထိ ဖမ်းဆီးခံထားရသူ ၁ သောင်း ၁ ထောင်ကျော်ရှိပြီး ၁၂၀၀ ကျော်ထောင်ဒဏ်ချမှတ်ခံထားရတယ်လို့ သိရပါတယ်။

တောင်ကုတ်၊ ဧပြီ ၂၈၊ ၂၀၂၂။

ရခိုင်ပြည်နယ် ၊ တောင်ကုတ်မြို့က CDM ကျောင်းဆရာမ တဦးကို စစ်ကောင်စီက ဒီနေ့ သံတွဲတရားရုံးကနေ ပုဒ်မ ၅၀ည နဲ့ ထောင်ဒဏ် ၁၀ နှစ်ချမှတ်လိုက်ပါတယ်။

စစ်တပ်က အာဏာသိမ်းတာလက်မခံပဲ CDM လုပ်ခဲ့တဲ့ အထက်တန်းပြဆရာမ ဒေါ်ချယ်ရီသက်ရှည်ကို ပြီးခဲ့တဲ့ ၂၀၂၁ ခုနှစ် နိုဝင်ဘာလ ၂၀ရက်က တောင်ကုတ်မြို့၊ ကံပိုင်ရပ်ကွက် ရွှေတောင်ရေခဲစက်နောက်လမ်းက နေအိမ်မှာ လာဖမ်းသွားခဲ့တာဖြစ်တယ်လို့ မိတ်ဆွေတဦး ‌ပြောပါတယ်။

” အရပ်၀တ်နဲ့ ၁၅ ယောက်လောက်က မနက် ၁၀နာရီလောက်မှာ အိမ်ကို ဝိုင်းပြီး စအဖနဲ့ စစ်တပ် ပေါင်းပြီး ဖမ်းလိုက်တာ သူ့ကို ဖမ်းပြီး ၅ရက် တောင်ကုတ်စစ်တပ်ထဲမှာ အစာမကျွေးဘဲ ထားတယ် ၂၅ရက်နို၀င်ဘာမှာ တောင်ကုတ်အချုပ်ကိုပြောင်းတယ်” လို့ ‌ ‌ဒေါ်ချယ်ရီသက်ရှည်ရဲ့ မိတ်ဆွေတဦးက ပြောပါတယ်။

၂၀၂၁ ခုနှစ် ဒီဇင်ဘာ ၂၃ရက်မှာ သံတွဲထောင်ကို ပို့ကာ တရားလိုဘက်ကို စစ်ဆေးတာတွေလုပ်ခဲ့ပြီး ၅လနီးပါး အကြာ အချုပ်ကျနေခဲ့ရာက ဧပြီလ ၂၈ရက် ဒီနေ့ညနေပိုင်းမှာ သံတွဲတရားရုံးက အကြမ်းဖက်တိုက်ဖျက်ရေးဥပဒေပုဒ်မ ၅၀ည နဲ့ ထောင် ၁၀နှစ်ချမှတ်လိုက်တာဖြစ်ပါတယ်။

” သူအဖမ်းခံရတဲ့ နေ့ကတော့ အိမ်စီးကားနဲ့လာဖမ်းတာ ကားပေါ်ကနေ ရပ်ကွက်ကတယောက်ကို တော့မှာခဲ့ သူ့အတွက်မပူနဲ့ သူမဟုတ်တာ ဘာမှမလုပ်ထားဘူး အမှန်တရားအတွက်ဘဲ သူ့အမေနဲ့ သားတွေကိုတော့ စောင့်ရှောက်ပေးပါလို့ မှာတယ်” လို့ မိတ်တွေ တဦးက ပြောပါတယ်။

အသက် ၄၅ နှစ်နီးပါး ရှိပြီဖြစ်တဲ့ အထက်တန်းပြ ကျောင်းဆရာမ ဒေါ်ချယ်ရီသက်ရှည်က အမေနဲ့ သား နှစ်ယောက်အတွက် စာတစောင်ကိုလည်း ရေးပေးခဲ့တယ်လို့ သိရပါတယ်။

မြေလတ်အသံ၊ ဧပြီ ၁၂၊ ၂၀၂၂။

မိုင်းမတော်တဆပေါက်ကွဲမှုဖြစ်စဉ်မှာပါဝင်ခဲ့တဲ့ CDM ပညာရေးဝန်ထမ်းတဦးကို ပြီးခဲ့တဲ့ မတ်လ ၂၅ရက်က ပြည်မြို့ အကျဥ်းထောင်မှာ အကြမ်းဖက်ပုဒ်မ အပါအဝင်တခြားပုဒ်မတွေနဲ့ ထောင်ဒဏ် နှစ်၄၀ ချမှတ်လိုက်တယ်လို့ ဒေသခံတွေဆီကသိရပါတယ်။

ပြီးခဲ့တဲ့ ၂၀၂၁ ခုနှစ် ၉လပိုင်း ၆ရက် ညနေ ၆နာရီဝန်းကျင်လောက်က သဲကုန်းမြို့နယ် ဆင်တဲကုန်းရွာမှာ မိုင်းမတော်တဆပေါက်ကွဲခဲ့လို့ ပွဲချင်းပြီး တဦးသေဆုံးပြီး တဦးက စစ်ကြောရေးမှာ ဆေးကုမပေးပဲ သေဆုံးသွားသလို ဒဏ်ရာအနည်းငယ်ပဲ ရရှိခဲ့တဲ့ လက်ရှိထောင်ချခံလိုက်ရသူကိုတော့ စစ်ကောင်စီက ဖမ်းခေါ်သွားခဲ့တာဖြစ်ပါတယ်။

အခင်းဖြစ်ခဲ့တဲ့ နေရာမှာပဲ သေဆုံးသွားသူ ကိုရန်ကျော်က အသက် ၂၃နှစ်အရွယ်ဖြစ်ပြီး စစ်ကြောရေးကို ခေါ်သွားပြီးမှ ဆေးကုသမှုမခံရပဲ သေဆုံးသွားသူကတော့ ကိုအုန်းဟန် အသက် ၃၆ နှစ်တို့ဖြစ်ပါတယ်။

” စစ်ကြောရေးမှာ ဆေးကုမယ်ဆိုပြီးခေါ်သွားတာ ကိုအုန်းဟန်ကို ၊ ‌ရေဆာလို့ တောင်းသောက်တာ ပရဟိတအဖွဲ့တွေက ပေးမလို့ကို သေနတ်တွေနဲ့ ချိန်ပြီး မပေးခိုင်းဘူး၊ ဒဏ်ရာကပြင်းထန်တဲ့အပြင် ဆေးကုမပေးပဲ စကစရဲ့ စစ်ဆေးမှုပြင်းထန်တဲ့ ဒဏ်ကြောင့် သေသွားတာပါ” လို့ မိသားစုနဲ့ နီးစပ်သူတဦးက ပြောပါတယ်။

ကိုအုန်းဟန်က ပေါက်ကွဲမှုဖြစ်ပြီး နောက်တရက် D day ခေါ်တဲ့ရက်မှာ သေဆုံးသွားခဲ့ပါတယ်၊ ဖမ်းဆီးခံလိုက်ရတဲ့ CDM ပညာရေးဝန်ထမ်း ကိုဇင်လင်းထက်ကတော့ စစ်ကြောရေးမှာ နှိပ်စက်ခံရလို့ လက်ကျိုးထားပြီး စတီးရိုးထည့်ထားရတယ်လို့ သိရပါတယ်။

” ဒဏ်ရာပဲ ရပေမယ့် စကစရဲ့ စစ်ကြောရေးမှာဖိနှိပ်မှုဒဏ်ကြောင့် ညာဘက်လက်မှာ စတီးရိုးထည့်ထား‌ပေမယ့် လက်က ကောက်နေတုန်းပဲ၊ လက်ရှိကျန်းမာရေးက ကောင်းပါတယ်” လို့ ဒေသခံတဦးက ပြောပါတယ်။

ပြီးခဲ့တဲ့ မတ်လ ၁၅ရက်မှာတော့ မိသားစုဝင်တွေ မသိရပဲ ပြည်ထောင်မှာ အကြမ်းဖက်ပုဒ်အပါအဝင် ပုဒ်မလေးခုနဲ့ ထောင်ဒဏ်နှစ် ၄၀ ကျခံနေရတယ်လို့ ပြောပါတယ်။

” ထောက်ပို့ပုဒ်မ၊ ဖောက်ခွဲရေးပုဒ်မ၊ လက်နက်အက်ဥပဒေ၊ အကြမ်းဖက်ဆက်သွယ်ရေးပုဒ်မ စုစုပေါင်း ထောင်ဒဏ် နှစ်၄၀ ချလိုက်တာပါ၊ အဓိကက နှစ်၄၀ ချတဲ့ သတင်းကို စကစက အမှောင်ချထားတာ” လို့ ပြောပါတယ်။

ပွဲချင်းပြီး သေဆုံးသွားသူ ကိုရန်ကျော်ဟာ သဲကုန်းမြို့နယ်က တတိယနှစ်ကျောင်းသားတဦးဖြစ်ပြီး စစ်ကြောရေးမှာ သေဆုံးသွားသူ ကိုအုန်းဟန်ပိုင်တဲ့ ကြက်ခြံကိုတော့ စစ်ကောင်စီက ချိတ်ပိတ်ခဲ့ပြီး လက်ရှိမှာတော့ လုပ်ငန်းရှင်တဦးကို ရောင်းလိုက်တယ်လို့ သိရပါတယ်။

မြေလတ်အသံ၊ မတ် ၉၊ ၂၀၂၂။

ပုဒ်မ ၅၀၅ နဲ့ ဖမ်းဆီးပြီး ရွေးကောက်ပွဲမှာ မဲလိမ်မဲခိုးကြောင်း လက်မှတ်ရေထိုးပေးဖို့ စစ်ကောင်စီက ညှိနှိုင်းတာကို လက်မခံတဲ့ ပဲခူးတိုင်းအနောက်ခြမ်း၊ သာယာဝတီမြို့က ရွေးချယ်ခံ တိုင်းဒေသကြီးလွှတ်တော်ကိုယ်စားလှယ်ကို မတ်လ ၈ ရက် မနေ့ကမနက်ပိုင်းက သာယာဝတီထောင်တွင်းတရားရုံးကနေ ထောင်ဒဏ် ၃ နှစ် ချမှတ်ခဲ့ပါတယ်။

ဦးကျော်ကိုကိုစိန်ဆိုသူဖြစ်ပြီး ၂၀၂၀ ရွေးကောက်ပွဲမှာ သာယာဝတီမြို့နယ် တိုင်းဒေသကြီးလွှတ်တော်ကိုယ်စားလှယ်အဖြစ် အမျိုးသားဒီီမိုကရေစီအဖွဲ့ချုပ်ကနေ ရွေးချယ်ခံရသူဖြစ်တယ်လို့ သိရပါတယ်။

“သူက ၂၀၂၀ မှာ ရွေးချယ်ခံရတာပါ။ လွန်ခဲ့တဲ့ ၄ လလောက်က ဖမ်းဆီးခံရတာပါ။ မနေ့ကသူကို ပုဒ်မ ၅၀၅ နဲ့ထောင်သုံးနှစ်ချခဲ့ပါတယ်။ ပြီးတော့ စာရွက်အလွတ်ပေါ်မှာလည်း လက်ပွေရာတွေ အတင်းအဓမ္မနှိပ်ခိုင်းပါတယ်” လို့ ဦးကျော်ကိုကိုစိန်နဲ့ နီးစပ်သူတဦးက ပြောပါတယ်။

ဒါ့အပြင် နောက်နောင် NLD ပါတီနဲ့ ပတ်သက်ခြင်းမရှိဖို့နဲ့ ရွေးကောက်ပွဲမှာ မဲလိမ်မဲခိုးတာ မှန်ကန်ကြောင်းလက်မှတ်ထိုးပေးဖို့ ညှိနှိုင်းတာကိုလည်း ကိုကျော်ကိုကိုစိန်က ငြင်းဆိုခဲ့တယ်လို့လည်း သူက ဆက်ပြောပါတယ်။

အခုလာမယ့်သောကြာနေ့မှာလည်း သာယာဝတီထောင်တွင်းက ပုဒ်မ ၅၀၅ နဲ့ ဖမ်းဆီးထားသူအချို့ကို အမိန့်ချသွားဖို့ရှိတယ်လို့လည်း သိရပါတယ်။

ပဲခူး၊ ဒီဇင်ဘာ ၂၃၊ ၂၀၂၁။

ပဲခူးတိုင်းအနောက်ခြမ်း ပေါင်းတည်အကျဥ်းထောင်မှာ ပုဒ်မ၅၀၅ က နဲ့ အကျဥ်းချခံထားရသူ ၉ ဦးကို ဒီနေ့မနက်မှာ အကျဥ်းထောင်တရားရုံးကနေ ထောင်ဒဏ်၂နှစ်စီ ချမှတ်ခဲ့တယ်လို့ မိသားစုဝင်တဦးကပြောပါတယ်။

သူတို့တွေဟာပြီးခဲ့တဲ့ မတ်လ ၂၇ရက် တော်လှန်ရေးနေ့က ပေါင်းတည်မြို့မှာငြိမ်းချမ်းစွာဆန္ဒပြနေတုန်း စစ်ကောင်စီက ပစ်ခတ်ဖြိုခွင်းလို့ ဖမ်းဆီးခံခဲ့ရသူတွေ ဖြစ်ပါတယ်။

“အခုမနက်ပဲ ထောင်တရားရုံးကနေ ပုဒ်မ ၅၀၅ နဲ့ တရားစွဲခံရသူ ၉ဦးကို ထောင်ဒဏ် ၂ နှစ်စီ ချမှတ်လိုက်တယ်၊ အားလုံးက အုန်းနဲစမ်းရွာကပါ၊ အဲ့အထဲမှာမှ ထက်ကိုကိုလင်းဆိုတဲ့ တယောက်ကကျ ပုဒ်မ ၃၀၇နဲ့ ကပ်ခံရပြီး ၃၀၇အတွက်က ထောင်တနှစ်ချလိုက်တော့ သူက သုံးနှစ်ဖြစ်သွားတယ်” လို့ လိုက်ပါအကျိုးဆောင်ပေးနေသူတဦးက ပြောပါတယ်။

သူတို့အားလုံးဟာတရွာတည်းသားတွေဖြစ်ပြီး ချုပ်နှောင်ခံနေရတာ ၉ လရှိပြီဖြစ်ကြောင်း သိရပါတယ်။