ခရီးသွား

ချောင်ဦး၊ မတ် ၆၊ ၂၀၂၅

စစ်ကိုင်းတိုင်း၊ ချောင်းဦးမြို့နယ်၊ မုံရွာ-မန္တလေးလမ်းပိုင်းရှိ ငါးယှန်ကျေးရွာအနီးမှာ တိုက်ပွဲဖြစ်ချိန် ၃ နှစ်အရွယ်ကလေးငယ်အပါအဝင် ခရီးသွားပြည်သူ ၃ ဦးသေဆုံးပြီး ၂ ဦးဒဏ်ရာရတယ်လို့ ချောင်းဦးမြို့နယ်ပြည်သူ့ကာကွယ်ရေးအဖွဲ့ တာဝန်ရှိသူဆီက သိရပါတယ်။

မတ် ၄ ရက် ညနေ ၃ နာရီခန့်မှာ မုံရွာဘက်ကနေ ချောင်းဦးဘက်ကို သံပြားကာထားတဲ့ စစ်ကား ၂ စီးမောင်းလာချိန် ဒေသကာကွယ်ရေးပူးပေါင်းတပ်တွေဘက်က စတင်တိုက်ခိုက်ခဲ့ရာကနေ တိုက်ပွဲဖြစ်ပြီး လမ်းတွေပိတ်ခဲ့တယ်လို့ ဆိုပါတယ်။

အဲ့ဒီအချိန်နတ်ရေကန်ရွာမှာ အထိုင်ချထားတဲ့စစ်ကောင်စီတပ်သားတွေကလည်း မန္တလေးဘက်ကနေ မုံရွာဘက်ကိုလာတဲ့ ခရီးသည်တင်ယာဥ် ၁ စီးပေါ်မှာတက်လိုက်လာပြီး တိုက်ပွဲဧရိယာအတွင်းကို ဖြတ်မောင်းခိုင်းပြီးနောက် တိုက်ပွဲဖြစ်နေတဲ့နေရာအရောက်မှာ ကားပေါ်ကနေ ဆင်းနေခဲ့ကြတယ်လို့ ဆိုပါတယ်။

တိုက်ပွဲဖြစ်ပွားနေချိန် မြပုလဲဂိတ်မှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေဘက်က လက်နက်ကြီးတွေဆက်တိုက်ပစ်ခတ်သလို၊ ပါရာမိုတာကနေလည်းဗုံးချတိုက်ခိုက်တာတွေရှိခဲ့တယ်လို့ ချောင်းဦးမြို့နယ်ပြည်သူ့ကာကွယ်ရေးအဖွဲ့ ဒုတာဝန်ခံကပြောပါတယ်။

“ကားက မောင်းလာလိုက်ရတော့ ကျနော်တို့ဘက်ရောက်လာတော့ ရဲဘော်တွေက ကားပေါ်က ခရီးသည်တွေကိုဆင်းခိုင်းပြီး လမ်းဘေးဝပ်ခိုင်းနေချိန်မှာ ပါရာမိုတာကဗုံးချတာမှာ သားအမိကထိတယ်။ သားအမိနှစ်ယောက်ထိတာကတော့ ပါရာမိုတာကချတဲ့ဗုံးထိမှန်တာ။ “လို့ သူကပြောပါတယ်။

တိုက်ပွဲအတွင်း မုံရွာမြို့၊ နွားခြံကုန်းနေ အသက် ၂၇ နှစ်အရွယ် မမေသရဖီဦးမှာ ဦးခေါင်းထိခိုက်ဒဏ်ရာနဲ့ နေရာမှာတင်သေဆုံးသွားပြီး သမီးဖြစ်သူ အသက် ၃ နှစ်အရွယ်မကေယံထက်မှာလည်း ဦးခေါင်းဒဏ်ရာရပြီး ဆေးရုံပို့ဆောင်ချိန်မှာသေဆုံးခဲ့ပါတယ်။

ဒါ့အပြင် အသက် ၅၀ ကျော်အရွယ်အမျိုးသမီးကြီး ၁ ဦးလည်းသေဆုံးပြီး ကားပေါ်ပါ အသက် ၄၀ ဝန်းကျင် အမျိုးသား ၁ ဦးနဲ့အမျိုးသမီး ၁ ဦးတို့လည်းဒဏ်ရာရခဲ့တယ်လို့ဆိုပါတယ်။

အဆိုပါ ထိခိုက်သေဆုံးသူအားလုံးက ဗုံးစထိမှန်တာလား၊ အပြန်အလှန်ပစ်ခတ်မှုအတွင်း ကျည်ထိမှန်သေဆုံးခဲ့တာလားဆိုတာကိုတော့ မြေလတ်အသံကသီးခြားအတည်မပြုနိုင်သေးပါဘူး။

ညနေ ၄ နာရီကျော်မှာ တိုက်ပွဲပြီးဆုံးသွားခဲ့ပြီး စစ်ကောင်စီဘက်က ထိခိုက်သေဆုံးအခြေနေနဲ့ လက်နက်သိမ်းဆည်းရမိမှုတွေကိုတော့ အသေးစိတ်ထုတ်ပြန်ပေးသွားမယ်လို့ ချောင်းဦးမြို့နယ် ပြည်သူ့ကာကွယ်ရေးအဖွဲ့ ဒုတာဝန်ခံကပြောပါတယ်။

ဖေဖော်ဝါရီ ၂၅ ရက်ကလည်း ချောင်းဦးမြို့နယ်၊ ချောင်းမကျေးရွာနဲ့ နွယ်ခွေကျေးရွာတွေမှာ လေကြောင်းကနေဗုံးကြဲခံရပြီး စစ်ကြောင်းထိုးပစ်ခတ်ခံရလို့ ပကဖအဖွဲ့ဝင် ၁ ဦး၊ ပြည်သူ ၁၁ ဦးသေဆုံးပြီး ၉ ဦးဒဏ်ရာရတယ်လို့ သိရပါတယ်။

စာတည်း – လင်း