ဝေါ၊ ဇူလိုင် ၁၈၊ ၂၀၂၅

မွန်ပြည်နယ်၊ ကျိုက်ထိုမြို့နယ်၊ မရမ်းချောင်ကျေးရွာအနီး ရန်ကုန်-မော်လမြိုင်လမ်းပိုင်းမှာ ဖွင့်လှစ်ထားတဲ့ စစ်ကောင်စီရဲ့ အမြဲတမ်းစစ်ဆေးရေးဂိတ်ကို ပဲခူးတိုင်း၊ ဝေါမြို့နယ်၊ ညောင်ခါးရှည်ကျေးရွာရှိ X-ray စစ်ဆေးရေးဂိတ်အနီးမှာ ပြောင်းလဲဖွင့်လှစ်လိုက်တယ်လို့ ဝေါပကဖထံက သိရပါတယ်။

ညောင်ခါးရှည်မှာ ပြောင်းလဲဖွင့်လှစ်လိုက်တဲ့ အမြဲတမ်းစစ်ဆေးရေးဂိတ်ကို ဇူလိုင် ၁၇ ရက် မနေ့က စစ်ကောင်စီပဲခူးတိုင်းဝန်ကြီးချုပ် တက်ရောက်ဖွင့်လှစ်ပေးခဲ့ပြီး စစ်ဆေးမှုတွေစတင်နေပြီလို့ ဆိုပါတယ်။

” ကျိုက်ထို၊ မရမ်းချောင်ဂိတ်ကို အဲဒီဘက်ကို ရွှေ့လိုက်တာ။ ဂိတ်ပေါင်းဖွင့်လိုက်တဲ့ သဘောပဲ ။ စကစဘက်က တစုတဝေးတည်းရှာဖွေစစ်ဆေးရေးလုပ်မယ်ဆိုတဲ့ သဘောမျိုးပါပဲ။ သူတို့ကတော့ ပိုပြီးတော့ ထိန်းချုပ်နိုင်ဖို့၊ ချုပ်ကိုင်နိုင်အောင်လုပ်တာလို့ပဲ မြင်တယ်”လို့ ဝေါမြို့နယ်ပကဖတာဝန်ခံက ပြောပါတယ်။

မရမ်းချောင်းစစ်ဆေးရေးဂိတ်ဟာ တော်လှန်ရေးအဖွဲ့တွေရဲ့ မကြာခဏလာရောက်တိုက်ခိုက်တာ ခံနေရတာကြောင့်လည်း စစ်ဆေးရေးအဖွဲ့တွေရဲ့ လုံခြုံရေးပိုစိတ်ချရအောင် နေရာပြောင်းရွှေ့တာလည်းဖြစ်နိုင်တယ်လို့ ဆိုပါတယ်။

အသစ်ဖွင့်လှစ်တဲ့ စစ်ဆေးရေးဂိတ်မှာ စစ်ကောင်စီရဲ့အကောက်ခွန်ဌာနဦးဆောင်ကာ တရားမဝင် ကုန်ပစ္စည်းတွေ စစ်ဆေးမှာဖြစ်ပြီး ညောင်ခါးရှည် X-ray စစ်ဆေးရေးဂိတ်ကတော့ မူးယစ်ဆေးဝါး၊ လက်နက်ခဲယမ်းတွေကို အဓိကထားစစ်ဆေးမှုတွေပြုလုပ်မှာဖြစ်တယ်လို့ သိရပါတယ်။

ကျိုက်ထို၊ မရမ်းချောင်စစ်ဆေးရေးဂိတ်ဟာ ထိုင်းနိုင်ငံ နယ်စပ်ဒေသ မြန်မာပြည်တောင်ပိုင်း မွန်၊ကရင်ပြည်နယ်နဲ့ တနင်္သာရီတိုင်းတွေကနေ ဝင်ရောက်လာတဲ့ ကုန်ပစ္စည်းတွေကို အဓိကထားစစ်ဆေး ဖမ်းဆီးတဲ့ အမြဲတမ်းစစ်ဆေးရေးဂိတ် ဖြစ်ပါတယ်။

စာတည်း – ဟိန်းစံ

ညောင်လေးပင်၊ ဧပြီ ၁၉၊ ၂၀၂၅။

ပဲခူးတိုင်း၊ ညောင်လေးပင်မြို့ကနေ မွန်ပြည်နယ်၊ ကျိုက်ထိုမြို့နယ်၊ ကဒက်ချောင်းမှာ ဖမ်းဆီးခံထားရတဲ့ ညောင်လေးပင်ကပျူစောထီးမိသားစုဝင် ၄၀ ကျော်ကို ပြန်လွှတ်လိုက်ပြီး အဲ့ဒီထဲက အရေးပါတဲ့ပျူစောထီး ၆ ဦးကိုတော့ ဆက်လက်ဖမ်းဆီးစစ်ဆေးနေတယ်လို့ အမှတ် ၂ စစ်ဒေသခွဲ၊ အမှတ် ၂၇ စစ်ဗျူဟာတာဝန်ရှိသူဆီက သိရပါတယ်။

ဧပြီ ၁၈ ရက်မှာ ဖမ်းမိထားတဲ့အထဲပါလာတဲ့ အသက် ၁၀ နှစ်အောက် ကလေးငယ်တွေ အမျိုးသမီးတွေနဲ့ အသက် ၁၈ နှစ်မပြည့်သေးတဲ့ လူငယ်တွေကို ပြန်လွှတ်ပေးလိုက်တယ်လို့ ဆိုပါတယ်။

“ခေါင်းဆောင်ကတော့ လှိုင်မင်းပါ။ သူနဲ့အတူ ပျူအဖွဲ့ဝင် ၄ ယောက်ပါတယ်။ သူနဲ့ဆို ၅ ယောက်ပေါ့။ ကြီးမားတဲ့ပစ်မှုတွေကို အများကြီး ကျူးလွန်ထားကြပါတယ်။ သူ့မိသားစုဝင်တွေကိုတော့ ကောင်းကောင်းမွန်မွန်ကျွေးမွေးစောင့်ရှောက်ထားပြီး ပြန်လွှတ်ပေးခဲ့ပါတယ်”လို့ အမှတ် ၂၇ စစ်ဗျူဟာ တာဝန်ရှိသူတဦးကပြောပါတယ်။

ပျူစောထီးတွေကို ဖမ်းဆီးတာဟာ စစ်ကောင်စီထောက်ခံချန်နယ်တွေကဝါဒဖြန့်သလိုမျိုး ဘုရားဖူး ပြည်သူတွေကို အကြောင်းမဲ့ဖမ်းဆီးတာမျိုးမဟုတ်ဘဲ ပျူစောထီးတွေဖြစ်ကြောင်း သတင်းအတိအကျရတဲ့အတွက် ဖမ်းဆီးတာဖြစ်တယ်လို့ အထက်ပါ တာဝန်ရှိသူကဆက်ပြောပါတယ်။

မိသားစုဝင်တွေကိုပြန်လွှတ်ပေးခဲ့ပြီး ပျူစောထီးတွေဖြစ်တဲ့ ခေါင်းဆောင် လှိုင်မင်း၊ ဇနီးဖြစ်သူ ယမင်း၊ သားဖြစ်သူ မင်းမော်ဦး၊ မဲကြီး၊ ကျော်ကျော်ဦး၊ သိန်းဌေးတို့ကို ဆက်လက်ဖမ်းဆီးထားတယ်လို့ ဆိုပါတယ်။

ဆက်လက်ဖမ်းဆီးထားသူ ၆ ဦးက လူသတ်အလောင်းဖျောက်တာ၊ ခမရ ၂၀ က စစ်ကောင်စီ တပ်ဖွဲ့ဝင်တွေနဲ့ပေါင်းပြီး ရွာတွေမီးရှို့တာ၊ လူငယ်တွေကို စစ်မှုထမ်းပေါ်တာဆွဲဖမ်းဆီးပြီး ငွေညှစ်တဲ့ကိစ္စတွေကိုကျူးလွန်ထားတယ်လို့ စစ်ဆေးထားမှုအရ သိရတယ်လို့ဆိုပါတယ်။

စစ်ဆေးပေါ်ပေါက်ချက်တွေအရ ကျူးလွန်ထားတဲ့ပြစ်မှုတွေအတွက် ထိရောက်တဲ့ ပြစ်ဒဏ်ရအောင် ဆောင်ရွက်သွားမှာဖြစ်ပြီး ပြစ်မှုပြစ်ဒဏ်ကတော့ မဆုံးဖြတ်ရသေးဘူးလို့ အထက်ပါ တာဝန်ရှိသူကဆက်ပြောပါတယ်။

ဧပြီ ၁၅ ရက်နေ့လယ် ၂ နာရီခန့်မှာ ကဒက်ချောင်းရှိ ဝါဆိုမိုးစားသောက်ဆိုင်မှာရှိနေတဲ့ ပျူစောထီး ခေါင်းဆောင် လှိုင်မင်း၊ ဇနီးဖြစ်သူ ယမင်းနဲ့ ပျူစောထီး ဒုခေါင်းဆောင် မဲကြီး အပါအဝင် အမျိုးသား၊ အမျိုးသမီး ၄၀ ကျော်ကို အမှတ် ၂၇ စစ်ဗျူဟာတပ်ဖွဲ့ဝင်တွေက ဖမ်ဆီးခဲ့တာဖြစ်ပါတယ်။

ပုံစာ – ပျူစောထီးခေါင်းဆောင်လှိုင်မင်း။

သတင်း – ကျော်ကြီး၊ စာတည်း – လင်း

ပဲခူး၊ ဖေဖော်ဝါရီ ၁၄၊ ၂၀၂၅။

ပဲခူး၊ ရန်ကုန်နဲ့ မွန်ဒေသတွေက တော်လှန်ရေးအင်အားစုတွေပါဝင်ပြုလုပ်တဲ့ အစည်းအဝေးနေရာ လေယာဉ်နဲ့ဗုံးကြဲခံရလို့ ၃ ဦးကျဆုံးခဲ့ပြီး ၅ ဦးဒဏ်ရာရခဲ့တယ်လို့ အစည်းအဝေးတက်ရောက်ခဲ့သူ အဖွဲ့ဝင်တွေထံက သိရပါတယ်။

မွန်ပြည်နယ်၊ ကျိုက်ထိုနယ်၊ ပိန္နဲကုန်းကျေးရွာအတွင်း ပဲခူးတိုင်းနဲ့ KNU တပ်မဟာ ၁ လက်အောက် တော်လှန်ရေးအင်အားစုတွေ အစည်းအဝေးပြုလုပ်နေချိန် ဖေဖော်ဝါရီ ၁၃ ရက် မနေ့မနက် ၁၁ နာရီခန့်မှာ စစ်ကောင်စီတပ်က ဗုံး ၄ လုံးကြဲချ တိုက်ခိုက်ခဲ့တာလို့ ဆိုပါတယ်။

“ကျနော်တို့ ဒီဘက်က အဖွဲ့တွေအစည်းအဝေးလုပ်နေချိန်မှာ ပေါင် ၂၀၀ နဲ့လာချသွားတာ၊ စုစုပေါင်း ၄ လုံး။ ၃ မိနစ် ၄ မိနစ်လောက်ခြားလာချတာ။ တစီးပြီးတစီးလှည့်ပြီးချတာ။ စခန်းပတ်လည်ကိုကျတာ။” လို့ အစည်းအဝေးတက်ရောက်ခဲ့သူ ကာကွယ်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

ဗုံးကြဲတိုက်ခိုက်ခံရလို့ အစည်းအဝေးတက်ရောက်ခဲ့သူတွေအနက် ဒိုက်ဦးပကဖ အဖွဲ့ဝင် ၁ ဦး၊ ခရမ်းပကဖ အဖွဲ့ဝင် ၂ ဦး စုစုပေါင်း ၃ ဦး ဗုံးစထိမှန် ကျဆုံးခဲ့ပြီး နောက်ထပ် ၅ ဦး ထိခိုက်ဒဏ်ရာရသွားသလို ကျေးရွာဘုန်းကြီးကျောင်းနဲ့ နေအိမ် ၂ လုံးပျက်စီးသွားခဲ့တယ်လို့ သိရပါတယ်။

ကျဆုံးတပ်ဖွဲ့ဝင်တွေရဲ့ အသေးစိတ်အချက်အလက်တွေနဲ့ပတ်သက်ပြီး လုံခြုံရေးအခြေအနေအရ ထုတ်ဖော်ပြောလို့မရနိုင်သေးဘူးလို့ ၎င်းက ဆိုပါတယ်။

ကျိုက်ထိုနယ်ထဲမှာ တော်လှန်ရေးတပ်ဖွဲ့ဝင်တွေ ပြုလုပ်တဲ့အစည်းအဝေး လေကြောင်းကဗုံးကြဲတိုက်ခိုက်ခံရလို့ ကာကွယ်ရေးတပ်ဖွဲ့ဝင်တချို့ကျဆုံးမှုရှိခဲ့ကြောင်း ကျိုက်ထိုနယ်အတွင်းလှုပ်ရှားနေတဲ့ နောက်ထပ် PDF တပ်ဖွဲ့ဝင်တဦးကလည်း အတည်ပြုပါတယ်။

အစည်းအဝေးလုပ်နေချိန် လေကြောင်းကနေ လာရောက်ဗုံးလာကြဲတိုက်ခိုက်သွားတာဟာ အစည်းအဝေးလုပ်မယ့်သတင်း ပေါက်ကြားတာကြောင့်ဖြစ်နိုင်တယ်လို့ အစည်းအဝေးတက်ရောက်ခဲ့သူ တပ်ဖွဲ့ဝင်က သုံးသပ်ပြောပါတယ်။

လေကြောင်းကနေဗုံးကြဲပြီးနောက် နာရီဝက်ခန့်အကြာမှာ သိမ်ဇရပ်အခြေစိုက် ခမရ ၂၀၇ နဲ့ အမတ ၃၁၀ တပ်တွေကနေ ဒရုန်းတွေတက်လာပြီး ပိန္နဲကုန်းကျေးရွာအနီးတဝိုက်ကို ဗုံးသီး ၆ လုံးခန့် ထပ်မံကြဲချခဲ့ပေမယ့် ဒရုန်းဗုံးတိုက်ခိုက်မှုမှာတော့ လူထိခိုက်တာမရှိဘူးလို့ သိရပါတယ်။

ယမန်နေ့ညနေ ၄ နာရီခန့်မှာပဲ ကျိုက်ထိုမြို့နယ်၊ ကော်ကပ်ကျေးရွာကို စစ်ကောင်စီတပ်က တိုက်လေယာဉ် ၁ စီးနဲ့ ပေါင် ၅၀၀ ဗုံးတလုံးကြဲချခဲ့ရာ ကျေးရွာစာသင်ကျောင်း ၁ ကျောင်း ပျက်စီးခဲ့သေးတယ်လို့ ဆိုပါတယ်။

စာတည်း – ဟိန်းစံ