၅၀၅-က

သာယာဝတီ၊ မေ ၃၊ ၂၀၂၃။

ယနေ့ တနိုင်ငံလုံး အတိုင်းအတာနဲ့ ၅၀၅-က နဲ့ ဖမ်းဆီးထောင်ချခံထားရသူတွေကို လွတ်ငြိမ်းနဲ့ ပြန်လွတ်ပေးနေတာမှာ ပဲခူးတိုင်း(အနောက်ခြမ်း)၊ သာယာဝတီအကျဉ်းထောင်ကနေ နိုင်ကျဉ်း ၂၀၀ ကျော် လွတ်မြောက်ခဲ့ပေမယ့် CDM တချို့လည်း ကျန်နေသေးတယ်လို့ သိရပါတယ်။

လွတ်မြောက်လာသူတွေထဲမှာ ၅၀၅-က နိုင်ငံရေးအကျဉ်းသား ကျား ၁၃၀ ဦး၊ မ ၇၆ ဦးလွတ်မြောက်လာပြီး CDM အကျဉ်းထောင်ဆရာဝန်၊ CDM ကျောင်းဆရာ/ဆရာမ ၇ ဦးတို့ ပါဝင်ပြီး ၂ ဦး ကျန်ရှိနေသေးတယ်လို့ နိုင်ငံရေးအသိုင်းအဝန်းက သိရပါတယ်။

“သာယာဝတီနယ်ကအတော်များများ လွတ်တယ်။ အဲ့ဒီအထဲမှာ ၅၀၅.က နဲ့အဖမ်းခံထားရတဲ့ ဆရာဆရာမ ၇ ဦး ပါတယ်။ ၂ ဦးက လွတ်တဲ့အထဲမပါဘဲ ကျန်နေသေးတယ်” လို့ နိုင်ငံရေးလှုပ်ရှားနေသူတဦးက ပြောပါတယ်။

အဲ့ဒီပညာရေးဝန်ထမ်းတွေကို ၂၀၂၁ ခု၊ ဒီဇင်ဘာ ၁ ရက်နေ့က ဖမ်းဆီးခံခဲ့ရတာဖြစ်ပြီး၊ မူလတန်းကျောင်းအုပ် ၂ ဦး၊ အလယ်တန်းပြ ၃ ဦး၊ မူလတန်းပြ ၁ ဦးနဲ့ အထွေထွေလုပ်သား ၁ ဦးတို့ ဖြစ်ပါတယ်။

“ကိုယ့်မြို့နယ်က CDM သူရဲကောင်းတွေ လွတ်လာတော့ဝမ်းသာမိပါတယ်။ ထောင်ထဲမှာရှိမနေသင့်တဲ့သူတွေ ဖြစ်တယ်။ သူတို့ယုံကြည်ချက်နဲ့ CDM လုပ်တာ လုပ်ပိုင့်ခွင့်ရှိရမယ်။ ဒါကို စစ်ကောင်စီက နိုင်ထက်စီးနင်းနဲ့ ဖမ်းဆီးခဲ့တာပါ” လို့ သာယာဝတီဒေသခံတဦးက ပြောပါတယ်။

ကျန်ရှိနေသေးတဲ့ မူလတန်းပြ ဆရာမကိုတော့ အကြမ်းဖက်မှုတိုက်ဖျက်ရေးဥပဒေ ၅၀(ည)၊ အထွေထွေလုပ်သားကို အကြမ်းဖက်မှုတိုက်ဖျက်ရေးဥပဒေ ၅၂(ခ) တို့နဲ့ ဆက်လက်ဖမ်းဆီးထောင်ချထားတယ်လို့ ဆိုပါတယ်။

အလားတူ ပြည်အကျဉ်းထောင်မှ ၅၃ ဦး၊ ပေါင်းတည်အကျဉ်းထောင်က ၃ ဦးတို့ကိုလည်း ယနေ့လွတ်ပေးလိုက်တယ်လို့ သိရပါတယ်။

ယနေ့ ကဆုန်လပြည့်ဗုဒ္ဓနေ့ အထိမ်းအမှတ်ဟုဆိုကာ စစ်ကောင်စီက အကျဉ်းထောင်/အချုပ်နဲ့ စခန်းတွေမှာရှိတဲ့ ရာဇသတ်ကြီးပုဒ်မ ၅၀၅-က ထောင်ချခံထားရတဲ့ အကျဉ်း သား/သူ ၂၁၅၃ ဦးတို့ကို လွတ်ငြိမ်းခွင့်ပေးခဲ့ပြီး ရာဇဝတ်ကျင့်ထုံးဥပဒေပုဒ်မ ၄၀၁ ပုဒ်မခွဲ(၁)အရ “နောက်တစ်ကြိမ် ပြစ်မှုထပ်မံကျူးလွန်ပါက ၎င်းပြစ်ဒဏ်အပြင် လက်ရှိကျခံရန်ကျန်သော ပြစ်ဒဏ်များကိုပါ ဆက်လက်ကျခံပါမည်” ဆိုတဲ့ စည်းကမ်းသတ်မှတ်ချက်နဲ့ လွတ်ငြိမ်းခွင့်ပြုတာလို့ စစ်ကောင်စီက ထုတ်ပြန်ထားပါတယ်။

စာတည်း – 007

ပဲခူး၊ မေ ၃၊ ၂၀၂၃။

ပဲခူးတိုင်း(အနောက်ပိုင်း)၊ ပြည်အကျဉ်းထောင်ကနေ ၅၀၅-က ဖြင့် ဖမ်းဆီးထောင်ချထားသူများကို လွတ်ငြိမ်းချမ်းသာခွင့်ပေးလိုက်တယ်လို့ အကျဉ်းထောင်အသိုင်းအဝန်းက သိရပါတယ်။

ယနေ့ မေလ ၃ ရက် ကဆုန်လပြည့်နေ့မှာ ပြည်အကျဉ်းထောင်ကနေ ၅၀၅-က နဲ့ နိုင်ငံရေးအကျဉ်းသား ကျား ၃၅ ဦး နဲ့ မ ၁၄ ဦး လွတ်ပေးခဲ့သော်လည်း လွတ်ငြိမ်းစာရင်းပါဝင်ပြီးကာမှ သံသယနဲ့ ပြန်လည်ဖမ်းဆီးထိန်းသိမ်းခံရသူလည်း ရှိတယ်လို့ နိုင်ငံရေးအသိုင်းအဝန်းက သိရပါတယ်။

“ကျနော်တို့ သိတဲ့တယောက်ဆို လွတ်ငြိမ်းပါပြီးမှ မပါဘူးဆိုပြီး သံသယနဲ့ ပြန်ထိန်းထားတယ်။ သူ့ရင်ဝ ဆောင့်ကန်လိုက်သလို ဖြစ်တာပေါ့။ အခုမနက်မှ စာရင်းပြန်ဖျက်တယ်။ အပြင်က စောင့်နေကြတဲ့ သူမိသားစုရော အထဲကသူရော တလွဲဖြစ်ကုန်တာပေါ့” လို့ နိုင်ငံအသိုင်းအဝိုင်းနဲ့နီးစပ်သူ တဦးက မြေလတ်အသံကို ပြောပါတယ်။

လွတ်ငြိမ်းခွင့်ပေးသူတွေထဲမှာ ပြည်မြို့က နာမည်ကြီး နိုင်ငံရေးတက်ကြွလှုပ်ရှားသူများ ပါဝင်ခဲ့သော်လည်း ၅၀၅-က နဲ့ ထောင်ချခံထားရတဲ့ မိုးမေတ္တာနာရေးကူညီမှုအသင်းက ကိုမျိုးညိန်းဇော်ကိုတော့ လွတ်မပေးဘူးလို့ သူ့မိတ်ဆွေတွေဆီက သိရပါတယ်။

“၅၀၅-က နဲ့ ပြည်ကနေ အကုန်နီးပါး လွတ်တယ်လို့ ပြောရမယ်။ အဲ့အထဲမှာမှ သူကမပါဘူးဆိုတော့ စိတ်မကောင်း ဖြစ်ကြတာပေါ့။ တကယ်က သူက ဘာနိုင်ငံရေးမှ မလုပ်ဘူး။ လူအေးလူပျော်ပဲ။ မိုးမေတ္တာအသင်းကဆိုတာ တခုပဲ ပြောစရာရှိတယ်။ အဲဒါကြောင့်ပဲ မလွတ်တာလား ဒါမှမဟုတ် ရဲစခန်းက ချုပ်ရက်ကိုလျော့ပေါ့တဲ့အထဲမှာ မပါဘူးလို့လည်း ကြားတယ်” လို့ ကိုမျိုးညိန်းဇော်ရဲ့ မိတ်ဆွေတဦးက ပြောပါတယ်။

လွတ်ငြိမ်းစာရင်းမှာ ၅၀၅-က အမှုအပြင် တခြား ပုဒ်မထပ်တိုးကပ်ခံရသူများကို မထည့်သွင်းထားဘူးလို့ အကျဉ်းထောင်နဲ့နီးစပ်သူတွေဆီက သိရပါတယ်။

ယနေ့ ကဆုန်လပြည့် ဗုဒ္ဓနေ့ အထိမ်းအမှတ်ဟုဆိုကာ စစ်ကောင်စီက အကျဉ်းထောင်/အချုပ်နဲ့ စခန်းတွေမှာရှိတဲ့ ရာဇသတ်ကြီးပုဒ်မ ၅၀၅-က ထောင်ချခံထားရတဲ့ အကျဉ်း သား/သူ ၂၁၅၃ ဦးတို့ကို လွတ်ငြိမ်းခွင့်ပေးခဲ့ပြီး ရာဇဝတ်ကျင့်ထုံးဥပဒေပုဒ်မ ၄၀၁ ပုဒ်မခွဲ(၁)အရ “နောက်တစ်ကြိမ် ပြစ်မှုထပ်မံကျူးလွန်ပါက ၎င်းပြစ်ဒဏ်အပြင် လက်ရှိကျခံရန် ကျန်သော ပြစ်ဒဏ်များကိုပါ ဆက်လက်ကျခံပါမည်” ဆိုတဲ့ စည်းကမ်းသတ်မှတ်ချက်နဲ့ လွတ်ငြိမ်းခွင့်ပြုတာလို့ စစ်ကောင်စီက ထုတ်ပြန်ထားပါတယ်။

ပုံစာ – ယနေ့(မေလ ၃ ရက်)နေ့မှာ ပြည်အကျဉ်းထောင်က လွတ်မြောက်လာသူများကို မိသားစုများက ကြိုဆိုနေကြစဉ်။