သေနတ်

မြောင်၊ မတ် ၁၅၊ ၂၀၂၃။

စစ်ကိုင်းတိုင်း၊ မြောင်မြို့နယ်၊ မင်တန်းရွာက စစ်ရှောင်အမျိုးသားတဦးကို စစ်ကောင်စီတပ်တွေက မတ်လ ၁၄ ရက်မနေ့ကနေ့လယ် ၁ နာရီလောက်မှာ သေနတ်နဲ့ ပစ်သတ်သွားတယ်လို့ ဒေသခံတွေဆီက သိရပါတယ်။

မင်တန်းရွာသား အသက် ၇၀ နှစ်အရွယ် ဦးသန့်ဟာ ထွက်ပြေးတိမ်းရှောင်နေရင်း နေပူကုန်းရွာနဲ့ နဂါးပေါက်ရွာကြားမှာ စစ်ကောင်စီစစ်ကြောင်းနဲ့တွေ့ပြီး ပစ်သတ်ခံလိုက်ရတယ်လို့ မြောင်ဒေသခံ အမျိုးသမီးတဦးက ပြောပါတယ်။

“ပစ်သတ်ခံရတာတောင် ရက်ရက်စက်စက် ပစ်သတ်သွားတာ။ စစ်ရှောင်နေတဲ့အချိန်မှာ သုံးဖို့ သူ့ရဲ့ရေလဲတပတ်လေးတွေ၊ သွားတိုက်တံ၊ သွားတိုက်ဆေးတွေတောင်မှ သူသေတဲ့နေရာမှာပဲ ကျန်ခဲ့တယ်” လို့ ဆိုပါတယ်။

အဲ့ဒီစစ်သားတွေဟာ မြင်းမူဘက်ကနေ အင်အား ၂၀၀ နီးပါးနဲ့ ထွက်လာတဲ့ စစ်ကြောင်းဖြစ်ပြီး၊ ကျေးရွာတွေကို မီးရှို့တာမျိုးမလုပ်တော့ဘဲ စစ်ရှောင်ပြည်သူတွေနဲ့ ဒေသကာကွယ်ရေးတပ်ဖွဲ့တွေကိုသာ ဖမ်းဆီးသတ်ဖြတ်ဖို့ အဓိကပစ်မှတ်ထားပြီး လာတာဖြစ်နိုင်တယ်လို့ အထက်ပါအမျိုးသမီးက ခန့်မှန်းပါတယ်။

“ဒီနေ့ (မတ်လ ၁၅ ရက်)မှာလည်း နန်းမတော်ရွာထဲမှာ စစ်ရှောင်နေတဲ့ ရွာသားတွေ ရှိတယ်။ အဲဒီရွာထဲကို သူတို့ဝင်လာတော့ စစ်ရှောင်တွေကလည်း ပြေးချိန် မရလိုက်ဘူးပေါ့။ သူတို့ရွာထဲကနေ ပြန်ထွက်သွားချိန် စစ်ရှောင်တွေနေတဲ့ နေရာကို လက်နက်ကြီးတွေနဲ့ ထုတယ်။ ၆၀ မမတွေနဲ့လည်း ပစ်ထည့်တယ်” လို့ ဆိုပါတယ်။

ဒါ့အပြင် မတ်လ ၁၃ ရက်မှာလည်း မြောင်မြို့နယ်ထဲက ကျေးရွာတွေကို စစ်ကြောင်းထိုးဝင်ရောက်ခဲ့တာကြောင့် ကျေးရွာ ၁၀ က ဒေသခံပြည်သူ ၁၅၀၀၀ ကျော် ထွက်ပြေးတိမ်းရှောင်ခဲ့ရပြီး၊ ရွာသား ၃ ဦးလည်း အသတ်ခံခဲ့ရတယ်လို့ CDSOM က ထုတ်ပြန်ရေးသားထားပါတယ်။

အဲ့ဒီနေ့က အသတ်ခံရသူတွေနဲ့ ပတ်သက်တဲ့ အသေးစိတ်အချက်အလက်တွေကိုတော့ မြေလတ်အသံက ဆက်လက်စုံစမ်းနေဆဲပါ။

ဒီစစ်ကြောင်းဟာ ပြီးခဲ့တဲ့မတ်လ ၁၂ ရက်ကတည်းက မြောင်မြို့နယ်၊ ကင်းရွာကို စတင်ဝင်ရောက်လာခဲ့တာဖြစ်ပြီး၊ အဲ့ဒီနောက်မှာ ဆက်တိုက်ဆိုသလို နီးစပ်ရာကျေးရွာတွေကို စစ်ကြောင်းလှည့်နေခဲ့ကာ ခုတော့ ပေါက်ချောင်းရွာမှာ တပ်စွဲထားတယ်လို့ သိရပါတယ်။

စာတည်း – လင်း

နတ်မောက်၊ မတ် ၅၊ ၂၀၂၃။

မကွေးတိုင်း၊ မကွေးခရိုင်၊ နတ်မောက်မြို့၊ စစ်ကောင်စီလက်အောက်ခံမြို့နယ်ပညာရေးမှူး မတ်လ ၄ ရက် မနေ့နေ့လယ် ၁ နာရီဝန်းကျင်မှာ သေနတ်နဲ့ပစ်သတ်ခံရပြီးသေဆုံးသွားတယ်လို့ သိရပါတယ်။

ပစ်သတ်ခံရသူဟာ နတ်မောက်မြို့နယ်ပညာရေးမှူး ဦးသန်းထိုက် အသက် ၆၀ နှစ်ဆိုသူဖြစ်ပြီး ထမင်းဆိုင်ကနေ နေအိမ်ကိုဆိုင်ကယ်နဲ့တဦးတည်းအပြန် နတ်မောက် -ပျော်ဘွယ်ကားလမ်း၊ ပြည်သူ့ဆေးရုံအနီးမှာ အမည်မသိသေနတ်သမားတွေက ပစ်ခတ်သွားတာလို့ ဒေသခံတဦးက မြေလတ်အသံကိုပြောပါတယ်။

“သူက အောင်ဟိဏ်းစားသောက်ဆိုင်ကနေ သူ့အသိတွေနဲ့စားသောက်ပြီး ဆိုင်ကယ်နဲ့ တယောက်တည်းပြန်လာတာ။ သူပြန်တဲ့အချိန်ကိုစောင့်ကြည့်နေတာဖြစ်မယ်။ အနောက်ကနေ ဆိုင်ကယ်နဲ့လိုက်လာပြီးပစ်သွားတာ” လို့ ပြောပါတယ်။

မြို့နယ်ပညာရေးမှူး ဦးသန်းထိုက်ဟာ သေနတ်နဲ့ပစ်ခတ်ခံရလို့ ဦးခေါင်း၊ ဝမ်းဗိုက်နဲ့ ရင်အုံတွေမှာ သေနတ်ဒဏ်ရာ ၅ ချက်ရပြီး နေရာမှာဘဲသေဆုံးသွားတယ်လို့ သိရပါတယ်။

အဲဒီပစ်ခတ်မှုကို ဒေါင်းစစ်သည်ပြောက်ကျား(နတ်မောက်)နဲ့ Magway Guerrilla Warfare အဖွဲ့တွေက ပူးပေါင်းလုပ်ဆောင်ခဲ့တာဖြစ်ပြီး ဦးသန်းထိုက်ဟာ နတ်မောက်မြို့နယ်အတွင်းက CDM ဆရာ၊ ဆရာမတွေကို စစ်ကောင်စီတပ်ကို သတင်းပေးဖမ်းဆီးခိုင်းနေပြီး ပြည်သူတွေကို ဒုက္ခပေးနေတာကြောင့် ရှင်းလင်းလိုက်တာဖြစ်တယ်လို့ သိရပါတယ်။

ဇန်နဝါရီလ ၁၂ ရက် ညနေပိုင်းကလည်း နတ်မောက်မြို့နယ်၊ ဖျောက်ဆိတ်ကုန်းကျေးရွာအနီး နတ် မောက်-ကျောက်ပန်းတောင်း ကားလမ်းပေါ်မှာ Non-CDM ဖျောက်ဆိတ်ကုန်းရွာ မူလတန်းကျောင်းအုပ် ဦးဝင်းခိုင်ဟာ ကျောင်းကအပြန်ပစ်သတ်ခံရပြီး သေဆုံးခဲ့တယ်လို့သိရပါတယ်။

မန္တလေး၊ မတ် ၂၊ ၂၀၂၃။

မန္တလေးတိုင်း​ဒေသကြီး၊ အောင်မြေသာစံမြို့နယ်၊ ဒေါနဘွားရပ်ကွက်၊ ၁၀ လမ်း၊ ၆၂လမ်း ထောင့်မှာ လူငယ် ၁ ဦး ဆိုင်ကယ်မောင်းနေချိန် သေနတ်နဲ့ ပစ်ခံရလို့ သေဆုံးသွားတယ်လို့ သိရပါတယ်။

မတ်လ၂ရက် ဒီနေ့ နေ့လည် ၁ နာရီခွဲခန့်မှာ ပုသိပ်ကြီးမြို့နယ်၊ မြို့မရပ်ကွက်၊ အောင်မင်္ဂလာရပ်နေ မောင်အောင်မျိုးမြတ် ၂၀ နှစ်ဟာ ဆိုင်ကယ်မောင်းလာချိန် အနောက်ကနေ ဆိုင်ကယ်နဲ့လိုက်လာတဲ့ လူငယ် ၂ ဦးက အနားကပ် ပစ်ခတ်သွားတာ ဖြစ်တယ်လို့ ဒေသခံတဦးက ပြောပါတယ်။

“ပထမ သိရတာက ယာဥ်တိုက်မှုဖြစ်လို့ လူငယ် ၁ ဦး လမ်းဘေးလဲကျ သေဆုံးတယ်ဆိုပြီး သိရတယ်။ နောက်မှ မဟုတ်ဘဲ သေနတ်ပစ်ခတ်ခံရပြီး သေဆုံးသွားတယ်ဆိုတာ သိရတာ။ သေသွားတာကတော့ လူငယ်ပိုင်းပဲ။ သူအချက်အလက်ကတော့ နည်းနည်းပဲ သိရတယ်။ သူက လက်ရှိကျောင်းတက်နေသူလို့လည်း ပြန်ကြားမိတယ်။ သူဘာလုပ်လဲဆိုတာတော့ ​​မသိရဘူး” လို့ ပြောပါတယ်။

သေနတ်နဲ့ ပစ်ခတ်ခံရလို့ မောင်အောင်မျိုးမြတ်ဟာ ယာနားအောက် ဖောက်ဝင်ဒဏ်ရာ ၁ ချက် ရရှိပြီး နေရာမှာပဲ သေဆုံးသွားခဲ့ပြီး အလောင်းကိုတော့ လူမှုကူညီရေးအသင်းတွေက မန္တလေးပြည်သူ့ဆေးရုံကို သယ်သွားတယ်လို့ သိရပါတယ်။

ဒေသခံတွေကတော့ အဲဒီပစ်ခတ်မှုဟာ စစ်ကောင်စီဘက်က လုပ်တာဖြစ်နိုင်ပြီး PDF နဲ့ ပြည်သူတွေကို သွေးခွဲအောင်လုပ်တာ ဖြစ်နိုင်တယ်လို့ ဆိုထားသလို စစ်ကောင်စီထောက်ခံ
တယ်လီဂရမ် ချန်နယ်တွေမှာတော့ သေဆုံးသူ လူငယ်ဟာ PDF ၁ ဦး ဖြစ်ပြီး PDF အချင်းချင်း အဝေမတည့်ဖြစ်ရာမှ ပစ်ခတ်တာဖြစ်တယ်လို့ ဖော်ပြထားပါတယ်။

မန္တလေး UG အဖွဲ့တစ်ခုဖြစ်တဲ့ အောင်စည်တော်စစ်ဆင်ရေးအဖွဲ့ကို အဲ့ဒီကိစ္စနဲ့ပတ်သက်ပြီး မေးမြန်းခဲ့ပေမယ့် မသိရသေးဘဲ ဘယ်အဖွဲ့က ဘာကြောင့်လုပ်တယ်ဆိုတာ စုံစမ်းနေဆဲလို့ဆိုပါတယ်။

ဇန်နဝါရီလ ၃၁ ရက်က ပုသိမ်ကြီးမြို့နယ်၊ နန္ဒာတောင်ကျေးရွာနဲ့ မန္တလေး-မတ္တရာသွားကားလမ်းကြားမှာ မင်္ဂလာဆောင်က ပြန်လာတဲ့ အမျိုးသမီးငယ် ၂ ဦး ပစ်ခံရလို့ ၁ ဦး သေဆုံးသွားတယ်လို့ သိရပြီး သေဆုံးသူဟာ ဒလန်ဖြစ်တာကြောင့် ရှင်းလင်းရတာဖြစ်တယ်လို့ ဒေသကာကွယ်ရေးအဖွဲ့တစ်ခုက ထုတ်ပြန်ထားပါတယ်။

စာတည်း – ဇို

ပဲခူး၊ ဖေဖော်ဝါရီ ၁၅၊ ၂၀၂၃။

ပဲခူးတိုင်းဒေသကြီး၊ သာယာဝတီမြို့နယ်၊ ချမ်းသာကုန်းကျေးရွာနဲ့ ညောင်လေးပင်ရွာကြားက သုဿန်မှာ ပြုလုပ်နေတဲ့ လောင်းကစားဝိုင်းကို ဆက်မလုပ်ဖို့ အသံမိုင်းခွဲသတိပေးတဲ့ ကာကွယ်ရေးအဖွဲ့ဝင်တွေကို စကေဘာနဲ့ထိုးဖို့လာတဲ့ ပျူစောထီးဆိုသူ သေနတ်နဲ့ပစ်ခံရပြီး ဒဏ်ရာရရှိခဲ့တယ်လို့ သိရပါတယ်။

ဖေဖော်ဝါရီလ ၁၄ ရက်မနေ့ည ၉ နာရီခွဲလောက်မှာ ပစ်ခတ်ခဲ့တာဖြစ်ပြီး၊ ပစ်ခတ်ခံရလို့ မြို့နယ်ပျူစောထီးအဖွဲ့ဝင်လည်းဖြစ် အထက်ပါလောင်းကစားဝိုင်းတွေရဲ့ ဒိုင်ချုပ်ဖြစ်သူ ကိုဘိုကျောက် အသက် ၄၆ နှစ်ခန့်မှာ ဦးခေါင်းသေနတ်ရှပ်မှန်ဒဏ်ရာရသွားတယ်လို့ သာယာဝတီခရိုင် ဂဠုန်တပ်ဖွဲ့တာဝန်ခံက ပြောပါတယ်။

“တယောက်ကိုဝိုင်းဖမ်းလို့ လုံးထွေးနေချိန် လုံးထွေးနေတဲ့ ရဲဘော်ကို ပျူစောထီးဘိုကျောက်က စကေဘာနဲ့ ထိုးဖို့ပြေးလာတာကို အပြင်ကနေ အခြေနေကြည့်နေတဲ့ နောက်ရဲဘော်တယောက်က ပစ်လိုက်တာ” လို့ ပြောပါတယ်။

သူဟာ ကျေးရွာအုပ်ချုပ်ရေးမှူးတွေနဲ့ ပေါင်းကာ လောင်းကစားဝိုင်းတွေကို အကြီးအကျယ်လုပ်နေလို့ သတိပေးတဲ့အနေနဲ့ အဖွဲ့ဝင်တွေက အသံမိုင်းဖောက်ခွဲဖို့အတွက် သွားခဲ့တာလို့လည်း ဂဠုန်တပ်ဖွဲ့တာဝန်ခံက ဆက်ပြောပါတယ်။

“လောင်းကစားဝိုင်းတွေကြောင့် ကျေးရွာဘက်က လူတွေ တော်တော် ဒုက္ခရောက်နေကြတယ်။ ဒါကို ဆက်မလုပ်ဖို့သတိပေးတဲ့အနေနဲ့ အသံမိုင်းသွားခွဲတာ။ အဲ့ဒါကို လောင်းကစားဒိုင်လုပ်နေတဲ့ ပျူစောထီးအဖွဲ့ဝင်နဲ့ သူတပည့်တွေက မိုင်းခွဲတဲ့အဖွဲ့ဝင်ကို ဝင်လုံးပြီး စကေဘာနဲ့ထိုးတာ။ အဲဒါကြောင့် သူတို့ကိုပါ ပစ်ခတ်ခဲ့ရတယ်” လို့ ပြောပါတယ်။

ပစ်ခတ်ခံရပြီးနောက် ကိုဘိုကျောက်ကိုတော့ စစ်ကောင်စီအဖွဲ့တွေက သာယာဝတီဆေးရုံကို သယ်ဆောင်သွားတယ်လို့ သိရပြီး၊ PDF အဖွဲ့ဝင်တွေကတော့ ခန္ဓာကိုယ်ပွန်းပဲ ဒဏ်ရာသာရပြီး လုံခြုံတဲ့နေရာကို ပြန်ရောက်သွားပြီလို့ ဆိုပါတယ်။

အဲဒီတိုက်ခိုက်မှုကို သာယာဝတီခရိုင်ဂဠုန်တပ်ဖွဲ့နဲ့ မင်းလှပြည်သူ့ကွယ်ရေးတပ်ဖွဲ့တို့က ပူးပေါင်းလုပ်ဆောင်ခဲ့တာလို့ သိရပါတယ်။

ဖေဖော်ဝါရီလ ၁၃ ရက်ကလည်း မင်းလှမြို့နယ်၊ ပဲခူးရိုးမအနီးမှာ သစ်ခိုးထုတ်နေတဲ့ စစ်ကောင်စီသတင်းပေးဆိုသူ ရာအိမ်မှူး ကိုစိုးနိုင်ကို သာယာဝတီခရိုင် ဂဠုန်တပ်ဖွဲ့နဲ့ မင်းလှမြို့နယ် ပကဖတို့က ပူးပေါင်းရှင်းလင်းခဲ့ပါသေးတယ်။

မကွေး၊ ဖေဖော်ဝါရီ ၁၀၊ ၂၀၂၃။

မကွေးတိုင်း၊ မင်းတုန်းမြို့နယ်၊ ပြောင်းကျေးရွာနဲ့ သီးပင်ကုန်းကျေးရွာကြားမှာ ကွမ်းဝယ်ထွက်လာတဲ့ စစ်ကောင်စီတပ်သား ၂ ဦး သေနတ်နဲ့ ပစ်ခတ်ခံရပြီး သေဆုံးခဲ့တယ်လို့ သိရပါတယ်။

ဖေဖော်ဝါရီလ ၉ ရက် မနေ့ညနေ ၅ နာရီ ၄၅ မိနစ်ခန့်မှာ ပြောင်းကျေးရွာမှာ တပ်စွဲထားတဲ့ စစ်ကောင်စီအဖွဲ့ကနေ ထန်းပင်ကုန်းကျေးရွာဘက်ကို ဆိုင်ကယ်နဲ့ ကွမ်းဝယ်ထွက်လာတဲ့ စစ်သား ၂ ဦးကို ပစ်ခတ်ရှင်းလင်းခဲ့တာလို့ Swallow PDF – Magway တာဝန်ရှိသူက ပြောပါတယ်။

“ပြောင်းရွာမှာ တပ်စွဲထားတဲ့ စကစ ဗိုလ်တယောက်က ထန်းပင်ကုန်းဘက်ကို အမြဲလာလာနေတယ်လို့ သတင်းရလို့ စောင့်ပစ်ဖို့ သွားတာ။ ဖြစ်ချင်တော့ သူကမလာဘဲ သူတပည့်တွေ ၂ ယောက်က ကွမ်းဝယ်ဖို့ ထွက်လာတာတွေ့လို့ မင်းတုန်းချောင်းတံတားထိပ်မှာ ပစ်ခတ်ရှင်းလင်းခဲ့တာ။ သူတို့ဆီက လက်နက်မပါလာတော့ လက်နက်တော့ မရလိုက်ဘူး” လို့ ပြောပါတယ်။

ပစ်ခတ်ရှင်းလင်းခံရလို့ စစ်ကောင်စီတပ်သား ၂ ဦးဟာ နေရာမှာဘဲ သေဆုံးသွားပြီး သူတို့ဆီက ဖုန်း ၂ လုံးကို သိမ်းဆည်းလာခဲ့တယ်လို့ ဆိုပါတယ်။

သေဆုံးစစ်သားတွေရဲ့ အလောင်းကိုတော့ ညပိုင်းမှ စစ်ကောင်စီဘက်ကလာသယ်ပြီး မင်းတုန်းဘက်ကို ယူဆောင်သွားတယ်လို့ သိရပါတယ်။

ဇန်နဝါရီလ ၃၁ ရက်ညကလည်း ပြောင်းကျေးရွာမှာ အင်အား ၁၅ ဦးကျော်နဲ့တပ်စွဲထားတဲ့ စစ်ကောင်စီစစ်ဆေးရေးဂိတ်ကို လက်ပစ်ဗုံး ၃ လုံးနဲ့ စတင်ပစ်ခတ်ပြီး လက်နက်ငယ်တွေနဲ့ပါ ပစ်ခတ်ခံရလို့ စစ်ကောင်စီတပ်သားတွေ ၂ ဦးထက်မနည်း ဒဏ်ရာရခဲ့သေးတယ်လို့ သိရပါတယ်။

အင်းတော်၊ ဖေဖော်ဝါရီ ၉၊ ၂၀၂၃။

စစ်ကိုင်းတိုင်း၊ အင်းတော်မြို့နယ်ကို စစ်အုပ်ချုပ်ရေး ကြေညာအပြီး ၆ ရက်မြောက်နေ့မှာ အလယ်ဆိပ်ရွာသားတဦး ည ၁၀ နာရီကျော်မှာ အိမ်ပြန်မိလို့ သေနတ်နဲ့ ပစ်ခံရပြီး သေဆုံးသွားခဲ့ပါတယ်။

အသက် ၄၅ နှစ်အရွယ် ဦးစိုးနိုင်ဟာ ဖေဖော်ဝါရီ ၈ ရက် မနေ့ည ၁၀ နာရီလောက်မှာ မဲဇာရွာကနေ အလယ်ဆိပ်ရွာကိုပြန်လာချိန် မဲဇာရဲစခန်းရှေ့အရောက်မှာ ရဲကသေနတ်ပစ်လို့ သေဆုံးခဲ့တာ ဖြစ်တယ်လို့ အင်းတော်ဒေသခံတဦးက ပြောပါတယ်။

“ကျနော် သတိပေးထားတာတော့ ကြာပြီ။ စစ်ကောင်စီက မကြေညာခင် ကျနော် အတွင်းသတင်းရလို့အရင် သတိပေးထားတယ်။ မနေ့ကလည်း သတိပေးထားတယ်။ အဲ့လူက နဲနဲစိတ်ဖောက်နေတယ်လို့လည်း ကြားတယ်” လို့ ဆိုပါတယ်။

ဖေဖော်ဝါရီလ ၉ ရက် ဒီနေ့မနက်မှာ ရဲစခန်းက အလောင်းလာယူဖို့ နီးစပ်ရာရွာသားတွေတဆင့် ဆက်သွယ်အကြောင်းကြားလာခဲ့တ​ယ်လို့ ဆိုပါတယ်။

“ရုပ်လောင်းကတော့ မိသားစုတွေ လာယူသွားပါပြီ။ အလယ်ဆိပ်ရွာမှာပဲ မီးသင်္ဂြိုလ်လိုက်ပါပြီ။ စခတွေဘက်ကတော့ ဘာတာဝန်ယူမှုမှ မပေးပါဘူး” လို့ အင်းတော်ဒေသခံက ဆက်ပြောပါတယ်။

စစ်တပ်အာဏာမသိမ်းခင်ကလည်း အင်းတော်ရဲစခန်းရှေ့မှာ ပြည်သူတဦး သေနတ်နဲ့ ပစ်ခံရလို့ သေဆုံးခဲ့ပါသေးတယ်။

စစ်ကိုင်း၊ ဖေဖော်ဝါရီ ၅၊ ၂၀၂၃။

စစ်ကိုင်းတိုင်း၊ ဆားတောင်မြို့နယ်၊ ဆားတောင်မြို့ပေါ်(တနေရာမှာ) လောင်းကစားဝိုင်းဖွင့်ထားတဲ့ ၂ပွင့်ဗိုလ်တဦး နဲ့ နောက်လိုက် ၅ ဦး သေနတ်နဲ့ပစ်ခံရလို့ သေဆုံးခဲ့ပါတယ်။

ဖေဖော်ဝါရီလ ၅ ရက် ဒီနေ့ နေ့လယ် ၁၂ နာရီလောက်မှာ မြေအောက်လျှပ်စီးပြောက်ကျား တပ်ဖွဲ့က ပြည်သူတွေတိုင်ကြားချက်ကြောင့် လောင်းကစားဝိုင်းရှိရာနေရာကို သွားရောက်ပစ်ခတ်ခဲ့တာလို့ ဗိုလ်မုန်တိုင်း က မြေလတ်အသံကို ပြောပါတယ်။

“၂ပွင့်ဗိုလ်လို့ ဘာကြောင့်သိရလဲဆိုတော့ ၆လုံးပြူးလည်းကိုင်တယ်။ နောက်ပြီး ကျနော်တို့ကိုသတင်းပေးပို့တဲ့ ပြည်သူက အတိအကျကိုပြောတာပါ။ အဲဒီထဲမှာ ဦးစိန်ထွန်းနဲ့ ဒေါ်သိန်းကြည်က ဒလန်လင်မယားတွေပါ။ သူတို့တွေက ပြည်သူတွေကိုစစ်ကောင်စီနဲ့ ခြိမ်းခြောက်ထားပြီး လောင်းကစားဝိုင်းဖွင့်ထားပါ” လို့ ဆိုပါတယ်။

ကားပေါ်မှာထိုင်နေတဲ့ ဗိုလ်မျိုးထွန်းသိန်း၊ ဦးစိန်ထွန်း၊ ဒေါ်သိန်းကြည်နဲ့အတူ လောင်း ကစားဝိုင်းမှာ လုံခြုံရေးယူပေးနေတဲ့ရဲတပ််ဖွဲ့ဝင် ၄ ဦး စုစုပေါင်း ၆ ဦးပစ်ခံရပြီး သေဆုံးခဲ့တယ်လို့ ဆိုပါတယ်။

“ပြည်သူတွေတိုင်ထားတာကတော့ကြာပြီ၊ အရင်ရက်တွေမှာဆို သူတို့က (စစ်ကောင်စီ) လက်နက်တွေကိုယ်စီနဲ့လာကြတော့ ကျနော်တို့က သွားပစ်လို့မရဘူး၊ လက်နက်အင်အားကမမျှလို့၊ ဒီနေ့တော့ သူတို့တပ်ဖွဲ့ထဲမှာ ဗိုလ်တယောက်ပဲ ခြောက်လုံးပြူးပါတယ်ဆိုလို့ ကျနော်တို့က သွားရောက်ပစ်ခတ်ခဲ့တာပါ” လို့ ပြောပါတယ်။

လောင်းကစားဝိုင်းထဲမှ ငွေကျပ် ၃၄၂၀၀၀ ကိုသိမ်းဆည်းရမိသွားပြီး သိမ်းဆည်းထားတဲ့ ငွေကြေးတွေကိုလည်း တော်လှန်ရေးအတွက် အသုံးပြုသွားမှာဖြစ်ကြောင်း နဲ့ ၂ ပွင့်ဗိုလ် မျိုးထွန်းသိန်း ကနေ ၆လုံးပြူး အတိုတလက်ကို သိမ်းဆည်းရမိခဲ့တယ်လို့ ပြောပါတယ်။

မန္တလေး၊ ဖေဖော်ဝါရီ ၅၊ ၂၀၂၃။

မန္တလေးတိုင်း၊ ပြည်ကြီးတံခွန်မြို့နယ်၊ သင်ပန်းကုန်းရပ်ကွက်အုပ်ချုပ်ရေးမှူး သေနတ်နဲ့ပစ်ခံရပြီး သေဆုံးသွားတယ်လို့ သိရပါတယ်။

ဖေဖော်ဝါရီလ ၄ ရက်မနေ့ကမနက် ၁၁ နာရီဝန်းကျင်မှာ သင်ပန်းကုန်းရပ်ကွက်၊ ၁၂၁×၁၂၂ လမ်းကြား၊ ၅၁ (ဘီ)လမ်းရှိ အုပ်ချုပ်ရေးမှူး ဦးသာဌေး ၆၉ နှစ်ဟာ နေအိမ်မှာရှိနေချိန် သေနတ်သမားတွေက ဝင်ရောက်ပစ်ခတ်သွားတာလို့ ဒေသခံတဦးက ပြောပါတယ်။

“သူက အရင်ကရာအိမ်မှူးပါ။ သူရပ်ကွက် အုပ်ချုပ်ရေးမှူးနေရာမှာ သူကအုပ်ကြီးဖြစ်တာ မကြာသေးဘူး။ အဲ့ဒါကို အိမ်မှာရှိနေတဲ့အချိန် ပစ်သတ်သွားတာ။ သူကအသက်လည်း တော်တော်ကြီးနေပြီ။ အရင်ကတည်းက ရာအိမ်မှူးလုပ်ခဲ့တာဆိုတော့ ဟိုနေရာဒီနေရာပါတာတော့ရှိတယ်”လို့ ပြောပါတယ်။

သေနတ်နဲ့ပစ်ခံရလို့ အုပ်ချုပ်ရေးမှူး ဦးသာဌေးဟာ ဦးခေါင်း၊ ရင်ဘတ်တွေမှာ ကျည်ဖောက်ဝင်ဒဏ်ရာ ၃ ချက်ရရှိပြီး နေရာမှာဘဲ သေဆုံးသွားတယ်လို့ ဆိုပါတယ်။

ဦးသာဌေးဟာ ကျူးကျော်များရှင်းလင်းရေးဟုဆိုကာ အများပြည်သူပိုင်နေအိမ်တွေကိုဖျက်ဆီးဖို့ စာရင်းကောက်ရာမှာ ဦးဆောင်သူ၊ ဧည့်စာရင်းလက်ခံသူ၊ မဲစာရင်း၊ လူဦးရေစာရင်း၊ အိမ်ထောင်စုစာရင်းကောက်ရာမှာ ဦးဆောင်ပါဝင်နေသူဖြစ်လို့ သေနတ်နဲ့ ၇ ချက် ပစ်ခတ်ရှင်းလင်းခဲ့တယ်လို့ အောင်စည်တော်စစ်ဆင်ရေးအဖွဲ့က ထုတ်ပြန်ထားပါတယ်။

ဇန်နဝါရီလ ၃၁ ရက်ကလည်း မန္တလေးတိုင်း၊ ပုသိမ်ကြီးမြို့နယ်၊ နန္ဒာတောင်ကျေးရွာသားလမ်းမှာ ဒလန်လို့လူသိများတဲ့ အမျိုးသမီးငယ်ကို မင်္ဂလာဆောင်ကနေ ဆိုင်ကယ်နဲ့ပြန်လာချိန် ဒေသကာကွယ်ရေးတပ်ဖွဲ့တခုက ပစ်ခတ်ရှင်းလင်းခဲ့ပါသေးတယ်။