ဝက်လက်

မြေလတ်အသံ၊ ဖေဖော်ဝါရီ ၁၊ ၂၀၂၅။

စစ်အာဏာသိမ်းလိုက်တဲ့ ၄ နှစ်ပြည့်တဲ့ ဖေဖော်ဝါရီ ၁ ရက်မှာ စစ်ကိုင်းတိုင်း၊ ဝက်လက်မြို့နယ်အတွင်း ဒေသခံတွေနဲ့ ကျောင်းသား၊ ကျောင်းသူတွေပူးပေါင်းပြီး စစ်သုံးစစ်တိုက်ဖျက်ရေး လူထုလှူပ်ရှားမှု ချီတက်ဆန္ဒပြပွဲ ပြုလုပ်ခဲ့ကြတယ်လို့ Wetlet Township Student’s Union – ABFSUက ထုတ်ပြန် ပါတယ်။

အဲဒီဆန္ဒပြပွဲကို ဝက်လက်မြို့နယ်ထဲကကျေးရွာတရွာမှာ မနက် ၉ နာရီကနေ ၁၁ နာရီအထိ စုစုပေါင်းအင်အား ၂၀၀ ကျော်ပါဝင်ခဲ့တယ်လို့ ဆိုပါတယ်။

“ပြည်သူလူထုအနေနဲ့ လက်ရှိတော်လှန်ရေး ၄ နှစ်ကျော်ကာလတွင်မကဘူး။ ဒီတော်လှန်ရေးရဲ့ အဆုံးသတ်နိုင်တဲ့အထိ ကျောင်းသား၊ပြည်သူလူထုတရပ်လုံး ပူးပေါင်းပါဝင်ပေးဖို့ မေတ္တာရပ်ခံ ချင်ပါတယ်”လို့ Wetlet Township Student’s Union – ABFSU ဥက္ကဌ ကိုဟန်မင်းစိုးက ပြောပါတယ်။

စစ်အာဏာသိမ်းမှု ၄ နှစ်ပြည့် အထိမ်းအမှတ်အဖြစ် လူထုချီတက်ဆန္ဒပြပွဲအပြင် ဆန္ဒပြသပိတ်မှောက် ရာမှာပါဝင်သူတွေကို တော်လှန်သွေးနိုးကြားတတ်ကြွစေမယ့် နိုင်ငံရေးဟောပြောဆွေးနွေးမှုတွေကို ဒေသစည်းရုံးရေးတပ်ဖွဲ့ဝင်တွေကဦးဆောင်ကာ ဟောပြောဆွေးနွေးခဲ့ကြတယ်လို့ သူကဆိုပါတယ်။

စစ်ကိုင်း၊ ဇန်နဝါရီ ၁၉၊ ၂၀၂၅။

စစ်ကိုင်းတိုင်း၊ ၀က်လက်မြို့မှာ ဇန်နဝါရီလဆန်းပိုင်းက စတင်ဖြစ်ပွားတဲ့တိုက်ပွဲတွေကြောင့် ဝက်လက်မြို့လမ်းပိုင်းတွေ ပိတ်ထားရလို့ ကုန်စည်စီးဆင်းမှုပြတ်တောက်ကာ စားသုံးကုန်ပစ္စည်း‌၊ ဆေးဝါးနဲ့ စက်သုံးဆီတွေ ရှားပါးပြတ်လပ်နေတယ်လို့ ဝက်လက်မြို့ခံတွေထံက သိရပါတယ်။

၀က်လက်မြို့နယ်အတွင်း စစ်ကြောင်းထိုးလာတဲ့ စစ်ကောင်စီတပ်နဲ့ ဒေသတော်လှန်ရေးပူးပေါင်းတပ်ဖွဲ့တွေ တိုက်ပွဲဖြစ်ပွားခဲ့တဲ့ ဇန်နဝါရီ ၄ ရက်ကနေစပြီး မြို့အ၀င်အထွက်လမ်းတွေကို ပြည်သူ့ကာကွယ်ရေးတပ်တွေဘက်က ယာယီအသုံးပြုခွင့် ပိတ်ထားတာဖြစ်ပါတယ်။

ဝက်လက်မြို့ အဝင်အထွက်လမ်းတွေကို အခုလိုပိတ်ဆို့ထားတာကြောင့် မြို့တွင်းမှာ ကုန်ပစ္စည်းတွေပြတ်လပ်လာပြီး ကုန်ဈေးနှုန်းဟာလည်း အရင်ကရှိနေတဲ့ ဈေးနှုန်းထက် ထက်ဝက်ခန့်ဈေးတက်လာတယ်လို့ မြို့ခံတွေက ပြောပါတယ်။

“ဆန် ၁ ပြည် ၇ ထောင်ကျော်တယ်။ ဆီက ၁ ပိဿာ ၁၈,၀၀၀၊ ကြက် ၁ တလုံး ၈၀၀၊ ဓာတ်ဆီက ၁ လီတာ ၁ သောင်း၊ ကွမ်းက ၁ရွက်ကို ၃၀၀ နှုန်းဖြစ်နေပြီ၊ အကုန်ငတ်နေပြီ။” လို့ ဝက်လက်မြို့ခံတဦးက ပြောပါတယ်။

လမ်းပိတ်ထားလို့ အနီးအနားရွာတွေက ဈေးသည်တွေ လာမရောင်းတဲ့အတွက် ဟင်းသီးဟင်းရွက်၊ အသားငါးတွေ ၀ယ်မရတော့ဘဲ မြို့တွင်းမှာရှိတဲ့ဈေးဆိုင်တွေလည်း ရောင်းစရာကုန်ပစ္စည်းမရှိလို့ ပိတ်ထားကြတယ်လို့ ပြောပါတယ်။

“ဈေးထဲ ဘောလုံးကန်လို့ ရတယ်” လို့ ဝက်လက်မြို့ခံတဦးက ဆိုပါတယ်။

ယခုလက်ရှိမှာ ဝက်လက်မြို့နယ်အတွင်းတိုက်ပွဲတွေဖြစ်ပွားတာ မရှိတော့ပေမယ့် မြို့နယ်အတွင်းအ၀င်အထွက်လမ်းပိုင်းတွေကို ဆက်လက်ပိတ်ထားသေးပြီး ပြန်ဖွင့်မယ့်အချိန်ကိုတော့ မသိရသေးဘူးလို့ ဒေသခံတွေက ပြောပါတယ်။

၂၀၂၃ တုန်းကလည်း ပြည်သူ့ကာကွယ်ရေးတပ်တွေဘက်က ၀က်လက်မြို့အ၀င်အထွက်လမ်းတွေကို ၂၂ ရက်တိတိ ပိတ်ထားခဲ့လို့ အခုလို ကုန်ပစ္စည်းပြတ်လပ်မှုတွေ ကြုံခဲ့ရသေးတယ်လို့ ၀က်လက်မြို့ခံတွေဆီကနေ သိရပါတယ်။

၂၀၁၄ သန်းခေါင်စာရင်းအရ ဝက်လက်မြို့လူဦးရေဟာ ၁၀,၀၀၀ ကျော်ရှိပါတယ်။ လက်ရှိ စစ်အာဏာသိမ်းပြီးတဲ့နောက် ဝက်လက်မြို့လူဦးရေဟာ မူလရှိတဲ့လူဦးရေရဲ့ တဝက်ခန့်သာရှိတော့တယ်လို့ ဒေသခံတွေက ပြောပါတယ်။

ဇန်နဝါရီ ၅ ရက် တနေ့တည်းမှာ ရွှေဘိုမြို့၊ အမှတ် ၈ စစ်အခြေခံလေ့ကျင့်ရေးတပ်ရင်းကနေ ထွက်လာတဲ့ စစ်ကောင်စီစစ်ကြောင်းကို ဝက်လက်မြို့နယ်၊ မှတ်ထိကျေးရွာနဲ့ မင်းကုန်းကျေးရွာကြားမှာ တော်လှန်ရေး တပ်ဖွဲ့တွေက တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၄၇ ဦးသေဆုံးပြီး ၆ ဦးဖမ်းဆီးရမိခဲ့ပါတယ်။

အလားတူ စစ်ကိုင်းတိုင်း၊ ဆားတောင်မြို့ကထွက်လာပြီး ဝက်လက်မြို့နယ်၊ အုန္နဲဘုတ်ရွာကို စီးနင်းတပ်စွဲနေတဲ့ စစ်ကောင်စီတပ်မ ၃၃ လက်အောက် စစ်သားတွေကို ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၂၀ ဦးကျော်သေဆုံး၊ ၃ ဦး အရှင်ဖမ်းမိထားကာ MA 1 သေနတ် ၅ လက်၊ မြေမြှုပ်မိုင်း ၄ လုံး၊ ရှေ့ထွက်မိုင်း ၁ လုံး၊ ၆၀ မမ ဗုံးသီး ၃ လုံး၊ Jammer စက် ၁ လုံးနဲ့ ခဲယမ်းပစ္စည်းအချို့ကိုလည်း သိမ်းဆည်းရရှိခဲ့ပါတယ်။

သတင်း – လကျာ်၊ စာတည်း – လင်းဇေ

စစ်ကိုင်း၊ ဇွန် ၁၈၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်အတွင်းမှာ စစ်ကောင်စီတပ်သားတွေက အကြောင်းမဲ့ လက်နက်ကြီး၊ လက်နက်ငယ်တွေနဲ့ ပစ်ခတ်လို့ ဇွန်လ ၁၆ ရက် တရက်တည်းမှာတင် စစ်ကောင်စီလက်အောက်ခံ ကျေးရွာအုပ်ချုပ်ရေးမှူးရဲ့ သားဖြစ်သူအပါ ၂ ဦး သေဆုံးခဲ့တယ် လို့ ဝက်လက် ပကဖအဖွဲ့ဆီက သိရပါတယ်။

၁၆ ရက်မနက်ပိုင်းက ဝက်လက်မြို့အနောက်ဘက်၊ မူးဆည်ဘောင်အနီး တပ်စွဲထားတဲ့ စစ်ကောင်စီတပ်က လက်နက်ငယ်တွေနဲ့ ပစ်ခတ်တာကြောင့် သခွတ္တောရွာမမှာ နေထိုင်တဲ့ အသက် ၃၃ နှစ်အရွယ် ကိုရဲမော် ကျည်ထိမှန်သေဆုံးခဲ့ပြီး၊ ညနေပိုင်းမှာတော့ လှတောရွာဘက်ကနေ ပစ်လိုက်တဲ့ လက်နက်ကြီးကျည်က အသက် ၂၃ နှစ်အရွယ် ကိုထက်ဝေစိုးကို ထိမှန်သေဆုံးခဲ့တာလည်း ဖြစ်ပါတယ်။

“နှစ်ဦးစလုံးက နှမ်းခင်းထဲ အလုပ်လုပ်နေရင်း စစ်တပ်က ရမ်းပစ်တဲ့ကျည်နဲ့ သေဆုံးရတာ။ ကိုရဲမော်က နေရာတင်သေတာ၊ ထက်ဝေစိုးက ည ၁၂ နာရီလောက်မှာသေတာ”လို့ ဒေသခံတဦးက ပြောပါတယ်။

သူတို့ ၂ ဦးဟာ သခွတ္တောရွာမှာ နေထိုင်သူတွေဖြစ်ကာ ကိုရဲမော်က ရွာအနောက်ဘက်ရှိ နှမ်းခင်းမှာ ကျည်ထိမှန်ခဲ့တာဖြစ်ပြိး ကိုထက်ဝေစိုးကတော့ ရွာတောင်ဘက်ရှိ နှမ်းခမ်းတခုမှာ ရှိနေချိန် ကျည်ထိမှန်ခဲ့တာလို့ သိရပါတယ်။

ကိုထက်ဝေစိုးရဲ့ ဖခင်က သခွတ္တောရွာ အုပ်ချုပ်ရေးမှူးဖြစ်ပြီး လက်ရှိရွာမှာမနေဘဲ ဝက်လက်မြို့ပေါ်က ဝန်ထမ်းအိမ်ရာတခုမှာ နေထိုင်နေတာလို့လည်း အထက်ပါဒေသခံက ဆက်ပြောပါတယ်။

ဇွန်လ ၁၇ ရက် မနေ့ကမနက် ၉ နာရီမှာ ကိုရဲမော်ရဲ့အလောင်းကို မြေမြှုပ်သဂြိုဟ်ပြီး ၁၁ နာရီလောက်မှာတော့ ကိုထက်ဝေစိုးရဲ့အလောင်းကို မီးသဂြိုဟ်ခဲ့တယ်လို့ သိရပါတယ်။

ပြီးခဲ့တဲ့နှစ် ဇွန်လဝန်းကျင်ကလည်း သခွတ္တောရွာတောင်ပိုင်းက နေအိမ် ၂၀ ကိုစစ်တပ်ကမီးရှို့လို့ ပြာကျပျက်စီးခဲ့ရပါသေးတယ်။

စာတည်း – လင်း

စစ်ကိုင်း၊ ဇွန် ၁၄၊ ၂၀၂၃။

စစ်ကိုင်းတိုင်း၊ ဝက်လက်မြို့မှာ အခြေစိုက်ထားတဲ့ G Z Special Task Force – Wetlet အဖွဲ့ဟာ အထူးစစ်ဆင်ရေးနဲ့ မြို့ပြပြောက်ကျားစစ်ဆင်ရေးလေ့ကျင်မူတွေပြုလုပ်နေတယ်လို့ အဲဒီအဖွဲ့ရဲ့ တာဝန်ခံတဦးက ပြောပါတယ်။

မြို့ပြစစ်ဆင်ရေး လေ့ကျင့်မှုကို တိုင်းရင်းသားလက်နက်ကိုင် တပ်ဖွဲ့တဖွဲ့မှ သင်တန်းဆရာ ၂ ဦးက တပ်စိပ် ၁ စိပ်စာပါ အင်အား ၁၂ ဦးကို သင်ကြားပေးနေတာလို့ ဆိုပါတယ်။

“စစ်ကောင်စီယှဥ်တဲ့အခါမှာ ရဲဘော်တွေရဲ့ ကြံ့ခိုင်ရေး၊ သက်လုံကောင်းဖို့၊ အသာစီးရဖို့၊ လေ့ကျင့်ပေးတာပါ။ မြို့ပေါ်တွေက စစ်ကောင်စီအထိုင်ချတဲ့ နေရာတွေ၊ ဘန်ကာတွေကို လျှပ်တပြက်အသာစီးယူ တိုက်ခိုက်ဖို့ပါ။ နောက်တခုက စစ်ကြောင်းထိုးတဲ့နေရာမှာ စနစ်တကျခြုံခိုတိုက်ခိုက်ဖို့ လေ့ကျင့်တာပါ” လို့ GZ Specical Task Force – Wetlet တာဝန်ခံက ပြောပါတယ်။

လေ့ကျင့်ရာမှာ ဒိုက်ထိုးတာ၊ ရေကူးတာ၊ အလေးမတာနဲ့ အဝေးပြေးတာစတဲ့ မြို့ပြစစ်ဆင်ရေးအတွက် လိုအပ်တဲ့လေ့ကျင့်မှုတွေ ပြုလုပ်နေရတာလို့ သူကဆက်ပြောပါတယ်။

ဇွန်လ ၃ ရက်က စတင်လေ့ကျင့်တာဖြစ်သလို လေ့ကျင့်ကာလရက် ၂၀ ခန့် ကြာမြင့်မှာဖြစ်ပြီး အခုလေ့ကျင့်မှုဟာ ပထမအကြိမ်ဖြစ်တယ်လို့ ဆိုပါတယ်။

G Z Special Task Force -Wetlet အဖွဲ့ဟာ ဝက်လက်မြို့နယ် အပြင်နယ်မြေချင်း ထိစပ်နေတဲ့ စစ်ကိုင်း၊ ရွှေဘို၊ အရာတော်မြို့နယ်တွေမှာလည်း လူပ်ရှားမှုတွေပြုလုပ်ခဲ့တယ်လို့ ဆိုပါတယ်။

ပြီးခဲ့တဲ့ ဧပြီလ ၂၃ ရက် မနက် ၆ နာရီလောက်ကလည်း GZ အဖွဲ့ဟာ ဝက်လက်မြို့ ကနေ ဟံလင်းမြို့ဟောင်းကို ရိက္ခာပို့လာတဲ့ စစ်ကောင်စီတပ်သား ၁၀၀ ဝန်းကျင်လောက်ကို ဘင်တဲကုန်းကျေးရွာအနီးကနေ ၆၀ မမလက်နက်ကြီးနဲ့ တိုက်ခိုက်ခဲ့ကြပါသေးတယ်။

ဒါ့အပြင် ပြီးခဲ့တဲ့ ဧပြီလ ၄ ရက်ကတော့ ရွှေဘိုမြို့နယ်၊ ဘုံးဘွဲ့ကျေးရွာအနီး စစ်ကောင်စီတပ်နဲ့တိုက်ပွဲမှာ GZ Special Task Force – Wetlet ရဲဘော်ကတုံးနဲ့ ရဲဘော်မု့န်လုံးတို့ ၂ ဦး သေဆုံးခဲ့ရပါသေးတယ်။

စာတည်း – လင်းဇေ

စစ်ကိုင်း၊ ဇွန် ၃၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်၊ နဘဲပင်လှကျေးရွာကို စစ်ကောင်စီတပ်ဖွဲ့က ထိတွေ့ဖြစ်ပွားခြင်းမရှိဘဲ ဇွန်လ ၃ ရက် ဒီနေ့မနက် ၁၀ နာရီခွဲလောက်မှာ နေအိမ်တွေကို ဝင်ရောက်မီးရှို့ခဲ့သလို ဒေသခံတဦးကိုလည်း မီးရှို့သတ်ဖြတ်သွားတယ်လို့ ဒေသခံတွေက ပြောပါတယ်။

လူနေအိမ်ခြေ ၂၀၀ နီးပါးရှိတဲ့ နဘဲပင်လှကျေးရွာဟာ အခုလိုမီးရှို့ခံရတာ ပထမအကြိမ်ပဲ ဖြစ်ပါတယ်။

အင်အား ၁၀၀ နီးပါးရှိတဲ့ စစ်ကောင်စီစစ်ကြောင်းဟာ နဘဲပင်လှကျေးရွာထဲကို ဒီနေ့မနက်မှာ လက်နက်တွေ ပစ်ဖောက်ပြီးဝင်ရောက်လာခဲ့ပါတယ်။ အဲဒီနောက်မှာတော့ ကျေးရွာထဲက နေအိမ်တွေကို မီးရှို့ဖျက်ဆီးနေချိန် ရွာထဲကနေထွက်မပြေးဘဲ ကျန်နေခဲ့တဲ့ အသက် (၂၃) နှစ်အရွယ် အမျိုးသားတဦးကို ရိုက်နက်ပြီး မီးရှို့သတ်ဖြတ်သွားတယ်လို့ ဝက်လက်မြို့နယ် ထောက်ပို့အဖွဲ့မှ ဖေဖော်ဝါရီဝမ်က ပြောပါတယ်။

“အခုလောလောဆယ်တော့ ရွာသားတွေတော့ ရွာထဲကိုပြန်ဝင်သွားပါပြီ၊ နေအိမ်တွေ မီးထဲဘယ်လောက်ပါသွားလဲ မသိရသေးဘူး၊ ရွာထဲက အမျိုးသား ၅ ဦးကိုလည်း စကစတွေက ဓားစားခံအဖြစ် ဖမ်းဆီးခေါ်ဆောင် သွားတယ်။ ရွာသားတဦးကို မီးရှို့သတ်လိုက်တယ်။ ဦးလေးတယောက်ကတော့ ခြေထောက်ကို ထိထားတယ်။ သူ့ကို ရွာဘုန်းကြီးကျောင်းမှာ ထားခဲ့တယ်”လို့ သူက ဆိုပါတယ်။

နဘဲပင်လှကျေးရွာကို မီးရှို့ပြီး မနက် ၁၁ နာရီခွဲလောက်မှာတော့ အဲဒီရွာနဲ့ တမိုင်လောက်ဝေးတဲ့ တမာကန်ရွာထဲကို ဓားစားခံ ၅ ဦးနဲ့အတူ စစ်ကောင်စီတပ်ဖွဲ့တွေက ဝင်ရောက်သွားခဲ့ပြီး ကျေးရွာထဲက လူနေအိမ်တွေကို ထပ်မံမီးရှို့ဖျက်ဆီးတာတွေ ပြုလုပ်နေတယ်လို့ အဆိုပါ ထောက်ပံ့အဖွဲ့ဝင်က ပြောပါတယ်။

စာတည်း −လင်းဇေ

စစ်ကိုင်း၊ မေ ၂၅၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်၊ လိမ်ပင်ကျေးရွာက လူနေအိမ်တွေကို မီးရှို့ဖို့လာတဲ့ စစ်ကောင်စီတပ်သားတွေ ကို မေ ၂၅ ရက် ဒီနေ့ မနက် ၆နာရီကျော်မှာ မိုင်းဆွဲတိုက်ခိုက်ခဲ့တာကြောင့် ၃ ဦးထက်မနည်း ဒဏ်ရာရှိခဲ့တယ်လို့ ဝက်လက် PDF တဦးက ပြောပါတယ်။

ဝက်လက်မြို့ပေါ်ကနေ အင်အား ၇၀ ကျော်ပါတဲ့ အဲဒီစစ်ကြောင်းဟာ လိမ်ပင်ကျေးရွာအနီးကို ရောက်ရှိလာချိန် People’s Servant Revolution (Wetlet) တပ်ခွဲ(၁)ရဲ့ အသင့်ထောင်ထားတဲ့ တိုက်မိုင်း ၃လုံးနဲ့ ဖောက်ခွဲ တိုက်ခိုက်ခဲ့တာဖြစ်တယ်လို့ PSR(Wetlet)မှ ရဲဘော်တဦးက ပြောပါတယ်။

“စကစတွေက ရွာအရှေ့ဖက်ကို ၃ဖွဲ့ခွဲပြီးဝင်တာ အဲဒီထဲက တဖွဲ့က ကျနော်တို့မိုင်းကွင်းထဲကို ဝင်ရောက်လာတာနဲ့ ဖောက်ခွဲလိုက်တာ။ ၃ ကောင်လဲကျသွားတာကိုမြင်ခဲ့ရတယ်။ မိုင်းက တိုက်မိုင်းဆိုတော့ နောက်ထပ်လည်း ဒဏ်ရာရ၊ သေဆုံးသူတွေရှိနိုင်တယ်ဗျ”လို့ သူကဆိုပါတယ်။

အခုလိုမိုင်းဆွဲခံရပြီးနောက် ဒဏ်ရာရသွားတဲ့ စစ်ကောင်စီတပ်သားတွေကို ကားတစီးနဲ့ မြို့ပေါ်ကိုတင်ဆောင်သွားပြီး၊ ကျန်ခဲ့တဲ့စစ်ကောင်စီတပ်သားတွေကတော့ ရွာထဲကလူနေအိမ် ၁၀ အိမ်ကျော်ကိုမီးရှို့ဖျက်ဆီးခဲ့ပြီးမှ ဝက်လက်မြို့ပေါ်ကို မနက် ၁၀ နာရီကျော်မှာ ပြန်ဆုတ်သွားခဲ့ကြတယ်လို့ သူကဆက်ပြောပါတယ်။

မိုင်းဆွဲခံရတဲ့ စစ်ကောင်စီတပ်သားတွေဟာ ဝက်လက်မြို့ပေါ်မှာ ရောက်ရှိအထိုင်ချနေကြတဲ့ ခမရ ၃၆၄ တပ်ရင်းက တပ်သားတွေဖြစ်ကြတယ်လို့ သိရပါတယ်။

ပြီးခဲ့တဲ့ မေ ၂၃ ရက် ညနေ ၄ နာရီကျော်မှာလည်း လှတောရဲစခန်းကနေ အင်အား ၇၀ ကျော် နဲ့ ဝက်လက်မြို့ပေါ်ကို ခြေလျင်လာတဲ့ စစ်ကြောင်းကို ပင်းဇင်းကျေးရွာအနီးမှာ People’s Servant Revolution(Wetlet)အဖွဲ့နဲ့ နယ်မြေခံပကဖတွေက မိုင်းဆွဲပြီး ထိတွေ့ပစ်ခတ်ခဲ့တာကြောင့် စစ်ကောင်စီ တပ်သား ၂ ဦး ဒဏ်ရာရှိခဲ့တယ်လို့သိရပါတယ်။

စာတည်း – လင်းဇေ