◼ အသံတိတ်သပိတ်မတိုင်မီ မန္တလေးမှာ လုံခြုံရေးတိုးမြှင့်တင်းကျပ်
မန္တလေး၊ ဒီဇင်ဘာ ၉၊ ၂၀၂၅။
မြို့တွင်းကနေ ဆန္ဒပြသပိတ်ခေါင်းဆောင်တွေပြန်မထွက်သေးဘူးဆိုကာ မန္တလေးမြို့မှာ စစ်ကော်မရှင်တပ်ကလုံခြုံရေးတင်းကျပ်ထားပြီး လမ်းတွေမှာရှောင်တခင်စစ်ဆေးတာတွေနဲ့ နေအိမ်တွေကို ရှောင်တခင်ဧည့်စာရင်းစစ်ဆေးတာတွေ ဆက်တိုက်လုပ်ဆောင်နေတယ်လို့ မြို့ခံတွေဆီက သိရပါတယ်။
ဒီဇင်ဘာ ၈ ရက် မနေ့ညပိုင်းက မန္တလေးမြို့၊ မဟာအောင်မြေမြို့နယ်၊ မဟာမြိုင်ရပ်ကွက်၊ အောင်မြေသာစံမြို့နယ်၊ အိုးဘိုထောင်အနီးနဲ့ ညောင်ကွဲရပ်ကွက်တွေက နေအိမ်တချို့ကို ရှောင်တခင်ဧည့်စာရင်းစစ်ဆေးခဲ့ပြီး ဒေါက်တာ တေဇာဆန်း၊ ကိုနန်းလင်းနဲ့ ကိုခန့်ဝေဖြိုးတို့ ဓာတ်ပုံတွေပြကာ တွေ့ရှိရင် သက်ဆိုင်ရာကို အကြောင်းကြားဖို့ ဧည့်စာရင်းစစ်ဆေးတဲ့စစ်ကော်မရှင်တပ်သားတွေက ပြောဆိုခဲ့တယ်လို့ သိရပါတယ်။
” နေ့တိုင်းမြို့အစွန်ရပ်ကွက်တွေမှာ လုံခြုံရေးချထားတယ်။ ရဲကားနဲ့စစ်ကားတွေလည်း မြို့ထဲတောက်လျှောက်ပတ်နေတာ။ တချို့နေရာတွေဆို ရဲတွေကို အပြည့် တနေကုန်ကင်းချထားတာမျိုးလည်း တွေ့ရတယ်” လို့ မန္တလေးမြို့ခံတဦးက မြေလတ်အသံကို ပြောပါတယ်။
မန္တလေးအခြေစိုက် စစ်ကော်မရှင်တပ် စစ်ဖက်ရေးရာလုံခြုံရေးတပ်ဖွဲ့ဝင်(စရဖ)တဦးကတော့ ဆန္ဒပြသပိတ်လုပ်ဆောင်သူတွေဟာ မန္တလေးမြို့တွင်းမှာပဲရှိနေနိုင်သေးပြီး အလွန်ဆုံးမြို့နီးအစပ်မှာပဲရှိနိုင်သေးတာကြောင့် မိအောင်ဖမ်းဆီးမယ်ဆိုကာ လူမှုကွန်ယက်မှာ ရေးသားထားပါတယ်။
ဒါ့အပြင်မြို့တွင်းက အများပြည်သူစည်ကားရာ ဈေးတွေမှာလည်း ဆန္ဒပြခံရပြီးနောက်တရက် ဒီဇင်ဘာ ၄ ရက်ကနေ ဒီကနေ့ ဒီဇင်ဘာ ၉ ရက်အထိ လုံခြုံရေးတွေချထားတယ်လို့ မြို့ခံတွေက ပြောပါတယ်။
မနက်ဖြန် ဒီဇင်ဘာ ၁၀ ရက်မှာလည်း အသံတိတ်သပိတ်ပြုလုပ်ဖို့ ကြေညာထားတာကြောင့် မန္တလေးမြို့ကို လုံခြုံရေးပိုကြပ်နေတာဖြစ်နိုင်တယ်လို့ မြို့ခံတွေက ပြောဆိုပါတယ်။
ဒီဇင်ဘာ ၃ ရက် မနက်အစောပိုင်းက စစ်ခေါင်းဆောင် မန္တလေးမြို့ရောက်ရှိနေချိန် လုံခြုံရေးတင်းကျပ်ထားတဲ့ကြားက လူစည်ကားရာမန္တလေးစျေးချိုအနီးမှာ ဒေါက်တာတေဇာဆန်းဦးဆောင်တဲ့ သပိတ်အဖွဲ့တွေဟာ စစ်ကော်မရှင်ပြုလုပ်မယ့် ရွေးကောက်ပွဲကိုဆန့်ကျင်ရေး ဆန္ဒပြလှုပ်ရှားမှု ပြုလုပ်ခဲ့တာပါ။
အဲ့ဒီနေ့ကတည်းက မန္တလေးမြို့မှာ သပိတ်ခေါင်းဆောင်တွေကိုရှာဖွေဖို့ မြို့တွင်းမှာစစ်ဆေးမှုတွေတင်းကျပ်နေပြီး မြို့တွင်းနေရာအများအပြားမှာ လုံခြုံရေးအင်အားအများအပြားတိုးမြှင့်ချထားတာလို့ မြို့ခံတွေဆီက သိရပါတယ်။
သတင်း – မြတ်