ရေနစ်သေဆုံးမှု

မန္တလေး၊ ဇွန် ၁၂၊ ၂၀၂၃။

မန္တလေးတိုင်းဒေသကြီး၊ ညောင်ဦးမြို့၊ အမှတ် ၇ ရပ်ကွက်၊ ဝက်ကြီးအင်းရပ်အနီး ဧရာဝတီမြစ်ထဲမှာ ပျောက်ဆုံးနေတဲ့ ကိုရင် ၂ ပါးကို ရေနစ်သေဆုံးလျက် ပြန်တွေ့ခဲ့ရတယ်လို့ သိရပါတယ်။

မေလ ၁၁ ရက်နေ့က ပျောက်ဆုံးနေတဲ့ ကိုရင်တွေဖြစ်တဲ့ ဝက်ကြီးအင်းရပ် အလိုတော်ပြည့်ကျောင်းတိုက်က ကိုရင် အရှင်စန္ဒာမာလာ ၁၂ နှစ်၊ အရှင်အရိယဓမ္မ ၉ နှစ်တို့ရဲ့ အလောင်းတွေကို ပြန်တွေ့ခဲ့ရတာလို့ ဒေသခံတဦးက ပြောပါတယ်။

“ကိုရင် ၂ ပါးက ၁၀ ရက်နေ့ ညနေ ၆ နာရီလောက်ကတည်းက ပျောက်နေလို့ လိုက်ရှာနေကြတာ။ နောက်တော့ မြစ်ကမ်းဘေးမှာ သင်္ကန်းတွေ တွေ့လို့ လိုက်ရှာရာကနေ နောက်တနေ့မနက် ၁ နာရီမထိုးခင်လောက်မှာ တပါးကို အရင်တွေ့တယ်။ နေ့ခင်း ၁၀ နာရီလောက်တော့ နောက်ထပ်တပါးကို မြစ်ထဲမှာ ထပ်တွေ့ရတယ်။ “လို့ ဒေသခံက ပြောပါတယ်။

သိတတ်နားလည်တဲ့သူ မပါဘဲ အရွယ်မရောက်သေးတဲ့ ကိုရင် ၂ ပါးသာ ရေဆင်းကူးရာကနေ ရေနစ်သေဆုံးတာဖြစ်နိုင်တယ်လို့ ဆိုပါတယ်။

ရေနစ်သေဆုံးသွားတဲ့ ကိုရင် ၂ ပါးအလောင်းကိုတော့ ညောင်ဦးခရိုင်ပြည်သူ့ဆေးရုံကို တင်ပို့ထားရတယ်လို့ သိရပါတယ်။

ညောင်ဦးမြို့နယ်ထဲမှာ ယခုလို ကိုရင်တွေ ရေနစ်သေဆုံးတာ ပထမဆုံးအကြိမ် ဖြစ်တယ်လို့ ဆိုပါတယ်။

စာတည်း – 007

စစ်ကိုင်း၊ မေ ၂၉၊ ၂၀၂၃။

စစ်ကိုင်းတိုင်းဒေသကြီး၊ စစ်ကိုင်းမြို့နယ်၊ ဝါးချက်ကျေးရွာ၊ ရှင်ဖြူရှင်လဘုရားရေဆိပ်နားမှာ အဖော်တွေနဲ့ ရေဆင်းကူးရာက လူငယ် ၂ ဦးရေနစ်သေဆုံးသွားတယ်လို့ သိရပါတယ်။

မေလ ၂၈ ရက် နေ့လည် ၁ နာရီကျော်ခန့်မှာ စစ်ကိုင်းမြို့၊ မီးရထားရပ်နေ လူငယ် ၈ ဦးခန့်ဟာ ဧရာဝတီမြစ်အတွင်း ရေဆင်းကူးရာက လူငယ် ၂ ဦး ရေနစ်သေဆုံးသွားတာလို့ ဒေသခံတဦးက ပြောပါတယ်။

“ရေသွားကူးကြတာက သူတို့အရွယ်တူလေးတွေ ၇ ယောက် ၈ ယောက်လောက်ရှိမယ်။ ခု ကလေး ၂ ယောက်ကလဲ ရေမကူးတတ်ဘဲနဲ့ ဆင်းဆော့ရာကနေရေနစ်သွားတာ။ ရေကလဲ မြစ်ထဲဆိုတော့ နက်တယ်လေ”လို့ ပြောပါတယ်။

သေဆုံးသွားသူ ၂ ဦးဟာ မောင်ဟိန်းထက်ဇော် ၁၄ နှစ်နဲ့ မောင်ထက်ဝေလင်း ၁၇ နှစ်တို့ဖြစ်တယ်လို့ သိရပါတယ်။

ကလေး ၂ ဦးရေနစ်ရာကို ဒေသလူမှုကူညီရေးအသင်း၊ မီးသတ်နဲ့ဒေသခံတွေက ဝိုင်းဝန်းရှာဖွေခဲ့ကြပြီး ရေနစ်အပြီး နာရီဝက်ကျော်အကြာမှာ အလောင်း ၂ လောင်းကိုရေနစ်တဲ့ နေရာဝန်းကျင်နားမှာ ပြန်ရှာတွေ့ခဲ့တာလို့ ဆိုပါတယ်။

ရေနစ်သေဆုံးသွားတဲ့ လူငယ် ၂ ဦးရဲ့အလောင်းကို စစ်ကိုင်းဆေးရုံကို ပို့ဆောင်ပေးခဲ့ရပြီး မေလ ၂၉ ရက် ယနေ့မနက် ၁၀ နာရီမှာ မီးသင်္ဂြိုဟ်ခဲ့ကြတယ်လို့ သိရပါတယ်။

ဧပြီ ၂၉ ရက်နေ့က စစ်ကိုင်းမြို့၊ တကောင်းရပ်ကွက်၊ ရတနာပုံတံတားအောက်၊ ဧရာဝတီမြစ်အတွင်းရေးဆင်းကူးသူ အမျိုးသား ၁ ဦးရေနစ်သေဆုံးသွားသေးတယ်လို့ ဒေသခံတွေက ဆိုပါတယ်။

အလားတူ မတ်လ ၅ ရက်နေ့က စစ်ကိုင်းတံတားအောက် ဧရာဝတီမြစ်အတွင်းမှာ စစ်ကိုင်းမြို့၊ ဝါဆိုကျောင်းက ကိုရင် ၃ ပါး ရေဆင်းကူးချိန် အသက် ၁၂ နှစ်အရွယ် ကိုရင် ၁ ပါးရေနစ်သေဆုံးခဲ့ပါသေးတယ်။

စာတည်း – 007