မြေလတ်အသံ၊ ဒီဇင်ဘာ ၁၉၊ ၂၀၂၅။
စစ်ကိုင်းတိုင်း၊ ခင်ဦးမြို့နယ်ရှိ ရွှေဘို-မြစ်ကြီးနား ဗျူဟာလမ်းမနဲ့ ဧရာဝတီမြစ်ကြောင်းဆိပ်ကမ်းတို့ကို စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ခဲ့ရာ ဆီပေပါ ရာနဲ့ချီ မီးလောင်ဆုံးရှုံးခဲ့ပြီး သေဆုံးသူတွေလည်းရှိခဲ့တယ်လို့ ခင်ဦးမြို့နယ်ပြည်သူ့အုပ်ချုပ်ရေးအဖွဲ့မှတာဝန်ရှိသူတဦးက ပြောပါတယ်။
ရွှေဘို-မြစ်ကြီးနား ဗျူဟာလမ်းမပေါ်ရှိ မြေနီချိုလမ်းဆုံကနေ ထနောင်းကိုင်းလမ်းဆုံကြားထိ ကုန်ကားတွေ ပိတ်မိနေတဲ့နေရာကို ဒီဇင်ဘာ ၁၈ ရက်မနက် ၁၁ နာရီကနေ နေ့လယ် ၁ နာရီကျော်အထိ တိုက်လေယာဥ် ၄ စီး၊ ဂျိုင်ရိုကော်ပတာ ၃ စီးတို့နဲ့ ဗုံးကြဲတိုက်ခိုက်ခဲ့တာကြောင့် လူ ၁ ဦးမီးလောင်သေဆုံးခဲ့တယ်လို့ ဆိုပါတယ်။
“သေဆုံးတဲ့သူကျား/မ အသက်အရွယ်ခွဲလို့ မရပါ။ သေဆုံးတဲ့သူက လေကြောင်းတိုက်ခိုက်မှုကြောင့် လုံးဝကောက်လို့မရဘူး။ ကောက်လို့မရတဲ့ အခင်းအကျင်းမှာ မီးလောင်တယ်။ မီးလောင်တော့ ဆီခြံမှာရှိတဲ့ ဆီပေပါတွေရော၊ ၁၂ ဘီးကားကြီးထဲမှာ ဆီပေပါတွေကအပြည့်တင်ထားတာဆိုတော့ ဆီပေပါတွေရော၊ ဆီခြံတွေရောအကုန်လောင်တာ။ လောင်တဲ့အတွက်ကြောင့် Deadbody ကကောက်လို့မရတော့ဘူး”လို့ ခင်ဦးမြို့နယ်ပအဖ တာဝန်ရှိသူတဦးက ပြောပါတယ်။
ဒီဗုံးကြဲမှုအတွင်း သေဆုံးသူ ၁ ဦးအပြင် နောက်ထပ်အမျိုးသား၊ အမျိုးသမီး ၆ ဦး ဒဏ်ရာရရှိခဲ့ပြီး သေဆုံးသူကိုတော့ မီးငြှိမ်းသတ်ပြီးချိန်မှာတောင် အမျိုးသား၊ အမျိုးသမီး ခွဲခြားလို့မရတော့တဲ့ အခြေအနေဖြစ်သွားခဲ့တယ်လို့ ဆိုပါတယ်။
ဒါ့အပြင် မြေနီချိုလမ်းဆုံအနီးရှိ ယာဥ်ကြောပိတ်ဆို့တဲ့နေရာမှာ ဆီပေပါတွေ နှစ်ထပ်အပြည့်တင်ဆောင်ထားတဲ့ ၁၂ ဘီးကား ၁ စီး၊ ဆီဘောက်ဆာကားတွေ၊ ခြံခတ်သိုလောင်ထားတဲ့ ရာနဲ့ချီတဲ့ ဆီးပေပါတွေအကုန်းးလုံး မီးလောင်ပျက်စီးခဲ့သလို ဆီတွေဟာလည်း ကားလမ်းမပေါ်ကနေ ဒလဟောစီးကျခဲ့တယ်လို့ သူကဆိုပါတယ်။
“မီးလောင်ဆုံးရှုံးသွားတဲ့ ဆီပေပါတွေအကုန်လုံးက ပုဂ္ဂလိကပိုင်တာတွေပါ။ တော်လှန်ရေးတပ်တွေပိုင်တဲ့ပစ္စည်း တခုမှမပါဘူး။ ခြံခတ်ထားတာက စစ်ဘေးလွတ်ရာနေရာတွေမှာ အရောင်းအဝယ်လုပ်နိုင်ဖို့ သိုလောင်ထားတာပါ” လို့ ခင်ဦးမြို့နယ်ပအဖ တာဝန်ရှိသူတဦးကပြောပါတယ်။
ဒီဇင်ဘာ ၁၅ ရက်လောက်ကစလို့ ဗျူဟာလမ်းပိုင်းပေါ်မှာ ပိတ်မိနေကြတဲ့ကုန်ကားနဲ့ ခရီးသွားကားတွေဟာ ခင်ဦးကနေ ကန့်ဘလူဘက်ကိုသွားမယ့် ကားတွေဖြစ်ကြပြီး အဲ့ဒီကားတွေကို စစ်ကော်မရှင်တပ်ဖွဲ့ဝင်တွေက ခင်ဦး-ကန့်ဘလူမြို့နယ်စပ် ကျီကျင်းရွာမှ ဂိတ်ဖွင့်ပြီးပိတ်ဆို့ထားတာကြောင့် ယာဥ်ကြောပိတ်မိနေတာလို့ ဒေသခံတွေကပြောပါတယ်။
အလားတူ ဒီဇင်ဘာ ၁၆ ရက်နဲ့ ၁၇ ရက်နေ့ တို့မှာလည်း ခင်ဦး-စဉ့်ကူး-သပိတ်ကျင်း မြို့နယ်အစပ်ရှိ ဆိပ်ကမ်းတွေကို တိုက်လေယာဥ်တွေ၊ ဒရုန်းတွေနဲ့ ဗုံးကြဲတိုက်ခိုက်ခဲ့ရာ ဒေသခံတွေထိခိုက်သေဆုံးမှုတွေ ရှိခဲ့ပြီး အသေးစိတ်အခြေအနေတွေကိုမသိရှိရသေးဘူးလို့ အထက်ပါပအဖတာဝန်ရှိသူက ပြောပါတယ်။
၃ ရက်ဆက်ဗုံးကြဲမှုအတွင်း သေဆုံး၊ ဒဏ်ရာရရှိသူအမြောက်အများရှိနိုင်ပေမယ့် မြေပြင်ချိတ်ဆက်မှု အခက်အခဲတွေကြောင့် ၁ ဦးသာအတည်ပြုနိုင်ခဲ့ပြီး အခုလိုထိခိုက်သေဆုံးသူတွေဟာ ခရီးသွားပြည်သူတွေ၊ ကားသမားတွေနဲ့ စစ်ဘေးရှောင်တွေဖြစ်ကြတယ်လို့ ဆိုပါတယ်။
ပြီးခဲ့တဲ့ဒီဇင်ဘာ ၁၆ ရက်မှာပဲ ရွှေဘိုမြို့နယ်၊ ရွာသစ်ကုန်းနဲ့ မအူကျေးရွာ အနီးမှာ ပိတ်မိနေကြတဲ့ ကားတန်းတွေ ကို တိုက်ခိုက်ရေးလေယာဥ်နဲ့ ဗုံး ၇ ကြိမ်တိုက် ခိုက်ခဲ့သလို Gyrocopter ၃ စီးနဲ့ပါ ဗုံးကြဲတိုက်ခိုက်ခဲ့တာကြောင့် သံဃာ ၁ ပါးနဲ့ ဒေသခံ ၃ ဦးသေဆုံးခဲ့တယ်လို့ သိရပါတယ်။
စာတည်း – လင်း