မြွေကိုက်

မြေလတ်အသံ၊ ဇူလိုင် ၂၀၊ ၂၀၂၅။

စစ်ကိုင်းတိုင်း၊ ကန့်ဘလူမြို့ နယ်၊ ရပ်ကျေးပြည်သူ့ကာကွယ်ရေးအဖွဲ့မှ လူငယ်တပ်ဖွဲ့ဝင် ၁ ဦး အဆိပ်ပြင်းမြွေ(မြွေပွေး)ကိုက်ခံရပြီးနောက် ဆေးကုသမှုခံယူနေချိန် ကျဆုံးခဲ့တယ်လို့ Kantbalu Counter Revolution Army (KBU-CRA) က ပြောပါတယ်။

ကျဆုံးခဲ့သူမှာ ညောင်ပေါင်ရင်းကျေးရွာ ပြည်သူ့ကာကွယ်ရေးအဖွဲ့မှ အသက် ၁၉ နှစ်အရွယ် ရဲကို ကို(ခ)ကံကောင်း ဖြစ်ပြီး သူဟာ ဇူလိုင် ၁၁ ရက်မနက်ပိုင်းမှာ ကျေးရွာကိုကင်းပတ်နေချိန် ဝဲဖက်ခြေဖမိုးကို အဆိပ်ပြင်းမြွေကိုက်ခံခဲ့ရတာလို့ ဆိုပါတယ်။

“ကန့်ဘလူမြို့နယ်မှာ NUG ကဖွင့်ထားတဲ့ ပြည်သူ့ဆေးရုံ ရှိတယ်။အဲ့ဒီဆေးရုံးကို သွားတာ လမ်းက စစ်ကြောင်းရှိနေလို့ ပြန်လှည့်ခဲ့ရတယ်”လို့ Kantbalu Counter Revolution Army (KBU-CRA)တာဝန်ခံ ကိုငယ်လေး က ပြောပါတယ်။

အဲ့ဒီနောက် စစ်ကောင်စီထိန်းချုပ်မှုအောက်မှာရှိနေတဲ့ မြို့ကြီးတခုရဲ့ ဆေးရုံကို ပို့ဆောင်ကုသခဲ့ပေမယ့် ဆေးရုံရောက်နောက်ကျတာ၊ ကျောက်ကပ်ဆေးဖိုးမတတ်နိုင်ခဲ့တာတွေကြောင့် ဇူလိုင် ၁၉ ရက်မနက် ၈ နာရီမှာ ကျဆုံးသွားတာလို့ သိရပါတယ်။

“အဲ့ဒီ(လုံခြုံရေးအရမြို့အမည်မဖော်နိုင်တဲ့)ဆေးရုံကို လမ်းကြောင်းအမျိုးမျိုးရှာပြီး သွားခဲ့ရတာ။ ဆေးရုံရောက်တော့ အဆိပ်ကလွန်သွားတယ်။ နှလုံး၊အဆုပ်တွေ၊အသည်းတွေ ကျွမ်းသွားတယ်”လို့ သူက ဆက်ပြောပါတယ်။

ရဲဘော် ကံကောင်းဟာ အထက်ပါဆေးရုံပေါ်မှာပဲ ကျ‌ဆုံးခဲ့တာကြောင့် ၎င်းရဲ့ရုပ်အလောင်းကို ကန့်ဘလူရှိပကဖစခန်းရှိရာကို ဇူလိုင် ၂၀ ရက်ဒီကနေ့မှာ ပြန်လည်သယ်ယူလာခဲ့ပြီး နာရေးကိစ္စတွေ ဆက်လက်ဆာင်ရွက် နေတယ်လို့ သိရပါတယ်။

ကျေးရွာလုံခြုံရေးအတွက် ကင်းပတ်လှည့်နေချိန် ပကဖတပ်ဖွဲ့ဝင် ကံကောင်းမှာ တိုက်ခိုက်ရေးစစ်ဖိနပ်မရှိလို့ `ရှိုးဝါး´အမျိုးအစား ညှပ်ဖိနပ်စီးကင်းလှည့်ချိန် အခုလို အဆိပ်ပြင်းမြွေကိုက်ခံခဲ့ရတာလို့ ဆိုပါတယ်။

ကန့်ဘလူမြို့နယ်မှာ စစ်ဖိနပ် ၁ ရံကို ၅၅,၀၀၀ ကျပ်စျေးရှိပေမယ့် ဝယ်ယူဖို့လမ်းကြောင်းခက်ခဲတာအပြင် တပ်ဖွဲ့အနေနဲ့လည်း ငွေကြေးအဆင်မပြေတာကြောင့် ရဲဘော်တွေဟာ စစ်ဖိနပ်အစား ညှပ်ဖိနပ်အသုံးပြုကာ စစ်ဘက်တာဝန်တွေ ထမ်းဆောင်နေကြရတယ်လို့ သိရပါတယ်။

စာတည်း – ဟိန်းစံ

ရွှေဘို၊ ဇွန် ၂၉၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ရွှေဘိုမြို့နယ်နဲ့ ဒီပဲယင်းမြို့နယ်အတွင်းမှာ ၂၀၂၄ ဇန်နဝါရီကနေ ၂၀၂၅ ဇွန် ၂၈ ရက်အတွင်း မြွေကိုက်ခံရသူ ၉၇ ဦးရှိပြီး အဲ့ဒီထဲက ၃ ဦးသေဆုံးထားတယ်လို့ S&C မီးဘေးစစ်ဘေးပညာရေး ကူညီစောင့်ရှောက်ရေးအဖွဲ့ဆီက သိရပါတယ်။

မြွေကိုက်ခံရသူတွေက စစ်ဘေးရှောင်ပြည်သူတွေဖြစ်ကြပြီး တိုက်ပွဲနဲ့ စစ်ကြောင်းထိုးလာတာတွေကြောင့် တောတောင်ထဲနဲ့ လယ်တောတွေမှာ နေထိုင်ကြချိန်မှာ ကိုက်ခံရတာဖြစ်တယ်လို့ ဆိုပါတယ်။

“ဒီဘက်နယ်မြေတွေမှာက အများစုက စစ်ရှောင်ရတာ။ မြို့ရွာမှာနေရတာမဟုတ်ဘဲ ကိုယ့်လယ်ယာ နီးစပ်ရာတောတွေထဲမှာ စစ်ရှောင်ရတာဆိုတော့ ချုံပုတ်တွေပေါတယ်။ လယ်ယာတွေထဲ တဲထိုးပြီး နေရာတာဆိုတော့ အနီးနားချုံပုတ်တွေကနေ အကောင်တွေထွက်တယ်။ အဲလိုတွေကနေ စစ်ရှောင်တွေ ကိုက်ခံရတာ။”လို့ S&C မီးဘေးစစ်ဘေးပညာရေး ကူညီစောင့်ရှောက်ရေးအဖွဲ့ တာဝန်ခံက ပြောပါတယ်။

ဒေသခံတွေ ကိုက်ခံရတဲ့ မြွေအများစုက မြွေပွေး၊ မြွေဟောက်အမျိုးအစားမြွေတွေဖြစ်ပြီး သေဆုံးသွားသူ ၃ ဦးက မြွေပွေးကိုက်ခံရလို့ သေဆုံးသူတွေဖြစ်တယ်လို့ ဆိုပါတယ်။

မြွေကိုက်ခံရသူတွေဟာ ဝက်လက်မြို့နယ်မှာ ၂၄ ဦး၊ ဒီပဲယင်းမြို့နယ်မှာ ၃၅ ဦး၊ ရွှေဘိုမြို့နယ်မှာ ၃၈ ဦး စုစုပေါင်း ၉၇ ဦးရှိပြီး အဲ့ဒီထဲကမှ ဝက်လက်မြို့နယ်က ၂ ဦးနဲ့ ဒီပဲယင်းမြို့နယ်က ၁ ဦးတို့သေဆုံးခဲ့တာ လို့ သိရပါတယ်။

မြွေကိုက်ခံရသူတွေကို မြွေဆိပ်ဖြေဆေးထိုးပေးနိုင်ဖို့ သက်ဆိုင်ရာဒေသအလိုက်က S&C အဖွဲ့ဝင်တွေ ဆီ ဆေးတွေဖြန့်ဝေပေးထားပြီး မြွေကိုက်ခံရပါက သက်ဆိုင်ရာအဖွဲ့ရုံးတွေဆီ အကြောင်းကြားလာရင် ကုသပေးနိုင်တဲ့အခြေနေရှိပါက ချက်ချင်းကုသပေးပြီး ကုသပေးနိုင်တာမရှိပါက အရေးပေါ်ကုသနည်းတွေနဲ့ ပြုစုပြီး သက်ဆိုင်ရာဆေးရုံဆေးခန်းတွေကို လွှဲပြောင်းပေးတယ်လို့ သိရပါတယ်။

စစ်ကိုင်းတိုင်းအတွင်းမှာ ဆေးဝါးပစ္စည်းသယ်ယူမှု စစ်ကောင်စီဘက်က ကန့်သတ်ထားတာကြောင့် မြွေဆိပ်ဖြေဆေးတွေ ဝယ်ယူသယ်ဆောင်ဖို့ အခက်ခဲပေါင်းများစွာကို ကျော်ဖြတ်သယ်ဆောင်ရလို့ အဖွဲ့တွေမှာ မြွေဆိပ်ဖြေဆေးလုံလောက်မှုတော့မရှိဘူးလို့ ဆိုပါတယ်။

“ဆေးဝါးသယ်ယူကန့်သတ်ခံရတာချင်းတူတူတောင် မြွေဆိပ်ဖြေဆေးသယ်ယူတာကို ပိုပြီးကန့်သတ်ထားတယ်။ ဥပဒေအရဆိုရင်တောင် မြွေဆိပ်ဖြေဆေးသယ်ယူတာက အိုင်ကွန်တွေ လက်နက်တွေသယ်ယူတာနဲ့ တူတူပဲပေါ့နော် ပြစ်မှုက။ နယ်မြေမှာရှိတဲ့ ပြည်သူလူထုရဲ့ အသက်အန္တရာယ်စိုးရိမ်တာဖြစ်လို့ ကိုယ့်ကိုယ်ကိုယ်အန္တရာယ်အများခံပြီး သယ်ယူပို့ဆောင်နေရတယ်”လို့ တာဝန်ခံက ဆက်ပြောပါတယ်။

မြွေကိုက်ခံရပါက လူနာ ၁ ဦးကို ကိုက်ခံရတဲ့ မြွေအမျိုးအစား၊ ကိုက်ခံရတဲ့ ဒဏ်ရာအပေါ်မူတည်ပြီး ဆေး ၈ လုံးမှ ၆၀ ကျော်ထိထိုးပေးရတယ်လို့ ဆိုပါတယ်။

မြွေဆိပ်ဖြေဆေးထိုးပြီးတဲ့ လူနာတွေထဲမှာ လူကောင်းပကတိပြန်ဖြစ်လာသူတွေရှိသလို ဆေးထိုးရတဲ့အပေါ်မူတည်ပြီး နောက်ဆက်တွဲပြသနာအနေနဲ့ ကျောက်ကပ်ရောဂါဝေဒနာလိုမျိုး ခံစားရသူတွေရှိလာတယ်လို့ သိရပါတယ်။

ဒ့ါအပြင်စစ်ရှောင်ပြည်သူတွေ မြွေကိုက်မခံရအောင် နေထိုင်သွားလာနည်း၊ မြွေကိုက်ခံရပြီးပါက နေထိုင်စားသောက်နည်းတွေကို သိရှိအောင် ပညာပေးဟောပြောတာနဲ့ လက်ကမ်းစာစောင်တွေ ဖြန့်ဝေပေးတာကို အလျဉ်းသင့်သလို ပြုလုပ်ပေးနေတယ်လို့ S&C မီးဘေးစစ်ဘေးပညာရေး ကူညီစောင့်ရှောက်ရေးအဖွဲ့ တာဝန်ခံက ပြောပါတယ်။

စာတည်း – လင်း

စစ်ကိုင်း၊ မေ ၂၂၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်ထဲမှာ ၂ ရက်အတွင်း စစ်ရှောင်အမျိုးသား ၂ ဦးနဲ့ အမျိုးသမီးတဦး မြွေကိုက်ခံရတာကြောင့် မေလအတွင်းမြွေကိုက်ခံရသူ ၆ ဦးအထိ ရှိလာတယ်လို့ သိရပါတယ်။

ကန့်ဘလူမြို့နယ်၊ ကိုးတောင်ဘို့တိုက်နယ်က အသက် ၅၆ နှစ်အရွယ် အမျိုးသမီးတဦးနဲ့ အသက် ၃၂ နှစ်အရွယ် အမျိုးသားတဦးတို့က မေလ ၂၁ ရက်မှာ မြွေအကိုက်ခံခဲ့ရပြီး၊ ချပ်သင်းတိုက်နယ်က အသက် ၂၇ နှစ်အရွယ် အမျိုးသားကတော့ မေလ ၂၀ ရက်မှာ အကိုက်ခံခဲ့ရတာ ဖြစ်ပါတယ်။

“အခုလအတွင်းကတော့ မြွေကိုက်ခံရသူ ၆ ဦးရှိပါပြီ။ အခု ၂ ရက်အတွင်း မြွေကိုက်ခံရတဲ့ အသက် ၅၆ နှစ်အရွယ် အမျိုးသမီးနဲ့ အသက် ၂၇ နှစ်အရွယ် အမျိုးသားတို့ဟာ စိတ်ချရတဲ့အနေအထားမှာ ရှိနေပါပြီ။ ၃၂ နှစ်အရွယ် အမျိုးသားကိုတော့​ ကျန်းမာရေးကိုစောင့်ကြည့်နေပါတယ်” လို့ NUG လက်အောက်ခံ ကျန်းမာရေးဌာနမှ တာဝန်ရှိသူတဦးက ပြောပါတယ်။

ဆေးဝါးကုသမှုပေးရာမှာ တခါတရံလူနာရှိတဲ့ နေရာမျိုးတွေဆီ လိုက်သွားရတာမျိုးရှိပြီး စစ်ကောင်စီစစ်ကြောင်းတွေကို ရှောင်သွားရတာမျိုးတွေလည်း ရှိတယ်လို့ သူကဆက်ပြောပါတယ်။

ဒါ့အပြင် ကန်ဘလူမြို့နယ်၊ ချပ်သင်းတိုက်နယ်ထဲမှာ မေလ ၁ ရက်က ၂၈ နှစ်အရွယ် အမျိုးသားတဦး၊ မေလ ၁၅ ရက်က ၅၃ နှစ်အရွယ် အမျိုးသမီးတဦး၊ ဇီးကုန်းတိုက်နယ်မှာ မေလ ၁၂ ရက်က ၁၇ နှစ်အရွယ် အမျိုးသားတဦးတို့ မြွေကိုက်ခံခဲ့ရတာကြောင့် အခုမေလအတွင်း မြွေကိုက်ခံရသူ ၆ ဦးရှိလာတာ ဖြစ်ပါတယ်။ သူတို့တွေကတော့ သေဆုံးမှုမရှိခဲ့ပါဘူး။

ကန့်ဘလူမြို့နယ်မှာ ပြီးခဲ့တဲ့နှစ်ကနေ အခုနှစ် မေလ ၂၁ ရက်အထိ မြွေကိုက်ခံရသူ ၆၇ ဦးရှိပြီး၊ အဲဒီအထဲမှာ ဝက်သဟင်းရွာက မောင်မိုးဟိန်း ၈ နှစ်၊ လျော်ဖြူကုန်းရွာက မလှလှမျိုး ၉ နှစ်၊ အလယ်ခုံရွာက ဦးဌေးမြင့် ၅၄ နှစ်နဲ့ ကိုရဲလင်း ၂၇ နှစ်၊ ကိုင်းရိုးရွာက ဦးဝင်းညွှန့် ၆၁ နှစ်နဲ့ မလယ်တိုက်နယ်က ဦးကျော်ညွှန့် ၅၃ နှစ်တို့ ၆ ဦး သေဆုံးခဲ့ရတယ်လို့ ကျွန်းလှတက်ကြွလူပ်ရှားများအဖွဲ့ရဲ့ ထုတ်ပြန်တဲ့စာရင်းအရ သိရပါတယ်။

ကန့်ဘလူနယ်အတွင်းက မြွေကိုက်ခံရသူတွေကို အမျိုးသားညီညွှတ်ရေးအစိုးရရဲ့ လက်အောက်ခံ မြို့နယ်ကျန်းမာရေးဌာနက ကုသပေးခဲ့တာဖြစ်ပြီး၊ မြေကိုက်ခံရသူအများစုဟာ စစ်ရှောင်တွေဖြစ်တယ်လို့ သိရပါတယ်။

ကန့်ဘလူနယ်အတွင်းမှာ စစ်ကောင်စီတပ်တွေရဲ့ စစ်ကြောင်းထိုးမီးရှို့လို့ ချင်မြစ်ကျင်း၊ သိုးဘိုး၊ တောင်းတည်းကုန်း၊ ဖလံချိုင်၊ သရက်ကောင်း၊ ညောင်ဇင်ကြီး၊ မင်းကုန်း (က)၊ ပေလယ်၊ ဘိုကုန်း၊ ဘိုတဲကုန်း၊ သပြေသာလေး၊​ ဆူးပုတ်ကုန်း၊ ထိန်တော၊ အင်းလယ်ကြီး၊ သရက်တာ၊ ရွာမ၊ ဥာဏ်အင်း၊ ညောင်ပေါင်းရင်း စတဲ့ကျေးရွာတွေက ဒေသခံသောင်းချီ ထွက်ပြေးတိမ်းရှောင်နေရတာလည်း ဖြစ်ပါတယ်။

စာတည်း – လင်း