မြေလတ်အသံ

မြေလတ်အသံ၊ မတ် ၄၊ ၂၀၂၆။

ဗမာနိုင်ငံလုံးဆိုင်ရာ လူငယ်ကဗျာဆရာများသမဂ္ဂ – ဗလကသ က ကဗျာဆရာကေဇဝင်း ကျဆုံးခြင်း ၅ နှစ်ပြည့် အောက်မေ့ဖွယ် ကဗျာရွတ်ပွဲအခမ်းအနားကို မတ်လ ၃ ရက်မှာပြုလုပ်ခဲ့တယ်လို့ လို့ ကဗျာဆရာ ယဉ်ဝယ်ထက်က ပြောပါတယ်။

ကဗျာဆရာကေဇဝင်း အောက်မေ့ဖွယ် ကဗျာရွတ်ပွဲ အခမ်းအနားကို စစ်ကိုင်းတိုင်း၊ ကနီမြို့နယ်နဲ့ ရှမ်းမြောက်တို့မှာ မတ်လ ၃ ရက်မှာ အသီးသီးကျင်းပခဲ့ကြတာပါ။

ရှမ်းမြောက်မှာပြုလုပ်တဲ့ အောက်မေ့ဖွယ် အခမ်းအနားကိုတော့ အဖွင့်အမှာစကား ပြောကြားတာ၊ အခမ်းအနားကို ပေးပို့လာတဲ့ သဝဏ်လွှာ ဖတ်ကြားတာတွေ၊ တက်ရောက်လာသူတွေကို ဗလကသအဖွဲ့ဝင်တွေက ကျေးဇူးတင်စကား ပြောကြားတာ၊ ဗလကသရဲ့ ရှေ့လုပ်ငန်းစဉ်တွေကို ဆွေးနွေးတာတွေနဲ့ ကဗျာဆရာကေဇဝင်း အမှတ်တရ တီရှပ်ဝေတာတွေ ပြုလုပ်ခဲ့တယ်လို့ ကဗျာဆရာ ယဉ်ဝယ်ထက်က ပြောပါတယ်။

အဲ့ဒီအခမ်းအနားကို မိတ်ဖက်အဖွဲ့အစည်းတွေနဲ့ ပြည်သူ ၅၀ ကျော်တက်ရောက်ခဲ့ပြီး လူ့ဘောင်သစ် ဒီမိုကရက်တစ်ပါတီနဲ့ Justice Soldiers PDFတို့က သဝဏ်လွှာတွေ ပေးပို့ခဲ့တယ်လို့ သိရပါတယ်။

တရက်တည်းမှာပဲ စစ်ကိုင်းတိုင်း၊ ကနီမြို့နယ်မှာလည်း “ဓားရဲ့တရားဆိုတာ ဝင့်ရုံနဲ့မရ၊ ရှေ့တိုးပြီး ခုတ်မှရမယ်”ဆိုတဲ့ ကိုကေဇဝင်းရဲ့ ကဗျာစာသားနဲ့ ကဗျာရွတ်ပွဲအခမ်းအနားကို ပြုလုပ်ခဲ့ပါတယ်။

ကနီမြို့နယ်မှာ ကျင်းပတဲ့ အခမ်းအနားကို ကဗျာဆရာတွေနဲ့ ဒေသခံ ကဗျာချစ်သူတွေ တက်ရောက်ခဲ့ပြီး ကိုကေဇဝင်းရဲ့ ကိုယ်ရေးအကျဉ်းနဲ့ ကဗျာစာသားတွေပါတဲ့ လက်ကမ်းစာစောင် ဖြန့်ဝေတာတွေလည်း ပြုလုပ်ခဲ့တယ်လို့ သိရပါတယ်။

ကဗျာဆရာ ကေဇဝင်းဟာ ဆားလင်းကြီးမြို့နယ်၊ လက်ပံတောင်းရွာဇာတိဖြစ်ပြီး ၂၀၂၁ ခုနှစ် မတ်လ ၃ ရက်နေ့က မုံရွာမြို့၊ ဘုရားနီလမ်းမှာ အာဏာရှင်စနစ်ဆန့်ကျင်ရေး သပိတ်မှောက်နေစဉ်မှာ စစ်ကော်မရှင်တပ်ရဲ့ သတ်ဖြတ်မှုခံခဲ့ရတာပါ။

စာတည်း – လင်း

ပခုက္ကူ၊ မတ် ၃၊ ၂၀၂၆။

မကွေးတိုင်း၊ ပခုက္ကူမြို့နယ်၊ မြောက်လူးကန်ကျေးရွာမှာအထိုင်ချပြီး ပြည်သူနေအိမ်တွေကို ဝင်ရောက်ကာ လက်နက်ပြလုယက်နေတဲ့ရဲတပ်သားကို ဖမ်းဆီးထားတယ်လို့ ဒေါင်းညီနောင် ပြည်သူကာကွယ်ရေးအဖွဲ့တာဝန်ရှိသူတွေဆီက သိရပါတယ်။

ဖမ်းဆီးရမိထားတဲ့ ရဲတပ်သားဟာ ပခုက္ကူမြို့နယ်ရဲတပ်ဖွဲ့မှ ရဲတပ်သား ကော့သောင်းသားလေး (ခ) သူရအောင်ဆိုသူဖြစ်ပြီး မတ်လ ၁ ရက် မနက် ၁ နာရီခန့်မှာ ရွာထဲကနေအိမ် ၁ အိမ်ကိုဝင်ရောက်ပြီး သေနတ်ပြလုယက်နေရာက အိမ်ရှင်တွေရဲ့အော်ဟစ်မှုကြောင့် ထွက်ပြေးချိန်မှာ ရွာအရှေ့တောင်ပိုင်းမှာ ပစ်ခတ်ဖမ်းဆီးခဲ့တာ လို့ ဆိုပါတယ်။

“သူတို့က ရွာဘုန်းကြီးကျောင်းမှာ တပ်စွဲထားတာ။ ရွာထဲမှာကျန်နေတဲ့ပြည်သူတွေရှိသေးတယ်။ နေတဲ့ပြည်သူနေအိမ်တွေကို ဒီကောင်တယောက်တည်း ညညထွက်ပြီး သေနတ်ထောက်ပြီးဓားပြတိုက်တယ်။ ရွှေတွေ့ရွှေယူတယ်။ ဖုန်းတွေ့ဖုန်းယူတယ်။ အကြမ်းဖက်တာတွေလုပ်တာပေါ့။ သတင်းရလို့သွားစောင့်တဲ့နေ့မှာ ပြည်သူကိုဓားပြဝင်တိုက်တာမှာ ပြည်သူကထအော်တော့ ပြည်သူကိုသေနတ်နဲ့ပစ်ပြီးတော့ ထွက်ပြေးလာတဲ့အချိန်မှာ လိုက်လံပစ်ပြီးဖမ်းခဲ့တာ”လို့ ဒေါင်းညီနောင်ပြည်သူကာကွယ်ရေးအဖွဲ့တာဝန်ခံ ဦးကုလားကပြောပါတယ်။

အဆိုပါရဲတပ်သားကိုဖမ်းမိချိန်မှာ G3 သေနတ် ၁ လက်၊ ကျည် ၂၇၈ တောင့်၊ 9 mm ပစ္စတိုကျည် ၂၂ တောင့်၊ လက်ပစ်ဗုံး ၁ လုံးနဲ့ ဖုန်းတို့ကို သိမ်းဆည်းရမိခဲ့တယ်လို့ ဆိုပါတယ်။

ရဲတပ်သားက ပစ်ခတ်ခဲ့တဲ့ကျည်ထိမှန်လို့ အသက် ၂၈ နှစ်အရွယ် အိမ်ရှင်အမျိုးသမီးမှာ ခြေထောက်ကျည်ထိဒဏ်ရာရပြီး ဆေးကုသမှုခံယူနေရတယ်လို့လည်း သိရပါတယ်။

ရွာအနောက်ဘက်ရှိ စစ်ကော်မရှင်တပ်ဖွဲ့ဝင်တွေအထိုင်ချထားတဲ့ ဘုန်းကြီးကျောင်းနဲ့ အခုဖမ်းဆီးခဲ့တဲ့နေရာဟာ မီတာ ၃၅၀ ခန့်ကွာဝေးပြီး ဖမ်းဆီးပြီးနောက် အမြန်ဆုတ်ခွာလာရတယ်လို့ ဆိုပါတယ်။

လတ်တလောစစ်ဆေးချက်အရ အဆိုပါရဲတပ်သားမှာ ကျေးရွာထဲကနေ သေနတ်ပြပြီး ဓားပြတိုက် လုယက်မှုကျူးလွန်ထားတာ ၈ ကြိမ်ရှိပြီး ဖုန်း ၈ လုံး၊ ငွေသား ကျပ် သုံးသောင်း၊ ရွှေလက်စွပ် ၁ ကွင်း၊ ဆွဲကြိုး ၁ ကုံးသာ ရရှိကြောင်းထွက်ဆိုထားပြီး စစ်ဆေးမှုတွေဆက်လုပ်နေတယ်လို့ ဆိုပါတယ်။

လတ်တလောမှာတော့ အချုပ်နဲ့ထိန်းသိမ်းထားကာ စစ်သုံ့ပန်းဥပဒေအရ အရေးယူသွားမှာဖြစ်သလို ကျူးလွန်ထားတဲ့ပြစ်မှုအလိုက် ထပ်မံအရေးယူဖို့လည်းရှိနေတယ်လို့ သိရပါတယ်။

စာတည်း – လင်း

အရာတော်၊ ဖေဖော်ဝါရီ ၂၈၊ ၂၀၂၆။

စစ်ကိုင်းတိုင်း၊ အရာတော်မြို့နယ်မှာ စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ခရီးသွား ၂ ဦးသေဆုံးပြီး ၂ ဦးဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဒီကနေ့ ဖေဖော်ဝါရီ ၂၈ ရက် နေ့လယ် ၃ နာရီခွဲမှာ ဂျိုင်ရိုကော်ပတာ ၃ စီးနဲ့ အရာတော်-ထီးဆောင်း လမ်းပိုင်းကို ၂ ကြိမ် လေကြောင်းတိုက်ခိုက်ခဲ့ပြီး ခရီးသွားအမျိုးသမီး ၁ ဦးနဲ့ အမျိုးသား ၁ ဦးနေရာမှာတင် သေဆုံးပြီး ဒဏ်ရာရတဲ့အမျိုးသား ၁ ဦးနဲ့ အမျိုးသမီး ၁ ဦးကိုတော့ ဆေးကုသပေးနေရကာ အမျိုးသမီးကတော့ အသက်အန္တရာယ်စိုးရိမ်ရတယ်လို့ ဆိုပါတယ်။

“ထိတာကတော့ ၄ ယောက်ထိတာ၊ အမျိုးသမီး ၂ ဦး၊ အမျိုးသား ၂ ဦး၊ ၂ ယောက်က ပွဲချင်းပြီးပဲ။ ကားမောင်းနေရင်း ဗုံးကြဲခံရတာ၊ လမ်းဘေးကို ဗုံးသီးကျပြီး ကားကိုအစတွေမှန်သွားတာ။ ထိသွားတဲ့ ၂ ယောက်ကတော့ ဆေးကုပေးနေရတယ်။ ၁ ယောက်က အခြေအနေမကောင်းဘူး။”လို့ ဖြစ်စဉ်အနီးရှိသူ တဦးက ပြောပါတယ်။

လေကြောင်းတိုက်ခိုက်မှု ပြုလုပ်ပြီးနောက် အရာတော် လေ့ကျင့်ရေး ၁၀ တပ်ကနေ အနီးအနား ကျေးရွာတွေကို လက်နက်ကြီးနဲ့ ၃ ကြိမ် ပစ်ခက်တိုက်ခိုက်ခဲ့သေးတယ်လို့လည်း ဆိုပါတယ်။

၂၀၂၁ စစ်အာဏာသိမ်းချိန်ကနေ ၂၀၂၆ ဖေဖော်ဝါရီ ၂၇ ရက်အထိ စစ်ကော်မရှင်နဲ့ ၎င်းရဲ့လက်အောက်ခံတွေကြောင့် သေဆုံးခဲ့ရတဲ့ ပြည်သူ ၇,၈၄၂ ဦးရှိတယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း