မုံရွာ

စစ်ကိုင်း၊ မေ ၃၁၊ ၂၀၂၃။

စစ်ကိုင်းတိုင်း၊ မုံရွာမြို့ပေါ်မှာ စစ်တပ်ပိုင် မြဝတီဘဏ်ရှေ့မှာ အာဏာရှင်ဆန့်ကျင်ရေးစာတန်းကို မုံရွာလူငယ် များအစည်းအရုံးအဖွဲ့ဝင်တွေက မေလ ၃၁ ရက် ဒီနေ့မနက် ၇ နာရီက ချိတ်ဆွဲခဲ့ကြပါတယ်။

ချိတ်ဆွဲထားတဲ့ဘန်နာပေါ်မှာ “ကျွေးတဲ့လက်ပြန်ကိုက်တဲ့စစ်ခွေး မင်းပထွေး မအလ နာရေးအတွက် ပြင်ဆင်ထားဟေ့” လို့ စာလုံးအနီတွေနဲ့ ရေးသားဖော်ပြထားပါတယ်။

အဆိုပါ ဘန်နာစာတန်းကို လုံခြုံရေးအရ ကာရံတားဆီးထားတဲ့ ဝါးလုံးတွေအပေါ်မှာ ချိတ်ဆွဲခဲ့တာဖြစ်ပါတယ်။

စာတည်း – လင်းဇေ

စစ်ကိုင်း၊ မေ ၂၅၊ ၂၀၂၃။

စစ်ကိုင်းတိုင်း၊ မုံရွာမြို့ပေါ် က လူစည်ကားရာနေရာတွေမှာ လုံခြုံရေးပတ်ကင်းကားတွေစစ်ဆေးတာတွေနဲ့ အန္တရာယ်ရှိတယ်ဆိုတာသိပေမယ့် ပြောက်ကျားသပိတ်နဲ့ ဆန္ဒပြခဲ့တာလို့ အညာပစ်တိုင်းထောင်လေးများအဖွဲ့ဆီက သိရပါတယ်။

မေလ ၂၅ ရက် နေ့လယ် ၁၁ နာရီခွဲအချိန်လောက်မှာ လူ ၃ ဦးနဲ့ သပိတ်ပြုလုပ်ခဲ့ကြတာပါ။

“သပိတ်ဆိုတာ နွေဦးတော်လှန်ရေးရဲ့ထောက်တိုင်တွေထဲမှာ ပါဝင်သလို လူထုကိုယ်စား ကျမတို့လူငယ်တွေက အာဏာရှင်ကိုအလိုမရှိကြောင်း နိုင်ငံတကာကိုပြချင်လို့ပါ။ ဒုက္ခရောက်နေကြတဲ့ ပြည်သူတွေရှိနေတာကို မြို့ပေါ်မှာ အပြုံးမပျက်သွားလာစားသောက်နေကြတဲ့သူတွေရှိနေလို့ မီးမောင်းထိုးပြရတာဖြစ်တယ်”လို့ သပိတ်ဦးဆောင်သူ အမျိုးသမီးတဦးက ပြောပါတယ်။

“ကျေးလက်မှာပေးဆပ်၊ မြို့ပြမှာအပြုံးမပျက်၊ လုံးဝ အုပ်ချုပ်ခွင့်မရစေရ၊ ဖက်ဆစ်စနစ် သပိတ်မှောက် ဖက်ဒရယ်လမ်းကိုရဲရဲလျှောက်” စာသားပါ ဘန်နာတွေကို ကိုင်ဆောင်ကာ မုံရွာမြို့ပေါ်ရှိ ကျောက္ကာလမ်း၊ နာရီစင်နဲ့ ကန်သာယာ စတဲ့နေရာတွေမှာ ဆန္ဒထုတ်ဖော်ခဲ့ကြတာလည်း ဖြစ်ပါတယ်။

စာတည်း – လင်း

စစ်ကိုင်း၊ မေ ၂၅၊ ၂၀၂၃။

စစ်ကိုင်းတိုင်း၊ ချောင်းဦးမြို့နယ်၊ အမြင့်မြို့ဟောင်းရဲစခန်းမှာတပ်စွဲထားတဲ့ စစ်ကောင်စီတပ်ဖွဲ့တွေဟာ လမ်းသွားလမ်းလာ ဆိုင်ကယ်၊ကားတွေကိုဖမ်းဆီးပြီး ငွေကြေးအဆမတန်တောင်းခံနေတယ်လို့ ဒေသခံတွေဆီက သိရပါတယ်။

အမြင့်မြို့ဟောင်းရဲစခန်းမှာ တနှစ်ကျော်ကြာတပ်စွဲထားတဲ့ အင်အား ၅၀ ခန့်ရှိစစ်ကောင်စီတပ်ဟာ ပြီးခဲ့တဲ့ဧပြီလကစတင်ကာ အမြင့်မြို့ဟောင်းလမ်းပေါ်က ကား၊ဆိုင်ကယ်တွေကိုဖမ်းဆီးပြီး ယာဉ်ပေါ်ပါ ငွေကြေးတွေကိုယူဆောင်သလို ကားနဲ့ဆိုင်ကယ်တွေကိုလည်း ငွေကြေးအဆမတန်တောင်းပြီး ပြန်ရွေးခိုင်းတယ်လို့ မုံရွာအမြင့်လမ်းသတင်းမှန်ပြန်ကြားရေးတာဝန်ခံတဦးက ပြောပါတယ်။

“အမြင့်မြို့ဟောင်းလမ်းပိုင်းကနေ ဖြတ်သန်းသွားလာနေတဲ့ ပြည်သူတွေဆီက ဆိုင်ကယ်တွေဖမ်းဆီးပြီး တစီးကို ၃ သိန်းနဲ့ ပြန်ရွေးခိုင်းတယ်။ ကားတွေဆို ကားပေါ်ပါတဲ့ပိုက်ဆံအကုန်ယူတယ်။ ဆိုင်ကယ်တွေဖမ်းပြီးရင် တရက်ထဲအပြီးရွေးခိုင်းတယ်။ သူတို့တောင်းတဲ့ငွေပမာဏ မပေးနိုင်ရင် တော်တော်တောင်းပန်ပြီးမှ တဝက်ကြေးပေးရတယ်” လို့ ပြောပါတယ်။

အဲ့ဒီစစ်ကောင်စီတပ်တွေဟာ တပ်စွဲထားတဲ့ ၁ နှစ်ကျော်ကာလအတွင်း ရဲစခန်းအပြင်ဘက်ကို သွားရောက်လစာမထုတ်ရဲတဲ့အတွက် အခုလိုဖမ်းဆီးပြီး ငွေကြေးအမြောက်အမြား တောင်းယူနေတာလို့ ပြောဆိုပေမယ့် သီးခြားတော့အတည်မပြုနိုင်ပါဘူး။

အမြင့်မြို့ထဲက ရွှေကြိုးရစ်ဘုရားနဲ့ ညိုမိတို့ရွာစာကြည့်တိုက်အနီး ပြည်သူတွေအလုပ်သွား၊ ပြန်ချိန်တွေမှာ စစ်ကောင်စီတပ်က ဖမ်းဆီးမှုတွေကိုအဓိကထားလုပ်ဆောင်နေလို့ အခြေခံလုပ်သားပြည်သူတွေ အခက်အခဲကြုံတွေ့နေရတယ်လို့ ဆိုပါတယ်။

မုံရွာ-အမြင့်-ချောင်းဦးလမ်းပိုင်းဟာ စစ်ကောင်စီတပ်နဲ့ လက်အောက်ခံရဲတွေ မကြာခဏ ပစ်ခတ်တိုက်ခိုက်ခံနေရတဲ့နေရာတွေဖြစ်လို့ ယခင်က အခုလိုဖမ်းဆီးငွေတောင်းတာတွေမရှိပေမယ့် ပြီးခဲ့တဲ့ ဧပြီလကစလို့ လုပ်ဆောင်လာတာလို့ ဒေသခံတွေကပြောပါတယ်။

စာတည်း − ရင်ငြိမ်း

စစ်ကိုင်း၊ မေ ၂၁၊ ၂၀၂၃။

စစ်ကိုင်းတိုင်း၊ မုံရွာမြို့အဝင် အဝိုင်းပတ်အနီးမှာ ဒီမနက် ၇ နာရီခွဲလောက်က တော်လှန်ရေးအင်အားစု အဖွဲ့ဝင်တွေ ပူးပေါင်းပြီး စစ်အာဏာရှင်ကိုဆန့်ကျင်တဲ့ သပိတ်လှုပ်ရှားမှုတခု ပြုလုပ်ခဲ့ပါတယ်။

အရာတော်မြို့နယ် လူထုသပိတ်ဦးဆောင်ကော်မတီနဲ့ မုံရွာ လူထုသပိတ်ကော်မတီဝင်တွေပူးပေါင်းကာ အင်အား ၁၅ ဦးဝန်းကျင်နဲ့ သပိတ်ဆင်နွှဲခဲ့ကြတာပါ။

“အခုရက်ပိုင်း ဖမ်းဆီးခံထားရတဲ့ရဲဘော်တွေကို သေဒဏ်ချမှတ်တာ၊ နှစ်ရှည် ထောင်ချနေတာတွေ များတဲ့အတွက် ဘယ်လောက်ပဲသေမိန့်ချချ တော်လှန်ရေးက သေမိန့်မကျဘဲ ဆက်လက်ချီတက်ကြရမယ်ဆိုတာကို ပြည်သူတွေသိအောင်ပါ” လို့ သပိတ်ပြုလုပ်ခဲ့ရတဲ့ ရည်ရွယ်ချက်ကို အရာတော်မြို့နယ်မှ သပိတ်တက်ကြွလှုပ်ရှားသူ ကိုသက်နောင် ကပြောပါတယ်။

“သာတူညီမျှတဲ့လောက လူထုအားနဲ့တိုက်ယူကြ”၊ “တော်လှန်ရေးသမားကိုသေမိန့်ချရုံနဲ့ တော်လှန်ရေးက သေမိန့်မကျဘူး” စတဲ့ စာသားပါဘန်နာတွေကို ကိုင်ဆောင်ဆန္ဒပြခဲ့ကြတာလည်း ဖြစ်ပါတယ်။

သပိတ်ပြုလုပ်ခဲ့တဲ့ နေရာဟာ စစ်ကောင်စီတပ်တွေ တပ်စွဲထားတဲ့နေရာနဲ့ မီတာ ၅၀၀ လောက်ပဲကွာဝေးကာ၊ လက်ရှိမုံရွာမြို့အတွင်းမှာတော့ စစ်သားတွေက စစ်ဆေးမှုတွေတင်းကြပ်နေတယ်လို့ သိရပါတယ်။

စစ်ကိုင်း၊ မေ ၁၉၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ မြေနဲကျေးရွာရှိ စွမ်းရည်ထက်ဆီဆိုင်မှာတပ်စွဲထားတဲ့ စစ်ကောင်စီတပ်က တိုက်ပွဲဖြစ်ပွားတာမရှိဘဲ လက်နက်ကြီးတွေနဲ့ပစ်ခတ်ခဲ့လို့ ဘာသာရေးအဆောက်အဦးတွေ ထိမှန်ပျက်စီးခဲ့တယ်လို့ သိရပါတယ်။

တပ်စွဲထားတဲ့ဆီဆိုင်ကနေ မုံရွာတောင်နယ်ကျေးရွာဘက်ကို မေလ ၁၇ ရက် ည ၈ နာရီဝန်းကျင်မှာ ၆၀ မမ ဗုံးသီးတွေနဲ့ ပစ်ခတ်ခဲ့တာကြောင့် အဲ့ဒီရွာဘုန်းကြီးကျောင်းမှာရှိတဲ့ ကျောင်းဆောင်နဲ့ ဘုရားစေတီတချို့ထိမှန် ပျက်စီးသွားတာလို့ မုံရွာဒေသခံတဦးက ပြောပါတယ်။

“သူတို့(စကစ)နေရာနဲ့ မုံရွာတောင်နယ်ရွာက ၁ မိုင်ကျော်လောက်ပဲရှိတယ်။ အရင်ကလည်း အခုလို လက်နက်ကြီးတွေနဲ့ရမ်းသမ်းပစ်တယ် ထိခိုက်တာတွေတော့မရှိခဲ့ဘူး။ ဒီတခါမှ ၂ လုံးပစ်တာ ဘုန်းကြီး ကျောင်းကိုထိသွားတယ်။ လူတော့မထိဘူး။ သူတို့က စိတ်မကြည်ရင်မကြည်သလိုပစ်တာ” လို့ မြေလတ်အသံကို ပြောပါတယ်။

စစ်ကောင်စီတပ်စွဲထားတဲ့ စွမ်းရည်ထက်ဆီဆိုင်နဲ့အနီးတဝိုက်က ကျေးရွာဒေသခံတွေဟာ ထွက်ပြေးတိမ်းရှောင်ရတာမျိုးမရှိသေးပေမဲ့လည်း လက်နက်ကြီးတွေနဲ့ပစ်ခတ်မှုတွေရှိနေလို့ ညဘက်တွေမှာ သတိထားအိပ်စက်နေရကာ စစ်ကြောင်းထိုးဝင်ရောက်လာနိုင်တဲ့အတွက်လည်းအသင့်အနေအထားပြင်ဆင်ထားရတယ်လို့ ဆိုပါတယ်။

ပြီးခဲ့တဲ့ မတ်လ ၁၅ ရက်နေ့ကလည်း အဲ့ဒီစစ်ကောင်စီတပ်ဖွဲ့ဟာ မုံရွာမြို့နယ်ထဲက ထနောင်းတောတောင်ရွာကို ဝင်ရောက်လာပြီး နေအိမ်အလုံး ၆၀ ကျော်ကိုမီးရှို့ဖျက်ဆီးခဲ့တာကြောင့် ထွက်မပြေးနိုင်တဲ့ အသက် ၇၀ အရွယ်အဘွားတဦးလည်း မီး လောင်သေဆုံးသွားခဲ့သေးတယ်လို့သိရပါတယ်။

စာတည်း − ရင်ငြိမ်း

စစ်ကိုင်း၊ မေ ၁၉၊ ၂၀၂၃။

စစ်ကိုင်းတိုင်းဒေသကြီး၊ မုံရွာမြို့က မုံရွာသပိတ်ခေါင်းဆောင် ကိုဝေမိုးနိုင်ကို စစ်ကောင်စီဘက်က ထောင်အနှစ် ၂၀ ထပ်မံချခဲ့လို့ စုစုပေါင်း ထောင်ဒဏ် ၅၂ ထိရှိလာပြီလို့ သိရပါတယ်။

မေလ ၁၉ ရက် ဒီနေ့မှာ မုံရွာအကျဥ်းထောင် အထူးတရားရုံးကနေ ကိုဝေမိုးနိုင်ကို နိုင်ငံတော် သစ္စာဖောက်ဖျက်ပုန်ကန်မှု ပုဒ်မ ၁၂၂ အရ ထောင်ဒဏ် အနှစ် ၂၀ ကျခံဖို့ ထပ်မံအမိန့်ချခဲ့တယ်လို့ မုံရွာလူထုသပိတ်တိုက်ပွဲဦးဆောင်ကော်မတီဝင် ကိုခန့်ဝေဖြိုးက ပြောပါတယ်။

“ဒီနေ့ အမိန့်ထပ်ချတာဖြစ်တယ်။ စကစ လက်အောက်ခံ တရားရုံးတွေက အမိန့်ချတာကို အသိအမှတ်မပြုသလို လက်ခံသွားမှာလည်း မဟုတ်ပါဘူးဗျ။ စစ်တပ်အလိုကျ လုပ်ဆောင်နေတဲ့ တရားရုံးတွေရဲ့ အခုလို မတရားအမိန့်ချတာတွေကိုလည်း ပြင်းပြင်းထန်ထန် ကန့်ကွက်ရှုံ့ချပါတယ်။ လက်ရှိမှာ သူကထောင်ထဲမှာ ကျန်းမာရေးကောင်းတယ်။ သူအမေနဲ့ တခါတခါတွေ့ခွင့်ရတယ်လို့ သိရတယ်” လို့ ပြောပါတယ်။

ကိုဝေမိုးနိုင်ကို စစ်ကောင်စီဘက်က ​ပုဒ်မ ၅၀၅(က)နဲ့ ၆ မှု၊ ပုဒ်မ ၂၅၊ ရာဇသတ်ကြီးပုဒ်မ ၁၄၈၊ ပုဒ်မ ၃၉၅၊ ပုဒ်မ ၃၉၇၊ ပုဒ်မ ၃၂၃၊ ပုဒ်မ ၁၂၂၊ ပုဒ်မ ၃၀၂တို့နဲ့ တမှုစီ စုစုပေါင်း ပုဒ်မ ၁၃ ခုနဲ့ တရားစွဲဆိုထားတယ်လို့ သိရပါတယ်။

စွဲဆိုထားတဲ့ ပုဒ်မ ၁၃ ခုအနက် ယခင် အမှုပေါင်း ၁၁ ခုအတွက် ထောင်ဒဏ် ၃၂ နှစ် ချမှတ်ခံထားရပြီး ယခု ပုဒ်မ ၁၂၂ အတွက် ထောင်ဒဏ် အနှစ် ၂၀ ထပ်မံချခံရလို့ စုစုပေါင်း ထောင်ဒဏ် ၅၂ နှစ်ထိရှိလာပြီး ၃၀၂ လူသတ်မှုနဲ့ ထပ်မံ အမှုရင်ဆိုင်ရဖို့ ရှိသေးတယ်လို့ သိရပါတယ်။

၂၀၂၁ ခုနှစ်၊ ဧပြီလ ၁၅ ရက်နေ့မှာ မုံရွာလူထုသပိတ်တိုက်ပွဲဦးဆောင်ကော်မတီက မုံရွာမြို့​ပေါ်မှာ သပိတ်ပြုလုပ်နေချိန် စစ်ကောင်စီတပ်သားတွေက ကိုဝေမိုးနိုင်ကို ကားနဲ့တိုက်ပြီး ရိုက်နှက်ဖမ်းဆီးခဲ့တာဖြစ်ပါတယ်။

စာတည်း- ဇို

စစ်ကိုင်း၊ မေ ၁၆၊ ၂၀၂၃။

စစ်ကိုင်းတိုင်း၊ မုံရွာမြို့ပေါ်မှာ မေလ ၁၆ ရက် ဒီနေ့ နေ့လယ် ၁ နာရီခန့်တွင် မုံရွာလူငယ်များအစည်းအရုံးလူငယ်တွေက လုံခြုံရေးတင်းကြပ်နေတဲ့ကြားက အာဏာရှင်ဆန့်ကျင်ရေး ဆန္ဒပြခဲ့ကြပါတယ်။

မုံရွာလူငယ်များအစည်းအရုံးစာတန်းပါ ဗီနိုင်းနဲ့အတူ “ခေတ်သစ်ရောက်ဖို့ အာဏာရှင်မှန်သမျှမောင်းထုတ်စို့” စာသားတွေရေးထားတဲ့ အာဏာရှင်ဆန့်ကျင်ရေးစာရွက်တွေကို မြို့ပေါ်ဈေးတခုမှာဖြန့်ဝေပြီး မုံရွာအကျဉ်းထောင်ရှေ့မှာလည်း အာဏာရှင်ဆန့်ကျင်ရေးစာရွက်တွေကို ဖြန့်ကြဲခဲ့တယ်လို့ မုံရွာလူငယ်အစည်းရုံးအဖွဲ့ဝင်တစ်ဦးဆီက သိရပါတယ်။