မိုင်းမတော်တဆမှု

ယင်းမာပင်၊ ဧပြီ ၇၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်အတွင်း ကျေးရွာတရွာက မိုင်းမတော်တဆမှုကြောင့် ခြေထောက် ၂ ဖက်လုံးပြတ်သွားတဲ့ အသက် ၁၁ နှစ်အရွယ် မောင်ရှင်းသန့်မောင်ကို ဧပြီလ ၆ ရက်နေ့က ငွေကျပ် ၂၅၀၀၀၀ သွားရောက်လှူဒါန်းခဲ့တယ်လို့ အညာပစ်တိုင်းထောင်လေးများအဖွဲ့ဆီက သိရပါတယ်။

မောင်ရှင်းသန့်မောင်ဟာ နွားကျောင်းသွားရင်း မိုင်းနင်းမိတာ‌ကြောင့် ဒူးခေါင်းအောက်ကနေခြေထောက် ၂ ဖက်လုံး ပြတ်သွားခဲ့တာဖြစ်ပြီး ကူညီသူနည်းပါးနေတာကြောင့် သွားရောက်ကူညီခဲ့တာလို့ အဖွဲ့တာဝန်ရှိသူက မြေလတ်အသံကို ပြောပါတယ်။

“ဒေသခံတွေက ဆက်သွယ်လာတာရယ်၊ ကလေးကိုလှူမဲ့သူတွေမရှိတာတွေရယ်ကြောင့် သွားလှူခဲ့တာပါ။ အခုလိုမိုင်းနင်းမိလို့ ဒဏ်ရာရသူတွေကို လှူဒါန်းတာ ၂ ကြိမ်ရှိပါပြီ။ ပထမက မိုင်းနင်းမိလို့ အရေပြားပျက်သွားတဲ့ ရဲဘော်ပါ။ အခုက မောင်ရှင်းသန့်မောင်ပါ။ နောက်ထပ်လည်း အဆင်ပြေရင် ပြေသလို လှူဒါန်းဖို့ရှိပါတယ်” လို့ ဆိုပါတယ်။

မောင်ရှင်းသန့်မောင်ရဲ့ ရေရှည်ကျန်းမာရေးအတွက် ဆေးဝါးစရိတ်တွေ လိုအပ်နေသလို Wheel Chair တစီးလည်း အရေးပေါ်လိုအပ်နေတယ်လို့ အညာပစ်တိုင်းထောင်လေးများအဖွဲ့က ထုတ်ပြန်ရေးသားထားပါတယ်။

ဧပြီလ ၄ ရက်နေ့ကလည်း အညာပစ်တိုင်းထောင်လေးများအဖွဲ့ဟာ ဆားလင်းကြီးမြို့နယ်အတွင်း မီးရှို့ခံရတဲ့ကျေးရွာက အိမ်ထောင်စု ၁၂၈ စုက လူဦးရေ ၆၀၀ အတွက် ခေါက်ဆွဲကြော်ကို သွားရောက်လှူဒါန်းခဲ့ပါသေးတယ်။

စာတည်း – ရင်ငြိမ်း

ယင်းမာပင်၊ မတ် ၅၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်ထဲကိုဝင်လာတဲ့ စစ်ကောင်စီစစ်ကြောင်းကို မိုင်းခွဲတိုက်ခိုက်ဖို့ပြင်ဆင်ချိန် မတော်တဆမှုဖြစ်ပြီးပေါက်ကွဲခဲ့ရာ ရဲဘော်တဦးကိုထိမှန်ပြီး လက်တဖက်ဖြတ်လိုက်ရတယ်လို့ သိရပါတယ်။

ယင်းမာပင်ခရိုင် တပ်ရင်း ၁၆မှ အသက် ၁၉ နှစ်အရွယ် ရဲဘော်ကုလားဖြစ်ပြီး၊ မတ်လ ၃ ရက်နေ့လယ်ပိုင်းမှာ စစ်အုပ်စုကိုတိုက်ဖို့ စခန်းတွင်းပြင်ဆင်နေချိန်မှာပဲ ပေါက်ကွဲခဲ့တာလို့ အဲ့ဒီအဖွဲ့မှတပ်ရင်းမှူး ဗိုလ်အောက်ဆွဲက ပြောပါတယ်။

“ကျနော်တို့ ရဲဘော်တွေရဲ့ ပေါ့စမှုကြောင့်လည်းပါတယ်၊ မိုင်းတွေနဲ့ပတ်သက်ပြီး ဘယ်လိုကိုင်တွယ်ရမယ်ကအစ ပြောထားပါတယ်၊ အခုလိုဖြစ်သွားတော့ ကျနော်တို့အနေနဲ့ စိတ်လည်းမကောင်းပါဘူး၊ မျက်ရည်လည်း ကျမိတယ်” လို့ ပြောပါတယ်။

ပေါက်ကွဲမှုကြောင့် ရဲဘော်ကုလားရဲ့ ဘယ်လက်ဖြတ်လိုက်ရတဲ့အပြင် ခြေထောက်နှစ်ဖက်လုံးနဲ့ မျက်နှာတွေမှာလည်း ဒဏ်ရာတွေရရှိခဲ့ပြီး ခြေထောက်တွေကိုတော့ ခွဲစိပ်မှုမလုပ်ရသေးဘူးလို့ ဆိုပါတယ်။

ခုလက်ရှိမှာတော့ အဲ့ဒီရဲဘော်ကို CDM ဆရာဝန်တွေကကုသပေးနေပြီး လက်အတုတပ်ဖို့အတွက် ငွေကြေးအခက်အခဲတွေရှိနေတယ်လို့ သိရပါတယ်။

တပ်ဖွဲ့အတွင်း လုံလောက်တဲ့လက်နက်အင်အားမရှိတဲ့အပြင် အမျိုးသားညီညွတ်ရေးအစိုးရ – NUG အနေနဲ့လည်း လက်နက်တပ်ဆင်ပေးမှုတွေ မရှိတာကြောင့် ရှိတဲ့လက်နက်တွေနဲ့သာ တိုက်ခိုက်နေရတဲ့အတွက် ခုလိုမတော်မတဆမှုတွေဖြစ်နေသလို လက်နက်အခက်အခဲတွေလည်းရှိနေရတယ်လည်း ဗိုလ်အောက်ဆွဲက ဆက်ပြောပါတယ်။

“MOD (Ministry of Defence – NUG) က ကျနော်တို့ကို အိမ်မက်တွေအမျိုးမျိုးပေးပြီး လက်နက်တွေ တပ်ဆင်ပါမယ်ပြောပြီးတော့ အရေးကြီးတဲ့မြို့နယ်ကို မတပ်ဆင်ပဲနဲ့ ကျန်တဲ့မြို့နယ်တွေကိုတပ်ဆင်နေတော့ ကျ‌နော်တို့တွေ တော်တော်ဒုက္ခရောက်တယ်၊ ကျနော်တို့တွေက ကိုယ်ထုကိုယ်ထဘဝနဲ့ပဲ အခုအချိန်ထိ တော်လှန်ရေးကို ဆက်လက်သွားနေရတုန်း၊ ရှိတဲ့လက်နက်နဲ့ပဲတွန်းလှန်နေရတယ်၊ သူတို့တွေ D Day တွေ ဘယ်လောက်ပဲကြော်ညာ ကြော်ညာ ကျနော်တို့တွေကို သူတို့လက်နက်မချပေးပဲနဲ့ ဘာမှလုပ်လို့မရဘူး” လို့ ဆိုပါတယ်။

ဖေဖော်ဝါရီလ ၂၇ ရက်မနက် ၇ နာရီလောက်မှာလည်း ဆားလင်းကြီးမြို့နယ်၊ မုံရွာ – ပုသိမ်လမ်းပိုင်းရှိ ၁၆ ကုတင်ဆေးရုံဟောင်းအနီးမှာ ကင်းပုန်းဝပ်ကာ လုံခြုံရေးယူနေတဲ့စစ်သားတွေကို ယင်းမာပင်ခရိုင် တပ်ရင်း ၁၆၊ တပ်ခွဲ ၁ Brother Defense Force က မိုင်း ၈ လုံးနဲ့တိုက်ခိုက်ခဲ့ရာ စစ်သား ၂ ဦးသေဆုံးခဲ့ပါသေးတယ်။

စစ်ကိုင်း၊ ဖေဖော်ဝါရီ ၂‌၇၊ ၂၀၂၃။

စစ်ကိုင်းမြို့နယ်အခြေစိုက် တိုက်နယ်စွန်အဖွဲ့က တပ်စိတ်မှူး ရဲဘော်တဦးဟာ ဖေဖော်ဝါရီလ ၂၆ ရက်မနေ့က ၁၂ နာရီလောက်မှာ မိုင်းမတော်တဆမှုဖြစ်ပြီး ကျဆုံးခဲ့ပါတယ်။

ကျဆုံးသူဟာ အသက် ၂၃ နှစ်အရွယ်ရှိပြီး၊ စစ်ကောင်စီစစ်ကြောင်းကို တိုက်ခိုက်ဖို့ စစ်ကိုင်းမြို့နယ်ထဲက တနေရာမှာ မိုင်းဆင်နေချိန် ပေါက်ကွဲမှုဖြစ်ကာ နေရာတင် ကျဆုံးခဲ့တာလို့ အဲ့ဒီအဖွဲ့ရဲ့တာဝန်ခံ ရဲမေစွန်နက်က အတည်ပြု ပြောပါတယ်။

“မနေ့နေလယ် ၁၂ နာရီ ဝန်းကျင်လောက်မှာ ကျဆုံးတာ၊ နာရီပိုင်းအကြာ နေ့လယ် ၃ နာရီခွဲမှာ မီးသဂြိုဟ်ခဲ့တယ်” လို့ ပြောပါတယ်။

ကျဆုံးတဲ့နေ့မှာတင် ကျန်တပ်ဖွဲ့ဝင်တွေက တပ်ဖွဲ့စည်းကမ်းနဲ့အညီ မီးသင်္ဂြုလ်ပေးခဲ့ကြတယ်လို့ သိရပါတယ်။

တိုက်နယ်စွန်အဖွဲ့ဟာ စစ်ကိုင်းတိုင်းအတွင်း စစ်ကောင်စီတပ်တွေကို တော်လှန်တိုက်ခိုက်နေတဲ့ ဒေသခံကာကွယ်ရေးတပ်ဖွဲ့ တခုဖြစ်ပြီး၊ ပြီးခဲ့တဲ့ဖေဖော်ဝါရီ ၁၉ ရက်ကလည်း စစ်ကိုင်းမြို့နယ်၊ ညောင်ပင်ဝန်းကျေးရွာဘက်မှာ လှုပ်ရှားနေတဲ့ စစ်ကောင်စီတပ်ဖွဲ့ဝင်တွေကို လက်နက်ကြီးနဲ့ပစ်ခတ် တိုက်ခိုက်ခဲ့ပါသေးတယ်။