ဘက်ပြောင်း

မြေလတ်အသံ၊ သြဂုတ် ၂၇၊ ၂၀၂၅။

မကွေးတိုင်း၊ ပခုက္ကူမြို့အခြေစိုက် တပ်မ ၁၀၁ က စစ်ကော်မရှင်တပ်သား ၁ ဦး ဘက်ပြောင်းခိုလှုံလာခဲ့တယ်လို့ 8+အညာမြေစစ်ဆင်ရေးအဖွဲ့က သြဂုတ် ၂၆ ရက်မနေ့က ထုတ်ပြန်ပါတယ်။

ဘက်ပြောင်းလာသူဟာ အသက် ၂၃ နှစ်ရှိ စစ်မှုထမ်းအပတ်စဥ် ၁၁ ဆင်း တပ်သားဖြစ်ပြီး သြဂုတ် ၂၁ ရက်မနက် ၁၁ နာရီမှာ ဘက်ပြောင်းလာခဲ့တာလို့ဆိုပါတယ်။

“(ဘက်ပြောင်း) ဝင်လာသူရဲ့နယ်မြေက ဖုန်းနံပါတ်ရပြီးအဆက်အသွယ်လုပ်လာတာနဲ့ ကျနော်တို့အဖွဲ့တွေက ပြန်ဆက်သွယ်ပြီးဝင်လာတာပါ။ ကျနော်တို့ဆီရောက်လာတာနဲ့ စစ်ထဲကိုပါသွားတဲ့အကြောင်းအရာကနေ ပြန်လည် အလင်းဝင်တဲ့ထိ သမိုင်းတွေကိုစစ်ဆေးပြီး ကောင်းစွာထားခဲ့တာပါ”လို့ 8+အညာမြေစစ်ဆင်ရေးအဖွဲ့မှ တာဝန်ရှိသူတဦးက ပြောပါတယ်။

အဆိုပါတပ်သားဟာ စစ်မှုထမ်းအပတ်စဥ် ၁၁ ကိုစစ်သင်တန်း ၃ လတက်ရောက်ခဲ့ပြီးနောက် တပ်မ ၁၀၁ ကို တာဝန်ကျလာခဲ့ချိန် လက်နက်တွေမပါဘဲ ခုလိုထွက်ပြေးလာတာလို့ ဆိုပါတယ်။

အဆိုပါတပ်သားကို 8+အညာမြေစစ်ဆင်ရေးအဖွဲ့က ၃ ရက်ကြာ လူ့အခွင့်အရေးသင်တန်း သင်ကြားပို့ချပေးခဲ့ပြီးနောက် လက်ရှိမှာ ၎င်းကို တခြားတော်လှန်ရေးအဖွဲ့တွေနဲ့အဆက်အသွယ်လုပ်ပြီး နေရပ်ကိုပြန်ပို့‌ပေး လိုက်ပြီလို့ ဆိုပါတယ်။

8+အညာမြေစစ်ဆင်ရေးအဖွဲ့ဟာ ပခုက္ကူမြို့နယ်နဲ့ မြိုင်မြို့နယ်တို့မှာ စစ်ရေးလှုပ်ရှားမှုတွေလုပ်နေတဲ့အဖွဲ့လို့ သိရပါတယ်။

ဒါ့အပြင် အမျိုးသားညီညွတ်ရေးအစိုးရ NUG၊ ကာကွယ်ရေးဝန်ကြီးဌာနရဲ့ ၂၀၂၄၊ စစ်ရေးဖြစ်ပေါ် တိုးတက်မှု အခြေအနေ အစီရင်ခံစာအရ နိုင်ငံတဝန်းမှာ ပြီးခဲ့တဲ့ ၂၀၂၄၊ တနှစ်တာအတွင်း စစ်ကော်မရှင်တပ်သား ၄၂၅ ဦး၊ ရဲ ၁၄၂ ဦး စုစုပေါင်း ၅၆၇ ဦး အလင်းဝင်လာခဲ့တယ်လို့ သိရပါတယ်။

စာတည်း – လင်း

ကျောက်ဆည်၊ ဩဂုတ် ၂၇၊ ၂၀၂၅။

မန္တလေးတိုင်း၊ ကျောက်ဆည်ခရိုင်အမှတ် ၂ တပ်ရင်းက ဆေးတပ်သား ၁ ဦးနဲ့ ထောက်ပို့ ၁ ဦး စစ်ကော်မရှင်တပ်ဆီ ဘက်ပြောင်းသွားတာကြောင့် စခန်းလုံခြုံရေးကို ပိုမိုတိုးမြှင့်ထားရတယ်လို့ တပ်ရင်းတာဝန်ရှိသူတွေဆီက သိရပါတယ်။

ဆေးတပ်သား နေကြီး (ခ) ဘယ်လေး (ခ) နေမျိုးလင်းနဲ့ ထောက်ပို့လုပ်နေသူ စိုးကြီးဆိုသူတို့ဟာ ဩဂုတ် ၂၄ ရက်က တပ်ရင်းကနေ တာဝန်ကျဒေသကိုပြန်လွှတ်လိုက်ချိန်မှာ ဝက်လက်မြို့နယ်၊ ရွာသာကြီးရွာရှိ စစ်ကော်မရှင်တပ်စခန်းဆီကို ဘက်ပြောင်းသွားကြတာလို့ ဆိုပါတယ်။

“သွားတာက ခရီးသွားဖို့လွှတ်လိုက်တာကနေ အလင်းဝင်သွားတာ။ သူတာဝန်ကျတဲ့နေရာကို ခွင့်ပြည့်လို့ဆိုပြီး ပြန်လွှတ်လိုက်တာ။ သူနဲ့အတူနောက်တယောက်က အပြင်ထောက်ပို့တယောက်။ ထောက်ပို့ကအခြားအဖွဲ့တွေအတွက် ထောက်ပို့လုပ်နေတာ။ သူတို့ထွက်သွားတဲ့နေ့မှာပဲ နေ့ခင်းလောက်မှာ အဲ့ဘက်နယ်မြေခံအဖွဲ့အစည်းတွေက သတင်းပို့လာတာ။ ကျနော်တို့ထပ်စုံစမ်းတော့ ဝင်သွားတာအတည်ပြုနိုင်ခဲ့တယ်” လို့ ကျောက်ဆည်ခရိုင် တပ်ရင်း ၂ စခန်းမှူး ရင်ငြိမ်မိုး က ပြောပါတယ်။

ဘက်ပြောင်းသူတွေနဲ့အတူ လက်နက်ခဲယမ်းတွေပါသွားတာမရှိဘဲ ဆေးပစ္စည်းအချို့နဲ့ ယူနီဖောင်းအချို့သာ ပါသွားကာ ခုလိုဘက်ပြောင်းသွားတာကြောင့် လေကြောင်းရန်နဲ့ စခန်းလုံခြုံရေးအတွက် စိုးရိမ်မှုတော့ရှိတယ်လို့ ကိုရင်ငြိမ်းမိုးက ဆက်ပြောပါတယ်။

“စခန်းလုံခြုံရေးက ပိုတိုးမြှင့်ထားရတယ်။ ကိုယ့်လူက ရန်သူဘက် ပါသွားတာကိုး။ လေကြောင်းတိုက်ခိုက်မှုကိုတော့ ပိုပြီးဂရုစိုက်နေရတယ်။ စစ်ကြောင်းထိုးလာတာမရှိဘူး။ ရဲဘော်တွေဆီ ဆက်သွယ်တာတွေလည်း မရှိဘူး။”လို့ ပြောပါတယ်။

နေကြီးဟာ ၂၀၂၃ မှာ ကျောက်ဆည်ခရိုင်တပ်ရင်း ၂ ကို ရောက်ရှိကာ အခြေခံစစ်သင်တန်းတက်ရောက်ပြီး နောက် တပ်ဖွဲ့ဝင်ဖြစ်လာပြီး တပ်ဖွဲ့အတွင်းနေထိုင်ချိန်မှာ စည်းကမ်းကောင်းပြီး တပ်ဖွဲ့အတွက် တာဝန် ကျေပွန်စွာအလုပ်လုပ်နိုင်သူဖြစ်တယ်လို့ ဆိုပါတယ်။

ယခုလို ကျောက်ဆည်ခရိုင်တပ်ရင်း ၂ က တပ်ဖွဲ့ဝင်တွေ စစ်ကော်မရှင်တပ်ဆီ ဘက်ပြောင်းသွားတာဟာ ခုတကြိမ်က ပထမဆုံးအကြိမ်ဖြစ်တယ်လို့လည်း သိရပါတယ်။

နေကြီးနဲ့ အဆက်အသွယ်ရှိတဲ့ တော်လှန်ရေးလုပ်ဖော်ကိုင်ဘက်တွေအနေနဲ့ သတိထားကြဖို့နဲ့ သူ့ကြောင့် ဖြစ်ပေါ်လာတဲ့ နောက်ဆက်တွဲပြသနာတွေကို တပ်ရင်းကတာဝန်ယူမှာ မဟုတ်ဘူးလို့ ဩဂုတ် ၂၆ ရက်မှာ ကျောက်ဆည်ခရိုင် တပ်ရင်း ၂ သတင်းထုတ်ပြန်အသိပေးထားပါတယ်။

စာတည်း – လင်း

ကညွတ်ကွင်း၊ သြဂုတ် ၂၅၊ ၂၀၂၅။

ပဲခူးတိုင်း၊ ဖြူးမြို့နယ်၊ ကညွတ်ကွင်းအခြေစိုက် ခမရ ၄၃၉ တပ်ရင်းက စစ်ကော်မရှင်တပ်ဖွဲ့ဝင် ၁ ဦး လက်နက်နဲ့ဘက်ပြောင်းလာတယ်လို့ Spring Warriors Column အဖွဲ့ဆီက သိရပါတယ်။

ဘက်ပြောင်းလာသူဟာ စစ်မှုထမ်းအပတ်စဥ် ၈ က စစ်မှုထမ်းသင်တန်းဆင်းထားသူ အသက် ၃၁ နှစ်အရွယ် ကိုအောင်ဆန်းမြင့်ဖြစ်ပြီး သြဂုတ် ၁၃ ရက်မှာ Spring Warriors Columnအဖွဲ့ဆီကို လက်နက်နဲ့ အတူ ဘက်ပြောင်းလာတယ်လို့ ဆိုပါတယ်။

စစ်သင်တန်းဆင်း ကိုအောင်ဆန်းမြင့်ဟာ MA 11 သေနတ် ၁ လက်နဲ့ ကျည်ဘောက် ၃ ခုတို့ကို ယူဆောင်လာပြီး ဘက်ပြောင်းလာခဲ့တယ်လို့ သိရပါတယ်။

“ကျနော်တို့ဆီကို ဇူလိုင်လကုန်လောက်ကတည်းက ချိတ်ဆက်တာဗျ။ အခွင့်အရေးမရသေးတာနဲ့ သူမလာသေးတာဗျ။ အခွင့်အရေးရတာနဲ့ ကျတော်တို့ဆီ ချက်ချင်းပြောပြီး ကျနော်တို့ကလည်း ရတဲ့နေရာထိသွားခေါ်လာခဲ့တာဗျ။ လက်ရှိမှာတော့ ကျနော်တို့တပ်ရင်းမှာပဲ ကျွေးမွေး စောင့်ရှောက်ထားပါတယ်။”လို့ Spring Warriors Columnအဖွဲ့ရဲ့ တာဝန်ရှိသူ တဦးက မြေလတ်အသံကို ပြောပါတယ်။

ကိုအောင်ဆန်းမြင့်ဟာ စစ်ကိုင်းတိုင်း၊ ခန္တီးမြို့နယ်ထဲက ရွှေမျှောတခုမှာ မျှောကျင်းသားသွားရောက်လုပ်စဥ် စစ်မှုထမ်းဖို့ အဓမ္မပေါ်တာဆွဲဖမ်းဆီးခံလိုက်ခဲ့ရတာဖြစ်ပြီး လက်ရှိမှာတော့ သူ့ကို ငွေကျပ် ၁၀ သိန်းဆု ချီးမြှင့်ထားတယ်လို့ ဆိုပါတယ်။

စစ်အာသိမ်းချိန်ကနေ လက်ရှိအချိန်ထိ Spring Warriors Column အဖွဲ့ဆီကို စစ်ကော်မရှင် တပ်သား စုစုပေါင်း ၄ ဦး လက်နက်နဲ့အတူ ဘက်ပြောင်းထားတယ်လို့ သိရပါတယ်။

စာတည်း – လင်း

မြေလတ်အသံ၊ သြဂုတ် ၁၅၊ ၂၀၂၅။

မကွေးတိုင်း၊ ဂန့်ဂေါမြို့အခြေစိုက် ခလရ ၅၀ တပ်ရင်းမှ ဒုတပ်ကြပ် ၁ ဦး ဘက်ပြောင်းခိုလှုံလာခဲ့တယ်လို့ သြဂုတ် ၁၅ ရက်ဒီကနေ့မှာ ယောကာကွယ်ရေးတပ် စစ်ဒေသရုံးဦးဆောင်ကော်မတီ -YDF က ထုတ်ပြန်ပါတယ်။

စစ်မှုထမ်းသက် ၆ နှစ်ရှိသူ အသက် ၂၈ နှစ်အရွယ် ဒုတပ်ကြပ်ဟာ သြဂုတ် ၈ ရက် မနက် ၁၁ နာရီမှာ လက်နက်၊ ခဲယမ်းတွေနဲ့အတူ ဘက်ပြောင်းလာခဲ့တာလို့ ဆိုပါတယ်။

“အလင်းဝင်ရောက်လာတဲ့ တပ်သားအမည်က ပြောကြားလို့အဆင်မပြေသေးလို့ပါဗျ။ ကျန်ခဲ့တဲ့ မိသားစုတွေ ထိခိုက်နိုင်လို့ပါ။ ကျနော်တို့ ထောက်လှန်းရေးဌာနက ရဲဘော်တွေနဲ့ ချိတ်ဆက်မိပြီး အလင်းဝင်ရောက်လာတာပါဗျ”လို့ ယောကာကွယ်ရေးတပ် စစ်ဒေသရုံးဦးဆောင်ကော်မတီ -YDF မှ ပြန်ကြားရေးတာဝန်ခံ ကိုနေကပြောပါတယ်။

အထက်ပါ ဒုတပ်ကြပ်ဟာ MA-11 မောင်းပြန်ရိုင်ဖယ် ၁ လက်၊ ကျည်ဘောက် ၃ ခု၊ ကျည် ၇၁ တောင့်၊ စကားပြောစက် ၂ လုံးတို့ရရှိထားတယ်လို့ ကိုနေက ဆက်ပြောပါတယ်။

ခလရ ၅၀ တပ်ကနေ YDF ဆီကို အခုလိုဘက်ပြောင်းခိုလှုံလာတာဟာ ပထမဆုံးဖြစ်ပြီး သူ့ရဲ့စိတ်ဆန္ဒရှိတဲ့အတိုင်း ဆောင်ရွက်ပေးသွားမှာဖြစ်တယ်လို့လည်း ကိုနေက ဆိုပါတယ်။

ဒါ့အပြင် ဆုကြေးငွေအနေနဲ့ ငွေကျပ်သိန်း ၃၀ သတ်မှတ်ထားပြီး တခြားလိုအပ်တာတွေကိုပါ ကူညီပေးသွားဖို့ စီစဥ်ဆောင်ရွက်နေဆဲဖြစ်တာကြောင့် လက်ရှိမှာဆုချီးမြှင့်ပွဲ မပြုလုပ်နိုင်သေးဘူးလို့ သိရပါတယ်။

စာတည်း – လင်း