ဖမ်းဆီး

ပဲခူး၊ မေ ၈၊ ၂၀၂၂။

ပဲခူးတိုင်းဒေသကြီး၊ ပြည်ခရိုင် ကျောင်းသားသမဂ္ဂဥက္ကဌဟောင်းကိုစိုးမြတ်မင်း ကို ဖမ်းဆီးပြီးနောက် ဇနီးဖြစ်သူနှင့် ၂ နှစ်အရွယ်သားကိုပါ ယနေ့ မေလ ၈ ရက်နေ့ နေ့လည်မှာ ဖမ်းဆီးသွားတယ်လို့ သူတို့နဲ့ ရင်းနှီးသူ မိတ်ဆွေတွေထံကသိရပါတယ်။

ယနေ့နေ့လည် ၂ နာရီခန့်က ပြည်ခရိုင်၊ ရွှေတောင်မြို့ နယ်ထဲက ကျေးရွာတခုမှာ ဝင်ရောက်ဖမ်းဆီးသွားတာဖြစ်ပြီး ဘယ်ကိုခေါ်ဆောင်သွားတယ်မသိရသေးဘူးလို့ ဆိုပါတယ်။

“စိုးမြတ်မင်းကို ဖမ်းသွားတုန်းက ဖမ်းတယ်မဖမ်းဘူးဆိုတာက နှစ်ရက်လောက်ထိမသေချာဖြစ်နေတာ။ ဒီနေ့တော့ သူ့မိန်းမနဲ့ ကလေးကို မိဘတွေရွာမှာ လာဖမ်းသွားတယ်ဆိုတာ သိရတယ်။ စိုးမြတ်မင်းကိုလည်း ဘယ်မှာထားတယ်ဆိုတာ မသိရသေးဘူး” လို့ သူတို့မိတ်ဆွေတဦးကပြောပါတယ်။

ကိုစိုးမြတ်မင်းကို ပြီးခဲ့တဲ့ မေလ ၃ ရက်နေ့က ပြည်မြို့ စားသောက်ဆိုင်တဆိုင်မှာ ထိုင်နေစဉ် ဝင်ဖမ်းသွားတယ်လို့ သတင်းများထွက်ပေါ်ခဲ့သော်လည်း ထိုစဉ်က ဖမ်းဆီးခံရသူမှာ ကိုစိုးမြတ်မင်း ဟုတ်မဟုတ် ကို အတည်ပြုနိုင်ခြင်းမရှိဘူးလို့လည်း ပြောဆိုကြပါတယ်။

ကိုစိုးမြတ်မင်းမှာ ယခင် ပြည်ခရိုင် ကျောင်းသားသမဂ္ဂဥက္ကဌ တာဝန်ကိုထမ်းဆောင်ခဲ့ဖူးပြီး နွေဦးတော်လှန်ရေးတွင် ဆန္ဒဖော်ထုတ်ခဲ့တာကြောင့် ပုဒ်မ ၅၀၅-က ဖြင့်အမှုဖွင့်ကာ ဖမ်းဝရမ်းထုတ်ခံထားရသူလည်းဖြစ်ပါတယ်။

မြေလတ်အသံ၊ မေ ၁၊ ၂၀၂၂။

မတရားအသင်း ဆက်သွယ်မှုအက်ဥပဒေပုဒ်မ ၁၇(၁)၊ နိုင်ငံတော်အကြည်အညိုပျက်စေမှု ပုဒ်မ ၅၀၅(ခ)တို့ဖြင့် တရားစွဲခံထားရသည့် ရခိုင်ပြည်နယ် ဝန်ကြီးချုပ်ဦးညီပု၏ သမီးဖြစ်သူ NLD ဗဟိုတာဝန်ခံ မမိုးဆန်းစုကြည်နှင့် မိသားစုအဆက်အသွယ်မရသည်မှာ ၂ လကျော်ရှိနေပြီဖြစ်ကြောင်း မိသားစုဝင်များထံမှ သိရသည်။

မမိုးဆန်းစုကြည်မှာ ပြီးခဲ့သည့် ၂၀၂၁ ခုနှစ် မေလ ၈ ရက်နေ့တွင် ရန်ကုန်မြို့၌ ဖမ်းဆီးခံလိုက်ရခြင်းဖြစ်ပြီး အင်းစိန်အကျဉ်းထောင်၌ ချုပ်နှောင်ခံ ထားရသူဖြစ်သည်။

လက်ရှိတွင် မမိုးဆန်းစုကြည်ကို သာယာဝတီအကျဉ်းထောင်သို့ရွေ့သွားပြီဟု သတင်းကြားရ သော်လည်း သူမနှင့် အဆက်အသွယ်လုံးဝမရသေးဟု အစ်မဖြစ်သူ မကြည်ကြည်ဦးက ပြောသည်။

“ညီမရဲ့ အမှုအခြေအနေလည်း မပြောတတ်တော့ဘူး။ ရုံးချိန်းလည်း မသိဘူး။ လောလောဆယ် အဆက်အသွယ် ပြတ်နေပါတယ်။ ရှေ့နေကလည်း သူနဲ့မတွေ့ရဘူး။ မိသားစုတွေက အရမ်းတွေ့ချင်တာပေါ့။ အခုလေ သူမကို သာယာဝတီကို ရွေ့တယ်လို့သတင်းရတယ်။ အခုချိန်ထိ အဆက်အသွယ်မရသေးဘူး။ သူမနဲ့ပတ်သက်လို့ စိတ်မကောင်းရုံကလွဲလို့ ဘာမှမပြောချင်တော့ဘူး”ဟု မကြည်ကြည်ဦးက ပြောသည်။

ဖမ်းဆီးခံရစဉ်က မမိုးဆန်းစုကြည်မှာ ပုဒ်မ ၅၀၅(ခ) အမှုတခုတည်းဖြင့်တရားစွဲခံရခြင်းဖြစ် သော်လည်း ၂၀၂၂ ခုနှစ် မတ်လ ၈ ရက်နေ့တွင် ပုဒ်မ ၁၇(၁) ဖြင့် ထပ်တိုးတရားစွဲခံလိုက်ရခြင်းဖြစ် သည်။

ထပ်တိုးတရားစွဲလိုက်သည့် ပုဒ်မ ၁၇(၁)သည် ထောင်ဒဏ် ၂ နှစ် သို့မဟုတ် ၃ နှစ်ထက်မပိုသော ပြစ်ဒဏ်ချမှတ်နိုင်သလို ငွေဒဏ်လည်း ချမှတ်နိုင်သည်ဟု ဥပဒေ၌ပြဌာန်းထားသည်။

မမိုးဆန်းစုကြည်မှာ ရခိုင်ပြည်နယ်ဝန်ကြီးချုပ် ဦးညီပု၏ သမီးဖြစ်ပြီး၊ လက်ရှိတွင် ဦးညီပုမှာလည်း ၅၀၅(ခ)၊ ပုဒ်မ ၅၁ တို့ဖြင့် စစ်တွေအကျဉ်းထောင်မှာ ထောင်ဒဏ် ၁၁ နှစ်ကျခံနေရသည်။

စစ်တပ်မှအာဏာသိမ်းပြီးနောက် ရခိုင်ပြည်နယ်မှ အမျိုးသားဒီမိုကရေစီအဖွဲ့ချုပ် (NLD) ပါတီဝင်များဖြစ်ကြသည့် ဦးညီပု၊ ဦးမင်းအောင်နှင့် ဦးစိုးလေးအပါအဝင် ၄ ဦးတို့မှာ ဖမ်းဆီးတရားစွဲ ခံထားကြရသည်။

ပဲခူး၊ ဧပြီ ၂၄၊ ၂၀၂၂။

ပဲခူးတိုင်း၊ ပြည်မြို့ မှာ စစ်ကောင်စီက နိုင်ငံရေးတက်ကြွလှုပ်ရှားသူ အမျိုးသားတဦးကို မနက်တကြိမ်ဖမ်းကာ ပြန်လွှတ်ပေးခဲ့ပြီး ညပိုင်းမှာ ထပ်ပြီးဖမ်းဆီးသွားခဲ့ပါတယ်။

ဧပြီလ ၂၃ရက် မနေ့က မနက် ၁၀နာရီဝန်းကျင်မှာ တစ်ကြိမ်ဖမ်းဆီးခဲ့ပြီး ညနေ ၅နာရီမှာ လွှတ်ပေးခဲ့ပေမယ့် ည ၉နာရီခွဲမှာ ထပ်ပြီးလာဖမ်းသွားတယ်လို့ ဒေသခံတဦးက ပြောပါတယ်။

” မနက်ပိုင်းက ကျောင်းသားခေါင်းဆောင်တယောက်ဖုန်းဝင်လာပြီး၊ မေးစရာရှိလို့ဆိုပြီးဖမ်းသွားတာ၊ ညနေ ၅နာရီလောက်ပြန်ရောက်တယ်၊ ညက ကား၂စီးနဲ့ ထပ်ဖမ်းသွားတယ်” လို့ ပြောပါတယ်။

လက်ရှိဖမ်းခံလိုက်ရတဲ့ ပြည်မြို့က ကျော်ကျော်ဉာဏ်ဝင်း ဆိုသူဟာ ၅၀၅ က အမှုနဲ့ တရားစွဲဆိုခံရပြီးထောင်ကျနေရာက ပြီးခဲ့တဲ့ ၂၀၂၁ခုနှစ် အောက်တိုဘာလ ၁၈ရက်က ပြည်အကျည်းထောင်ကနေ ပြန်လွတ်မြောက်ထားသူတဦးလည်းဖြစ်ပါတယ်။

ပဲခူး၊ ဧပြီ ၂၃၊ ၂၀၂၂။

ပဲခူးတိုင်း သာယာဝတီခရိုင် နတ်တလင်းမြို့နယ်က အုပ်ချုပ်ရေးမှူးအသတ်ခံရပြီးနောက်မှာ NLDအမျိုးသားလွှတ်တော်ကိုယ်စားလှယ်အပါအဝင် ရွာသား ၃၀ဦးထက် မနည်းကို စစ်ကောင်စီက ဖမ်းဆီးထားတယ်လို့ သိရပါတယ်။

ဧပြီ ၁၅ရက် သင်္ကြန်အကြတ်နေ့က အမျိုးသားလွှတ်တော်ကိုယ်စားလှယ်ဦးရဲမင်း နေထိုင်တဲ့လှပခြင်းအုပ်စုက အုပ်ချုပ်ရေးမှူး ပစ်သတ်ခံရတဲ့ ကိစ္စနဲ့ ဖမ်းဆီးတာလို့ ဆိုပါတယ်။

“ကိုရဲမင်းကို လာဖမ်းတာ မတွေ့လို့ သူ့နှမကိုခေါ်သွားတယ် ပြီးမှ ကိုရဲမင်းနဲ့ လူချင်းလဲရတာ အုပ်ချုပ်ရေးမှူး အသတ်ခံရတဲ့ ကိစ္စနဲ့ ဖမ်းတာတဲ့၊ ကိုရဲမင်းလိုပဲ သူတို့လိုချင်တဲ့သူကို မတွေ့လို့ မဆိုင်တဲ့သူကိုဖမ်းသွားပြီးမှ ပြန်လဲယူရတာတွေရှိတယ်” လို့ ဒေသခံတဦးက ပြောပါတယ်။

ဦးရဲမင်းဟာ ၂၀၂၀ရွေးကောက်ပွဲမှာ သာယာဝတီခရိုင်ထဲက နတ်တလင်း၊ဇီးကုန်း၊ကြို့ပင်ကောက်မြို့နယ်တွေရဲ့ ရွေးချယ်ခံအမျိုးသားလွှတ်တော်ကိုယ်စားလှယ်တဦးဖြစ်ပီး အကျိုးဆောင်ရှေ့နေတဦးလည်း ဖြစ်တယ်။

လှပခြင်းအုပ်စု အုပ်ချုပ်ရေးမှူး အသတ်ခံရတဲ့ ကိစ္စနဲ့ပတ်သက်ပြီး အနီးနားမှာရှိတဲ့ ကုလားတက်ထွန်းအုပ်စုထဲက ရွာသားတွေအပြင် နတ်တလင်းမြို့ပေါ်ကပြည်သူတွေအပါအဝင် ပြည်သူ ၃၀ ကျော်ကို မဆိုင်ပဲ ဖမ်းဆီးတာတွေလုပ်နေတာဖြစ်တယ်လို့ နတ်တလင်းမြို့နယ်ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ခံက ပြောပါတယ်။

” သူတို့ဖမ်းတဲ့ သူတွေက မဆိုင်တဲ့ သူတွေ ၊ သူတို့ကို ကျနော်တို့ သိတောင်မသိဘူး၊ တကယ်လုပ်တဲ့ သူတွေက လွတ်မြောက်တဲ့ နေရာတွေမှာ ရောက်နေကြပြီ၊ ဘယ်သူတွေက လက်ညိုးထိုးပြီးဖမ်းခိုင်းနေတယ်ဆိုတာလည်းသိတယ်” လို့ နတ်တလင်းမြို့နယ် ပကဖ ပြန်ကြားရေးတာဝန်ခံက ပြောပါတယ်။

အခုလို ဖမ်းဆီးတာတွေ လုပ်နေပေမယ့်လည်း နတ်တလင်းမြို့နယ်အတွင်းက စစ်ကောင်စီနဲ့ ပက်သတ်တဲ့ အုပ်ချုပ်ရေးမှူးတွေနဲ့ ဒလံသတင်းတွေပေးတွေကို ဆက်ပြီးအရေးယူတာတွေ လုပ်ဆောင်သွားမှာဖြစ်တယ်လို့ လည်း ပြောပါတယ်။

” နတ်တလင်းမြို့နယ်ထဲက အုပ်ချုပ်ရေးမှူးတချို့နဲ့ ပျူတွေ တပ်မ ၆၆ အင်းမမှာ သင်တန်းဆင်းပြီး လက်လုပ်တွေပါလာတယ်လို့ သတင်းရထားတယ် ၊ ပိုက်ဆံရှိတဲ့ သူတွေလည်း အတိုဝယ်ကိုင်ထားကြတယ်” လို့ မြို့နယ် ပကဖ ပြန်ကြားရေး တာဝန်ခံက ပြောပါတယ်။

ပြီးခဲ့တဲ့ ဧပြီ ၁၅ရက် သင်္ကြန်အကြတ်နေ့မှာ နတ်တလင်းမြို့နယ် လှပခြင်းအုပ်စု အုပ်ချုပ်ရေးမှုးကို သာယာဝတီခရိုင် PDF တပ်ရင်းတခုက မနက်၁၀ နာရီဝန်းကျင်မှာ သေနတ်နဲ့ ပစ်သတ်ခဲ့တာဖြစ်ပါတယ်။

ပဲခူး၊ ဧပြီ ၂၁၊ ၂၀၂၂။

ပဲခူးတိုင်းအနောက်ခြမ်း၊ ပေါင်းတည်မြို့မရဲစခန်းက ဧပြီ ၂၀ ရက် မနေ့ နေ့လည်ပိုင်းက အဲကွန်းပြင်သူတဦးကို အဲကွန်းပြင်ချင်လို့ဟုဆိုကာ လိမ်လည်ခေါ်ယူပြီး ရဲစခန်းအရောက်မှာ ဖမ်းဆီးထားခဲ့ပါတယ်။

အဲကွန်းပြင်ဆင်သူမှာ ရန်ကုန်-ပြည်လမ်း အထက်တန်းကျောင်းရှေ့က အသက် ၅၅ နှစ်အရွယ် ဦးရဲလေး(ခ)ဦးရဲထွဋ် ဆိုသူဖြစ်ပါတယ်။

“ရဲက သူ့အိမ်ကို လာတယ်။ အဲယားကွန်း ပြင်ချင်လို့ ပြောတယ်။ မီးပျက်နေတော့ ကိုရဲလေးက မီးလာမှ လာမယ် ပြောပြီး၊ မီးလာတော့ သွားတယ်​။ အဲမှာ ဖမ်းထားလိုက်တာ” လို့ ရဲနဲ့ နီးစပ်သူတဦးက ပြောပါတယ်။

ဦးရဲလေးဟာ အဲကွန်းပြင်တဲ့ အလုပ်နဲ့ အသက်မွေးနေသူဖြစ်ပြီး ယခင်ကလည်း မီးပွိုင့်
ပျက်တဲ့အခါတွေမှာ သွားရောက်ပြုပြင်ပေးတာမျိုးတွေ ရှိပေမယ့် အာဏာသိမ်းပြီး နောက်ပိုင်း သူ့အိမ်ကို ရဲကလာရောက် မေးမြန်းတာမျိုးတွေ ရှိခဲ့ဘူးပါတယ်။

အခုချိန်အထိ ဘာကြောင့်ဖမ်းဆီးသွားတယ်ဆိုတာကို မသိရသေးသလို ပေါင်းတည်ရဲစခန်းကနေ တခြားနေရာကို ခေါ်ဆောင်သွားတယ်လို့သိရပြီး လက်ရှိမှာ ကျန်းမာရေးကောင်းမွန်နေတယ်လို့ သူ့မိသားစုနဲ့ နီးစပ်သူတဦးဆီက သိရပါတယ်။

ပဲခူး၊ ဧပြီ ၂၁၊ ၂၀၂၂။

ပဲခူးတိုင်းဒေသကြီးအနောက်ပိုင်း၊ သာယာဝတီခရိုင်၊ အုတ်ဖိုမြို့နယ် မြန်မာ့စီးပွားရေးဘဏ် ဗုံးခွဲတိုက်ခိုက်ခံရပြီး ပြည်သူ ၆ ဦးကိုဖမ်းဆီးသွားတယ်လို့ မြို့ခံများထံကသိရသည်။

ဧပြီလ ၁၉ ရက်နေ့ည ၉ နာရီခန့်က အုတ်ဖို့မြို့ ကျောင်းကြီးတန်းရပ်ကွက်မှာရှိတဲ့ မြန်မာ့စီးပွားရေးဘဏ် လုံခြုံရေးကင်းအား အဝေးထိန်းဖြင့်ဖောက်ခွဲခံရပြီး နောက် မြို့တွင်းရှိ ကျောင်းကြီးတန်းရပ်ကွက်၊ မြို့သစ်ရပ်ကွက်၊ မြို့မရပ်ကွက် တို့မှ အမျိုးသမီး ၂ ဦးအပါ လူငယ်လူလတ် စုစုပေါင်း ၆ ဦးကိုဖမ်းဆီးသွားခဲ့ခြင်းဖြစ်သည်။

“ပေါက်ကွဲမှုဖြစ်တာကတော့ အသံအကျယ်ကြီးပဲ စစ်သားနှစ်ယောက် ထိသွားတယ်။ ပေါက်ကွဲမှုဖြစ်ပြီး ဖမ်းသွားတာကခြောက်ယောက် နှစ်ယောက်ပြန်လွတ်တယ် ကျန်တာတွေကတော့ဖမ်းထားတုန်းပဲ မိန်းကလေးတွေလည်း ပါတယ်။” ဟု မြို့ခံတဦးကပြောသည်။

ဖမ်းဆီးခံရသူများတွင် အမျိုးသမီးတဦးနှင့်အမျိုးသားတဦး ပြန်လည်လွတ်မြောက်လာပြီး ဖမ်းဆီးခံရသူ တဦးနေအိမ်မှ ငွေသိန်း ၂၀ နှင့်‌ ရွှေလက်ဝတ်လက်စားများ ယူဆောင်သွားကြောင်း မြို့ခံများထံကသိရသည်။

အဆိုပါဖောက်ခွဲမှုကို ဖက်ဆစ်တိုက်ဖျက်ရေးနှင့်ပြည်သူ့အာဏာတည်ဆောက်ရေးတပ်ဦး(အုတ်ဖိုမြို့နယ်)နှင့် တပ်ရင်းအမှတ် ၃၈၀၂၊ သာယာဝတီခရိုင်တပ်ရင်း(၂) တပ်ခွဲ(၄) မဟာမိတ် တို့ကပူးပေါင်း ပြုလုပ်ခဲ့ကြောင်း ဖတပအ က သတင်းထုတ်ပြန်ထားသည်။

“အဖမ်းခံရတာကတော့ ပြည်သူခြောက်ယောက်ပါ နှစ်ယောက်ပြန်လွတ်တယ်လို့ကြားတယ်။” လို့ ဖတပအတာဝန်ရှိသူ တဦးကပြောသည်

ဖတပအအနေဖြင့် တော်လှန်သင်္ကြန်ကာလအတွင်းကလည်း ပြည်သူလူထုနှင့်ကလေးများအား ထိခိုက်မည်စိုးရိမ်၍ mission အချို့ကိုဖျက်သိမ်း နောက်ဆုတ်ခဲ့ရပြီး ပြည်သူလူထုအနေဖြင့် စစ်ကောင်စီ ပြုလုပ်သော ပျော်ပွဲရွှင်ပွဲများ လောင်းကစားဝိုင်းများ နှင့် စစ်ကောင်စီအပေါင်းအပါများနှင့်အတူယှဉ်တွဲသွားလာခြင်းများ မပြုလုပ်ရန် သတိပေးထားသည်။

မြေလတ်အသံ၊ ဧပြီ ၁၄၊ ၂၀၂၂။

မူကြိုကျောင်းတွင် ဝင်ဖမ်းခံရသည့် ၃ နှစ်အရွယ်သားငယ်နှင့် သူရဲ့အမေမခိုင်(အမည်လွှဲ) အပါအဝင် ရန်ကုန်တိုင်း၊ မင်္ဂလာဒုံမြိုနယ်၊ ပုလဲရှိ စတူရီယို တခုမှာ ဝင်ဖမ်းခံရသူများ အခြားဖမ်းဆီးသူ စုစုပေါင်း ၁၂ ဦးခန့်မှာ တပတ်ကျော်ကြာအထိ သတင်းမရသေးတဲ့အတွက် သူတို့ရဲ့ အသက်အန္တရာယ်ကိုစိုးရိမ်ကြောင်း Ghost Ranger အဖွဲ့ကပြောသည်။

ဧပြီလ ၅ ရက်နေ့က သားဖြစ်သူမွေးနေ့အတွက် မွေးနေ့ကိတ်ဝယ်အပြန် လမ်းတွင် ပေါက်ကွဲမှုဖြစ်ပွားရာက မခိုင် ဖမ်းဆီးခံရပြီး နာရီပိုင်းအကြာ Ghost Ranger များနေထိုင်သည်ဆိုသည့် ပုလဲရှိ စတူရီယို ကို စစ်ကောင်စီက အင်အားအများအပြားဖြင့် ဝင်ရောက်စီးနင်း ဖမ်းဆီးခဲ့ခြင်းဖြစ်ပြီး မူကြိုကျောင်း ၃ နှစ်အရွယ်ကလေးငယ်ကိုလည်း ဓါးစာခံအဖြစ်ဖမ်းဆီးသွားခဲ့သည်။

“မခိုင်အဖမ်းခံရပြီဆိုတဲ့သတင်းလည်းကြားပြီး သိပ်မကြာဘူး စတီရီယိုကိုဝင်စီးတယ်နောက် လမ်းမှာပဲအဖမ်းခံရတာတွေဆိုတာသေချာတယ် ဘယ်နေရာမှာဖမ်းသွားတယ်ဆိုတာမသိဘူး အိမ်တွေကိုရှာသိမ်းပြီးပြီ၊ သူတို့ကိုစိတ်ပူတယ်၊ အသက်အန္တရာယ်ကိုစိတ်ပူတယ်၊ သေဒဏ်ဆိုတာလည်းသိတယ်။ ဒါပေမယ့် ဥပဒေနဲ့အညီပေါ့အခုချက်ချင်းဖမ်းသတ်အဲလိုလုပ်လို့မရဘူး” ဟု Ghost Ranger အဖွဲ့မှ ဗိုလ်ဆင်ကျားက မြေလတ်အသံကိုပြောသည်။

ဖမ်းဆီးသူများတွင် မသက်ဆိုင်သူ အလုပ်သမား(၃) ဦးနှင့် ယင်းနေ့တွင် အဝတ်လျှော်စက်လာပြင်သူ တို့ ပါပါဝင်ခဲ့ပြီး ကလေးငယ်နှင့် ဒဏ်ရာရထားသူ မခိုင်အသက်အန္တရာယ်ကို စိုးရိမ်တယ်လို့ ဆိုသည်။

“သူတို့အသက်အန္တရာယ်ကိုစိုးရိမ်တယ်၊ အဓိကသူတို့ရှိသေးလား၊ ဘယ်လိုဆောင်ရွက်ထားလည်းသိချင်တယ်။ ဖမ်းပြီးဘာလုပ်လိုက်လည်း သူတို့လုပ်ရင် တာဝန်ခံမှုတာဝန်ယူမှုရှိရမယ်။ ဘယ်တပ်ပဲဖြစ်ဖြစ်ပေါ့၊ ကျနော်တို့လည်း ကျနော်တို့မိတဲ့သူတွေကို သုံ့ပန်းအဖြစ်ကောင်းကောင်းမွန်မွန်ထားတယ်။ ထွက်ပြေးဖို့လုပ်တဲ့သူတွေကို တချို့မလုပ်ချင်ဘဲလုပ်လိုက်ရတာရှိတယ်၊ ဘာပဲဖြစ်ဖြစ်ကျနော်တို့ သတင်းထုတ်ပြန်တယ်။ စစ်တိုက်တာပဲ သူ့တပ်ကိုယ့်တပ်စစ်စည်းကမ်းနဲ့အညီလုပ်ရမယ်၊ ယောင်္ကျားပီသရမယ်၊ လုပ်ရင်လည်းတရားဝင်ပြော” ဟု ဗိုလ်ဆင်ကျားကပြောသည်။

Ghost Ranger အနေဖြင့် ဆုံးရှုံးခဲ့ရမှုများအတွက် တုန့်ပြန်မည်ဖြစ်ပြီး ရန်ကုန်မြေအောက်လှုပ်ရှားမှုများနှင့် EAO များနှင့်ပူးပေါင်းကာ မြေပေါ်တိုက်ခိုက်မှုများကိုလည်း လုပ်ဆောင်နေပြီး နေရာတိုင်းတွင်ရှိနေကြောင်း ပြောသည်။

မကွေး၊ ဧပြီ ၁၂၊ ၂၀၂၂။

မကွေးတိုင်း၊ နတ်မောက်မြို့နယ်၊ သမှုန်းကုန်းကြီးကျေးရွာရှိနေအိမ် ၁ လုံးကို ဧပြီလ ၁၁ ရက်နေ့ ညက မီးရှို့သွားပြီး၊ အိမ်ထောင်ဦးစီးကို ဖမ်းဆီးသွားတယ်လို့ နတ်မောက်မြို့နယ် ပြည်သူ့ကာကွယ်ရေးတပ်က ဗိုလ်ရာကျော်က မြေလတ်အသံကို ပြောပါတယ်။

မနေ့က ည ၉ နာရီခွဲခန့်က စစ်ကောင်စီအင်အား ၂၀ ခန့်နဲ့အတူ မီးသတ်ကားတစီးနဲ့ သမှုန်းကုန်းကြီးကျေးရွာက ဦးအောင်ထူးနေအိမ်ကို ရောက်ရှိလာပြီး၊ ယူဆောင်လို့မရတဲ့ ပစ္စည်းတွေကိုဖျက်စ္စည်းကာ ပစ္စည်းတွေနဲ့ ငွေတွေကိုလည်း ယူဆောင်သွားပြီး၊ နေအိမ်ကို မီးရှို့လိုက်တယ်လို့ သိရပါတယ်။

“စစ်ကား ၁ စီးနဲ့ တခါတည်း မီးသတ်ကားပါလာတယ်။ ကြိုပြီးကြံစီထားတဲ့သဘောမျိုးပေါ့၊ ဆိုင်ကယ်တွေလည်းနောက်ကနေ ရောက်လာတယ်ပေါ့၊ စိုင်ကောင်းရဲစခန်းက ရဲတွေလည်းပါတယ်၊ အဲဒီအိမ်ကိုဝင်ပြီးတော့ အိမ်ထဲကရှိတဲ့ပစ္စည်းတွေကို ထုခွဲရိုက်ပြီးတော့ အကုန်လုံး မီးရှို့ဖျက်ဆီးသွားတာပေါ့။ ဖုန်း ၅ လုံးနဲ့ ပိုက်ဆံ ၃ သိန်းကျော် ယူသွားတယ်။ အိမ်ထောင်ဦးစီး ဦးအောင်ထူးကိုလည်း ဖမ်းသွားတယ်၊ ဘာအကြောင်းပြချက်နဲ့ဖမ်းသွားတယ်ဆိုတာ ဘယ်သူမှမသိရသေးဘူး” လို့ ဗိုလ်ရာကျော်ကပြောပါတယ်။

စစ်ကောင်စီတပ်ဖွဲ့တွေဟာ နတ်မောက်မြို့နယ်၊ သမှုန်းကုန်းကျေးရွာအတွင်း အခုလို မကြာခဏ ပြုလုပ်လေ့ရှိပြီး၊ ကျေးရွာက ပြည်သူတချို့လည်း ထွက်ပြေးတိမ်းရှောင်နေရတယ်လို့ သိရပါတယ်။

ပဲခူး၊ ဧပြီ ၆၊ ၂၀၂၂။

ပဲခူးတိုင်းဒေသကြီး၊ ပြည်ခရိုင်တွင် အကြမ်းဖက်ဥပဒေပုဒ်မများနှင့် ၅၀၅(က)တို့ဖြင့်ပါ ဖမ်းဆီးတရားစွဲခံထားရသူ ၁၂၅ ဦးရှိနေပြီး အပြင်းထန်ညှင်းပမ်းနှိပ်စက် ခံထားရသူများသာဖြစ်ကြောင်း တရားရုံးနှင့်နီးစပ်သူများ ထံကသိရသည်။

ပြည်ခရိုင် ၆ မြို့နယ်တွင်နိုင်ငံရေးအကျဉ်းသားအဖြစ် အမျိုးသား ၁၁၆ ဦး၊ အမျိုးသမီး ၉ ဦး ဖမ်းဆီးခံထားရပြီး ပြည်မြို့နယ်မှာ ဖမ်းဆီးခံရသူများပြားကာ အခြားမြို့နယ်များတွင်လည်း ရှိနေပြီး ယခုနောက်ပိုင်း နိုင်ငံရေးဖြင့်ဖမ်းဆီးခံရသူတိုင်းနီးပါးကို အကြမ်းဖက်ဥပဒေများဖြင့်သာ အမှုဖွင့်တရားစွဲဆို နေခြင်းဖြစ်ပြီး ပြစ်မှုနှင့်ပြစ်ဒဏ်များပြားသည့်အတွက် ခရိုင်တရားရုံးကသာ တိုက်ရိုက်ကိုင်တွယ်သည့်အမှုများသည်လို့ ဆိုကြသည်။

“အကြမ်းဖက်မှုတိုက်ဖျက်ရေးဥပဒေနဲ့ ပတ်သက်တာတွေပဲများနေတယ်။ ဆွဲသမျှအဲဒါနဲ့ပဲစွဲနေတာများတယ်။ တချို့ပုဒ်မတွေကြတော့ နှစ်နဲတော့မြို့နယ်ကကိုင်တာတွေလဲရှိတယ်။ တချို့ကတိုက်ပွဲမှာမိလာတာ။ တချို့က ထောက်ပံ့၊ ဖုန်းပေါ်မှာလှုတာတွေလည်းပါတယ်။” ဟု တရားရေးအသိုင်းအဝန်းမှ အမျိုးသားတဦးကပြောသည်။

ဖမ်းဆီးခံရသူများတွင် နိုင်ငံရေးတက်ကြွလှုပ်ရှားသူများနှင့် ပြောက်ကျားတော်လှန်ရေးရဲဘော်များ အများဖြစ်ပြီး လူငယ်များပြားကာ မိန်းကလေးငယ်များလည်း ပါဝင်ပြီး စစ်ကြောရေးတွင် အပြင်းအထန်နှိပ်စက်ခံထားကြရသည်။

“ရိုက်နှက်တာကတော့ပြောမနေနဲ့တော့ ၅၀၅ လိုအမှုတောင်ရိုက်စစ်တာပဲ အကြမ်းဖက်ဆိုတော့ ဗျင်းတာပေါ့ဗျာ။ မိန်းကလေးတောင်မလွတ်ဘူး။ တရက်ထက်တရက်လည်း ဖမ်းဆီးတာကတအားဖြစ်နေတာ တရားရုံးတွေမှာနိုင်တောင်မနိုင်ဘူး တချို့အမှုတွေဆို ရုံးတင်ထားတယ် မစစ်နိုင်လို့ ပြန်ပြန်ချိန်းနေရတယ် ရဲစခန်းတွေမှာကလည်း အမှုဖွင့်ထားတာကော ဖမ်းထားရော များတော့ ကင်းပတ်ရတာ၊ လုံခြုံရေးယူရတာ၊ တခြားအမှုအခင်းဖြစ်လို့ သွားရတာ။ အထက်ကအရေးပေါ်ဆိုပြီး ခိုင်းတာတွေ တရားရုံးတွေကအမှုတွေမှာ တရားလိုလုပ်တာ သက်သေထွက်ဆိုရတာနဲ့ မနိုင်တော့ဘူးမအားရဘူး” ဟု ပြည်ထဲရေးဌာနလက်အောက်ရှိ ဝန်ထမ်းအမျိုးသားတဦးကပြောသည်။

အဆိုပါလူစာရင်းမှာ လက်ရှိဖမ်းဆီးအမှုဖွင့်ခံထားရသူများသာ ဖြစ်ပြီး ယခင်အမိန့်ချဖမ်းဆီးအမှုဖွင့်ခံထားရသူများ မပါဝင်သေးကြောင်း တရားရုံးများတွင် အမှုတွဲများသာ တင်ထားပြီး မစစ်ဆေးနိုင်သေးသည့် အမှုရှိနေသေးကြောင်း ဆိုကြသည်။

တရားစွဲဆိုထားသည့်အမှုအများဆုံးမှာ အကြမ်းဖက်မှုတိုက်ဖျက်ရေးဥပဒေပုဒ်မ-၅၀(ည)၊ ပုဒ်မ- ၅၀(ဂ) ပုဒ်မ ၅၀ တွင် ထောင်ဒဏ် ၁၀ နှစ်မှ တသက်ထိချနိုင်ပြီး ပုဒ်မ ၅၁ တွင် ထောင်ဒဏ် ၅ နှစ်မှ ၁၀ နှစ်ထိ ငွေဒဏ်လည်းချနိုင်၊ ပုဒ်မ ၅၂ တွင် ထောင်ဒဏ် ၃ နှစ်မှ ၇ နှစ်ထိချနိုင်သလို ငွေဒဏ်လည်း ချနိုင်ကြောင်း ပြစ်မှုပြစ်ဒဏ်နည်းသောအမှုများကို မြို့နယ်အဆင့်မှာပင် ကိုင်တွယ် စစ်ဆေးမည်ဖြစ်ကြောင်း တရားရေးအသိုင်းအဝန်းကသိရသည်။