ပြည်သူ

အင်းတော်၊ မတ် ၅၊ ၂၀၂၃။

စစ်ကိုင်းတိုင်း၊ အင်းတော်မြို့နယ်မှာ ပကဖအဖွဲ့ဝင် ၂ ဦး ဖမ်းဆီးခံခဲ့ရပြီးနောက် အလှူရှင်စာရင်းတချို့ စစ်ကောင်စီလက်ထဲရောက်သွားကာ နောက်ဆက်တွဲအနေနဲ့ ပြည်သူ ၁၅ ဦးကျော် ဖမ်းဆီးခံထားရတာဖြစ်ပါတယ်။

‌ပြီးခဲ့တဲ့ မတ်လ ၃ ရက်နေ့ မနက် ၇ နာရီလောက်က မြို့ထဲကမီးပွိုင့်မှာ စစ်ကောင်စီစစ်ဆေးရေးနဲ့တွေ့ပြီး ရဲဘော် ၂ ဦးဖမ်းဆီးခံခဲ့ရကာ၊ သူတို့နဲ့ဆက်စပ်တယ်ဆိုပြီး မြို့ထဲက ပြည်သူတချို့ကို လိုက်လံဖမ်းဆီးနေတာဖြစ်ပြီး CDM ဆရာမတွေလည်း ပါသွားတယ်လို့ ဆိုပါတယ်။

“မြို့ထဲမှာ ပကဖရဲဘော်၂ ဦး အဖမ်းခံလိုက်ရတာ၊ အဖမ်းခံလိုက်ရတော့ သူတို့အလှူရှင်နာမည်တွေပါပါသွားတာ စာရွက်နဲ့ပေါ့၊ မြို့ထဲမှာက အဲ့စာရင်းအတိုင်း လိုက်ဖမ်းတာ၊ အလှူရှင်စာရင်းက စစ်ကောင်စီ လက်ထဲကို ရောက်သွားတယ်” လို့ အင်းတော်ဒေသခံတဦးက ပြောပါတယ်။

ပကဖအဖွဲ့ဝင်တွေဖြစ်တဲ့ ပြည့်ဖြိုးအောင် အသက် ၂၄ နှစ်နဲ့ ရဲရင့်အောင်အသက်၂၂ နှစ်တို့ ဖမ်းဆီးခံခဲ့ရပြီး နောက်ဆက်တွဲဖမ်းဆီးခံရတဲ့ ပြည်သူတွေရဲ့ အချက်လက်တွေကတော့ မြေလတ်အသံအနေနဲ့ စုံစမ်းနေဆဲဖြစ်ပြီး သတင်းမေးမြန်းနေစဉ်အတွင်းမှာပဲ နောက်ထပ်ပြည်သူ ၃ ဦး ထပ်မံ ဖမ်းဆီးခံလိုက်ရတယ်လို့ သိရပါတယ်။

အင်းတော် ဈေးတိုက်တန်းတဝိုက်က ပြည်သူအများစု ဖမ်းဆီးခံခဲ့ရပြီး၊ အဲဒိဖမ်းဆီးခံထားရတဲ့သူတွေကို အင်း‌တော်စစ်တပ်ကုန်းထဲကို ခေါ်ဆောင်သွားတယ်လို့ သိရပါတယ်။

စစ်ကောင်စီဘက်ကလည်း ဒီကနေ့ နေ့လည်ထဲက မြို့ထဲမှာ ကားနဲ့လှည့်လည်ကာ ရှာဖွေတာတွေ၊ ဖမ်းဆီးတာတွေလုပ်နေပြီး အဆက်သွယ်ရှိထားတဲ့ ပြည်သူတွေအနေနဲ့ သတိထားရှောင်တိမ်းကြဖို့ လိုအပ်နေတယ်လို့ သိရပါတယ်။

ဝက်လက်၊ မတ် ၃၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်၊ ကျီးကန်ရွာ မီးရှို့ခံနေရလို့ မီးငြိမ်းသတ်သွားရာကနေ စစ်ကောင်စီတပ်သားတွေနဲ့ တွေ့ပြီး ရဲဘော် ၅ ဦး ကျဆုံးသလို ပြည်သူ ၅ ‌ဦး သေဆုံးခဲ့တယ်လို့ နွေမုန်တိုင်း ပကဖ အဖွဲ့ဆီက သိရပါတယ်။

မတ်လ ၂ ရက်နေ့ မနေ့ကနေ့လယ် ၁၁ နာရီခန့်က စစ်ကောင်စီတပ်သားတွေ မီးရှို့နေတဲ့ရွာကို မီးငြိမ်းဖို့သွားရာက စစ်သားတွေနဲ့ ထိပ်တိုက်တွေ့ချိန်မှာ အပြန်အလှန်ပစ်ခတ်ရင်း ရဲဘော် ၅ ဦးနဲ့ ပြည်သူ ၅ ဦး ကျဆုံးခဲ့တာလို့ နွေမုန်တိုင်း ပကဖ အဖွဲ့ ရဲဘော်တဦးက ပြောပါတယ်။

“စစ်ကောင်စီတပ်သား‌တွေ ထွက်ပြီဆိုပြီး ဖမ်းဆီးခံထားရတဲ့ ပြည်သူ‌တွေက ပြောတာ။ ဆိုက်ဝါးလွှတ်လိုက်တာလို့ ကျနော်တို့က ထင်တာပဲ။ ကျနော်တို့က မီးငြိမ်းဖို့ ရွာထဲပတ်တာ။ စစ်**တွေက ဝင်လာတာသိရဲ့သားနဲ့ ကျနော်တို့ကို မပစ်သေးဘူး။ ကျနော်တို့ကတဖြည်းဖြည်းတိုးရင်းနဲ့ အိမ်တွေထဲ ဝင်သွားတာ။ သူတို့က ပြည်သူတွေ ဖမ်းထားပြီးတော့ မရှိဘူးလို့ ပြောခိုင်းထားပုံ ထင်ပါတယ်။ ကျနော်တို့ကို ဝိုင်းထားတာ။ သူတို့ဘက်က သေနတ်တွေနဲ့ ကောက်ချိန်တဲ့အချိန်မှာ ခုန်ချရတယ်။ မှန်တဲ့သူတွေလည်း မှန်တယ်။ ကျနော်တို့က အကုန်ပြေးရတာ။ ၁၀ ယောက်ကတော့ အကျအဆုံး ရှိတယ်” လို့ ရဲဘော်က ဆိုပါတယ်။

ကျဆုံးတဲ့ ရဲဘော် ၅ ဦးက နွေမုန်တိုင်း ပကဖ အဖွဲ့ ကျီးကန်တောင်ရွာက ဖြစ်ပြီး ကျီးကန်ရွာက အမျိုးသား ၅ ဦးလည်း သေဆုံးခဲ့ပါတယ်။ ရဲဘော် ၂ လောင်းကတော့ သေနတ်ဒဏ်ရာနဲ့ သေပြီး ကျန်တဲ့ ရဲဘော် ၃ ဦးနဲ့ ပြည်သူ ၅ ဦးက ကြိုးတွေနဲ့ တုတ်ပြီး မီးရှို့အသတ်ခံလိုက်ရတယ်လို့ သိရပါတယ်။

“သေဆုံးသူ အ‌ကုန်လုံး သင်္ဂြိုဟ်ပြီးသွားပါပြီ။ ကောင်းတဲ့ရုပ်အလောင်းကိုတော့ သူ့မိသားစုတွေနဲ့ သင်္ဂြိုလ်ပေးလိုက်ပါတယ်။ ဒီနေ့ ၁၀ နာရီမှာ သင်္ဂြိုလ်ဖြစ်ခဲ့ပါတယ်” လို့ ဆိုပါတယ်။

နွေမုန်တိုင်း ပကဖ အဖွဲ့က ရဲဘော်မင်းမင်း၊ ရဲဘော်ဘိုသန်း၊ ရဲဘော်နိုင်မျိုးမင်း ရဲဘော်ကိုဦး၊ ကျီးကန်ရွာသား စိတ်ရောဂါဝေဒနာရှင် ဦးစိုးတင့် တို့ဖြစ်ကြပြီး ကျန်သူတွေကိုတော့ မသိရသေးဘူးလို့ ဆိုပါတယ်။

စာတည်း – 007

စစ်ကိုင်း၊ မတ် ၂၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ တာတိုင်ရွာဒေသခံ ၁၆ ဦးကို စစ်ကောင်စီတပ်က လူသားဒိုင်းအဖြစ် ဖမ်းဆီးခေါ်ဆောင်သွားပြီးနောက် သတ်ဖြတ်ထားခဲ့လို့ ၁၅ ဦးကို သေဆုံးလျက် ပြန်တွေ့တယ်လို့ သိရပါတယ်။

မတ်လ ၁ ရက် မနက်အစောပိုင်းက တာတိုင်ရွာမှာ တိုက်ပွဲတွေ ဖြစ်ပွားခဲ့ပြီးနောက် အဲ့ဒီနေ့ညပိုင်းမှာ စစ်ကောင်စီတပ်က ရွာအတွင်း ဝင်ရောက်တပ်စွဲခဲ့ပြီး၊ မတ်လ ၂ ရက် ဒီကနေ့မနက်ပိုင်းမှာတော့ ရွာအတွင်းကနေ ထွက်ခွာချိန် အဲ့ဒီရွာသား ၁၆ ဦးကို လူသားဒိုင်းအဖြစ် ဖမ်းဆီးခေါ်ဆောင်သွားကာ ဒီကနေ့ နေ့လည်ပိုင်းမှာ ၁၅ ဦးရဲ့ ရုပ်အလောင်းတွေကိုသာ ပြန်လည်တွေ့ရှိခဲ့တာလို့ ဒေသကာကွယ်ရေးတပ်ဖွဲ့ဝင် တဦးက ပြောပါတယ်။

“ဓါးစာခံ ဖမ်းဆီးခံရတာက ၁၆ ဦးပါ။ လောလောဆယ်တော့ အလောင်း ၁၅ လောင်းပဲ တွေ့ပါတယ်။ တွေ့ တာက မြင်းမူနယ်ထဲက ညောင်ရမ်းရွာနားမှာ တွေ့တာ။ အမျိုးသမီး ၃ ဦးနဲ့အမျိုးသား ၁၂ ဦးရဲ့ အလောင်းတွေပါ။ ဓါးစာခံခေါ်သွားတဲ့အထဲက ၁ ဦးနဲ့ လမ်းပြခေါ်သွားတဲ့ အမျိုးသား ၃ ဦး ပေါင်း ၄ ဦးက ပျောက်နေဆဲပါ။ အလောင်းတွေကို ညနေ ၆ နာရီလောက်က သဂြိုဟ်ပြီးစီးခဲ့တယ်” လို့ People Revolution Force Kyaukse ရဲ့အဖွဲ့ခေါင်းဆောင် ကိုစစ်နိုင်က မြေလတ်အသံကို ပြောပါတယ်။

မတ်လ ၁ ရက် မနေ့မနက်ပိုင်းတိုက်ပွဲမှာလည်း အသက် ၅၀ ဝန်းကျင် တာတိုင်ရွာ ပကဖ ခေါင်းဆောင်တဦးဖြစ်တဲ့ မိုက်ကယ် ကျော်ဇော်ကို စစ်ကောင်စီတပ်ဖွဲ့ဝင်တွေက ဖမ်းဆီးပြီးနောက် ရက်ရက်စက်စက် သတ်ဖြတ်ခဲ့တယ်လို့ သိရပါတယ်။

“မနေ့က မနက် ၄ နာရီလောက်မှာ အင်အား ၇၀ လောက် စစ်ကောင်စီတပ်ဖွဲ့တွေက တာတိုင်ရွာထဲကို ဝင်လာလို့ ဒေသကာကွယ်ရေးတပ်ဖွဲ့တွေနဲ့ ထိတွေ့ပစ်ခတ်မှု တနေကုန်နီးပါး ဖြစ်တယ်။ သေဆုံးသွားတဲ့ ပကဖခေါင်းဆောင်ကလည်း ရွာထဲမှာ ပိတ်မိနေတဲ့ ပြည်သူတွေအတွက် စခလမ်းကြောင်းကို ပြန်ထောက်ရင်း အသတ်ခံလိုက်ရတာ။ အပိုင်းပိုင်းလုပ်ပြီးသတ်သွားတာ။ နာမည်က ဦးကျော်ဇောပါ တော်လှန်ရေးနာမည်ကတော့ မိုက်ကယ် အသက်က ၅၀ ဝန်းကျင်လောက်ပဲ ရှိသေးတယ်။ဒီနေ့ မနက်ရွာထဲက ထွက်တဲ့အချိန်မှာ ရွာသားတွေကို ဖမ်းသွားတာ” လို့ စစ်ကိုင်းအခြေစိုက် ဒေသကာကွယ်ရေးတပ်ဖွဲ့ဝင် တဦးက ပြောပါတယ်။

အဲဒီစစ်ကြောင်းဟာ အရင်က အရာတော်နဲ့ မြင်းမူနယ်မှာရှိတဲ့ ကျေးရွာတွေကို ဝင်ရောက်မွှေနှောက်တဲ့ စစ်ကောင်စီစစ်ကြောင်း ဖြစ်ပြီး တရွာဝင်တရွာထွက် မီးရှို့သတ်ဖြတ်မှုတွေလုပ်ဆောင်နေတယ်လို့ ဒေသခံတွေဆီက သိရပါတယ်။

စာတည်း – ရင်ငြိမ်း

စစ်ကိုင်း၊ ဖေဖော်ဝါရီ ၁၇၊ ၂၀၂၃။

စစ်ကိုင်းတိုင်း၊ မုံရွာမြို့အဝင် မုံရွာ-အမြင့်လမ်းထိပ်ပိုင်းမှာ စစ်ကောင်စီတပ်ဖွဲ့ဝင်တွေဟာ အရပ်ဝတ်တွေဝတ်ထားပြီး လမ်းသွားလမ်းလာ ပြည်သူတွေဆီကနေ ငွေကြေးကောက်ခံနေတယ်လို့ ဒေသခံတွေဆီက သိရပါတယ်။

ဖေဖော်ဝါရီလ ၁၃ ရက်ကစပြီး မုံရွာ−အမြင့်လမ်းထိပ်ပိုင်းမှာ အင်အား ၄ ဦးနဲ့ ဂိတ်ချထားပြီး လမ်းသွားလမ်းလာ ပြည်သူတွေဆီကနေ ငွေကြေးကောက်ခံတာတွေအပြင် ဖုန်း၊ ဆိုင်ကယ်၊ ကားတွေကို စစ်ဆေးတာတွေပါ လုပ်နေတာလို့ မုံရွာမြို့ခံတဦးက ပြောပါတယ်။

“သူတို့ကောက်တဲ့နေရာက အဓိကကျပြီး မြို့အဝင်လို ဖြစ်နေတာ။ အရင်အဲ့နေရာက အခုလို တပ်စွဲမထားဘူးဗျ။ ဟိုတလောက ပြည်သူကာကွယ်ရေးတပ်ဖွဲ့တွေက ပစ်သွားတာ သုံးယောက်လောက် ကျသွားပြီး အခုအဲ့နေရာကို တပ်စွဲထားပြီး ပိုက်ဆံကောက်တာ။ ဖုန်းတွေစစ်၊ ဆိုင်ကယ်တွေစစ် လုပ်နေကြပြီး ငွေညစ်တာပါ” လို့ ဆိုပါတယ်။

အဲ့ဒီစစ်သားတွေဟာ ဖေဖော်ဝါရီလ ၁၇ ရက် ဒီမနက်ပိုင်းအထိ အဲ့ဒီနေရာမှာ ရှိနေပြီး၊ လမ်းသွားပြည်သူတွေကို ဆဲဆိုကြိမ်းမောင်းတာတွေအပြင် သေနတ်နဲ့ချိန်ကာ ချိန်းခြောက်ပြောဆိုတာတွေပါ လုပ်တယ်လို့ အထက်ပါမြို့ခံတဦးက ဆက်ပြောပါတယ်။

ပြီးခဲ့တဲ့ ဖေဖော်ဝါရီလ ၁၁ ရက် မနက်မှာလည်း မုံရွာ-အမြင့်လမ်း ကညန ရုံး အနီးနားမှာ စစ်ကောင်စီတပ်ဖွဲ့တွေက အိမ်စီးကား ၅ စီးနဲ့ ရောက်ရှိလာပြီး လမ်းသွားပြည်သူတွေကို စစ်ဆေးမှုတွေ လုပ်ခဲ့သေးတယ်လို့ သိရပါတယ်။

အင်းတော်၊ ဖေဖော်ဝါရီ ၉၊ ၂၀၂၃။

စစ်ကိုင်းတိုင်း၊ အင်းတော်မြို့နယ်ကို စစ်အုပ်ချုပ်ရေး ကြေညာအပြီး ၆ ရက်မြောက်နေ့မှာ အလယ်ဆိပ်ရွာသားတဦး ည ၁၀ နာရီကျော်မှာ အိမ်ပြန်မိလို့ သေနတ်နဲ့ ပစ်ခံရပြီး သေဆုံးသွားခဲ့ပါတယ်။

အသက် ၄၅ နှစ်အရွယ် ဦးစိုးနိုင်ဟာ ဖေဖော်ဝါရီ ၈ ရက် မနေ့ည ၁၀ နာရီလောက်မှာ မဲဇာရွာကနေ အလယ်ဆိပ်ရွာကိုပြန်လာချိန် မဲဇာရဲစခန်းရှေ့အရောက်မှာ ရဲကသေနတ်ပစ်လို့ သေဆုံးခဲ့တာ ဖြစ်တယ်လို့ အင်းတော်ဒေသခံတဦးက ပြောပါတယ်။

“ကျနော် သတိပေးထားတာတော့ ကြာပြီ။ စစ်ကောင်စီက မကြေညာခင် ကျနော် အတွင်းသတင်းရလို့အရင် သတိပေးထားတယ်။ မနေ့ကလည်း သတိပေးထားတယ်။ အဲ့လူက နဲနဲစိတ်ဖောက်နေတယ်လို့လည်း ကြားတယ်” လို့ ဆိုပါတယ်။

ဖေဖော်ဝါရီလ ၉ ရက် ဒီနေ့မနက်မှာ ရဲစခန်းက အလောင်းလာယူဖို့ နီးစပ်ရာရွာသားတွေတဆင့် ဆက်သွယ်အကြောင်းကြားလာခဲ့တ​ယ်လို့ ဆိုပါတယ်။

“ရုပ်လောင်းကတော့ မိသားစုတွေ လာယူသွားပါပြီ။ အလယ်ဆိပ်ရွာမှာပဲ မီးသင်္ဂြိုလ်လိုက်ပါပြီ။ စခတွေဘက်ကတော့ ဘာတာဝန်ယူမှုမှ မပေးပါဘူး” လို့ အင်းတော်ဒေသခံက ဆက်ပြောပါတယ်။

စစ်တပ်အာဏာမသိမ်းခင်ကလည်း အင်းတော်ရဲစခန်းရှေ့မှာ ပြည်သူတဦး သေနတ်နဲ့ ပစ်ခံရလို့ သေဆုံးခဲ့ပါသေးတယ်။

စစ်ကိုင်း၊ ဖေဖော်ဝါရီ ၄၊ ၂၀၂၃။

စစ်ကိုင်းတိုင်းဒေသကြီး၊ ကန့်ဘလူမြို့နယ်၊ ပုဏ္ဏာကြီးကျေးရွာမှာ စစ်ကောင်စီဘက်က လက်နက်ကြီးရမ်းသမ်းပစ်လို့ ပြည်သူ ၁ ဦးထိခိုက်ဒဏ်ရာရခဲ့တယ်လို့ သိရပါတယ်။

ဖေဖော်ဝါရီလ ၄ ရက်ဒီမနက် ၈ နာရီဝန်းကျင်မှာ ချပ်သင်းကျေးရွာဘက်ကနေလာတဲ့ စစ်သားနဲ့ ပျူ ဆယ်ဂဏန်းကျော်ဟာ ပုဏ္ဏားကြီးရွာဘက်ကိုရောက်လာပြီး လက်နက်ကြီး၊ လက်နက်ငယ်တွေနဲ့ ရမ်းသမ်းပစ်ခတ်ခဲ့တာလို့ ကျွန်းလှ−ကန့်ဘလူ တက်ကြွလှုပ်ရှားသူများအဖွဲ့ – ကန့်ဘလူခရိုင်မှ တာဝန်ရှိသူက ပြောပါတယ်။

“သူတို့က တိုက်ပွဲမရှိဘဲ ရွာဘက်ကိုရောက်လာပြီး အကြောင်းမဲ့ပစ်ခတ်ခဲ့တာဖြစ်ပါတယ်။ စကစ ဘက်က PDFတွေကြောင့် ရွာတွေကိုပစ်တာထက် သူတို့စိတ်ထဲမှာက ပြည်သူလို့ကိုမမြင်တော့တာ။ ဒီဘက်ခြမ်းက ဘယ်ရွာဖြစ်ဖြစ် ဒီလိုဘဲ လက်နက်ကြီးတွေနဲ့ ရမ်းသမ်ပစ်နေတာ” လို့ ပြောပါတယ်။

စစ်ကောင်စီဘက်က ပစ်ခတ်တဲ့လက်နက်ကြီးထိမှန်လို့ ပုဏ္ဏားကြီးကျေးရွာထဲက အသက် ၆၀ ကျော်အရွယ်အမျိုးသား ၁ ဦးဟာ ညာဘက်နားအနောက်ဘက်မှာ လက်နက်ကြီးစမှန် ဒဏ်ရာရသွားတယ်လို့ ဆိုပါတယ်။

လက်ရှိအချိန်မှာတော့ ဒဏ်ရာရသူကို ကျေးရွာအစီအစဥ်နဲ့စောင့်ကြည့်နေပြီး စိုးရိမ်ရပါက နီးစပ်ရာဆေးရုံကို ပို့ဆောင်ဖို့ စီစဥ်ထားတယ်လို့ သိရပါတယ်။

စစ်ကောင်စီစစ်ကြောင်းက လက်နက်ကြီး၊ လက်နက်ငယ်တွေနဲ့ ရမ်းသမ်းပစ်နေလို့ ပုဏ္ဏားကြီး၊ ဦးကင်းကြည်နဲ့ ကံကြီးရွာ သုံးရွာမှ ပြည်သူ ၁ထောင်ကျော် အိုးအိမ်စွန့်ခွါပြီး ဘေးလွတ်ရာထွက်ပြေးတိမ်းရှောင်နေရတယ်လို့ ဆိုပါတယ်။

ဇန်နဝါရီလ ၃၁ ရက်ကလည်း စစ်ကောင်စီအင်အား ၁၅၀ လောက်ဟာ ညောင်ဇင်ကြီးကျေးရွာကိုရောက်လာပြီး နေအိမ်တွေကို အကြောင်းမဲ့မီးရှို့လို့ ညောင်ဇင်ကြီး၊ မဲသည်၊ အင်းလည်ကြီး၊ ပေလည် ကျေးရွာတွေအပါအဝင် ကျေးရွာပေါင်း ၈ ရွာက ဒေသခံတွေဟာ ထွတ်ပြေးခဲ့ရသေးတယ်လို့ သိရပါတယ်။