ပျူစောထီး

မင်းလှ၊ ဖေဖော်ဝါရီ ၂၂၊ ၂၀၂၅။

ပဲခူးတိုင်း၊ သာယာဝတီခရိုင်၊ မင်းလှမြို့နယ်၊ ထောက်ကြန့်အုပ်စု၊ ဆားချောင်းရွာမှာနေတဲ့ အုပ်ချုပ်ရေးမှူးနဲ့ ပျူစောထီးဆိုသူတို့ကိုပစ်ခတ်ရာ သေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ဆီက သိရပါတယ်။

ဖေဖော်ဝါရီ ၂၀ ရက်ည ၇ နာရီခွဲလောက်မှာ ဒေသခံကာကွယ်ရေးတပ်ဖွဲ့ဝင်တွေက ဆားချောင်းရွာ အနောက်ပိုင်းမှာနေထိုင်တဲ့ ထောက်ကြန့်အုပ်စုအုပ်ချုပ်ရေးမှူး ဝင်လှိုင်နဲ့ ရွာအရှေ့ပိုင်းမှာနေထိုင်တဲ့ ပျူစောထီး ကတုံး (ခ) ဇော်မင်းထွန်းတို့ကို ပစ်ခတ်ခဲ့တာလို့ဆိုပါတယ်။

“ပျူစောထီးကတုံးကို သွားရှင်းတော့ အိမ်မှာတင်တွေ့လို့ တခါတည်းရှင်းနိုင်တယ်။ အုပ်ကြီးဝင်းလှိုင်က အိမ်မှာမရှိဘဲ သူ့တအိမ်ကျော်က မင်္ဂလာဆောင်ရောက်နေတာ။ သူ့သမီးကို သွားခေါ်ခိုင်းရတယ်။ သူက ကျနော်တို့ရဲဘော်တွေကို PDF မှန်းမသိဘူး။ သူမင်္ဂလာဆောင်အိမ်ကအထွက် သူ့အိမ်မရောက်ခင် ကြားထဲက အိမ်ရှေ့မှာရှင်းလိုက်တာ။” လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ မှ တာဝန်ရှိသူက ပြောပါတယ်။

ပျူစောထီး ကတုံးဟာ အုပ်ချုပ်ရေးမှူး ဦးဝင်းလှိုင်ခိုင်းသမျှကို လုပ်ဆောင်ပေးနေသူဖြစ်ပြီး သူတို့ ၂ ဦးကြောင့် ဖမ်းဆီးခံရသူ ၁၀ ဦးထက်မနည်းရှိတယ်လို့ သူကဆက်ပြောပါတယ်။

အုပ်ချုပ်ရေးမှူး ဦးဝင်းလှိုင်ဆီကနေ လက်လုပ်သေနတ် ၁ လက်နဲ့ ကျည် ၁၀ တောင့် သိမ်းဆည်းရရှိခဲ့တယ်လို့ ဆိုပါတယ်။

ဒါ့အပြင် သူတို့ ၂ ဦးဟာ လူငယ်တွေကိုစစ်မှုထမ်းရန် ဖိအားပေးလူစုစောင်းတာ၊ စစ်မှုထမ်းကြေး ဆိုကာ ငွေအတင်းအကြပ်ကောက်ခံတာ၊ ငွေမပေးသူတွေကိုလည်း စစ်တပ်ခေါ် ဖမ်းဆီးခိုင်းတာ၊ လက်နက်ပြပြီး ဖိနှိပ်ဒုက္ခပေးတာတွေ လုပ်တဲ့အတွက် အခုလိုပစ်ခတ်ခဲ့တာလို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ က ထုတ်ပြန်ရေးသားထားပါတယ်။

အုပ်ချုပ်ရေးမှူး ဦးဝင်းလှိုင်ဟာ ယခင်ထောက်ကြန့်ကျေးရွာအုပ်စု အုပ်ချုပ်ရေးမှူးဖြစ်တဲ့ ကျော်ဦးကို စစ်ကောင်စီတပ်သားတွေဝိုင်းရိုက်လို့ ဆေးရုံတက်နေတဲ့အချိန်မှာ အုပ်ချုပ်ရေးမှူး ဝင်လုပ်ခဲ့သူဖြစ်တယ်လို့ဆိုပါတယ်။

သာယာဝတီခရိုင် တပ်ရင်း ၃၈၀၂၊ တပ်ခွဲ ၂ တပ်ဖွဲ့ဟာ ဖေဖော်ဝါရီ ၁၅ ရက်ကလည်း မင်းလှမြို့နယ်၊ ဇရစ်မျှောင်ကျေးရွာ၊ ခွက်မအုပ်စု အုပ်ချုပ်ရေးမှူးသန်းထွေးကို ၎င်းရဲ့နေအိမ်မှာ သွားရောက်ပစ်ခတ် ရှင်းလင်းခဲ့ပြီး မိုလ်ဘိုင်းဖုန်း ၁ လုံး၊ ဆိုင်ကယ် ၁ စီး၊ စည်းတံဆိပ်တုံး ၂ ခုနဲ့ ထောက်ခံစာ စာရွက်တွေကို သိမ်းဆည်းရရှိခဲ့တယ်သေးလို့ သိရပါတယ်။

စာတည်း – လင်း

မန္တလေး၊ ဖေဖော်ဝါရီ ၁၇၊ ၂၀၂၅။

မန္တလေးတိုင်း၊ မြင်းခြံမြို့နယ်မှာ ဆိုင်ကယ်နဲ့ကင်းလှည့်ထွက်လာတဲ့ စစ်ကောင်စီလက်‌အောက်ခံ ပျူစောထီးအဖွဲ့ဝင် ၂ ဦးကို အနီးကပ် ပစ်ခတ်တိုက်ခိုက်ခဲ့တယ်လို့ Freedom Fighter Guerrilla Force ဆီက သိရပါတယ်။

ဖေဖော်ဝါရီ ၁၇ ရက် နေ့လယ် ၁၀ နာရီ ၄၅ မိနစ်မှာ မြင်းခြံမြို့နယ်၊ အမှတ် ၁၈ ရပ်ကွက်ထဲကို ဆိုင်ကယ် ၁ စီးနဲ့ ကင်းလှည့်ထွက်လာတဲ့ စစ်ကောင်စီလက်‌အောက်ခံ ပျူစောထီးအဖွဲ့ဝင် ၂ ဦးကို အနီးကပ်တိုက်ခိုက်ခဲ့တာလို့ ဆိုပါတယ်။

“သူတို့က အကုန်ပတ်နေတာ၊ ပျူစောထီးတွေဆိုတော့ **စခန်းတွေကိုလည်း ပတ်တယ်။ ပျူစောထီးခေါင်းဆောင် သီတာယုမွန်ဆီလည်း ရောက်တယ်။ သတင်းရလို့ ကျနော်တို့က မြို့ထဲကို ပြောက်ကျားနည်းနဲ့ကပ်တာ၊ သူတို့လာတဲ့လမ်းမှာ ကျနော်တို့စောင့်ကြိုပြီး တိုက်ခိုက်တယ်။ ၂ ဦးလုံးကတော့ ပွဲချင်းပြီးသေတယ်။ ရပ်ကွက်ထဲဆိုတော့ သူတို့ဘက်က တပ်ကူအင်အားရောက်လာလို့ သူတို့သေနတ်တော့ မကောက်နိုင်ခဲ့ဘူး။” လို့ Fighter Guerrilla Force မိုင်းတာဝန်ခံက ပြောပါတယ်။

ဒီတိုက်ခိုက်မှုကို Fighter Guerrilla Force၊ Anyar Federal Task Force နဲ့ 8 Stars မြင်းခြံပြောက်ကျားတပ်ဖွဲ့ တို့က ပူးပေါင်းလုပ်ဆောင်ခဲ့ပြီး တိုက်ခိုက်မှုအတွင်း ကာကွယ်ရေးတပ်ဖွဲ့ဝင်တွေဆုတ်ခွါတဲ့ဘက်ကို စစ်ကောင်စီတပ်ဖွဲ့ဘက်က ဟောင်ဝစ်ဇာနဲ့ ပစ်ခတ်ခဲ့ပေမယ့် ကာကွယ်ရေးတပ်ဖွဲ့ဝင်တွေအထိအခိုက်မရှိ ပြန်လည် ဆုတ်ခွါနိုင်ခဲ့တယ်လို့ သိရပါတယ်။

ပြီးခဲ့တဲ့ ဒီဇင်ဘာ ၂၉ ရက်ကလည်း မြင်းခြံမြို့နယ် လယ်သစ်ရွာကနေ စစ်ကြောင်းဖြန့်ထွက်လာတဲ့ စစ်သားနဲ့ ပျူစောထီးအဖွဲ့ဝင်တွေကို Fighter Guerrilla Force အဖွဲ့က လယ်သစ်ရွာအရှေ့ဘက်မှာ တိုက်ခိုက်ခဲ့ရာ စစ်ကောင်စီတပ်ဖွဲ့ဘက်က ၂ ဦးသေပြီး ၃ ဦးဒဏ်ရာရခဲ့ပါသေးတယ်။

စာတည်း – ကိုချမ်း

မြေလတ်အသံ၊ ဇန်နဝါရီ ၃၀၊ ၂၀၂၅။

အရာတော်မြို့နယ်၊ ငွေတွင်းကျေးရွာအခြေစိုက် ပျူစောထီး(ပြည်သူ့စစ်)စခန်းက ပစ်လိုက်တဲ့ ၈၁ မမ လက်နက်ကြီးကျည်စထိမှန်ပြီး ကလေး ၁ ဦးနဲ့ အမျိုးသမီး ၂ ဦး ထိခိုက်ဒဏ်ရာရှိခဲ့ပါတယ်။

ဇန်နဝါရီ ၂၈ ရက် ညနေ ၄ နာရီလောက်က ငွေတွင်းကျေးရွာကနေ ၁ မိုင်ခန့်အကွာ မြေနက်ကျေးရွာကို စစ်ရေးလှုပ်ရှားမှုမရှိဘဲ ၈၁ မမလက်နက်ကြီး ၂ လုံးနဲ့ ပစ်ခတ်ခဲ့တာလို့ အရာတော်မြို့နယ် ဒေသခံပြည်သူ့ကာကွယ်ရေးတပ်ဖွဲ့က တာဝန်ရှိသူတစ်ဦးက မြေလတ်အသံကို ပြောပြပါတယ်။

စစ်ရေးလှုပ်ရှားမှုမရှိတဲ့အတွက် နေ့စဥ်ပုံမှန်သွားလာနေကြတဲ့ မြေနက်ကျေးရွာက အသက် ၉ နှစ်အရွယ် ကလေးငယ် ၁ ဦးနဲ့ အသက် ၅၀ ကျော်အရွယ် အမျိုးသမီး ၂ ဦးတို့ ဒဏ်ရာရရှိခဲ့ပြီး ဆေးကုသမှုခံယူနေရတယ်လို့ ပြောပါတယ်။

“ခြေထောက်တွေထိသွားတာ။ နောက်တယောက်ကတော့ ခါးဖောက်ဝင်သွားတာ။ အငယ်ဆုံးတယောက်ကတော့ ပါးမှာ အရေပြားကြီး လန်သွားတယ်။” လို့ အရာတော်မြို့နယ် ဒေသခံပြည်သူ့ကာကွယ်ရေးတပ်ဖွဲ့က တာဝန်ရှိသူတစ်ဦးက ပြောပါတယ်။

အရင်ကလည်း ငွေတွင်းကျေးရွာဘက်က လက်နက်ကြီးတွေနဲ့ ပစ်လေ့ရှိတဲ့အတွက် အရပ်သားတွေ ထိခိုက်ဒဏ်ရာရခဲ့ဖူးပါတယ်။

ငွေတွင်းကျေးရွာမှာ စစ်ကောင်စီတပ်ဖွဲ့ဝင်တွေနဲ့ ပျူစောထီးတွေက ခံစစ်စခန်းနဲ့ အခိုင်အမာတပ်စွဲထားတာဖြစ်ပြီး သူတို့စခန်းထဲကနေ လက်နက်ကြီးနဲ့ အကြောင်းမဲ့ ပစ်ခတ်တာဖြစ်တယ်လို့ ပြောပါတယ်။

ငွေတွင်းကျေးရွာက ပျူစောထီးအဖွဲ့ဝင်တွေနဲ့ စစ်ကောင်စီတပ်ဖွဲ့တွေကို တော်လှန်ရေးအင်အားစုတွေက ဝိုင်းဝန်းပြီးတော့ ပိတ်ဆို့ဖြတ်တောက်မှုတွေ လုပ်ဆောင်နေကြတာရှိပါတယ်။

၂၀၂၅ နှစ်စအထိ ငွေတွင်းကျေးရွာက ပျူစောထီးတွေရဲ့ ဖိနှိပ်မှုဒဏ်တွေကြောင့် ထွက်ပြေးခိုလုံလာသူ အရပ်သားပြည်သူ စုစုပေါင်း ၃,၀၀၀ ဝန်းကျင်ရှိပါတယ်။

သတင်း – ငြိမ်းချမ်းမေ၊ စာတည်း – ဈာန်မြင့်

ပဲခူး၊ ဇန်နဝါရီ ၂၃၊ ၂၀၂၅။

ပဲခူးတိုင်း၊ သာယာဝတီခရိုင်၊ မင်းလှမြို့နယ်က ပျူစောထီးတဦး ဇန်နဝါရီ ၂၂ ရက် ည ၇ နာရီလောက်မှာ ပစ်ခတ်ခံရပြီး သေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၃ နဲ့နီးစပ်သူဆီက သိရပါတယ်။

ဂန့်ဂေါ်ပင်ရွာမှာနေထိုင်တဲ့ ပျူစောထီး ရှမ်းလေး ဆိုသူကို သူ့ရဲ့နေအိမ်မှာရှိနေချိန် ကာကွယ်ရေးပူးပေါင်း တပ်ဖွဲ့တွေက ပစ်ခတ်ခဲ့တာလို့ ဆိုပါတယ်။

“ဒီပျူစောထီးရှမ်းလေးက တော်တော်ဆိုးပါတယ်။ စစ်သင်တန်းတွေ သူလုပ်နေတာတွေရှိတယ်။ အကြိမ်ကြိမ် သတိပေးတယ်၊ မရတဲ့အဆုံး ကျနော်တို့ သွားပြီးတော့ ပစ်ခတ်ရှင်းလင်းရတာ။ ကျနော်တို့ တော်ရုံတန်ရုံ အဲ့လိုမျိုးမလုပ်ပါဘူး” လို့ သာယာဝတီခရိုင်တပ်ရင်း ၃၈၀၂ တပ်ခွဲ ၃ နဲ့ နီးစပ်သူက ပြောပါတယ်။

ရှမ်းလေးကြောင့် ထွက်ပြေးတိမ်းရှောင်ရသူတွေရှိပြီး သူနဲ့အဆင်မပြေသူတွေကိုလည်း ကာကွယ်ရေး တပ်ဖွဲ့ဝင်တွေကို ထောက်ပံ့တယ်ဆိုကာ စစ်ကောင်စီဆီတိုင်ကြားပြီး ဖမ်းဆီးခိုင်းတာတွေရှိတယ်လို့ သာယာဝတီခရိုင်တပ်ရင်း ၃၈၀၂၊ တပ်ခွဲ ၃ နဲ့ နီးစပ်သူက ပြောပါတယ်။

“တော်တော်လေးကို ဒီကောင်ကဆိုးတယ်။ အဲ့မှာရှိတဲ့ ကျေးရွာသူ၊ ကျေးရွာသားတွေက အကုန်ကြောက်ရတယ်။ သူနဲ့မတည့်တာနဲ့ လက်ညှိုးထိုးပြီးတော့ PDF ထောက်ပို့တွေပါလို့ပြောပြီး ဖမ်းဆီးခိုင်းတယ်။ သတ်ဖြတ်ခိုင်းတယ်။ ” လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၃ နဲ့ နီးစပ်သူက ပြောပါတယ်။

ပြီးခဲ့တဲ့ဇန်နဝါရီ ၃ ရက်မှာ ဂွေးချောင်းကျေးရွာက အသက် ၄၁ နှစ်အရွယ် ကိုသိန်းသန်းဌေး၊ နောက်ထပ်အမျိုးသား ၁ ဦးနဲ့ အမျိုးသမီး ၂ ဦးတို့ကို စစ်ကောင်စီကဖမ်းဆီးခဲ့ကာ ဇန်နဝါရီ ၅ ရက်မှာတော့ ကိုသိန်းသန်းဌေးကို ခြောက်တင်းကွင်းဆက်သွယ်ရေးလမ်းပေါ်မှာ ဝါးကြောနှီးနဲ့ လက်ပြန်ကြိုးတုတ်ပြီး ရိုက်သတ်ခဲ့ပါတယ်။

ခုလို ဖမ်းဆီးရိုက်သတ်ခဲ့တဲ့ဖြစ်စဉ်မှာ အဆိုပါပျူစောထီး ရှမ်းလေးနဲ့အဖွဲ့လည်း ပါဝင်တယ်လို့ သူက ပြောပါတယ်။

ရှမ်းလေးဟာ စစ်တပ်ထောက်ခံသူဖြစ်တဲ့အပြင် စစ်မှုထမ်းသင်တန်းအတွက် လူမစုဆောင်းခင်ကတည်းက ပျူစောထီးသင်တန်းတက်ထားသူဖြစ်ပြီး သူ့ကိုပစ်ခတ်ဖို့ ၃ ကြိမ်လောက်ကြိုးစားခဲ့ရတယ်လို့ သူက ဆက်ပြောပါတယ်။

ဒီပစ်ခတ်မှုကို ၃၈၀၂ တပ်ရင်းမှတပ်ခွဲ ၂၊ ၃၊ ၆ (လက်ပံတန်းရွှေတန်းမြေအဖွဲ့) နဲ့ မင်းလှပြည်သူ့ကာကွယ်ရေးတပ်ဖွဲ့တို့က ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ ၂၀၂၄ နိုဝင်ဘာ ၁၉ ရက်ကလည်း သာယာဝတီခရိုင်တပ်ရင်း ၃၈၀၂၊ တပ်ခွဲ ၃ တပ်ဖွဲ့ဝင်တွေက မင်းလှမြို့နယ်၊ ဖြူကွင်းကျေးရွာ၊ ညောင်ကုန်းအုပ်စုအုပ်ချုပ်ရေးမှူး အာကြီး (ခ) ခင်ထွန်းလွင်ကိုပစ်ခတ်ရာ သေဆုံးခဲ့ပါသေးတယ်။

စာတည်း – လင်း