ရွှေဘို၊ ဇွန် ၂၇၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ရွှေဘို-ဆိပ်ခွန်သွားလမ်းပိုင်းပေါ်မှာ စစ်ကောင်စီတပ်ဖွဲ့ဝင်ပစ်တဲ့ လက်နက်ကြီးထိမှန်ပြီး ဒေသခံ ၃ ဦးဒဏ်ရာရခဲ့တယ်လို့ ရွှေဘိုမြို့နယ်ပြည်သူ့ကာကွယ်ရေးအဖွဲ့ ပြန်ကြားရေးတာဝန်ခံဆီက သိရပါတယ်။

ဇွန် ၂၆ ရက်ညနေ ၄ နာရီခန့်မှာ ရွှေဘိုမြို့တောင်ဘက်မုဒ်အထွက်မှာ အထိုင်ချထားတဲ့ စစ်ကောင်စီတပ်ဖွဲ့ဝင်တွေက ၈၁ မမ လက်နက်ကြီး ၁ လုံး၊ မင်းကုန်းရွာဘုန်းကြီးကျောင်းမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေက ၆၀ မမ ၁ လုံးပစ်ခတ်ခဲ့တယ်လို့ ဆိုပါတယ်။

“ပြည်သူထိတဲ့ အလုံးက ၈၁ ကျကွဲတာကနေ ထိကြတာ။ တိုက်ပွဲမဖြစ်ဘဲနဲ့ပစ်တာ။ ခါတိုင်းလည်း သူတို့က ဒီလိုဘဲ တော်လှန်ရေးအင်အားစုတွေရှိတဲ့ဘက်ကို ရမ်းသမ်းပစ်ခတ်နေတာပါပဲ”လို့ ရွှေဘိုမြို့နယ်ပကဖ ပြန်ကြားရေးတာဝန်ခံက ပြောပါတယ်။

လက်နက်ကြီးကျရောက်ပေါက်ကွဲတာကြောင့် လမ်းသွားလမ်းလာ ကင်းပြားရွာသား အသက် ၄၀ ကျော်အမျိုးသား ၂ ဦးနဲ့ အမျိုးသမီး ၁ ဦးတို့ ထိခိုက်ဒဏ်ရာရခဲ့ပြီး လက်ရှိမှာဆေးကုသမှုပေးနေတာကြောင့် စိုးရိမ်ရတဲ့အခြေအနေမရှိဘူးလို့ ဆိုပါတယ်။

ရွှေဘိုမြို့နယ်မှာ ရွှေဘိုမြို့ကလွဲပြီး ရွှေဘို-မြစ်ကြီးနားလမ်းပိုင်း၊ ရွှေဘို-ဆိပ်ခွန်လမ်းပိုင်းအပါအဝင် နေရာအများစုကို ဒေသကာကွယ်ရေးအဖွဲ့တွေဘက်ကထိန်းချုပ်ထားတာလို့လည်း ရွှေဘိုမြို့နယ်ပကဖ ပြန်ကြားရေးတာဝန်ခံက ပြောပါတယ်။

ဧပြီ ၂၈ ရက်ကလည်း ရွှေဘိုမြို့နယ်၊ ကွေ့တက်ကြီးကျေးရွာမှာ မခေါက်ကျေးရွာရှိ ပျူစောထီး အဖွဲ့ဝင်တွေကနေ ဒရုန်းအသုံးပြုပြီး ဗုံး ၁ လုံးကြဲချခဲ့တာကြောင့် မိသားစုဝင် ၃ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ ဇွန် ၂၁၊ ၂၀၂၅။

စစ်ကိုင်းတိုင်း၊ ပင်လည်ဘူးမြို့နယ်၊ အင်္ဂါးကျေးရွာစာသင်ကျောင်း ဇွန် ၂၀ ရက်ညနေ ၄ နာရီခန့်မှာ ဗုံးကြဲတိုက်ခိုက်ခံရတာကြောင့် ဆရာမ ၁ ဦးသေဆုံးပြီး ကလေး ၃ ဦးအပါအဝင် ၈ ဦးဒဏ်ရာ ရရှိခဲ့တယ်လို့ ဒေသခံတွေကပြောပါတယ်။

စစ်ကောင်စီတပ်က တိုက်ခိုက်ရေးလေယာဥ် ၁ စီးနဲ့ အင်္ဂါးရွာအလယ်တန်းကျောင်းကို ဗုံးသီး ၂ လုံးချတိုက်ခိုက်ခဲ့ရာ ဝန်ထမ်းအိမ်ရာအနီး ၁ လုံးနဲ့ ကျောင်းဆောင်နောက်ရှိ ရေစင်အနီး ၁ လုံး ကျရောက်ပေါက်ကွဲခဲ့တာလို့ ဆိုပါတယ်။

“ဗုံးက ၂ လုံးတွဲ တပြိုင်တည်းချသွားတာပါ။ ဝန်ထမ်းနေအိမ် ၃ လုံးတွဲထဲက အလည်လုံး ပျောက်သွားပါတယ်။ ၂ ထပ်ကျောင်းဆောင်က တံခါးအားလုံး ပျက်စီးပါတယ်။ တကျောင်းလုံးရှိတဲ့ မှန်ကွဲပြီး မှန်ကွဲစတွေချည်းပါပဲ။ ဗုံးကျတဲ့နေရာနဲ့မီတာ ၁၀၀ နီး ပါးဝေးမယ့် အိမ်မှာအိပ်နေတဲ့ ကလေးလေး ၂ ယောက်လည်း ဒဏ်ရာရပါတယ်” လို့ ဒေသခံအမျိုးသားတဦးကပြောပါတယ်။

သေဆုံးသူမှာ စာသင်ကျောင်းဝန်းရှိ ဝန်ထမ်းအိမ်ရာမှာနေတဲ့ CDM ဆရာမ(မူပြ) အသက် ၃၀ အရွယ် ဒေါ်ဌေးဌေးမြင့် ဖြစ်ပြီး ဆေးရုံကိုသွားတဲ့လမ်းမှာအသက်ဆုံးရှုံးခဲ့ရတာလို့ ဆိုပါတယ်။

အသက် ၄ နှစ်နဲ့ ၇ နှစ် မိန်းကလေး ၂ ဦး၊ ၄ နှစ်ယောကျာ်းလေး ၁ ဦး၊ ၂၁ နှစ်နဲ့ ၄၀ နှစ်ကြားရှိ အမျိုးသား ၅ ဦးတို့ ဒဏ်ရာရခဲ့ပြီး အဲဒီထဲက ၄ နှစ်အရွယ် မိန်းကလေးမှာ ဘယ်ဖက်ခြေထောက် ဖြတ်လိုက်ရတယ်လို့ အထက်ပါအမျိုးသားကပြောပါတယ်။

ဒဏ်ရာရသူတွေထဲက အမျိုးသား ၅ ဦးဟာ စာသင်ကျောင်းဝန်းအတွင်း ယာယီစာသင်ဆောင်ဆောက်လုပ်ဖို့ သေဆုံးဆရာမရဲ့အိမ်ရှေ့မှာ ဝါးထရံယက်လုပ်နေကြတာကြောင့် ဗုံးကြဲချိန် ထိမှန်ခဲ့ကြတာလို့ သိရပါတယ်။

အင်္ဂါးကျေးရွာဟာ ပင်လည်ဘူးမြို့နဲ့ ၂၄ မိုင်အကွာ၊ အိမ်ခြေ ၂၂၀ ခန့်ရှိတဲ့ရွာဖြစ်ပြီး ဗုံးကြဲခံရတဲ့ စာသင်ကျောင်းဟာလည်း NUG ရဲ့ညွှန်ကြားချက်နဲ့ ပိတ်ထားတာ ၁ လလောက်ရှိပြီလို့ ဆိုပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅၊ ဇွန် ၂၀ အထိ စစ်ကောင်စီတပ်နဲ့ ၎င်းတို့ရဲ့လက်အောက်ခံတွေကြောင့် သေဆုံးတဲ့ပြည်သူ စုစုပေါင်း ၆,၈၁၀ ဦးရှိပြီလို့ နိုင်ငံရေးအကျဥ်းသားများ ကူညီ စောင့်ရှောက်ရေး အသင်း – AAPP ရဲ့အစီရင်ခံစာအရသိရပါတယ်။

စာတည်း – လင်း

ဆော၊ ဇွန် ၆ ၊၂၀၂၅။

မကွေးတိုင်း၊ ဆောမြို့နယ်၊ ညောင်ကန်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၃ ဦးသေဆုံး၊ ၆ ဦး ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဇွန် ၅ ရက် နေ့လယ် ၂ နာရီခန့်မှာ ညောင်ကန်ကျေးရွာက ရခိုင်ပြည်နယ်ကိုထွက်ခွာမယ့် ကုန်တင်ကားတွေရပ်နားထားတဲ့နေအိမ်ကို တိုက်ခိုက်ရေးလေယာဥ် ၁ စီးနဲ့ ဗုံး ၁ လုံးကြဲချခဲ့ရာ နေအိမ်ပေါ်ကျရောက်ပေါက်ကွဲခဲ့တယ်လို့ ဆိုပါတယ်။

” (ကုန်တင်)ကားတွေထားတဲ့ အိမ်ပေါ်တည့်တည့်ကြီးကိုကျတာ။ အဲ့ဒီအိမ်မှာကကုန်သည်တွေပဲ စုနေကြတာ။ ရခိုင်ကိုထွက်မယ့်ကားတွေ”လို့ ဆောမြို့ခံတဦးက မြေလတ်အသံကို ပြောပါတယ်။

လေယာဥ်ဗုံးကြောင့် (အမည်စိစစ်ဆဲ) ရခိုင်ကုန်သည်အမျိုးသား ၁ ဦး၊ ကုန်ကားမောင်းနှင်သူ ကိုဝင်းစိုး၊ ကုန်တင်ကုန်ချလုပ်သား ကိုကျော်သက် တို့ ၃ ဦးနေရာမှာ သေဆုံးခဲ့ကြကာ နောက်ထပ်အမျိုးသား ၆ ဦး ဒဏ်ရာရရှိခဲ့ပြီး အဲ့ဒီထဲက ၅ ဦးမှာ ဒဏ်ရာပြင်းထန်တယ်လို့ သိရပါတယ်။

ဒါ့အပြင် ဗုံးပေါက်ကွဲမှုကြောင့် နေအိမ်ဝန်းအတွင်းရှိ ကုန်ပစ္စည်းတွေတင်ဆောင်တဲ့ ၆ ဘီးကား ၂ စီးနဲ့ ဂျက်ပလူးအမျိုးအစား ကား ၁ စီး မီးလောင်ပျက်စီးခဲ့သလို နေအိမ်ပါပြိုကျပျက်စီးခဲ့တယ်လို့ အထက်ပါအမျိုးသားက ဆိုပါတယ်။

သေဆုံး ရခိုင်ကုန်သည်အမျိုးသားရဲ့ ရုပ်အလောင်းကို အခင်းဖြစ်နေရာကနေ ရခိုင်ပြည်နယ်ကို သယ်ယူသွားတယ်လို့ သူက ဆိုပါတယ်။

ပြီးခဲ့တဲ့မေ ၁ ရက်ကလည်း အညာကတင်းကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက် ခိုက်ခဲ့တာကြောင့် ၈ နှစ်အရွယ်ကလေး ၁ ဦးအပါ အမျိုးသမီး ၄ ဦးသေဆုံးခဲ့တယ်လို့ သိရပါတယ်။

စာတည်း – ဟိန်းစံ

ရွှေဘို၊ မေ ၂၇၊ ၂၀၂၅။

စစ်ကိုင်းတိုင်း၊ ရွှေဘိုမြို့၊ အမှတ် ၅ ရပ်ကွက်ရှိ ရွှေပလောင်ပုဂ္ဂလိကဆေးရုံဝန်းအတွင်း ပစ်ခတ်မှုတွေဖြစ်ပြီး ပျူစောထီး ၂ ဦးနဲ့ အရပ်သား ၂ ဦးဒဏ်ရာရခဲ့တယ်လို့ ဒေသခံတွေထံက သိရပါတယ်။

မေ ၂၆ ရက် မနေ့မနက် ၈ နာရီကျော်မှာ မေခွန်ရွာပျူစောထီးခေါင်းဆောင် ပေါသိန်းနဲ့အင်အား ၁၀ ဦးခန့်ပါ ပျူစောထီးအဖွဲ့က ရွှေပလာင်ဆေးရုံမှာ လာရောက်ကုသနေစဥ် လက်နက်ကိုင်အဖွဲ့တခုက လာရောက်ပစ်ခတ်ခဲ့ရာ အပြန်အလှန် ပစ်ခတ်မှုတွေဖြစ်ပွားခဲ့တယ်လို့ ဆိုပါတယ်။

” ပေါသိန်းက ခြေထောက်ကျိုးလို့ ဆေးရုံလာတက်တာ။ အဲ့ဒါက ပုဂ္ဂလိက ဆေးရုံလေ။ ခုက ဒုတိယအကြိမ်ခြေထောက်ကျိုးတာ။ ချော်လဲလို့ကျိုးတာ။ ပထမတခေါက်ကလည်း ကျိုးထားသေးတာ။ အသက်တောင်မပါတာကံကောင်းတယ်” လို့ ဖြစ်စဥ်ကိုသိရှိထားတဲ့ဒေသခံတဦးက မြေလတ်အသံကို ပြောပါတယ်။

အပြန်အလှန်ပစ်ခတ်မှုတွေကြောင့် ဆေးရုံလုံခြုံရေးဝန်ထမ်း အသက် ၄၀ ကျော်အရွယ် အမျိုးသား ၁ ဦးနဲ့ ပစ်ခတ်မှုဖြစ်ချိန် စက်ဘီးနဲ့ဖြတ်သန်းသွားတဲ့ လမ်းသွား၊ လမ်းလာ အသက် ၃၀ ကျော်အရွယ် အမျိုးသမီး ၁ ဦးတို့( မစိုးရိမ်ရ)ဒဏ်ရာရသွားကာ ပျူစောထီးတွေဘက်ကလည်း ၂ ဦးဒဏ်ရာရတယ်လို့ ၎င်းဒေသခံထံက သိရပါတယ်။

ဆေးရုံဝန်းအတွင်း ကင်းလာစောင့်ပေးတဲ့ ပျူစောထီးတွေကို ရွှေဘိုတိုက်နယ် ၅ ပကဖတပ်ဖွဲ့က သွားရောက်ပစ်ခတ်တိုက်ခိုက်ခဲ့တာဖြစ်ပြီး တိုက်ခိုက်မှုအတွင်း ပျူစောထီး ၂ ဦး ထိခိုက်ခဲ့တယ်လို့ ရွှေဘိုမြို့နယ်ပကဖတာဝန်ရှိသူတဦးက အတည်ပြုပြောပါတယ်။

“ မျက်မြင်တော့ ၂ ကောင်လဲကျသွားတာရှိတယ်။ သူတို့စီးလာတဲ့ ပါဂျဲရိုးကားကလည်း ပျက်စီးတာရှိတယ်။ အတွင်းထဲက လူထိ၊ မထိတော့မသိရဘူး” ၎င်းက ပြောပါတယ်။

ပစ်ခတ်မှုအတွင်း ပျူစောထီးတွေထိခိုက်တာကြောင့် ယမန်နေ့ ညနေပိုင်းထိ စစ်ကောင်စီအဖွဲ့တွေဟာ ရွှေဘိုမြို့အဝင်အထွက်နေရာတွေမှာ ပိတ်ဆို့စစ်ဆေးခဲ့တယ်လို့ သိရပါတယ်။

မေခွန်ကျေးရွာအုပ်ချုပ်ရေးမှူးဖြစ်တဲ့ ပျုစောထီး ပေါသိန်းဟာ မြို့နယ်ပျူစောထီးခေါင်းဆောင်တဦးလည်း ဖြစ်ပြီး ကျေးရွာမှာ စစ်မှုထမ်းကြေးကောက်ခံတာ၊ မြေယာတွေသိမ်းဆည်းရောင်းစားတာတွေ လုပ်ဆောင်နေတယ်လို့ ရွှေဘိုမြို့နယ်ပကဖက ပြောပါတယ်။

မေ ၁၅ ရက်ကလည်း ရွှေဘိုမြို့နယ်၊ ညောင်ပင်သာ စိုက်ပျိုးရေးသိပ္ပံတက္ကသိုလ်နဲ့ ပန်းရံကျေးရွာသွား လမ်းပေါ်မှာ ဒုရဲအုပ်အပါအဝင် ၂ ဦးပစ်ခတ်ခံရပြီး သေဆုံးသွားတယ်လို့ သိရပါတယ်။

စာတည်း – ဟိန်းစံ

ကမ္မ၊ မေ ၁၈၊ ၂၀၂၅။

မကွေးတိုင်း၊ ကမ္မမြို့ပေါ်ရှိ ဂျိုးပျံရပ်ကွက်ကို မေ ၁၈ ရက် ဒီမနက် ၆ နာရီလောက်မှာ စစ်ကောင်စီတပ်ကဗုံကြဲခဲ့တာကြောင့် ကလေး ၁ ဦးအပါအဝင် ၂ ဦးဒဏ်ရာရခဲ့ပြီ အဆောက်အဦပျက်စီးမှုတွေရှိခဲ့တယ်လို့ အညာမြေအရပ်ဖက်အဖွဲ့အစည်း – မြိုင် ဆီကသိရပါတယ်။

တိုက်ပွဲဖြစ်တာမရှိဘဲ ဗုံး ၂ လုံးကြဲချခဲ့တာကြောင့် ဂျိုးပျံရပ်ကွက်ကဆေးခန်း ၁ ခုပေါ်ကျရောက် ပေါက်ကွဲပြီး အသက် ၁၂ နှစ်အရွယ်နဲ့ ၃၀ အရွယ်အမျိုးသား ၂ ဦးထိခိုက်ဒဏ်ရာရခဲ့တာပါ။

“ကြဲချတာကတော့ ဘာအကြောင်းမှမရှိဘူး။ တိုက်ပွဲဘာညာမရှိဘူး။ အစောကြီးရှိသေးတာ မိုးလင်းစပဲရှိသေးတာ။ ၂ လုံးချတာကို ပထမအလုံးပဲကွဲတာ။ ၁ လုံးက သစ်ပင်နဲ့ငြိပြီးမကွဲတာ။ ပေါင် ၅၀၀ တွေဖြစ်မယ်ဗျ။ ဗုံးသီးအစတွေက ပေ ၁ ထောင်လောက်အထိ အဝေးကြီးတွေထိလွင့်တယ်”လို့ အညာမြေအရပ်ဖက်အဖွဲအစည်းက တာဝန်ရှိသူတဦးကဆိုပါတယ်။

ဒါ့အပြင် ဗုံးစထိမှန်လို့ ဆေးခန်းလည်းပျက်စီးခဲ့ပြီး မပေါက်ကွဲသေးတဲ့ဗုံးကိုတော့ ဘယ်လိုဆက်ပြီးလုပ်ဆောင်မယ်ဆိုတာမသိရဘူးလို့ သူကပြောပါတယ်။

ယခုဗုံးကျရောက်ပေါက်ကွဲခဲ့တဲ့နေရာအနီးမှာယခင်က တော်လှန်ရေးတပ်ဖွဲ့တွေရဲ့ ဂိတ်စခန်း ၁ ခုရှိခဲ့ပေမယ့် အဲ့ဒီဂိတ်ကပြောင်းရွှေ့သွားတာကြာပြီလို့ ဆိုပါတယ်။

ပြီးခဲ့တဲ့မေ ၅ ရက်ကလည်း စစ်ကောင်စီတပ်က ကမ္မမြို့နဲ့ ၁ မိုင်ဝန်းကျင်ခန့်အကွာက စောင်ဇမ်းကုန်းရွာကိုလေကြောင်းနဲ့ ဗုံးကြဲတိုက်ခိုက်ခဲ့ရာ ကာကွယ်ရေးတပ်ဖွဲ့ဝင် ၉ ဦးကျဆုံးခဲ့တယ်လို့သိရပါတယ်။

စာတည်း – လင်း

ပေါက်၊ ဧပြီ ၁၄၊ ၂၀၂၅။

မကွေးတိုင်း၊ ပေါက်မြို့နယ်၊ သနပ္ပင်ဇင်းကျေးရွာကို စစ်ကောင်စီတပ်က စက်တပ်လေထီးနဲ့ ဗုံးသီးချတိုက်ခိုက်ခဲ့တာကြောင့် ဒေသခံ ၂ ဦးထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဧပြီ ၁၄ ရက် မနေ့ကမနက်ပိုင်းမှာ ဆိပ်ဖြူ ကပစ ၂၄ ဘက်ကတက်လာတဲ့ စက်တပ်လေထီး ၂ စီးပေါ်ကနေ စက်လတ်သေနတ်နဲ့ပစ်ခတ်ပြီးနောက် ဗုံးသီး ၂ လုံးကြဲချခဲ့တာလို့ ဆိုပါတယ်။

“ကုက္ကိုစုပျူရွာနဲ့ နီးလို့ လာချတာထင်တယ်ဗျ။ သူတို့ ပျူရွာက အနီးပတ်ဝန်းကျင်ရွာတွေကို တိုက်ခိုက်ပေးဖို့ အထက်ကိုပေါက်ကိုယ်တော်က တောင်းဆိုထားတာလို့ကြားတာပဲ”လို့ အညာမြေအရပ်ဖက်အဖွဲ့အစည်း – မြိုင်မှ တာဝန်ရှိသူတဦးက ပြောပါတယ်။

ဒီတိုက်ခိုက်မှုကြောင့် သနပ္ပင်ဇင်းရွာက အသက် ၄၀ အရွယ်အမျိုးသား ၁ ဦး ပေါင်ထိမှန်ပြီး အသက် ၃၀ အရွယ်အမျိုးသမီး နဖူးထိမှန်ဒဏ်ရာရရှိခဲ့တာပါ။

ဒါ့အပြင် သနပ္ပင်ဇင်းရွာနဲ့ အနီးတဝိုက်ကိုလည်း ကပစ ၂၄ ကနေ လက်နက်ကြီးတွေနဲ့ မကြာခဏပစ်ခတ်လေ့ရှိတယ်လို့လည်း ဆိုပါတယ်။

ဧပြီလဒုတိယပတ်အတွင်းမှာ မကွေးနဲ့စစ်ကိုင်းတိုင်းအတွင်း လေကြောင်းတိုက်ခိုက်မှုတွေ ခပ်စိပ်စိပ်လုပ်လာတဲ့အတွက် ဒေသခံထိခိုက်သေဆုံးမှုတွေရှိနေတာပါ။

ဧပြီ ၁၂ ရက်ဒီနေ့မနက် ၁၀ နာရီလောက်မှာ မိတ္ထီလာလေတပ်ဘက်ကလာတဲ့ ဂျက်ဖိုက်တာနဲ့ ရေစကြိုမြို့နယ်၊ ရေလယ်ကျွန်းဒေသရှိ သာဂေါင်ကျေးရွာကို ဗုံး ၂ လုံးကြဲချတိုက်ခိုက်ခဲ့တာကြောင့် ထိခိုက်ပျက်စီးမှုတွေရှိခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ပုံစာ – ပြီးခဲ့တဲ့ ဖေဖော်ဝါရီလအတွင်း သနပ္ပင်ဇင်းရွာ စစ်ကောင်စီတပ်ဖွဲ့မှမီးရှို့ခဲ့စဥ်။

သတင်း – ဟယ်သာ၊ စာတည်း – လင်း