တိုက်ပွဲ

ဆင်ဖြူကျွန်း၊ ဇန်နဝါရီ ၂၊ ၂၀၂၆။

မကွေးတိုင်း၊ ဆင်ဖြူကျွန်းမြို့မှာ ထွေထွေအုပ်ချုပ်ရေးမှူးရုံးနဲ့ စက်မှုလယ်ယာရုံး မီးလောင်ပျက်စီးပြီး စစ်ကော်မရှင်တပ်ဖွဲ့ဝင်တွေက လက်နက်ကြီးနဲ့ပစ်ခတ်တာကြောင့် ဒေသခံ ၂ ဦးသေဆုံးခဲ့တယ်လို့ ဆင်ဖြူကျွန်းမြို့ခံတွေဆီက သိရပါတယ်။

ဇန်နဝါရီ ၁ ရက် နေ့လယ် ၁ နာရီခွဲမှာ ဆင်ဖြူကျွန်းမြို့၊ သစ္စာမြိုင်ကွက်သစ်ရှိ စက်မှုလယ်ယာရုံးနဲ့ သရက်တောရွာထိပ်ရှိ အထွေထွေအုပ်ချုပ်ရေးမှူးရုံးတို့ မီးလောင်ခဲ့တာဖြစ်ပြီး အဆိုပါရုံး ၂ ခုဟာ အကွာအဝေး ၃ ဖာလုံခန့်သာရှိတယ်လို့ ဆိုပါတယ်။

“အဲ့ဒါက သူတို့(စစ်ကော်မရှင်)ပစ်တဲ့ လက်နက်ကြီးကျတာ၊ နွယ်တမယ်တံတားထိပ်ကနေ လှမ်းပစ်တာ၊ မနေ့ကပါ၊ ထွေအုပ်ရုံးနဲ့ စက်မှုလယ်ယာကို လက်နက်ကြီးကျည်ကျတာ၊ တခြားမီးကူးတာတွေတော့မရှိဘူး၊ လက်ရှိကတော့ အခုအချိန်ထိ ငြိမ်နေကြတယ်၊ ဘာမှတော့ မထူးသေးဘူး၊ အပြန်အလှန် ပစ်ခတ်မှုလည်း မရှိသေးဘူး” လို့ ဆင်ဖြုကျွန်းမြို့ခံတဦးက ပြောပါတယ်။

အထက်ပါဌာနဆိုင်ရာရုံးတွေမှာ လူနေထိုင်တာမရှိတဲ့အတွက် ထိခိုက်သေဆုံးမှုမရှိဘဲ ခုလိုမီးလောင်တာ ဟာ စစ်ကော်မရှင်တပ်တွေပစ်တဲ့လက်နက်ကြီးတွေ ကျရောက်ပေါက်ကွဲတာကြောင့်လို့ ဆိုပေမယ့် မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ ဒီဇင်ဘာ ၃၁ ရက်ကလည်း ဆင်ဖြူကျွန်းမြို့၊ နွယ်တမယ်ရွာထိပ်မှာ အထိုင်ချတပ်စွဲထားတဲ့ စစ်ကော်မရှင်တပ်ကပစ်ခတ်တဲ့လက်နက်ကြီးက ဆင်ဖြူကျွန်းမြို့၊ မန်းကျည်းတောကွက်သစ်က နေအိမ်ပေါ်ကျရောက်ပေါက်ကွဲပြီး အသက် ၆၀ အရွယ် ဒေါ်ဆယ်မိ နဲ့ အမျိုးသား ၁ ဦးသေဆုံးကာ၂ ဦး ဒဏ်ရာရခဲ့တယ်လို့ ဆိုပါတယ်။

“နွယ်တမယ်ရွာထိပ်ကနေ နတ်စင်ရွာဘက်ကို လှမ်းပစ်တာကနေ မန်းကျည်းတောကွက်သစ်ဘက်ကို လက်နက်ကြီးကျည်ကျတာ၊ အိမ်ပေါ်တည့်တည့်ကျတာ၊ မန်းကျည်း‌တောကွက်သစ်က ဆင်ဖြူကျွန်းနားမှာပဲရှိတာ၊ ရှားတောမြောက်ဘက်မှာ ရှိတာ၊ သေတာက ၂ ဦးသေတယ်၊ ၂ ဦးဒဏ်ရာရတယ်၊ ၁ ဦးကတော့ လက်ပြတ်တယ်၊ ၁ ဦးက နားစည် ကွဲသွားတယ်”လို့ သူက ဆက်ပြောပါတယ်။

ဒါ့အပြင် ဒီဇင်ဘာ ၃၁ ရက် ဒီနေ့လယ် ၂ နာရီဝန်းကျင်မှာ ချောင်းဖြူရွာနဲ့ နတ်စင်ရွာကို စစ်ကော်မရှင် တပ်ကဂျက်ဖိုက်တာနဲ့ ဗုံး ၆ လုံးကြဲချခဲ့ပါသေးတယ်။

ဆင်ဖြူကျွန်းမြို့မှာ ဒီဇင်ဘာ ၂၃ ရက်နဲ့ ၂၄ ရက်က ဒေသခံကာကွယ်ရေးတပ်တွေနဲ့ စစ်ကော်မရှင်တပ်တို့ တိုက်ပွဲဖြစ်ခဲ့ပြီးနောက် တိုက်ပွဲငြိမ်သက်ခဲ့ရာက ဒီဇင်ဘာ ၃၀ ရက်ည ၇ နာရီကနေ ၁၁ နာရီခွဲအထိ ဆင်ဖြူကျွန်းမြို့အနီး နွယ်တမယ်တံတားရှိ စစ်ကော်မရှင်တပ်ဖွဲ့ဝင်တွေနဲ့ ဒေသခံတော်လှန်ရေးတပ်တွေ ပစ်ခတ်မှုပြန်ဖြစ်ခဲ့ပါတယ်။

လက်ရှိမှာတော့ တိုက်ပွဲငြိမ်နေပြီး စစ်ကော်မရှင်တပ်ဖွဲ့ဝင်တွေဟာ ဆင်ဖြူကျွန်းမြို့၊ အသိရိဘုရား၊ မဟာစေတီလှဘုရား၊ ရဲစခန်းနဲ့ နွယ်တမယ်ရွာထိပ်စတဲ့ နေရာ ၄ နေရာမှာ အင်အား ၂၀၀ ကျော်နဲ့ တပ်စွဲနေထိုင်တယ်လို့ သိရပါတယ်။

စာတည်း – လင်း

စစ်ကြောင်းကိုထွက်ကြည့်တဲ့ အမျိုးသား ၁ ဦးပစ်ခတ်ခံရပြီး လက်နက်ကြီးထိလို့ဒဏ်ရာရသူတွေရှိ

ဆင်ဖြူကျွန်း၊ ဒီဇင်ဘာ ၂၄၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့‌မှာ စစ်ကော်မရှင်တပ်နဲ့ တော်လှန်ရေးပူးပေါင်းတပ်တွေအကြား တိုက်ပွဲတွေဆက်ဖြစ်နေပြီး မြို့တွင်းမှာပိတ်မိနေတဲ့အရပ်သားတချို့ လက်နက်ကြီးဗုံးစထိမှန်ဒဏ်ရာရရှိခဲ့တယ်လို့ မြို့ခံတွေဆီက သိရပါတယ်။

ဒီဇင်ဘာ ၂၃ ရက် ယမန်နေ့ မနက်အစောပိုင်းကစတင်ခဲ့တဲ့ ဆင်ဖြူကျွန်းမြို့တိုက်ပွဲဟာ ဒီကနေ့အထိ ဆက်ဖြစ်နေတာဖြစ်ပြီး စစ်ကော်မရှင်တပ်က လေယာဥ်နဲ့ လက်နက်ကြီးပစ်ကူတွေ ဆက်တိုက်ပစ်ခတ်နေတယ်လို့ ဆိုပါတယ်။

” ပိတ်မိနေတာက မြို့ပတ်ချာလည် အနောက်နဲ့တောင်တွေမှာ တိုက်ပွဲတွေကဖြစ်နေတာ့ မြို့ထဲကနေ အပြင်ထွက်လို့မရဘူး။ တိုက်ပွဲဖြစ်မှာကိုလည်း မြို့ခံတွေက ကြိုမသိတော့ ပြေးချိန်လည်းမရှိဘူး။ ခုတော့ ကိုယ့်အိမ်ထဲကို နေနေရတယ်”လို့ ဆင်ဖြူကျွန်းမြို့ခံတဦးက မြေလတ်အသံကို ပြောပါတယ်။

စစ်ကော်မရှင်တပ်အင်အား ၂၀၀ နီးပါးဟာ ပရိက္ခရာရပ်ကွက်ရှိ ဆင်ဖြူကျွန်းမြို့ရဲစခန်းနဲ့ အမှတ် ၂ ရပ်ကွက်ရှိ အသိရိဘုရားဝန်းတွေအတွင်း လက်နက်ကြီးအထိုင်တပ်စွဲပြီး စလင်းမြို့အနောက်ဘက် ကျေးရွာတွေဖြစ်တဲ့ နွ​ယ်တမယ်၊ ချောင်းဖြူရွာတွေဘက်ကို အဆက်မပြတ်ပစ်ခတ်နေတာပါ။

ယမန်နေ့ ဒီဇင်ဘာ ၂၃ ရက်နေ့လယ်ပိုင်းမှာ စစ်ကော်မရှင်တပ်ပစ်ခတ်တဲ့လက်နက်ကြီးဗုံးသီးတွေဟာ ပိုးအနောက်ရပ်ကွက်ရှိနေအိမ်တချို့ပေါ်ကျရောက် ပေါက်ကွဲခဲ့တာကြောင့် မြို့ခံအမျိုးသမီး ၂ ဦး၊ အမျိုးသား ၁ ဦးအပါ ၆ ဦးခန့် ဗုံးစထိမှန်ဒဏ်ရာရခဲ့တယ်လို့ သိရပါတ​ယ်။

ဒါ့အပြင် ယမန်နေ့ မနက် ၁၀ နာရီလောက်မှာ စစ်ကော်မရှင်တပ်စစ်ကြောင်းကို ထွက်ကြည့်တဲ့ ဆင်ဖြူကျွန်းမြို့၊ သုံးပင်တောင်ရပ်ကွက်နေ အသက် ၄၀ ဝန်း ကျင်အမျိုးသား ၁ ဦးကို စစ်ကော်မရှင်စစ်ကြောင်းက သေနတ်နဲ့ပစ်ခတ်သွားတာကြောင့် နောက်ကျောကျည်ထိမှန်ဒဏ်ရာ(မစိုးရိမ်ရ)ရရှိခဲ့တယ်လို့ ဆိုပါတယ်။

လက်ရှိ ဆင်ဖြူကျွန်းမြို့မှာ တိုက်ပွဲတွေဆက်ပြင်းထန်နေပြီး စစ်ကော်မရှင်တပ်က လက်နက်ကြီးတွေ ဆက်တိုက်ပစ်ခတ်နေသလို ဒီကနေ့မနက်ပိုင်းမှာပဲ တိုက်ပွဲဖြစ်ပွားရာနေရာတွေအနီးကို တိုက်လေယာဥ် ၂ စီးနဲ့ တိုက်ခိုက်နေတယ်လို့ အထက်ပါမြို့ခံက ပြောပါတယ်။

” ခုလေးတင်ပဲ ဖိုက်တာနဲ့ လှည့်ပတ်ပစ်နေတာ နွယ်တမယ်တံတားဘက်နဲ့ မြို့အစပ်နေရာတွေကို စက်လက်တွေနဲ့လည်း ဆက်တိုက်ပစ်နေတာ ” လို့ သူက ပြောပါတယ်။

မြို့တွင်းမှာလည်း စစ်ကော်မရှင်တပ်က အမှတ် ၂ နဲ့ အမှတ် ၃ ရပ်ကွက်တွေမှာ အင်အား ၅၀ စီနဲ့ ကင်းပုန်းဝပ်နေပြီး ထပ်မံအင်အားဖြည့်တင်းတာတွေလည်း လုပ်ဆောင်နေကာ ဆင်ဖြူကျွန်းမြို့ကို အင်တာနက်လိုင်းတွေဖြတ်တောက်ထားတာလည်း ဖြစ်ပါတယ်။

စာတည်း – ဟိန်းစံ

ပွင့်ဖြူ၊ ဒီဇင်ဘာ ၂၃၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ ကျောင်းကုန်းကြီးကျေးရွာရှိစစ်တပ်လက်အောက်ပျုစောထီး(ပြည်သူ့စစ်)အထိုင်စခန်း တိုက်ခိုက်ခံရပြီး တိုက်ပွဲအတွင်း ပျူစောထီးခေါင်းဆောင် မြတ်အောင်နဲ့ ပျူစောထီးတချို့သေဆုံးခဲ့တယ်လို့ ဒေသခံတွေနဲ့ ကာကွယ်ရေးအဖွဲ့ဝင်တွေထံက သိရပါတယ်။

ဒီဇင်ဘာ ၂၃ ရက်ဒီကနေ့မနက် ၅ နာရီခန့်မှာ ပျူစောထီးနဲ့စစ်ကော်မရှင်တပ်ပူးပေါင်းအင်အား ၁၀၀ ခန့်ရှိတဲ့ ကျောင်းကုန်းကြီးအနောက်ရွာပျူစောထီးစခန်းကို တော်လှန်ရေးပူးပေါင်းတပ်တွေက ဝင်ရောက်တိုက်ခိုက်ခဲ့ရာ ၄ နာရီကျော်ကြာတိုက်ပွဲပြင်းထန်ခဲ့တာလို့ ဆိုပါတယ်။

“တော်လှန်ရေးအင်အားစုတွေက ပျူခေါင်းဆောင်လက်နက်ကိုင်တွေကိုဝင်စီးတဲ့နေရာမှာ ကျေးရွာရဲ့အနောက်ဘက်ခြမ်းကို ဝင်စီးနိုင်တယ်။ ပျူတွေဖြစ်တဲ့ မြအောင်၊ ဝင်းတင်၊ ခင်မောင်စိုးပါ သေဆုံးကြတယ်” လို့ ပွင့်ဖြူမြို့နယ်မှာစစ်ရေးလှုပ်ရှားနေတဲ့ကာကွယ်ရေးအဖွဲ့ဝင်တဦးက မြေလတ်အသံကို ပြောပါတယ်။

စစ်ကော်မရှင်တပ်က တိုက်ပွဲတွေပြင်းထန်နေချိန် ဒီကနေ့မနက် ၇ နာရီခွဲလောက်မှာ Mi – 35 တိုက် ခိုက်ရေးရဟတ်ယာဥ် ၂ စီးနဲ့ တိုက်ပွဲဖြစ်ပွားရာနေရာအနီးကို နာရီဝက်ကြာ လှည့်ပတ်ပစ်ခတ်ခဲ့တယ်လို့ သိရပါတယ်။

တိုက်ပွဲအတွင်းမှာ ပျူစောထီးခေါင်းဆောင်အချို့အပါ ၆ ဦးသေဆုံးကြောင်း ကနဦးသိထားရပြီး မနက် ၉ နာရီခွဲခန့်မှာ တိုက်ပွဲပြီးဆုံးခဲ့ကာ အထိနာတဲ့စစ်ကော်မရှင်ပူးပေါင်းတပ်ဖွဲ့တွေက ကျောင်းကုန်းကြီးအရှေ့ဘက်ခြမ်းကိုဆုတ်ခွာသွားတယ်လို့ အထက်ပါကာကွယ်ရေးတပ်ဖွဲ့ဝင်က ပြောပါတယ်။

ပွင့်ဖြူမြို့နယ်ဒေသခံတဦးကလည်း ဒီကနေ့မနက်အစောပိုင်းမှာ ကျောင်းကုန်းကြီးပျူစောထီးဂိတ်ကို PDF ပူးပေါင်းတပ်တွေဘက်ကတိုက်ခိုက်မှုကြောင့် တိုက်ပွဲတွေ ပြင်းထန်ခဲ့ပြီး ပျူစောထီးတွေဘက်က ထိခိုက်သေဆုံးမှုတွေရှိတယ်လို့ ပြောပါတယ်။

” ထိခိုက်ကျဆုံးတော့ရှိတယ်။ PDF ဘက်ကတော့မသိသေးဘူး။ ပျူစောထီးခေါင်းဆောင် မြတ်အောင်၊ ခေါင်းဆောင်ထဲကတယောက် အဲ့ကောင်နောက်စေ့မှန်သေတယ်။ ခင်မောင်ဦး ပြင်းထန်ဒဏ်ရာရတယ်။ ဖြစ်နေတုန်းဆိုတော့ အတိအကျမသိရသေးဘူး။ ကျနော်သိတာ နှစ်ယောက်သိတယ်။ မြတ်အောင်သေတာသိတယ်။ သေတဲ့အထဲ **တွေပါတာလည်းရှိနိုင်တယ်” လို့ ပြောပါတယ်။

ဒါ့အပြင် စစ်တပ်က ရဟတ်ယာဥ်နဲ့ပစ်ခတ်မှုတွေကြောင့် အရပ်သားတွေထိခိုက်မှုရှိခဲ့တယ်လို့သိရပြီး တိုက်ပွဲအသေးစိတ်အခြေနေတွေကိုတော့ သက်ဆိုင်ရာကာကွယ်ရေးတပ်ဖွဲ့တွေဘက်က ထုတ်ပြန်မလာသေးပါဘူး။

တိုက်ပွဲဖြစ်ပွားပြီးနောက်မှာ စစ်ကော်မရှင်တပ်ဘက်က မကျည်းကုန်း၊ ရှောက်တော၊ သစ်ချိုကုန်းဘက်ကနေ စစ်ကား ၁၅ စီးပါ အင်အား ၂၀၀ ခန့်နဲ့ စစ်ကြောင်းပြန်ထိုးလာနေလို့ စစ်ရေးတင်းမာနေသေးတယ်လို့ သိရပါတယ်။

တိုက်ပွဲနဲ့လေကြောင်းပစ်ခတ်မှုတွေကြောင့် ကျောင်းကုန်းကြီးအရှေ့၊ အနောက်နဲ့ ရေပုတ်ကြီးကျေးရွာက ပြည်သူ ၂,၀၀၀ ကျော်ထွက်ပြေးနေရပြီး အချို့ကတော့နေအိမ်အတွင်းမှပုန်းအောင်းနေကြသေးတယ်လို့ ဆိုပါတယ်။

စာတည်း – ဟိန်းစံ

ဆင်ဖြူကျွန်း၊ ဒီဇင်ဘာ ၂၃၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့၊ နွယ်တမယ်တံတားထိပ်အနီး ဒီဇင်ဘာ ၂၃ ရက် ဒီကနေ့ မနက်ပိုင်းမှာ စစ်ကော်မရှင်တပ်နဲ့ တော်လှန်ရေးတပ်ဖွဲ့ဝင်‌တွေအကြား တိုက်ပွဲပြင်းထန်နေတယ်လို့ မြို့ခံတွေဆီက သိရပါတယ်။

ဒီကနေ့မနက် ၆ နာရီလောက်ကစပြီး ဆင်ဖြူကျွန်းမြို့ဘက်အခြမ်း၊ နွယ်တမယ်တံတားထိပ်ရှိ စစ်တပ်ဂိတ်ကို PDF ပူးပေါင်းတပ်ဖွဲ့တွေကတိုက်ခိုက်တာကနေ တိုက်ပွဲတွေစတင်ခဲ့ပြီး စစ်တပ်က တိုက်ပွဲဖြစ်ပွားရာနေရာအနီးတဝိုက်ကို Y 12 လေယာဥ်နဲ့ ဗုံးကြဲနေကာ မြို့ပေါ်ရပ်ကွက်တွေကို ကျရောက်ပေါက်ကွဲမှုတွေရှိတယ်လို့ ဆိုပါတယ်။

” တော်လှန်ရေးတပ်ဖွဲ့တွေက ဆင်ဖြူကျွန်းရဲစခန်းရဲ့ ပတ်ချာလည်ကို ဝိုင်းထားတာ၊ စစ်ကော်မရှင်က ပါရာမော်တာနဲ့လည်း ဗုံးပတ်ကြဲနေတာ၊ ထိခိုက်သေဆုံးမှုကတော့ မသိရသေးဘူး၊ တိုက်ပွဲကအခုထိဖြစ်နေတုန်း” လို့ ဆင်ဖြူကျွန်းမြို့ခံတဦးက ပြောပါတယ်။

ယမန်နေ့ ဒီဇင်ဘာ ၂၂ ရက် ည ၁၁ နာရီခန့်မှာလည်း စစ်ကော်မရှင်တပ်ကဆင်ဖြူကျွန်းမြို့နဲ့အနီးတဝိုက်ကျေးရွာတွေကို Y 12 လေယာဥ်နဲ့ ဗုံးအလုံးရေ ၃၀ ကျော် ကြဲချတိုက်ခိုက်ခဲ့တာကြောင့် ချောင်းကောက်၊ နတ်စင်၊ ဆုတ်လေဦး၊ ချောင်းဖြူစတဲ့ရွာတွေမှာ ဗုံးသီးတွေကျရောက်ပေါက်ကွဲခဲ့တယ်လို့ သိရပါတယ်။

တိုက်ပွဲတွေနဲ့ စစ်ကော်မရှင်တပ်ရဲ့ဗုံးကြဲတိုက်ခိုက်မှုတွေကြောင့် ဆင်ဖြူကျွန်းနဲ့အနီးတဝိုက်ကျေးရွာတွေ စစ်ရှောင်နေရပြီး နှစ်ဖက်တပ်တွေနဲ့ အရပ်သားထိခိုက်သေဆုံးမှုအခြေအနေတွေကို မသိရသေးပါဘူး။

လက်ရှိမှာ ဆင်ဖြူကျွန်းမြို့ကို စစ်ကော်မရှင်တပ်က အင်တာနက်လိုင်းတွေဖြတ်တောက်ထားပြီး သတင်းတင်ပြချိန်အထိ ဆင်ဖြူကျွန်းမြို့မှာ တိုက်ပွဲတွေဆက်လက်ပြင်းထန်နေဆဲဖြစ်ကာ နောက်ဆက်တွဲအခြေအနေတွေကို ဆက်လက်ဖော်ပြပေးသွားပါမယ်။

တိုက်ခိုက်မှုတွေအတွင်း စစ်ကော်မရှင်တပ်ဖွဲ့ဝင် ၇ ဦးနဲ့ လက်နက်ခဲယမ်းတွေသိမ်းဆည်း

ကောလင်း၊ ဒီဇင်ဘာ ၂၂၊ ၂၀၂၅။

စစ်ကိုင်းတိုင်း၊ ကောလင်းမြို့နယ်အရှေ့ခြမ်းရှိ သစ်ဖုလတောင် စစ်ကော်မရှင်တပ်စခန်းကို တော်လှန်ရေးတပ်တွေသိမ်းပိုက်ခဲ့ပြီး စစ်ကူလာတဲ့စစ်ကြောင်းကိုဖြတ်တိုက်ရာ စစ်သား ၃ ဦး သေဆုံးပြီး ၇ ဦး အရှင်ဖမ်းမိခဲ့တယ်လို့ တော်လှန်ရေးတပ်တွေဆီကနေ သိရပါတယ်။

ဒီဇင်ဘာ ၁၈ ရက်ညပိုင်းကတည်းက သစ်ဖုလစခန်းကို တော်လှန်ရေးတပ်တွေသွားရောက် တိုက်ခိုက်ခဲ့ပြီး ဒီဇင်ဘာ ၁၉ ရက်မှာ စစ်ကော်မရှင်တပ်တွေစခန်းစွန့်ထွက်ပြေးသွားပြီးနောက်ဒီဇင်ဘာ ၂၀ ရက်မှာ သိမ်းပိုက်နိုင်ခဲ့တယ်လို့ တော်လှန်ရေးတပ်ဖွဲ့ဝင်တဦးက ပြောပါတယ်။

ဒါ့အပြင် ၁၉ ရက်ညမှာလည်း ဝန်းသိုမြို့ ခမရ ၁၂၀ ကနေ စစ်ကူထွက်လာတဲ့စစ်ကြောင်းက ဝန်းသိုမြို့နယ်၊ အာမခံရွာကိုမီးဝင်ရှို့ပြီးနောက် ညောင်ပင်သာရွာကိုဝင်ခဲ့ကာ ဒီဇင်ဘာ ၂၀ ရက် မနက်ပိုင်းမှာအဲ့ဒီရွာမှာထပ်မံတိုက်ပွဲဖြစ်ခဲ့ပါသေးတယ်။

ဒီတိုက်ခိုက်မှုအတွင်း စစ်ကော်မရှင်တပ်ဖွဲ့ဝင် ၃ ဦးသေဆုံးပြီး ၇ ဦးကိုအရှင်ဖမ်းမိကာ သေနတ် ၁၀ လက်နဲ့ စစ်အသုံးအဆောင်တချို့ကိုလည်း သိမ်းယူနိုင်ခဲ့တယ်လို့ အဲဒီတော်လှန်ရေးတပ်ဖွဲ့ဝင်က ပြောပါတယ်။

“ညဘက်ကို ဝင်အောင်းတာ။အဲ့ဒီမှာ စစ်တပ်က တော်တော်ထိတယ်။အရှင်ဖမ်းမိတာတွေ ရော၊ အသေတွေရော ရတယ်”လို့ တော်လှန်ရေးတပ်ဖွဲ့ဝင်က ဆက်ပြောပါတယ်။

ဒီဇင်ဘာ ၂၂ ရက် ဒီနေ့မနက်မှာတော့ တော်လှန်ရေးတပ်တွေက သစ်ဖုလစခန်းကို နယ်မြေရှင်းလင်းရေးပြုလုပ်ချိန်မှာလည်း နောက်ထပ်အလောင်းတွေထပ်မံတွေ့ခဲ့ရတယ်လို့ သိရပါတယ်။

“သူတို့က(စကမ)က သစ်ဖုလက လူတွေနဲ့လည်း အဆက်အသွယ်ပျက်ကုန်တယ်ထင်ပါတယ်။ သူတို့လည်းရွာထဲက နေထွက်ပြေးတယ်။ သစ်ဖုလကပြေးတဲ့သူတွေလည်း ဘယ်ရောက်ကုန်လဲမသိသေးဘူး”လို့ တော်လှန်ရေးတပ်ဖွဲ့ဝင်တဦးက ပြောပါတယ်။

ဒ့ါအပြင် ဒီကနေ့အထိ ဝန်းသိုမြို့နယ်နဲ့ ကောလင်းမြို့နယ်အစပ်မှာလည်း တိုက်ပွဲတွေဆက်ဖြစ်နေပြီး မနေ့ညနေပိုင်းက ဝန်းသို ခမရ ၁၁၁ နဲ့ ၁၂၀ ကို ရဟတ်ယာဉ်နဲ့ အင်အား၊ ရိက္ခာတွေဖြည့်ထားတယ်လို့လည်း သိရပါတယ်။

သတင်း – မြတ်