တိုက်ပွဲ

မြေလတ်အသံ၊ ဇန်နဝါရီ ၁၃၊ ၂၀၂၆။

ပဲခူးတိုင်း၊ ကျောက်တံခါးမြို့နယ်၊ ပဲနွယ်ကုန်းမြို့၊ ရန်ကုန် – မန္တလေးလမ်းဟောင်းအနီးရှိ ကြိမ်ခါးကုန်း ကျေးရွာမှာတိုက်ပွဲဖြစ်ပြီး စစ်ကော်မရှင်တပ်က ဗိုလ်မှူး ၁ ဦးအပါအဝင် သေဆုံးသူများပြီး လက်နက်တွေလည်းသိမ်းဆည်းရရှိခဲ့တယ်လို့ အမှတ် ၂ စစ်ဆင်ရေးနယ်မြေ ဆီက သိရပါတယ်။

ဇန်နဝါရီ ၁၂ ရက် နေ့လယ်ပိုင်းမှာ စတင်ဖြစ်ပွားခဲ့တဲ့ အဲ့ဒီတိုက်ပွဲမှာ ကညွတ်ကွင်းအခြေစိုက် ခမရ ၄၃၉ တပ်ရင်းက စစ်ကြောင်းမှုးအဖြစ်ပါလာတဲ့ ဗိုလ်မှူး ထိန်လင်းအပါအဝင် ၂၀ ဦးသေဆုံးခဲ့တာဖြစ်ပြီး တိုက်ပွဲကြာချိန် ၂ နာရီနီးပါးကြာခဲ့တယ်လို့ သိရပါတယ်။

“စစ်ကြောင်းထိုးလာတဲ့ စကမ အင်အားက အနည်းဆုံး ၁၅၀ ရှိပါတယ်။ သေဆုံးတဲ့လူဦးရေကလည်း မျက်မြင် ၂၀ ဦးပါ။ သူတို့က ဆုတ်ခွာထွက်ပြေးသွားတာဖြစ်တော့ ဒီထက်လည်းပိုနိုင်ပါတယ်။ တိုက်ပွဲကတော့ ၁ နာရီနဲ့ ၄၅ မိနစ်ကြာပါတယ်။ ကျနော်တို့သတင်းထုတ်ပြန်ချက်မှာဖော်ပြထားတဲ့ ဓာတ်ပုံပိုင်ရှင်က သူ(ဗိုလ်မှူးထိန်လင်း)ပါပဲ”လို့ ပြည်သူ့ကာကွယ်ရေးတပ်၊ အမှတ် ၂ စစ်ဆင်ရေးနယ်မြေ၊ သတင်းနဲ့ ပြန်ကြားရေးတာဝန်ခံ စောဒိုရှင်းက ပြောပါတယ်။

တိုက်ပွဲအတွင်း ကာကွယ်ရေးတပ်ဖွဲ့ဝင် ၂ ဦးလည်းသေဆုံးပြီး နောက်ထပ် ၃ ဦး ဒဏ်ရာအနည်းငယ်ရရှိခဲ့တယ်လို့ စောဒိုရှင်းက ပြောပါတယ်။

ဒါ့အပြင် တိုက်ပွဲအတွင်း ၆၀ မမ ပြောင်းရှည် ၁ လက်၊ ပြောင်းတို ၂ လက်၊ ‎RPG ၁ လက်၊ MA 1 ၇ လက်၊ MA 2 ၂ လက်၊ MA 3 ၂လက်၊ ‎MA 11 ၃ လက်၊ ‎၆၀ မမ ဗုံးသီး ၂၄ လုံး၊ အီနာဂါဗုံးသီး ၂၄ လုံး၊‎ RPG ဗုံးသီး ၂ လုံး၊ RPG ပို့ယမ်း ၂ တောင့်၊‎ ၄၀ မမ အသီး ၉ လုံး၊ ကျည်ဘောက်အစုံ ၉ ခု၊ ၁၈ မိုင်း ၃လုံး၊ ၁၄ မိုင်း ၃ လုံး၊ ကျည်ကာဦးထုပ် ၁၃ လုံး၊ ၅.၅၆ ကျည် ၂၀၀ တောင့်၊ ‎၇.၆၂ ကျည် ၁၅၀ တောင့်၊ ကျောပိုးဂျန်မာ ၁ ခု၊‎ ဆက်သွယ်ရေးစက် ၁ ခုတို့ကို သိမ်းဆည်းရရှိခဲ့တယ်လို့ ဆိုပါတယ်။

ဒီတိုက်ခိုက်မှုကို ပြည်သူ့ကာကွယ်ရေးတပ်မတော်၊ အမှတ် ၂ စစ်ဆင်ရေးနယ်မြေ၊ ပဲခူးတိုင်းစစ်ဌာန၊ ဗျူဟာ ၂၅ ကွပ်ကဲမှုအောက်ရှိ အမှတ် ၃၇၀၂ တပ်ရင်း၊ အထူးကွန်မန်ဒိုတပ်ရင်း P-299 14၊ ဗျူဟာ ၂၆ ကွပ်ကဲမှုအောက်ရှိ အမှတ် ၃၇၀၃ တပ်ရင်း (Fire Dragon)၊ တော်ဝင်ဒေါင်းတပ်ရင်း P-299 13 တို့ ပူးပေါင်းလုပ်ဆောင်ခဲ့တာ ဖြစ်ပါတယ်။

တိုက်ပွဲဖြစ်ပြီးနောက် စစ်ကြောင်းက ပဲနွယ်ကုန်းမြို့ပေါ်ကိုပြန်ဆုတ်ခွာသွားခဲ့ပြီး ဇန်နဝါရီ ၁၃ ရက် ဒီကနေ့အထိ တန်ပြန်စစ်ကြောင်းထိုးလာတာမရှိဘူးလို့ သိရပါတယ်။

ပြီးခဲ့တဲ့ ဇန်နဝါရီ ၉ ရက် ဒီမနက်အစောပိုင်းမှာလည်း ပဲခူးတိုင်း၊ ကျောက်တံခါးမြို့နယ်၊ တောကျွဲအင်းမြို့ အပါအဝင် ကျောက်တံခါးနဲ့ အုတ်တွင်းမြို့နယ်မှ စစ်ကော်မရှင်စခန်း ၁၄ ခုကို ဒေသခံကာကွယ်ရေးပူးပေါင်းတပ်တွေက ဝင်ရောက်တိုက်ခိုက်ပြီး လက်နက်ခဲယမ်းတွေသိမ်းဆည်းခဲ့ပါသေးတယ်။

စာတည်း – လင်း

မြေလတ်အသံ၊ ဇန်နဝါရီ ၉၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ ကမ်းဖြူကျေးရွာအနီးမှာ စစ်ကော်မရှင်တပ်နဲ့ တော်လှန်ရေးတပ်ဖွဲ့တို့ တိုက်ပွဲဖြစ်ပြီး ပြည်သူ့ကာကွယ်ရေးတပ်ဖွဲ့ဝင် ၇ ဦးအပါအဝင် နှစ်ဖက်ထိခိုက်သေဆုံးမှုတွေရှိခဲ့တယ်လို့ မတ္တရာမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ကမ်းဖြူရွာအတွင်း အင်အား ၁၀၀ ကျော်ရှိ စစ်ကော်မရှင်တပ်ဖွဲ့ဝင်တွေ စစ်ကြောင်းထိုးဝင်ရောက်နေစဥ် ဇန်နဝါရီ ၆ ရက်မနက်ပိုင်းမှာ မတ္တရာမြို့နယ်ပကဖနဲ့ ရွှေဘိုခရိုင်တပ်ရင်း ၁၈ တို့က ထိုးစစ်ဆင်တိုက်ခိုက်ပြီးနောက် တိုက်ပွဲ ၁ နာရီကျော်ဖြစ်ခဲ့တယ်လို့ ဆိုပါတယ်။

“စကမ အင်အား ၁၀၀ ဝန်းကျင်ပါပါတယ်။ တိုက်ပွဲကြာချိန် ၁ နာရီဝန်းကျင်ရှိပါတယ်။ တိုက်ပွဲဖြစ်ပြီး စကမ ကရှေ့ဆက်တိုးလာတာပါ။ စကမ ၁၅ ဦးခန့်သေဆုံးခြင်းနဲ့ဒဏ်ရာရရှိမှုကို ကျနော်တို့ရဲဘော်တွေ မျက်မြင်နဲ့ အတည်ပြုနိုင်ခဲ့ပါတယ်။ တိုက်ပွဲဖြစ်ပြီး စကမ ဟာ ကမ်းဖြူကျေးရွာမှာ ယာယီအထိုင်ချနေခဲ့ပါတယ်”လို့ မတ္တရာမြို့နယ် ပကဖတာဝန်ရှိသူတဦးက ပြောပါတယ်။

တိုက်ပွဲအတွင်း လက်နက်ကြီးလက်နက်ငယ်ကျည်ထိမှန်ပြီး မတ္တရာမြို့နယ်ပြည်သူ့ကာကွယ်ရေးအဖွဲ့မှ အသက် ၂၀ နဲ့ ၃၀ အရွယ်ရှိ တပ်ဖွဲ့ဝင် ၇ ဦးသေဆုံးကာ သေနတ် ၇ လက်ဆုံးရှုံးခဲ့ရပြီး နောက်ထပ် တပ်ဖွဲ့ဝင်း ၄ ဦးလည်း ဒဏ်ရာရရှိခဲ့တယ်လို့ ဆိုပါတယ်။

“ရဲဘော် ၇ ဦးကျဆုံးခဲ့တာ ဟုတ်ပါတယ်။ ရဲဘော်တွေရဲ့ဈာပနကိုတော့ ဘယ်ချိန်လုပ်တယ်ဆိုတာ ဖြေဆိုလို့မရပါဘူး”လို့ အထက်ပါတာဝန်ရှိသူက ပြောပါတယ်။

အထက်ပါစစ်ကော်မရှင်စစ်ကြောင်းဟာ ဇန်နဝါရီ ၄ ရက်က ရှိန်းမကားရွာစခန်းကနေ ကမ်းဖြူကျေးရွာကို ဝင်ရောက်ယာယီတပ်စွဲနေချိန်မှာလည်း ကျေးရွာကအမျိုးသမီး ၉ ဦးကို အဓမ္မပြုကျင့်ခဲ့တယ်လို့ သူကဆိုပါတယ်။

ကမ်းဖြူကျေးရွာဟာ အိမ်ခြေ ၁၀၀ ကျော်ရှိပြီး ဒေသခံတွေကတော့ စစ်ကော်မရှင်တပ်တွေဝင်ရောက်လာတဲ့ ဇန်နဝါရီ ၄ ရက်ကစလို့ တိမ်းရှောင်နေကြတယ်လို့ သိရပါတယ်။

စာတည်း – လင်း

■ ခဲယမ်းမလောက်လို့ နတ်တလင်းပျူစခန်းကို လက်လွှတ်ခဲ့ရ

ကျော်ကြီး၊ အောင်စိုး

ဇီးကုန်း၊ ဇန်နဝါရီ ၈၊ ၂၀၂၆ ။

ပဲခူးတိုင်းအနောက််ခြမ်း၊ ဇီးကုန်းနဲ့ နတ်တလင်းမြို့နယ်တွေမှာ စစ်ကော်မရှင်တပ်လက်အောက် ပျူစောထီးစခန်းတွေကို တိုက်ခိုက်ခံရပြီး စခန်း ၁ ခုကို စီးနင်းသိမ်းပိုက်နိုင်ခဲ့တယ်လို့ ဒေသကာကွယ်ရေးတပ်ဖွဲ့ဝင်တွေထံက သိရပါတယ်။

စစ်ကော်မရှင်ပူးပေါင်းအင်အား ၃၀ ခန့်ရှိတဲ့ ဇီးကုန်းမြို့နယ်၊ မီးကောက်ပင်ရွာရှိ ပျူစောထီးစခန်းကို ဇန်နဝါရီ ၇ ရက် ယမန်နေ့ မနက် ၅ နာရီခန့်မှာ တိုက်ခိုက်ခဲ့ပြီး တိုက်ပွဲ ၁ နာရီနီးပါးကြာ ဖြစ်ပွားခဲ့ပြီးနောက် စခန်းကို သိမ်းပိုက်နိုင်ခဲ့တယ်လို့ ဆိုပါတယ်။

” စခန်းက ရွာထိပ်မှာရှိတယ်။ အချို့က ရွာထဲနေအိမ်မှာနေတာရှိတယ်။ တိုက်ပွဲဖြစ်တော့ သူတို့ဘက်က ၁ နာရီလောက် တောင့်ခံပြီးပစ်သေးတယ်။ ပြီးမှ ဒဏ်ရာရသူတွေခေါ်ပြီး ဆုတ်သွားတာ” လို့ သာယာဝတီခရိုင် ၃၈၀၁ တပ်ရင်း၊ အမှတ် ၁ တပ်ခွဲမှူး ကရင်လေးက မြေလတ်အသံကို ပြောပါတယ်။

စစ်ကော်မရှင်တပ်ဖွဲ့တွေဆုတ်ခွာသွားတာကြောင့် ကျေးရွာစခန်းတွင်းဝင်ရောက်ကာ နယ်မြေရှင်းလင်းရာမှာ သေဆုံးစစ်ကော်မရှင်တပ်ဖွဲ့ဝင် အလောင်း ၄ လောင်း တွေ့ရှိရပြီး ပျူစောထီးစခန်းတဲတွေကို မီးရှို့ဖျက်ဆီးရှင်းလင်းခဲ့တယ်လို့ ဆိုပါတယ်။

မီးကောက်ပင်ကျေးရွာစခန်းက စစ်ကော်မရှင်တပ်ဖွဲ့တွေဟာ ကျေးရွာနဲ့မီတာ ၁၀၀ ကျော်အကွာရှိ ဘော်ဘင်ရွာပျုစောထီးစခန်းကို ဆုတ်ခွာသွားပြီးနောက် ဘော်ဘင်ရွာရှိ စစ်ကော်မရှင်နဲ့ပျူစောထီးအင်အား ၃၀ ကျော်နဲ့ပူးပေါင်းကာ စစ်ကြောင်းပြန်ထိုးလာလို့ ပြန်လည်ဆုတ်ခွာခဲ့တယ်လို့ သိရပါတယ်။

တိုက်ခိုက်မှုကိုတော့ သာယာဝတီခရိုင် တပ်ရင်း ၁၊ တပ်ခွဲ ၁ YOMA( GBK)၊ တပ်ခွဲ ၅၊ သာယာဝတီခရိုင်တပ်ရင်း ၂၊ တပ်ခွဲ ၁၊ BTZM(GBK)၊ သာယာဝတီခရိုင်ပကဖ၊ ဇီးကုန်းပကဖ၊ သာယာဝတီခရိုင်ဒရုန်းတပ်ဖွဲ့ဝင်တွေက လုပ်ဆောင်ခဲ့တာပါ။

အလားတူ ယမန်နေ့ မနက် ၄ နာရီကျော်မှာပဲ နတ်တလင်းမြို့နယ်၊ ပျဥ်ပုံရွာပျူစောထီးစခန်းကို PDF ပူးပေါင်းတပ်တွေက ဝင်ရောက်တိုက်ခိုက်ခဲ့ရာ ခဲယမ်းလုံလောက်မှုမရှိတာကြောင့် ပြန်ဆုတ်ခွာခဲ့ရတယ်လို့ ဒေသကာကွယ်ရေးတပ်ဖွဲ့ဝင်တွေက ပြောပါတယ်။

စစ်ကော်မရှင်တပ်နဲ့ ပျူစောထီးပူးပေါင်းအင်အား ၆၀ ခန့်ရှိတဲ့ ပျဉ်ပုံကျေးရွာအထိုင်စခန်းကို တိုက်ခိုက်မှုမှာ ၄ နာရီကြာတိုက်ပွဲတွေပြင်းထန်ခဲ့ပြီး စစ်တပ်က လေကြောင်းပစ်ကူဆက်တိုက်လုပ်ဆောင်ခဲ့တယ်လို့ ဆိုပါတယ်။

” (ပျဉ်ပုံရွာ) စခန်းကို မသိမ်းခဲ့ရဘူး။ ပြန်ဆုတ်လာခဲ့ရတယ်။ တိုက်ပွဲက မနက် ၄ နာရီကစတာ မနက် ၈ နာရီလောက်အထိကြာခဲ့တယ်။ စကစဖက်က လေယာဥ်ပစ်ကူက တောက်လျှောက်ပေးတာ။ ရဲဘော်တွေမှာလည်း ခဲယမ်းမလောက်တော့ ဆုတ်လာရတာ။”လို့ ​နတ်တလင်းဒေသခံတော်လှန်ရေး တပ်ဖွဲ့ဝင်တဦးက ပြောပါတယ်။

တိုက်ခိုက်ချိန်ကြာမြင့်လာတဲ့အလျောက် တပ်ဖွဲ့ဝင်တွေ့ရဲ့ ခဲယမ်းအင်အားနည်းပါးလာတာကြောင့် စခန်းကို သိမ်းပိုက်နိုင်တဲ့အထိ ဆက်လက်မတိုက်ခိုက်နိုင်ခဲ့တာလို့ သူက ဆိုပါတယ်။

တိုက်ပွဲတွေအတွင်း တော်လှန်ရေးပူးပေါင်းတပ်ဖွဲ့ဝင်တွေဘက်က အသက် ၂၀ ကျော်ရှိ PDF တပ်ဖွဲ့ဝင် ၁ ဦး စစ်ကော်မရှင်တပ်ရဲ့လက်နက်ကြီးဗုံးစထိမှန် သေဆုံးခဲ့ပြီး သူ့ရဲ့ရုပ်အလောင်းကို ဇန်နဝါရီ ၈ ရက်ဒီကနေ့ နေ့လယ်ပိုင်းမှာ မြေမြုပ်သင်္ဂြိုဟ်သွားမယ်လို့ သူက ဆိုပါတယ်။

ပျဉ်ပုံကျေးရွာစခန်းတိုက်ပွဲဖြစ်ပွားခဲ့ပြီးနောက် နတ်တလင်းမြို့ပေါ်ရှိ စစ်ကော်မရှင်တပ်သားတွေက အင်အား ၁၀၀ ကျော်နဲ့ အနီးတဝိုက်ကျေးရွာတွေကို စစ်ကြောင်းထိုးဝင်ရောက်နေတာကြောင့် ဒေသခံတွေ ထွက်ပြေးတိမ်းရှောင်နေကြရတယ်လို့ သိရပါတယ်။