တင်းကြပ်

ပဲခူး၊ မတ် ၃၀၊ ၂၀၂၃။

ပဲခူးတိုင်း၊ ပဲခူးမြို့ပေါ်က ရွှေမော်ဓောဘုရားပွဲမှာ အသံဗုံးပေါက်ကွဲပြီးနောက် ဘုရားပွဲလာတဲ့ ပြည်သူတွေကို စစ်ကောင်စီတပ်ဖွဲ့ဝင်တွေက စစ်ဆေးမှုတွေ ပိုမိုပြုလုပ်လာတယ်လို့ မြို့ခံတွေဆီက သိရပါတယ်။

မတ်လ ၂၈ ရက် ညနေ ၅ နာရီလောက်မှာ ရွှေမော်ဓောဘုရားပွဲဝန်းရှိ ကားကြီးကွင်းနားက စျေးဆိုင်တန်းတွေမှာ အသံဗုံးတလုံး ပေါက်ကွဲခဲ့ပြီးနောက် အဲ့ဒီညမှာပဲ ရဲတပ်သားတွေက လုံခြုံရေးချကာ စစ်ဆေးမှုတွေ ပြုလုပ်နေတာလို့ ပဲခူးမြို့ခံတဦးက ပြောပါတယ်။

“စစ်ဆေးရေးက ဘုရားဝန်းကျင် လေးဘက်လေးလံပဲ။ ရဲတွေက ကားနဲ့အပြည့်ပဲ။ ဝန်းထဲကို လွယ်လွယ်ဝင်လို့ မရတော့ဘူး။ အသံဗုံးပေါက်တဲ့နေ့မှာပဲ လမ်းတွေ ပိတ်ချလိုက်တယ်။ အဝင်လည်း စစ်တယ်။ အထွက်လည်း စစ်တယ်။ ဆိုင်ကယ်လိုင်စင်၊ ဖုန်းနဲ့ ခန္ဓာကိုယ် ကိုင်ပြီးလည်း စစ်တယ်” လို့ ဆိုပါတယ်။

ရွှေမော်ဓောဘုရားပွဲမှာ အခုလို စစ်ဆေးတာဟာ ပထမအကြိမ်ဖြစ်ပြီး၊ စွံပလွန်ကန်လမ်းအဝင်၊ ပဲခူး Tennis ကွင်းရှေ့၊ ဘုရားစျေးထိပ်၊ ကမ္ဘာလုံးဘုန်းကြီးကျောင်းဘေး လမ်းထိပ်နဲ့ ပုပ္ပါရုံကျောင်း‌မြောက်ဘက်မုဘ် စတဲ့နေရာတွေမှာ စစ်ဆေးနေတာလို့ အထက်ပါမြို့ခံက ပြောပါတယ်။

“အရင်ညတွေက ရဲ** တွေက အရပ်ဝတ်တွေနဲ့ ပွဲခင်းထဲမှာ စောင့်တယ်။ အသံဗုံးပေါက်တဲ့နေ့ကစပြီး အဲဒီဘုရားဝန်းကို သံဆူးကြိုးတွေနဲ့ ကာပေးလိုက်တယ်။ တချို့နေရာမှာဆိုရင် လူတယောက်စာပဲ ဖွင့်ထားတယ်။ အကုန်သံဆူးကြိုးတွေနဲ့ ကာလိုက်တယ်” လို့ ဆိုပါတယ်။

ဒါ့အပြင် ပြီးခဲ့တဲ့မတ်လ ၂၆ ရက်မှာလည်း ပွဲဝန်းထဲရှိ ပင်လယ်ဓားပြရဟတ်စင် ပြုတ်ကျခဲ့ရာ လူ ၁၀ ဦးထက်မနည်း ဒဏ်ရာရရှိခဲ့ပါသေးတယ်။

အဆိုပါဘုရားပွဲကို ပဲခူးစစ်ကောင်စီအဖွဲ့ဝင်တွေက ဦးဆောင်ကျင်းပနေတာဖြစ်ပြီး၊ မတ်လ ၂၀ ရက်ကနေ ဧပြီလ ၁၈ ရက်အထိ ကျင်းပသွားမှာလို့လည်း သိရပါတယ်။

စာတည်း – လင်း

ပဲခူး၊ မတ် ၄၊ ၂၀၂၂။

ပဲခူးတိုင်း၊ ပြည်မြို့မှာ အရင်ရက်တွေနဲ့မတူပဲ လုံခြုံရေး ပိုပြီးတင်းကြပ်နေတယ်လို့ ပြည်မြို့ခံတွေဆီက သိရပါတယ်။

ပုံမှန်ရက်‌တွေမှာ မနက်ပိုင်းမြို့ထဲမှာ စစ်ဆေးလေ့မရှိပဲ ဒီနေ့မှာ လမ်းတွေ ပိတ်ဆို့စစ်ဆေးတာတွေ လုပ်နေတာဖြစ်တယ်လို့ ဒေသခံတဦးက ပြောပါတယ်။

“စက်ဘီးသမားပါ မချန် အကုန်စစ်တာ ခါးတွေပါတွေ စမ်းတာ၊ စျေးရောင်းချိန်ဆိုတော့ အသွားအလာတွေ ကြန့်ကြာတာပေါ့” လို့ ပြောပါတယ်။

ပြည်မြို့ကို အာဏာသိမ်းစစ်ခေါင်းဆောင် လာမယ်ဆိုတဲ့ သတင်းကြောင့် ဌာနဆိုင်ရာတွေမှာ ပြင်ဆင်မှုတွေ လုပ်နေသလို ဗိုလ်ချုပ်လမ်းတလျှောက်ရေဆေးတာတွေလည်း ပြီးခဲ့တဲ့ရက်ပိုင်းက ပြုလုပ်ခဲ့ကြပါတယ်။

“လူစည်ကားတဲ့ ဗိုလ်ချုပ်လမ်း၊ ရန်ကုန်ပြည်လမ်း တလျှောက် လမ်းရေဆေးတာ၊ ယာဥ်လမ်းကြောသတ်မှတ်တဲ့မျဥ်းရေးဆွဲတာ၊ သန့်ရှင်းရေးအမှိုက်ကောက်၊ ဆေးသုတ်တာတွေ တွေ့ရတယ်” လို့ ဒေသခံတဦးက ပြောပါတယ်။

မတ်လ ၄ ရက် ဒီကနေ့ မနက်ပိုင်းမှာလည်း အာဏာသိမ်းခေါင်းဆောင်လာမဲ့အပေါ်မှာ Shadow Pyay Defense နဲ့ PUGN တို့ပေါင်းပြီး စစ်အာဏာရှင်ကို ဆန့်ကျင်တဲ့ စာသားတွေ ချိတ်ဆွဲပြီး ဆန္ဒထုတ်ဖော်ခဲ့ကြပါတယ်။

ဌာနဆိုင်ရာရုံးတွေနဲ့ မြို့ပြင်တွေမှာလည်း စစ်အင်အားအပြည့်နဲ့ စစ်ကောင်စီယာဉ်တန်းတွေ လှုပ်ရှားနေတာ‌တွေ ရှိတယ်လို့ ဒေသခံတွေဆီက သိရပါတယ်။