ညောင်ဦး၊ မတ် ၁၈၊ ၂၀၂၅။

မန္တလေးတိုင်း၊ ညောင်ဦးမြို့နယ်မှာ စစ်ကူသွားတဲ့ စစ်ကောင်စီတပ်ယာဥ်တန်း မတ် ၁၆ ရက် တမနက်တည်းမှာ မိုင်း ၂ ကြိမ်ဆွဲ တိုက်ခိုက်ခံရတာကြောင့် စစ်သား ၅ ဦးသေဆုံးခဲ့တယ်လို့ Bagan Bo Cho PDF ကပြောပါတယ်။

ညောင်ဦးမြို့အခြေစိုက် ခမရ – ၄၁၅ တပ်ရင်းကနေ စလင်းမြို့နယ်ဘက်ကို စစ်ကူသွားတဲ့ သံချပ်ကာကား ၂ စီးအပါအဝင် စစ်ကား ၄ စီးကို မနက် ၉ နာရီမှာ ပထမအကြိမ် ညောင်ဦး -ချောက်ကားလမ်းမတနေရာမှာ အသင့်ထောင်ထားတဲ့ပဒေသာ မိုင်း ၁ လုံးနဲ့ တိုက်ခိုက်ခဲ့တာလို့ ဆိုပါ တယ်။

“ပထမတကြိမ်ဆွဲတဲ့အခါ စကစ ၁ ကောင်သေတာကို မျက်မြင်တွေ့ခဲ့တယ်။ ရှေ့ပြေးသံချပ်ကာကား ၁ စီးလည်း သံဘောင်တွေကျွတ်ထွက်ပြီး နောက်ကိုလှန်သွားတယ်။ အပြန်အလှန်ပစ်ခတ်မှုမဖြစ်ခဲ့”လို့ Bagan Bo Cho PDF မှပြန်ကြားရေးတာဝန်ခံကပြောပါတယ်။

မိုင်းဆွဲခံရတဲ့ စစ်ကောင်စီတပ်သားတွေဟာ ပျက်စီးသွားတဲ့ သံချပ်ကာကား ၁ စီးကိုထားကာ ညောင်ဦးမြို့နယ်၊ စဉ့်ကူနယ်မြေရဲစခန်းကို သွားရောက်ခဲ့ပြီးနောက် အဲဒီရဲစခန်းကနေ ဒဏ်ရာရတဲ့ တပ်သားတွေကို ဆေးကုသဖို့ ဖောကား ၄ စီးနဲ့ ညောင်ဦးမြို့ပေါ်ကိုပြန်လည်ထွက်ခွာလာချိန် ၉ နာရီခွဲမှာ ဒုတိယအကြိမ် မိုင်းဆွဲခဲ့တာလို့ ဆိုပါတယ်။

“ဒုတိယတချီဆွဲတာမှာ ၄ ကောင်သေတယ်။ ၁ ကောင်ဆိုရင် ခေါင်းပြတ်ပြီးတော့ မျက်လုံးမှာ ကျွတ်ထွက်သွားတယ်လို့ ဖရဲသီး (စစ်တပ်သတင်းပေး) ကအတည်ပြုပြောတာ။ ဒဏ်ရာရလည်း တော်တော်များတယ်တဲ့”လို့ ပြန်ကြားရေးတာဝန်ခံက ပြောပါတယ်။

ပထမတကြိမ်မိုင်းဆွဲတိုက်ခိုက်ခံရချိန်မှာ သံချပ်ကာကားပေါ်မှာပါလာတဲ့ ပွိုင့်ဖိုက်သေနတ်တွေနဲ့ စစ်ကောင်စီတပ်သားတွေက စဉ့်ကူနယ်မြေရဲစခန်းကို ရောက်တဲ့အထိ တောက်လျောက် ပစ်ခတ်ခဲ့ပေမယ့် ဒုတိယတကြိမ်မိုင်းဆွဲခံရချိန်မှာတော့ ပြန်လည်ပစ်ခတ်တာ မရှိခဲ့ဘူးလို့ သူကဆိုပါတယ်။

မိုင်းဆွဲခံရတဲ့ စစ်အုပ်စုဟာ ဒဏ်ရာရတပ်သားတွေကို ညောင်ဦးမြို့နယ်ဘက်ဆီ ပြန်သယ်ချိန်အတွင်းမှာဘဲ ရှေ့မှာကျန်ခဲ့တဲ့စစ်ကောင်စီတပ်သားတွေက မိုင်းထိပျက်စီးသွားတဲ့ သံချပ်ကာ စစ်ကား ၁ စီးကို ပြန်လည်ပြုပြင်ပြီး နေ့လယ် ၃ နာရီကျော်မှာ စလင်းမြို့နယ်ဘက်ကို ဆက်လက် စစ်ကူ ထွက်သွားခဲ့တယ်လို့ အထက်ပါတာဝန်ခံက ဆက်ပြောပါတယ်။

အဆိုပါ တိုက်ခိုက်မှုကို Bagan Bo Cho PDF နဲ့ မဟာမိတ်တပ်တွေက ပူးပေါင်းတိုက်ခိုက်ခဲ့တာဖြစ်ပြီး တော်လှန်ရေးတပ်ဖွဲ့ဝင်တွေအနေနဲ့ အထိအခိုက်မရှိ ပြန်လည် ဆုတ်ခွာနိုင်ခဲ့တယ်လို့သိရပါတယ်။

စာတည်း – လင်း

‌ညောင်ဦး၊ မတ် ၁၀၊ ၂၀၂၅။

မန္တလေးတိုင်း၊ ညောင်ဦးမြို့နယ်မှာ ယာခင်းအတွင်းအသတ်ခံထားရတဲ့ စစ်ကောင်စီလက်အောက်အထွေထွေအုပ်ချုပ်ရေးဌာနစာရေးနဲ့ ဇနီးဖြစ်သူတို့ ရုပ်အလောင်းတွေ တွေ့ရှိခဲ့တယ်လို့ ဒေသခံတွေထံက သိရပါတယ်။

အသတ်ခံရသူတွေမှာ တောပြားကျေးရွာနေ ငါ့သရောက်မြို့ထွေအုပ်ရုံးစာရေး အသက် ၄၉ နှစ်အရွယ် ဦးသန်းလှိုင်နဲ့ ဇနီးဖြစ်သူ အသက် ၄၅ နှစ်အရွယ် ဒေါ်ခင်မမတို့ဖြစ်ပြီး ၎င်းတို့ရုပ်အလောင်းတွေကို တောပြားကျေးရွာအနီးယာခင်းအတွင်း မတ် ၉ ရက် မနက် ၁၀ နာရီကျော်မှာ ဒေသခံတွေက တွေ့ရှိခဲ့တာလို့ ဆိုပါတယ်။

“သူတို့အလောင်းကို ယာခင်းထဲသွားသူတွေက တွေ့ခဲ့တာ။ လင်မယား ၂ ယောက်စလုံးထိုးသွင်းဒဏ်ရာတွေနဲ့ သေဆုံးနေတာ။ သေတာက ညကတည်းက သေထားတဲ့ပုံစံရှိတယ်။”လို့ ညောင်ဦးဒေသခံတဦးက မြေလတ်အသံကို ပြောပါတယ်။

သေဆုံးသူတွေဟာ လည်ပင်းနဲ့ရင်ဘတ်တွေမှာ ထိုးသွင်းဒဏ်ရာတွေနဲ့သေဆုံးနေတာဖြစ်ပြီး ရုပ်အလောင်းတွေကိုတော့ ဒေသခံတွေက ညောင်ဦးပြည်သူ့ဆေးရုံကို ပို့ဆောင်ပေးခဲ့ရတယ်လို့ သိရပါတယ်။

ပြီးခဲ့တဲ့ မတ် ၆ ရက် ညနေပိုင်းကလည်း ညောင်ဦးမြို့နယ်၊ သူကောင်းတည်ကျွန်းကျေးရွာမှာ နေအိမ်မှာရှိနေတဲ့ အုပ်ချုပ်ရေးမှူးသားအဖ သေနတ်နဲ့ပစ်ခံရလို့ အုပ်ချုပ်ရေးမှူးသေဆုံးပြီး သားဖြစ်သူ ဒဏ်ရာရမှု ဖြစ်ပွားခဲ့ပါသေးတယ်။

စာတည်း – ဟိန်းစံ

■ အကြောင်းကြားခံရတဲ့ လူငယ်တွေကို မတ်လအတွင်းခေါ်မှာဖြစ်ပြီး ခရီးသွားခွင့်ပိတ်

မန္တလေး၊ မတ် ၂၊ ၂၀၂၅။

မန္တလေးတိုင်း၊ ညောင်ဦးမြို့နယ်နဲ့ ပုဂံမြို့နယ်အစပ်က မြင်းကပါရွာမှာ လူငယ် ၆၀ ခန့် စစ်ကောင်စီတပ်ထဲမှာ စစ်မှုထမ်းဖို့ စာရင်းပါဝင်အကြောင်း စာပို့ခံခဲ့ရတယ်လို့ ဒေသခံတွေဆီက သိရပါတယ်

မတ် ၁ ရက် မနေ့ မနက်ပိုင်းမှာ စစ်ကောင်စီတပ်ဖွဲ့ဝင်တွေနဲ့ စစ်ကောင်စီလက်အောက်ခံဝန်ထမ်းတွေက အကြောင်းကြားစာ လိုက်ပို့နေတာဖြစ်ပြီး စာရင်းမှာ ပါဝင်တဲ့လူငယ်တွေကို ခရီးသွားလာခွင့်လည်းပိတ်ထားကာ မတ်လအတွင်းမှာပဲ စစ်မှုထမ်းဖို့ခေါ်ဆောင်မှာဖြစ်တယ်လို့ ဆိုပါတယ်။

“စစ်မှုထမ်း စာရင်းပါတယ်၊ ဘယ်မှထွက်လို့ မရဘူး၊ ခရီးသွားလို့ မရဘူး၊ ပြည်ပလည်း ထွက်လို့မရဘူး ဆိုတဲ့ဟာမျိုးပေါ့။ တကယ်လို့မှ ထွက်ရင် လေယာဉ်ကွင်းကနေ ဖမ်းမယ်တို့ပါ ပြောသွားတယ်။ သူတို့(စာ)သွားပို့တဲ့အိမ်က လူက ပြည်ပရောက်နေတယ်ဆိုလည်း ပြန်ခေါ်ပေးပေါ့။ တကယ်လို့ ပြန်မလာဘူးဆို အိမ်မှာရှိတဲ့သူကို ခေါ်မယ်လို့ ပြောတယ်၊ ယောကျ်ားလေး ၂ယောက်ရှိတဲ့ အိမ်မျိုးတွေ ပါတာများတယ်။”လို့ ညောင်ဦးဒေသခံ အမျိုးသားတဦးက ပြောပါတယ်။

ပြည်သူ့ဒီမိုကရက်တစ်တပ်တော် PDA ကလည်း စစ်ဆင်ရေးတခုအတွင်း စစ်ကောင်စီတပ်ဖွဲ့ဝင်တွေဆီကရရှိခဲ့တဲ့ စစ်မှုထမ်းဖို့ အသက်အရွယ်ပြည့်မီသူ လူငယ် ၇၀၀ ကျော်ရဲ့ အချက်လက်တွေကို ဖေဖော်ဝါရီ ၂၈ ရက်က ထုတ်ပြန်ပေးခဲ့ပြီး စာရင်းမှာပါဝင်တဲ့ ပြည်သူတွေအနေနဲ့ နီးစပ်ရာ တော်လှန်ရေးတပ်ဖွဲ့တွေကို ဆက်သွယ်ကာ ရှောင်ရှားကြဖို့လည်း တိုက်တွန်းထားပါတယ်။

အဆိုပါ စာရင်းတွေထဲမှာ ညောင်ဦးမြို့၊ အမှတ် ၃ နယ်မြေမှာရှိတဲ့ စိုက်ပျိုးရေး၊ ငှက်ပစ်တောင်၊ အောင်သဒ္ဓိ၊ ကံသာယာ၊ ဇေယျဝတီ၊ အောင်ဇေယျ၊ ပြည်တော်အေး၊ အောင်မင်္ဂလာ၊ အောင်သပြေ၊ မြို့မကွက်သစ် စတဲ့ရပ်ကွက်တွေမှာနေထိုင်တဲ့ အသက် ၁၈ နှစ်ကနေ ၃၅ နှစ်ကြား လူငယ်တွေရဲ့ အသေးစိတ်အချက်အလက်တွေ ပါဝင်ပါတယ်။

ညောင်ဦးဒေသခံတဦးကတော့ အဆိုပါ စာရင်းတွေဟာ စစ်ကောင်စီတပ်ဖွဲ့ဝင်တွေက စစ်မှုထမ်းခေါ်ဆောင်ဖို့အတွက် အသက်ပြည့်မီသူတွေကို စာရင်းပြုစုထားတာ ဖြစ်နိုင်တယ်လို့ ဆိုပါတယ်။

“ဒီလူတွေ အကုန်လုံးကို ခေါ်မယ့်စာရင်းတော့ မဟုတ်လောက်ဘူး။ ဘာဖြစ်လို့လဲဆို ရပ်ကွက်ထဲမှာ ရှိသမျှလူတွေရဲ့ အသက်မီသူတွေရဲ့ နာမည်တွေ အကုန်ပါတယ်၊ ရှိသမျှလူငယ် အကုန်ပါတယ်။”လို့ ပြောပါတယ်။

ပြီးခဲ့တဲ့ ၂၀၂၄ ဒီဇင်ဘာ ၁၁ ရက်ကလည်း စစ်ကောင်စီတပ်ဖွဲ့ဝင်တွေက ညောင်ဦးမြို့၊ ကျောက်ပြင်ကန်ကျေးရွာနဲ့ ကြအူကျေးရွာက အမျိုးသား ၁၁ ဦးကို စစ်မှုထမ်းဖို့အတွက်ဆိုပြီး နေအိမ်ထဲထိ ဝင်ရောက်ဖမ်းဆီးခဲ့ကာ နောက်တနေ့မှာတော့ အထက်တန်းကျောင်းသား ၃ ဦးနဲ့ အသက်ကြီးပိုင်းအမျိုးသား ၁ ဦးကို ပြန်လွှတ်ပေးခဲ့တယ်လို့ သိရပါတယ်။

ညောင်ဦး၊ ဖေဖော်ဝါရီ ၂၆၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ မြောင်ကျေးရွာက ရှင်ပြုအလှူပွဲကို စစ်ကောင်စီတပ်ဖွဲ့ဝင်တွေက ဝင်ရောက်စီးနင်းခဲ့ပြီး ရွာခံ ၁၀ ဦးကို ဖမ်းဆီးသွားတယ်လို့ ကျေးရွာနဲ့နီးစပ်သူတဦးဆီက သိရပါတယ်။

ဖေဖော်ဝါရီ ၂၅ ရက်မနက် ၈ နာရီခန့်မှာ ညောင်ဦးမြို့ဘက်ကနေ အင်အား ၅၀ ခန့်ပါတဲ့ စစ်ကောင်စီတပ်ဖွဲ့ဝင်တွေက မြောင်ကျေးရွာမှာပြုလုပ်နေတဲ့ ရှင်ပြုအလှူပွဲကိုရောက်လာပြီး အလှူရှင်တွေအပါအဝင် ရွာခံ ၁၀ ဦးကျော်ကို ကျေးရွာဘုန်းကြီးကျောင်းထဲကို ဖမ်းခေါ်သွားခဲ့တယ်လို့ ဆိုပါတယ်။

“သူတို့(စကစ)ရောက်တဲ့အချိန် အလှူမှာက တရားနာနေချိန်။ တရားနာနေတဲ့သူကော ဘုန်းကြီးတွေကော ဘုန်းကြီးကျောင်းထဲ ခေါ်သွားတယ်။ တရားပွဲတောင်မပြီးသေးဘူး။ အချို့လည်း ထွက်ပြေးကြတယ်။ အချို့လည်းပါသွားတယ်။ ၁၂ ဦးလောက်ပါသွားတာ။ “လို့ ကျေးရွာနဲ့နီးစပ်သူတဦးက ပြောပါတယ်။

စစ်ကောင်စီအဖွဲ့ဟာ အလှူရှင်လင်မယားဖြစ်တဲ့ ဦးပေါ်လာနဲ့ ဒေါ်ယဉ်မင်းသူတို့အပါအဝင် အလှူရှင်နဲ့ ပတ်သက်တဲ့ ဆွေမျိုး အမျိုးသား ၁၀ ဦးကို ဘုန်းကြီးကျောင်းထဲဖမ်းခေါ်သွားပြီးနောက် ၁ နာရီခန့်အကြာမှာတော့ အလှူရှင်လင်မယားကို ပြန်လွှတ်ပေးခဲ့တယ်လို့ ဆိုပါတယ်။

အဲဒီနောက်မှာ အသက် ၃၈ နှစ်အရွယ် ဦးဇော်ဦး၊ အသက် ၄၀ အရွယ် ဦးညိုဝင်း၊ အသက် ၄၇ နှစ်အရွယ် ဦးမြင့်ကြိုင် အပါအဝင် အမျိုးသား ၁၀ ဦးကို ခေါ်ဆောင်ပြီး ညောင်ဦးဘက်ကို ပြန်ထွက်သွားတယ်လို့ ဆိုပါတယ်။

စစ်ကောင်စီအဖွဲ့ဝင်တွေဟာ ကျေးရွာထဲကိုဝင်လာချိန်ကတည်းက သေနတ်တွေပစ်ဖောက် ဝင်ရောက်လာတာဖြစ်ပြီး ရွာခံတွေကို ဘာအကြောင်းကြောင့် ဖမ်းဆီးသွားတယ်ဆိုတာတော့ မသိရသေးဘူးလို့ ကျေးရွာနဲ့နီးစပ်သူတဦးက ပြောပါတယ်။

ဖမ်းဆီးခံရသူတွေက PDF တွေနဲ့ပတ်သက်သူတွေမဟုတ်ဘဲ သာမန်ရွာသားတွေဖြစ်ကာ ဖေဖော်ဝါရီ ၂၆ ရက် ဒီမနက်ပိုင်းထိတော့ ပြန်လွတ်လာတာမရှိသေးဘူးလို့ သိရပါတယ်။

ပြီးခဲ့တဲ့နှစ် ဒီဇင်ဘာ ၁၁ ရက်ကလည်း ညောင်ဦးမြို့နယ်၊ ကျောက်ပြင်ကန်နဲ့ ကြအူကျေးရွာတွေက ဒေသခံ အမျိုးသား ၁၁ ဦးကို စစ်ကောင်စီအဖွဲ့ဝင်တွေက နေအိမ်တွေပေါ်ထိတက်ဖမ်းပြီး စစ်မှုထမ်းအတွက် ခေါ်ဆောင်သွားတယ်လို့လည်း ဒေသခံတွေဆီကသိရပါတယ်။

စာတည်း – လင်း

မန္တလေး၊ ဖေဖော်ဝါရီ ၁၈၊ ၂၀၂၅။

မန္တလေးတိုင်း၊ ညောင်ဦးမြို့၊ အမှတ်(၇) ဝက်ကြီးအင်းရပ်ကွက်၊ အလိုတော်ပြည့်ဘုရားအနီး၊ အနော်ရထာလမ်းမကြီးပေါ်မှာ ကင်းပတ်နေတဲ့ရဲတွေ ပစ်ခတ်ခံရပြီး ၂ ဦးသေဆုံးသွားတယ်လို့ ဖြစ်စဥ်ကိုသိထားတဲ့ ဒေသခံတွေထံက သိရပါတယ်။

ဖေဖော်ဝါရီ ၁၈ ရက်နေ့မနက် ၉ နာရီကျော်ခန့်မှာ ညောင်ဦးနယ်မြေရဲစခန်းက ဒုရဲအုပ် ၁ ဦးအပါအဝင် ယူနီဖောင်းဝတ် ရဲ ၃ ဦးဟာ ဆိုင်ကယ်တွေနဲ့ကင်းပတ်နေစဥ် အလိုတော်ပြည့်ဘုရားအနီးအရောက် လက်နက်ကိုင်အဖွဲ့တခုက ကားပေါ်ကနေ သေနတ်တွေနဲ့ဝိုင်းပစ်သွားတယ်လို့ ဆိုပါတယ်။

“တော်လှန်ရေးအဖွဲ့တွေက အဲနားကနေစောင့်နေပြီးတော့ သူတို့ကင်းပတ်နေကျတာကို ပစ်သွားတာ။ ရဲနှစ်ယောက်ကျတယ်လို့ကြားတယ်။ ညောင်ဦးစခန်းကရဲတွေပါ။ သူတို့ပုံမှန်ကင်းပတ်နေကျအချိန်မှာ PDF တွေကချောင်းပစ်သွားတာပါ။ “လို့ ဖြစ်စဥ်ကိုသိထားတဲ့ ဒေသခံတဦးကပြောပါတယ်။

သေနတ်သမားတွေရဲ့ပစ်ခတ်တာကိုခံရလို့ ညောင်ဦးနယ်မြေရဲစခန်းက ရဲတပ်ကြပ် ခင်မောင်မြင့်နဲ့ ရဲတပ်သား ရီဝေဦးတို့မှာ နေရာမှာပင်သေဆုံးသွားပြီး ဒုရဲအုပ်တဦးကတော့ လွတ်မြောက်သွားတယ်လို့ သိရပါတယ်။

ကင်းပတ်နေတဲ့ရဲတွေကို ပစ်ခတ်ခဲ့တဲ့အဖွဲ့ဟာ ဘယ်အဖွဲ့ကဆိုတာ မသိရသေးဘဲ ဒေသကာကွယ်ရေးတပ်ဖွဲ့တွေကလည်း သတင်းထုတ်ပြန်ထားတာမျိုး မရှိသေးပါဘူး။

ရဲတွေပစ်ခတ်ခံရပြီးနောက် စစ်ကောင်စီတပ်ဖွဲ့ဘက်က မြို့ဝင်မြို့ထွက်တွေပိတ်ပြီး စစ်ဆေးရှာဖွေတာတွေ ပြုလုပ်နေတယ်လို့ဆိုပါတယ်။

စာတည်း – ကိုချမ်း