ဆင်ဖြူကျွန်း၊ ဇန်နဝါရီ ၁၄၊ ၂၀၂၆။
မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့မှာ ဆောင်းသီးနှံတွေ ရိတ်သိမ်းချိန်ရောက်ရှိလာပေမယ့် တိုက်ပွဲတွေနဲ့လက်နက်ကြီးပစ်ခတ်မှုတွေကြောင့် မရိတ်သိမ်းနိုင်လို့ တောင်သူတွေဆုံးရှုံးမှုများပြားတယ်လို့ ဆင်ဖြူကျွန်းမြို့ခံတွေဆီက သိရပါတယ်။
ဆင်ဖြူကျွန်းမှာ လက်ရှိအထိ စစ်ရေးတင်းမာနေသေးပြီး စစ်ကော်မရှင်တပ်က လက်နက်ကြီး၊ လက်နက်ငယ်တွေနဲ့ နေ့စဥ်ပစ်ခတ်နေတာတွေ၊ နှစ်ဖက်ထိတွေ့ပစ်ခတ်မှုတွေကြောင့် စလင်းချောင်းတလျှောက်စိုက်ပျိုးထားတဲ့ ပန်းမုန်လာ၊ ဂေါ်ဖီထုပ်နဲ့ ပြောင်းဖူးစတဲ့သီးနှံတွေ မရိတ်သိမ်းနိုင်တော့တာလို့ ဆိုပါတယ်။
” အခုအချိန်က သိမ်းရမဲ့အချိန်ဖြစ်နေပြီ၊ အဲ့ဒီအတိုင်း ထားခဲ့ရတာ။ ဘာမှကို မသိမ်းလိုက်ရဘူး၊ မသိမ်းနိုင်တာက တဖက်နဲ့တဖက် ပစ်တာကြောင့်ပါ။ အခင်းထဲ လူရိပ်တွေ့ရင်ကို စစ်တပ်က သေနတ်နဲ့လှမ်းပစ်တာ။ မသိမ်းနိုင်တော့ ပုပ်ပြီး ရိသွားတာပေါ့၊ တချို့ကျလည်း အနှံတွေထွက်သွားတာ၊ ရင်းနှီးထားတာမနည်းဘူး” လို့ ဆင်ဖြူကျွန်းတောင်သူတဦးက မြေလတ်အသံကိို ပြောပါတယ်။
စလင်းချောင်းတလျှောက် ညောင်အင်း၊ ချောင်းကောက်ကလေး၊ ချောင်းကောက်ကြီး၊ နတ်စင်၊ မြောင်းဘောင်၊ နွယ်တမယ်၊ ရှမ်းကုန်း၊ ကြက်ဆူး၊ ငှက်ပျောတော၊ ပန်းတော စတဲ့ကျေးရွာတောင်သူတွေက အထက်ပါသီးနှံတွေကို ဧက ၁၀၀ ဝန်းကျင်စိုက်ပျိုးထားတာဖြစ်ပြီး ၁ ဧကအတွက် ဆုံးရှုံးမှုဟာ ကျပ်သိန်း ၅၀ ဝန်းကျင်ရှိတာကြောင့် ပျမ်းမျှကျပ်သိန်း ၅,၀၀၀ ခန့်ဆုံးရှုံးမှုရှိနိုင်တယ်လို့ သူက ခန့်မှန်းပါတယ်။
” ၁ ဧက ကို အရင်းအနှီးက သိန်း ၂၅ လောက်ရှိတယ်။ ၁ ဧက ဆိုရင် သိန်း ၅၀ နီးနီးရတယ်၊ ပန်းမုန်လာ အကြီးဆုံးပွင့်ဆိုရင် ၂၅၀၀ ကျပ်ရောင်းရတယ်၊ အလတ်ဆိုရင် ၁၅၀၀ ကျပ်၊ အငယ်ဆို ၁၀၀၀ ကျပ်ရောင်းရတယ်။ ဂေါ်ဖီထုပ်ကျလည်း ဈေးက သိပ်မကွာဘူးအတူတူပဲ။ ပြောင်းဖူးကြီးရင် ၇၀၀ ကျပ် ငယ်ရင် ၅၀၀ ကျပ် ရောင်းရတယ်။ ပန်းမုန်လာနဲ့ ဂေါ်ဖီထုပ်က ၁ ဧက ကို အပင် ၁ သောင်းခွဲ ၂ သောင်းလောက်ထိ ထွက်တယ်။ တချို့ကျ ၁ ဧကထဲစိုက်တာ မဟုတ်ဖူး၊ ပြောင်းဖူးကော၊ ပန်းမုန်လာကော ဂေါ်ဖီထုပ်ကောစိုက်ကြတာ” လို့ သူက ရှင်းပြပါတယ်။
ပြီးခဲ့တဲ့ဒီဇင်ဘာ ၂၃ ရက်က စတင်ခဲ့တဲ့ တိုက်ပွဲတွေကြောင့် ဆင်ဖြူကျွန်းမြို့လုံးကျွတ်နီးပါး နေရပ်စွန့်ခွာထွက်ပြေးနေရပြီး လက်ရှိမှာတိုက်ပွဲတွေငြိမ်သက်နေပေမယ့် စလင်းချောင်းတလျှောက်ကျေးရွာတွေကို စစ်ကော်မရှင်တပ်က လက်နက်ကြီး၊ လက်နက်ငယ်တွေနဲ့ နေ့စဥ်ပစ်ခတ်နေတာလို့ ဒေသခံတွေက ပြောပါတယ်။
ဆင်ဖြူကျွန်းဒေသ စလင်းချောင်းတလျှောက်မှာ ဆောင်းသီးနှံအဖြစ် ပန်းမုန်လာ၊ ဂေါ်ဖီထုပ်၊ ပြောင်းဖူးတွေကို အောက်တိုဘာလမှာ စတင်စိုက်ပျိုးခဲ့တာဖြစ်ပြီး ဇန်နဝါရီလမှာ ရိတ်သိမ်းရမှာဖြစ်ပေမယ့် တိုက်ပွဲတွေကြောင့် ဒေသခံတွေနဲ့တောင်သူတွေ နေရပ်စွန့်ခွာထွက်ပြေးနေရလို့ မရိတ်သိမ်းနိုင်သေးတာပါ။
” တောထဲမှာနေရတာဆိုတော့ ဘယ်အဆင်ပြေမှာတုန်း၊ တချိန်က ကျနော်တို့ရင်းနှီးထားတာတွေက အကုန်လုံးဆုံးရှုံးသွားပြီလေ ဘာမှမကျန်တော့ဘူး။ တိုက်ပွဲငြိမ်သွားလို့ ပြန်စိုက်မယ်ဆိုရင် တော်တော်ကြိုးစားယူရမှာပါ၊ သီးနှံတခုစိုက်ပြီးဆိုရင် ရင်းလိုက်၊ ရလာတဲ့ အမြတ်စားလိုက်လုပ်ရတာ” လို့ သူက ဆက်ပြောပါတယ်။
ဆောင်းသီးနှံအဖြစ် စျေးကောင်းရရှိတဲ့သီးနှံတွေကို ရွေးချယ်စိုက်ပျိုးကြတာဖြစ်ပြီး အားလူး၊ ကြက်သွန်နီ၊ ကြက်သွန်ဖြူတို့ကိုလည်း စိုက်ပျိုးလေ့ရှိတယ်လို့ ဒေသခံတောင်သူတွေဆီက သိရပါတယ်။
