စစ်ကောင်စီ

မြေလတ်အသံ၊ ဇွန် ၃၀၊ ၂၀၂၂။

ချင်းပြည်နယ်၊ ပလက်ဝမြို့၊ မြို့မရပ်ကွက်မှ ဖမ်ဆီးထားသည့် အရပ်သား ၂ ဦးကို စစ်ကောင်စီက ဇွန်လ ၂၉ ရက်နေ့တွင် မြို့နယ်တရားရုံး၌ ရာဇသတ်ကြီးပုဒ်မ ၅၀၅(က) ဖြင့် အမှုဖွင့်တရားစွဲဆိုလိုက်သည်ဟု မိသားစုဝင်များက ပြောသည်။

တရားစွဲဆိုခံလိုက်ရသူ ၂ ဦးမှာ ဦးမဲကျော့နှင့် ဦးမောင်ဝင်းတို့ဖြစ်ကြပြီး ၎င်းတို့ကို ပလက်ဝအခြေစိုက် ခလရ ၂၈၉ တပ်ရင်းတွင် ရက်ပေါင်း ၂၈ ရက်ကြာ မိသားစုများနှင့် အဆက်အသွယ်ဖြတ်တောက်ကာ စစ်ဆေးမေးမြန်းမှု ခံယူရပြီးနောက် ယခုလိုတရားစွဲခံလိုက်ရခြင်းဖြစ်သည်ဟု ဦးမောင်ဝင်း၏ ဆွေမျိုးတဦးက ပြောသည်။

“စစ်သားဖက်က ဘယ်သူစွဲတာလဲဆိုတာကိုတော့ မသိရသေးဘူး။ လာမယ့် ဇူလိုင်လ ၁၆ ရက်နေ့ကို ရုံးချိန်းလိုက်ပါတယ်။ ဒီလို ထောင်ဒဏ်အများကြီး ချမှတ်နိုင်တဲ့ ပုဒ်မတွေနဲ့ တရားစွဲလိုက်တဲ့အပေါ်မှာတော့ ဝမ်းနည်းရတာကလွဲရင် ဘာမှမပြောတတ်တော့ပါဘူး။ အပြစ်မရှိတဲ့သူတွေကို ဒီလိုလုပ်တာဟာ လုံးဝမတရားပါဘူး” ဟု သူကဆိုသည်။

ဦးမဲကျော့မှာ ပြီးခဲ့သည့် ဇွန်လ ၄ ရက်နေ့ ည ၉ နာရီကျော်အချိန်ခန့်တွင် ၂၈၉ တပ်ရင်းမှ အရာရှိတဦးက နေအိမ်အတွင်းသို့ဝင်ရောက်လာကာ ဖမ်းဆီးသွားခြင်းဖြစ်ပြီး၊ ဦးမောင်ဝင်းကိုလည်း အင်အား ၂၀ ခန့်ရှိသည့် စစ်ကောင်စီ တပ်သားများက နေအိမ်မှဖမ်းဆီးသွားခြင်းဖြစ်သည်။

ဥပဒေပြဌာန်းချက်အရ ၅၀၅(က)မှာ ပြည်ထောင်စုအစိုးရ၏ ကြည်း၊ရေ၊လေ တပ်တခုခုမှ အရာရှိအား သို့တည်းမဟုတ် တပ်သားများအား စစ်ပုန်ကန်ခြင်းကိုသော်လည်းကောင်း အကြောင်းရှိလျှင် ထိုသူကို ထောင်ဒဏ် တမျိုးမျိုးဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်နိုင်ကြောင်း ပါရှိသည်။

ပဲခူး၊ ဇွန် ၂၉၊ ၂၀၂၂။

ပဲခူးတိုင်း(အနောက်ခြမ်း)၊ သာယာဝတီခရိုင်၊ လက်ပံတန်းမြို့၊ ဖြူစင်လူငယ်ပရဟိတအသင်းဥက္ကဌ ကိုဝင်းမင်းစိုး ဇွန်လ ၂၈ ရက်မနေ့က ထောင်ဒဏ် ၁၀ နှစ်ချမှတ်ခံခဲ့ရတယ်လို့ သူနဲ့နီးစပ်တဲ့သူတွေဆီက သိရပါတယ်။

ပြီးခဲ့တဲ့နှစ် အောက်တိုဘာလ ၃၁ ရက်နေ့က လက်ပံတန်းမြို့ပေါ်ကြံ့ခိုင်ရေးရုံးအပါအဝင် နေရာအများအပြားမှာ ဗုံးပေါက်ကွဲတာနဲ့ပတ်သက်ပြီး သူအပါ အဝင် ၂ ဦးကို PDF နဲ့ ပတ်သတ်တယ်ဆိုပြီး စွပ်စွဲဖမ်းဆီးခဲ့ရာကနေ သူ့ကိုသာယာဝတီထောင်တွင်းတရားရုံးက အခုလို ထောင် ၁၀ နှစ်ချမှတ်ခဲ့တာပါ။

“လက်ပံတန်းမှာဗုံးကွဲတာတွေနဲ့ပတ်သက်ပြီး PDF နဲ့ပတ်သက်တယ်ဆိုပြီး စွပ်စွဲပြီး ဖမ်းသွားတာ။ ကျနော်တို့သိသလောက်ကတော့ ဒီဗုံးကွဲတာတွေနဲ့ သူနဲ့ဘာမှမပတ်သက်ဘူး။ ဒလန်က ဖမ်းခိုင်းတာနဲ့ဖမ်းသွားတာ။ မနေ့ကထောင်တရာရုံးမှာဘဲ အကြမ်းဖက်ပုဒ်မနဲ့ ဆယ်နှစ်ချလိုက်တယ်ဆိုတာသိရတယ်” လို့ သူနဲ့နီးစပ်သူဒေသ ခံတဦးကမြေလတ်အသံကို ပြောပါတယ်။

ကိုဝင်းမင်းစိုးဟာ လက်ပံတန်းမြို့ပေါ် ပရဟိတလုပ်ငန်းတွေမှာ တက်ကြွစွာဆောင်ရွက်တဲ့သူဖြစ်ပြီးတော့ ပြီးခဲ့တဲ့နှစ် ဇွန်လ အခုလိုအချိန် လက်ပံတန်းမြို့မှာ ကိုဗစ်တတိယလှိုင်းပြင်းထန်ခဲ့စဥ်ကလည်း စစ်ကောင်စီက ဘာမှထောက်ပံ့ပေးမှုမရှိတာတောင် ဗော်လန်တီယာလုပ်ပြီး ပရဟိတအလုပ်တွေကို အားထည့်လုပ်ဆောင်သူဖြစ်တယ်လို့ ဒေသခံတွေက ပြောပါတယ်။

စစ်အာဏာသိမ်းပြီးတဲ့နောက်မှာ စစ်ကောင်စီတပ်က သူတို့ကိုဆန့်ကျင်တယ်လို့ ယူဆသူတွေကို PDF နဲ့ ပတ်သက်တယ်လို့စွပ်စွဲဖမ်းဆီးကာ အမြင့်ဆုံးပြစ် ဒဏ်တွေချမှတ်နေပြီး နိုင်ငံရေးအကျဥ်းသားများကူညီစောင့်ရှောက်ရေးအသင်း- AAPPရဲ့ စာရင်းတွေအရ မနေ့ကအထိ ဖမ်းဆီးခံထားရသူ ၁ သောင်း ၁ ထောင်ကျော်ရှိပြီး ၁၂၀၀ ကျော်ထောင်ဒဏ်ချမှတ်ခံထားရတယ်လို့ သိရပါတယ်။

မြေလတ်အသံ၊ ဇွန် ၂၈၊ ၂၀၂၂။

စစ်ကောင်စီက တပ်မတော်စစ်ဆေးရုံတွေမှာရှိတဲ့ ဆရာဝန်တွေကို နာဂဒေသမှာ တာဝန်ထမ်းဆောင်ဖို့ စေလွှတ်ရန်ပြင်ဆင်နေပြီး ရွေးချယ်အပို့ခံရမယ့် စစ်ဆရာဝန်တွေက ကြောက်လန့်နေတယ်လို့ အမည်မဖော်လိုသူ စစ်တပ်ရင်းမြစ်က မြေလတ်အသံကို ပြောပါတယ်။

၂၀၂၂ ခုနှစ်အတွက် နာဂဒေသသို့ စစ်ကောင်စီက စစ်ဆရာဝန် အယောက် (၄၀) ကို တပ်ဆေးရုံတွေမှာ ယခုရက်ပိုင်းအတွင်း စာရင်းကောက်ခံနေကာ လာမယ့်ဩဂုတ်လထဲမှာ ပို့ဆောင်မှာဖြစ်ပြီး၊ သူတို့ရဲ့ လုံခြုံရေးနဲ့ ပတ်သက်ပြီး အကူညီတောင်းခံချိန်မှာ ရောက်လာကယ်တင်နိုင်ခြင်းမရှိခဲ့လို့ ပြီးခဲ့တဲ့နှစ် ၁၀ လပိုင်းမှာ စစ်ဆရာဝန် ၂ ယောက် သေဆုံးခဲ့ရတယ်လို့ ဆိုပါတယ်။

“လုံလ် ဖြစ်စဥ်မှာ စခန်းအသိမ်းပိုက်မခံရခင်၂ ရက်က “နမခ”ကို လုံခြုံရေးတောင်းတယ်။ မပေးနိုင်ဘူး။ “နမခ” က မပေးနိုင်လို့ လုံလ်စခန်းကျသွားတယ်လို့လဲ သိရပါတယ်။ တပ်မတော် ဆရာဝန် ၂ ဦး သေဆုံးမှုမှာလဲ လုံလောက်တဲ့ လုံခြုံရေးမပေးနိုင်ပါဘဲ၊ အခုနှစ်မှာလည်း နာဂဒေသ ကိုသွားဖို့ ၊ တပ်မတော်ကဆရာဝန်တွေကို စာရင်းကောက်ခံလျက်ရှိပါတယ်” လို့ အမည်မဖော်လိုတဲ့ ရင်းမြစ်က ပြောပါတယ်။

နာဂဒေသတွင် တာဝန်ထမ်းဆောင်ရန် ၁၅ နေရာခန့်ရှိပြီး၊ ချင်းပြည်နယ် ထန်တလန်မြို့နယ်လည်း ပါဝင်တာကြောင့် မသွားလိုခြင်းဖြစ်တယ်လို့ သူကဆက်ပြောပါတယ်။

“ဒီကပို့ရင် နာဂဒေသတွင် တာဝန်ထမ်းဆောင်ရန်ဆိုပြီး ပို့တာပါ။ ဟိုရောက်မှ ထန်တလန် မြို့၊ နဲ့တခြားမြို့တွေပြန်ခွဲတာပါ။ နှစ်တိုင်း နာဂသွားတဲ့သူတွေကို ထန်တလန်လွှတ်ပါတယ်။” လို့ သူက ပြောပါတယ်။

နာဂဒေသမှာ ၂ နှစ်တာဝန်ထမ်းဆောင်ပြီးပါက မိမိနေလိုသောဆေးရုံကိုတောင်းခံခွင့်နဲ့ ဆေးပညာဘွဲ့ မဟာသိပ်ပ္ပံသင်တန်း(ပါရဂူ)ကို တန်းတက်ရောက်ခွင့်၊ မိမိရွေးချယ်လိုသော ဘာသာကိုရွေးချယ်ခွင့်ပေးထားပြီး အထူးအခွင့်အရေးရလို့ သွားလိုသူတွေရှိပေမယ့် ချင်းပြည်နယ်၊ ထန်တလန်ကို မသွားလိုကြဘူးလို့ ပြောပါတယ်။

“မနှစ်က ၁၀ လပိုင်းမှာ ချင်းဒေသကာကွယ်ရေးတပ်က ထန်တလန်က တပ်စခန်းတခုကို ဝင်စီးတယ်။ နာဂဒေသကိုလွတ်တဲ့ တပ်မတော်ကဆရာဝန်တွေက နီးစပ်ရာတပ်မှာ တွဲဖက်အနေနဲ့နေရတာ၊ ဝင်စီးတဲ့အချိန် ထန်တလန်မြို့မှာ တာဝန်သွားရောက်ထမ်းဆောင်တဲ့ တပ်မတော်က ဆရာဝန် ၂ ဦးပါ ပါသွားတယ်။” လို့ ၎င်းကဆက်ပြောပါတယ်။

စစ်ကောင်စီတပ်အာဏာသိမ်းပြီးနောက်ပိုင်း စစ်ဆေးဆရာဝန် ဗိုလ်ကြီးများမှာလည်း CDM ပြုလုပ်ကာ ပြည်သူ့ရင်ခွင့်ခိုလှုံမှုများလည်း ရှိနေပါတယ်။

မြေလတ်အသံ၊ ဇွန် ၂၇၊ ၂၀၂၂။

ဇွန်လအတွင်း ရခိုင်ပြည်နယ်၊ စစ်တွေမြို့နှင့် ပုဏ္ဏားကျွန်းမြို့များမှ အပြစ်မဲ့အရပ်သား ၂၉ ဦးကို စစ်ကောင်စီက ဖမ်းဆီးထားသည်ဟု ရက္ခိုင့်တပ်တော် (AA)က ထုန်ပြန်လိုက်သည်။

ပြီးခဲ့သည့် ဇွန်လ ၂၃ ရက်နှင့် ၂၄ ရက်နေ့တို့တွင် စစ်တွေမြို့မှ စစ်ကောင်စီက ဖမ်းဆီးထားသည့် အပြစ်မဲ့အရပ်သား ၂၁ ဦးရှိပြီး၊ ၎င်းတို့ထဲတွင် အသက် ၁၈ နှစ်မပြည့်သေးသော လူငယ် ၃ ဦး ပါဝင်သည်ဟု ဇွန်လ ၂၅ ရက်နေ့တွင် AA က ထုတ်ပြန်ထားသည်။

အလားတူ ဇွန်လ ၁၆ ရက်နေ့မှ ဇွန်လ ၂၆ ရက်နေ့အထိ ၁၀ ရက်အတွင်း ပုဏ္ဏားကျွန်းမြို့မှ စစ်ကောင်စီက ဖမ်းဆီးထားသည့် အရပ်သား ၈ ဦးရှိပြီး ၎င်းတို့ထဲတွင် အသက် ၁၈ နှစ်မပြည့်သေးသော လူငယ် ၁ ဦးပါဝင်သည်ဟုလည်း AA က ဇွန်လ ၂၆ ရက်နေ့တွင် ထုတ်ပြန်ထားသည်။

စစ်တွေမှ ဖမ်းဆီးခံထားရသူမှာ ဦးလှထွန်းဝင်း၊ ဦးခင်မောင်စော၊ ဦးဘသိန်း၊ ညီညီထွန်း၊ ဦးမြင့်စိုး၊ မောင်မောင်ခင်၊ ဒီမာမောက်၊ အောင်အောင်၊ မာမောက်ရှာ၊ မောင်ကျော်လှ၊ ညီညီ၊ စံမောင်၊ မောင်ဟန်စိုး၊ ကျော်သန်းအေး၊ အောင်ဇာ်လင်း၊ ကျော်အေးလှိုင်၊ စိုးနိုင်ဝင်း၊ မောင်စံဦး၊ မောင်ဖြူ၊ မောင်လုံးချေ၊ မောင်သန်းထွန်းတို့ဖြစ်ကြောင်း သိရသည်။

ယင်းအပြင် ပုဏ္ဏားကျွန်းမှ ဖမ်းဆီးခံထားရသူများမှာ ကျော်မင်း၊ ဝင်းမောင်သန်း၊ ထွန်းလှိုင်၊ ဦးဘလှိုင်၊ မျိုးသွင်၊ မြတ်သူထွန်း၊ နိုင်မျိုးထွန်း၊ မင်းအောင်ခိုင်တို့ဖြစ်ကြသည်။

ယင်းအပြင် ကျောက်တော်နှင့် မြောက်ဦးမြို့တို့တွင်လည်း စစ်ကောင်စီကဖမ်းဆီးထားသည့် မပြစ်မဲ့အရပ်သား အနည်ဆုံး ၂၀ ကျော်ရှိသည်ဟုလည်း ဒေသခံများ၏ပြောဆိုချက်အရသိရသည်။ယင်းအရေအတွက်ကိုမူ ရက္ခိုင့်တပ်တော် (AA)က ထုတ်ပြန်ထားခြင်းမရှိသေးပေ။

ယခုနှစ် ဇွန်လမှစ၍ ရခိုင်ပြည်နယ်ရှိ မြို့နယ် ၄ မြို့နယ်မှ ရက္ခိုင့်တပ်တော်(AA)က ဖမ်းစီးထားသည့် စစ်ကောင်စီတပ်ဖွဲ့ဝင်များနှင့် ရဲတပ်ဖွဲ့ဝင် အရေအတွက် စု၏စုစုပေါင်း ၁၈ ဦးအထိရှိပြီ ဖြစ်သည်။

ယင်းအပြင် ရက္ခိုင့်တပ်တော်(AA)ထံသို့လည်း ထွက်ပြေခိုလှုံလာသည့် စစ်ကောင်စီတပ်ဖွဲ့ဝင် အရေအတွက် ထောင်နှင့်ချီ၍ရှိသည်ဟု ဇွန်လ ၁၄ ရက်နေ့တွင် ပြုလုပ်ခဲ့သည့် သတင်းစာရှင်းလင်းပွဲ AA ၏ ပြောခွင့်ရသူ ခိုင်သုခက ပြောဆိုခဲ့သည်။

ပဲခူး၊ ဇွန် ၂၂၊ ၂၀၂၂။

ပဲခူးတိုင်း(အနောက်ခြမ်း)၊ မင်းလှမြို့နယ်၊ စိန်ကန့်လန့်ရွာအခြေစိုက် အမှတ် ၁ ခြေလျင်တပ်ရင်း (ခလရ ၁) စစ်ကောင်စီတပ်မှာ တပ်အင်အားမရှိလို့ စစ်မှုထမ်းဟောင်း အသက်ကြီးရွယ်အိုတွေကို ခေါ်ယူအလုပ်ပေးပြီး ကင်းစောင့်ခိုင်းနေတယ်လို့ အဲ့ဒီတပ်နဲ့နီးစပ်တဲ့ဒေသခံတွေဆီက သိရပါတယ်။

စစ်မှုထမ်းဟောင်းတွေကို ပြန်လည်ခေါ်ယူရမှာ သေနတ်ပစ်ခတ်နိုင်ရေးကို အဓိကထားခေါ်ယူနေကာ ခြေထောက်တဖက်ပြတ်နေသူတွေလည်း ပါဝင်တယ်လို့ ဆိုပါတယ်။

“သေနတ်ကို မ နိုင်ပြီးပစ်နိုင်သေးရင်ပြီးရောဆိုတာမျိုးခေါ်တာထင်တယ်။ အဘိုးကြီးတွေရော၊ ခြေတဖက်ပြတ်တွေရောပါတယ်။ သူတို့ကို လစာပေးထားတယ်လို့လည်း သိရတယ်။ ဘယ်လောက်ပေးလည်းတော့မသိဘူး” လို့ ခလရ ၁ နဲ့ နီးစပ်သူတဦးက မြေလတ်အသံကို ပြောပါတယ်။

ဒါ့အပြင် သူတို့စစ်ကောင်စီတပ်ဖွဲ့ဝင်တွေရဲ့ တပ်တွင်းနေထိုင်တဲ့ အရွယ်ရောက်ပြီးသူ မိသားစုဝင်သားသမီးတွေကိုပါ စစ်သင်တန်းပေးကာ တက်ရောက်ခိုင်းနေတယ်လို့ သိရပါတယ်။

“ခလေးသေးသေးတွေလောက်ဘဲ မတက်ခိုင်းတာ၊ သေနတ် မ(သယ်)နိုင်တဲ့အရွယ်မျိုးလောက်ကနေစပြီး စစ်သင်တန်းတက်ခိုင်းတယ်။ ခလေးတွေကို​တော့ ကင်းစောင့်ခိုင်းတာမျိုးတော့ မတွေ့ဘူး။ စစ်သင်တန်းဘဲ သက်သက်တက်ခိုင်းတာမျိုးဖြစ်မယ်” လို့ သူက ဆက်လက်ပြောပါတယ်။

ခလရ ၁ တပ်ဟာ အင်းမအခြေစိုက် အမှတ် ၆၆ ခြေမြန်တပ်မဌာနချုပ် (တမခ ၆၆) လက်အောက်ခံ တပ်ရင်းတခုဖြစ်ပြီး လက်ရှိမှာ ခလရ ၁ တပ်အပါအဝင် တပ်မ ၆၆ တပ်မတခုလုံး ကရင်နီပြည်အတွင်းမှာ ကရင်နီတပ်ဖွဲ့တွေနဲ့ တိုက်ခိုက်နေရတာ ဖြစ်ပါတယ်။

ပြီးခဲ့တဲ့ ဒီဇင်ဘာလ ၃၁ ရက်နေ့ ကရင်နီတိုက်ပွဲမှာဘဲ ခလရ ၁ တပ်ရင်းမှူး ဒု-ဗိုလ်မှူးကြီး ကျော်ဇေယျအပါအဝင် စစ်ကောင်စီတပ်ဖွဲ့ဝင် ၁၀ ဦးကျော် တိုက်ပွဲအတွင်းသေဆုံးခဲ့ပြီးတော့ နောက်ပိုင်းတိုက် ပွဲတွေမှာလည်း ထိခိုက်သေဆုံးမှုများပြားခဲ့တယ်လို့ တပ်နဲ့နီးစပ်တဲ့သတင်းရင်းမြစ်တွေဆီကသိရပါတယ်။

ခလရ ၁ က စစ်ကောင်စီတပ်သားတွေအပြင် တပ်မ ၆၆ လက်အောက်ခံတပ်သားတွေလည်း ကရင်နီတပ်တွေဆီကို CDM ပြုလုပ်ဘက်ပြောင်းသွားတာ အများအပြားရှိနေတယ်လို့ ကရင်နီတပ်ဖွဲ့တွေရဲ့ထုတ်ပြန်ချက်တွေအရသိရပါတယ်။

ပဲခူး(အနောက်ခြမ်း)ဒေသတွေဖြစ်တဲ့ ပြည်ခရိုင်နဲ့ သာယာဝတီခရိုင်တွေမှာလည်း PDF တပ်ရင်းတွေ ဖွဲ့စည်းပြီး စစ်ကောင်စီရဲ့စစ်ရေးပစ်မှတ်နဲ့ အုပ်ချုပ်ရေးပစ်မှတ်တွေကို တိုက်ခိုက်မှုများလာတာကြောင့် စစ်ကောင်စီဘက်က နောက်ချန်အင်အားနည်းပါးတဲ့ တပ်ရင်းတွေမှာ အခုလိုပြင်ဆင်လာတာမျိုးဖြစ်တယ်လို့ CDM တပ်မတော်သားဟောင်းတဦးက သုံးသပ်ပြောဆိုပါတယ်။

ပဲခူး၊ ဇွန် ၂၂၊ ၂၀၂၂။

ပြည်ခရိုင်၊ ပေါင်ခေါင်းမြို့ပေါ်မှာ ပဲခူးရိုးမအစပ်က စစ်ဘေးရှောင်တွေ ရောက်ရှိခိုလှုံနေတယ်ဆိုတဲ့ သတင်းတွေကြောင့် စစ်ကောင်စီတပ်တွေက ရှာဖွေမေးမြန်းစစ်ဆေးမှုတွေပြုလုပ်နေတာဖြစ်တယ်လို့ မြို့ခံတွေက ပြောပါတယ်။

ပြီးခဲ့တဲ့ ဇွန်လ ၁၉ ရက်နေ့ကတည်းက အဲဒီသတင်းတွေကြောင့် လိုက်လံရှာဖွေစစ်မေးတာတွေ လုပ်နေကြပြီး ပေါက်ခေါင်းမြို့နယ်နဲ့ ပေါင်းတည်မြို့နယ်နယ်ခြား ပဲခူးရိုးမအခြေ ရုပ်စိုင်ကျေးရွာက စစ်ဘေးရှောင်တွေ ရောက်ရှိနေတယ်လို့လည်းဆိုကြပါတယ်။

“ဘုန်းကြီးကျောင်းတို့ သတင်းရတယ်ဆိုတဲ့ အိမ်တွေကို စစ်ကားတွေနဲ့ လာမေးကြတယ်ကြားတယ်။ အိမ်ရှင်တွေစစ်ဆေးခံနေရတယ်။” လို့ မြို့ခံတဦးကဆိုပါတယ်။

ရုပ်စိုင်ရွာမှာ PDF တွေရောက်ရှိခိုလှုံနေတယ်ဆိုတဲ့ သတင်းကြောင့် စစ်ကြောင်းထိုးခံရတာ၊ မီးရှို့ခံနေရတာတွေရှိခဲ့ပြီး ဒေသခံတွေက တောထဲမှာ ခိုလှုံနေကြရာက မိုးရာသီဒဏ်နဲ့ အစားအစာရှားပါးလာတဲ့ဒဏ်တွေကြောင့် မြို့တွေပေါ်က အမျိုးအဆွေတွေဆီကို ရောက်လာတာ ဘုန်းတော်ကြီးကျောင်းတွေကို ခွင့်တောင်းခိုလှုံခွင့်တောင်းခံတာတွေ ရှိလာတယ်လို့ လည်း မြို့ခံတွေက ပြောပါတယ်။

တဖက်မှာလည်း “ရုပ်စိုင်ရွာက တာဝန်ရှိသူတွေက အတင်းပြန်ခေါ်နေတယ်လို့ကြားတယ်။ ပြန်မလာတဲ့သူတွေကိုလည်း အကြမ်းဖက်တို့ PDF တို့ ဆက်နွယ်နေတဲ့သူတွေဆိုပြီး သတ်မှတ်မယ်လည်း ပြောနေတယ်” လို့ ဒေသခံတဦးက ဆိုပါတယ်။

ပဲခူးတိုင်းအနောက်ခြမ်း မှာရှိတဲ့ ဒေသကာကွယ်ရေးတပ်တွေနဲ့ စစ်ကောင်စီတပ်တွေကြား ပဲခူးရိုးမအစပ် ကျေးရွာတွေမှာ ထိတွေ့တိုက်ပွဲဖြစ်ပွားတာတွေရှိနေပြီး ကျေးရွာတွေမှာ စစ်ကောင်စီတပ်တွေက တပ်စွဲတာတွေ စစ်ဆေးတာတွေရှိနေတာကြောင့် ဒေသခံတွေ နေရပ်ပြန်နိုင်ခြင်းမရှိသေးပါဘူး။