စစ်ကောင်စီစစ်ကြောင်း

မြိုင်၊ မတ် ၁၉၊ ၂၀၂၃။

မကွေးတိုင်း၊ မြိုင်မြို့နယ်ထဲမှာ မတ်လ ၁၈ ရက်မနေ့ညနေပိုင်းက စစ်ကောင်စီစစ်ကြောင်းကို မိုင်းဆွဲတိုက်ခိုက်ခဲ့ရာ စစ်သား ၃ ဦး သေဆုံးခဲ့တယ်လို့ သိရပါတယ်။

ပေါက်မြို့နယ်၊ သနက်ပင်ရွာက ထွက်လာတဲ့ အင်အား ၈၀ ဝန်းကျင်ပါ စစ်ကြောင်းကို ညနေ ၆ နာရီလောက်က မြိုင်မြို့နယ်၊ ကန်နက်ရွာအနီးမှာ ရှေ့ထွက်မိုင်း ၁၀ လုံးနဲ့ တိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်မှ ဗိုလ်လက်ယာက ပြောပါတယ်။

“မိုင်း ၄ ပွိုင့်ဆွဲလိုက်တာ၊ ၃ ယောက်သေပြီး ၈ ယောက်ဒဏ်ရာရတယ်။ ရှေ့ထွက်မိုင်း ၁၀ လုံးနဲ့ဆွဲခဲ့တာ။ သူတို့ဘက်ကလည်း ပစ်ခတ်တာတွေ လုပ်တယ်။ အပြန်အလှန် ပစ်ခတ်တာ ၂၅ မိနစ် ကြာတယ်” လို့ ပြောပါတယ်။

ဒါ့အပြင် တိုက်ခိုက်ပြီးနောက် ထိခိုက်သေဆုံးသူတွေကို သုံးဘီးကားတွေနဲ့ သရက်ကန်ကျေးရွာကို သယ်သွားကြတယ်လို့ မြေပြင်တိုက်ခိုက်ရေး ရဲဘော်တွေက ဆိုပါတယ်။

ဒီတိုက်ခိုက်မှုအတွင်း စစ်ကောင်စီဘက်က ထိခိုက်သေဆုံးအခြေအနေတွေနဲ့ပတ်သက်လို့ မြေလတ်အသံက သီးခြားအတည်မပြုနိုင်သေးပါဘူး။

ဒီတိုက်ခိုက်မှုကို မြိုင်မြို့နယ် ပြည်သူ့ကာကွယ်ရေးတပ်ဖွဲ့၊ တပ်ရင်း ၁၊ တပ်ခွဲ ၁၊ တပ်ခွဲ ၄ (စကြ်ာ)၊ မုန်တိုင်းတပ်ဖွဲ့ တို့က ပူးပေါင်းတိုက်ခိုက်ခဲ့တာပါ။

ပြီးခဲ့တဲ့ မတ်လ ၁၇ ရက်ကလည်း မြိုင်မြို့နယ် Well Two ရေနံမြေစခန်းမှာ တပ်စွဲထားတဲ့ စစ်ကောင်စီတပ်သား‌တွေကို ပြည်သူ့ကာကွယ်ရေးတပ်ဖွဲ့ – မြိုင်မြို့နယ် ပကဖ အဖွဲ့က ပစ်ခတ်တိုက်ခိုက်ခဲ့ပါသေးတယ်။

ရွှေဘို၊ မတ် ၁၂၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်က စစ်ကောင်စီစစ်ကြောင်းကို မတ်လ ၁၁ ရက် မနေ့ မနက် ၉ နာရီလောက်က မိုင်းဆွဲတိုက်ခိုက်ခဲ့တာကြောင့် ထိခိုက်သေဆုံး သူတွေရှိတယ်လို့ Burma Rangers (Shwe Bo) အဖွဲ့ တာဝန်ခံတဦးက ပြောပါတယ်။

ရွှေဘိုမြို့နယ် ရွှေဘို – ကျောက်မြောင်းလမ်းရဲ့ဘေး လယ်ကွင်းတွေအတိုင်း ကင်းပုန်းတွေနဲ့ စစ်ကြောင်းထိုးပြီးပြန်လာတဲ့ အင်အား ၆၀ ပါစစ်ကြောင်းကို မိုင်း ၃ လုံးနဲ့ တိုက်ခိုက်ခဲ့တာလို့ Burma Rangers(Shwe Bo)အဖွဲ့ရဲ့ သတင်းပြန်ကြားရေးတာဝန်ခံ ဗိုလ်အေဒီက ပြောပါတယ်။

“စစ်ကောင်စီစစ်ကြောင်းက ရွှေဘိုမြိုနယ်တအုံရွာမှာ ညအိပ်ပြီး မနေ့မနက် ၇ နာရီလောက်က ခြေလျင်ထွက်လာတာပါ။ လမ်းမပေါ်က မသွားရဲဘဲ လမ်းဘေးလယ်ကွင်းလမ်းအတိုင်း ပြန်လာတာကို ရွှေဘိုကြက်မွေးမြူရေးဇုန် နောက်ကျောဘက်အရောက်မှာ တိုက်ခိုက်ခဲ့တာပါ” လို့ ပြောပါတယ်။

စစ်ကောင်စီဘက်ကနေ လက်နက်ငယ်တွေ စက်သေနတ်အသေးတွေအပြင် RPGနဲ့ပါ ပြန်လည်ပစ်ခတ်တာကြောင့်အင်အားမမျှလို့ တိုက်ခိုက်ရေးရဲဘော်တွေ ပြန်ဆုတ်ခွာခဲ့တယ်လို့ သူက ဆက်ပြောပါတယ်။

တိုက်ခိုက်ရေးရဲဘော်တွေ ပြန်လည်ဆုတ်ခွာပြီးချိန်မှာတော့ စစ်တပ်ဘက် ကျဆုံးသူ ဒဏ်ရာရသူတွေနဲ့ လက်ကျန်စစ်သားတွေကို ၆ ဘီးကား ၂ စီးနဲ့ ရွှေဘိုဘက်က လာတင်ခေါ်သွားတယ်လို့ ဆိုပါတယ်။

Burma Rangers (Shwe Bo) အဖွဲ့ဟာ တိုက်ခိုက်ရေးတွေအပြင် စစ်ကောင်စီတပ်က မီးရှို့ခဲ့တာကြောင့် မီးဘေးသင့်ခဲ့တဲ့ နေအိမ် ၄၁ လုံးကိုလည်း အလျားပေ ၃၀ အနံပေ ၂၀ ခေါင်အမြင့် ၁၅ ပေရှိတဲ့​ နေအိမ်ဆောက်လုပ်နိုင်ဖို့ အိမ်တိုင် ၁၁ လုံးစီကို မတ်လ ၈ ရက်က လှူဒါန်းခဲ့ပါသေးတယ်။

မြောင်၊ မတ် ၈၊ ၂၀၂၃။

စစ်ကိုင်းတိုင်း၊ မြောင်မြို့နယ်ထဲက ကျေးရွာတွေကို မီးရှို့ဖို့လာတဲ့ စစ်ကောင်စီစစ်ကြောင်း မိုင်းဆွဲခံရလို့ ဗိုလ် ၁ ဦးအပါ ၆ ဦး သေဆုံးသွားတယ်လို့ PDF တပ်ဖွဲ့ဝင်ဆီက သိရပါတယ်။

မတ်လ ၅ ရက်နေ့က အင်အား ၃၀၀ ခန့်ပါ စစ်ကောင်စီတပ်တွေဟာ မြောင်မြို့နယ်၊ ချောင်းဆင်းရွာကို စစ်ကောင်စီစစ်ကြောင်း ၃ ကြောင်းခွဲ ဝင်ရောက်ကာ ညအိပ်တပ်စွဲပြီးတဲ့နောက်၊ ၆ ရက်နေ့မနက် ၁၀ နာရီဝန်းကျင်မှာ ရသစ်ရွာကို စစ်ကြောင်းထိုးလာစဉ် ချောင်းဆင်းနဲ့ ရသစ်ရွာကြားမှာ မိုင်းဆွဲတိုက်ခိုက်ခဲ့တာလို့ ဆိုပါတယ်။

“စစ်ကြောင်းတကြောင်းက ချောင်းဆင်းရွာထဲမှာ ကျန်နေခဲ့တာ။ စစ်ကြောင်း ၂ ကြောင်းက ချောင်းဆင်းရွာနဲ့ ၁ မိုင်အကွာလောက်မှာရှိတဲ့ ရသစ်ရွာဘက်ကို စစ်ကြောင်းထိုး မီးရှို့ဖို့ ထွက်လာတဲ့အချိန် ပူးပေါင်းတပ်ဖွဲ့တွေက မိုင်းဆွဲတိုက်ခိုက်ခဲ့တာ။ ဗိုလ်သင်တန်းဆင်း ၁ ယောက်နဲ့ နောက်လိုက် ၅ ယောက် သေတယ်။ ထိခိုက်သေဆုံးမှုကိုတော့ ကျနော်တို့ရဲ့ မြေပြင်သတင်းပေးသူတွေ ပြောကြားချက်တွေ တခြားကင်းထောက်အဖွဲ့တွေဆီက သိရတာပါ” လို့ MN PDF Myitnge တပ်ဖွဲ့ဝင် တဦးက ပြောပါတယ်။

မိုင်းဆွဲတိုက်ခိုက်ခံရပြီးတဲ့နောက် စစ်ကောင်စီစစ်ကြောင်းတွေဟာ ရသစ်ရွာထဲကို ဝင်ရောက်သွားခဲ့ကာ နေအိမ် ၂၀ ကျော်ကို မီးရှို့ဖျက်ဆီးခဲ့ပြီး မတ်လ ၇ ရက်နေ့ မနက် ၆ နာရီလောက်မှာ နဂါးပေါက်ရွာဘက်ကို ထပ်မံစစ်ကြောင်းထိုးပြီး လက်ရှိမှာ စစ်ကောင်စီစစ်ကြောင်း ၃ ကြောင်းဟာ နဂါးပေါက်ရွာကနေ လမ်းရိုးတလျှောက် ထွက်ခွာသွားတယ်လို့ သိရပါတယ်။

အဆိုပါတိုက်ခိုက်မှုကို မန္တလေးခရိုင် အမှတ်(၅)တပ်ရင်း၊ MNPDF Myitnge၊ ဇာမဏီပြောက်ကျားတပ်ဖွဲ့ (ငါန်းဇွန်)၊ ဗိုလ်တစ်ထောင်ငမိုးပြောက်ကျားတပ်ဖွဲ့၊ Maung Special People Defence Force (MS PDF) မဟာမိတ်တပ်ဖွဲ့တို့က ပူးပေါင်းတိုက်ခိုက်ခဲ့ကြတာလို့ သိရပါတယ်။

စာတည်း – ရင်ငြိမ်း

ရေစကြို၊ မတ် ၇၊ ၂၀၂၃။

မကွေးတိုင်း၊ ရေစကြိုမြို့၊ PDF ထိန်းချုပ်မြို့ပေါ် ရပ်ကွက်အတွင်း နယ်ကျွံစစ်ကြောင်းထိုးလာတဲ့ စစ်ကောင်စီတပ်ကို မိုင်းဆွဲတိုက်ခိုက်ခဲ့တယ်လို့ Myingyan Black Tiger – MBT အဖွဲ့ဆီက သိရပါတယ်။

မတ်လ ၆ ရက်နေ့ မနေ့နေ့လည် ၁၁ နာရီလောက်မှာ အင်အား ၁၀၀ ဝန်းကျင်နဲ့ စစ်ကြောင်း ၃ ကြောင်း ခွဲကာ ဝင်ရောက်လာတာ ဖြစ်ပြီး အင်အား ၂၅ ယောက်ခန့် စစ်ကြောင်းဟာ PDF နယ်မြေ အမှတ် ၁ ထင်းတန်းရပ်ကွက်အတွင်း နယ်ကျွံလာချိန် မိုင်းဆွဲတိုက်ခိုက်ခဲ့တာလို့ အဖွဲ့တာဝန်ခံ ဗိုလ်မိုက်ခဲက မြေလတ်အသံကို ပြောပါတယ်။

“ရုံးပေါင်းစုံနဲ့ ဆေးရုံမှာ တပ်စွဲထားတဲ့ကောင်တွေ စစ်ကြောင်း ၃ ကြောင်းခွဲပြီးတော့ ဝင်လာတာ။ ရေစကြို မြို့ အမှတ် ၁ ထင်းတန်းရပ်ကွက်က ကျနော်တို့အပိုင်စိုးမိုးထားတဲ့နယ်မြေ။ အဲ့ဒီစစ်ကြောင်း ၃ ခုထဲက အင်အား ၂၅ လောက်က နယ်ကျွံလာတဲ့အချိန် အသင့်ထောင်ထားတဲ့ မိုင်းကွင်းထဲ ကင်းသမားက ခွဲခဲ့တာ။ ၄ ယောက်သေဆုံးပြီး အများအပြား ဒဏ်ရာရတယ်” လို့ ပြောပါတယ်။

မိုင်းဆွဲတိုက်ခိုက်မှုကြောင့် သေဆုံးတဲ့သူတွေကို သင်္ဂြိုလ်တာမျိုး မရှိသေးဘဲ ဒဏ်ရာရသူတွေကိုတော့ ရေစကြိုမြို့နယ် ဆေးရုံကြီးမှာ ပို့ဆောင်ထားတယ်လို့ တပ်တွင်းသတင်းရင်းမြစ်တွေရဲ့ပြောဆိုချက်ကို ကိုးကားပြီး သူကဆက်လက်ပြောပါတယ်။

ပြီးခဲ့တဲ့ ဖေဖော်ဝါရီလ ၁ ရက်နေ့ကလည်း ရေစကြိုမြို့၊ အမှတ် ၂ စည်ပင်သာယာရပ်ကွက် စုပေါင်းရုံးထဲမှာ တပ်စွဲနေတဲ့ စစ်အုပ်စုကို Myingyan Black Tiger(MBT) အဖွဲ့က လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့ရာ စစ်သား ၄ ဦး သေဆုံးခဲ့တယ်လို့ သိရပါတယ်။

စာတည်း – ရင်ငြိမ်း

မြင်းမူ၊ မတ် ၃၊ ၂၀၂၃။

စစ်ကိုင်းတိုင်း၊ မြင်းမူမြို့ကနေလာတဲ့ စစ်ကောင်စီစစ်ကြောင်းကို မြင်းမူမြို့နဲ့ ပုလဲတန်ရွာကြားမှာ မိုင်းဖောက်ခွဲတိုက်ခိုက်ခံရလို့ စစ်သား ၃ ဦး သေဆုံးပြီး ၄ ဦး ထိခိုက်ဒဏ်ရာရရှိသွားတယ်လို့ Dog Killers People’s Defence Force Myinmu တပ်ဖွဲ့က မတ်လ ၂ ရက် မနေ့က သတင်းထုတ်ပြန်လာပါတယ်။

အင်အား ၆၀ နီးပါးရှိတဲ့ စစ်ကောင်စီစစ်ကြောင်းဟာ ပြီးခဲ့တဲ့ ဖေဖော်ဝါရီလ ၂၈ ရက်မှာ အထူးပြုလုပ်ထားတဲ့ မိုင်းဘီးလူးအမည်ရှိ မိုင်းအမျိုးအစားနဲ့ တိုက်ခိုက်ခဲ့တာလို့ Dog Killers People’s Defence Force Myinmu တပ်ဖွဲ့မှ တာဝန်ရှိက မြေလတ်အသံကို ပြောပါတယ်။

“အဲဒီစခတွေက မြင်းမူမြို့နယ်ထဲမှာရှိတဲ့ ရွာသားတွေကို သတ်ဖြတ်တာတွေ၊ မုဒိမ်းကျင့်တာတွေလုပ်ပြီး စစ်ကြောင်းထွက်လာတာပါ။ ကျနော်တို့ကလည်း စစ်ကြောင်းထိုးလာတဲ့ *တွေကို အထူးထုတ် မိုင်းဘီးလူးကြီးတလုံးနဲ့ ဖောက်ခွဲခဲ့တာ။ သူတို့ဘက်က သေဆုံးသွားတဲ့သူ ဒဏ်ရာရသွားတဲ့သူတွေကို ထမ်းလာတာကို ကျနော်တို့မျက်စိနဲ့ မြင်တွေ့ခဲ့ပါတယ်” လို့ ဆိုပါတယ်။

ဒီစစ်ဆင်ရေးကို People’s Army To Fight Dictatorship(PAFD).တပ်ခွဲ DK PDF(MMU)၊ People’s Knight Defense Force Myinmu (PKDF.MMU)၊ မြင်းမူမြို့တိုက်နယ် အနောက်ခြမ်း ပ က ဖ၊ D.B.B.F.MMU မဟာမိတ်အဖွဲ့တွေက ပူးပေါင်းလုပ်ဆောင်ခဲ့တာလည်း ဖြစ်ပါတယ်။

မိုင်းဆွဲပြီးတဲ့နောက်မှာ စစ်ကောင်စီဘက်က လက်နက်ကြီး၊ လက်နက်ငယ်၊ စက်သေနတ်တွေနဲ့ ပြန်လည်ပစ်ခတ်ခဲ့တယ်လို့ သိရပါတယ်။

ပစ်ခတ်မှုကို ဖေဖော်ဝါရီ ၂၈ ရက်မှာ ပြုလုပ်ခဲ့ပေမယ့် နယ်မြေအခြေအနေကြောင့် သတင်းထုတ်ပြန်မှုကို နောက်ဆုတ်လိုက်ရတာလို့လည်း အထက်ပါတာဝန်ရှိသူက ပြောပါတယ်။

တိုက်ခိုက်မှုအတွင်း စစ်သား ၃ ဦး သေဆုံးခဲ့တယ်လို့ မြေပြင်တိုက်ခိုက်ရေးရဲဘော်တွေက ပြောပေမယ့် မြေလတ်အသံက သီးခြားအတည်မပြုနိုင်သေးပါဘူး။

အလားတူ ဖေဖော်ဝါရီလ ၂၇ ရက်ကလည်း DK PDF တပ်ဖွဲ့ဟာ မြင်းမူမြို့၊ စီးပွားရေးဘဏ်မှာ အထိုင်ချတပ်စွဲထားတဲ့ စစ်ကောင်စီတပ်ဖွဲ့ကို လက်နက်ငယ်တွေနဲ့ သွားရောက်ပစ်ခတ်ခဲ့ပါသေးတယ်။

စာတည်း – လင်း

ရွှေဘို၊ မတ် ၃၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်မှာ စစ်ကြောင်းထိုးနေတဲ့ စစ်ကောင်စီတပ်ကို မတ်လ ၂ ရက် မနေ့မနက် ၈ နာရီလောက်မှာ လက်နက်ကြီးတွေနဲ့ တိုက်ခိုက်ခဲ့လို့ ထိခိုက်သေဆုံးသူတွေ ရှိတယ်လို့ Eagle Guerrilla Force ဆီက သိရပါတယ်။

ဝက်လက်မြို့နယ် အောင်ချမ်းသာရွာကနေ အင်အား ၇၀ လောက်နဲ့ ထွက်လာတဲ့စစ်ကြောင်းကို ဘင်တဲကုန်းရွာ အဝင်နဲ့ အထွက်မှာ တိုက်ခိုက်ခဲ့တာလို့ Eagle Guerrilla Force ရဲ့ တပ်ရင်းမှူး ဗိုလ်ကောက်ရိုးက မြေလတ်အသံကို ပြောပါတယ်။

“သူတို့က ဘင်တဲကုန်း ဘုန်းကြီးကျောင်းထဲရောက်တာနဲ့ ကျနော်တို့က စပစ်တာ ဘင်တဲကုန်းရွာ အထွက်မှာ လက်နက်ကြီးထိတာ အဲဒီမှာ စစ်တပ်က လက်နက်မျိုးစုံ ပစ်ခတ်ပြီး ဆောင်ပခက်တွေနဲ့ သခွတ္တောရွာကို ထမ်းသွားတာ ၅ ဦး၊ အဲဒီကနေ ၃ ဖာလုံလောက်ပဲ ဝေးတဲ့ ဝက်လက်ဆေးရုံကို နာရေးကားနဲ့ သယ်သွားတာ” လို့ သူက ပြောပါတယ်။

အဲ့ဒီစစ်ကောင်စီစစ်ကြောင်းဟာ ပြီးခဲ့တဲ့ တပတ်အတွင်းကမှ ရွှေဘိုမြို့နယ်ကနေ ဝက်လက်မြို့နယ်ထဲကို အရပ်ဝတ်တွေနဲ့ ဝင်ရောက်လာတာ ဖြစ်ပြီး မနေ့ညပိုင်းအထိ သခွတ္တောရွာမှာပဲ ရှိနေကာ နေအိမ်တချို့ကို မီးရှို့တာတွေ လုပ်ဆောင်နေတယ်လို့ သူကဆက်ပြောပါတယ်။

တိုက်ခိုက်မှုအတွင်း စစ်ကောင်စီတပ် ထိခိုက်ဒဏ်ရာရသူတွေနဲ့ ပတ်သက်ပြီး မြေလတ်အသံက သီးခြားအတည်ပြုချက် မရသေးပါဘူး။

အဲဒီတိုက်ခိုက်မှုမှာ Eagle Guerrilla Force တပ်ခွဲ ၁ ၊ လျှပ်စီးပြောက်ကျားတပ်ဖွဲ့၊ ရွှေဘိုခရိုင်အမှတ် ၂ တပ်ရင်း တို့ ပူးပေါင်းတိုက်ခိုက်ခဲ့တယ်လို့ သိရပါတယ်။ ဖေဖော်ဝါရီလ ၂၈ ရက် မနက်ပိုင်းကလည်း Eagle Guerrilla Force အဖွဲ့ဟာ အဲဒီစစ်ကြောင်းကိုပဲ ဝက်လက်မြို့နယ်အနောက်ဘက်ခြမ်း ဘိုတဲကျေးရွာအနီးကနေ စောင့်ကြိုတိုက်ခိုက်ခဲ့လို့ စစ်သား ၁ ဦး သေဆုံးကာ ၂ ဦး ပြင်းထန်ဒဏ်ရာ ရရှိခဲ့ပါသေးတယ်။

စာတည်း – ရင်ငြိမ်း

ဝက်လက်၊ မတ် ၁၊ ၂၀၂၃။

စစ်ကိုင်းတိုင်း၊ ဝက်လက်မြို့နယ် အနောက်ဘက်ခြမ်းက စစ်ကောင်စီစစ်ကြောင်းကို ဖေဖေါ်ဝါရီလ ၂၈ ရက် မနေ့မနက်ပိုင်းက စောင့်ကြိုတိုက်ခိုက်ခဲ့ရာ စစ်သား ၁ ဦး သေဆုံးခဲ့ရာ ၂ ဦး ပြင်းထန်ဒဏ်ရာ ရရှိခဲ့တယ်လို့ Eagle Guerrilla Force အဖွဲ့ဆီက သိရပါတယ်။

ဝက်လက်မြို့နယ်၊ ဘိုတဲကျေးရွာကနေ အင်အား ၈၀ လောက်နဲ့ လာတဲ့စစ်ကြောင်းကို မနက် ၉ နာရီခွဲလောက်က မုဆိုးခြုံရွာအနီးမှာ ရော့ကက် ၁၀ လုံးအပြင် ၉၀ မမ လက်နက်ကြီးတွေနဲ့ အချိန် ၁ နာရီနီးပါးကြာ တိုက်ခိုက်ခဲ့တာလို့ ဆိုပါတယ်။

“စစ်ကြောင်းက ခြေလျင်ထွက်လာတာ၊ ရှေ့တကြောင်း နောက်တကြောင်းလာတာကို နောက်ကစစ်ကြောင်းရှေ့ကို ရော့ကက်ကျည်ကျသွားတာမှာ စစ်သားတယောက် သေပြီး ၂ ယောက် ဒဏ်ရာရသွားတယ်” လို့ Eagle Guerrilla Force အဖွဲ့တပ်ရင်းမှူး ဗိုလ်ကောက်ရိုးက ပြောပါတယ်။

စစ်ကောင်စီဘက်က ထိခိုက်သေဆုံးတာနဲ့ပက်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

အဲဒီစစ်ကြောင်းဟာ ည ၁၁ နာရီလောက်မှာတော့ ဘိုတဲကျေးရွာကို ပြန်လည်ထွက်ခွာသွားပြီး အဘွားအိုတဦးကို မီးရှို့သတ်ဖြတ်သွားတယ်လို့ သိရပြီး၊ အဲ့ဒီဖြစ်စဥ်နဲ့ ပတ်သက်တဲ့ နောက်ဆက်တွဲ အခြေအနေတွေကိုတော့ မြေလတ်အသံက ဆက်လက်စုံစမ်းနေဆဲပါ။

ဒီတိုက်ခိုက်မှုကို ရွှေဘိုခရိုင် အမှတ် – ၁၅ တပ်ရင်း Eagle Guerrilla Force တပ်ခွဲ ၁ နဲ့ ရွှေဘိုခရိုင် အမှတ် ၁၅ တပ်ရင်း Fight For Freedom တပ်ခွဲ ၂ တို့ ပူးပေါင်းခဲ့တာ ဖြစ်ပြီး၊ တိုက်ခိုက်ရေးရဲဘော်တွေ အန္တရာယ်ကင်းခဲ့တယ်လို့ ဆိုပါတယ်။

Eagle Guerrilla Forceအဖွဲ့ဟာ တိုက်ခိုက်ရေးတွေအပြင် ပြီးခဲ့တဲ့ ဖေဖေါ်ဝါရီလ ၂၄ ရက်ကလည်း ရွှေဘိုမြို့နယ်ထဲက NUG မူလွန်ကျောင်းတကျောင်းကို မလေးရှားနိုင်ငံ ဂျိုဟိုးစီနိုင်း ၂ ငါးလုံးအဖွဲ့က လှူဒါန်းတဲ့ ကျောင်းသုံးပစ္စည်းတွေကိုလည်း အလှူရှင်တွေကိုယ်စား လှူဒါန်းခဲ့ကြပါသေးတယ်။

မတ္တရာ၊ မတ် ၁၊ ၂၀၂၃။

မန္တလေးတိုင်း၊ မတ္တရာမြို့နယ်၊ မြွေဟင်္သာရွာကို စစ်ကြောင်းထိုးလာတဲ့ စစ်ကောင်စီတပ်ကို ဖေဖော်ဝါရီလ ၂၈ ရက် မနေ့ နေ့လည်ပိုင်းက မိုင်းဆွဲတိုက်ခိုက်ခဲ့တယ်လို့ တောကြီးမြွေပွေးအဖွဲ့ဆီက သိရပါတယ်။

မတ္တရာမြို့ဘက်ကနေ ဖေဖော်ဝါရီလ ၂၇ ရက်က စတင်စစ်ကြောင်းထိုးလာတဲ့ စစ်ကောင်စီတပ်ကို မနေ့နေ့လည်ပိုင်းက မြွေဟင်္သာရွာအနီးမှာ မိုင်း ၈ လုံးနဲ့ တိုက်ခိုက်ခဲ့တာကြောင့် စစ်သား ၅ ဦး သေဆုံးခဲ့ပြီး၊ ထိခိုက်ဒဏ်ရာရသူတွေကို လူနာတင်ကားနဲ့ လာသယ်သွားတယ်လို့ တောကြီးမြွေပွေးအဖွဲ့ တာဝန်ရှိသူ ဗိုလ်တီက မြေလတ်အသံကို ပြောပါတယ်။

“မတ္တရာမြို့ကနေ စစ်ကြောင်းထိုးလာတဲ့ စစ်အုပ်စုကို မြွေဟင်္သာရွာနဲ့ ကားလမ်းအကြားမှာ မိုင်းဆွဲတိုက်ခိုက်ခဲ့တယ်။ ကျနော်တို့ မိုင်းဆွဲလိုက်တာက ၃၂ ယောက်ပါတဲ့ စစ်ကြောင်းကိုပါ။ ထိခိုက်မှုကများပြီး ကျနော်တို့ သိတာက ၅ ယောက် သေတယ်။ ဒဏ်ရာရတဲ့သူတွေကိုတော့ ည ၉ နာရီ ၄၅ မိနစ်မှာ သူတို့ကား ၇ စီးနဲ့ လာသယ်သွားပြီး မတ္တရာမြို့ထဲကို ပြန်သွားတယ်” လို့ ဗိုလ်တီက ပြောပါတယ်။

စစ်ကြောင်းထိုးလာတဲ့ စစ်ကောင်စီတပ်သားတွေဟာ ထီးတော်မိုးအခြေစိုက် အမှတ် ၂ စစ်သားစု ဆောင်းရေးတပ်နဲ့ မန္တလေးမြို့ပေါ် တပ်ရင်းတွေက ပူးပေါင်းစစ်သားတွေ ဖြစ်နိုင်တယ်လို့ ခန့်မှန်းထားပြီး၊ လက်ရှိမှာ စစ်ကြောင်း ၃ ကြောင်း ပေါင်းမိကာ စစ်ကောင်စီတပ်သား အင်အား ၃၀၀ ခန့် ရှိနေတယ်လို့ သိရပါတယ်။

ပြီးခဲ့တဲ့ ဖေဖော်ဝါရီလ ၂ ရက်ကလည်း စစ်ကိုင်းမြို့နယ်၊ သုံးဆယ်‌ဘေးကျေးရွာမှ ကုန်းတန်းလေးကျေးရွာကို မောင်းနှင်သွားတဲ့ စစ်ကားကို ကုန်းတန်းလေးကျေးရွာတောင်ဘက်မှာ တောကြီးမြွေပွေးအဖွဲ့က မိုင်းဆွဲတိုက်ခိုက်ခဲ့လို့ စစ်သား ၆ ဦး သေဆုံးတယ်လို့ သိရပါတယ်။

စာတည်း – ရင်ငြိမ်း