စစ်ကောင်စီကား

စစ်ကိုင်း၊ ဖေဖော်ဝါရီ ၁၈၊ ၂၀၂၃။

စစ်ကိုင်းတိုင်း၊ ချောင်းဦးမြို့နယ်၊ မြပုလဲဆီဆိုင်အနီး စစ်ဆေးရေးဂိတ်ကနေ မုံရွာကိုလာတဲ့ စစ်ကားတစီးကို ဖေဖေါ်ဝါရီလ ၁၈ ရက် ဒီနေ့လည် ၃ နာရီလောက်က တိုက်ခိုက်ခဲ့တယ်လို့ People Defence Force – South Monywa မုံရွာခရိုင် တပ်ရင်း ၁၁ က သတင်းထုတ်ပြန်ထားပါတယ်။

မုံရွာမြို့နယ်၊ မုံရွာ – ချောင်းဦး လမ်းပိုင်းတနေရာမှာ ပဒေသာမိုင်း ၃ လုံးဆွဲကာ တိုက်ခိုက်ခဲ့တာလို့ ဆိုပါတယ်။

“အဲ့ကားပေါ်မှာ ဒဏ်ရာရတဲ့ ကောင်တွေပါတယ်လို့တော့ သိထားပါတယ်။ မနေ့က ချောင်းဦးမြို့နယ်မှာ စစ်ကြောင်းထိုးရင်း မိုင်းဆွဲခံရလို့ ဒဏ်ရာရတဲ့ သူတွေလို့တော့ ထင်တယ်ဗျ။ တော်တော်တော့ ထိခိုက်မယ်။ ကားက ဘေးတခြမ်းလုံး စုတ်ပြတ်ပြီး မိုးကာတွေပါ ပေါက်ပြဲကုန်တာပါ” လို့ People Defence Force – South Monywa မုံရွာခရိုင် တပ်ရင်း ၁၁ မှ တာဝန်ရှိသူက ပြောပါတယ်။

မိုင်းဆွဲခံရတဲ့ ကားကနေ ပြန်လှန်ပစ်ခတ်တာတွေ မရှိဘဲ မုံရွာမြို့ဘက်ကို ဆက်ထွက်သွားတယ်လို့ သူက ဆက်ပြောပါတယ်။

အဲဒီတိုက်ခိုက်မှုမှာ People Defence Force – South Monywa ၊ Monywa People’s Liberation Force – ဒေါင်းမင်းစစ်ကြောင်းတပ်ခွဲ၊ Forces Our History တို့က ပူးပေါင်းတိုက်ခိုက်ခဲ့တာ ဖြစ်ပြီး စစ်ကောင်စီဘက်က ထိခိုက်သေဆုံးအခြေအနေတွေကိုတော့ မြေလတ်အသံက အတည်မပြုနိုင်သေးပါဘူး။

People Defence Force – South Monywa အဖွဲ့ဟာ ဖေဖေါ်ဝါရီလ ၁၂ ရက် ညနေကလည်း လက်လုပ် ၄၀ မမ၊ လက်လုပ်ရှော့ဂန်း၊ အော်တိုဂန်းတွေနဲ့ ပျူစောထီးတောပုရွာကို ပစ်ခတ် တိုက်ခိုက်ခဲ့ကြပါသေးတယ်။

အမ်း၊ ဖေဖော်ဝါရီ ၅၊ ၂၀၂၃။

ရခိုင်ပြည်နယ်၊ အမ်းမြို့ကနေ မကွေးတိုင်းထဲကို ရိက္ခာလာပို့တဲ့ စစ်ကောင်စီကားတွေကို ငဖဲမြို့နယ်ထဲမှာ ၂ရက်ဆက်တိုက် မိုင်းဆွဲခဲ့တယ်လို့ Chin Defence Force-Asho အဖွဲ့ဆီက သိရပါတယ်။

အမ်းမြို့ အနောက်မြောက်တိုင်းစစ်ဌာနချုပ်ကနေ ပဒါန်းဘက််ကို ရိက္ခာလာပို့တဲ့ ယာဥ်တန်းကို ၂ရက်ဆက်တိုက် ငဖဲမြို့နယ်၊ အမ်း-ပဒါန်းလမ်းမပေါ်မှာ မိုင်းဆွဲတိုက်ခိုက်ခဲ့တယ်လို့ CDF – Asho အဖွဲ့ ပြောရေးဆိုခွင့်ရှိသူတဦးက ပြောပါတယ်။

“ပြင်ဆင်နေတာကြာပါပြီ။ တကယ်တိုက်ခိုက်ဖို့အတွက် အခွင့်အရေးပေးလာတော့ ဖေဖော်ဝါ ရီလ ၃ ရက်နဲ့ ၄ ရက်မှာ ကျနော်တို့ လုပ်ဆောင်နိုင်ခဲ့တာဖြစ်ပါတယ်။ ၃ ရက်နေ့အမ်းဘက်က ဆင်းလာတဲ့ကား ၁၆ စီးကိုတော့ မိုင်း ၂ လုံးနဲ့ တိုက်ခိုက်နိုင်ခဲ့ပြီး ၄ ရက်နေ့မှာတော့ ကား ၁၈ စီးကို မိုင်း ၃ လုံးနဲ့တိုက်ခိုက်နိုင်ခဲ့ပါတယ်” လို့ ပြောပါတယ်။

မိုင်းဆွဲမှုကြောင့် ရိက္ခာပို့တဲ့ ကားတွေမှာပါတဲ့ စစ်သားတွေထိခိုက်ဒဏ်ရာရတာတွေရှိပြီး ပြန်ပစ်ခတ်တာတွေရှိလို့ ပြန်ဆုတ်လာခဲ့ရတယ်လို့ ဆိုပါတယ်။

ဒီတိုက်ခိုက်မှုကို Chin Defence Force-Asho အဖွဲ့က လုပ်ဆောင်ခဲ့တာဖြစ်ပြီး ပြည်သူတွေဘက်က ပူးပေါင်းပါဝင်မှုရှိချင်တာကြောင့် လုပ်ဆောင်ခဲ့တာဖြစ်ပြီး ဖောက်ခွဲဖို့လိုအပ်တဲ့မိုင်းနဲ့ဆက်စပ်ပစ္စည်းတွေကို ကျောင်းသားလက်ရုံးတပ် (SAF) နဲ့ PRA-Magway အဖွဲ့တွေက ထောက်ပံ့ကူညီပေးခဲ့တာလို့ သိရပါတယ်။

မန္တလေး၊ ဒီဇင်ဘာ ၂၈၊ ၂၀၂၂။

မန္တလေးတိုင်း၊ မြင်းခြံမြို့နယ်ထဲက ပျူစောထီးရွာတရွာဖြစ်တဲ့ ဆုံကျေးရွာကို ကာကွယ်ရေးအဖွဲ့တွေကတိုက်ခိုက်နေချိန် ပျူတွေဘက်ကို စစ်ကူပေးဖို့ထွက်လာတဲ့စစ်ကောင်စီကားတစီး မိုင်းဆွဲခံခဲ့ရတယ်လို့ သိရပါတယ်။

ဒီဇင်ဘာလ ၂၇ ရက်မနေ့ကမနက်အစောပိုင်း ၂ နာရီလောက်က နဘူးအိုင်ရွာကနေ စစ်ကူထွက်လာတဲ့ကားကို ဆီမီးခုံ-နဘူးအိုင် လမ်းပိုင်းတနေရာမှာ ကြားဖြတ်ပြီး ပဒေသာမိုင်း ၅ လုံးဆွဲတိုက်ခိုက်ခဲ့တာလို့ နောင်ရိုးအထူးပြောက်ကျားတပ်ရဲ့ ရဲဘော်တဦးက ပြောပါတယ်။

“နဘူးအိုင်ကနေ မှန်လုံကားသေးတစီး စစ်ကူထွက်လာတာ၊ စစ်သားတွေတပ်ကူလာမယ့်လမ်းမှာ ကြိုတင်ပြင်ဆင်ပြီး မိုင်းဆင်ထားတာပါ၊ နဘူးအိုင်နဲ့ပျူရွာ (ဆုံရွာ)က ဆိုင်ကယ်နဲ့ဆို မိနစ်၂၀လောက်ပဲဝေးတာ။ မိုင်းဆွဲခံရတဲ့ကားကတော့ နဘူးအိုင်ကို ကြိုးနဲ့ဆွဲပြီးပြန်သွားရတယ်”လို့ ပြောပါတယ်။

မိုင်းဆွဲတိုက်ခိုက်ခံရလို့ စစ်ကောင်စီတပ်သား ၄ ဦးသေဆုံးကာ ကားပျက်စီးခဲ့ပြီး၊ သေဆုံးအလောင်းတွေနဲ့ကားကို နဘူးအိုင်ရွာထဲကိုပဲ ပြန်သယ်သွားတယ်လို့ တပ်တွင်းသတင်းပေးတွေရဲ့ပြန်ပြောချက်အရ အတည်ပြုထားနိုင်ခဲ့တယ်လို့ ဆိုပါတယ်။

အဆိုပါတိုက်ခိုက်မှုကို နယ်မြေခံအဖွဲ့တွေဖြစ်တဲ့ မြင်းခြံခရိုင်တပ်ရင်း အမှတ် ၆၊ တပ်ခွဲ-၁ နောင်ရိုးအထူးပြောက်ကျားတပ် NYSGFနဲ့အတူ မြင်းခြံခရိုင် တပ်ရင်းအမှတ်-၁ 27 revolution forceတို့ ပူးပေါင်းလုပ်ဆောင်ခဲ့တာလည်း ဖြစ်ပါတယ်။

ဒါ့အပြင် မနေ့ကမနက် ဆုံရွာတိုက်ခိုက်မှုမှာတော့ အဲ့ဒီရွာက ပျူစောထီး ၃ ဦးသေဆုံးခဲ့ပြီး ၁၀ ဦးထပ်မနည်း ထိခိုက်ဒဏ်ရာရရှိခဲ့တယ်လို့ သိရပါတယ်။