ခြုံခိုတိုက်ခိုက်ခံရ

ပဲခူး၊ မေ ၄၊ ၂၀၂၃။

ပဲခူးတိုင်း(အနောက်ခြမ်း)၊ အုတ်ဖိုမြို့နယ်၊ ပဲခူးရိုးမအခြေမှာ စစ်ကြောင်းထိုးလာတဲ့ စစ်ကောင်စီ စစ်ကြောင်းကို ပြောက်ကျားစနစ်နဲ့တိုက်ခိုက်ခဲ့လို့ ထိခိုက်သေဆုံးသူတွေရှိကာ ၄၀ မမ ကျည်အပါ စစ်အသုံးအဆောင်ပစ္စည်းတွေကို သိမ်းဆည်းနိုင်ခဲ့တယ်လို့ မြေအောက်ပြောက်ကျားတပ်ဖွဲ့ – အုတ်ဖိုအဖွဲ့ဆီက သိရပါတယ်။

မေလ ၂ ရက်ညနေ ၄ နာရီလောက်မှာ အင်အား ၈၀ ပါစစ်ကြောင်းကို ၂ ကြောင်းခွဲကာ ပဲခူးရိုးမအခြေမှာရှိတဲ့ ချောင်းစောက်ရွာဟောင်းနဲ့ ကိုင်းချိုကြီးရွာဘက်ကနေ ထွက်လာတာကို ပဒေသာမိုင်းတွေ၊ ၄၀ မမ တွေ၊ လက်နက်ငယ်တွေနဲ့ပါ တိုက်ခိုက်ခဲ့တာလို့ သိရပါတယ်။

“စစ်ကြောင်းက ချောင်းစောက်နဲ့ကိုင်းချိုကြီးကနေ ပ စောက်ပုံနဲ့ တက်လာတာကို ကိုင်းချိုကြီးစစ်ကြောင်းကို တာဝါတိုင်ရွာနားမှာ ကျနော်တို့ထောင်ထားတဲ့ ပဒေသာမိုင်း ၇ လုံးကွဲပြီးချိန်မှာ ၄၀ မမ ၅ လုံးနဲ့ထပ်ပစ်တာမှာ ၁ လုံးက သူတို့အလယ်ကိုကျပြီး စစ်သား ၃ ယောက်သေပြီး ဒဏ်ရာရကုန်တာ” လို့ မြေအောက်ပြောက်ကြားတပ်ဖွဲ့ တာဝန်ခံက ပြောပါတယ်။

တိုက်ပွဲဖြစ်စဉ်မှာ သေဆုံးဒဏ်ရာရ စစ်ကောင်စီတပ်သားတွေကို မြေလတ်အသံသတင်းဌာနအနေနဲ့ သီးခြားအတည်မပြုနိုင်သေးပါဘူး။

ဒါ့အပြင် ချောင်းစောက်ရွာဟောင်းကထွက်လာတဲ့ စစ်ကြောင်းကိုလည်း တာဝါတိုင်အတက်မှာ လက်နက်ကြီးတွေနဲ့ ပစ်ခတ်နေစဉ် ဝိုင်းရဲစခန်းကခြေလျင် စစ်ကူ ၁၅ ဦးရောက်လာပြီးနောက် စခန်းချထားတဲ့ ကြို့ပင်ကောက်မြို့နယ်၊ ဝိုင်းရွာဘက်ကို တပ်ပြန်ဆုတ်သွားတယ်လို့ ဆိုပါတယ်။

အဲဒီစစ်ကြောင်းကနေ ၄၀ မမ ကျည် ၆ လုံး၊ ကျည်ခွံ ၁၂ လုံး၊ မြန်မာငွေ သုံးသောင်းနှစ်ထောင်ကျော် ချဲဘောက်ချာ ၁ ရွက်နဲ့ စစ်ဦးထုပ် ၁ လုံး သိမ်းဆည်းနိုင်ခဲ့တယ်လို့ ဆိုပါတယ်။

အုတ်ဖိုမြို့နယ်ထဲမှာ စစ်ကောင်စီတပ်နဲ့ ဒေသခံကာကွယ်ရေးတပ်တွေ မကြာခဏထိတွေမှုဖြစ်ပွားပြီး မတ်လ ၂၈ ရက်ကလည်း အုတ်ဖိုမြို့နယ်၊ မုန်းဆည်ကို စစ်ကြောင်းဆုတ်လာတဲ့စစ်သား ၃၅ ဦးလောက်ကို ပဒေသာမိုင်းဆွဲခဲ့လို့ စစ်သား ၁ ဦးသေဆုံးခဲ့ပါသေးတယ်။

စာတည်း-007

စစ်ကိုင်း၊ ဇန်နဝါရီ ၂၆၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်မှာ PDF တွေ ခြုံခိုတိုက်ခိုက်မှာကိုကြောက်လို့ သစ်ပင်၊ ခြုံနွယ်တောတွေကိုမီးရှို့တဲ့စစ်အုပ်စု ဇန်နဝါရီ ၂၅ ရက်နေ့မနက်ပိုင်းမှာ တိုက်ခိုက်ခံရတာကြောင့် ၅ ဦးသေဆုံးခဲ့တယ်လို့ သိရပါတယ်။

အဲဒီစစ်အုပ်စုမှာ အင်အား ၃၀ ခန့်နဲ့ အင်းပတ်ကွေ့စျေးတန်း၊ ရွာသစ်ကုန်း(ပျူ)ရွာ တို့မှာ အထိုင်ချတပ်စွဲကာ ကျေးရွာတွေကိုမီးရှို့နေတာကြောင့် ကာကွယ်ရေးပူးပေါင်းတပ်ဖွဲ့တွေက လက်နက်ကြီး ၁၈ လုံးပစ်ခတ်တိုက်ခိုက်ခဲ့တာ ဖြစ်တယ်လို့ Khin U Dog Killers(KDK)မှ ပြန်ကြားရေးတာဝန်ခံက ပြောပါတယ်။

“စကစအများစုက ဒီပဲယင်းမြို့နယ် ညောင်လှကျွေးရွာဘက်က အထိနာနေတဲ့ကောင်တွေကို သွားကြိုနေတဲ့အချိန် စခန်းမှာကျန်ခဲ့တာတွေကို ကျနော်တို့က တိုက်ခိုက်ခဲ့တာပါ။ စကစ ဘက်ကလည်း လက်နက်ငယ်နဲ့ခဏပဲရမ်းပစ်ခဲ့တယ်။ အတွင်းသတင်းအရ ငါးယောက်သေတာကို အတည်ပြုနိုင်ခဲ့တယ်။ သေတဲ့ငါးယောက်က စျေးတန်းကကောင်တွေဗျ။ ကျနော်တို့ ရဲဘော်တွေတော့ အထိအခိုက်မရှိ ဆုတ်ခွာနိုင်ခဲ့တယ်” လို့ဆိုပါတယ်။

ဒီတိုက်ခိုက်မှုကိုတော့ Khin U Specialforce Organization_KSO၊ Khin U Dog Killers၊ Local Brothers၊Wolf Guerrilla (Ye-U)၊FAF၊PDA၊ တပ်ရင်း၂၀ခွဲ-၃တို့က ပူးပေါင်းလုပ် ဆောင်ခဲ့တာဖြစ်ပါတယ်။

အဲဒီစစ်ကောင်စီတွေက ရေဦးမြို့နယ် နဲ့ ဒီပဲယင်းမြို့နယ်ဘက်တို့ကို တပ်ကူလုပ်ပေးနေတဲ့စခန်းတွေဖြစ်ပြီး ဇန်နဝါရီ ၂၃ ရက်နေ့မှာလည်း KSO အဖွဲ့ကမိုင်းဆွဲတိုက်ခိုက်ခဲ့တာကြောင့် ၅ ဦးသေဆုံးခဲ့သေးတယ်လို့ သိရပါတယ်၊

ဇန်နဝါရီ ၂၄ ရက်နေ့မှာ တပ်စွဲထားတဲ့စခန်းထဲကနေ တပ်သား ၁၅ ဦးမှာ PDFရဲ့ ပုန်းလျိုတိုက်ခိုက်မှုက ကင်းလွတ်အောင် သူတို့စခန်းအနီးမှာရှိတဲ့ ငှက်ပျောခြံ၊ လျှော်ဖြူခြံ၊ ခြုံတောတွေကို မီးရှို့ခဲ့တာကြောင့် အင်းပတ်ကျေးရွာကို မီးကူးစက်ကာ လူနေအိမ် ၂လုံး လောင်ကျွမ်းပြာကျခဲ့ပါတယ်။