ခင်ဦး

ခင်ဦး၊ မတ် ၄၊ ၂၀၂၃။

စစ်ကိုင်းတိုင်း၊ ခင်ဦးမြို့နယ် အနောက်ဘက်ခြမ်းရှိ ကျေးရွာများကို ဖေဖော်ဝါရီလ ၂၅ ရက်မှ မတ်လ ၂ ရက်နေ့ထိ စစ်တပ်က အင်အား ၁၀၀ ကျော်နဲ့ စစ်ကြောင်းထိုး ဝင်ရောက်ပစ်ခတ်မှုတွေကြောင့် ဒေသခံ ၁ သောင်းကျော် အစားအသောက်နဲ့ ကျန်းမာရေး အခက်အခဲဖြစ်နေတယ်လို့ စစ်ဘေးရှောင်ကူညီစောင့်ရှောက်နေတဲ့ တာဝန်ခံတဦးက ပြောပါတယ်။

“စစ်**တွေက လက်နက်ကြီး၊ လက်နက်ငယ်တွေနဲ့ ပစ်ခတ်ဝင်ရောက်လာပြီး ယာတော်ရွာနဲ့ ကျွန်းတောကြီးရွာတွေကို မီးရှို့ရာကနေ တဖြေးဖြေးကျေးရွာ ၁၀ ရွာထိ ပြေးကုန်ရတယ်။ ၄ ရက်တိတိ ဘေးလွတ်ရာကို တနေရာပြီးတနေရာ ဆက်တိုက်ပြေးနေရလို့ အခက်အခဲများစွာနဲ့ အကူညီတွေ လိုအပ်နေတယ်” လို့ သူက ဆက်ပြောပါတယ်။

မြင်းဒေါင်း၊ မကျီးအုပ်၊ သရက်ပင်စု၊ အင်တိုင်းလေးတောင်ရွာ၊ အင်တိုင်းလေးမြောက်ရွာ၊ယာတော်၊ မြင်းကျ၊ ကျွန်းတောကြီး၊ ဥယာဥ်နဲ့ သာဝတ္ထိရွာ စတဲ့ကျေးရွာ ၁၀ ရွာက ဒေသခံတွေ အခုချိန်ထိ နေရပ်မပြန်နိုင်သေးသလို အဲဒီရွာတွေက မီးရှို့ခံရတဲ့ အိမ်အရေအတွက်ကိုလည်း အခုချိန်ထိ အတိအကျ မသိရသေးဘူးလို့ ဆိုပါတယ်။

အဝတ်တထည် ကိုယ်တခုဖြင့် ထွက်ပြေးနေရပြီး နီးစပ်ရာရွာတွေက ထမင်းထုပ်လာဝေမှသာ စားနေရတာ၊ သက်ကြီးရွယ်အိုနဲ့ ကလေးငယ်တွေလည်း ကျန်းမာရေးထိခိုက်မှုတွေ ရှိလာသလို ဆေးဝါးတွေလည်း လိုအပ်နေတယ်လို့ ဆိုပါတယ်။

အာဏာသိမ်းပြီးချိန်မှ ယနေ့အထိ ခင်ဦးမြို့နယ်အတွင်း စစ်ကောင်စီဘက်က ကျေးရွာ ၆၆ ရွာမှ နေအိမ်ပေါင်း ၄၀၀၀ ကျော် မီးရှို့ဖျက်ဆီးထားခဲ့ပြီး ရဲဘော်နဲ့ပြည်သူပေါင်း ၂၅၀ ကျဆုံး ထားပြီလို့ ဆိုပါတယ်။

ခင်ဦး၊ ဖေဖော်ဝါရီ ၂၈၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်၊ တယ်ဘိုပင်ကျေးရွာကနေအိမ်တအိမ်ကို အမည်မသိလက်နက်ကိုင်တွေက ဓားပြတိုက်တဲ့အပြင် အိမ်ရှင်အမျိုးသားကိုလည်း ဖမ်းဆီးသတ်ဖြတ်သွားတယ်လို့ ဒေသခံတွေဆီက သိရပါတယ်။

တယ်ဘိုပင်ရွာက ဟာဂျီဦးဘိုလေးရဲ့နေအိမ်ကို ဖေဖော်ဝါရီလ ၂၂ ရက်ည ၇ နာရီ ၄၅ မိနစ်လောက်မှာ လူအင်အား ၃၀ နီးပါးပါဝင်တဲ့ လက်နက်ကိုင်တွေဟာ ဆိုင်ကယ်တွေနဲ့ရောက်လာပြီး ရွှေ၊ငွေနဲ့ ဆိုင်ကယ်တွေကို ဓားပြတိုက်ယူဆောင်သွားတယ်လို့ မိသားစုနဲ့နီးစပ်သူ ဒေသခံတဦးက မြေလတ်အသံကို ပြောပါတယ်။

“သူတို့ရဲ့မျက်နှာတွေကို ပုဝါနဲ့ အုပ်ထားတယ်။ အသက်တွေက ၁၈ ကနေ ၃၀ ဝန်းကျင်တွေ။ မိသားစုဝင် ၅ ယောက်လုံးကို မှောက်ထားခိုင်းပြီး လည်ပင်းတွေကိုလည်းတက်နင်းထားတယ်။ အိမ်ထဲကနေ ငွေကျပ် သိန်း ၆၅၀၊ ရွှေထည် ၁ ပိဿာကျော်ကို ချွတ်ယူတာရော၊သိမ်းယူတာရော ပြီးတော့ ဆိုင်ကယ်(လိုင်စင်ပါ)၄ စီး ယူသွားတယ်” လို့ ဆိုပါတယ်။

ဒါ့အပြင် ဓားပြတိုက်ခံရတဲ့နေအိမ်ပိုင်ရှင် အသက် ၅၅ နှစ်အရွယ် ဟာဂျီ ဦးဘိုလေးကို အဲ့ဒီလက်နက်ကိုင်တွေက ဖမ်းဆီးခေါ်ဆောင်သွားပြီးနောက် ဖေဖော်ဝါရီလ ၂၃ ရက်မှာ အလောင်းသာ ပြန်လည်တွေ့ရှိခဲ့တယ်လို့ သိရပါတယ်။

“ဟာဂျီဦးဘိုလေး အိမ်ကနေသူတို့မထွက်ခင်မှာ ငါ**ကုလားတွေ မျိုးစုံကြိမ်းဝါးဆဲဆိုသွားတယ်။ ဟာဂျီဦးဘိုလေးကို ဖမ်းသွားပြီးတော့ သူ့ရဲ့ ရုပ်အလောင်းကို သဲကုန်းရွာအနောက်ဖက် ကပ်လျက်မှာရှိတဲ့ ချိုင်စောက်တံတား ရေချိုးချောင်းထဲမှာ နောက်နေ့ညနေမှပြန်တွေ့တာ။ လယ်ဂုတ်မှာ ဓားခုတ်ရာ ၂ ချက်နဲ့ သေဆုံးနေတာတွေ့ရတယ်”လို့ သူကဆက်ပြောပါတယ်။

ပစ္စည်းလု၊ လူသတ်သွားတဲ့ လက်နက်ကိုင်တွေဟာ သူတို့လုပ်ဆောင်ခဲ့တာတွေနဲ့ပတ်သက်ပြီး မိသားစုဝင်တွေထဲက တိုင်တန်းတာတွေလုပ်ခဲ့ရင် နောက်တကြိမ်ထပ်လာပြီး သတ်ပစ်မယ်လို့ ခြိမ်း ခြောက်သွားတယ်လို့လည်း သိရပါတယ်။

ဒီလုယက်သတ်ဖြတ်မှုလုပ်ခဲ့သူတွေက ဘယ်သူလဲဆိုတာကိုတော့ အခုအချိန်ထိမသိရှိရသေးပါဘူး။

သတ်ဖြတ်ပစ္စည်းလုခံလိုက်ရတဲ့ ဟာဂျီဦးဘိုလေးဟာ နိုင်ငံရေးနဲ့ပတ်သက်တာတွေ လုပ်ဆောင်တာမျိုးမရှိပဲ သာမာန်တောင်သူလုပ်ငန်းနဲ့ လယ်ထွန်စက်ပစ္စည်းတွေ ရောင်းဝယ်ရေးဆက်စပ်လုပ်ငန်းတွေကို လုပ်ကိုင်သူဖြစ်တယ်လို့လည်း ဒေသခံတွေဆီကသိရပါတယ်။

စစ်ကိုင်း၊ ဖေဖော်ဝါရီ ၂၃၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်မှာ တိုက်ပွဲမဖြစ်ဘဲ စစ်ကောင်စီတပ်သားတွေနဲ့ပျူစောထီတွေက ဖေဖော်ဝါရီလ ၂၁ ရက်ည ၈ နာရီမှာ လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့တာကြောင့် အဘွားအိုတဦးနဲ့ အမျိုးသားတဦးဒဏ်ရာရရှိခဲ့ပါတယ်။

ဒဏ်ရာရှိခဲ့သူမှာ အင်းပတ်ကွေ့ကျေးရွာမှ အသက် ၆၀ ကျော်အရွယ်အဘွားနဲ့ အသက်၃၀ ကျော်အရွယ် အမျိုးသားတဦးတို့ဖြစ်ပြီး၊ သူတို့ ၂ ဦးမှာ အချိန်မီဆေးကုသမှုခံယူခဲ့ရတာကြောင့် အသက်အန္တရာယ်မစိုးရိမ်ရတော့ဘူးလို့ ခင်ဦးမြို့နယ်သတင်းမှန်ပြန်ကြားရေးအဖွဲ့မှ တာဝန်ရှိသူတဦးက ပြောပါတယ်။

“အဘွားကတော့ လက်နက်ကြီးစထိတာ။ အစတွေက အဘွားခန္ဓာကိုယ်ရဲ့ ညာဖက်နံရိုးကို ထိသွားတာ။ အမျိုးသားတယောက်ကတော့ လက်နက်ငယ်ကျည်ထိတာ ဘယ်ဖက်ပေါင်မှာထိတာ။ အခုအချိန်ထိတော့ ဆေးကုသမှုခံယူနေရဆဲပါ။ ဒါပေမယ့် မစိုးရိမ်ရတော့ဘူး။ သူတို့ရဲ့နာမည်တွေကိုတော့ လုံခြုံရေးအရမပြောရဘူး” ဆိုပါတယ်။

လက်နက်ကြီး၊ လက်နက်ငယ်တွေ နေ့တိုင်းလိုလိုပစ်ခတ်နေတဲ့ စစ်အုပ်စုစခန်းကတော့ အင်းပတ်ကွေ့ကျေးရွာအနီးမှာရှိတဲ့ အင်းပတ်ကွေ့စျေးတန်း(စကစအထိုင်ချစခန်း)နဲ့ ရွာသစ်ကုန်း(ပျူ)စခန်းတို့ကဖြစ်တယ်လို့ အထက်ပါတာဝန်ရှိသူက ပြောပါတယ်။

“အဲနေ့ကတိုက်ပွဲဖြစ်တာမရှိခဲ့ဘူး။ လက်နက်ကြီး ၃လုံးပစ်တာမှာ တလုံးကျသွားတာရွာထဲကို။ စကစတွေနဲ့ပျူတွေက နေ့တိုင်းလိုလို လက်နက်ကြီး၊ လက်နက်ငယ်တွေပစ်တယ်။ အခုလိုပစ်ခတ် နေတာကတော့ သူတို့စခန်းကို PDF တွေ မတိုက်ခိုက်လာအောင် လုပ်နေတာလို့သိရတယ်” လို့ ဆိုပါတယ်။

အဆိုပါပျူစခန်းမှာ စစ်သားနဲ့ပျုတပ်သား ခန့်မှန်းခြေ ၅၀ကျော်ရှိပြီး၊ အဲဒီစခန်းကပဲ လက်နက်ကြီးတွေ ရမ်းသမ်းပစ်ခတ်ခဲ့တာကြောင့် အင်းပတ်ကွေ့ကျေးရွာထဲကို ကျရောက် ပေါက်ကွဲခဲ့လို့ အခု ၂၀၂၃ ခုနှစ်ထဲမှာအမျိုးသားတဦးသေဆုံးခဲ့သလို ၁၅ ဒဏ်ရာရရှိထားတယ်လို့ သိရပါတယ်။

ရွှေဘို၊ ဖေဖော်ဝါရီ ၂၀၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်အတွင်းက လောင်းရှည်၊ လက်ပံလှ မီးဘေးသင့် အိမ်ထောင်စု ၄၉၀ ကျော်အတွက်ခင်ဦး မြို့နယ် ပအဖ၊ ပကဖ တာဝန်ခံ အသီးသီးကစုပေါင်းပြီးမနေ့က ဖေဖော်ဝါရီလ ၁၉ ရက်နေ့မှာ သိန်း (၅၀)ကျပ် တန်ဖိုးရှိတဲ့ ကုန်စိမ်များ ထောက်ပံ့ လှူဒါန်းခဲ့တယ်လို့ သိရပါတယ်၊

“ခင်ဦး လောင်းရှည် ကျေးရွာ မီးဘေးသင့် အိမ်ခြေ (၃၁၀)နှင့်၊ လက်ပံလှကျေးရွာ မီးဘေးသင့် အိမ်ခြေ (၁၈၀)၊ စုစုပေါင်း မီးဘေးသင့် အိမ်ခြေ အိမ်ထောင်စု (၄၉၀) အတွက်အရေးပေါ် လိုအပ်နေတဲ့ စားနပ်ရိက္ခာ ထောက်ပံတဲ့ အစီအစဥ်အနေနဲ့ကျပ် သိန်း (၅၀)တန်ဖိုးရှိတဲ့ (ဆီ၊ဆား၊ပဲ၊ကြက်သွန်နီ၊မုံလာထုပ်၊ခရမ်းသီး၊ခရမ်းချဥ်သီး) ကုန်စိမ် ၇ မျိုးကို ထောက်ပံ့ပေးခဲ့တာ”လို့ မြို့နယ်အုပ်ချုပ်ရေး တာဝန်ခံတဦးကပြောပါတယ်။

အခုလို ထောက်ပံ့လှူဒါန်းမှုကို အမျိုးသားညီညွတ်ရေးအစိုးရ၊ MONREC မှ ရရှိတဲ့ အခွန်ခွဲတမ်းကနေ မြို့နယ် ပအဖ၊ ပကဖ စီမံခန့်ခွဲခွင့်ရှိတဲ့ ဘတ်ဂျက်နဲ့ ကူညီ ဆောင်ရွက်ခဲ့တာဖြစ်ပြီး ဒေသခံပြည်သူတွေဆီသွားရောက်ပြီး တိုက်ရိုက်လှူဒါန်းခဲ့တာလို့ သူကဆက်ပြောပါတယ်။

ခင်ဦးနယ်အတွင်းက မြို့နယ် ပအဖ ၊ မြို့နယ် ပကဖ တာဝန်ခံ၊ လူသားစာနာအဖွဲ့အစည်း၊ ပြည်သူ့ရင်ခွင်၊ သတင်းပြန်ကြားရေး ၊ တရားရေး၊ အခွန်အရာရှိ၊ ဘဏ္ဍာရေး ပ/ဒု တာဝန်ခံ၊ မြို့နယ် ပကဖ ရဲဘော်တွေနဲ့အတူ တိုက်နယ် ၁ ခေါင်းဆောင်အဖွဲ့၊ လောင်းရှည်/လက်ပံလှ ရပ်ကျေး ပအဖ/ ပကဖများ အားလုံး စုပေါင်းပြီး သွားရောက်ထောက်ပံလှူဒါန်းခဲ့ကြတာလို့ သိရပါတယ်။

စစ်ကိုင်း၊ ဖေဖော်ဝါရီ ၅၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်အတွင်း ပြီးခဲ့တဲ့ဇန်နဝါရီလ ၃၀ ရက်ကစတင်ပြီး စစ်ကောင်စီရဲ့ မီးရှို့ခြင်းခံရတဲ့ ကျေးရွာ ၄ ရွာကို မြို့နယ်အုပ်ချုပ်ရေးအဖွဲ့ကဦးဆောင်ပြီး ဒီနေ့ဖေဖော်ဝါရီလ ၅ ရက်မှာ ဆီနဲ့ငွေသားတချို့ ထောက်ပံ့လှူဒါန်းခဲ့ တယ်လို့ သိရပါတယ်။

“ဇန်နဝါရီ ၃၀ ရက်ကနေ ဖေဖော်ဝါရီလ ၂ ရက်နေ့အထိ ၄ ရက်အတွင်းကို ဗျိုင်းကြိုင်၊ မှန်သာ၊ ရုံးစု၊ ညောင်ပင်ကြီးစု အစရှိတဲ့ ကျေးရွာ ၄ ရွာလုံးမှာရွာလုံးကျွတ်နီးပါး မီးရှို့ဖျက်ဆီးခံခဲ့ရတာပါ။ အဲ့ဒီ ၄ ရွာလုံးကအိမ်ထောင်စု ၇၀၀ လောက် အိုးမဲ့အိမ်မဲ့ဖြစ်နေရပြီး အကူအညီတွေလိုအပ်နေတာ”လို့ မြိုနယ်အုပ်ချုပ်ရေးအဖွဲ့ တာဝန်ရှိသူတဦးက ပြောပါတယ်။

အဲ့ဒီကျေးရွာ ၄ ရွာအတွင်းကမီးရှို့ဖျက်ဆီးခံလိုက်ရတဲ့အိမ်ထောင်စုတွေအတွက် စားသုံးဆီနဲ့ ငွေသားတွေကို ခင်ဦးမြို့နယ်အုပ်ချုပ်ရေးအဖွဲ့ကဦးဆောင်ပြီး ဆီနဲ့ ငွေသားတွေ ထောက်ပံ့လှူဒါန်းခဲ့တာပါ။ အိမ်ထောင်စု ၇၀၀ အတွက် ဆီ ၅၀ ကျပ်သား နဲ့ ငွေသား တသောင်းကျပ်စီ ထောက်ပံ့လှူဒါန်းခဲ့တာလို့ သိရပါတယ်။

ခင်ဦးမြို့နယ်မှာ စစ်ကောင်စီတပ်တွေက ၂၀၂၁ ခုနှစ် ဖေဖော်ဝါရီ ၁ ရက်အာဏာသိမ်းပြီးချိန်ကစပြီး ၂၀၂၃ ခုနှစ် ဖေဖော်ဝါရီလ ၁ ရက် ၂ နှစ်ပြည့်အချိန်ထိ ကျေးရွာပေါင်း ၆၃ ရွာက နေအိမ်ပေါင်း ၃၇၀၀ အထိ မီးရှို့ဖျက်ဆီးခဲ့တာကြောင့် မီးဘေးသင့် အိုးမဲ့အိမ်မဲ့ပြည်သူ ၁၈၀၀၀ ခန့်အထိရှိနေပြီလို့ ဆိုပါတယ်။

ခင်ဦး၊ ဇန်နဝါရီ ၃၀၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်၊ ဗျိုင်းကြိုင်ရွာက ဒေသခံ ၂၀ ဦးကို စစ်ကိုင်း တပ်မ ၃၃ ကတပ်သားတွေက ဇန်နဝါရီလ ၃၀ ရက် ဒီ‌နေ့မနက်ပိုင်းမှာ ဝင်ရောက်လာပြီး ဖမ်းဆီးထားတယ်လို့ သိရပါတယ်။

မအူပင်မြို့ပေါ်ကနေ အင်အား ၈၀ ကျော်ရှိတဲ့ စစ်ကိုင်းတပ်မ ၃၃ တပ်သားတွေက ဇန်နဝါရီလ ၃၀ ရက် မနက်ပိုင်းမှာ ဗျိုင်းကြိုင်ကျေးရွာက ဒေသခံ ၂၀ ဦး ဖမ်းဆီးထားပြီး နေအိမ်တွေကို မီးရှို့နေတယ်လို့ FIRE DRAGON PDF ဗိုလ်‌ပျောက်ကြီးက ပြောပါတယ်။

“မနက် ၉ နာရီလောက်ကနေ မအူပင်ကနေ စထွက်လာပြီးတော့ ရွှေဘိုမြို့နယ် အင်ကြင်းပင်ရွာအနောက်ဘက်က တဲတွေမီးရှို့တယ်။ ခင်ဦးမြို့နယ် ဗိုင်းကြိုင်ရွာမှာ မီးရှို့နေတယ်။ အိမ်ခြေက ၁၅၀ လောက်ပဲရှိတာ။ အခုမှ မီးစရှို့နေတာ။ စစ်ခွေးတွေက အဲဒီရွာမှာ ခဏနားနေတယ်။ ပြည်သူ ၂၀ ကျော်လောက် အဖမ်းခံထားရတယ်။ တပ်မ ၃၃ က စစ်ခွေးတွေနဲ့ ပျူတွေဝင်ရောက်နေတာ” လို့ ဗိုလ်ပျောက်ကြီးက ပြောပါတယ်။

ဗျိုင်းကြိုင်ကျေးရွာက ဖမ်းခံရသူတွေဟာ အသက် ၄၀ ကျော်နဲ့ ၅၀ ဝန်းကျင်အမျိုးသားတွေ ဖြစ်ကြပြီး ကလေးအမေတွေကိုပါ ဖမ်းဆီးထားကာ လက်ရှိစစ်ကြောင်းဝင်လာလို့ ထွက်ပြေးရသူ ၇၀၀ ကျော်ရှိတယ်လို့ ဆက်ပြောပါတယ်။

ဗျိုင်းကြိုင်ရွာကနေ စစ်သားအင်အား ၄၀ နဲ့ခွဲထွက်သွားပြီး ယခုအချိန်မှာ စိုင်တိုးရွာ မီးရှို့နေတယ်လို့ ဆက်ပြောပါတယ်။

ရွှေဘို၊ ဇန်နဝါရီ ၂၉၊ ၂၀၂၃။

စစ်ကိုင်းတိုင်းဒေသကြီး၊ ရွှေဘိုခရိုင်၊ ခင်ဦးမြို့နယ်အတွင်းမှာ နေ့တိုင်းနီးပါး ထိတွေ့တိုက်ပွဲနဲ့ ဖိနှိပ်မှုတွေကြားကပဲ ဥပဒေရေးရာတွေ စီရင်ဆောင်ရွက်နိုင်ဖို့ရည်ရွယ်ချက်နဲ့ မြို့နယ်တရားရေးအဖွဲ့ရုံးကို ဇန်နဝါရီလ ၂၈ ရက်မနေ့က စတင်ဖွင့်လှစ်ခဲ့တယ်လို့ ခင်ဦး PDF တာဝန်ရှိသူတဦးက ပြောပါတယ်။

“တိုက်ပွဲတွေနဲ့ မီးလောင်ဖျက်ဆီးမှုတွေကြားကပဲ တရားဥပဒေစိုးမိုးရေး တရားစီရင်မှုတွေမှာ ဖက်ဒရယ်စနစ်နဲ့ ဆောင်ရွက်နိုင်ဖို့ တရားရေးအဖွဲ့ရုံးဖွင့်လှစ်နိုင်အောင်စီစဉ်ခဲ့တာပါ။ ဇန်နဝါရီလ ၂၄ ရက်နေ့ကစပြီး ဖွင့်လှစ်နိုင်အောင်စီစဉ်နေတာပါ။ ခုတော့ ဖွင့်လှစ်ထားပါပြီ”လို့ သူကဆက်ပြောပါတယ်။

အမျိုးသားညီညွတ်ရေးအစိုးရ (NUG) တရားရေးဝန်ကြီးဌာန တရားဥပဒေစိုးမိုးရေးနဲ့ တရားစီရင်ရေးတွေကို နိုင်ငံတကာဥပဒေ၊ လူအခွင့်အရေးဆိုင်ရာဥပဒေတွေ၊ ဖက်ဒရယ်စနစ်ကိုမသွေဖယ်တဲ့ ဥပဒေတွေနဲ့အညီ စီရင်ဆောင်ရွက်နိုင်ဖို့ တရားရေးအဖွဲ့ရုံး ဖွင့်လှစ်လိုက်တာလို့ ဆိုပါတယ်။

ဖွင့်ပွဲကို ခင်ဦး မြို့နယ် အုပ်ချုပ်ရေး ခေါင်းဆောင်နဲ့အတူ အုပ်ချုပ်ရေးအဖွဲ့တာဝန်ခံအသီးသီး၊ ပြည်သူ့ကာ ကွယ်ရေးအဖွဲ့ ခေါင်းဆောင်၊ တိုက်နယ်ခေါင်းဆောင်တွေနဲ့အတူ ရပ်/ ကျေး ပကဖတွေက တက်ရောက်အားပေး ဖွင့်လှစ်ခဲ့ကြတယ်လို့ ဆိုပါတယ်။