ကျောက်ဖြူ

မြေလတ်အသံ၊ နိုဝင်ဘာ ၁၆၊ ၂၀၂၅ ။

ရခိုင်ပြည်နယ်၊ ကျောက်ဖြူမြို့နယ်၊ မင်းပြင်ရွာအနီး ရေဒါစခန်းမှာ တန်းစီဓာတ်ပုံရိုက်နေတဲ့ စစ်ကော်မရှင်တပ်ဖွဲ့ဝင်တွေ လက်နက်ကြီးထိမှန်ကာ အစု လိုက်အပြုံလိုက်သေဆုံးခဲ့တဲ့ဖြစ်စဥ်အပေါ် စစ်တပ်ထောက်ခံသူတွေအကြား ဝေဖန်မှုတွေမြင့်တက်နေပါတယ်။

နိုဝင်ဘာလ ၁၄ ရက်မှာ AA တပ်ဖွဲ့တွေ ထိန်းချုပ်ထားတဲ့ မင်းပြင်ရွာအနီး ရေဒါစခန်းကို စစ်ကော်မရှင်စစ်ကြောင်းတွေက အင်အားအလုံးအရင်းနဲ့ ထိုးစစ်ဆင်တိုက်ခိုက်လာတာကြောင့် AA တပ်ဖွဲ့ဝင်တွေ ဆုတ်ခွာပေးလိုက်ပြီး စစ်ကော်မရှင်တပ်ဖွဲ့တွေက ဝင်ရောက်တပ်စွဲလိုက်တယ်လို့ ရခိုင်ကလာတဲ့သတင်းတွေအရ သိရပါတယ်။

စစ်ကော်မရှင်စစ်ကြောင်းတွေက ပြန်လည်ဝင်ရောက်ထိန်းချုပ်ထားနိုင်တဲ့အခြေအနေကို မှတ်တမ်းဓာတ်ပုံရိုက်ကူးဖို့လုပ်ဆောင်နေချိန် လက်နက်ကြီးဗုံးသီးကျရောက်ပေါက်ကွဲခဲ့တာကြောင့် အစုလိုက် သေဆုံးခဲ့တာပါ။

လူမှုကွန်ယက်မှာပျံ့နှံ့လာတဲ့ စစ်ကော်မရှင်တပ်သားတွေ လက်နက်ကြီးဗုံးသီးထိမှန်သေဆုံးမှုကို ဒရုန်းနဲ့ရိုက်ကူးထားတဲ့မှတ်တမ်းရုပ်သံအရ စစ်ကော်မရှင်တပ်သားတွေဟာ စခန်းအလယ်ကွင်းပြင်မှာ ဓာတ်ပုံရိုက်ဖို့ တန်းစီနေချိန် လက်နက်ကြီးဗုံးသီးက Squad တည့်တည့်ကို ကျရောက်ပေါက်ကွဲခဲ့တာပါ။

စစ်ကော်မရှင်တပ်ဖွဲ့ဝင် ၂၀ ဦးခန့်ဟာ ဓာတ်ပုံရိုက်ကူးခံဖို့အတွက် ပထမတန်းမှာ ထိုင်လျက်၊ ဒုတိယတန်းမှာ မတ်တပ်ရပ်လျက် တန်းစီနေတာဖြစ်ပြီး ပေါက်ကွဲမှုဖြစ်ပြီးနောက် နေရာမှာပဲအားလုံး သေဆုံးခဲ့တာလည်း ဖြစ်ပါတယ်။

အဲ့ဒီဖြစ်စဥ်နဲ့ပတ်သက်ပြီး စစ်တပ်ကိုထောက်ခံရေးသားနေတဲ့တယ်လီဂရမ်ချန်နယ်တွေမှာ ဝေဖန်မှုတွေလည်း မြင့်တက်နေပါတယ်။

အဲ့ဒီရေဒါစခန်းမှာ စစ်ကော်မရှင်တပ်သားအစုလိုက်သေဆုံးမှုဖြစ်စဥ် ရုပ်သံမှတ်တမ်းပျံ့နှံ့မလာခင်အထိ စစ်တပ်ထောက်ခံတဲ့တယ်လီဂရမ်တွေမှာ ၎င်းသတင်းမှာ သတင်းမှားဖြစ်ကြောင်း ဝိုင်းဝန်းပုံဖော်နေခဲ့ကြပြီး ရုပ်သံပျံ့နှံ့လာပြီးတဲ့နောက် စစ်တပ်ထောက်ခံသူတွေအကြား ဝေဖန်မှုတွေ မြင့်တက်လာတာပါ။

ဖြစ်စဥ်အပေါ် စစ်တပ်ထောက်ခံသူ တယ်လီဂရမ်ချန်နယ်တခုက စစ်မြေပြင်ခေါင်းဆောင်တွေအနေနဲ့ အတွေ့အကြုံရင့်ကျက်သင့်ကြောင်း၊ ခေါင်းဆောင်တွေရဲ့ ညွှန်ကြားချက်မှားယွင်းမှုတွေအောက်မှာ အောက်ခြေတပ်ဖွဲ့ဝင်တွေ ပေးဆပ်လိုက်ရကြောင်း၊ ဂျန်မာတွေရှိတယ်ဆိုကာ ရန်သူကို လျှော့တွက်ကြကြောင်း၊ လက် နက်ကြီးပစ်ချက်တိကျထိမှန်သွားတဲ့အပေါ် ဒရုန်းကင်မရာနဲ့မှတ်တမ်းတင်နိုင်ခဲ့တဲ့အတွက် တပ်မတော်သိက္ခာကျကြောင်း၊ ယခုအဖြစ်အပျက်ကို သင်ခန်းစာယူကာ AA ကိုလျှော့မတွက်သင့်ကြောင်း ဝေဖန်ပြစ်တင်ရေးသားထားပါတယ်။

အဲ့ဒီ တယ်လီဂရမ်ပို့စ်အောက်မှာ စစ်တပ်ထောက်ခံသူတွေကလည်း မှတ်ချက်ပေးဝေဖန်နေကြပြီး ရန်သူကို အထင်မသေးသင့်ကြောင်း၊ စစ်ခေါင်းဆောင်တွေပေါ့လျော့ကြကြောင်းဖြင့် မှတ်ချက်ပေး ရေးသားနေကြတာပါ။

အဲ့ဒီတိုက်ခိုက်ခံရမှုမှာ ဓာတ်ပုံရိုက်ဖို့တန်းစီနေတဲ့ စစ်ကော်မရှင်တပ်ဖွဲ့ဝင်တွေအပါအဝင် ၃၀ ခန့် သေဆုံးမှုရှိခဲ့တယ်လို့ ရခိုင်သတင်းတွေမှာဖော်ပြပါတယ်။

ကျောက်ဖြူမြို့နယ်မှာ စစ်ကော်မရှင်တပ်က အခုနှစ်မတ်လကစတင်ကာ ကြည်း/ရေ/လေပူးပေါင်း အင်အားတွေနဲ့ အကြိမ်ကြိမ်ထိုးစစ်ဆင်နေလို့ လက်ရှိအထိ အာရက္ခတပ်တော်-AA နဲ့တိုက်ပွဲတွေ ဆက်လက်ပြင်းထန်နေပြီး တိုက်ပွဲတွေအတွင်း စစ်ကော်မရှင်တပ်ဖွဲ့ဝင်တွေ ထိခိုက်သေဆုံးမှုတွေ များနေတာလည်းဖြစ်ပါတယ်။