ကျောက်ပန်းတောင်းမြို့နယ်

◾️တောင်းတဲ့ပိုက်ဆံမပေးလို့ အမျိုးသမီးတဦးကို ရိုက်နှက်လို့ ပြင်းထန်ဒဏ်ရာရ

ကျောက်ပန်းတောင်း၊ ဩဂုတ် ၁၇၊ ၂၀၂၆။

မန္တလေးတိုင်း၊ ကျောက်ပန်းတောင်းမြို့နယ်၊ ပုပ္ပါးတောင်အရှေ့ဘက်က ကျေးရွာတွေကို စစ်ကောင်စီစစ်ကြောင်းက နေ့စဉ်ဆိုသလို မီးရှို့ကာ ပြည်သူတွေရဲ့ ပစ္စည်းတွေကို သိမ်းယူနေပြီး၊ အမျိုးသမီးတဦးကိုလည်း ရိုက်နှက်ခဲ့တဲ့အတွက် ဒဏ်ရာပြင်းထန်စွာ ရရှိခဲ့တယ်လို့ ဒေသခံတွေဆီက သိရပါတယ်။

ရွာစဉ်ပတ် မီးလိုက်ရှို့နေ့တဲ့ စစ်ကြောင်းဟာ ဒီဒုတ်ကုန်းရွာမှာ ညအိပ်ရပ်နားခဲ့ပြီး သြဂုတ် ၁၆ ရက် မနေ့ မနက်ပိုင်းမှာတော့ အဲ့ဒီကနေ ၁ မိုင်ခန့်ဝေးတဲ့ လေးပင်ရွာကို ဝင်ရောက်ကာ အဲဒီကမှတဆင့် ဒေသအခေါ် ဖလံကျင်းတောတိုက် (လယ်တော) ထဲက နေအိမ် ၃ လုံးနဲ့ ကမ္ဘားတဲရွာက နေအိမ်တွေကို မီးရှို့ခဲ့တာလို့ ပြောပါတယ်။

အဆိုပါစစ်ကြောင်း လေးပင်ရွာကို ဝင်လာချိန်မှာတော့ ရွာကျောင်းဆရာတော်က တောင်းပန်ခဲ့တဲ့အတွက် နေအိမ်တွေကို မီးမရှို့ပေမယ့် လိုက်ထရပ်ကား ၁ စီး၊ ငွေကျပ် ၄ သိန်း၊ ဖုန်း ၁ လုံးနဲ့ အခြားအဖိုးတန် ပစ္စည်းတွေကို သိမ်းယူသွားတယ်လို့ ဆိုပါတယ်။

“ဘုန်းကြီးက အိမ်တွေကို မီးမရှို့ဖို့တားတာ စစ်သားက မီးမရှို့လို့မရဘူးဆိုပြီး ပြောတာ၊ နောက်ဆုံးမှ မီးမရှို့ပဲနဲ့ ရွာထဲက ပစ္စည်းတွေကိုယူသွားတာ။ မီးဖွားထားတဲ့ အမျိုးသမီးဆီက ပိုက်ဆံ သုံးသိန်းကိုလည်း ယူသွားတယ်။ မီးဖွားသူကို ကူလုပ်ပေးနေတဲ့ အမျိုးသမီးငယ်လေးကိုလည်း ငွေတောင်းတာကို ပေးတာနည်းလို့ဆိုပြီး ရိုက်လို့ခြောက်ချက် ချုပ်လိုက်ရတယ်။ အမျိုးသမီး ၂ ဦးဆီက ငွေ ၄ သိန်းရယ် ဖုန်း ၁ လုံးရယ် ယူသွားတာ” လို့ ဒေသခံတဦးက ပြောပါတယ်။

အဲဒီစစ်ကြောင်းက ကမ္ဘားတဲ(မြောက်)နဲ့ တောင်ရွာက နေအိမ်တွေကိုမီးရှို့ခဲ့တယ်လို့ ကြားရပေမယ့် တရွာလုံးရဲ့ပျက်ဆီးတဲ့ နေအိမ်အရေအတွက်ကိုတော့ စုံစမ်းနေဆဲဖြစ်ပြီး၊ စစ်သားနဲ့ ရဲ အင်အား ၇၀၀ ခန့်နဲ့ လှည့်လည်နေတဲ့ အဲ့ဒီစစ်ကြောင်းထဲကို လိုက်ပါလာသူတွေဟာ ဆိုင်ကယ်တွေ၊ ကားတွေအပြင် ခြေလျှင်လိုက်ပါသူတွေနဲ့အတူ ကူလည်ရွာက နေအိမ် ၁ လုံးနဲ့ ချောင်းခြားရွာက နေအိမ် ၂ လုံးကို လွန်ခဲ့တဲ့ ၂ ရက်က မီးရှို့ခဲ့ ပါတယ်။

ပြီးခဲ့တဲ့ဩဂုတ် ၁၄ ရက်နေ့ကလည်း သုံးအိမ်ကုန်းရွာက နေအိမ် ၁၇ လုံးခန့်နဲ့ သီးကုန်းရွာက နေအိမ် ၃၀ လာက်အပြင် ဒီးဒုတ်ကုန်းရွာက နေအိမ် ၁၆ လုံး၊ နွားစာတိုက်နဲ့ လယ်ယာသုံးပစ္စည်းတွေကိုလည်း မီးရှို့ဖျက်စီးခဲ့သလို သယ်ယူလို့ လွယ်ကူမယ့် လယ်ယာသုံးပစ္စည်းတွေနဲ့ အခြားအဖိုးတန် ပစ္စည်းတွေကိုလည်းသိမ်းယူသွားတယ်လို့ ဒေသခံတွေက ပြောပါတယ်။

ဒီကနေ့ မနက်ပိုင်းမှာတော့ စစ်ကြောင်းဟာ ကမ္ဘားတဲရွာကနေ သရက်ချိုကုန်းရွာကို ဝင်ရောက်ကာ လက်နက်ကြီး/ငယ်တွေနဲ့ပစ်ခတ်ပြီး၊ တောင်သာမြို့နယ် စွန်းလွန်းရွာဘက်ကနေ၊ မလှိုင်မြို့နယ်၊ တောင်ရိုးတဲရွာဘက်ကို ထွက်ခွါသွားတယ်လို့ မလှိုင်အခြေစိုက် လူထုသတင်းကွန်ယက်ရဲ့ တာဝန်ရှိသူတဦးဆီက သိရပါတယ်။

သတင်း – သော်တာအောင်

■ ထောင်နဲ့ချီတဲ့ ဒေသခံတွေ မိုးရေထဲမှာ ထွက်ပြေးနေရ

ကျောက်ပန်းတောင်း၊ ဩဂုတ် ၁၅၊ ၂၀၂၆။

မန္တလေးတိုင်း ကျောက်ပန်းတောင်းမြို့နယ်ထဲက ကျေးရွာတွေမှာ စစ်အုပ်စုက ပြည်သူ့တွေရဲ့ နေအိမ်တွေကို လိုက်လံမီးရှို့နေလို့ အိမ်ခြေ ၆၀ ကျော်ပျက်စီးခဲ့တယ်လို့ ဒေသခံတွေဆီက သိရပါတယ်။

ကျောက်ပန်းတောင်း – မြင်းခြံလမ်းပေါ်က သီးကုန်းရွာနဲ့ သုံးအိမ်ကုန်းရွာတွေက နေအိမ်တွေကို ဩဂုတ်လ ၁၄ ရက် မနေ့က နေ့လယ်ပိုင်းမှာ စစ်ကောင်စီတပ်တွေ ဝင်ရောက်မီးရှို့ခဲ့တာလို့ ဆိုပါတယ်။

“သီးကုန်းရွာ အိမ်ခြေ ၃၀ လောက်၊ သုံးအိမ်ကုန်း ၁၇ အိမ်နဲ့ အရင်နေ့က ကူလည်(ရွာ)က ၁ အိမ်နဲ့ ချောင်းခြားရွာက နေအိမ် ၂ လုံးကိုလည်း မီးရှို့သွားခဲ့ပါတယ်။ စစ်တပ်က မနေ့က သီးကုန်းကနေ ၂ မိုင်ကျော်လောက်ဝေးတဲ့ ဒီးဒုတ်ကုန်းရွာမှာ စခန်းချပြီး ဒီမနက် ဒီးဒုတ်ကုန်းရွာကို မီးဆက်ရှို့ပါတယ်။ မီးလောင်ပျက်စီးသတင်းတော့ အသေးစိတ်မသိရသေးဘူး။ တိုက်ပွဲရှိလို့ မဟုတ်ပဲ ရှို့ချင်လို့ကို ရှို့နေတာ PDF နဲ့ ပြည်သူကို သွေးခွဲတာ” လို့ ဒေသခံတဦးက ပြောပါတယ်။

စစ်အုပ်စုဟာ အင်အား ၇၀၀ ဦးလောက်နဲ့ မီးရှို့ရာမှာ ရွာလုံးကျွတ်မီးရိူ့တာမဟုတ်ပဲ ကျပ်သိန်းရာကျော်တန်အိမ်တွေနဲ့ ထောင်ဂဏန်းတန်တဲ့ နေအိမ်တွေကို တမင်ရွေးချယ်မီးရှို့တာဖြစ်ပြီး စိတ်ဓါတ်စစ်ဆင်ရေး ဖြစ်နိုင်တယ်လို့ ယူဆကြောင်း သူကဆက်ပြောပါတယ်။

ကျေးရွာတွေကိုမီးလိုက်ရှို့စဉ် လွတ်ရာကို ထွက်ပြေးခဲ့လို့ ကားမှောက်ပြီး ဒေသခံ ၂ ဦး အသက်ဆုံးရှုံးခဲ့ရတယ်လို့ ကြားသိရပြီး အသေးစိတ်ကို မြေလတ်အသံက စုံစမ်းနေဆဲဖြစ်ပါတယ်။

ဒေသခံရွာသားတွေ ထွက်ပြေးတိမ်းရှောင်စဉ် အဲဒီစစ်အုပ်စုဟာ ဒေသခံတွေရဲ့ ကြက်၊ ဝက်နဲ့ နွားတွေကိုလည်း ဖမ်းဆီးခိုးယူသွားလို့ ဒေသခံတွေက ပြောပါတယ်။

“မီးရိူ့တာက မိတ္ထီလာတပ်ကလို့ပဲ သိထားပါတယ်။ ဘယ်နှစ်အိမ်ရိူ့တယ်ဆိုတာတော့ တိတိကျကျ မသိရသေးဘူး” လို့ ဒေသခံ ပြည်သူ့အကွယ်ရေးတပ်ဖွဲ့ဝင်တဦးက ပြောပါတယ်။

မီးရိူ့ခံရပြီး စစ်ရှောင်နေရတဲ့အတွက်လက်ရှိမှာ စားသောက်နေထိုင်ရေးနဲ့ ပြန်လည်ထူထောင်ရေးအတွက် အကူညီတွေလိုအပ်နေတယ်လို့ သူက ဆက်ပြောပါတယ်။

ပြီးခဲ့တဲ့ ဩဂုတ်လ ၅ ရက်နေ့ကလည်း စစ်အုပ်စုဟာ ကျောက်ပန်းတောင်းမြို့နယ်၊ ကမ်းဖြူရွာ၊ ကြီးကန်ရွာနဲ့ ကြို့ပင်သာရွာတို့ကို ဝင်ရောက်ပြီး ပြည်သူပိုင်ပစ္စည်းတွေကို ခိုးယူကာ စိတ္တိန်း(မြောက်) ရွာကိုလည်း မီးရှို့ခဲ့တဲ့အတွက် နွားစာတိုက်အပါ နေအိမ်အလုံး ၂၀ လောက် ပျက်စီးခဲ့တယ်လို့ မလှိုင် အခြေစိုက် လူထုသတင်းကွန်ယက်မှာ ဖော်ပြထားပါတယ်။

သတင်း – သော်တာအောင်