မဲပေးသူ ၅၀ ရာခိုင်နှုန်းအထက်ရှိရင် လူအများစုဆန္ဒအဖြစ် သတ်မှတ်နိုင်တယ်လို့ဆို

မြေလတ်အသံ၊ ဩဂုတ် ၁၃၊ ၂၀၂၅။

ရွေးကောက်ပွဲကျင်းပနိုင်မယ့်မြို့နယ်တွေ ပိုမိုတိုးတက်ရရှိရေး ဆောင်ရွက်ဖို့ စစ်ကော်မရှင်ဥက္ကဌ ဗိုလ်ချုပ်မှူးကြီး မင်းအောင်လှိုင် က ပြောကြားခဲ့တယ်လို့ စစ်ကော်မရှင်ပိုင်မီဒီယာတွေက ဖော်ပြပါတယ်။

စစ်ကော်မရှင်ကို ပြောင်းလဲဖွဲ့စည်းပြီးတဲ့နောက် ပထမအကြိမ်အစည်းအဝေးကို ဩဂုတ် ၁၂ ရက် ယမန်နေ့က နေပြည်တော်မှာ စစ်ခေါင်းဆောင် ဦးဆောင်ကာ ပြုလုပ်ခဲ့ပြီး အစည်းအဝေးမှာ အခုလိုပြောကြားခဲ့တာပါ။

ရွေးကောက်ပွဲကျင်းပနိုင်မယ့်မြို့နယ်တွေ ပိုမိုတိုးတက်ရရှိရေး ဆောင်ရွက်ရမယ့် စစ်ဆင်ရေးနဲ့ လုံခြုံရေးဆိုင်ရာ ကိစ္စရပ်တွေကို အဲ့ဒီအစည်းအဝေးမှာ ညှိနှိုင်းမှာကြားခဲ့တယ်လို့ ဆိုပါတယ်။

ရွေးကောက်ပွဲဥပဒေအရ ဆန္ဒမဲပေးသူ မည်သည့်ရာခိုင်နှုန်းရှိမှ ရွေးကောက်ပွဲအောင်မြင်မယ်လို့ သတ်မှတ်ပြဌာန်းထားခြင်းမရှိကြောင်း၊ ၅၀ ရာခိုင်နှုန်းနဲ့အထက် ဆန္ဒမဲပေးနိုင်မယ်ဆိုပါက လူထုအများစုရဲ့ ဆန္ဒပါဝင်တယ်လို့ သတ်မှတ်နိုင်မှာ ဖြစ်ကြောင်းလည်း ၎င်းက ပြောပါတယ်။

အလားတူ ဖွဲ့စည်းပုံအခြေခံဥပဒေအရ လွှတ်တော်အစည်းအဝေးအထမြောက်ဖို့အတွက် ပထမဆုံးလွှတ်တော်အစည်းအဝေးကျင်းပရာမှာ လွှတ်တော်တက်ရောက်ခွင့်ရှိသူ ကိုယ်စားလှယ်ဦးရေရဲ့ ထက်ဝက်ကျော်တက်ရောက်ပါက အစည်းအဝေး အထမြောက်တယ်လို့ ဖော်ပြထားကြောင်း၊ အထမမြောက်ပါက ဒုတိယအကြိမ်အစည်းအဝေးမှာ လွှတ်တော်တက်ရောက်ခွင့်ရှိသူ ကိုယ်စားလှယ် အနည်းဆုံး ၃ ပုံ ၁ ပုံ တက်ရောက်ပါက အစည်းအဝေးအထမြောက်ကြောင်း ဖော်ပြထားတယ်လို့လည်း ဆိုပါတယ်။

ဒါကြောင့် လွှတ်တော်အစည်းအဝေးကျင်းပချိန်မှာ လွှတ်တော်ကိုယ်စားလှယ်ဦးရေအနည်းဆုံး ၅၀ ရာခိုင်နှုန်းတက်ရောက်နိုင်ရေး ရွေးကောက်ပွဲကျင်းပနိုင်မယ့် မြို့နယ်အားလုံးမှာ ကျင်းပနိုင်ရေး ဆောင်ရွက်ရမယ်လို့လည်း ဆိုပါတယ်။

ဇူလိုင် ၃၁ ရက်မှာ နိုင်ငံတဝှမ်း တိုင်းနဲ့ ပြည်နယ် ၉ ခုက မြို့နယ် ၆၃ ခုကို အမျိုးသားကာကွယ်ရေးနဲ့လုံခြုံရေးကောင်စီ(ကာလုံ)က ရက် ၉၀ စစ်အုပ်ချုပ်ရေးကြေညာခဲ့ပြီး အဲ့ဒီမြို့နယ်အများစုဟာ တိုင်းရင်းသားတော်လှန်ရေးတပ်တွေနဲ့ ပြည်သူ့ကာကွယ်ရေးတပ်ဖွဲ့တွေ ထိန်းချုပ်ထားတဲ့ ဒေသတွေဖြစ်တာကြောင့် စစ်ကော်မရှင်က ရွေးကောက်ပွဲမလုပ်နိုင်ဘူးလို့ နိုင်ငံရေးလေ့လာသူတွေက ခန့်မှန်းထားပါတယ်။

အာရက္ခတပ်တော် – AA က ဩဂုတ် ၁၁ ရက်နေ့က ပြုလုပ်တဲ့ သတင်းစာရှင်းလင်းပွဲမှာ ရခိုင်ပြည်နယ်အတွင်းက AA အုပ်ချုပ်နေတဲ့ မြို့နယ်တွေမှာ ရွေးကောက်ပွဲပြုလုပ်ဖို့ ခွင့်မပြုကြောင်းပြောဆိုထားပြီး ကရင့် အမျိုးသားအစည်းအရုံး – KNU ဥက္ကဌကလည်း ရွေးကောက်ပွဲကို လက်မခံဖို့ ပြောဆိုထားသလို မကွေးနဲ့မန္တလေးတိုင်းက ပြည်သူ့ကာကွယ်ရေးတပ်ဖွဲ့တချို့က စစ်ကော်မရှင်က ပြုလုပ်မယ့် ရွေးကောက်ပွဲမှာ ပါဝင်သူတွေကို အရေးယူမယ်လို့ ထုတ်ပြန်ထားပါတယ်။

ပြီးခဲ့တဲ့သီတင်းပတ်ထဲမှာပဲ စစ်ကော်မရှင်ရဲ့ ရှမ်းပြည်နယ်ဝန်ကြီးချုပ်နဲ့အဖွဲ့က “ဝ” နဲ့ မိုင်းလား ကိုယ်ပိုင် အုပ်ချုပ်ခွင့်ရဒေသတွေကို သွားရောက်ပြီး ဒေသဖွံ့ ဖြိုးတိုးတက်ရေးဆိုကာ ဆွေးနွေးမှုတွေလုပ်ဆောင်ခဲ့ကြောင်း စစ်ကော်မရှင်ရုပ်သံသတင်းတွေက ဖော်ပြပါတယ်။

မြေလတ်အသံ၊ ဩဂုတ် ၉၊ ၂၀၂၅။

ရွေးကောက်ပွဲအောင်မြင်စွာ ကျင်းပနိုင်ရေးအတွက် ဝိုင်းဝန်းဆောင်ရွက်ကြဖို့ စစ်ကော်မရှင်လက်အောက် ကျန်းမာရေးဌာနဝန်ကြီး ဒေါက်တာ သက်ခိုင်ဝင်းက မှာကြားပြောဆိုလိုက်ပါတယ်။

ဩဂုတ် ၈ ရက်က နေပြည်တော်၊ ကျန်းမာရေးဝန်ကြီးဌာနရုံးမှာပြုလုပ်တဲ့ ကုတင် ၁၀၀ နဲ့အထက်ဆေးရုံအုပ်ကြီးတွေနဲ့ အထူးကုဆရာဝန်တွေကို တွေ့ဆုံပွဲမှာ စစ်ကော်မရှင်ဝန်ကြီးက အခုလိုပြောဆိုခဲ့တာပါ။

ဒေသအလိုက် ကျန်းမာရေးဝန်ထမ်းတွေအနေနဲ့ “မကြာမီမှာကျင်းပမယ့် ပါတီစုံဒီမိုကရေစီအထွေထွေရွေးကောက်ပွဲလုပ်ငန်းစဥ်များ အောင်မြင်စေရေး ကျရာကဏ္ဍမှ တာဝန်ကျေပွန်စွာ ပူးပေါင်းပါဝင်ဆောင်ရွက်ရန်” ဆိုကာ ၎င်းက မှာကြားပါတယ်။

စစ်ကော်မရှင်က ပြုလုပ်မယ့်ရွေးကောက်ပွဲမှာ ပူးပေါင်းဆောင်ရွက်တာတွေ မလုပ်ဆောင်ကြဖို့နဲ့ မလိုက်နာရင် ထိရောက်တဲ့အရေးယူမှုတွေလုပ်ဆောင်မယ်လို့ ဩဂုတ်လဆန်းပိုင်းမှာ တော်လှန်ရေးအင်အားစုတွေဘက်က ထုတ်ပြန်ထားပါတယ်။

စစ်ကော်မရှင်က ပြုလုပ်မယ့်ရွေးကောက်ပွဲအတွက် စစ်ကော်မရှင်တပ်နဲ့လက်အောက် ရပ်/ကျေးအုပ်ချုပ်ရေးမှူးတွေ၊ Non CDM ဝန်ထမ်းတွေနဲ့ ကြံ့ခိုင်ရေးပါတီဝင်တွေက အဓိကပါဝင်ဆောင်ရွက်နေတယ်လို့လည်း တော်လှန်ရေးတပ်ဖွဲ့ဝင်တွေက ထုတ်ပြန်သတိပေးထားပါတယ်။

စစ်ကော်မရှင်က အခုနှစ်ကုန်ပိုင်းမှာ အထွေထွေရွေးကောက်ပွဲကျင်းပဖို့ပြင်ဆင်နေပြီး ရွေးကောက်ပွဲကို နယ်မြေအလိုက်ခွဲပြီး လုပ်ဆောင်မှာဖြစ်ကြောင်းပြောဆိုထားကာ ဝင်ရောက်ယှဥ်ပြိုင်မယ့်ပါတီ ၅၀ ကျော်ရှိတယ်လို့လည်း ဆိုပါတယ်။

မြေလတ်အသံ၊ ဩဂုတ် ၁၊ ၂၀၂၅။

စစ်ကောင်စီကိုဖျက်သိမ်းပြီး စစ်ဘက်၊ နယ်ဘက်ရာထူးတွေကို စိတ်ကြိုက်ခန့်နေတဲ့ စစ်ခေါင်းဆောင်တွေက စစ်ရေးချုပ်ရာထူးအပါ စစ်ဘက်ထိပ်ပိုင်းနေရာတချို့ကို အပြောင်းအလဲထပ်မံပြုလုပ်ခဲ့ပါတယ်။

နေပြည်တော်၊ ကာကွယ်ရေးဦးစီးချုပ်ရုံး(ကြည်း)ရဲ့ စစ်ရေးချုပ် ဒုတိယဗိုလ်ချုပ်ကြီး စိုးမင်းဦး စစ်ဘက်ရာထူးကနေ အနားပေးခံခဲ့ရပြီး ဇူလိုင် ၃၁ ရက် စစ်ကောင်စီထုတ်ပြန်ချက်အရ အသစ်ထပ်မံဖွဲ့စည်းတဲ့ ပြည်ထောင်စုရာထူးဝန်အဖွဲ့မှာ ဦးစိုးမင်းဦး အဖြစ် ဥက္ကဌရာထူးခန့်အပ်ထားတာကို တွေ့ရပါတယ်။

၎င်းရဲ့စစ်ရေးချုပ်နေရာကို နေပြည်တော်၊ စစ်ရုံးချုပ် အမှတ် ၅ စစ်ဆင်ရေးအထူးအဖွဲ့မှူး ဒုတိယ ဗိုလ်ချုပ်ကြီး ဖုန်းမြတ်က ရောက်ရှိသွားကြောင်း နေပြည်တော်ကလာတဲ့သတင်းတွေအရသိရပြီး လစ်လပ်သွားတဲ့ ကစထ ၅ မှူးနေရာကို ရှမ်းပြည်နယ်၊ တောင်ပိုင်းနဲ့ ကယားပြည်နယ်စစ်ဆင်ရေးတွေကို ကွပ်ကဲရတဲ့ အရှေ့ပိုင်းတိုင်းစစ်ဌာနချုပ်(ရပခ) တိုင်းမှူး ဗိုလ်ချုပ် ဇော်မင်းလတ် က ရာထူးတိုးနဲ့ ရောက်ရှိသွားပါတယ်။

DSA အပတ်စဥ် ၃၇ ဆင်း ဗိုလ်ချုပ် ဇော်မင်းလတ် ဟာ ရပခတိုင်းမှူးမတိုင်ခင်က စစ်တက္ကသိုလ် ကျောင်းအုပ်ကြီးနဲ့ နိုင်ငံတော်ကာကွယ်ရေးတက္ကသိုလ်(NDC) ကျောင်းအုပ်ကြီးဖြစ်ခဲ့ပြီး ပြီးခဲ့တဲ့ဇူလိုင်လအတွင်း မိုးဗြဲမြို့ကို စစ်ကောင်စီတပ်က ပြန်လည်ထိန်းချုပ်နိုင်ပြီးတဲ့နောက် ရပခတိုင်းမှူးကနေ ကစထမှူးအဖြစ် ရာ ထူးတိုးမြှင့်ခံရတာလည်း ဖြစ်ပါတယ်။

အလားတူ ရပခတိုင်းမှူး နေရာကို ရပ်စောက်မြို့အခြေစိုက် တိုက်ခိုက်ရေးကျောင်း(ဗထူး) ကျောင်းအုပ်ကြီး ဗိုလ်မှူးချုပ် နိုင်ဇော်လတ် အလုပ်သင်ဗိုလ်သင်တန်းအပတ်စဥ် ၂၅ က ရောက်ရှိသွားတယ်လို့ သိရပါတယ်။

ဒါ့အပြင် နေပြည်တော်၊ စစ်ရုံးချုပ်က ငွေစာရင်းရုံးညွှန်ကြားရေးမှူး ဗိုလ်ချုပ် သက်ထွန်းအောင် ကို ဗဟိုဘဏ် ဒုဥက္ကဌ၊ နိုင်ငံတော်ကာကွယ်ရေးတက္ကသိုလ် ကျောင်းအုပ်ကြီး ဗိုလ်ချုပ် နိုင်မင်းကျော် ကို နိုင်ငံခြားရေးဝန်ကြီးဌာန ဒုတိယဝန်ကြီးအဖြစ် ပြောင်းရွှေ့ခန့်အပ်ကြောင်းလည်း ယမန်နေ့ညပိုင်းမှာပဲ စစ်ကောင်စီက အမိန့် ထုတ်ပြန်ခဲ့ပါတယ်။

စေတုတ္တရာ၊ သြဂုတ် ၁၊ ၂၀၂၅။

စစ်ကောင်စီပြုလုပ်မယ့် ရွေးကောက်ပွဲနဲ့ပတ်သက်ပြီး ပူးပေါင်းလုပ်ဆောင်မယ့်သူတွေကို ထိရောက်စွာ အရေးယူသွားမယ်လို့ မန္တလေးတိုင်းနဲ့ မကွေးတိုင်းရှိ ဒေသခံတော်လှန်ရေးတပ်ဖွဲ့တချို့က ထုတ်ပြန်ထားပါတယ်။

မန္တလေးတိုင်း၊ နွားထိုးကြီးမြို့နယ်အတွင်း စစ်ကောင်စီရဲ့ ရွေးကောက်ပွဲ လုပ်ငန်းစဥ်တွေကို ပူးပေါင်း ဆောင်ရွက်တာနဲ့ အများပြည်သူကို စည်းရုံးလှုံ့ဆော်တာတွေ တားမြစ်ထားပြီး ကျူးလွန်ပါက မည်သူမဆို ထိရောက်စွာအရေးယူမယ်လို့ နွားထိုးကြီးမြို့နယ် ပကဖ၊ ပအဖ နဲ့ ပလဖ အဖွဲ့တို့ ထုတ်ပြန်ထားပါတယ်။

ဒါ့အပြင် မကွေးတိုင်း၊ မင်းဘူးခရိုင်၊ စေတုတ္တရာမြို့နယ်မှာ စစ်ကောင်စီရဲ့ ရွေးကောက်ပွဲနဲ့ပတ်သက်ပြီး ပူးပေါင်းလုပ်ဆောင်မယ့်သူတွေကို ထိရောက်စွာအရေးယူသွားမယ်လို့ စေတုတ္တရာမြို့နယ် ပြည်သူ့ကာကွယ်ရေးအဖွဲ့ ပကဖက သြဂုတ် ၁ ရက်မှာ ထုတ်ပြန်ထားပါတယ်။

စေတုတ္တရာမြို့နယ်ထဲမှာ စစ်ကောင်စီရဲ့ ရွေးကောက်ပွဲဖြစ်မြောက်ရေးအတွက် စည်းရုံးလှုံ့ဆော်တာ၊ ပါဝင်တာ၊ ကူညီတာတွေ မလုပ်ဆောင်ပေးဖို့နဲ့ လိုက်နာခြင်းမရှိပါက ပြင်းထန်စွာ အရေးယူမယ်လို့ ဆိုပါတယ်။

“ထုတ်ပြန်ရတဲ့ရည်ရွယ်ချက်က နိုင်ငံရေးနားမလည်တဲ့ ပြည်သူတွေကို ဖိအားပေးပြီး မဲပေးခိုင်းတာတွေ နဲ့ ဒီမိုကရေစီဟန်ပြပြီး စစ်အုပ်စုထွက်ပေါက်ရှာဖို့ ပြင်ဆင်လာတာတွေကြောင့်ပါ။”လို့ စေတုတ္တရာမြို့နယ် ပကဖ တာဝန်ခံတဦးက မြေလတ်အသံကို ပြောပါတယ်။

လက်ရှိမှာတော့ စေတုတ္တရာမြို့နယ်ထဲမှာ စစ်ကောင်စီရဲ့ တရားမဝင်ရွေးကောက်ပွဲ ဖြစ်မြောက်ရေးအတွက် မဲပေးစက်တွေနဲ့လေ့ကျင့်ပေးနေတာတွေ ကျေးရွာတွေကို အုပ်ချုပ်ရေးမှူးတွေ ခန့်အပ်ပြီး မဖြစ်မနေ မဲပေးရမယ်ဆိုတာတွေ လုပ်ဆောင်နေတယ်လို့ သူက ဆက်ပြောပါတယ်။

လုပ်ဆောင်ပေးနေတဲ့သူတွေထဲမှာ Non CDM ဝန်ထမ်း၊ ရပ်ကျေးအုပ်ချုပ်ရေးအဖွဲ့ဝင်တွေနဲ့ ကြံ့ခိုင်ရေးပါတီအဖွဲ့ဝင်တွေ ပါဝင်နေတယ်လို့ ဆိုပါတယ်။

“ရွေးကောက်ပွဲ နဲ့ ပတ်သက်ရင် မဲပေးနိုင်တဲ့ ရပ်ရွာတွေကို သူတို့တရားဝင်နယ်မြေလို သဘောထားမယ်။ မဲမပေးဘဲနေတဲ့ ကျေးရွာတွေကိုတော့ ရန်သူနယ်မြေသတ်မှတ်မယ်ဆိုတဲ့သဘောနဲ့ ပြောဆိုတာတွေလည်း ရှိနေတယ်ဗျ။”လို့ စေတုတ္တရာမြို့နယ် ပကဖအဖွဲ့ တာဝန်ခံတဦးက မြေလတ်အသံကို ပြောပါတယ်။

အခုလို စစ်ကောင်စီရဲ့ တရားမဝင် ရွေးကောက်ပွဲအတွက် ပါဝင်ပတ်သက်နေသူတွေကို ဆက်လက်မပါဝင်ဖို့ သတိပေးချက် ထုတ်ပြန်ပြီးတဲ့နောက်မှာ ပါဝင်နေဆဲဖြစ်ပါက ၎င်းတို့ ပါဝင်ပတ်သက်နေတဲ့ နေရာပေါ်မူတည်ပြီး ဖမ်းဆီးအရေးယူမှုတွေ လုပ်ဆောင်မယ်လို့ သူကဆက်ပြောပါတယ်။

စစ်ကောင်စီဘက်ကတော့ လာမယ့်ဒီဇင်ဘာလမှာ အထွေထွေရွေးကောက်ပွဲကျင်းပဖို့ ပြင်ဆင်နေပြီး နယ်မြေအလိုက်ခွဲပြီး လုပ်ဆောင်မှာဖြစ်ကာ ရွေးကောက်ပွဲဝင်မယ့်ပါတီ ၅၄ ပါတီရှိနေတယ်လို့လည်း ပြောဆိုထားပါတယ်။

စာတည်း – လင်း

မြေလတ်အသံ၊ ဩဂုတ် ၁၊ ၂၀၂၅။

စစ်ခေါင်းဆောင်တွေနဲ့ဖွဲ့စည်းထားတဲ့ အမျိုးသားကာကွယ်ရေးနဲ့လုံခြုံရေးကောင်စီက နိုင်ငံတဝှမ်း တိုင်းဒေသကြီးနဲ့ပြည်နယ် ၉ ခုက ၆၃ မြို့ကို အရေးပေါ်အခြေအနေသတ်မှတ်ကာ စစ်အုပ်ချုပ်ရေးကြေညာတယ်လို့ ဇူလိုင် ၃၁ ရက် မနေ့ညပိုင်းမှာ ထုတ်ပြန်ပါတယ်။

စစ်အုပ်ချုပ်ရေးကြေညာခံရတဲ့မြို့နယ်တွေဟာ ကချင်ပြည်နယ်ဆွမ်ပရာဘွမ်၊ ရွှေကူ၊ အင်ဂျားယန်၊ ဆော့လော်၊ ချီဖွေ၊ ကယားပြည် ရှားတော၊ ဖားဆောင်း၊ မယ်စဲ့၊ ကရင်ပြည်နယ် ကော့ကရိတ်၊ ကြာအင်းဆိပ်ကြီး၊ ချင်းပြည်နယ် ကန်ပက်လက်၊ ထန်တလန်၊ ပလက်ဝ၊ တွန်းဇံ၊ မင်းတပ်၊ မတူပီ၊ ဖလမ်း၊ စစ်ကိုင်းတိုင်း ထီးချိုင့်၊ ကောလင်း၊ ပင်လည်ဘူး၊ ခင်ဦး၊ ဝက်လက်၊ ကနီ၊ ဒီပဲယင်း၊ ပုလဲ၊ အင်းတော်၊ မကွေးတိုင်း ပေါက်၊ မြိုင်၊ ဆော၊ ထီးလင်း၊ ရေစကြို၊ မန္တလေးတိုင်း မိုးကုတ်၊ စဥ့်ကူး၊ ငါန်းဇွန်၊ ရခိုင်ပြည်နယ် ရမ်းဗြဲ၊ ပေါက်တော၊ ပုဏ္ဏားကျွန်း၊ ရသေ့တောင်၊ ဂွ၊ မောင်တော၊ ဘူးသီးတောင်၊ ကျောက်တော်၊ မင်းပြား ၊ မြေပုံ၊ မြောက်ဦး၊ သံတွဲ၊ အမ်း၊ တောင်ကုတ်၊ ရှမ်းပြည်နယ် နမ္မတူ၊ မဘိမ်း၊ ကွတ်ခိုင်၊ နမ့်ခမ်း၊ သိန္ဒီ၊ ကွမ်းလုံ၊ နမ့်ဆန်၊ မန်တုံ၊ ဟိုပန်၊ လောက်ကိုင်၊ ကုန်းကြမ်း၊ မိုးမိတ်၊ ကျောက်မဲ၊ သီပေါ၊ မိုင်းလား စတဲ့ မြို့နယ်တွေ ဖြစ်ပါတယ်။

အဲ့ဒီမြို့နယ်တွေထဲကအများစုဟာ ဒေသအလိုက် တိုင်းရင်းသားတပ်ဖွဲ့တွေဖြစ်တဲ့ KIA(ကချင်)၊ MNDAA(ကိုးကန့်)၊ TNLA(တအာဝ်း)၊ AA(အာရက္ခ) တပ်တွေနဲ့ KNDF(ကရင်နီကာကွယ်ရေးတပ်)၊ ပြည်သူ့ကာကွယ်ရေးတပ် PDF တပ်ဖွဲ့တွေက ထိန်းချုပ်ထားတဲ့မြို့နယ်တွေဖြစ်ပြီး မြို့နယ်တွေအလိုက်ရှိ စစ်ကောင်စီတပ်ရင်း/တပ်ဖွဲ့တွေအားလုံးနီးပါး တိုက်ခိုက်သိမ်းပိုက်ခံထားရပါတယ်။

စစ်ကိုင်းနဲ့မကွေးတိုင်းက မြို့နယ်တချို့မှာ စစ်ကောင်စီတပ်ရင်း/ တပ်ဖွဲ့တချို့ကျန်ရှိနေပေမယ့် မြို့ပေါ် ဧရိယာလောက်ကိုသာ ထိန်းချုပ်ထားနိုင်တာဖြစ်ပြီး စစ်တပ်နဲ့တိုက်ပွဲမဖြစ်တဲ့ အမျိုးသားဒီမိုကရေစီမဟာမိတ်တပ်(မိုင်းလား) NDAA တပ်ဖွဲ့ ထိန်းချုပ်ထားတဲ့ မိုင်းလားမြို့နဲ့ ” ဝ ” တပ်ဖွဲ့ UWSA ထိန်း ချုပ်ထားတဲ့ ဟိုပန်မြို့ကိုလည်း စစ်အုပ်ချုပ်ရေးစာရင်းမှာ ထည့်သွင်းထားပါ။

အထက်ဖော်ပြပါမြို့တွေကို အရေးပေါ်အခြေအနေအဖြစ်ကြေညာသတ်မှတ်ပြီး စစ်တိုင်းမှူး သို့မဟုတ် စစ်နယ်မြေမှူးတဦးဦးက စစ်အုပ်ချုပ်ရေးနဲ့ အုပ်ချုပ်မှာဖြစ်ပြီး ပြစ်မှု ၂၃ မျိုးကိုလည်း စစ်ခုံရုံးနဲ့စစ်ဆေးစီရင်မယ်လို့လည်း ဖော်ပြပါတယ်။

မကွေး၊ ဇန်နဝါရီ ၂၆၊ ၂၀၂၃။

မကွေးတိုင်း၊ ရေစကြိုမြို့နယ်ထဲက ကျေးရွာတရွာမှာ ပြည်သူတွေစိတ်ဓာတ်မကျဘဲ တော်လှန်ရေးမှာဆက်လက်ပါဝင်နိုင်ဖို့ နိုင်ငံရေးဆွေးနွေးပွဲတခု ကျင်းပပြုလုပ်ခဲ့တယ်လို့ သိရပါတယ်။

ဇန်နဝါရီလ ၂၄ ရက်နေ့လည် ၁ နာရီကနေ ၃ နာရီထိ ကျင်းပခဲ့ပြီး ဒေသကာကွယ်ရေးအဖွဲ့တွေ၊ ရပ်ရွာအဖွဲ့အစည်းတွေနဲ့ ကျောင်းသူ၊ကျောင်းသားတွေတက်ရောက်ခဲ့ကာ PDFနဲ့ ပြည်သူတွေကြား နားလည်မှုပိုရလာအောင်ရည်ရွယ်ပြီး လုပ်ခဲ့တာဖြစ်တယ်လို့ ဆိုပါတယ်။

“ဒီဘက်ဒေသတွေမှာက ခဏခဏမီးရှို့ခံရတော့ စိတ်ဓာတ်ပိုင်းဆိုင်ရာ ကျဆင်းမသွားအောင် အားပေးတဲ့ပုံစံမျိုးလည်း ဖြစ်တယ်၊ နိုင်ငံရေးမှာလည်း ဖက်ဒရယ်နဲ့ ဒီမိုကရေစီဆိုတဲ့ အကြောင်းရာတွေလည်း ကွဲဖို့ပေါ့၊ ပြည်သူတွေကို ဖြည်းဖြည်းချင်းတော့ မျက်စိဖွင့် နားဖွင့်ပေးနိုင်အောင် ဆောင်ရွက်နေပါတယ်။” လို့ ဆွေးနွေးပွဲမှာပါခဲ့တဲ့ အဖွဲ့ဝင်တဦးက ပြောပါတယ်။

မြောင်နယ်နဲ့ ရေစကြိုနယ်ဘက်တွေမှာရှိတဲ့ တပ်ရင်း၊ တပ်ဖွဲ့တွေကိုလည်း ဖယ်ဒရယ်နဲ့ဒီမိုကရေစီအကြောင်း သေချာသိနိုင်ဖို့ မန္တလေး၊ ရန်ကုန်၊ မုံရွာဘက်က သပိတ်ကော်မတီဝင်တွေ ကျောင်းသားအဖွဲ့အစည်းတွေက လာရောက်ရှင်းပြတာတွေ လုပ်‌ဆောင်နေတယ်လို့ ဆိုပါတယ်။

အခုလက်ရှိကျင်းပခဲ့တဲ့ဆွေးနွေးပွဲမှာ နိုင်ငံရေးသမားဟောင်းတွေပါဝင်ခဲ့ပြီး တခြားကျေးရွာတွေမှာလည်း ခုလိုလူထုပါဝင်နိုင်တဲ့ ဗဟုသုတရနိုင်တဲ့ တွေ့ဆုံပွဲတွေကို ဆက်လက်လုပ်ဆောင်သွားဖို့ရှိတယ်လို့ သိရပါတယ်။

စစ်ကိုင်း၊ ဇန်နဝါရီ ၁၉၊ ၂၀၂၃။

စစ်ကိုင်းတိုင်း(အထက်ပိုင်း)၊ တမူးမြို့က စစ်ကောင်စီလက်အောက်ခံ တမူးမြို့နယ် ရွေးကောက်ပွဲကော်မရှင်ရုံးမှာ ဒီကနေ့ ဇန်နဝါရီလ ၁၉ ရက်မနက် ၁၀ နာရီခန့်က မီးလောင်မှုဖြစ်ပွားခဲ့ပါတယ်။

အာရှလမ်း၊ စော်ဘွားရပ်ကွက်မှာရှိတဲ့ စစ်ကောင်စီလက်အောက်ခံရွေးကော်ရုံးကို တော်လှန်ရေးအင်အားစုတွေဘက်က စီးနင်း မီးရှို့ခဲ့တာဖြစ်ပြီး နာရီဝက်နီးပါးအကြာ မီးလောင်ကျွမ်းခဲ့လို့ ရုံးတွင်းစာရွက်စာတမ်းတွေနဲ့ ရုံးအဆောက်အဦမီးလောင်ပျက်ဆီးခဲ့တယ်လို့ တမူး ABSDF တပ်ရင်း ၅ မှတာဝန်ရှိသူတဦးက မြေလတ်အသံကိုပြောပါတယ်။

”စစ်ကောင်စီရဲ့အတုအယောင်ရွေးကောက်ပွဲစာရွက် စာတမ်းတွေကို မီးရှို့ဖျက်ဆီးခဲ့တာဖြစ်ပါတယ်။ လောင်တာ နာရီဝက်လောက်ကြာတယ်။ စာရွက် စာတမ်းတွေအကုန်မီးလောင်ပြီး ရုံးအဆောက်အဦလည်းပျက်စီးတယ်” လို့ ပြောပါတယ်။

စစ်ကောင်စီရွေးကော်ရုံးမီးရှို့ဖျက်ဆီးတာကို တမူး ABSDF တပ်ရင်း ၅ နဲ့ တမူးပကဖတို့ ပူးပေါင်းလုပ်ဆောင်ခဲ့တာလို့ ပြည်သူ့ကာကွယ်ရေးတပ်ဖွဲ့-တမူးက ဒီကနေ့မနက်ပိုင်းမှာ ထုတ်ပြန်ထားပြီး ဒီဖြစ်စဉ်နဲ့ပက်သက်တဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲဖြစ်ပါတယ်။