မှုခင်း

ရေတာရှည်၊ ဖေဖော်ဝါရီ ၅၊ ၂၀၂၆ ။

ပဲခူးတိုင်း၊ ရေတာရှည်မြို့နယ်အပိုင် ရန်ကုန်-မန္တလေးအမြန်လမ်းမိုင်တိုင် ၁၅၇/၇ အနီးမှာ ခရီးသည်တင်ကားနဲ့အိမ်စီးကားတိုက်မိပြီး ၁ ဦးသေဆုံးကာ ၃ ဦးဒဏ်ရာရခဲ့တယ်လို့ ကူညီဆောင်ရွက်ပေးခဲ့သူတွေထံကသိရပါတယ်။

ဖေဖော်ဝါရီ ၅ ရက်ဒီကနေ့မနက် ၂ နာရီကျော်မှာ နေပြည်တော်ကနေ ရန်ကုန်ဘက်ကိုဦးတည်မောင်းနှင်လာတဲ့ ခရီးသည်တင်ယာဥ်နဲ့ တဖက်ယာဥ်ကြောကနေ (U Turn) ဂငယ်ကွေ့ ကွေ့ပြီး လမ်းကူးလာတဲ့အိမ်စီးကားတို့ တိုက်မိခဲ့တာလို့ ဆိုပါတယ်။

” ခရီးသည်တင်ယာဥ်က လမ်းမှန်တယ်။ အိမ်စီးကားက (တဖက်ယာဥ်ကြောနေ) လမ်းဒီဘက်ချိုးမယ့်အခြေနေမှာ လမ်းမှန်နဲ့သွားတွေ့တာ။ အိမ်စီးကားဖင်ကိုတိုက်ပြီး စီယာတိုင်ကိုညာဘက်ဆွဲလိုက်တော့ လမ်းဘေးကာထားတဲ့တန်းတွေ သွား တိုက်မိသွားတာ။”လို့ ကူညီဆောင်ရွက်ပေးခဲ့သူတဦးက မြေလတ်အသံကို ပြောပါတယ်။

ယာဥ်တိုက်မှုကြောင့် အသက် ၅၀ ကျော်အရွယ် ခရီးသည်တင်ယာဥ်မောင်းအမျိုးသား နေရာမှာသေဆုံးပြီး ယာဥ်ပေါ်ပါ အသက် ၂၀ ကျော်အရွယ် ခရီးသည်အမျိုးသမီး ၃ ဦးဒဏ်ရာရခဲ့ကာ သေဆုံးထိခိုက်သူတွေကိုတော့ လူမှုကူညီရေးအသင်းတွေက တောင်ငူပြည်သူ့ဆေးရုံကို တင်ပို့ထားရတယ်လို့ သိရပါတယ်။

ဖေဖော်ဝါရီ ၄ ရက် မနက်ပိုင်းကလည်း ပျော်ဘွယ်မြို့နယ်၊ ပေပင်လေးကျေးရွာအနီး အမြန်လမ်းပေါ်မှာ ခရီးသည်တင်ယာဥ် ၁ စီး အင်ဂျင်အပူလွန်ကဲကာ မီးလောင်မှုဖြစ်ပွားခဲ့ပြီး ကား ၁ စီးလုံး ပျက်စီးဆုံးရှုံးခဲ့ပေမယ့် လူထိခိုက်တာမရှိဘူးလို့ သိရပါတယ်။

အမရပူရ၊ ဇန်နဝါရီ ၃၀၊ ၂၀၂၆။

မန္တလေးတိုင်း၊ အမရပူရမြို့နယ်၊ ရှမ်းလေးကျွန်းကျေးရွာလမ်းပေါ်မှာ ဦးခေါင်းဒဏ်ရာတွေနဲ့ သေဆုံးနေတဲ့ လူငယ်အလောင်း ၁ လောင်းကိုတွေ့ခဲ့တယ်လို့ ကျေးရွာနဲ့နီးစပ်သူတွေဆီက သိရပါတယ်။

သေဆုံးသူဟာ အသက် ၂၅ နှစ် အရွယ်ဖြစ်ပြီး ဦးခေါင်းဒဏ်ရာတွေနဲ့ ကျေးရွာမြောက်ဘက်ခြမ်း ကားလမ်းမဘေး ဇန်နဝါရီ ၂၉ ရက် မနက် ၆ နာရီကျော်မှာ ရွာခံတွေကတွေ့ခဲ့ရတာလို့ ဆိုပါတယ်။

“ခေါင်းမှာတော့ ဒဏ်ရာတွေ့တယ်။ ဓားခုတ်ဒဏ်ရာနဲ့ ကွဲနေတာမျိုး။ သူသေနေတာကို လမ်းသွားလမ်းလာတွေက တွေ့ကြတာ။ “လို့ ကျေးရွာနဲ့နီးစပ်သူတဦးက ပြောပါတယ်။

သေဆုံးသူနဲ့အချက်အလက်တွေကို မသိရှိရသေးဘဲ အလောင်းကိုတော့ အမရပူရဆေးရုံကို ပို့ဆောင်ထားပြီး ပိုင်ရှင်မပေါ်သေးတာကြောင့် ဇန်နဝါရီ ၃၀ ရက်မနက်ပိုင်းထိ ဆေးရုံရင်ခွဲရုံမှာ ရှိနေတယ်လို့ ဆိုပါတယ်။

ပြီးခဲ့တဲ့ စက်တင်ဘာ ၁၅ ရက်ကလည်း မန္တလေးတိုင်း၊ မိတ္ထီလာမြို့၊ နန်းတော်ကုန်းရပ်ကွက်နယ်မြေ၊ မြောက်ကန်စောင်း၊ ကလေးကစားကွင်းအနီးမှာ စလော့ဂိမ်းရှုံးနေတဲ့ အမျိုးသား ၂ ဦးက သူငယ်ချင်းဖြစ်သူ ဝက်ကုန်သည် အမျိုးသားကို သတ်ဖြတ်ငွေယူပြီး အလောင်းစွန့်ပစ်တဲ့ဖြစ်စဥ် ရှိခဲ့ပါသေးတယ်။

စာတည်း – လင်း

မြေလတ်အသံ၊ ဇန်နဝါရီ ၃၀၊ ၂၀၂၆။

နေပြည်တော်ကောင်စီနယ်မြေ၊ ဥတ္တရသီရိမြို့နယ်အတွင်းမှာ အမျိုးသမီး ၁ ဦးကို အဓမ္မပြုကျင့်သတ်ဖြတ်ပြီးပစ္စည်းလုယက်သူတွေကို သေဒဏ်နဲ့ နှစ်ရှည်ထောင်ဒဏ်တွေချမှတ်ခဲ့တယ်လို့ ဇန်နဝါရီ ၂၉ ရက် ယမန်နေ့ညမှာ စစ်ကော်မရှင်က ထုတ်ပြန်ပါတယ်။

ပြစ်ဒဏ်ချမှတ်ခံရသူတွေဟာ ဥတ္တရသီရိမြို့နယ်နေ အသက် ၂၃ နှစ်အရွယ် မအိအိငြိမ်း ကို အဓမ္မပြုကျင့်သတ်ဖြတ်ခဲ့ကြတဲ့ ဇမ္ဗူသီရိမြို့နယ်မှာ ဆောက်လုပ်ရေးလုပ်ငန်းလုပ်ကိုင်သူ သိန်းဇော်(ခ) ကိုသိန်း ၄၃ နှစ်နဲ့ သောင်းဝင်းအောင် (ခ)ချစ်ဖူး တို့ဖြစ်ပြီး ၎င်းတို့ကို ဥတ္တရသီရိခရိုင်တရားရုံးက လူသတ်မှု၊ အဓမ္မပြုကျင့်မှု၊ ပစ္စည်းလုယက်မှုတွေအပါအဝင် ရာဇသတ်ကြီးပုဒ်မ ၅ ခုနဲ့ မသေမချင်းကြိုးကွင်းစွပ်သတ်စေရန်(သေဒဏ်)၊ ထောင်ဒဏ် ၇၀ နှစ်တို့ကို သီးခြားစီ ကျခံစေရန် ချမှတ်ခဲ့တာပါ။

ဒါ့အပြင် လုယက်လာတဲ့ပစ္စည်းတွေကို ဖျောက်ဖျက်ရာမှာပူးပေါင်းပါဝင်တဲ့အမျိုးသား ၃ ဦးကိုလည်း ရာဇသတ်ကြီးပုဒ်မ ၂ ခုနဲ့ ထောင်ဒဏ် ၃ နှစ်၊ ထောင်ဒဏ် ၆ လ တို့ သီးခြားစီကျခံစေရန်ဆိုကာ အမိန့်ချမှတ်ခဲ့တာပါ။

၂၀၂၅ ဩဂုတ် ၃၀ ရက် နေ့လယ် ၁ နာရီခန့်မှာ ဥတ္တရသီရိမြို့နယ်၊ မောင်းရမ်းကျေးရွာ နေအိမ်ကနေ အသက် ၂၃ နှစ်အရွယ် မအိအိငြိမ်း ဟာ တဦးတည်းဆိုင်ကယ်စီးနင်းထွက်ခွာသွားပြီးနောက် ညနေ ၆ နာရီခွဲခန့်မှာ ၎င်းကို ငန်းစပ်ကျေးရွာ သားသတ်ရုံအနီးချုံတောအတွင်း ဒဏ်ရာတွေနဲ့သေဆုံးလျက်ပြန်လည်တွေ့ရှိခဲ့တာလို့ ထုတ်ပြန်ချက်က ဆိုပါတယ်။

အခင်းဖြစ်စဥ်နဲ့ပတ်သက်ပြီး ကျူးလွန်သူ ၂ ဦးနဲ့ပူးပေါင်းပါဝင်သူ ၃ ဦးကို ရဲတပ်ဖွဲ့က စက်တင်ဘာ ၂ ရက် မှာဖမ်းဆီးနိုင်ခဲ့ပြီးနောက် ဥတ္တရသီရိတရားရုံးမှာ တရားစွဲတင်ခဲ့ပြီးနောက် ၅ လအကြာမှာ အခုလို ပြစ်ဒဏ်တွေချမှတ်ခဲ့တာပါ။

ဖမ်းဆီးခံရသူတွေရဲ့ထွက်ဆိုချက်တွေအရ သိန်းဇော် နဲ့ သောင်းဝင်းအောင်တို့ ၂ ဦးဟာ အခင်းဖြစ်နေ့မှာ အရက်သေစာသောက်စားနေပြီး မအိအိငြိမ်း တဦးတည်းဆိုင်ကယ်စီးနင်းလာတာကိုတွေ့ရှိတာကြောင့် တားဆီးကာဝိုင်းဝန်းအဓမ္မပြုကျင့်စဥ် ရုန်းကန်ထွက်ပြေးတာကြောင့် သစ်သားတုတ်နဲ့ လည်းပင်းနဲ့ဦးခေါင်းကို ၈ ချက်ရိုက်နှက်ခဲ့ရာ မအိအိငြိမ်း သေဆုံးသွားခဲ့ပြီး ၎င်းထံက ရွှေထည်တွေနဲ့ ဆိုင်ကယ်ကို လုယူခဲ့တယ်လို့ ဖော်ပြထားပါတယ်။

မြေလတ်အသံ၊ ဇန်နဝါရီ ၂၃၊ ၂၀၂၆ ။

စစ်ကိုင်းတိုင်း၊ ရွှေဘိုခရိုင်၊ ဒီပဲယင်းမြို့နယ်၊ တည်တောရွာပစ်ခတ်မှုမှာ ဖမ်းဆီးခံထားရတဲ့ ရွှေဘိုခရိုင်အခြေစိုက် ကျောင်းသားလေး – LPDF တပ်ဖွဲ့ဝင် ၁၂ ဦးကို တရားစီရင်ပေးဖို့ မိသားစုဝင်တွေက တောင်းဆိုလိုက်ပါတယ်။

အဲ့ဒီ LPDF တပ်ဖွဲ့ဝင် ၁၂ ဦးကို ဒီပဲယင်းမြို့နယ်အရှေ့ခြမ်းပြည်သူ့လုံခြုံရေးအဖွဲ့(ပလဖ) လက်အောက် ဒီပဲယင်းနဲ့ကနီနယ်အစပ်ရှိ ပလဖအချုပ်ထောင်မှာ ဖမ်းဆီးထိန်းသိမ်းထားတာဖြစ်ပြီး ၂ နှစ်နီးပါးကြာအထိ အမှုဖွင့်တရားစွဲဆိုတာတွေ လုပ်ဆောင်တာမရှိလို့ အခုလိုတောင်းဆိုရတာလို့ ဆိုပါတယ်။

” ဘာအမှုမှလည်းမတင်ဘူး။ စစ်လည်းမစစ်ဆေးပေးဘူး။ တကယ်လို့ အပြစ်ရှိတယ်ဆိုရင် ရတယ်။ ဘယ်နှစ်နှစ်ဖြစ်ဖြစ် စစ်ဆေးပြီးချလိုက်။ အခုက အဲ့လိုလည်းမဟုတ်ဘူး။ စစ်လည်းမစစ်ဆေးဘဲနဲ့ တမင်တကာ ဒီအတိုင်းထားထားတာ”လို့ ဖမ်းဆီးခံထားရသူတဦးရဲ့မိသားစုဝင်က မြေလတ်အသံကို ပြောပါတယ်။

ဖမ်းဆီးခံထားရသူတွေနဲ့ပတ်သက်ပြီး အပြစ်မရှိပါက ချက်ချင်းပြန်လွှတ်ပေးစေချင်ပြီး အပြစ်ရှိပါကလည်း ဥပဒေအရ အမြန်ဆုံးအမိန်ချပေးဖို့ လိုလားတယ်လို့ ဆိုပါတယ်။

အချုပ်နဲ့ဖမ်းဆီးထားစဥ်မှာလည်း ဒီပဲယင်းအရှေ့ခြမ်းပလဖတာဝန်ခံ ကိုကျော်ထက်အောင် က အကျဥ်းသားတွေအပေါ်နှိပ်စက်တာ၊ အလုပ်ကြမ်းတွေခိုင်းစေတာ၊ ရေနဲ့အစားအစာလောက်ငှစွာမပေးတာ၊ မိသားစုတွေနဲ့ပုံမှန်တွေ့ခွင့်မပြုတာတွေအပါအဝင် အခြားအကျဥ်းသားအခွင့်အရေးတွေလည်း ချိုးဖောက်ဖိနှိပ်ခံနေတယ်လို့ မိသားစုဝင်က ပြောပါတယ်။

” အရမ်းပူတဲ့အချိန် ၃ လပိုင်း(မတ်)၊ ၄ လပိုင်း(ဧပြီ)တောင် ၁ ရက်ကို ဘလူးမောင်တိန်ရေဘူးအသေးဗူးလေးနဲ့ ၁ ယောက်ကို ၁ ဗူးပေးတယ်။ ရေဆိုလည်း ၁၀ ရက် ၁ ကြိမ်ပဲ ပေးချိုးတယ်” လို့အထက်ပါမိသားစုဝင်က ဆက်ပြောပါတယ်။

ပြီးခဲ့တဲ့ ၂၀၂၄ မေ ၂၈ ရက်မနက်ပိုင်းမှာ ကျောင်းသားလေး LPDF အဖွဲ့ဝင် အောင်မြတ်မွန်နဲ့ Black Tiger မိုးကြိုးမုန်တိုင်းအဖွဲ့ဝင်ဟောင်း သန့်ဇင်ထက်အပါ ၃ ဦးတို့အကြား အချင်းများရန်ဖြစ်ခဲ့ကြောင်း၊ အချင်းများချိန်တွင် အောင်မြတ်မွန်ကိုင်ဆောင်တဲ့ ပစ္စတိုသေနတ်နဲ့ လက်ကိုင်ဖုန်းတို့ သန့်ဇင်ထက်အဖွဲ့က ရရှိသွားခဲ့ကြောင်း၊ ၎င်းပစ္စတိုသေနတ်နဲ့ လက်ကိုင်ဖုန်းကို သန့်ဇင်ထက်နေအိမ်မှာ ကျောင်းသားလေးအဖွဲ့အပါ ဒေသတွင်းအဖွဲ့အစည်းတွေက လိုက်လံတောင်းခံရာက ပစ်ခတ်မှုတွေဖြစ်ခဲ့တာလို့ ဆိုပါတယ်။

” ဝိုင်းတဲ့အထဲက ကျောင်းသားလေးအဖွဲ့ဝင်တွေရော ရပ်ရွာလူကြီးတွေကော(ပကဖ၊ ပလဖ)တွေကော ဝိုင်းပြီး တောင်းပေးကြတယ်။ သူတိုပစ္စည်းတွေကိုပြန်ပေးလိုက်ပြီး ညှိနှိုင်းပေးကြတယ်။ ရွာကလူတွေလည်းထွက်ကြည့်နေကြတာဆိုတော့ လူကတော့များတယ်။ အိမ်ထဲကနေ လက်ပစ်ဗုံးတွေကတအားထုနေတော့ မကပ်ရဲကြတော့ လက်နက်ကိုင်တွေချည်းပဲဆိုတော့ တင်းတင်းကြပ်ကြပ်မတားရဲကြဘဲ ဖြစ်ကုန်တာ”လို့ အထက်ပါမိသားစုဝင်က ပြောပါတယ်။

သေနတ်ပြန်လည်တောင်းခံရာကနေ ကျောင်းသားလေး-LPDF တွေနဲ့ သန့်ဇင်ထက်တို့အကြား နှစ်ဖက်အပြန်အလှန်အပြန်အလှန်ပစ်ခတ်မှုတွေနဲ့ နေအိမ်တွင်းဗုံးပေါက်ကွဲမှုတွေဖြစ်ပွားခဲ့ပြီး သန့်ဇင်ထက်၊ ဇနီးဖြစ်သူအပါအဝင် မိသားစုဝင် ၅ ဦးသေဆုံးသွားခဲ့တာပါ။

အထက်ပါဖြစ်စဥ်တွေဖြစ်ပွားပြီးနောက် မေ ၃၀ ရက်မှာ သေနတ်ပစ်ခတ်မှု၊ လူသေဆုံးမှုတွေနဲ့ပတ်သက်ပြီး ကျောင်းသားလေး-LPDF ၁၉ ဦးကို ရွှေဘိုခရိုင်တပ်ရင်း ၁၂ က ဖမ်းဆီးခဲ့ပြီး အဲ့ဒီကနေတဆင့် ဇွန်လအတွင်းမှာ ၎င်းတို့ ၁၉ ဦးကို ဒီပဲယင်းမြို့နယ်အရှေ့ခြမ်းပလဖထံ ထပ်မံလွှဲပြောင်းပေးခဲ့တယ်လို့ သိရပါတယ်။

ဖမ်းဆီးခံရပြီးနောက် ၃ လအကြာ ၂၀၂၄ ဩဂုတ်လအတွင်းမှာ LPDF ၁၉ ဦးအနက် ၆ ဦးမှာ အာမခံနဲ့ပြန်လွတ်လာခဲ့ပေမယ့် ကျန်တပ်ဖွဲ့ဝင်တွေဖြစ်တဲ့ အောင်မြတ်မွန်၊ ဇာနည်အောင်၊ မျိုးဇော်ဌေး၊ ဟန်သူထွန်း၊ ချမ်းရဲဇော်၊ ထက်ဇော်၊ ကိုညောင် ၊ စိုင်းခန့်ကျော်၊ တောသား၊ စုဟန်၊ မင်းမင်းထက်၊ ခေါင်းကြီး၊ ငနောင်တို့ ၁၃ ဦးမှာ လက်ရှိအထိ ဒီပဲယင်းပလဖလက်အောက်အချုပ်ထောင်တွေမှာ ဆက်လက်ဖမ်းဆီးခံထားရတာလည်း ဖြစ်ပါတယ်။

၂၀၂၅ အောက်တိုဘာလမှာ အောင်မြတ်မွန်၊ မင်းခေါင်အပါ ၃ ဦးကို ခင်ဦးမြို့နယ်ပလဖစခန်း၊ ထက်ဇော်အပါ ၂ ဦးကို ဝက်လက်မြို့နယ်ပလဖစခန်းတွေကို အသီးသီးခွဲကာ ပို့ဆောင်လိုက်ပြီး ကျန်သူတွေကိုတော့ ဒီပဲယင်းအရှေ့ခြမ်းပလဖစခန်းမှာပဲ ဆက်လက်ချုပ်ထားတယ်လို့ သိရပါတယ်။

ဝက်လက်ပလဖစခန်းမှာချုပ်နှောင်ခံထားရတဲ့ LPDF ၂ ဦးအနက် တည်တောရွာသား ကိုထက်ဇော်မှာ အစာအိမ်အချဥ်ဖောက်ပြီး သေဆုံးသွားခဲ့ကြောင်း ပြီးခဲ့တဲ့ ဇန်နဝါရီ ၄ ရက်မှာ မြို့နယ်ပလဖက ကျန်ရစ်သူမိသားစုတွေထံ အကြောင်းကြားလာတာကြောင့် ယင်းဖြစ်စဥ်မှာ ဖမ်းဆီးခံရသူ ၁၂ ဦးသာ ကျန်တော့တာပါ။

ကိုထက်ဇော် သေဆုံးခဲ့ပြီးတဲ့နောက် အကျဥ်းထောင်တွေမှာရှိနေတဲ့ LPDF တွေရဲ့ ကျန်းမာရေးနဲ့ အသက်အန္တရာယ်ကို စိုးရိမ်နေတယ်လို့ မိသားစုဝင်တွေက ပြောပါတယ်။

ဖမ်းဆီးခံထားရသူတွေရဲ့အခြေအနေနဲ့ပတ်သက်ပြီး ဒီပဲယင်းအရှေ့ခြမ်းပလဖတာဝန်ခံ ကိုကျော်ထက်အောင် ကို မြေလတ်အသံက ဖုန်းနဲ့ဆက်သွယ်ခဲ့ပေမယ့် ဆက်သွယ်မရခဲ့ပါဘူး။

ဒီပဲယင်းမြို့နယ်ပြည်သူ့လုံခြုံရေးအဖွဲ့တာဝန်ခံကို မေးမြန်းရာမှာတော့ အဲ့ဒီ တည်တောရွာ ဖြစ်စဥ် LPDF တွေအမှုဟာ အမျိုးသားညီညွတ်ရေးအစိုးရ-NUG ပြည်ထဲရေးဝန်ကြီးဌာနက တိုက်ရိုက်ကိုင်တွယ်နေတာဖြစ်လို့ သူ့အနေနဲ့ သီးခြားဖြေကြားဖို့မရှိဘူးလို့ တုံ့ပြန်ပါတယ်။

ဖြစ်စဥ်နဲ့ပတ်သက်ပြီး ဆောင်ရွက်နေတဲ့အခြေအနေကို သိရှိနိုင်ရေး NUGအစိုးရ သတင်းထုတ်ပြန်ရေးအဖွဲ့ကတဆင့် ပြည်ထဲရေးဝန်ကြီးဌာနကို မြေလတ်အသံက ဆက်လက်မေးမြန်းခဲ့ပေမယ့် သတင်းတင်ပြချိန်အထိ ပြန်လည်ဖြေကြားလာတာ မရှိသေးပါဘူး။

စာတည်း – ဟိန်းစံ

မန္တလေး၊ ဇန်နဝါရီ ၁၅၊ ၂၀၂၆။

မန္တလေးတိုင်း ၊ချမ်းအေးသာစံမြို့နယ်၊ အောင်နန်းရိပ်သာအရှေ့ရပ်ကွက်မှာ မီးလောင်မှုဖြစ်လို့ နေအိမ် ၇ လုံးမီးလောင်ပျက်စီးခဲ့တယ်လို့ ကူညီဆောင်ရွက်ပေးခဲ့သူတွေထံက သိရပါတယ်။

ဇန်နဝါရီ ၁၄ရက် ယမန်နေ့ညနေ ၅ နာရီကျော်မှာ အောင်နန်းရိပ်သာရပ်ကွက် ၃၄ ×၃၅ လမ်းကြား၊ ၈၂×၈၃ လမ်းကြားရှိ ဦးလှသိန်းဆိုသူနေအိမ်ကနေ မီးစတင်လောင်ခဲ့တာဖြစ်ပြီး အနီးအနားနေအိမ်တွေကိုပါ မီးကူးစက်လောင်ကျွမ်းခဲ့တာလို့ ဆိုပါတယ်။

” ထမင်းပေါင်းအိုးနဲ့ ထမင်းတည်ထားရာကနေ ဝါယာရှော့ဖြစ်ပြီး မီးစလောင်တာ။ အိမ်ရှင်တွေအိမ်မှာရှိပေမယ့် မီးမငြှိမ်းနိုင်လို့ ဘေးအိမ်တွေပါကူးကုန်တာ။”လို့ မီးငြှိမ်းသတ်ရာမှာကူညီပေးခဲ့သူတဦးက မြေလတ်အသံကို ပြောပါတယ်။

မီးလောင်မှုကြောင့် ဦးလှသိန်းနေအိမ်အပါအဝင် အနီးဝန်းကျင် နေအိမ် ၇ လုံးမီးလောင်ပျက်စီးခဲ့ပြီး လူထိခိုက်တာတော့မရှိခဲ့ပေမယ့် နေအိမ်တွေပျက်စီးမှုကြောင့် ပြည်သူ ၄၀ ခန့် မီးဘေးသင့်ခဲ့ရတယ်လို့ သိရပါတယ်။

မန္တလေးမီးသတ်တွေနဲ့ အခြေစိုက်လူမှုကူညီရေးအသင်းတွေ ဝိုင်းဝန်းမီးငြှိမ်းသတ်ခဲ့လို့ မီးလောင်ပြီးတနာရီကျော်အကြာမှာ မီးငြှိမ်းသတ်နိုင်ခဲ့တယ်လို့ သိရပါတယ်။

နိုဝင်ဘာ ၂၈ ရက်ကလည်း အမရပူရမြို့နယ်၊ ဘုံအိုးကျေးရွာရှိ နေအိမ် ၁ လုံးက ဆိတ်ခြံမှာ ခြင်ဆေးထွန်းထားရမှ မီးလောင်မှုဖြစ်လို့နေအိမ် ၈ လုံးမီး လောင်ပျက်စီးမှု ဖြစ်ပွားခဲ့ပါသေးတယ်။

ဝေါ၊ ဇန်နဝါရီ ၈၊ ၂၀၂၆။

ပဲခူးတိုင်း၊ ဝေါမြို့နယ်၊ ရန်ကုန်- မော်လမြိုင်ပြည်ထောင်စုလမ်းမှာ ကုန်တင်ယာဥ်ကို အိမ်စီးယာဥ်က အနောက်ကဝင်တိုက်ခဲ့တာကြောင့် ၃ ဦးသေဆုံးခဲ့ပြီး အသက် ၁၀ နှစ်ကလေး ၁ ဦးသာ အသက်ရှင်ကျန်ရစ်တယ်လို့ ကူညီဆောင်ရွက်ပေးခဲ့သူတွေထံက သိရပါတယ်။

ဇန်နဝါရီ ၇ ရက် ယမန်နေ့ည ၁၁ နာရီကျော်မှာ ကားလမ်းမိုင်တိုင်အမှတ် ၆/၄ အနီးမှာ စက်ချို့ယွင်းတာကြောင့် ဝေါမြို့ဘက်ကို ဦးတည်ရပ်ထားတဲ့ ၂၂ ဘီးကုန်တင်ယာဥ်ကို လားရာတူကနေ မောင်းနှင်လာတဲ့ ပရိုဘောက်ယာဥ်က အနောက်ကဝင်တိုက်ခဲ့တာလို့ ဆိုပါတယ်။

” ပရိုဘောက်က နောက်ကနေဝင်တိုက်တာ။ ကုန်တင်ယာဥ်ဖင်ကို ဝင်တိုက်တာ။ ကားပေါ်မှာတော့ လူ ၄ ဦးပါတယ်”လို့ အခင်းဖြစ်စဥ်ကိုကူညီဆောင်ရွက်ပေးခဲ့သူတဦးက မြေလတ်အသံကို ပြောပါတယ်။

ယာဥ်တိုက်မှုကြောင့် ပရိုဘောက်ယာဥ်ပေါ်ပါ ရန်ကုန်တိုင်း၊ မြောက်ဒဂုံမြို့၊ ချမ်းမြေ့သာ ၁ လမ်းနေသူတွေဖြစ်တဲ့ အသက် ၄၃ နှစ် ကိုဇေယျာလင်း၊ ဇနီးဖြစ်သူ မတင်တင်လှိုင်နဲ့ အသက် ၄၀ အရွယ် အမျိုးသား ၁ ဦးတို့ အခင်းဖြစ်နေရာမှာပဲ သေဆုံးသွားခဲ့တယ်လို့ သိရပါတယ်။

နောက်ထပ်ပရိုဘောက်ယာဥ်ပေါ်ပါတဲ့ ကိုဇေယျာလင်းရဲ့သမီးဖြစ်သူ အသက် ၁၀ နှစ်အရွယ် မိန်းကလေးမှာ ဘယ်ဘက်နားထင်ပေါက်ပြဲ သွေးထွက်ဒဏ်ရာ၊ ရင်ဘတ်အောင့်ဒဏ်ရာတွေရရှိခဲ့ပြီး စိုးရိမ်ရတဲ့အခြေအနေရှိတာကြောင့် ဝေါမြို့နယ်ပြည်သူ့ဆေးရုံကို ပို့ဆောင်ကုသပေးထားရတယ်လို့ သိရပါတယ်။

ဒီဇင်ဘာ ၂၆ ရက်ကလည်း ပဲခူးတိုင်း၊ အုတ်တွင်းမြို့နယ်အပိုင်၊ ရန်ကုန်-မန္တလေး အမြန်လမ်းမှာ အိမ်စီးကားဘီးပေါက်ပြီး တိမ်းမှောက်လို့ ကားပေါ်ပါသူ ၇ ဦးဒဏ်ရာရတယ်လို့ သိရပါတယ်။

မြေလတ်အသံ၊ ဇန်နဝါရီ ၆၊ ၂၀၂၆။

မကွေးတိုင်း၊ အောင်လံမြို့မှာ မူးယစ်ဆေးအရောင်းအဝယ်လုပ်ကိုင်နေသူ ခရိုင်ပညာရေးမှူးရုံးမှဝန်ထမ်း ၁ ဦးကို ဖမ်းဆီးထိန်းသိမ်းလိုက်တယ်လို့ သရက်ခရိုင်တပ်ရင်း ၂ ဆီက သိရပါတယ်။

ဖမ်းဆီးခံရသူမှာ ခရိုင်ပညာရေးမှူးရုံး၊ ရေး၊စီမံဌာန စာရေးဖြစ်သူ ဦးမိုးဌေးခိုင်ဖြစ်ပြီး သူ့ကို WY ၁၀၅ ပြား၊ Mango ဆေးခြောက် ၂၀ ကျပ်သားခန့်နဲ့အတူ အောင်လံမြို့နယ်၊ မြို့လှကျေးရွာနဲ့ သံချိတ်ဂိတ်တံတားအနီးမှာ ဒီဇင်ဘာ ၂၈ ရက် မနက် ၈ နာရီက ဖမ်းဆီးခဲ့တာလို့ ဆိုပါတယ်။

“ကျနော်တို့ ပတ်ကင်းနဲ့ သွားတွေ့တာပါ။ စစ်ဆေးလိုက်တဲ့အခါမှာ ဆေးခြောက်တွေတွေ့တာနဲ့ ဖမ်းဆီးခေါ်ဆောင်လာခဲ့တာပါ။ သူ့ဆီက WY ၁၀၅ ပြား၊ Mango ဆေးခြောက်ဆိုလား အဲဒါ ၂၀ ကျပ်သားခန့် တွေ့ရှိရတယ်။ လုပ်သက်ကလည်း ၁၀ နှစ် အထက်ရှိတယ်လို့တော့ စစ်ဆေးချက်အရ သိထားပါတယ်။” လို့ သရက်ခရိုင်အမှတ် ၂ တပ်ရင်းမှ တာဝန်ရှိသူတဦးက ပြောပါတယ်။

Non-CDM ဝန်ထမ်းဖြစ်သူ ဦးမိုးဌေးခိုင်ဟာ အောင်လံမြို့၊ အေးချမ်းဖြိုးလမ်း၊ ရွာထောင်ရပ်ကွက်မှာ နေထိုင်သူဖြစ်ပြီး ပညာရေးမှူးရုံးမှာ စာရေးအလုပ်ကို ၂၀၁၅ ကတည်းလုပ်ကိုင်နေသူဖြစ်ကာ တဆက်တည်းမှာလည်း မူးယစ်ဆေးကိုပါ အရောင်းအဝယ်လုပ်နေသူဖြစ်တယ်လို့ ထွက်ဆိုထားကြောင်း သူက ဆက်ပြောပါတယ်။

“သူက ပညာရေးဝန်ထမ်းကိုမှ ခရိုင်ရုံးကဆိုတော့ သူ့ကို ဘယ်သူကမှမစစ်သလို သူကိုယ်တိုင်မှာလည်း အဲ့ဒီလမ်းကြောင်းပေါ်က ဂိတ်၊ ရဲစခန်းတွေနဲ့ ကြီးမားတဲ့ပတ်သက်မှုရှိလို့ သယ်ရတာပေါ့။ အရပ်သားတွေကို ဒီလောက်အစစ်အဆေးကြမ်းနေတာ သူက မူးယစ်ဆေးဝါးပါ သယ်ရတယ်ဆိုတော့ ဒါ ပတ်သက်မှု ကြီးကြီးမားမား ရှိလို့ပါပဲ။”လို့ အထက်ပါတာဝန်ရှိသူက ပြောပါတယ်။

လက်ရှိမှာ သူ့ကို သရက်ခရိုင်တပ်ရင်း ၂ မှာထိန်းသိမ်းထားဆဲဖြစ်ပြီး အရေးယူနိုင်ဖို့ကို အောင်လံ မြို့နယ်ပကဖနဲ့ သက်ဆိုင်ရာ ကွပ်ကဲရေးအဆင့်ဆင့်တို့ကို အသိပေးတင်ပြထားတယ်လို့ သိရပါတယ်။

စာတည်း – လင်း

မြေလတ်အသံ၊ ဒီဇင်ဘာ ၃၁၊ ၂၀၂၅။

ထိုင်းနိုင်ငံ၊ ပထုံဌာနီခရိုင်မှာ မြန်မာအလုပ်သမားတွေလိုက်ပါလာတဲ့ကား ၁ စီး တူးမြောင်းထဲထိုးကျတာကြောင့် ၆ ဦး သေဆုံးခဲ့တယ်လို့ ထိုင်းဒေသတွင်းသတင်းတွေမှာ ဖော်ပြပါတယ်။

မြန်မာအလုပ်သမား ၁၃ ဦး စီးနင်းလာတဲ့ ပစ်ကပ်ကား(Pickup Truck)ဟာ ချွန်ဘူရီခရိုင်ကနေ အလှူပွဲသွားဖို့ထွက်ခွာလာခဲ့တာဖြစ်ပြီး ဒီဇင်ဘာ ၃၀ ရက် မနေ့ည ၁၀ နာရီခန့်မှာ အခင်းဖြစ်နေရာမှာ လမ်းဘေးအတားအဆီးကို တိုက်မိပြီးနောက် တူးမြောင်းထဲကျခဲ့တာလို့ ဆိုပါတယ်။

အခင်းဖြစ်တဲ့နေရာအနီး ဒေသခံတွေက ကူညီကယ်ဆယ်ခဲ့တာကြောင့် အမျိုးသား ၄ ဦးနဲ့ အမျိုးသမီး ၃ ဦးကို ကယ်ဆယ်နိုင်ခဲ့ပြီး ဒဏ်ရာရရှိသူ အမျိုးသား ၂ ဦးကိုတော့ ဆေးရုံပို့ဆောင်ခဲ့တယ်လို့ ဆိုပါတယ်။

ရဲတပ်ဖွဲ့ရဲ့ စုံစမ်းစစ်ဆေးမှုအရ ယာဉ်မောင်းဖြစ်သူဟာ လမ်းကျွမ်းကျင်မှုမရှိတာကြောင့် အကွေ့မှာ အရှိန်မထိန်းနိုင်ဘဲ လမ်းဘေးအတားအဆီးကို တိုက်မိကာ ရေထဲထိုးကျခဲ့တာလို့ ဖော်ပြပါတယ်။

လက်ရှိမှာ ကားအတွင်းပိတ်မိသေဆုံးခဲ့တဲ့ အလောင်း ၃ လောင်းကို ဆယ်ယူနိုင်ခဲ့ပြီး ကျန်ရှိတဲ့ ရုပ်အလောင်း ၃ လောင်းကိုတော့ ဆက်လက်ရှာဖွေလျက်ရှိတယ်လို့ ဆိုပါတယ်။

Ref; Khaosod.
Photo – Khaosod.

အုတ်တွင်း၊ ဒီဇင်ဘာ ၂၇၊ ၂၀၂၅။

ပဲခူးတိုင်း၊ အုတ်တွင်းမြို့နယ်အပိုင် ရန်ကုန်-မန္တလေး အမြန်လမ်းမှာ အိမ်စီးကားဘီးပေါက်ပြီး တိမ်းမှောက်ခဲ့တာကြောင့် ကားပေါ်ပါသူ ၇ ဦးဒဏ်ရာရခဲ့တယ်လို့ ကူညီဆောင်ရွက်ပေးခဲ့သူတွေဆီက သိရပါတယ်။

ဒီဇင်ဘာ ၂၆ ရက်ညနေ ၃ နာရီကျော်မှာ နေပြည်တော်ဘက်ကနေ ရန်ကုန်ဘက်ကိုမောင်းလာတဲ့ အိမ်စီးကား ၁ စီးဟာ ကားလမ်းမိုင်တိုင်အမှတ် ၁၃၀/ ၃ ဖာလုံအနီးအရောက်မှာ တိမ်းမှောက်ခဲ့တာလို့ ဆိုပါတယ်။

“ကားနောက်ညာဘီးပေါက်ပြီးတော့ အရှိန်မထိန်းနိုင်ဘဲ လမ်းလယ်ကျွန်းမှာရှိတဲ့ ခရေပင်ကို တိုက်ပြီးမှောက်တာ။ ကားပေါ်မှာပါသူအကုန်ဒဏ်ရာရတယ်”လို့ ကူညီဆောင်ရွက်ပေးခဲ့သူ တဦးက ပြောပါတယ်။

ယာဥ်တိမ်းမှောက်တာကြောင့် အသက် ၈ နှစ်ကနေ ၁၈ နှစ်ကြား ၄ ဦးနဲ့အသက် ၅၀ ဝန်းကျင် ၃ ဦးစုစုပေါင်း အမျိုးသား ၃ ဦးနဲ့အမျိုးသမီး ၄ ဦးထိခိုက်ဒဏ်ရာရခဲ့တယ်လို့ ဆိုပါတယ်။

ကားပေါ်ပါလာသူတွေဟာ ရန်ကုန်နဲ့မော်လမြိုင်နေသူတွေဖြစ်ပြီး ထိခိုက်ဒဏ်ရာရသူတွေထဲမှာ စိုးရိမ်ရသူ ၄ ဦးရှိကာ သူတို့ကိုတော့ တောင်ငူပြည်သူ့ဆေးရုံကို တင်ပို့ပြီးဆေးကုသမှုခံယူနေရတယ်လို့ သိရပါတယ်။

ပြီးခဲ့တဲ့ နိုဝင်ဘာ ၂၂ ရက်ကလည်း ရေတာရှည်မြို့နယ်အပိုင် ရန်ကုန်-မန္တလေး အမြန်လမ်းမှာ ကုန်တင်ယာဥ်ကို အိမ်စီးယာဥ်က ဝင်တိုက်လို့ ၃ ဦးသေဆုံးခဲ့ပါသေးတယ်။

စာတည်း – လင်း

မြေလတ်အသံ၊ ဒီဇင်ဘာ ၂၃၊ ၂၀၂၅။

စစ်ကော်မရှင်တပ်ဆီကို ရောင်းချမယ့် ဒရုန်း ၁၀ စင်းနဲ့အတူ မြန်မာနိုင်ငံသား ၄ ဦးကို ထိုင်းရဲတပ်ဖွဲ့က ဒီဇင်ဘာ ၂၃ ရက် ဒီကနေ့မှာ ဘန်ကောက်၊ သုဝဏ္ဏဘူမိလေဆိပ်အနီးမှာ ဖမ်းဆီးခဲ့တယ်လို့ ဘန်ကောက်ပို့စ် သတင်းဌာနမှာ ဖော်ပြပါတယ်။

ဒီဇင်ဘာ ၂၁ ရက် တနင်္ဂနွေနေ့က သုဝဏ္ဏဘူမိလေဆိပ်အနီး ဒရုန်းအများအပြားပျံသန်းနေတဲ့သတင်းတွေ ထွက်ပေါ်လာခဲ့ပြီး အမျိုးသားလုံခြုံရေးကောင်စီက ဒရုန်းကျူးကျော်မှုကို နှိမ်နင်းဖို့ အစီအမံတွေရေးဆွဲပြီးနောက် အခုလို စီးနင်းရှာဖွေခဲ့တာလို့ ဆိုပါတယ်။

သုဝဏ္ဏဘူမိလေဆိပ်နဲ့ ၃ ကီလိုမီတာအကွာ ဘန်ကောက်မြို့၊ လက်ကဘန်းနယ်မြေရှိ ဒရုန်းထိန်းချုပ်စခန်းအဖြစ်သံသယရှိတဲ့ Grand BS Airport Hotel Suvarnabhumi ကို ဝင်ရောက်ရှာဖွေခဲ့ရာ David အမည် Online Booking နဲ့ တနင်္ဂနွေနေ့ကတည်းကငှားရမ်းထားတဲ့ အခန်းမှာ မြန်မာနိုင်ငံသား ၄ ဦးကို ဖမ်းမိခဲ့တာပါ။

ဖမ်းဆီးခံရသူတွေဟာ ဇေထက်အောင် (၃၂ နှစ်)၊ စနေလင်းထက် (၂၄ နှစ်)၊ ကျော်ဇင်ဟိန်း (၂၁ နှစ်) နဲ့ သိန်းဇော် (၃၄ နှစ်) တို့ဖြစ်ကြပြီး အမည်မဖော်လိုသူ မြန်မာနိုင်ငံသားတဦးက ထိုင်းနိုင်ငံအတွင်းကနေ ဒရုန်းတွေ သယ်ဆောင်ဖို့ ငှားရမ်းခံရခြင်းဖြစ်တယ်လို့ ရဲတပ်ဖွဲ့ကို ထွက်ဆိုပါတယ်။

ရဲတပ်ဖွဲ့က တရုတ်နိုင်ငံထုတ် DJI အမျိုးအစား ဒရုန်း ၁၀ စီးကို အခန်းအတွင်းမှ သိမ်းဆည်းရရှိခဲ့ပြီး ဖမ်းဆီးခံရသူတွေရဲ့ ထွက်ဆိုချက်အရ အဲ့ဒီဒရုန်းတွေကို မြန်မာနိုင်ငံရှိ “Kevin Zo” ဆိုတဲ့ သူဌေးဆီကိုပို့ဆောင်ပေးရမှာဖြစ်ပြီး ၎င်းသူဌေးက မြန်မာစစ်တပ်ဆီကို ပြန်လည်ရောင်းချမယ့်သူဖြစ်တယ်လို့ သိရပါတယ်။

ထိုင်းရဲတပ်ဖွဲ့ကတော့ စုံစမ်းစစ်ဆေးမှုတွေကို ဆက်လက်လုပ်ဆောင်နေဆဲဖြစ်ပြီး လက်ရှိမှာ အဆိုပါဖမ်းဆီးရရှိသူတွေရဲ့ ဗီဇာတွေကို ပယ်ဖျက်လိုက်ပြီဖြစ်ကာ ထပ်မံစစ်ဆေးမေးမြန်းဖို့အတွက် လူဝင်မှုကြီးကြပ်ရေးဗျူရိုကို လွှဲပြောင်းထိန်းသိမ်းထားတယ်လို့ ဆိုပါတယ်။