ဟယ်သာ

ဟယ်သာ၊ အောင်စိုး

မြိုင်၊ နိုဝင်ဘာ ၆၊ ၂၀၂၅။

မကွေးတိုင်း၊ မြိုင်မြို့နယ်နဲ့ ထီးလင်းမြို့နယ်ထဲကို နိုဝင်ဘာ ၆ ရက်ဒီမနက်ပိုင်းမှာ စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံတွေဆီက သိရပါတယ်။

မြိုင်မြို့နယ်၊ နှမ်းဆီကန်ရွာအနီးတဝိုက်ကို ဒီမနက် ၇ နာရီဝန်းကျင်မှာ ဂျက်ဖိုက်တာနဲ့ ပါရာမော်တာတွေပေါ်ကနေ စုစုပေါင်းဗုံး ၉ လုံးကြဲချတိုက်ခိုက်ခဲ့တယ်လို့ ဆိုပါတယ်။

“လေကြောင်းကတော့ စစ်ကြောင်းတွေအရွေ့မှာ သူတို့ရဲ့ထုံးစံအတိုင်း လေယာဉ်ပစ်ကူတွေပါ တွဲပါလာပြီးတော့ အရပ်သားပစ်မှတ်တွေကို အဓိကထားပြီးတော့ကြဲချနေတဲ့ သဘောမျိုးပါပဲ။ ထိခိုက်ဒဏ်ရာရတယ်လို့တော့မရှိဘူး၊ တောဘက်တွေမှာကျတယ်။”လို့ဒေသခံတဦးက ပြောပါတယ်။

နှမ်းဆီကန်ရွာထဲမှာ တွင်းမရွာကနေလာတဲ့ အင်အား ၂၀၀ နီးပါးပါစစ်ကြောင်းကဝင်ရောက်တပ်စွဲနေတာကြောင့် အနီးတဝိုက်ကိုပစ်ကူပေးနေတဲ့သဘောဖြစ်နိုင်တယ်လို့ အထက်ပါဒေသခံက ခန့်မှန်းပါတယ်။

အဆိုပါစစ်ကြောင်းဟာ နိုဝင်ဘာ ၅ ရက်မှာလည်း နှမ်းဆီကန်ရွာထဲက နေအိမ်တွေကို မီးရှို့ဖျက်ဆီးခဲ့ပြီး စစ်ကြောင်းရှိနေသေးတာကြောင့် ပျက်စီးမှုအခြေအနေကို မသိရသေးဘူးလို့ ဆိုပါတယ်။

“အရင်းအမြစ်ကတော့ တပ်မ ၁၀၁ ကလာခဲ့တာပေါ့။ ညောင်ဂျစ်ပင် ရောက်တယ်ဆို လက်ရင်းဂိတ်ရှိတဲ့တွေကပြန်လိုက်လာလိုက် အဲ့ကနေမှ တွင်းမရောက်တယ်။ တွင်းမကတွေက ပြန်လိုက်လာလိုက်။ အဲ့လိုပေါ့ တွင်းမရွာထဲကထွက်လာတယ် နှမ်းဆီကန်ရွာကိုရောက်တယ်။ ပြည်သူ့အိမ်တွေလဲမီးရှို့တယ်လို့သိရတယ် ဘယ်နှအိမ်ရှို့လဲဆိုတာတော့ သေချာမသိရဘူး “လို့ ဆိုပါတယ်။

အိမ်ခြေ ၂၈၀ ခန့်ရှိတဲ့ နှမ်းဆီကန်ရွာဟာ ပျူစောထီးအားကောင်းတဲ့ သရက်ကန်နဲ့ တွင်းမရွာကြားမှာရှိပြီး ဒေသခံတွေကတော့ ၂၀၂၃ နှစ်ကုန်ပိုင်းကတည်းက စစ်ရှောင်နေကြရပြီး လက်ရှိထပ်ဝင်နေတဲ့ စစ်ကြောင်းကြောင့်လည်း နှမ်းဆီကန်၊ မြေရင့်၊ သာစည်၊ စိုကန်စတဲ့ ကျေးရွာက ရေရှည်စစ်ရှောင် ၅၀၀ ဝန်းကျင်လည်း နေရာထပ်မံရွေ့ပြောင်းနေရတယ်လို့ ဆိုပါတယ်။

ဒါ့အပြင် ဒေသခံကာကွယ်ရေးတပ်တွေနဲ့လည်းတိုက်ပွဲဖြစ်နေပြီး အသေးစိတ်အခြေအနေကိုတော့ မသိရဘူးလို့ အထက်ပါဒေသခံက ပြောပါတယ်။

အလားတူ နိုဝင်ဘာ ၅ ရက် ည ၁၀ နာရီကျော်မှာလည်း ထီးလင်းမြို့နယ်မြောက်ပိုင်းရှိ ပုံညာတောင်တန်းကို စစ်ကော်မရှင်တပ်က တိုက်ခိုက်ရေးလေယာဥ် ၁ စီးနဲ့ ဗုံးသီး ၂ လုံး ကြဲချတိုက်ခိုက်ခဲ့ကာ ထိခိုက်မှုတွေတော့မရှိခဲ့ဘူးလို့ ဒေသခံအမျိုးသားတဦးက ပြောပါတယ်။

စစ်ကော်မရှင်တပ်တွေဟာ မကွေးတိုင်းအတွင်းကကျေးရွာတွေကို အောက်တိုဘာနဲ့ နိုဝင်ဘာ ပထမပတ်အတွင်း စစ်ကြောင်းထိုးမီးရှို့တာအပြင် အရပ်သားတွေနေထိုင်တဲ့နေရာတွေကိုပါ မကြာခဏလေကြောင်းကနေဗုံးကြဲတိုက်ခိုက်နေတာကြောင့် ဒေသခံထိခိုက် သေဆုံးမှုတွေလည်း ရှိနေပါတယ်။

မကွေး၊ အောက်တိုဘာ ၂၅၊ ၂၀၂၅။

မကွေးတိုင်း၊ ပခုက္ကူမြို့နယ်၊ ထန်းတပင်ကျေးရွာကို စစ်ကော်မရှင်တပ်က ပါရာမော်တာနဲ့ ဗုံးကြဲ ပစ်ခတ်ခဲ့တာကြောင့် ပြည်သူ ၂ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

အောက်တိုဘာ ၂၄ ရက်ည ၁၀ နာရီဝန်းကျင်မှာ ပါရာမော်တာ ၃ စီးနဲ့ ထန်းတပင်ရွာကို ဗုံး ၂ လုံးကြဲချပြီး စက်သေနတ်တွေနဲ့ပစ်ခတ်ခဲ့တာကြောင့် အသက် ၅၀ အရွယ်အမျိုးသမီး ၁ ဦးနဲ့ အမျိုးသား ၁ ဦး သေဆုံးပြီး အမျိုးသမီး ၂ ဦးထိခိုက်ဒဏ်ရာရခဲ့တယ်လို့ ဆိုပါတယ်။

“စစ်ကြောင်းကတော့လှုပ်ရှားမှုမရှိဘူး။ ရှောင်သူတွေများလို့ အဲ့လောက်ပဲသေတာ။ အစတွေ မှန်ပြီးသေကြတာ။ စက်လတ်နဲ့ရောပစ်တယ်။ တချို့ကျတော့ရုတ်တရက်ဆို ရှောင်ရခက်တယ်” လို့ ဒေသခံတဦးကပြောပါတယ်။

ပခုက္ကူမြို့နယ်အတွင်း ပခုက္ကူအခြေစိုက် တပ်မ ၁၀၁ မှစစ်ကော်မရှင်တပ်တွေကလည်း စစ်ကြောင်း ထိုးနေတာကြောင့် အိမ်ခြေ ၂၀၀ ခန့်ရှိထန်းတပင်ရွာက ဒေသခံတွေတိမ်းရှောင်ခဲ့ရပြီး အခုထိခိုက်သူတွေဟာ မတိမ်းရှောင်နိုင်ပဲ ကျန်ခဲ့သူတွေဖြစ်တယ်လို့ ဆိုပါတယ်။

အဆိုပါစစ်ကြောင်းဟာ အင်အား ၂၀၀ ခန့်နဲ့ ညောင်ဂျစ်ပင်ရွာမှာအထိုင်ချပြီးနောက် အောက်တိုဘာ ၂၅ ရက်ဒီမနက်ပိုင်းမှာ ပခုက္ကူမြို့နယ်အနောက်ဘက်ကို စစ်ကြောင်းထိုးနေတယ်လို့ သိရပါတယ်။

စစ်ကြောင်းကြောင့် ထန်းတပင်ကျေးရွာ အပါအဝင် ရေလာကြီး၊ ဝါးကျွန်းကွင်း၊ ဖောင်းကွဲ၊ ဖောင်းကျောင်း၊ ရေမျက်၊ ရွာသာအေး၊ ပြည့်အိုင်၊ ချောင်းဦးတိုစတဲ့ကျေးရွာကဒေသခံတွေလည်း ထွက်ပြေးတိမ်းရှောင်နေကြရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ အောက်တိုဘာ ၂၄ အထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့တဲ့ပြည်သူစုစုပေါင် ၇,၄၀၅
ဦးရှိတယ်လို့ နိုင်ငံရေးအကျဥ်းသားများကူညီစောင့်ရှောက်ရေးသင်း – AAPP က ထုတ်ပြန်ပါတယ်။

စာတည်း – လင်း

ဖမ်းခံထားရသူထဲ စစ်တပ်လက်အောက်ခံဆယ်အိမ်မှူးရဲ့တူပါဝင်ပြီး သိန်းရာချီတောင်းလို့ ပြန်မရွေးနိုင်ခဲ့ဟုဆို

တောင်ငူ၊ အောက်တိုဘာ ၁၅၊ ၂၀၂၅။

ပဲခူးတိုင်း၊ တောင်ငူမြို့နယ်၊ အုတ်ကျွတ်တန်း ၁၀ ရပ်ကွက်မှာ လူငယ် ၃ ဦးကို စစ်ကော်မရှင်တပ်က ဖမ်းဆီးခေါ်ဆောင်သွားပြီး ၁ ဦးကို အသက်မပြည့်သေးတာကြောင့် ပြန်လွှတ်ပေးလိုက်တယ်လို့ ဖြစ်စဉ်ကိုသိရှိတဲ့ဒေသခံတဦးကပြောပါတယ်။

အောက်တိုဘာ ၁၄ ရက် ည ၉ နာရီဝန်းကျင်မှာ ၁၆ နှစ်အရွယ် ကျော်ထက်ပိုင်၊ အသက် ၂၀ အရွယ် ဟိန်းမင်းထူးနဲ့ ဇင်မျိုးတို့ကို အလုပ်ဆင်းချိန်လမ်းလျှောက်အိမ်ပြန်လာစဉ် အုတ်ကျွတ်တန်းရပ်ကွက် ၁၀ လမ်းထိပ်မှာ စစ်ကော်မရှင်တပ်က ဖမ်းဆီးခေါ်ဆောင်သွားပြီး ကျော်ထက်ပိုင်ကိုတော့ စခန်းအရောက်မှာ မှတ်ပုံတင်စစ်ဆေးပြီး အသက်မပြည့်လို့ ပြန်လွှတ်ပေးခဲ့တာလို့ သိရပါတယ်။

“သူတို့စစ်မှုထမ်းအတွက် လူလိုတော့လက်ထောက်ချတဲ့သဘောပါပဲ။ အတွင်းလူပါလို့ပေါ့။ ဒီကလေးတွေ ဒီချိန်ပြန်လာတတ်တယ်ဆိုတာသိတော့လေ၊ ဆက်ကြေးလည်းကောက်တယ်၊ သူတို့လူလိုရင်လည်း အစားထိုးတယ်။ ပျူစောထီးအတွင်းလူရှိလို့ ဘယ်သူ့သားသမီး ဆွဲရင်လုပ်လို့ရတယ် ဆိုတဲ့ပုံစံမျိုးနဲ့ဆွဲနေတာ နိမ့်ပါးတဲ့ရပ်ကွက်တွေဆို သူတို့က အားကြီးလုပ်တယ်”လို့ ဒေသခံတဦးက ပြောပါတယ်။

အဖမ်းခံရသူ ၃ ဦးအနက် ဇင်မျိုးဆိုသူဟာ တောင်ငူမြို့အမှတ် ၁၀ ရပ်ကွက် စစ်မှုထမ်းကြေးကောက်ရာမှာ လိုက်လံလုပ်ဆောင်ပေးနေသူ အမှတ် ၁၀ ရပ်ကွက်ရဲ့ ဆယ်အိမ်မှူးသန်းလှအောင် ဇနီးရဲ့တူ ဖြစ်ပြီး သန်းလှအောင်ကိုယ်တိုင်သွားပြီး ညှိနှိုင်းထုတ်ယူခဲ့ပေမယ့် ပြန်လွှတ်မပေးခဲ့ဘူးလို့ ဒေသခံတဦးက ပြောပါတယ်။

“သူမနက်က သူ့တူအတွက်ကို အမှတ် ၁ စခန်းက နယ်ထိန်းကိုလှမ်းညှိတယ်တဲ့၊ ပထမတော့ သိန်း ၃၀ လို့ပြောတယ်တဲ့။ တကယ့်တကယ်သွားထုတ်တော့ သိန်း ၃၀ နဲ့လည်းမရဘူး။ အခုက ရာဂဏန်းပေးမှ လွှတ်ပေးမယ်ပြောပြီးတော့ လေတပ်စခန်းရှိတဲ့ နှစ်ဆောင်ပြိုင်လို့ခေါ်တဲ့ အဲ့ဘက်ကို ခေါ်သွားပြီလို့လည်း ကြားတယ်”လို့ သူကပြောပါတယ်။

ဒါ့အပြင် ဟိန်းမင်းထူးနဲ့ ကျော်ထက်ပိုင်တို့ ၂ ဦးဟာလည်း ညီအကိုတော်စပ်ပြီး မိဘတွေအနေနဲ့ လက်လုပ်လက်စားတွေဖြစ်တာကြောင့် ဟိန်းမင်းထူး ကို ငွေပေးပြီးမရွေးနိုင်ကြဘူးလို့ ဆိုပါတယ်။

တောင်ငူမြို့နယ်အတွင်း ပေါ်တာဆွဲဖမ်းဆီးခံရသူတွေကို တောင်ငူလေတပ်စခန်းဌာနချုပ် – တလခ ကို ကနဦးပို့ဆောင်ပြီးနောက် တောင်ပိုင်းတိုင်းစစ်ဌာနချုပ်နဲ့ အုတ်တွင်းမြို့နယ်၊ အုတ်တွင်းအခြေစိုက် အမှတ် ၆ တပ်မတော်တန်းမြင့်လေ့ကျင့်ရေးကျောင်း (တတက ၆) စစ်သင်တန်းကျောင်းကို ပို့ဆောင်လေ့ရှိပြီး အခု ဖမ်းဆီးခံရသူ ၂ ဦးကိုတော့ ဘယ်ကိုပို့ဆောင်တယ်ဆိုတာ အတိအကျမသိရသေးဘူးလို့ ဆိုပါတယ်။

တောင်ငူမြို့ပေါ်ရှိ အိမ်ထောင်စုတွေအနေနဲ့ ၁ လကို စစ်မှုထမ်းကြေး ၂ သောင်းပေး ဆောင်နေကြရပေမယ့် ပျူစောထီးအများစုကြောင့် မြို့ပေါ်အပြင် ကျေးရွာတွေဘက်မှာပါ ပေါ်တာဆွဲဖမ်းဆီးမှုတွေ မကြာခဏကြုံနေရပြီး နိမ့်ပါးတဲ့မိသားစုတွေက လူငယ်တွေကိုအဓိကထားဖမ်းဆီးနေကြတာလို့ ဒေသခံတဦးကပြောပါတယ်။

ပြီးခဲ့တဲ့ စက်တင်ဘာ ၂၀ ရက်ကလည်း တောင်ငူမြို့၊ သဖန်းပင်ကျေးရွာအုပ်စု၊ အလယ်ကျွန်းရွာမှာ ဒေသခံအမျိုးသား ၅ ဦး ပေါ်တာဆွဲဖမ်းဆီးခံရပြီး ၁ ဦးက ငွေပေးပြန်လွတ်လာကာ ၄ ဦးကတော့ စစ်မှုထမ်းအတွက် ပို့ဆောင်ခံခဲ့ရတယ်လို့ သိရပါတယ်။

စာတည်း – လင်း

၆ လအတွင်းပေါက်နဲ့ မြိုင်မှာ အကြိမ်ရေ ၂၀၀ နီးပါးဗုံးကြဲခံရပြီး ဒေသခံ ၂၀ ကျော်သေဆုံး

မကွေး၊ အောက်တိုဘာ ၉၊ ၂၀၂၅။

မကွေးတိုင်း၊ ပေါက်မြို့နယ်မြောက်ပိုင်းရှိ သပြေညိုရေနံမှော်ကို စစ်ကော်မရှင်တပ်က ဗုံးကြဲတိုက်ခိုက်တာကြောင့် အလုပ်သမားလင်မယား ၂ ဦးသေဆုံးပြီး ကလေးဖြစ်သူဒဏ်ရာရခဲ့တယ်လို့ ပေါက်မြို့နယ် ပြည်သူ့ကာကွယ်ရေးတပ်ဖွဲ့ဆီက သိရပါတယ်။

အောက်တိုဘာ ၈ ရက်မနက် ၁၀ နာရီဝန်းကျင်မှာ ဂျိုင်ရိုကော်ပတာ ၃ စီးနဲ့ဗုံးကြဲတိုက်ခိုက်ခဲ့ရာ ရေနံမှော်ရှိ ရေနံလုပ်သားတွေရဲ့ ယာယီနေအိမ်တွေပေါ်ကျရောက်ပေါက်ကွဲပြီး အသက် ၃၀ အရွယ် ရေနံလုပ်သား လင်မယား ၂ ဦးသေဆုံးပြီး ၇ နှစ်အရွယ်ကလေး ၁ ဦးထိခိုက်ဒဏ်ရာရခဲ့တယ်လို့ ဆိုပါတယ်။

“ရေနံမှော်ဆိုတော့ အလုပ်သမားတွေက နေအိမ်ပုံစံမျိုးနဲ့ အဆောက်အအုံတွေဆောက်နေတာမျိုးတွေ ရှိတယ်။ အဲ့လိုနားကိုကျသွားတာ။ နေအိမ်ပဲဆိုပါတော့ အဲ့အိမ်မှာ မိသားစု ၃ ယောက်ရှိတယ်။ အမျိုးသားနဲ့ အမျိုးသမီး တောက်လျောက်ဆုံးတယ်၊ ကလေးလေးကထိခိုက်မှုရှိတယ် အသက်ရှင်နိုင်ပါ့မယ်လို့မသိရဘူး၊ ထိခိုက်ပြင်းထန်တယ်” လို့ ပေါက်မြို့နယ်ပြည်သူ့ကာကွယ်ရေးတပ်ဖွဲ့မှ တာဝန်ရှိသူက ပြောပါတယ်။

ဒါ့အပြင် ပေါက်မြို့နယ်နဲ့ မြိုင်မြို့နယ်အတွင်းကို စစ်ကော်မရှင်တပ်က လေကြောင်းကနေ မကြာခဏဗုံးကြဲတိုက်ခိုက်နေပြီး မေလကနေ အောက်တိုဘာ ၉ ရက်အတွင်း အဲ့ဒီမြို့နယ်တွေထဲကို အကြိမ်ရေ ၂၀၀ နီးပါးကြဲခံရပြီး ဒေသခံ ၂၀ ကျော်လည်းသေဆုံးခဲ့တယ်လို့ ပေါက်မြို့နယ်ပြည်သူ့ကာကွယ်ရေးတပ်ဖွဲ့ မှ စုစည်းထားတဲ့စာရင်းကိုးကားပြီး အထက်ပါတာဝန်ရှိသူက ပြောပါတယ်။

အောက်တိုဘာ ၉ ရက်ဒီမနက်ပိုင်းမှာလည်း ပေါက်နဲ့ မြိုင်အစပ်တနေရာကို ဗုံးကြဲတိုက်ခိုက်ခဲ့သေးတယ်လို့ သိရပြီး ဒီအခြေအနေကိုတော့ မြေလတ်အသံကဆက်လက်စုံစမ်းနေပါတယ်။

ဗုံးကြဲရာမှာ Y12၊ Y8၊ ပါရာမော်တာအပြင် အခုနောက်ပိုင်း ဂျိုင်ရိုကော်ပတာတွေကိုပါ အသုံးပြုလာကာ လေကြောင်းအပြင် မြေပြင်ကနေလည်းစစ်ကြောင်းထိုးတာတွေရှိတဲ့အတွက် ဒေသခံတွေလည်း စိုးရိမ်မှုမြင့်တက်နေတယ်လို့ ဆိုပါတယ်။

“မြေပြင်စစ်ကြောင်းကလဲ ၅ လပိုင်းကတည်း ပေါက်နယ်အတွင်းမှာရှိနေတာ အခုချိန်ထိပဲဆိုပါတော့။ တနေရာမဟုတ် တနေရာမှာစစ်ကြောင်းလုပ်နေလို့ ပြည်သူရှောင်တိမ်းနေရတာမျိုးတွေရှိတယ်။ ဒုက္ခရောက်နေတာမျိုးတွေရှိတယ် စိုးရိမ်မှုအမျိုးမျိုးနဲ့ပေါ့ ပြည်သူကတော့”လို့ အထက်ပါတာဝန်ရှိသူက ပြောပါတယ်။

ပြီးခဲ့တဲ့ အောက်တိုဘာ ၇ ရက်မှာလည်း မြိုင်မြို့နယ်၊ ကျောက်ခွက်ရေနံမှော်အနီးကို ပါရာမှော်တာ ၂ စီး နဲ့ ဗုံးကြဲချတိုက်ခိုက်ခဲ့တာကြောင့် အမျိုးသား ၃ ဦးသေဆုံးခဲ့ပါသေးတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ အောက်တိုဘာ ၈ ရက်အထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့ရတဲ့ပြည်သူစုစုပေါင်း ၇,၃၃၉ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ပါတယ်။

စာတည်း – လင်း

ဝက်လက်၊ အောက်တိုဘာ ၂၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ တမာကန်ရွာကိုလာတဲ့ စစ်ကော်မရှင်တပ်ကပစ်ခတ်လို့ မသန်စွမ်း အမျိုးသား ၁ ဦးနဲ့ အဖွား ၁ ဦးသေဆုံးခဲ့တယ်လို့ Wetlet Informational Network တာဝန်ရှိသူဆီက သိရပါတယ်။

အောက်တိုဘာ ၂ ရက် ဒီမနက်ပိုင်းမှာ အင်အား ၁၀၀ ကျော်ပါစစ်ကြောင်းက တမာကန်ရွာကို ပစ်ခတ်ဝင်ရောက်လာချိန် အသက် ၈၀ အဖွား ၁ ဦးနဲ့ ၂၇ နှစ်အရွယ် မသန်စွမ်းအမျိုးသား ၁ ဦး သေဆုံးပြီး အသက် ၅၀ အရွယ်အမျိုးသား ၁ ဦးထိခိုက်ဒဏ်ရာရခဲ့တယ်လို့ ဆိုပါတယ်။

“သေဆုံးတာကတော့ **ကြောင်းဝင်လာမှ မတိမ်းနိုင်မရှောင်နိုင်တဲ့လူတွေမိတာလို့သိရတယ်ဗျ။ မွေးကတည်းက မသန်စွမ်းတဲ့ လူ ၁ ယောက်ရယ် အသက် ၈၀ ကျော် အဖွားရယ် ၂ ဦးက လက်နက်ငယ်နဲ့ ရမ်းသမ်းပစ်လို့ သေတယ်လို့သိရတယ်” လို့ Wetlet Informational Network ကတာဝန်ရှိသူက ပြောပါတယ်။

အဆိုပါစစ်ကြောင်းဟာ စက်တင်ဘာလလယ်လောက်မှာ မန္တလေးဂေါဝန်ဆိပ်ကနေတက်လာပြီး တပ်အောက်ရွာနဲ့ အထက်ရွာတွေမှာတပ်စွဲနေရာကနေ ဒီကနေ့မှာ တမာကန်ကျေးရွာကို စစ်ကြောင်းထိုး ဝင်ရောက်လာတာဖြစ်ပြီး လက်ရှိမှာ စစ်ကြောင်းကရွာထဲမှာပဲရှိနေသေးတယ်လို့ ဆိုပါတယ်။

ပစ်ခတ်မှုကြောင့်ထိခိုက်ဒဏ်ရာရသူဦးရေများနိုင်ပြီး ရွာထဲမှာဖမ်းခံထားရသူတွေလည်း ရှိတယ်လို့ သိရပါတယ်။

အဲ့ဒေသတွေမှာ မေလကုန်ပိုင်းလောက်ကစလို့ မကြာခဏစစ်ကြောင်းထိုးဝင်ရောက်တာတွေ ရှိနေပြီး တမာကန်ရွာအပါအဝင် တပ်(အောက်)ရွာ၊ တပ်(အထက်)ရွာ၊ ငါးရယ်၊ မင်းကုန်းလေး စတဲ့ ရွာတွေက ပြည်သူ ၅,၀၀၀ ကျော် စစ်ရှောင်နေကြရတယ်လို့သိရပါတယ်။

“ပြည်သူတွေက ဒီစစ်ကြောင်းမဝင်ခင်ထဲကိုက ရွာထဲမှာမအိပ်ကြဘူး။ အဝင်အထွက်လေး နေ့လယ် နေ့ခင်းမှသာ ထမင်းဝင်ချက်လိုက် နွားလေးဝင်ကျွေးလိုက် အဲ့လိုမျိုးနေနေကြတာဆိုတော့ ဗြုန်းဒိုင်းကြီးဝင်လာတော့ တချို့လဲထွက်နိုင်တယ်၊ တချို့လည်းမထွက်နိုင်ဘူး ရွာထဲမှာမနေတာက ဒီရက်ပိုင်းပဲ ရှိသေးတာ”လို့ Wetlet Informational Network ကတာဝန်ရှိသူက ပြောပါတယ်။

စက်တင်ဘာ ၉ ရက် နေ့လယ် ၃ နာရီကျော်ကလည်း ဝက်လက်မြို့နယ်က ကျေးရွာ ၆ ရွာကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ကလေး ၁ ဦးအပါအဝင် ၄ ဦးသေဆုံးပြီး ၁၃ ဦးဒဏ်ရာရရှိခဲ့တယ်လို့ ဒေသခံတွေဆီကသိရပါတယ်။

စာတည်း – လင်း