ဒိန်းဂျား

ရေစကြို၊ မတ် ၈၊ ၂၀၂၅။

မကွေးတိုင်း၊ ရေစကြိုမြို့ကနေ ပခုက္ကူမြို့ကိုထွက်တဲ့ ယာဉ်လိုင်း ၃ လိုင်းက စပါယ်ယာ ၁၄ ဦးကို စစ်ကောင်စီတပ်ဖွဲ့ဝင်တွေက ဖမ်းဆီးထားတယ်လို့ ရေစကြိုမြို့ခံတွေဆီက သိရပါတယ်။

မတ် ၇ ရက်မှာ ‌ရေစကြိုမြို့ကနေ ပခုက္ကူမြို့ကိုထွက်တဲ့ ချင်းတွင်းဧရာ၊ သလ္လာဝတီ၊ ရွှေသလ္လာမန်း ကားလိုင်းတွေက အသက် ၂၀ နဲ့ ၃၀ ကြား စပါယ်ယာ ၁၄ ဦးကို အပြာရောင်ဝတ်စုံတွေဝတ်ထားတဲ့ ပခုက္ကူမြို့ စီမံကောင်စီနဲ့ မြို့စောင့်တပ်ဖွဲ့ဝင်တွေက ပခုက္ကူမြို့အဝင် ရွှေချောင်းတံတား၊ မြို့ပတ်လမ်း၊ မြသီတာဂိတ်နဲ့ စက်မှုဇုန်ဂိတ်တွေမှာ ဖမ်းဆီးသွားတယ်လို့ ရေစကြိုမြို့ခံတဦး ပြောပါတယ်။

“ရေစကြိုမြို့ကနေ ပခုက္ကူမြို့ကိုထွက်တဲ့ ကားက ၄ လိုင်းရှိတာ။ တနေ့ကို ကားအစီးရေ ၃၀ ကျော်လောက်ထွက်တယ်။ ပေါင်မုန့်ကားလေးတွေပါ။ မြို့မေတ္တာ၊ ရွှေသလ္လာမန်း၊ ချင်းတွင်းဧရာ၊ သလ္လာဝတီ ကားလိုင်းတွေထဲက ချင်းတွင်းဧရာ၊ သလ္လာဝတီ၊ ရွှေသလ္လာမန်း ကားတွေပေါ်က စပယ်ယာ ၁၄ ဦးကို စစ်ကောင်စီက ဖမ်းဆီးထားတယ်။”လို့ ရေစကြိုမြို့ခံတဦး ပြောပါတယ်။

စစ်ကောင်စီတပ်ဟာ စစ်ကြောင်းထွက်ရင် ဖမ်းဆီးထားတဲ့လူတွေကို ရှေ့ကသွားခိုင်းတာမျိုး လုပ်လေ့ရှိပြီး ယခုဖမ်းဆီးခံရသူလူငယ်တွေကိုလည်း မိသားစုဝင်တွေက လိုက်ရွေးတဲ့အခါမှာ ၅ ရက်အတွင်းလိုက်မရွေးဖို့ အကြောင်းပြန်ခဲ့တာကြောင့် စစ်ကြောင်းမှာအသုံးချနိုင်တယ်လို့ သူကဆိုပါတယ်။

“စစ်ကြောင်းထိုးတဲ့နေရာမှာ သူတို့ကိုလိုအပ်တဲ့နေရာမှာခိုင်းဖို့ လူသားဒိုင်းလုပ်မှာပေါ့ဗျာ။ ရေလယ်ကျွန်းဘက်ကို မနေ့က အင်အား ၁၅၀ လောက်ထပ်ဖြည့်တယ်။ ဟိုဘက်မှာ အင်အား ၂၀၀ ရှိတာကို ၁၅၀ ထပ်ဖြည့်တဲ့အခါမှာ အဲ့ဒီလူတွေကိုရှေ့ကသွားခိုင်းပြီးတော့ လူသားဒိုင်းလုပ်တာ။ သူတို့ဖမ်းထားတဲ့ လူတွေမှန်သမျှ စစ်ကြောင်းထွက်ရင် ရှေ့ကသွားခိုင်းတာ။ ၅ ရက်လောက်ခေါ်ခိုင်းပြီးရင်တော့ ပြန်လာပြီးထုတ်လို့ရတယ်တဲ့။ ၅ ရက်အတွင်းတော့ လိုက်လည်းမလိုက်နဲ့ ရွေးလည်းမရွေးနဲ့ ခေါ်လို့လည်းမရဘူးလို့ပြောတယ်။” လို့ အထက်ပါ ဒေသခံကပြောပါတယ်။

ရေစကြိုကနေ ပခုက္ကူမြို့ကိုပြေးဆွဲနေတဲ့ ယာဉ်လိုင်း ၄ လိုင်းရှိကာ တနေ့ကို ကားအစီးရေ ၃၀ ကျော်ထွက်လေ့ရှိပြီး ယခုအခါ စပါယ်ယာ ၁၄ ဦးဖမ်းဆီးခံလိုက်ရတာကြောင့် ယာဉ်လိုင်းတွေမှာ ပြေးဆွဲနေတဲ့ကားတွေ ရပ်နားထားရတယ်လို့ ဆိုပါတယ်။

ပြီးခဲ့တဲ့ မတ် ၁ ရက်ကလည်း မြေစွန်းတော်ရွာက ဒေသခံ ၁၃ ဦးကို စစ်ကောင်စီကဖမ်းဆီးသွားပြီး စစ်ကြောင်းနဲ့အတူ လူသားဒိုင်း လုပ်ခဲ့တယ်လို့ သိရပါတယ်။

စာတည်း – ကိုချမ်း

ရေစကြို၊ မတ် ၇၊ ၂၀၂၅။

မကွေးတိုင်း၊ ရေစကြိုမြို့နယ် ခလရ ၂၅၈ တပ်မှာ တာဝန်ကျနေတဲ့ စစ်ကောင်စီတပ်ဖွဲ့ဝင် ၁ ဦး သေနတ် ၁ လက်ယူပြီး ဘက်ပြောင်းခိုလှုံလာတယ်လို့ ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် အဖွဲ့ဆီက သိရပါတယ်။

ဘက်ပြောင်းခိုလှုံလာတဲ့စစ်ကောင်စီတပ်ဖွဲ့ဝင်ဟာ အသက် ၂၃ နှစ်အရွယ်ရဲရင့်အောင်ဆိုသူဖြစ်ကာ ပြည်သူ့ကာကွယ်ရေးတပ်ဖွဲ့ဝင်တွေနဲ့ချိတ်ဆက်ပြီး မတ် ၅ ရက်နေ့ ည ၉ နာရီအချိန်မှာ တာဝန်ကျနေတဲ့ ခလရ ၂၅၈ တပ်ကနေ လက်နက်ယူကာ ထွက်ပြေးလာတာလို့ သိရပါတယ်။

“သူ့ကို ၂၀၂၄ နိုဝင်ဘာလလောက်မှာ ဖမ်းဆီးခံခဲ့ရတာ။ အဲ့ဒီကတဲ့ကနေ သူ့ကို စစ်မှုထမ်းဖို့ သင်တန်းပို့လိုက်တာ သူက ဟိုပုံးမှာ သင်တန်း ၈ ပတ်အကြာ တက်ခဲ့ရတယ်။ ပြီးခဲ့တဲ့ လထဲမှာ ရေစကြို ခလရ ၂၅၈ တပ်ကိုရောက်တာပါ”လို့ ပြည်သူ့ကာကွယ်ရေးတပ်ဖွဲ့ – ရေစကြိုမြို့နယ် သတင်းနှင့်ပြန်ကြားရေးတာဝန်ခံက ပြောပါတယ်။

ဘက်ပြောင်းခိုလှုံလာသူရဲရင့်အောင်ဟာ စစ်ကိုင်းနယ်ထဲကဖြစ်ကာ စစ်ကိုင်းတံတားပေါ်မှာ စစ်ကောင်စီတပ်ရဲ့ ဖမ်းဆီးတာ၊ မှတ်ပုံတင်သိမ်းဆည်းတာခံရပြီး စစ်မှုထမ်းခဲ့ရတာလို့ သိရပါတယ်။

ရဲရင့်အောင်ထွက်ပြေးလာချိန်မှာ MA 1 ၁ လက်ပါယူဆောင်လာနိုင်တာကြောင့် ပြည်သူ့ကာကွယ်ရေးတပ်ဖွဲ့-ရေစကြိုမြို့နယ်အနေနဲ့ ကျပ်သိန်း ၃၀ ချီးမြှင့်ပေးခဲ့တယ်လို့ အထက်ပါတာဝန်ခံက ပြောပါတယ်။

မကွေးတိုင်း၊ ရေစကြိုမြို့နယ်အခြေစိုက် ပြည်သူ့ကာကွယ်ရေးတပ်ဖွဲ့-ရေစကြိုမြို့နယ်အဖွဲ့ဆီကို စစ်မှုထမ်းဥပ‌ဒေနဲ့အဖမ်းဆီးခံရပြီး တာဝန်ကျရာတပ်တွေကနေ ဘက်ပြောင်းခိုလှုံလာသူ စစ်ကောင်စီတပ်ဖွဲ့ဝင် ၇ ဦးနဲ့ ဖမ်းဆီးရမိသူ ၁ ဦးရှိတယ်လို့ သိရပါတယ်။

စာတည်း – ကိုချမ်း

ဆင်ဖြူကျွန်း၊ မတ် ၇၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့၊ သရက်ချဉ်ကျေးရွာမှာ စစ်ကောင်စီတပ်ဖွဲ့ဝင်တွေက တင့်ကားတွေအပါအဝင် အင်အားအလုံးအရင်းနဲ့ တပ်ဖြန့်ထားတယ်လို့ ဆင်ဖြူကျွန်းမြို့ခံတွေဆီက သိရပါတယ်။

မတ် ၇ ရက် မနေ့မနက် ၁၀ နာရီခန့်မှာ စစ်ကား ၁၀ စီး၊ တင့်ကား ၅ စီး၊ စစ်ကောင်စီတပ်ဖွဲ့ဝင် အင်အား ၃၀၀ ကျော်နဲ့ တပ်ဖြန့်ထားတာဖြစ်ပြီး အဲ့ဒီတပ်ဖွဲ့ဝင်တွေဟာ ပခုက္ကူအခြေစိုက် တပ်မ ၁၀၁၊ စလင်းမြို့နယ်အခြေစိုက် ခလရ ၂၅၃၊ ၂၅၄ နဲ့ ၂၅၅ ကဖြစ်တယ်လို့ ဆိုပါတယ်။

“သရက်ချဉ် ဘုန်းကြီးကျောင်းကနေ ရမ်းဘိုကုန်းရွာထိပ်အထိ ကင်းပုန်းဝပ်ပြီး တပ်ဖြန့်နေကြတာ။ လက်ရှိတော့ ဘာမှမလုပ်သေးကြဘူး။”လို့ ဒေသခံတဦးက ပြောပါတယ်။

အိမ်ခြေ ၉၀ နဲ့ လူဦးရေ ၅၀၀ ကျော်ရှိတဲ့ သရက်ချဉ်ကျေးရွာကို ပြီးခဲ့တဲ့ ၂၀၂၄ အောက်တိုဘာ ၂၇ ရက်မှာ စစ်ကောင်စီတပ်ဖွဲ့ဝင်တွေက စတင်ဝင်ရောက်အထိုင်ချခဲ့တဲ့အတွက် ကျေးရွာဒေသခံအများစု ထွက်ပြေးတိမ်းရှောင်ခဲ့ကြရပါတယ်။

အခုထပ်မံရောက်ရှိလာတဲ့ စစ်ကောင်စီတပ်ဖွဲ့ဝင်တွေကတော့ ဆင်ဖြူကျွန်း နယ်မြေရဲစခန်းမှူးအသတ်ခံရပြီးနောက်မှာ ရောက်လာခဲ့တာလို့ ဆိုပါတယ်။

ပြီးခဲ့တဲ့ မတ် ၄ ရက်က ဆင်ဖြူကျွန်းမြို့၊ အမှတ် ၁၊ သုံးပင်တောင်ရပ်ကွက်မှာ ဆင်ဖြူကျွန်း နယ်မြေရဲစခန်းမှူး ပစ်ခတ်ခံရပြီးသေဆုံးခဲ့တယ်လို့ သိရပါတယ်။

စာတည်း – ချယ်ရီ

တောင်တွင်းကြီး၊ မတ် ၇၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ ပရပ်ကြယ်အုပ်စု၊ ကန်ကြီးကုန်းကျေးရွာအုပ်ချုပ်ရေးမှူး သေနတ်ပစ်ခတ်ခံခဲ့ရပြီး သေဆုံးခဲ့တယ်လို့ Magway Guerrilla Warfare မကွေးပြောက်ကျားတပ်ဆီက သိရပါတယ်။

သေဆုံးသူမှာ ကန်ကြီးကုန်းကျေးရွာအုပ်ချုပ်ရေးမှူး အသက် ၅၅ ဝန်းကျင်အရွယ် ဝင်းသန်း ဖြစ်ပြီး မတ် ၆ ရက် နေ့လယ် ၁ နာရီခွဲဝန်းကျင်မှာ ၎င်းရဲ့နေအိမ်အတွင်းဝင်ရောက် ပစ်ခတ်ခဲ့တာလို့ ဆိုပါတယ်။

“ သူ့နယ်အတွင်း နေအိမ်မှာပင်ရှင်းလင်းခဲ့တာ။ ၄ ချက်ပစ်ခတ်ရှင်းလင်းခဲ့တာ၊ ပေါင် ၂ ချက်၊ ဦးခေါင်း ၂ ချက်ပစ်ခတ်ပြီး ရှင်းလင်းခဲ့တာ။” လို့ Magway Guerrilla Warfare မကွေးပြောက်ကျားတပ်တာဝန်ခံ ကံကြီးမောင်က ပြောပါတယ်။

အုပ်ချုပ်ရေးမှူး ဝင်းသန်းဟာ စစ်ကောင်စီတပ်ဖွဲ့ဝင်တွေနဲ့ပေါင်းပြီး ပြည်သူတွေဆီက လစဉ်စစ်မှုထမ်းကြေးကောက်ခံတာတွေ လုပ်ဆောင်နေတဲ့သူဖြစ်တယ်လို့ ဆိုပါတယ်။

ပစ်ခတ်မှုဖြစ်ပြီးတဲ့နောက် ပရပ်ကြယ်ရွာရဲစခန်းက စစ်ကောင်စီတပ်ဖွဲ့ဝင်တွေဟာ အခင်းဖြစ်ပွားတဲ့ကံကြီးကုန်းရွာကိုထွက်လာခဲ့ပေမယ့် ရွာအထိရောက်မလာဘဲ လမ်းကနေ ပရပ်ကြယ်ရဲစခန်းကို ပြန်လှည့်သွားတယ်လို့ သိရပါတယ်။

ပစ်ခတ်မှုကို Magway Guerrilla Warfare မကွေးပြောက်ကျားတပ်၊ Dragon King People’s Defence Forceနဲ့ နဂါးမင်းပြည်သူ့ကာကွယ်ရေးအဖွဲ့တောင်တွင်းကြီးတို့က ပူးပေါင်းလုပ်‌ဆောင်ခဲ့တာဖြစ်ပါတယ်။

ဖေဖော်ဝါရီ ၁၇ ရက်ကလည်း တောင်တွင်းကြီးမြို့နယ်၊ ထောက်ကြံ့ကွင်း‌ကျေးရွာ စစ်တပ်ဂိတ်အနီးအရက်ဆိုင်ဖွင့်ကာ စစ်ကောင်စီတပ်ဖွဲ့နဲ့ပူးပေါင်းပြီး လမ်းသွားလမ်းလာတွေကို ဆက်ကြေးကောက်တယ်လို့ နာမည်ကြီးတဲ့ လင်မယားသေနတ်ပစ်ခတ်ခံရပြီး သေဆုံးခဲ့ပါသေးတယ်။

စာတည်း – ဟိန်းစံ