ဒိန်းဂျား

ရေစကြို၊ မတ် ၁၄၊ ၂၀၂၅။

မကွေးတိုင်း၊ ရေစကြိုမြို့နယ်၊ သာဂေါင်ရွာမှာအထိုင်ချနေတဲ့ စစ်ကောင်စီတပ်ဖွဲ့ဝင်တွေက ဒေသခံ ၆ ဦးကိုသတ်ဖြတ်ခဲ့ပြီး ရွာကထွက်ချိန်မှာလည်းနေအိမ်တွေကိုမီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

တပ်မ ၁၀၁ လက်အောက် အင်အား ၃၀၀ ဝန်းကျင်ပါ ခလရ ၂၅၆၊ ခလရ ၂၅၇၊ ခလရ ၂၅၈ စစ်ကြောင်းဟာ မတ် ၇ ရက်ကနေ ၁၂ ရက်အထိ သာဂေါင်ရွာမှာအထိုင်ချနေထိုင်ခဲ့ပြီး မတ် ၁၂ ရက် မနက်ပိုင်းမှာရွာကပြန်ထွက်ချိန် နေအိမ်တွေကိုမီးရှို့ခဲ့တာပါ။

စစ်ကြောင်းပြန်ထွက်သွားချိန်မှာတော့ ဒေသခံတွေက ခေါင်းဖြတ်၊ မီးရှို့သတ်ခံထားရတဲ့ အလောင်း ၆ လောင်းကိုတွေ့ခဲ့ရတာလို့ ဆိုပါတယ်။

“သူတို့ပြန်ထွက်သွားတဲ့အချိန်မှာ နှိပ်စက်ဖမ်းဆီးမီးရှို့သတ်ဖြတ်သွားတဲ့ ရုပ်အလောင်း ၆ လောင်းကိုတွေ့ရတယ်၊ သတ်တာတော့ ဘယ်အချိန်သတ်တယ်ဆိုတာတော့ မသိရဘူး၊ သူတို့ အထိုင်ချသွားတဲ့ ရက်အတွင်းမှာ အားလုံး ၆ ဦးအသတ်ခံရတယ်၊ ၁ ဦးကတော့ ခေါင်းဖြတ်ပြီးတော့ မီးရှို့ထားတယ်၊ ခေါင်းကိုတော့ အိမ်ခြံစည်းရိုးမှာ ချိတ်ထားတာ၊” လို့ ဒေသခံတဦးကပြောပါတယ်။

သာဂေါင်ရွာက အသက် ၆၅ နှစ် အရွယ် ဦးချစ်မောင်၊ အသက် ၄၂ နှစ် အရွယ် ဦးသန်းမင်းလှိုင်၊ အသက် ၉၁ နှစ် အရွယ် ဦးအုန်း၊ အသက် ၇၀ အရွယ် ဒေါ်ခင်စန်းဝေ တို့အသတ်ခံရပြီး ကျန် ၂ ဦးကတော့ လူသားဒိုင်းအဖြစ်ဖမ်းဆီးခေါ်ဆောင်လာသူတွေဖြစ်တယ်လို့ ဆိုပါတယ်။

လက်ရှိမှာ ဒေသခံတွေလည်းနေရပ်ကနေထွက်ပြေးတိမ်းရှောင်နေကြပြီး ပျက်စီးဆုံးရှုံးတဲ့ နေအိမ်အရေအတွက်ကိုတော့ အတည်မပြုနိုင်သေးဘူးလို့ သူကဆက်ပြောပါတယ်။

“အိမ်အရေအတွက်တော့ မသိရသေးဘူး၊ သူတို့ကတော့ နေအိမ်ကတွေ့သမျှပစ္စည်း အကုန်ယူတယ်၊ လက်ဝတ်လက်စား ရွှေ၊ ဖွက်ထားတဲ့ပစ္စည်းကအစ မကျန်ယူသွားကြတာ”လို့ ရေစကြိုမြို့ခံတဦးက ပြောပါတယ်။

သာဂေါင်ရွာကထွက်ခွာသွားတဲ့စစ်ကြောင်းဟာ မတ် ၁၄ ရက်ဒီနေ့မှာ မြေတော်ရွာ၊ ဘီးစပ်ကုန်းရွာက နေအိမ်တွေကို မီးဆက်ရှို့နေတယ်လို့ သိရပါတယ်။

သာဂေါင်ကျေးရွာဟာ အိမ်ခြေ ၅၀၀၊ လူဦးရေ ၂,၀၀၀ ဝန်းကျင်ရှိပြီး ဒေသခံအားလုံးနီးပါး တိမ်းရှောင်နေကြရသလို ဇရပ်နီရွာ၊ ရွှေလှံရွာ၊ မြေစွန်းတော်ရွာ၊ ဆင်ချီရာရွာ၊ သာဂေါင်ရွာ၊ နမော့ရွာ၊ မိဖုရားရွာ၊ မီးလောင်ကျွန်းရွာ တို့က ဒေသခံ ၂၀,၀၀၀ ကျော်လည်း စစ်ဘေးရှောင်နေရပြီး သူတို့အတွက် ဆေးဝါး၊ စားနပ်ရိက္ခာလို‌အပ်နေတယ်လို့ အထက်ပါဒေသခံကပြောပါတယ်။

စာတည်း – လင်း

ဆင်ဖြူကျွန်း၊ မတ် ၁၄၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့နယ်အတွင်း လှည့်ပတ်စစ်ကြောင်းထိုးနေတဲ့ စစ်ကောင်စီတပ်ဖွဲ့က ကုက္ကိုတန်းကျေးရွာကို မီးလောင်ဗုံး၊လက်နက်ကြီးတွေနဲ့ပစ်ခတ်လို့ နေအိမ် ၃၀၀ ခန့် မီးလောင်ခဲ့တယ်လို့ ဒေသခံတွေထံက သိရပါတယ်။

မတ် ၁၃ ရက် မနေ့ည ၉ နာရီ ၄၅ မိနစ်လောက်မှာ ကျပင်းကျေးရွာအနီး ကြက်ရိုးတောင်ပေါ်မှာ ယာယီတပ်စွဲနေတဲ့ အဆိုပါစစ်ကောင်စီစစ်ကြောင်းက ကုက္ကိုတန်းကျေးရွာကို လက်နက်ကြီး၊ မီးလောင်ဗုံးတွေနဲ့ပစ်ခတ်ခဲတာလို့ဆိုပါတယ်။

“ အခုကတော့ တရွာလုံးကုန်ပြီလို့ သိရတယ်၊ မီးကတော်တော်ပြင်းတယ်” လို့ ကုက္ကိုတန်းရွာခံအမျိုးသမီးတဦးက မြေလတ်အသံကို ပြောပါတယ်။

မီးလောင်ဗုံးကြောင့် အိမ်ခြေ ၃၀၀ ဝန်းကျင် လူဦးရေ ၁,၅၀၀ ခန့်ရှိ ကုက္ကိုတန်းကျေးရွာမှာ ရွာလုံးကျွတ်နီးပါးနေအိမ်တွေ မီးလောင်ဆုံးရှုံးခဲ့ပြီး ဒေသခံတွေက စစ်ကောင်စီစစ်ကြောင်းစတင်ဝင်ရောက်တဲ့ မတ် ၈ ရက်က စတင်ကာ ရိက္ခာနဲ့ပစ္စည်းတချို့ယူဆောင်ကာ နီးစပ်ရာတောစပ်တွေမှာ စစ်ရှောင်နေကြရတယ်လို့ ဆိုပါတယ်။

မတ်လဒုတိယအပတ်က စတင်ကာ စစ်ကောင်စီတပ်ဖွဲ့က ဆင်ဖြူကျွန်းနယ်အတွင်း စစ်ကြောင်းထိုးမီးရှို့တာနေတာကြောင့် ကုက္ကိုတန်းရွာအပါအဝင် ကျေးရွာ ၂၀ ခန့်က ဒေသခံ ၁၀,၀၀၀ ကျော်ဟာ ဘေးလွတ်ရာကို အရေးပေါ်စစ်ရှောင်နေကြရတာပါ။

အဆိုပါစစ်ကောင်စီတပ်ဟာ ပခုက္ကူအခြေစိုက် တပ်မ ၁၀၁ နဲ့ စလင်း ခလရ ၂၅၃၊ ခလရ ၂၅၄၊ ခလရ ၂၅၅ တပ်တွေက စစ်ကောင်စီတပ်ဖွဲ့ဝင် ၃၀၀ ကျော်ပါ ပူးပေါင်းစစ်ကြောင်းဖြစ်ပြီး လက်ရှိမှာ ကျပင်းကျေးရွာအနီးမှာပဲ ယာယီတပ်စွဲထားတယ်လို့ သိရပါတယ်။

၎င်းစစ်ကြောင်းကပဲ မတ် ၁၁ နဲ့ ၁၂ ရက်တွေမှာလည်း ကျပင်းရွာနဲ့ နေပူကန်ရွာက နေအိမ်တွေကို မီးရှို့ခဲ့လို့ နေအိမ် ၈၀ ကျော်မီးလောင်ဆုံးရှုံးခဲ့ပါသေးတယ်။

စာတည်း – ဟိန်းစံ

ဆင်ဖြူကျွန်း၊ မတ် ၁၃၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့၊ နေပူကန်ကျေးရွာက နေအိမ် ၈၀ ကျော်ကို စစ်ကောင်စီတပ်ဖွဲ့ဝင်တွေက မီးရှို့ဖျက်ဆီးသွားတယ်လို့ ဒေသခံတွေဆီက သိရပါတယ်။

မတ် ၁၂ ရက် ညနေ ၄ နာရီ ၄၀ မိနစ်လောက်မှာ ကျပင်းရွာမှာအထိုင်ချတပ်စွဲနေရာကနေ ထွက်လာတဲ့ ပခုက္ကူအခြေစိုက် တပ်မ ၁၀၁ နဲ့ စလင်း ခလရ ၂၅၃၊ ခလရ ၂၅၄၊ ခလရ ၂၅၅ တပ်တို့က စစ်ကောင်စီတပ်ဖွဲ့ဝင် ၃၀၀ ကျော်ပါစစ်ကြောင်းဟာ နေပူကန်ကျေးရွာထဲကိုဝင်လာပြီး နေအိမ်တွေကို မီးရှို့ခဲ့တာလို့ ဆိုပါတယ်။

“ဘာကြောင့်မီးဝင်ရှို့တာတော့ မသိရဘူး၊ အိမ်ခြေ ၇၀၊ ၈၀ လောက် မီးလောင်သွားတယ်။ နည်းနည်းတော့ ကျန်သေးတယ်၊ စစ်ရှောင်တွေကတော့ တောထဲမှာနေရတာ၊ မနေ့ကအထိ ၁၇ ရွာ စစ်ရှောင်နေရပြီး အခုဆိုရင် အုတ်ရှစ်ကုန်းရွာ၊ ကန်တော်ရွာ၊ နွားတပ်ရွာတို့က ပြည်သူတွေလည်း စစ်ရှောင်နေရတယ်” လို့ ဆင်ဖြူကျွန်းမြို့ခံတဦးက ပြောပါတယ်။

နေပူကန်ရွာကို ဝင်ရောက်မီးရှို့ခဲ့တဲ့စစ်ကောင်စီတပ်ဖွဲ့ဝင်တွေဟာ မတ် ၁၁ ရက်ကလည်း ကျပင်းရွာက နေအိမ်တွေကို မီးရှို့ဖျက်ဆီးခဲ့တဲ့စစ်ကြောင်းဖြစ်ပြီး အိမ်ခြေ ၁၁၀ ရှိတဲ့ နေပူကန်ရွာက ပြည်သူ ၅၀၀ ကျော်ဟာလည်း ထွက်ပြေးတိမ်းရှောင်နေကြရတယ်လို့ ဆိုပါတယ်။

စစ်ကောင်စီတပ်ဖွဲ့ဝင်တွေ စစ်ကြောင်းထိုးမီးရှို့တာတွေလုပ်နေတာကြောင့် ကျပင်းတောင်ရွာနဲ့ မြောက်ရွာအပါ အနီးတဝိုက်ရွာတွေဖြစ်တဲ့ ချောင်းဖြူ အမှု့အနောက်၊ တောင်ပို၊ သပြေပင်ရွာသစ်၊ ကျောင်းကုန်း၊ မြို့သစ်၊ ကုက္ကိုကျင်း၊ ကုက္ကိုတန်း၊ နေပူကန်၊ ကုန်းကြား၊ ဇီးဖြူပင်၊ သန်းကုန်း၊ ကိုးလံ၊ အုတ်ရှစ်ကုန်းရွာ၊ ကန်တော်ရွာ၊ နွားတပ်ရွာ စတဲ့ကျေးရွာတွေအပါ ကျေးရွာ ၂၀ ရွာက ဒေသခံ ၁၀,၀၀၀ ကျော်ဟာ ဘေးလွတ်ရာကို အရေးပေါ်စစ်ရှောင်နေကြရတယ်လို့ သိရပါတယ်။

စာတည်း – ကိုချမ်း

မင်းလှ၊ မတ် ၉၊ ၂၀၂၅။

ပဲခူးတိုင်း၊ သာယာဝတီခရိုင်၊ မင်းလှမြို့နယ်၊ ထန်းပင်ကုန်းအုပ်စု၊ နတ်ထမင်းကျေးရွာရာအိမ်မှူး သေနတ်ပစ်ခတ်ခံခဲ့ရပြီး သေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ ဆီက သိရပါတယ်။

သေဆုံးသူဟာ နတ်ထမင်းကျေးရွာရာအိမ်မှူး အသက် ၄၅ ဝန်းကျင် အငယ်လေး (ခ) သက်နိုင်စိုး ဖြစ်ပြီး မတ် ၈ ရက် နေ့လယ် ၁၁ နာရီ ၄၅ မိနစ်ဝန်းကျင်မှာ ၎င်းရဲ့နေအိမ်အတွင်း ဝင်ရောက် ပစ်ခတ်ခဲ့တာလို့ ဆိုပါတယ်။

“နတ်ထမင်းရွာက ရာအိမ်မှူးအငယ်လေး အိမ်ထဲမှာထိုင်နေတဲ့အချိန် ကျနော်တို့ ပူးပေါင်းရဲဘော်တွေနဲ့ အိမ်ထဲဝင်ပြီး ခေါင်းတည့်တည့်ကို ကျည် ၃ ချက်ပစ်တာ ပွဲချင်းပြီး သေပါတယ်။ ကျနော်တို့လည်း စစ်**ဂိတ် တော်တော်များများကိုဖြတ်ပြီး ရှင်းလင်းခဲ့ရတာလို့” သာယာဝတီခရိုင် တပ်ရင်း ၃၈၀၂ တပ်ခွဲ ၂ တာဝန်ရှိသူတဦးက ပြောပါတယ်။

ရာအိမ်မှူး အငယ်လေး (ခ) သက်နိုင်စိုးဟာ စစ်ကောင်စီတပ်ဖွဲ့ဝင်တွေနဲ့ပေါင်းပြီး ဒေသခံတွေဆီက စစ်မှုထမ်းကြေးကောက်ခံတာတွေ စစ်မှုထမ်းကြေးမပေးတဲ့သူတွေကို စစ်တပ်ခေါ်ကာ ဖမ်းခိုင်းတာတွေလုပ်တဲ့အပြင် PDF တွေကို စိန်ခေါ်နေတဲ့သူဖြစ်တယ်လို့ ဆိုပါတယ်။

ရာအိမ်မှူးကိုပစ်ခတ်ပြီးတာနဲ့ တော်လှန်ရေးတပ်ဖွဲ့တွေ ပြန်လည်ဆုတ်ခွာလာတာ‌ကြောင့် နောက်ဆက်တွဲအခြေအနေကို မသိရသေးဘူးလို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ တာဝန်ရှိသူတဦးက ဆက်ပြောပါတယ်။

ပစ်ခတ်မှုကို သာယာဝတီခရိုင် တပ်ရင်း ၃၈၀၂ တပ်ခွဲ ၂ နဲ့ မင်းလှမြို့နယ် ပြည်သူ့ကာကွယ်ရေးအဖွဲ့တို့က ပူးပေါင်းလုပ်‌ဆောင်ခဲ့တာဖြစ်ပါတယ်။

မတ် ၄ ရက်ကလည်း မင်းလှမြို့နယ်၊ ဦးတိုကညင်ပင်အုပ်စု၊ ဦးတိုမြန်မာစုရွာ‌နေ ပျူစောထီး ခင်မောင်ဝင်းကို တာကလေးရွာ ရန်ကုန်-ပြည်လမ်းဘေးရှိ ဇရပ်မှာထိုင်နေစဉ် သာယာဝတီခရိုင် တပ်ရင်း ၃၈၀၂ တပ်ခွဲ ၂ ပစ်ခတ်ခဲ့တာကြောင့် သေဆုံးခဲ့တယ်လို့ သိရပါတယ်။

စာတည်း – ကိုချမ်း

မြေလတ်အသံ၊ မတ် ၈၊ ၂၀၂၅။

မန္တလေးတိုင်း၊ မိတ္ထီလာအခြေစိုက်၊ ခြေမြန်တပ်မဌာနချုပ် တပ်မ ၉၉ မှာတာဝန်ကျနေတဲ့ စစ်ကောင်စီတပ်ဖွဲ့ဝင် ၁ ဦး လက်နက်ခဲယမ်းတွေနဲ့ ဘက်ပြောင်းခိုလှုံလာတယ်လို့ မင်းဘူးခရိုင် အမှတ် ၂ တပ်ရင်းဆီက သိရပါတယ်။

အသက် ၃၂ နှစ်အရွယ် စစ်ကောင်စီတပ်ဖွဲ့ဝင် ၁ ဦးက မတ်လ ၇ ရက်မှာ မင်းဘူးခရိုင် အမှတ် ၂ တပ်ရင်းဆီကို လက်နက်ခဲယမ်းတွေယူပြီး ဘက်ပြောင်းခိုလှုံလာတာလို့ ဆိုပါတယ်။

“အမည်ကတော့ သူ့လုံခြုံရေး သူ့မိသားစုအနေအထားကြောင့် ပြောလို့အဆင်မပြေလို့ပါ။ သူကတော့ တပ်ထဲမှာ မနေချင်တာပါပဲ၊ ပြည်သူ့ဘက်မှာနေချင်တယ်၊ ပြည်သူ့ဘက်ကို ခိုလှုံချင်တယ်။ ကျနော်တို့ တပ်ရင်းနဲ့ပူးပေါင်းပြီးတော့ ဆက်လက်လုပ်ဆောင်သွားမှာရှိပါတယ်”လို့ မင်းဘူးခရိုင် အမှတ် ၂ တပ်ရင်း တပ်ရင်းမှူး ဗိုလ်ဇာမဏီက ပြောပါတယ်။

အဆိုပါတပ်ဖွဲ့ဝင်အနေနဲ့ စစ်ကောင်စီကိုပြန်လည်တိုက်ခိုက်ဖို့ ဆန္ဒရှိတာကြောင့် တပ်ရင်းမှာပဲ ဆက်လက်တာဝန်ထမ်းဆောင်နိုင်ဖို့ စီစဉ်ပေးထားပေးထားတယ်လို့ ဆိုပါတယ်။

“ကျနော်တို့ သူ့ကို ရှေ့တန်းမှာပဲဖြစ်ဖြစ် နောက်တန်းမှာပဲဖြစ်ဖြစ် ထားဖို့တော့စီစဉ်ထားပါတယ်။ နောက်ပြီးတော့ ထောက်ပို့အပိုင်းတွေ ရုံး‌ပိုင်းဆိုင်ရာတွေ ဆေးဘက်ဆိုင်ရာတွေရှိတာကြောင့် သူတဖက်ဖက်မှာ ပါဝင်မှာ”လို့ တပ်ရင်းမှူးဗိုလ်ဇာမဏီက ပြောပါတယ်။

တပ်မ ၉၉ က တပ်သားတဦးဘက်ပြောင်းလာချိန်မှာ MA 1 ၁ လက်၊ ကျည် ၉၆ တောင့်၊ ကျည်ဘောက် ၃ ခု၊ ရေဗူး ၁ ဗူး၊ အီကွေ့မန့် ၁ ခု၊ အင်္ကျီ ၁ ထည်၊ စစ်ဖိနပ် ၁ ရံ တို့ကိုယူဆောင်လာနိုင်တာကြောင့် တပ်ရင်းအနေနဲ့ ဆုချီးမြှင့်ပေးခဲ့တယ်လို့ အထက်ပါတပ်ရင်းမှူးက ပြောပါတယ်။

အထက်ပါစစ်ကောင်စီတပ်သားဟာ မင်းဘူးမြို့နယ်အခြေစိုက် မင်းဘူးခရိုင် အမှတ် ၂ တပ်ရင်းအဖွဲ့ဆီကိုဘက်ပြောင်းခိုလှုံလာတဲ့ ပထမဆုံးသူဖြစ်တယ်လို့လည်း သိရပါတယ်။

စာတည်း – လင်း