အောင်စိုး

မြေလတ်အသံ၊ နိုဝင်ဘာ ၂၄၊ ၂၀၂၅။

စစ်ကိုင်းတိုင်း၊ တန့်ဆည်မြို့နယ်၊ ကံထူးမကျေးရွာရဲ့ တိုက်နယ်ဆေးရုံကို စစ်ကော်မရှင်တပ်က နိုဝင်ဘာ ၂၄ ရက်ဒီမနက် ၁ နာရီကျော်မှာ ဗုံးကြဲတိုက်ခိုက်ခဲ့တာကြောင့် လူငယ် ၂ ဦးအပါအဝင် ၇ ဦး သေဆုံးခဲ့တယ်လို့ ဒေသခံတွေက ပြောပါတယ်။

စစ်ကော်မရှင်တပ်ရဲ့ တိုက်ခိုက်ရေးလေယာဥ် ၁ စီးနဲ့ တိုက်နယ်ဆေးရုံကို ဗုံးသီး ၂ လုံးကြဲချခဲ့တာဖြစ်ပြီး ဆေးရုံအနီးရှိ ကားဘော်ဒီဆိုင်ကိုပါ ဗုံးထိမှန်ခဲ့တာကြောင့် ဆိုင်မှာရှိနေတဲ့ အမျိုးသား ၇ ဦးသေဆုံးပြီး ၃ ဦးဒဏ်ရာရရှိခဲ့တာလို့ ဆိုပါတယ်။

“သေဆုံး၊ ဒဏ်ရာရတာက ဆေးရုံတက်နေတဲ့လူနာတွေမဟုတ်ပါဘူး။ ပစ်ခံရတဲ့ ဓာတ်မှန်ဆောင်ကလည်း လူနာတွေ လက်ခံပြီးတော့ကုနေတာမရှိဘူး။ သေဆုံး၊ ဒဏ်ရာရတဲ့သူတွေက ကားဘော်ဒီဆိုင်က အလုပ်သမားတွေနဲ့ အလုပ်သမားတွေကို မှီခိုနေတဲ့ မိသားစုဝင်တွေပဲ ဖြစ်ပါတယ်”လို့ တန့်ဆည်ဒေသခံအမျိုးသားတဦးက ပြောပါတယ်။

သေဆုံးသူ ၇ ဦးမှာ ဇင်ကို ၁၆ နှစ်၊ ကတုံး ၁၇ နှစ်၊ ပိုင်ချစ် ၁၉ နှစ်၊ ပေါက်စ(ခ)ရှိုင်းထက်အောင် ၂၀ နှစ်၊ ဦးစံဦး ၅၃ နှစ်နဲ့ အမည်မသိရှိရသေးတဲ့ ကားသမား ၂ ဦးတို့ဖြစ်ပြီး ဒဏ်ရာရရှိသူ ၃ ဦးကတော့ ကိုတေဇာဝင်း ၃၉ နှစ်၊ ကောင်းခန့်လှိုင် ၁၈ နှစ်၊ အောင်မျိုးဦး ၁၅ နှစ်တို့ဖြစ်ကြပါတယ်။

သေဆုံးသူတွေထဲက ပိုင်ချစ် ဆိုသူဟာ ဆေးကုသမှုခံယူနေချိန်အတွင်း သေဆုံးခဲ့ရတာဖြစ်ပြီး ဒဏ်ရာရသူ ၃ ဦးဟာလည်း ဒဏ်ရာပြင်းထန်ရာရရှိထားတာကြောင့် အရေးပေါ်ဆေးကုသနေရတယ်လို့လည်း အထက်ပါအမျိုးသားက ဆိုပါတယ်။

သေဆုံး၊ ဒဏ်ရာရရှိသူတွေဟာ တန့်ဆည်၊ မုံရွာ၊ ပင်လည်ဘူး၊ ကန့်ဘလူစတဲ့မြို့နယ်တွေက ဒေသခံတွေဖြစ်ကြတယ်လို့ သိရပါတယ်။

ပြီးခဲ့တဲ့ စက်တင်ဘာ ၂၆ ရက်ကလည်း ကံထူးမကျေးရွာရှိ စက်သုံးဆီအရောင်းဆိုင် နဲ့ ဆေးဆိုင် ၁ ဆိုင်ကို စစ်ကော်မရှင်တပ်ကဗုံးကြဲတိုက်ခိုက်ခဲ့ရာ အမျိုးသား ၉ ဦး၊ အမျိုးသမီး ၂ ဦး စုစုပေါင်း ၁၁ ဦးသေဆုံးခဲ့ပါသေးတယ်။

စာတည်း – လင်း

မြေလတ်အသံ၊ နိုဝင်ဘာ၂၃၊ ၂၀၂၅။

စစ်ကိုင်းတိုင်း၊ မုံရွာမြို့နယ်က ကျေးရွာ ၂ ရွာကြားကို စစ်ကော်မရှင်တပ်က ဂျိုင်ရိုကော်ပတာ (Gyrocopter) နဲ့ဗုံးကြဲတိုက်ခိုက်ခဲ့တာကြောင့် ကလေးငယ် ၂ ဦးအပါအဝင် ၃ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

အနောက်မြောက်တိုင်းစစ်ဌာနချုပ် – နမခ ဘက်ကတက်လာတဲ့ ဂျိုင်ရိုကော်ပတာ ၃ စီးက ရတုံရွာနဲ့ ဘူးတောင်းကန်ရွာအကြားရှိ တဲဆောင် ၁ ခုကို နိုဝင်ဘာ ၂၂ ရက်မနက် ၁၀ နာရီကျော်မှာ ဗုံးကြဲတိုက်ခိုက်ခဲ့ရာမှာ သေဆုံးခဲ့ကြတာလို့ဆိုပါတယ်။

“ရတုံရွာနဲ့ ဘူးတောင်ကန်ရွာကြားက တောတဲ။ တောတဲဆိုတာ လယ်စောင့်တဲပုံစံပေါ့။ တောထဲက ယာခင်းစောင့်တဲဆိုတော့ စိုက်ပျိုးရေးလုပ်ပြီး ခဏနားချိန်ပါကြဲခံရတာ။ ဒဏ်ရာရသူမရှိ။ ပျက်စီးမှုကတော့ တဲ ၁ လုံး။ ဂျိုင်ရိုကော်ပတာ ၃ စီနဲ့ကြဲတယ်။ မကြဲခင် နမခက ၁၂၀ ၃ လုံးပစ်တယ်”လို့ မုံရွာဒေသခံ အမျိုးသားတဦးက ပြောပါတယ်။

ဗုံးစထိမှန်တာကြောင့် သေဆုံးခဲ့သူတွေဟာ ဘူးတောင်းကန်ရွာခံတွေဖြစ်တဲ့ ၈ နှစ်အရွယ် မအိရွှေရည်ဖြိုး၊ ၅ နှစ်အရွယ် မောင်ဟိန်းထက်နဲ့ ၃၀ နှစ်အရွယ် ကိုအောင်စိုးထွေးတို့ဖြစ်ပြီး ၎င်းတို့ ၃ ဦးဟာ တူဝရီးတော်စပ်ကြတယ်လို့ ဆိုပါတယ်။

အဆိုပါမိသားစု ၃ ဦးဟာ ဘူးတောင်းကန်ကျေးရွာကို စစ်ကော်မရှင်တပ်ကမီးရှို့ဖျက်ဆီးခဲ့တဲ့ ၂၀၂၄ ဖေဖော်ဝါရီကစလို့ ကျေးရွာကတိမ်းရှောင်ကာ ကျေးရွာ၂ ရွာကြားရှိတောထဲမှာ စိုက်ပျိုးရေး လုပ်ကိုင်ရင်း နေထိုင်ကြတာလို့လည်း အထက်ပါအမျိုးသားပြောပါတယ်။

သေဆုံးသူတွေရဲ့ရုပ်အလောင်းတွေကို ဘူးတောင်းကန်ကျေးရွာသားတွေက နိုဝင်ဘာ ၂၂ ရက်နေ့လယ် ၃ နာရီကျော်မှာ မီးသင်္ဂြိုဟ်ပေးခဲ့ကြတယ်လို့ သိရပါတယ်။

ပြီးခဲ့တဲ့အောက်တိုဘာလ ၆ ရက်ည (သီတင်းကျွတ်လပြည့်ည) ကလည်း မုံရွာမြို့နယ်နဲ့ ချောင်းဦးမြို့နယ်အစပ်ရှိ ဗုံတိုရွာမှာ ဆီမီးသပိတ်ပြုလုပ်နေချိန် စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ဒေသခံ ၂၀ ဦးကျော်သေဆုံးခဲ့ပြီး ၄၀ ကျော်ထိခိုက် ဒဏ်ရာရရှိခဲ့တယ်လို့ သိရသည်။

စာတည်း – လင်း

အောင်စိုး၊ ဟယ်သာ

မြေလတ်အသံ၊ နိုဝင်ဘာ ၂၀၊ ၂၀၂၅။

မကွေးတိုင်း၊ မြိုင်မြို့နယ်အနောက်ပိုင်းရှိ ​ကံကြီးကျေးရွာကို စစ်ကော်မရှင်တပ်က တိုက်လေယာဥ်နဲ့ ဗုံးကြဲတိုက်ခိုက်တာကြောင့် ကလေး ၃ ဦးအပါ ၅ ဦး သေဆုံးခဲ့တယ်လို့ ဒေသခံတွေကပြောပါတယ်။

နိုဝင်ဘာ ၁၉ ရက် ည ၁၂ နာရီကျော်မှာ တိုက်ခိုက်ရေးလေယာဥ်တစီးနဲ့ ကံကြီးကျေးရွာအလယ်ရှိ နေအိမ်တွေပေါ်ကို ဗုံးကြဲချတိုက်ခိုက်ခဲ့တာလို့ ဆိုပါတယ်။

” ရွာအလယ်က အိမ်တွေပေါ်မှာတည့်တည့်ကျတာဗျ၊ အသံကြီးကလည်း အဝေးကြီးတောင်မှဟိန်းဟောက်သွားတာဆိုတော့ တော်တော်ကို တုန်လှုပ်ခြောက်ခြားစရာပါ အသံကြောင့်လည်း အများကြီးပျက်သွားတာပါ ပျက်စီးမှုကတော့တော်တော်ကြီးကြီးမားမားကြီးရှိပါတယ်” လို့ အညာမြေအရပ်ဖက်လူမှုကူညီရေးအဖွဲ့မှ တာဝန်ရှိသူတဦးက ပြောပါတယ်။

ဗုံးပေါက်ကွဲမှုကြောင့် နေအိမ်တွင်းရှိနေတဲ့ အသက် ၁၀ နှစ်ဝန်းကျင်ကလေး ၃ ဦးနဲ့ အသက် ၃၀ ကျော် အမျိုးသား ၂ ဦး သေဆုံးခဲ့ပြီး နောက်ထပ် လူ ၂၀ နီးပါး ထိခိုက်ဒဏ်ရာရှိခဲ့ကာ လူနေအိမ် ၁၅ လုံးထိခိုက်ပျက်စီးခဲ့တယ်လို့ သိရပါတယ်။

“ နေအိမ်ကတော့သေချာပေါက် ၁၅ လုံးကတော့ တော်တော်ကို ဆိုးဆိုးရွားရွားပျက်သွားတာ ကျန်တဲ့ လေး၊ ငါးလုံးကတော့သွပ်လန်တာ၊ သွပ်ပေါက်တာ၊ အကာပေါက်တာ၊ အကာပျက်တာ ၁၅ လုံးကတော့ ညက်ညက်ကြေအောင်ပျက်သွားတဲ့သဘော” လို့ သူက ပြောပါတယ်။

နိုဝင်ဘာ ၁၇ ရက်ကလည်း မြိုင်မြို့နယ်၊ သင်းမကျေးရွာနဲ့စာသင်ကျောင်း ကို စက်တပ်လေထီး ၂ စီးနဲ့ ဗုံးကြဲတိုက်ခိုက်ခဲ့လို့ အသက် ၇၀ ကျော်အဘွားတဦး ဒဏ်ရာရရှိခဲ့တယ်လို့သိရပါတယ်။

မြေလတ်အသံ၊ နိုဝင်ဘာ ၁၉၊ ၂၀၂၅။

မကွေးတိုင်း၊ ဂန့်ဂေါမြို့နယ်၊ တောင်ခင်ရန်းကျေးရွာကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့လို့ အမျိုးသား ၁ ဦးသေဆုံးပြီး ၇ ဦးဒဏ်ရာရရှိခဲ့တယ်လို့ ဒေသခံတွေကပြောပါတယ်။

အိမ်ခြေ ၅၀၀ ခန့်ရှိတဲ့ တောင်ခင်ရန်းရွာထဲကို နိုဝင်ဘာ ၁၈ ရက် ည ၉ နာရီကျော်မှာ တိုက်လေယာဥ် ၁ စီးနဲ့ ဗုံး ၂ လုံး ကြဲချခဲ့တာဖြစ်ပြီး ကျေးရွာတွင်းနေအိမ်တွေကို ကျရောက်ပေါက်ကွဲခဲ့တယ်လို့ ဆိုပါ တယ်။

” ဒဏ်ရာရ၊ သေဆုံးသူတွေက မိသားစုဝင်တွေ။ မိသားစုက ၂ စုထက်မနည်းဘူး၊ ထိခိုက်တာ” လို့ မြေပြင်အခြေအနေကိုသိရှိသူ ဒေသခံအမျိုးသားတဦးက ပြောပါတယ်။

နေအိမ်တွေပေါ်ဗုံးကျရောက်ပေါက်ကွဲတာကြောင့် တောင်ခင်ရန်းရွာခံ အသက် ၃၀ နှစ်ခန့်ရှိ ဦးနိုင်ထွန်း သေဆုံးခဲ့ပြီး ၎င်းရဲ့မိသားစုဝင်တချို့အပါအဝင် အမျိုးသား ၅ ဦးနဲ့ အမျိုးသမီး ၂ ဦး စုစုပေါင်း ၇ ဦး ဒဏ်ရာရှိခဲ့တဲ့အပြင် နေအိမ် ၂ လုံးထက်မနည်းပျက်စီးခဲ့တယ်လို့ သိရပါတယ်။

တောင်ခင်ရန်းကျေးရွာဟာ ပျူစောထီးနဲ့ စစ်ကော်မရှင်တပ်စခန်းအထိုင်ချတပ်စွဲထားတဲ့ မြောက်ခင်ရန်း ကျေးရွာနဲ့ ၁ မိုင်ကျော်ကွာဝေးပြီး လတ်တလောမှာ တိုက်ပွဲဖြစ်ပွားတာမရှိဘဲ အခုလိုဗုံးကြဲတိုက်ခိုက်ခဲ့တာလို့ အထက်ပါအမျိုးသားက ပြောပါတယ်။

နိုဝင်ဘာ ၁၇ ရက် မနက်ပိုင်းက ဂန့်ဂေါမြို့နယ်၊ စန်းမြို့ရွာအနီးကို တိုက်လေယာဥ် ၁ စီးနဲ့ ဗုံးသီး ၂ လုံးကြဲချတိုက်ခိုက်ခဲ့ပြီး အဲ့ဒီတိုက်ခိုက်မှုမှာ လူနဲ့နေအိမ်တွေထိခိုက်တာမရှိခဲ့ဘူးလို့ သိရပါတယ်။

စာတည်း – ဟိန်းစံ

မြေလတ်အသံ၊ နိုဝင်ဘာ ၁၉၊ ၂၀၂၅။

အမျိုးသားညီညွှတ်ရေးအစိုးရ(NUG)လက်အောက် ပြည်သူ့ကာကွယ်ရေးတပ်တွေထိန်းချုပ်ထားတဲ့ စစ်ကိုင်းတိုင်း၊ ဗန်းမောက်မြို့နဲ့ ကနီမြို့နယ်ကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၃ ဦး သေဆုံးခဲ့တယ်လို့ ဒေသခံတွေက ပြောပါတယ်။

ယမန်နေ့နိုဝင်ဘာ ၁၈ ရက်ညနေ ၄ နာရီကျော်မှာ ဗန်းမောက်မြို့နယ်တောင်ပိုင်းရှိတိုက်နယ်ဆေးရုံနဲ့ အချုပ်ခန်းနေရာတွေကို စစ်ကော်မရှင်တပ်ကတိုက်လေယာဥ်နဲ့ ဗုံးသီး ၁ လုံးစီ ကြဲချခဲ့တာကြောင့် ကျန်းမာရေးဝန်ထမ်းအမျိုးသမီး ၁ ဦးနဲ့ အမျိုးသား ၁ ဦးတို့ သေဆုံးခဲ့တာလို့ဆိုပါတယ်။

” ဆေးရုံကိုအရင်ချတာ။ ပြီးမှအချုပ်ခန်းချတာ။ ဆေးရုံက ၂ယောက်သေတယ်လို့ပဲသိရတယ်။ ကျန်တဲ့ အသေးစိတ်တွေကိုတော့မသိရဗျ။ ထိခိုက်မှုတွေများနိုင်တယ်ဗျ။ ဒီနေရာတွေက လူများတဲ့နေရာတွေလေ”လို့ ဗန်းမောက်ဒေသခံတော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

ဗုံးကြဲခံရတဲ့ ဆေးရုံဟာ အမျိုးသားညီညွတ်ရေးအစိုးရ – NUG ရဲ့ထိန်းချုပ်မှုအောက်မှာလည်ပတ်နေတဲ့ တိုက်နယ်ဆေးရုံဖြစ်ပြီး ဖြစ်စဥ်နဲ့ပတ်သက်လို့ ဗန်းမောက်မြို့နယ် ပကဖ၊ ပအဖ၊ ပလဖ အဖွဲ့အစည်းတွေက သတင်းထုတ်ပြန်တာမရှိသေးပါဘူး။

အလားတူ နိုဝင်ဘာ ၁၈ ရက် ညနေ ၃နာရီကျော်မှာ ကနီမြို့နယ်၊ မင်းအိုကျေးရွာအနီး ယာခင်းတွေထဲကို စစ်တပ်တိုက်လေယာဥ် ၂ စီးက ဗုံး ၂ လုံးကြဲချခဲ့တာကြောင့် ယာခင်းထဲမှာရှိနေတဲ့ အမျိုးသမီး ၁ ဦးသေဆုံးပြီး ၂ ဦး ဒဏ်ရာရရှိခဲ့တယ်လို့ သိရပါတယ်။

” ကြဲတဲ့နေရာက PDF စခန်းဟောင်းနေရာလို့ပြောတယ်။ အရင်ကစခန်းချခဲ့တာပေါ့။ အခု မနေတော့ဘူး။ အဲ့နားမှာနှမ်းရိတ်နေကြတဲ့ သားအမိနှစ်ယောက်ထိတယ်။ သမီးဖြစ်သူ သေတယ်။ နောက်ထပ်ထိတဲ့ ယောကျာ်းတယောက်ကတော့ ဘယ်သူလည်းဆိုတာမသိရဘူး” လို့ ကနီဒေသခံအမျိုးသားတဦးက ပြောပါတယ်။

ဗုံးကြဲခံရတာကြောင့် အသက် ၃၀ ဝန်းကျင်ရှိ အမျိုးသမီး ၁ ဦး သေဆုံးခဲ့ပြီး ၎င်းရဲ့မိခင် အသက် ၆၁ နှစ်ရှိ အမျိုးသမီး ၁ ဦးနဲ့ အသက် ၂၃ ဝန်းကျင်ရှိ အမျိုး သား ၁ ဦး ဒဏ်ရာရရှိခဲ့တယ်လို့ ဆိုပါတယ်။

ပြီးခဲ့တဲ့နိုဝင်ဘာ ၁၁ ရက်ကလည်း ကနီမြို့နယ်၊ ဝင်းမနားကျေးရွာရှိ တိုက်နယ်ဆေးရုံကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ဆေးကုသမှုခံယူနေကြတဲ့ ​ပြည်သူ ၈ ဦးသေဆုံးပြီး ၅၀ ကျော် ဒဏ်ရာရရှိခဲ့တယ်လို့သိရပါတယ်။

စာတည်း – ဟိန်းစံ

မြေလတ်အသံ၊ နိုဝင်ဘာ ၁၈၊ ၂၀၂၅။

မကွေးတိုင်း၊ နတ်မောက်မြို့နယ်က ရွာတရွာကို စစ်ကော်မရှင်တပ်က နိုဝင်ဘာ ၁၇ ရက်မနက် ၈ နာရီကျော်မှာ လေယာဥ်နဲ့ ဗုံးကြဲတိုက်ခိုက်ခဲ့တာကြောင့် ဒေသခံ ၃ ဦးသေဆုံးခဲ့တယ်လို့ ဒေသခံတော်လှန်ရေးတပ်ဖွဲ့တခုဆီက သိရပါတယ်။

နတ်မောက်မြို့နယ်၊ အနောက်ဘက်ခြမ်းရှိ ကြက်သောက်တွင်းကျေးရွာကို တိုက်ပွဲဖြစ်တာမရှိဘဲ တိုက်ခိုက်ရေးလေယာဥ် ၁ စီးနဲ့ ဗုံးသီး ၂ လုံးကြဲချခဲ့တာလို့ဆိုပါတယ်။

“ဗုံးကရွာထဲကိုကျတာ။ နေအိမ်တွေပျက်စီးသွားတယ်။ ၃ယောက်က ပွဲချင်းပြီးကိုသေတာ၊ ၁၀ ယောက်လောက်ကတော့ ဒဏ်ရာရတယ်။ အဲ့ရွာအနီးနားတွေမှာ ဘာတိုက်ပွဲမှကိုမရှိတာ။ သပ်သပ်ကိုလာကြဲတာနေမှာ” လို့ နတ်မောက်ဒေသခံတော်လှန်ရေးတပ်ဖွဲ့ဝင်တဦးကပြောပါတယ်။

သေဆုံးသူ ၃ ဦးဟာ ကြက်သောက်တွင်းရွာမှ ကိုစိုးတင့် ၅၇ နှစ်၊ မမျိုးသီတာ ၃၇ နှစ်၊ ကိုဌေးလှိုင် ၃၂ နှစ်တို့ဖြစ်ပြီး ဒဏ်ရာရရှိသူ ၁၀ ဦးထဲက ဒဏ်ရာပြင်းထန်စွာရရှိခဲ့သူ ၃ ဦးကတော့ ကိုမြင့်ကို ၃၃ နှစ်၊ ကိုတက်တိုး ၄၈ နှစ်၊ မသီတာအေး ၂၂ နှစ်တို့ဖြစ်ပါတယ်။

သေဆုံးသူတွေရဲ့ရုပ်အလောင်းတွေကိုတော့ နိုဝင်ဘာ ၁၇ ရက်နေ့လယ် ၃ နာရီကျော်မှာ မြေမြုပ်သင်္ဂြိုဟ်ခဲ့ပြီး ဒဏ်ရာရရှိသူတွေကို နီးစပ်ရာဆေးခန်းတွေမှာ ဆေးကုသမှုခံယူနိုင်ဖို့ ပို့ဆောင်ခဲ့ကြတယ်လို့ အထက်ပါတပ်ဖွဲ့ဝင်ကပြောပါတယ်။

ပြီးခဲ့တဲ့အောက်တိုဘာ ၁၃ ရက်ကလည်း နတ်မောက်မြို့နယ်၊ အရှေ့ခြမ်းရှိ စမ်းကုန်းကျေးရွာအနီး ပတ်ဝန်းကျင်ကို စစ်ကော်မရှင်တပ်က ဗုံးကြဲတိုက်ခိုက်ခဲ့ပါသေးတယ်။

စာတည်း – လင်း