အောင်စိုး

မြေလတ်အသံ၊ ဇန်နဝါရီ ၃၀၊ ၂၀၂၆။

စစ်ကိုင်းတိုင်း၊ မော်လူးမြို့နယ်၊ လေဘိုကျေးရွာကို စစ်ကော်မရှင်တပ်က ဇန်နဝါရီ ၂၉ ရက်ည ၉ နာရီမှာ ဗုံးကြဲတိုက်ခိုက်ခဲ့တာကြောင့် မိသားစုဝင် ၇ ဦးအပါအဝင် ၈ ဦးသေဆုံးခဲ့တယ်လို့ ဒေသခံတွေက ပြောပါတယ်။

လေဘိုရွာထဲကို တိုက်ခိုက်ရေးလေယာဉ် ၁ စီးနဲ့ ပေါင် ၅၀၀ ဗုံးသီး ၂ လုံးကြဲချခဲ့တာကြောင့် လူနေအိမ် ၁ လုံးပေါ်ကို ကျရောက်ပေါက်ကွဲခဲ့တာလို့ ဆိုပါတယ်။

“ဒဏ်ရာရတာ မရှိဘူး။ မိသားစု ၇ ဦးသေတဲ့ အိမ်ကို ပေါင် ၅၀၀ ဗုံး ၂ လုံးကျတာကို။ သေတာကလည်း ဆိုးဆိုးဝါးဝါးကို သေကြတာ။ နောက် ၁ ယောက်သေတာက ဘေးအိမ်ကပါ။”လို့ မော်လူးဒေသခံ အမျိုးသားတဦးက ပြောပါတယ်။

သေဆုံးသူ ၈ ဦးမှာ အမျိုးသမီး ၄ ဦးနဲ့ အမျိုးသား ၄ ဦးဖြစ်ပြီး အဲ့ဒီထဲက ၁၃ နှစ်အရွယ် မိန်းကလေးငယ် ၁ ဦးနဲ့ ၆ နှစ်အရွယ် ယောကျ်ားကလေး ၁ ဦးပါဝင်တယ်လို့ သူက ဆိုပါတယ်။

လေဘိုကျေးရွာဟာ အိမ်ခြေ ၁၀၀ ကျော်ရှိပြီး အခုလိုလေကြောင်းကနေ ဗုံးကြဲတိုက်ခိုက်ခံရတာဟာ ပထမဆုံးအကြိမ်ဖြစ်တယ်လို့လည်း အထက်ပါအမျိုးသားက ပြောပါတယ်။

ပြီးခဲ့တဲ့ ဇန်နဝါရီ ၂၁ ရက်ကလည်း မော်လူးမြို့နယ်၊ မာန်ဟဲကျေးရွာရှိ မြို့နယ်ပြည်သူ့ကာကွယ်ရေးအဖွဲ့ ပကဖရုံးကို လေယာဉ် ၁ စီးနဲ့ ဗုံးကြဲတိုက်ခိုက်ခဲ့တာကြောင့် ပကဖအဖွဲ့ဝင် ၅ ဦး သေဆုံးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ ဇန်နဝါရီ ၂၂၊ ၂၀၂၆။

စစ်ကိုင်းတိုင်း၊ အင်းတော်မြို့နယ်၊ မော်လူးမြို့ရှိ မြို့နယ်ပြည်သူ့ကာကွယ်ရေးအဖွဲ့(ပကဖ)ရုံး လေကြောင်းကနေဗုံးကြဲခံရလို့ ပကဖအဖွဲ့ဝင် ၄ ဦးအပါ လူ ၇ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ဇန်နဝါရီ ၂၁ ရက် မနေ့ည ၁၁ နာရီကျော်မှာ မော်လူးမြို့၊ မာန်ဟဲရွာထိပ်မှာရှိတဲ့ ပကဖရုံးကို တိုက်လေယာဥ်နဲ့ ဗုံး ၂ လုံးကြဲချတိုက် ခိုက်ခဲ့တာလို့ ဆိုပါတယ်။

“ဗုံးကြဲခံရတာက ပေါင် ၂၅၀၊ ၃၀၀ (ဗုံး) လောက်တော့ရှိမယ် ၂ လုံးကြဲတာ။ ပကဖ သူတို့ရုံးပေါ့လေ။ ရုံးဘေးမှာရှိတဲ့ နေအိမ် ၂လုံးပျက်စီးတယ်။”လို့ မြေပြင်အခြေအနေသိရှိသူ ဒေသခံအမျိုးသားတဦးက ပြောပါတယ်။

ဗုံးကြဲခံရတာကြောင့် ပကဖရုံးအတွင်းမှာရှိနေတဲ့ ပကဖအဖွဲ့ဝင် ၄ ဦး၊ နောက်ထပ်တော်လှန်ရေးတပ်ဖွဲ့ဝင် ၁ ဦး ရုံးအနီးနေအိမ်မှာနေထိုင်တဲ့ ရွာခံအမျိုးသား ၂ ဦး စုစုပေါင်း ၇ ဦး သေဆုံးပြီး ရွာခံအမျိုးသား၊ အမျိုးသမီး ၁၀ ဦးခန့် ထိခိုက်ဒဏ်ရာရရှိခဲ့တယ်လို့ ဆိုပါတယ်။

သေဆုံးသူတွေရဲ့ရုပ်အလောင်းတွေကို ဇန်နဝါရီ ၂၂ ရက် ဒီကနေ့မနက်ပိုင်းမှာ ဈာပနအခမ်းအနားပြုလုပ်ကာ မီးသင်္ဂြိုဟ်​ပြီးဖြစ်ကြောင်းသိရှိရပြီး သေဆုံးသူတွေရဲ့ အသေးစိတ်အချက်အလက်တွေကိုတော့ မသိရသေးပါဘူး။

မော်လူးမြို့ကို PDFအပါအဝင် တော်လှန်ရေးပူးပေါင်းတပ်တွေက ၂၀၂၃ ဒီဇင်ဘာ ၁၃ရက်မှာ သိမ်းပိုက်ရရှိခဲ့ပြီးတဲ့နောက် လက်ရှိကာလအထိ အမျိုးသားညီညွတ်ရေးအစိုးရလက်အောက်တပ်ဖွဲ့တွေက ထိန်းချုပ်ထားတာလည်း ဖြစ်ပါတယ်။

ပြီးခဲ့တဲ့ဇန်နဝါရီ ၂ ရက်ကလည်း မော်လူးမြို့နယ်၊ ပဲခူးကျေးရွာရှိ အမျိုးသားညီညွတ်ရေးအစိုးရ-NUG ဖွင့်လှစ်ထားတဲ့ စာသင်ကျောင်းကို စစ်တပ်က ဗုံးကြဲတိုက်ခိုက်ခဲ့တာကြောင့် G-12 ကျောင်းသူ ၁ ဦးသေဆုံးခဲ့တာလည်း ဖြစ်ပါတယ်။

အောင်စိုး၊ ကျော်ကြီး

မြေလတ်အသံ၊ ဇန်နဝါရီ ၂၀၊ ၂၀၂၆။

စစ်ကိုင်းတိုင်း၊ ဒီပဲယင်းမြို့နယ်နဲ့ မကွေးတိုင်း၊ ဆိပ်ဖြူမြို့နယ်က ကျေးရွာတွေကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးပြီး ထိခိုက်ဒဏ်ရာရသူတွေရှိခဲ့တယ်လို့ ဒေသခံတွေဆီက သိရပါတယ်။

ဒီပဲယင်းမြို့နယ်က အိမ်ခြေ ၅၀၀ ကျော်ရှိပျံကျကျေးရွာကို ဇန်နဝါရီ ၁၉ ရက်ည ၁၀ နာရီကျော်မှာ တိုက်ခိုက်ရေးလေယာဥ်နဲ့ ဗုံသီး ၂ လုံးကြဲတိုက်ခိုက်ခဲ့ရာ ကွက်သစ်ရပ်ကွက်ထဲကိုကျရောက်ကာ အသက် ၆၀ အရွယ်အမျိုးသမီး ၁ ဦးသေဆုံးပြီး အသက် ၃၀ အရွယ်အမျိုးသား ၁ ဦး ဒဏ်ရာရခဲ့တယ်လို့ ဆိုပါတယ်။

“ဒီရွာ(ပျံကျရွာ)က ဖိုင်တာနဲ့ကြဲတာ ဒါပထမဆုံးပဲ။ အရင်တုန်းက မီးရှို့ခံရတာရှိခဲ့တယ်။ သေဆုံးတဲ့ အဘွားက ဗုံးခိုကျင်းထဲမသွားဘဲ အိမ်ပေါ်မှာကျန်ခဲ့တာတဲ့။ အိမ်ပေါ် ဗုံးကျတော့ ပွဲချင်းပြီး သေသွားတာလေ။ ဒဏ်ရာရတဲ့ ၁ ယောက်ကတော့ စစ်ဘေးရှောင်လို့ ပြောတယ်”လို့ ဒီပဲယင်းဒေသခံ အမျိုးသားတဦးက ပြောပါတယ်။

ပျံကျကျေးရွာအနီးဝန်းကျင်မှာ စစ်ကြောင်းထိုးတိုက်ပွဲဖြစ်နေတာမရှိသလို PDF တပ်ဖွဲ့တွေ စခန်းချနေထိုင်တာတွေလည်းမရှိဘဲ ဗုံးကြဲတိုက်ခိုက်ခဲ့တာဖြစ်ပြီး တိုက်ခိုက်မှုအတွင်း လူနေအိမ် ၂ လုံးလည်း လုံးဝပျက်စီးခဲ့တယ်လို့ သူကဆိုပါတယ်။

ပျံကျကျေးရွာကို ပြီးခဲ့တဲ့၂၀၂၂ ဒီဇင်ဘာလအတွင်းမှာလည်း အင်အား ၁၀၀ ကျော်ပါတဲ့ စစ်ကော်မရှင်တပ်သားတွေက ၃ ကြိမ်တိုင် ဝင်ရောက်မီးရှို့ခဲ့ရာ လူနေအိမ် ၃၀၀ ကျော် မီးလောင်ပြာကျခဲ့တယ်လို့ အထက်ပါအမျိုးသားက ပြောပါတယ်။

အလားတူ မကွေးတိုင်း၊ ဆိပ်ဖြူမြို့နယ်ထဲက ဆင်နီတောင်ကျေးရွာမှာ စက်တပ်လေထီးနဲ့ဗုံးကြဲခံရပြီး အမျိုးသမီး ၁ ဦးလက်ပြတ်သွားတယ်လို့ ဆိပ်ဖြုမြို့နယ်အခြေစိုက် ဒေသကာကွယ်ရေးအဖွဲ့တာဝန်ရှိသူ တဦးဆီက သိရပါတယ်။

ဇန်နဝါရီ ၁၉ ရက်ညနေ ၄ နာရီကျော်မှာ ကပစ ၂၂ ဘက်ကနေတက်လာတဲ့ စက်တပ်လေထီး ၁ စီးဟာ ကျေးရွာထဲကို ဗုံးသီး ၂ လုံးကြဲချပြီး စက်လတ်နဲ့လည်း ပစ်ခတ်သွားတယ်လို့ ဆိုပါတယ်။

“ကပစထဲ စက်တပ်လေထီးရောက်တာက တပတ်လောက်ရှိနေပြီ။ ထိတဲ့သူက အိမ်ထဲရှိနေချိန်ထိတာ။ အိမ်ပေါ်ကျတာ။ ကျန်မိသားစုဝင်တွေတော့ နေအိမ်မှာမရှိဘူး။ သူတယောက်တည်းရှိနေချိန်ထိတာ”လို့ ဆိပ်ဖြူမြို့နယ်အခြေစိုက် ဒေသကာကွယ်ရေးအဖွဲ့တာဝန်ရှိသူတဦးက ပြောပါတယ်။

ဗုံးထိမှန်တာကြောင့် အသက် ၄၀ ကျော်အရွယ် အမျိုးသမီးမှာ လက်မောင်းပြတ်ဒဏ်ရာနဲ့ စိုးရိမ်ရအခြေနေကြောင့် ဆေးကုနေရကာ နေအိမ် ၁ လုံးပျက်စီးခဲ့တယ်လို့ ဆိုပါတယ်။

ဆင်နီတောင်ရွာမှာ အိမ်ခြေ ၂၀၀ ကျော်ရှိပြီး ကြဲချတဲ့ဗုံးတွေထဲက ၁ လုံးက မပေါက်ကွဲသေးတာကြောင့် ရွာထဲရှိဒေသခံ ၇၀၀ ခန့်လည်း ဘေးလွတ်ရာကိုတိမ်းရှောင်နေကြတယ်ို့ အထက်ပါတာဝန်ရှိသူက ပြောပါတယ်။

ပြီးခဲ့တဲ့နှစ် ဩဂုတ် ၁၉ ရက်ကလည်း ဆိပ်ဖြူမြို့နယ်၊ ဝန်ကြီး၊ ရှားလှ၊ ကျွန်းတောရွာတွေကို Y 12 နဲ့ဗုံးကြဲခဲ့လို့ ပြည်သူ ၁၀ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ ဇန်နဝါရီ ၁၉၊ ၂၀၂၆။

စစ်ကိုင်းတိုင်း၊ ဒီပဲယင်းမြို့နယ်၊ စိုင်းပြင်ကျေးရွာကို စစ်ကော်မရှင်တပ်က ဇန်နဝါရီ ၁၉ ရက်မနက် ၁၁ နာရီကျော်မှာ လေကြောင်းကနေ ဗုံးကြဲတိုက်ခိုက်ခဲ့ရာ အမျိုးသား ၁ ဦး သေဆုံးခဲ့တယ်လို့ ဒေသခံတွေကပြောပါတယ်။

စိုင်ပြင်ကျေးရွာတောက်ဘက်အထွက်ရှိ မူးသစ်ရေလွှတ်ဆည်မြောင်းအနီးကို တိုက်ခိုက်ရေးလေယာဥ် ၁ စီးနဲ့ ဗုံးကြဲတိုက်ခိုက်ခဲ့ရာ အသက် ၄၀ နှစ်အရွယ်အမျိုးသား ၁ ဦး သေဆုံးပြီး ၃၀ နှစ်အရွယ်အမျိုးသား ၁ ဦး ဒဏ်ရာရရှိခဲ့တာလို့ ဆိုပါတယ်။

“စိုင်းပြင် မြို့တောင်ဘက်အထွက် မူးသစ်ရဲ့တောင်ဘက်ပါ။ ပစ်သွားတာကတော့ ရော့ကတ်နဲ့ စက်လတ်လို့ ခန့်မှန်းရပါတယ်။ ပစ်ခတ်အပြီး နေအိမ်တချို့မီးလောင်တယ်။ ၁ ယောက် ပွဲချင်းပြီးသေတယ်။ နောက် ၁ ယောက်က်ကတော့ ဒဏ်ရာရတာ မစိုးရိမ်ရ။” လို့ ဒီပဲယင်းဒေသခံ အမျိုးသားတဦးက ပြောပါတယ်။

တိုက်ပွဲဖြစ်တာမရှိဘဲ စိုင်းပြင်ကျေးရွာကို အခုလိုလေကြောင်းကနေ ဗုံးကြဲခဲ့တာကြောင့် လူနေအိမ် ၃ လုံးလည်း မီးလောင်ပျက်စီးခဲ့တယ်လို့ သူကဆိုပါတယ်။

ပြီးခဲ့တဲ့ ဇန်နဝါရီ ၁ ရက်ကလည်း ဒီပဲယင်းမြို့နယ်၊ မူးကမ်းကြီးကျေးရွာရှိ စစ်ဘေးရှောင်တွေ ခိုလှုံနေကြတဲ့ စာသင်ကျောင်းဆောင်ကို စစ်ကော်မရှင်တပ်ကလေကြောင်းကနေ ဗုံးကြဲခဲ့တာကြောင့် စစ်ရှောင်အမျိုးသား ၁ ဦးဒဏ်ရာရရှိခဲ့တယ်လို့ သိရပါတယ်။

လက်ရှိအချိန်မှာ ဒီပဲယင်းမြို့နယ်ကို စစ်ကော်မရှင်တပ်က လေကြောင်းကနေ မကြာခဏ ဗုံးကြဲတိုက်ခိုက်နေတာကြောင့် ဒေသအတွင်းရှိပြည်သူတွေအနေနဲ့ လေကြောင်းသတိအမြဲရှိပြီး လေကြောင်းသတင်းကြားရင် ဘေးလွတ်ရာနေရာတွေမှာ အထူးဂရုစိုက်နေထိုင်ကြဖို့ ဒီပဲယင်းမြို့နယ်ရှိတော်လှန်ရေးတပ်ဖွဲ့တွေက တိုက်တွန်းထားပါတယ်။

စာတည်း – လင်း

မြေလတ်အသံ၊ ဇန်နဝါရီ ၁၇၊ ၂၀၂၆။

စစ်ကိုင်းတိုင်း၊ အရာတော်နဲ့ ပေါက်မြို့နယ်က ကလေးငယ်တွေစာသင်ကြားတဲ့နေရာနဲ့ ဆေးပေးခန်းတို့ကို စစ်ကော်မရှင်တပ်က ဇန်နဝါရီ ၁၇ ရက်နေ့လယ် ၁ နာရီကျော်မှာ ဗုံးကြဲတိုက်ခိုက်ခဲ့တာကြောင့် ၂ ဦးသေဆုံးခဲ့တယ်လို့ Northwest Plains Revolutionary Force – NPRF ဆီက သိရပါတယ်။

တိုက်ခိုက်ရေးလေယာဥ် ၁ စီးအပါအဝင် အသေခံဒရုန်း ၃ စီးတို့နဲ့ ကန်ရင်းကျေးရွာရှိ KG ကလေးငယ် တွေစာသင်နေတဲ့ အဆောက်အဦးနဲ့ အနီးရှိနေအိမ်တွေကို ဗုံးကြဲတိုက်ခိုက်ခဲ့တာလို့ဆိုပါတယ်။

“စာသင်ကျောင်းတော့ မဟုတ်ဘူးဗျ။ ကလေးတွေကိုစုပြီး မူကြိုသင်တာ။ အဲ့အဆောင်က ရွာလယ်မှာ ရှိတာ။ ဗုံးသီးက ပေါင် ၅၀၀ လို့ယူဆရတယ်။ တော်တော်ပြင်းထန်တာ။ စာသင်ဆောင်လည်း ပျက်စီးသွားတယ်။ အိမ်တွေရောပဲ”လို့ Northwest Plains Revolutionary Force-NPRFမှ တပ်ခွဲမှူး ကိုဝေလင်းက ပြောပါတယ်။

ဗုံးကြဲတိုက်ခိုက်ချိန်ဟာ ကလေးတွေကို မုန့်စားနားနေချိန်ဖြစ်တာကြောင့် စာသင်ဆောင်ထဲကို ရောက်ရှိနေတဲ့ ၉ နှစ်အရွယ်မိန်းကလေးငယ် ၁ ဦးနဲ့ နေအိမ်မှာရှိနေတဲ့ အမျိုးသား ၁ ဦးတို့သေဆုံးခဲ့ပြီး နောက်ထပ်အမျိုးသား၊ အမျိုးသမီး ၄ ဦး ဒဏ်ရာရရှိခဲ့တယ်လို့ ကိုဝေလင်းက ဆိုပါတယ်။

ကန်ရင်းကျေးရွာဟာ လူနေအိမ် ၁,၀၀၀ ခန့်ရှိကာ ရွာအနီးပတ်ဝန်းကျင်းမှာ စစ်ကြောင်းထိုးနေပြီး တိုက်ပွဲဖြစ်တာတွေမရှိဘဲ လေကြောင်းကနေဗုံးကြဲခဲ့တာကြောင့် ကား ၁ စီး၊ ဆိုင်ကယ် ၃ စီး၊ လူနေအိမ် ၃ လုံးတို့လည်း မီးလောင်ပြာကျပျက်စီးပြီး နွား ၁ ကောင်ပါသေဆုံးခဲ့တယ်လို့ သူကဆိုပါတယ်။

အလားတူ ပေါက်မြို့နယ်၊ တောင်ကံပိုင်ကျေးရွာထဲကိုလည်း ဒီနေ့လယ်ပိုင်းမှာ တိုက်ခိုက်ရေး လေယာဥ်နဲ့ဗုံး သီး ၂ လုံးကြဲချခဲ့တာကြောင့် ကျေးရွာဆေးပေးခန်းနဲ့ လူနေအိမ် ၅ လုံးတို့ ပျက်စီးခဲ့တယ်လို့ ပေါက်ဒေသခံ အမျိုးသားတဦးက ပြောပါတယ်။

“ဆေးခန်းက သားဖွားဆရာမလောက် ရှိတဲ့နေရာပါ။ ဆေးခန်းနဲ့ အိမ် ၅ လုံးပျက်စီးသွားတယ်။ လူတွေကတော့ ဗုံးခိုကျင်းတွေရှိကြလို့ အထိခိုက်မရှိခဲ့ကြတာ”လို့ ပေါက်ဒေသခံ အမျိုးသားတဦးက ပြောပါတယ်။

၂၀၂၁ စစ်အာဏာသိမ်းချိန်ကနေ ၂၀၂၆ ဇန်နဝါရီ ၁၆ ရက်အတွင်း စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့တဲ့ဒေသခံ ၇,၆၉၀ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

ကျော်ကြီး၊ အောင်စိုး

မြေလတ်အသံ၊ ဇန်နဝါရီ ၁၆၊ ၂၀၂၅။

စစ်ကိုင်းတိုင်း၊ ကနီနဲ့ ရေဦးမြို့နယ်တွေ လေကြောင်းကနေ ဗုံးကြဲတိုက်ခိုက်ခံရလို့ အသက် ၁၀ နှစ် ဝန်းကျင်ကလေး ၁ ဦး သေဆုံးပြီး သံဃာ ၂ ပါးဒဏ်ရာရခဲ့တယ်လို့ ဒေသခံတွေနဲ့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဇန်နဝါရီ ၁၅ ရက် ယမန်နေ့ညနေ ၃ နာရီကျော်မှာ ကနီမြို့နယ်၊ ရှမ်းမြောင်ရွာဘုန်းကြီးကျောင်းပေါ်ကို စက်တပ်လေထီး ၂ စီးနဲ့ ဗုံး ၅ လုံးချခဲ့ရာ အောင်စင်္ကြာစေတီကုန်းပေါ်ရှိ ဂန္ဓကုဋီတိုက်ဓမ္မာရုံနဲ့ အောင်မင်္ဂလာဘုန်းတော်ကြီးကျောင်းတိုက်တွေပေါ် ကျရောက်ပေါက်ကွဲခဲ့ပြီး သံဃာ ၂ ပါးဒဏ်ရာရတာလို့ ဆိုပါတယ်။

” သံဃာတွေက တောင်အောက်ကျောင်းပေါ်ရှိနေချိန် ထိကြတာ။ တောင်ပေါ်၊ တောင်အောက် ၂ ကျောင်းလုံးချခံရတာ။ ဘာတိုက်ပွဲမှမရှိဘဲ ဒီအတိုင်းလာချတာ။ စစ်ရှောင်တွေလည်း ကျောင်းမှာမရှိဘူး။” လို့ ကနီဒေသခံတဦးက မြေလတ်အသံကို ပြောပါတယ်။

ဗုံးချခံရလို့ သက်တော် ၄၀ ကျော်အရွယ်ရှိ သံဃာတော် ၂ ပါး ထိခိုက်ဒဏ်ရာရရှိခဲ့ပြီး တောင်ပေါ်ရှိဓမ္မာရုံနဲ့ တောင်အောက်ရှိ ဘုန်းတော်ကြီးကျောင်းဆောင်တွေပျက်စီးခဲ့ကာ ဗုံးချခံရပြီးနောက် ကျောင်းနေသံဃာနဲ့ ကိုရင်တွေဟာ ဘေးလွတ်ရာကိုပြောင်းရွှေ့နေထိုင်နေရတယ်လို့ သိရပါတယ်။

ဒါ့အပြင် ရေဦးမြို့နယ် လေးရွာ၊ အုန်းနပေါင်းရွာစာသင်ကျောင်းတွေနဲ့ ပင်စိမ်းခင်းကျေးရွာစာသင်ကျောင်းတွေကို ဇန်နဝါရီ ၁၀ ရက်၊ ၁၁ ရက်နဲ့ ၁၃ ရက်တွေမှာ လေယာဥ်နဲ့ဗုံးကြဲတိုက်ခိုက်ခံရတာကြောင့် အသက် ၁၀ နှစ်ကလေး ၁ ဦး သေဆုံးခဲ့တယ်လို့ ရေဦးပကဖအဖွဲ့ထံက သိရပါတယ်။

“လေးရွာနဲ့ အုန်းနပေါင်းမှာက လူမနေတဲ့ စာသင်ကျောင်းတွေကို ကြဲတာဖြစ်လို့ လူအထိခိုက်မရှိခဲ့။ ကျောင်းဆောင်တွေပဲ ပျက်စီးခဲ့တာ။ ပင်စိမ်းခင်းမှာတော့ လူနေအိမ်တွေကျတာ ကလေး ၁ ယောက်သေတယ်”လို့ ရေဦးမြို့နယ်ပကဖတာဝန်ခံက ပြောပါတယ်။

အိမ်ခြေ ၅၀ ခန့်သာရှိတဲ့ ပင်စိမ်းခင်းကျေးရွာကို တိုက်လေယာဥ် ၁ စီးနဲ့ ပေါင်း ၅၀၀ ဗုံးသီး၂ လုံးကြဲချခဲ့တာဖြစ်ပြီး ကျေးရွာနေအိမ်ပေါ်ကျရောက်ပေါက်ကွဲခဲ့လို့ အသက် ၁၃ နှစ် ယောက်ျားလေး ၁ ဦးသေဆုံးပြီး ၁၆ နှစ်အရွယ်ယောက်ျားလေး ၁ ဦးနဲ့ အသက် ၆၀ နှစ်အရွယ် အမျိုးသမီး ၂ ဦး ဒဏ်ရာရရှိခဲ့တယ်လို့ အထက်ပါပကဖတာဝန်ခံက ပြောပါတယ်။

မြေလတ်အသံ၊ ဇန်နဝါရီ ၁၃၊ ၂၀၂၆။

မကွေးတိုင်း၊ အမ်း-ပဒါန်းလမ်းနဲ့ မုံရွာ-ပုသိမ်လမ်းမကြီးတဝိုက်ရှိ စစ်ကော်မရှင်တပ်စခန်းတွေကနေ ထွက်ပြေးလာပြီးဖမ်းမိသူနဲ့ ဘက်ပြောင်းလာသူတွေအပါ စုစုပေါင်း ၂၉ ဦးရှိခဲ့တယ်လို့ ကျောင်းသားတပ်ဦး/တပ်တော် SF/SAF ဆီက သိရပါတယ်။

အဆိုပါ ၂၉ ဦးဟာ ၂၀၂၅ နိုဝင်ဘာနဲ့ ဒီဇင်ဘာ ၂ လအတွင်းမှာ ဖမ်းမိ၊ ဘက်ပြောင်းလာခဲ့သူတွေဖြစ်ပြီး မိတ္ထီလာမြို့အခြေစိုက် အမှတ် ၉၉ ခြေမြန်တပ်မဌာနချုပ်နဲ့ ပဒါန်းမြို့အခြေစိုက် အမှတ် ၉၀၅ အမြောက်စစ်ဆင်ရေးကွပ်ကဲမှုဌာနချုပ်တို့က ဖြစ်ကြတယ်လို့ ဆိုပါတယ်။

“ဖမ်းဆီးရမိတဲ့ စစ်သုံ့ပန်း ၁၆ ဦးကိုတော့ တပ်တော်ရဲ့ မူဝါဒတွေ၊ နိုင်ငံတကာ စစ်ဥပဒေတွေနဲ့အညီ ထိန်းသိမ်းထားပြီးတော့ အလင်းဝင် (ဘက်ပြောင်း)လာသူတွေကတော့ ရောက်လာပြီးချိန် လုံခြုံရေးအရ စစ်ဆေးသင့်တာစစ်ဆေးပြီး စိတ်ချရတဲ့အချိန်ကာလတည်းက တာဝန်ထမ်းဆောင်နေပါတယ်”လို့ ကျောင်းသားတပ်ဦး/တပ်တော် (SF/SAF)မှ အထွေထွေအတွင်းရေးမှူး-၂ ကိုနွေညိမ်းက ပြောပါတယ်။

အဲဒီ ၂၉ ဦးမှာ တပ်စခန်းတွေနဲ့တိုက်ပွဲအတွင်းကထွက်ပြေးလာချိန် ဖမ်းမိသူ ၁၆ ဦးနဲ့ နောက်ထပ် ၁၃ ဦးကတော့ ဘက်ပြောင်းလာသူတွေဖြစ်ပြီး သူတို့ဆီကနေ သေနတ် ၄ လက်၊ မိုင်း၊ လက်ပစ်ဗုံး၊ ကျည်တွေရရှိခဲ့တယ်လို့ ဆိုပါတယ်။

ဒါ့အပြင် စစ်ကော်မရှင်တပ်တွင်း တာဝန်ထမ်းဆောင်နေတဲ့သူတွေအနေနဲ့လည်း ပြည်သူ့ဘက်ကိုရပ်တည်ပြီး ဘက်ပြောင်းကြဖို့ သူကတိုက်တွန်းထားပါတယ်။

“ပြည်သူကို ကာကွယ်ရမယ့်အစား နေ့စဉ် ဗုံးကြဲသတ်ဖြတ်၊ မတရားအနိုင်ကျင့်နေတဲ့ စစ်ကော်မရှင်တပ်မှာ မတတ်သာလို့ အခုချိန်ထိ တာဝန်ထမ်းဆောင်နေသေးသူတွေအနေနဲ့လည်း ရရာနည်းနဲ့ ပြည်သူဘက်ကရပ်တည်ပြီး မှန်ကန်တဲ့လမ်းကိုရွေးချယ် ဘက်ပြောင်းခိုလှုံကြဖို့ တိုက်တွန်းချင်ပါတယ်”လို့ ကိုနွေညိမ်းက ဆိုပါတယ်။

အထက်ပါဘက်ပြောင်းလာသူ ၁၃ ဦးထဲမှာ တပ်ကြပ်ကြီး ၁ ဦးနဲ့ ဒုတပ်ကြပ် ၁ ဦးတို့ပါဝင်ပြီး ၎င်းတို့အကုန်လုံးဟာ လက်ရှိမှာ ကျောင်းသားတပ်ဦး/တပ်တော်(SF/SAF) တပ်ဖွဲ့ဝင်တွေအဖြစ် ဆက်လက်တာဝန်ထမ်းဆောင်နေကြတယ်လို့ သူကဆိုပါတယ်။

စာတည်း – လင်း