MLAT 
မတ္တရာ၊ ဩဂုတ်၂၈၊ ၂၀၂၅။
တော်လှန်ရေးပူးပေါင်းတပ်တွေ သိမ်းပိုက်ထားတဲ့ မန္တလေးတိုင်း၊ မတ္တရာမြို့နယ်အရှေ့ခြမ်းရှိ ဖယောင်းတောင်ရွှေလုပ်ကွက်ကို လက်လွှတ်လိုက်ရပြီးနောက် စစ်ကော်မရှင်တပ်တွေက အယ်ဖာဘိလပ်မြေစက်ရုံကို ဆက်လက်ထိုးစစ်ဆင်လာတာကြောင့် တိုက်ပွဲတွေဆက်ဖြစ်နေတယ်လို့ မြေပြင် တော်လှန်ရေးတပ်ဖွဲ့ဝင်တွေထံက သိရပါတယ်။
ဖယောင်းတောင်ရွှေလုပ်ကွက်တွေကို မန္တလေး လပခလက်အောက် စစ်ကော်မရှင်တပ်တွေနဲ့ ပျူစောထီးပူးပေါင်းတပ်တွေက ဩဂုတ်လနောက်ဆုံးပတ်မှာ ထိုးစစ်ဆင်လာတာဖြစ်ပြီး ဩဂုတ် ၂၄ ရက်မှာ သိမ်းပိုက်နိုင်ခဲ့တယ်လို့ စစ်ကော်မရှင်ကိုထောက်ခံရေးသားနေတဲ့ တယ်လီဂရမ်တွေမှာ ဖော်ပြခဲ့သလို မြေပြင်တပ်ဖွဲ့တွေကလည်း အတည်ပြုပါတယ်။
” အသေခံပြီး တိုးလာကြတာ။ဖယောင်းတောင်ကတော့ ဆုတ်ပေးလိုက်ရပြီ။အယ်ဖာ စက်ရုံပတ်ဝန်းကျင်မှာတော့ တိုက်ပွဲတွေ ဆက်ဖြစ်နေတုန်းပါ”လို့ မြေပြင်တော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။
ဒါ့အပြင် ဖယောင်းတောင်တိုက်ပွဲတွေအတွင်း စစ်ကော်မရှင်တပ်က လေကြောင်းပစ်ကူပေး တိုက်ခိုက်ခဲ့တာကြောင့် ဖယောင်းတောင်အနီးက ကျောက်တံတားကျေးရွာဝန်းကျင်မှာ ဗုံးတွေကျရောက် ပေါက်ကွဲခဲ့ပြီး အရပ်သားသေဆုံးမှုရှိခဲ့တယ်လို့ ဆိုပါတယ်။
စစ်ကော်မရှင်တယ်လီဂရမ်တွေရဲ့ဖော်ပြချက်အရ ဖယောင်းတောင်တိုက်ပွဲအတွင်း PDF တပ်ဖွဲ့ ရုပ်အလောင်း ၁၃ လောင်းနဲ့ သေနတ် ၈ လက်သိမ်းဆည်းရရှိတယ်လို့ ဆိုထားပါတယ်။
စစ်ကောင်စီတပ်က မန္တလေး-မတ္တရာကားလမ်းကို စိုးမိုးဖို့ကြိုးစားနေပြီး အခုတကြိမ်မှာ ပုသိမ်ကြီးမြို့နယ်အရှေ့ခြမ်းတောင်ကျောကနေ စစ်ကြောင်းတွေ ထိုးလာတာလို့ သိရပါတယ်။
“ကျောက်တံတားဘက်ကို ဖောက်ဝင်လာတာလည်း တွေ့ရတယ်။ ကြားထဲမှာ မြကန်သာကိုလည်း စကစ ပြန်မရသေးဘူး။ သူတို့က ကြားညှပ်ပြီး မြကန်သာကို ပြန်ယူမယ်လို့လည်း တွေးရတယ်။ဒီကားလမ်းကြောကိုရမှလည်း မန္တလေး၊ မတ္တရာမြို့မှာ ရွေးကောက်ပွဲလုပ်ဖို့ စစ်တပ်အတွက် စိတ်ချရမယ်”လို့ မန္တလေး-မတ္တရာလမ်းပိုင်းမှာနေထိုင်သူတဦးက ပြောပါတယ်။
ဖယောင်းတောင်သိမ်းပိုက်ခံလိုက်ရတာကြောင့် တော်လှန်ရေးတပ်တွေ ၁ နှစ်နီးပါးအကြာ ထိန်းချုပ်ထားတဲ့ ရွှေလုပ်ကွက်တွေကိုလည်း လက်လွှတ်လိုက်ရပြီး လက်ရှိမှာ တော်လှန်ရေးတပ်တွေရှိနေတဲ့ အယ်ဖာဘိလပ်မြေစက်ရုံဘက်ကို စစ်ကော်မရှင်တပ်က ထပ်မံထိုးစစ်ဆင်လာတာကြောင့် အဲဒီနယ်မြေအနီးဝန်းကျင်မှာ တိုက်ပွဲတွေဆက်ဖြစ်နေတယ်လို့လည်း သိရပါတယ်။
မတ္တရာမြို့နယ်အတွင်းက တိုက်ပွဲအခြေအနေတွေနဲ့ ပတ်သက်ပြီး ပြည်သူ့ကာကွယ်ရေးတပ်မတော်-မန္တလေး (MDYPDF) သတင်းနဲ့ပြန်ကြားရေးကို မြေလတ်အသံက မေးမြန်းခဲ့ပေမယ့် ပြန်လည်ဖြေကြားတာမရှိသေးပါဘူး။
၁၀၂၇ စစ်ဆင်ရေးနောက်ဆက်တွဲ ရှမ်း-မန်းစစ်ဆင်ရေးကာလ ၂၀၂၄ ဇွန်နဲ့ဇူလိုင်လတွေမှာ တော်လှန်ရေးပူးပေါင်းတပ်တွေက မန္တလေးတိုင်းထဲက မိုးကုတ်၊ သပိတ်ကျင်း၊ မတ္တရာ၊ စဥ့်ကူးမြို့နယ်နေရာအများစုကို သိမ်းပိုက်ပြီး ၁ နှစ်နီးအကြာ ထိန်းချုပ်နိုင်ခဲ့ပေမယ့် လက်ရှိမှာ သပိတ်ကျင်းမြို့ ပြန်လည်သိမ်းပိုက်ခံလိုက်ရပြီး မတ္တရာမြို့နယ်ထဲ အရေးကြီးနေရာတွေ လက်လွှတ်ထားရတာလည်း ဖြစ်ပါတယ်။
စစ်ကော်မရှင်တပ်က ဒီထိုးစစ်တွေကို စစ်မှုထမ်းသင်တန်းဆင်းတပ်သားတွေအပြင် အောင်ပင်လယ်ပျူစောထီး၊ ပြည်ကြီးတံခွန်နဲ့ ချမ်းမြသာစည်မြို့နယ်က နယ်မြေခံပျူစောထီးအဖွဲ့တွေကိုပါ အသုံးပြုတိုက်ခိုက်ခဲ့တာလို့ မြို့ခံတွေဆီက သိရပါတယ်။
သတင်း – မြတ်
2 comments
hyziygdvplxtjlepsjgyznvnriizfu
znzxhwjveyvkkjrxpmfekemrjjmwwi