မြိုင်

မြိုင်၊ မတ် ၅၊ ၂၀၂၃။

မကွေးတိုင်း၊ မြိုင်မြို့နယ်အတွင်းမှာ ပခုက္ကူအခြေစိုက် တမခ ၁၀၁ က စစ်သားတွေ ကင်းပုန်းဝပ်နေတဲ့နေရာ ၃ နေရာကို မတ်လ ၄ ရက် မနေ့က ၁ ရက်တည်းမှာတင် မိုင်း ၃ ကြိမ်ဆွဲတိုက်ခိုက်ခဲ့တယ်လို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်အဖွဲ့ဆီက သိရပါတယ်။

မနေ့ကမနက် ၈ နာရီ ၄၅ မိနစ်ကနေ ညနေ ၃ နာရီအတွင်း ပေါက်ပြင်းကျေးရွာ၊ သံပုရာခြံကျေးရွာအနီးနဲ့ မြိုင်မြို့ပြင်ဈေးဝန်း စတဲ့ ၃ နေရာမှာ ကင်းပုန်ဝပ်နေတဲ့စစ်သားတွေကို တိုက်ခိုက်ခဲ့တာလို့ ဆိုပါတယ်။

“၈ နာရီ ၄၅ မိနစ်ဝန်းကျင်မှာ မြိုင်မြို့အရှေ့ဘက်ပေါက်ပြင်းရွာမှာ ကင်းပုန်းဝတ်လာတဲ့ *၃ ကောင်ကိုတကြိမ် မိုင်းဆွဲခဲ့ပြီး၊ နေ့ခင်း ၂ နာရီ ၂၅ မိနစ်လောက်မှာ မြိုင်အရှေ့ဘက်၊ သံပုရာခြံကျေးရွာ၊ အခွန်လွတ်ဈေးနေရာမှာ တကြိမ်၊ နောက်ထပ် ဈေးဝန်းအတွင်းထဲမှာပဲ ပေပါမိုင်းအကြီးနဲ့တကြိမ် စုစုပေါင်း ၃ ကြိမ် မိုင်းဆွဲခဲ့တယ်” လို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ်မှ ဗိုလ်လက်ယာက ပြောပါတယ်။

မိုင်းကြီး ၂ လုံးနဲ့ ပေပါမိုင်း ၁ လုံးတို့ အသုံးပြုတိုက်ခိုက်ခဲ့တာကြောင့် စစ်သား ၉ ဦး သေဆုံးခဲ့တယ်လို့ ဆိုပေမယ့် ဒီသေဆုံးမှုနဲ့ပက်သက်ပြီး မြေလတ်အသံကသီးခြားအတည်မပြုနိုင်သေးပါဘူး။

ဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့-မြိုင်မြို့နယ်(မြိုင် ပကဖ)ရဲ့ ဗိုလ်လင်းမြွေက ဦးဆောင်တိုက်ခိုက်ခဲ့တာလည်း ဖြစ်ပါတယ်။

ပြီးခဲ့တဲ့ မတ်လ ၂ ရက်ကလည်း မြိုင်မြို့နယ်အတွင်းရှိစစ်ကောင်စီတပ်သားတွေကို ပြည်သူ့ကာကွယ်ရေးတပ်ဖွဲ့-မြိုင်မြို့နယ်အဖွဲ့က မိုင်း ၄ ကြိမ်ဆွဲတိုက်ခိုက်ခဲ့ရာ စစ်သား ၁ ဦး‌ သေဆုံးခဲ့ပါသေးတယ်။

မြိုင်၊ ဖေဖော်ဝါရီ ၂၅၊ ၂၀၂၃။

မကွေးတိုင်း၊ မြိုင်မြို့နယ်မြောက်ပိုင်း မကြီးကန်ရွာမှာရှိတဲ့ ရပ်ရွာက ဝိုင်းဝန်းဖွင့်လှစ်ထားတဲ့ ကိုယ်ထူကိုယ်ထ စာသင်ကျောင်းကို လေကြောင်းနဲ့ လာပစ်သွားလို့ ကျောင်းကတော့ ပျက်စီးမှုများတယ်လို့ သိရပါတယ်။

ဖေဖော်ဝါရီ ၂၅ ရက်နေ့ ဒီကနေ့ မနက် ၁၀ နာရီလောက်က ကလေးတွေ စာသင်နေချိန် ကျောင်းကိုပဲ သီးသန့်ဦးတည်ကာ ၁၅ မိနစ်ဝန်းကျင်လောက် ပစ်ခတ်သွားတယ်လို့ ဆိုပါတယ်။

“Location တည့်တည့်ကို ထုသွားတာ၊ ကလေးတွေက စာသင်နေတာရှိတယ်။ ကလေးတွေက ခုံအောက်တွေမှာ ပုန်းနေတာဆိုတော့ မမှန်လိုက်ဘူး။ ဘာလို့ဆို ကလေးတွေက အနောက်ခြမ်းမှာ ရောက်နေတာ အရှေ့ခြမ်းကို ထုသွားတာ။ မိဘတွေက လေယာဉ်လာတာကို သိတယ်။ အထဲက ကလေးတွေနဲ့ ဆူညံနေတော့ ဆရာမတွေက မသိဘူး။ မိဘတွေက ကိုယ့်ဆီကို ပစ်တာမဟုတ်ဘူး‌‌ဆိုပြီး ထိုင်ကြည့်နေကြတာ။ အပစ်ခံရမှ ဆရာတွေက ကလေးတွေကိုလည်း မထွက်တော့နဲ့ မထူးဘူးဆိုပြီး အနောက်စပ်က ခုံတွေအောက် ကုပ်နေတာ” လို့ ဒေသခံရွာသားတဦးက ပြောပါတယ်။

လေကြောင်းနဲ့ပစ်လို့ စာသင်ကျောင်းဆောင်ရဲ့ အရှေ့ခြမ်းကတော့ လက်နက်ကြီးနဲ့ စက်လက် ထိမှန်ကာ ပျက်စီးခဲ့ပြီး၊ စာသင်ကျောင်း မြောက်ဘက်က အိမ်မှာရှိတဲ့ နွားတွေလည်း ထိမှန်ကာ ၁ ကောင် သေသွားတယ်လို့ သိရပါတယ်။

အဆိုပါ စာသင်ကျောင်းဟာ ရွာထဲမှာရှိတဲ့ ၁၀ တန်း အောင်ထားပြီး စာသင်တတ်တဲ့သူတွေကနေ ကလေးတွေကို ပညာရေးနဲ့ဝေးမှာဆိုးလို့ ပြန်သင်ကြားပေးနေတာဖြစ်ပြီး NUG စာသင်ကျောင်း မဟုတ်ဘူးလို့ ဆိုပါတယ်။

“ဘယ်လို ပြောရမှန်းကို မသိဘူး။ ရွာသေးသေးလေး ဘာမှလည်း အထင်ကရ မဟုတ်ဘူး။ ဆရာ ဆရာမတွေ ဆိုတာကလည်း ဟိုလို CDM တွေ မဟုတ်ပါဘူးဗျာ။ ဆယ်တန်းအောင်လေးတွေ၊ တချို့ကျ ဆယ်တန်းတောင် မအောင်သေးဘူး။ အမကနေ ကိုယ့်မောင်လေး ညမလေးတွေကို ပြန်စာပြသလိုပေါ့။ ရွာထဲက သင်ပြနေတဲ့ ကလေးတွေ၊ အဲ့လိုမှ မသင်လည်း ကျတော်တို့ ကလေးတွေက ဘယ်နှယ့် လုပ်တော့မှာလဲ။ ဒါကိုထုသွားတာ။” လို့ ဒေသခံတဦးက ပြောပါတယ်။

အဆိုပါ ရဟတ်ယာဉ်ဟာ ဗဟင်းကျေးရွာအုပ်စုက မကြီးကန်ရွာကို ပစ်ခတ်ပြီးနောက် မြိုင်အနောက်ဘက်က မကြီးကန်ရွာဘက်ကိုလည်း ဆက်လက်ပစ်ခတ်သွားတယ်လို့ သိရပါတယ်။

ပြီးခဲ့တဲ့ ဇန်နဝါရီလ ၂၁ ရက်နေ့တုန်းကလည်း ဗဟင်းရွာမှာရှိတဲ့ ကျေးလက်ဆေးပေးခန်းကို လေကြောင်းနဲ့ပစ်ခတ်ခဲ့လို့ ဆေးရုံနားက အိမ်မှာနေထိုင်တဲ့ အမျိုးသမီးတဦး ထိမှန်သေဆုံးခဲ့ပါသေးတယ်။

မကွေး၊ ဖေဖော်ဝါရီ ၁၅၊ ၂၀၂၃။

မကွေးတိုင်း၊ မြိုင်မြို့နယ်၊ ဝက်ပုတ်ကျေးရွာမှာ အခြေချတပ်စွဲထားတဲ့ စစ်သားနဲ့ပျူတွေက မိုင်ဝက်သာသာဝေးတဲ့ ကျွဲတွင်းကျေးရွာကို တိုက်ပွဲမဖြစ်ပဲ လက်နက်ကြီးနဲ့ပစ်ခတ်လို့ တိရိစ္ဆာန်အချို့ထိမှန် သေဆုံးခဲ့သလို ရွာသားတွေလည်း ထွက်ပြေးတိမ်းရှောင်ခဲ့ရပါတယ်။

ဖေဖော်ဝါရီလ ၁၄ ရက်မနေ့ကညနေ ၅ နာရီကျော်လောက်မှာ လက်နက်ကြီးနဲ့ ၈ ချက်ခန့်ပစ်ခတ်ခဲ့ရာ ဒေသခံတွေကိုတော့ မထိခိုက်ပဲ နွား ၂ ကေင်ကတော့ ကျည်ထိမှန်သေဆုံးခဲ့တယ်လို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်မှ ဗိုလ်လက်ယာက ပြောပါတယ်။

“ဒေသခံတွေ ထွက်ပြေးတိမ်းရှောင်နေရတယ်လို့ သိရပါတယ်။ စစ်ကောင်စီတပ်သားတွေက တိုက်ပွဲမဖြစ်ပဲ ၆၀ မမ လက်နက်ကြီးနဲ့ ၈ ချက်ပစ်ခတ်တာ၊ အသံကြားလို့ ပြည်သူကတော့ တိမ်းရှောင်နိုင်ပြီး တိရစ္ဆာန်တွေ ထိသွားတယ်။ ပစ်ခတ်ခဲ့တာကြောင့် နွား ၂ ကောင်သေပြီး ၁ ကောင် ဒဏ်ရာရတယ်” လို့ ပြောပါတယ်။

ပခုက္ကူအခြေစိုက် တမခ ၁၀၁၊ ရေစကြိုအခြေစိုက် ခလရ ၂၅၈ က စစ်သားတွေနဲ့ ဝက်ပုတ်ရွာက ပျူစောထီးတွေ ပူးပေါင်းပြီး ခုလိုပစ်ခတ်ခဲ့တာဖြစ်သလို ခုလိုပစ်ခတ်လို့ အိမ်ခြေ ၂၀၀ ဝန်းကျင်ရှိတဲ့ ကျွဲတွင်းရွာက ဒေသခံ ၄၀၀ လောက်က ရွာကနေထွက်ပြေးနေရတယ်လို့ ဆိုပါတယ်။

ခုလက်ရှိမှာလည်း အဆိုပါစစ်အုပ်စုဟာ မြိုင်နယ်အတွင်း စစ်ကြောင်းထိုးဖို့ ပြင်ဆင်နေတယ်လို့ သိရပါတယ်။

မကွေး၊ ဖေဖော်ဝါရီ ၁၂၊ ၂၀၂၃။

မကွေးတိုင်း၊ မြိုင်မြို့‌၊ အမှတ် ၁ ရပ်ကွက်ရှိ ပျူစောထီးခေါင်းဆောင်နေအိမ်ကို ဒေသခံကာကွယ်ရေးတပ်တွေက မိုင်းထောင်ခွဲခဲ့ပြီး အဲ့ဒီပေါက်ကွဲမှုကိုလာစစ်ဆေးတဲ့ စစ်သားနဲ့ပျူစောထီးအဖွဲ့တွေကိုပါ လက်ကျန်မိုင်းနဲ့ ထပ်မံတိုက်ခိုက်ခဲ့တယ်လို့ သိရပါတယ်။

ပျူခေါင်းဆောင် ကိုထိန်လင်းရဲ့နေအိမ်မှာ ဖေဖော်ဝါရီလ ၁၂ ရက်ဒီမနက် ၃ နာရီလောက်မှာ ဖောက်ခွဲခဲ့ပြီးနောက် ညနေ ၃ နာရီလောက်မှ စစ်ဆေးဖို့လာတဲ့ စစ်သားနဲ့ပျူ ၈ ဦးဝန်းကျင်ကို ထပ်မံတိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ် ဗိုလ်လက်ယာက ပြောပါတယ်။

“ကျနော်တို့ လွန်ခဲ့တဲ့ ၂ ရက်က မြိုင်မြို့ပေါ် အမှတ် ၁ ရပ်ကွက်မှာရှိတဲ့ ပျူစောထီးခေါင်းဆောင်နေအိမ်ကို မိုင်း ၂ လုံးထောင်ထားခဲ့တာ၊ ဒီနေ့မနက် ၃ နာရီ ၄၅ မိနစ်မှာ ဟန်ပြ ၁ လုံးခွဲလိုက်တယ်၊ မိုင်းပေါက်ကွဲပြီး ဒီနေ့ညနေ ၃ နာရီ ၁၅ မိနစ်မှာ စစ်သားနဲ့ပျူတွေ လာစစ်တဲ့အချိန် ထပ်ခွဲလိုက်တယ်၊ မိုင်းပေါက်ကွဲပြီး စစ်သား ၁ ဦး သေဆုံးပြီး ၂ ဦး ဒဏ်ရာရတယ်” လို့ ပြောပါတယ်။

ဒီထိခိုက်သေဆုံးမှုတွေကို ဒေသခံတွေရဲ့ပြောပြချက်အရ အတည်ပြုနိုင်ခဲ့တယ်လို့ ကာကွယ်ရေးရဲဘော်တွေက ဆိုပေမယ့် မြေလတ်အသံက သီးခြားအတည်မပြုနိုင်သေးပါဘူး။

လက်ရှိအချိန်ထိ ပျူခေါင်းဆောင် ကိုထိန်လင်းရဲ့နေအိမ်မှာစစ်ကောင်စီတပ်တွေရှိနေပြီး ဘေးပတ်ဝန်းကျင်က နေအိမ်အချို့ကိုလည်း မီးရှို့နေတယ်လို့ဒေသခံတွေဆီက သိရပါတယ်။

ပြီးခဲ့တဲ့ဖေဖော်ဝါရီလ ၁၁ ရက်ကလည်း ပခုက္ကူခရိုင်၊ မြစ်ခြေ စစ်ကောင်စီမွေးမြူရေးတပ်စခန်းကို ပြည်သူ့ကာကွယ်ရေးတပ်ဖွဲ့ – မြိုင်မြို့နယ်အဖွဲ့နဲ့ မဟာမိတ်အဖွဲ့တွေက ဝင်ရောက်စီးနင်းတိုက်ခိုက်ခဲ့ရာ အရာရှိ ၂ ဦးအပါအဝင် ၇ ဦးသေဆုံးပြီး ၃ ဦး အရှင်ဖမ်းမိခဲ့တယ်လို့ သိရပါတယ်။

မကွေး၊ ဇန်နဝါရီ ၂၄၊ ၂၀၂၃။

မကွေးတိုင်း၊ ပခုက္ကူမြို့မှ Well-2 ရေနံမြေစခန်းကို စစ်ကောင်စီရိက္ခာပို့ယာဉ်တန်းရဲ့ ရှေ့ပြေးခြေလျင်တပ်သားတွေကို ကိုင်းတောမရဲစခန်းနဲ့ Well-2 ရေနံမြေစခန်းအကြား ဒေသခံကာကွယ်ရေးတပ်တွေက မိုင်း ၁၅ လုံးဆွဲတိုက်ခိုက်ခဲ့ရာ စစ်သား ၂၀ ဦးသေဆုံးခဲ့တယ်လို့ သိရပါတယ်။

ခြေလျင်အင်အား ၅၀ ကျော်ပါတဲ့ စစ်ကောင်စီတပ်တွေကို မြိုင်မြို့နယ်၊ ကိုင်းတောမရဲစခန်းနဲ့ Well-2 ရေနံမြေစခန်းအကြား ဇန်နဝါရီလ ၂၃ ရက်၊ ညနေ ၃ နာရီဝန်းကျင်မှာ မိုင်းဆွဲတိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ် ဗိုလ်လက်ယာက ပြောပါတယ်။

“သူတို့ဖြန့်ထွက်လာတာမှာ ကျနော်တို့ဆင်ထားတဲ့မိုင်းတွေအပေါ်အရောက်မှာ ဆွဲလိုက်တာ၊ သေဆုံး ၂၀ လောက်ရှိတယ်၊ မိုင်းထိလို့ ဖောကား‌ ၃ စီးလောက်နဲ့ လာသယ်သွားတယ်၊ ပခုက္ကူ တပ်မ ၁၀၁ ထဲက ဖောကား ၆ စီးနဲ့ထွက်လာတဲ့ စစ်သားတွေ” လို့ ဗိုလ်လက်ယာက ပြောပါတယ်။

အဲဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့-မြိုင်မြို့နယ် တပ်ခွဲ-၁၊ တပ်ခွဲ -၄( စင်္ကြာ) ၊ မုန်တိုင်းတပ်ဖွဲ့ နဲ့ MUGDF တပ်ဖွဲ့တို့ပူးပေါင်းလုပ်ဆောင်ခဲ့တယ်လို့ဆို့ပါတယ်။

ပြီးခဲ့တဲ့ ဇန်နဝါရီလ ၂၂ ရက်ကလည်း မြိုင်မြို့နယ်၊ တွင်းမကျေးရွာအနား ကင်းပုန်းဝပ်နေတဲ့ စစ်အုပ်စုကို ပြည်သူ့ကာကွယ်ရေးတပ်ဖွဲ့ – မြိုင်မြို့နယ်အဖွဲ့က Drone နဲ့ ဗုံးကြဲခဲ့ရာ စစ်သား ၂ ဦး ဒဏ်ရာရခဲ့တယ်လို့ သိရပါတယ်။

မကွေး၊ ဒီဇင်ဘာ ၃၀၊ ၂၀၂၂။

မကွေးတိုင်း၊ မြိုင်မြို့နယ်ထဲရှိ ကျေးရွာ ၃ ရွာက နေအိမ်အချို့ကို စစ်ကောင်စီတပ်သားတွေနဲ့ ပျူစောထီးတွေက ဒီဇင်ဘာလ ၂၉ ရက်နဲ့ ၃၀ ရက်အတွင်း မီးရှို့ဖျက်ဆီးခဲ့တာကြောင့် နေအိမ် ၁၃၄ လုံးပြာကျ ပျက်စီးခဲ့တယ်လို့ သိရပါတယ်။

အဲဒီစစ်အုပ်စုဟာ ဒီဇင်ဘာလ ၂၉ ရက်နေ့လည် ၂ နာရီလောက်မှာ အိမ်ခြေ ၁၀၀ ခန့်ရှိတဲ့ ကန်နက်ရွာကို မီးရှို့ခဲ့တာကြောင့် အိမ်ခြေ ၂၈ လုံး ပျက်စီးခဲ့သလို ဒီဇင်ဘာလ ၃၀ ရက်ဒီကနေ့မနက် ၄ နာရီဝန်းကျင်မှာလည်း အိမ်ခြေ ၃၀၀ ခန့်ရှိတဲ့အိုးဘိုရွာကို မီးရှို့ခဲ့တာကြောင့် အိမ်ခြေ ၇၀ လုံးပျက်စီးသွားခဲ့တယ်လို့ နွေဦးတော်လှန်ရေး – မြိုင်မြို့မှ တာဝန်ရှိသူတဦးက ပြောပါတယ်။

“ဒီစစ်ကောင်စီတွေနဲ့ ပျူတွေက မနေ့ကဆိုရင် မန်ကျည်းလေးပင်ရွာကို စပြီးတော့ မီးရှို့တယ်။ ပြီးတော့ ကန်နက်ရွာကို မီးရှို့တယ်။ အဲဒီကနေ အိုးဘိုရွာကိုဝင်ပြီး ညအိပ်တယ်။ မနက်ရောက်တော့ အိမ်တွေကို မီးရှို့တော့တာပဲ။ မီးရှို့ပြီးတော့ အဲဒီကောင်တွေက ၁၂ နာရီလောက်မှာ ပြန်ထွက်သွားတယ်။ အခုတော့ မီးရှို့ခံရွာတွေကို ကာကွယ်ရေးတပ်ဖွဲ့တွေက ရှင်းလင်းရေးလုပ်ပေးနေကြတယ်” လို့ဆိုပါတယ်။

ဒါ့အပြင် အဲ့ဒီစစ်အုပ်စုဟာ ဒီဇင်ဘာလ ၂၉ ရက်မနေ့ကမနက်ပိုင်းမှာလည်း အင်အား ၁၀၀ ဝန်းကျင်နဲ့ မန်ကျည်းလေးပင်ကျေးရွာမှ အိမ်ခြေ ၃၆ လုံးကို မီးရှို့ခဲ့ကြသေးတယ်လို့ အထက်ပါတာဝန်ရှိသူက ဆက်ပြောပါတယ်။

“မနေ့က မီးရှို့ခံရတဲ့ မန်ကျည်းလေးပင်ရွာမှာ အိမ် ၃၆ လုံး ပျက်စီးသွားတယ်။ စကစတွေက တရွာဝင်တရွာထွက် မီးရှို့နေတာ။ တိုက်ပွဲမဖြစ်ဘဲနဲ့ အကြောင်းမဲ့ရှို့နေတာ။ အခုမီးရှို့တဲ့ ပျူတွေနဲ့စကစတွေက ကန်နီပျူစခန်းကို ဝင်သွားကြပြီ” လို့ ဆိုပါတယ်။

အခုနှစ် စက်တင်ဘာ ၅ ရက်မှာလည်း ကန်နီရွာကပျူတွေနဲ့ စစ်ကောင်စီတပ်သားတွေ ပူးပေါင်းပြီးတော့ ကန်နက်ရွာက နေအိမ် ၂ လုံး၊ အိုးဘိုရွာက နေအိမ် ၁၄ လုံး၊ စုစုပေါင်း ၁၆ လုံး ပထမအကြိမ် မီးရှို့ ဖျက်ဆီးခဲ့ကြသေးတယ်လို့ သိရပါတယ်။

မကွေးတိုင်းဒေသကြီးအတွင်းမှာ စစ်တပ်အာဏာသိမ်းတဲ့ ၂၀၂၁ ခုနှစ်၊ ဖေဖော်ဝါရီ ၁ ရက်ကစပြီး ၂၀၂၂ ခုနှစ်၊ နိုဝင်ဘာ ၃၀ ရက်အထိ စစ်ကောင်စီတပ်တွေက အိမ်ခြေ ၇,၈၁၈ လုံး မီးရှို့ဖျက်ဆီးခဲ့တယ်လို့ Data For Myanmar က ဒီဇင်ဘာ ၁၀ ရက်မှာ ထုတ်ပြန်ထားပါတယ်